TBP Balochi

بلوچ لبریشن آرمی راجی آجوئی ءِ راہ ءَ نمیران بوتگیں سنگت منیر بلوچ ءُ سنگت زاھر بلوچ ءَ دروت ندر کنت –

جارکش ءَ گوشتگ کہ بی ایل اے ءِ دلیریں سرمچار منیر بلوچ پنام ءِ عبداللہ 5 مئی دوھزار ءُ بیست ءُ پنچ ءَ یک مشنے ءِ وھد ءَ دگ ءِ وئیلے ءَ نمیران بوتگ – سنگت منیر بلوچ پنام ءِ عبداللہ ء رشید بلوچ ءِ سیادی کیچ ءِ دمگ دشت شولی ءَ بیتگ – آ سال دوھزار ءُ سیزدہ ءَ بلوچ راجی آجوئی ءِ جھد ءَ بندوک بوتگ، آئی ءَ دشت ءُ تلار ءَ جوانیں وڑے ءَ وتی کرد پیلو کتگ آئی ءِ یک براتے سنیر بلوچ ھم راجی آجوئی ءِ جھد ءِ راہ ءَ نمیران بوتگ –

سنگت منیر بلوچ یکشلیں جھدے چیدگے بوتگ، آئی ءَ وتی زند ءِ شپ ءُ روچ راجی آجوئی ءِ ھاتر ءَ ندر کُتگ ءُ گڈی ساہ ءَ تاں وتی کرد ءَ پیلو کنگ ءَ بوتگ –

نمیرانیں سنگت ظاہر بلوچ پنام ءِ مُلا، یک دسمبر 2023 ءَ پنجگور ءِ دمگ گرمکان ءَ زورگریں پوج ءُ وتگڑیں کشندہ ٹولی ءِ گوم ءَ جنگ دیان ءَ نمیران بوتگ – سنگت ظاہر ء عبدالصمد ءِ سیادی پنجگور دمگ وشبود ءَ بوتگ – آ سال دوھزار ءُ ھبدہ ءَ بلوچ لبریشن آرمی ءَ گوں بندوک بوتگ ءُ راجی آجوئی ءِ ھاتر ءَ وتی جوانیں کرد ءِ پیلو کتگ – نمیرانیں ظاہر بلوچ ءِ نمیرانی ءَ پد آئی ءِ نمیرانی ءَ ھال بی ایل اے ءَ گل ءِ رازداری ءِ رِد ءَ چیر داتگ پرچاکہ آ ھما مشن ءِ بھر بوتگ آ سرجم کنگ بہ بیت –

نمیرانءِ سنگت ظاہر یک جوان ءُ تمرد آجوئی ءِ زانشت ءَ سر ریچیں سنگتے بوتگ ، آئی ءِ سادگی ءُ راجی باسمائی ءَ یکتائیں سنگتے بوتگ –

جارکش ءَ گوشتگ کہ ھردو سرمچار نمیرانیں سنگت منیر ءُ ظاہر بلوچ ءَ گوں وتی ھوناں راجی زرمبش سیراپ کتگ – آیانی نمیرانی بلوچ راج ءِ یکجاھیں دیمھونی ءُ جھد ءِ رژنائیں باندات انت – بی ایل اے آیانی دیمھونی ءَ.دروت ندر کنت ءُ کول کنت کہ آیانی مشن برجاہ دارگ بیت انت –

بلوچستان ءَ پاکستانی لشکر ءِ نیمگ ءَ زورانسری بیگواھیانی درچ برجاہ انت- کہ زورانسری بیگواھی ءِ دگہ یک کیسے رپورٹ بیتگ-

ھالانی رد ءَ پاکستانی لشکر ءَ ڈندار سول دشت ءِ نندوکیں سھیل ء حاجی واحد بخش دزگیر کتگ ءُ پد ءَ بیگواہ کتگ۔

ھاندان ءِ مردماں آئی ءِ جان سلامتی ءِ لوٹ کتگ ءُ اے ترس ءِ درشانی کتگ کہ سھیل ھم چو دگہ زورانسری بیگواھیں مردمانی وڑ ءَ دروگیں انکاؤنٹر یا دروگیں کیسانی تہ ءَ ھوار کنگ ءِ گمان ھست انت۔

زانگ بہ بیت گوستگیں روچاں بلوچستان ءَ دروگیں انکاؤنٹرانی تہ ءَ بازیں بیگواھیں مردم کشف بوتگ انت کہ چریشی آماچیں کھول سک ءَ پریشان انت-

دومی نیمگ ءَ تربت ءِ دمگ چہ تجابان ءَ زورانسری بیگواہ کنگ بوتگیں دولت ء بدر یل کنگ بوتگ۔

بلوچستان ءَ زورانسری آوار جنی ءِ دْرچ اوشت آماچ نہ بیتگ، چہ گوادر ءُ ڈیرہ بگٹی ءَ دگہ لھتے زورانسری آوار جنی ءِ نشانگ کنگ بیتگ اَنت-

گیشیں ھالانی رِد ءَ چہ ڈیرہ بگٹی ءَ پی پی ایل ءِ کاردار حیدر ے جاگو ( باخلانی ) بگٹی پاکستانی پوج ءِ کارندھاں سوئی ءَ بگٹی کالونی ءِ دمگ ءَ آوار جتگ ءُ بیگواہ کتگ-

ھمے وڑ بلوچی زبان ءِ شائر ءُ ادیب بلنگور ءِ دمگ عابد ادیب ءِ کسان سالی ئیں چُک عبداللہ عابد تیاب دپی شھر چہ گوادر ءَ سلاہ بندیں مردم زورانسری بیگواہ کتگ اَنت-

کھول رِد ءَ عبداللہ کسان ءُ وانگجاہ ءَ وانگ ءَ اِنت، گوادر پولیس ءِ گور ءَ آئی ءِ زورانسری آوار جنی ءِ رپورٹ نکش کتگ بلے تنی وھدے پولیس آئی ءِ یل کنگ ءَ بے سوب بیتگ-

زانگ بہ بیت کہ چہ گوادر ءَ یک ھپتگے تنی وھدے پنچ کسان سالی ئیں بچک جتاجتائیں وھداں پاکستانی پوج ءَ زورانسری بیگواہ کتگ اَنت-

ما شھری لوگانی سر ءَ ڈرون ءِ اُرش، زھگانی زھرناکیں کُشت ءُ کوش ءُ شمالی وزیرستان ءَ پشتون چُکچینی ءِ سک باز مذمت کنیں۔ پشتون سرزمین گوستگیں بازیں مدت ءَ چہ ریاستی زُلم، زوراکی ءُ پوجی زُلم ءُ زوراکی ءِ آماچ بوتگ۔ ما اے گپ ءَ یک ھاسیں ءُ ھواریں پشتون چُکچینی یے کہ ایشی ءِ تہ ءَ ھچ وڑیں ترجمانی ءُ درشانی نیست۔

دیمتر ءَ گْوشگ بوت کہ اَنچوش کہ ریاست بلوچستان ءِ تہ ءَ بلوچ راج ءِ سر ءَ مھممیں نسل کشی ءِ پالیسی ءَ دیم ءَ برگ ءَ اِنت ھمے رنگ ءَ پشتون سرڈگارانی تہ ءَ ھم ریاستی زور ءُ زوراکی برجاہ اِنت۔

بی وائی سی ءِ گشگ اِنت کہ مرچی نہ ایوک ءَ بلوچ ءُ پشتون راج بلکیں سرجمیں دمگ ءِ مزلومیں راج ھم بدتریں ریاستی زوراکی، سیاسی سروکانی زوراکی ءَ بیگواہ کنگ، در آمیدگس ءِ کشت ءُ کوش ءُ نام نھاد آپریشن ءِ وسیلہ ءَ برجاھیں پوجی زوراکی ءِ آماچ اَنت۔ مارٹر ءِ توپان ءُ ڈرون ءِ سر ءَ شھری آبادی ءِ سر ءَ اُرش روٹین آپریشن جوڑ بوتگ انت کہ اے انسانی ھکانی سر ءَ زاھریں لگتمالی انت۔

بیان ءِ تہ ءَ گْوشت کہ مئے ھیال ءَ دراھیں مزلومیں راج یکجاہ بہ بنت ءُ ریاستی زلم ءُ زوراکی ءِ ھلاپ ءَ جُنز بہ کن اَنت۔ اے زوراکیں نزام ءَ را ایوک ءَ یکجاھیں گھگیر ءُ راجی تاکت ءِ وسیلہ ءَ ھلاس کنگ بیت۔

دودا ءِ تامر ءِ سر ءَ کسانیں چمشانکے

نبشتہ کار: ھمل نور

دی بلوچستان پوسٹ

مرچی ما اگاں بلوچ سینما ءِ گپ ءَ بہ کن ایں بلوچ سینما ءَ چینچو دیم ءَ شتگ گڑا باید اِنت ما ایشی ءِ مکابله ءَ گوں ھالی ؤوڈ ءُ بالی ؤوڈ ءِ سینمایاں گوں مکنیں گاں سینما ءَ گوں کنگ المی انت گڑا ما پاکستانی سینما ءَ گوں کت کنیں چی ءَ کہ یکیں ملک انت ۔ چوناھا اگاں مکابله ءِ ھبر کیت گڑا ما وتی تامرانی مکابله ءَ وتی کوھنیں تامراں گوں کنیں گڑا ما گشت کنیں کہ مئے بلوچ سینما ءَ چینچو دیمروی کتگ۔

انچوشکہ یک زمانگے ءَ وکار بلوچ ءُ دانش بلوچ ءِ کامیڈی تامر بیتگ اَنت پد ءَ انور گلام اے پڑ ءَ اتکگ وتی کدم ایر کتگ اَنت دگہ بازیں تامر ساچاں تامر ساچی بندات کت پد ءَ ڈاکٹر حنیپ شریپ اتک آئی ءَ بلوچی تامر ساچی رنگ کمو مٹ کت دگہ دروشمے ءَ کت-پد ءَ ڈاکٹر ھنیپ شریپ ءَ چے پد جان البلوشی ءَ وتی کدم اے پڑ ءَ ایر کت انت آئی ءَ وتی تامر زراب جوڑ کتگ اَت انچو گش اَنت زراب بلوچی ءِ پروپیشنلتریں تامر گشگ بیت دنیگا مستریں تامر ڈاکٹر ھنیپ شریپ ئیگ انت”منی پت ءَ برات نیست”جان ءَ وتی تامر بھرین ءَ سینما اسکرینگ کت پد ءَ کمو مدت ءَ رند دودا جوڑ بیت دودا اولی بلوچی سینمائی تامر گشگ بیت کہ سینما ءَ شتگ بہ بکش اِت کہ بازیں تامر ءِ تامر ساچ ءِ نام نہ گپت بلوچی تامر ءِ راجدپتر ءِ تہ ءَ اے بس کسانیں چمشانکے۔

نوں ما کا اِیں دودا تامر ءِ سر ءَ کسانیں چمشانکے دے اِیں دودا تامر ءِ کسہ ءِ جند سک شوک ات شریں جیڑھے ءِ سر ءَ اے تامر جوڑ کتگ ات تامر ءِ گپ ءُ ھبر شر ات اَنت لھتیں جاگہ ءَ اردو گپ مان ات اگاں گپ ءُ ھبر انی سر ءَ گیشتر جهد بیتیں جوانتر ات ۔ پد ءَ ازمکاری شر ات شئیب ھسن ءِ اولی رند ات آئی ءَ سک شوک ازمکاری کتگ ات شکیل مراد ءَ ھم جوانیں رنگے ءَ ازمکاری کتگ ات پلم ءِ ڈائریکشن سک شوک لاجواب انت ۔

ڈائریکشن ءِ بارو ءَ منی انچو زانگ نہ انت کہ من دودا تامر ءِ ڈائریکشن ءِ سر ءَ باز گپ جت۔ تامر ءِ سینما ٹوگراپی سک وش ات سنگتاں شوک سینما ٹوگراپی کتگ انت ۔ ایڈیٹنگ ھم شر ات۔ یک چیزے ءِ بابت ءَ من کمے گپ جنگ لوٹاں ۔

انچو گش انت کہ تامر مئے چاگرد ءِ آدینک انت بلے من دودا ءِ تہ ءَ بلوچی دود ءُ ربیدگ نہ دیت پوشاکاں بچار ھچ بلوچی نہ انت اگاں دودا تامر ءِ تہ ءَ پوشاک بلوچی بیتین اَنت منی ھیال ءَ تامر سک جوان تر بیتگ ات ، اے چشیں نیزوری یے نه انت کہ ایشاں چه تامر ءِ سر ءَ مزنیں اسرے کپتگ بلے تامر انگت بلوچی تر بیتگ ات ۔ چی ءَ کہ اگاں دری راج اے تامر ءَ بچار انت اگاں بگوش انت بلوچ ءِ پوشاک ھمیش اِنت مزنیں اسر دار اِیت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان لبریشن فرنٹ ءِ جارکش میجر گْوھرام بلوچ ءَ رسانکدر ءَ وتی شنگ کرتگیں درشان ءِ تہ ءَ گوشتگ کہ ھبدہ مئی دوھزار ءُ بیست ءُ پنچ ءَ تر ءُ گردے ءِ میان ءَ گل ءِ سینیئریں سنگت کیپٹن امجد بشام پنام شمس ساھر ءُ لیفٹینٹ صبراللہ بلوچ پنام واھگ جان سھب ءِ ھپت ءَ کیچ ءِ بنجاھی شھر تربت ءَ پاکستانی پوج ءِ مزنیں بنجل ” اصغر گیٹ ” ءَ گوں گرنیڈ لانچر ءَ اُرش کرتگ کہ آ نشانگ ءَ کپتگ اَنت۔ چریشی ءِ آسر ءَ یک کارندھے مرتگ ءُ دو ٹپی بیتگ اَنت ۔ چہ کاروائی ءَ پد دوئیں سنگت چہ اود ءَ در کپتگ اَنت کہ ریاستی پوج ءَ ڈرون سرویلنس بال داتگ کہ ڈرون ءَ سنگتانی رندگیری کتگ ءُ دژمنیں پوج ءَ دیم ءَ راہ بستگ چریشی ءِ آسر ءَ یک میڑے برجاہ بیتگ۔ داں دہ دمان ءَ برجاھیں میڑ ءَ دژمن ءِ دو کارندہ مرتگ ءُ یکے ٹپی بیتگ۔ کیپٹن امجد بشام پنام شمس ساھر ءُ لیفٹینٹ صبر اللہ پنام واحد شھید بیتگ اَنت۔

جارکش ءَ گوشتگ کہ شھید امجد بشام بلوچ کپٹن ءُ صبر اللہ بلوچ لیفٹینٹ اگدہ ءِ سر ءَ بیتگ اَنت۔ بی ایل ایف وتی شھیداں سُھرچکیں دروت ندر کنت ءُ ھمے کول ءَ کنت کہ شھیدانی کاروان راجی آجوئی ءِ گرگ ءُ بلوچستان آجوئی ءِ دروشم ءَ سر بوگ ءَ پہ ھر پیمیں دیمونی دیگ ءَ چک ءُ پد نہ بیت۔

جارکش ءَ گوشتگ کہ امجد بشام بلوچ بے کساس بودناک، سیاسی پارست ءَ مھکم ءُ باسمائیں ورنایے بیتگ۔ آئی ءِ تہ ءَ سروکی، زانشت ءُ راجی کارانی چیدگ بیتگ۔ آئی اِلمی زانشت ، ربیدگی ءُ پروپیشنل زانت ءِ کیاس داں ھمینچو بوتگ کہ اگاں آئی بہ لوٹ اِت اِیں یک آرام ءُ آسودگیں زندے گوازینتگ اَت۔ بلے امجد آسودگیں زندمان ویل کت ءُ پہ ماتیں سرڈگار ءِ آجوئی ءُ راجی شرپ ءَ گھگیری ءِ گرانیں راہ گچین کرت۔شھید امجد چہ نودربری زمانگ ءَ یک مھکم پگر ءُ بودناکی ءِ واھند بیتگ ھمے سوب ءَ آ نودربری ءُ لس مردمانی سیاست ءَ تربت ءَ ناماں بیتگ۔ دوھزار ءُ ھبدہ ءَ آ لشکری جنگ ءِ پڑ ءَ ھوار بیتگ ءُ دژمن ءِ بگیری ءَ گھگیری کاروائیاں ھوار بیتگ۔ بیست ءُ ھپت جنوری دوھزار ءُ ھبدہ ءَ پاکستانی پوج ءَ گوں برات برکت بشام ءَ زور بیگواہ کرتگ۔ ھژدہ ماہ ءِ میان ءَ زوریں بیگواھی ءَ امجد گنتریں جانی ءُ سسائی آزارانی دیمپانی کرتگ بلے آئی ءِ توکل مھکم بیتگ۔ آ بیست ءُ نُھ جولائی دوھزار ءُ ھژدہ ءَ آجو بیتگ آئی ءِ جان چہ آزاراں نزور بیتگ، بلے آئی ءِ دل چہ تُرس ءَ آجو بیتگ لھتیں روچانی میان ءَ پد ءَ آجوئی زرمبشت ءِ بھر بیتگ۔ یل بوگ ءَ پد آئی ءَ پد ءَ شھر ءَ گھگیری کرد برجاہ داشتگ اَنت۔ مئی دوھزار ءُ بیست ءُ دو ءَ یک کاروائی یے ءِ میان ءَ ریاستی پوج ءَ انگر کرتگ اَت بلے امجد بشام گوں جوانمردی ءُ پوجی بودناکی ءَ بے ترس ءَ دژمن ءِ انگیر ءِ پروشگ ءُ در آیگ ءَ سوبین بیتگ۔

جارکش ءَ گوشتگ کہ آ تربت زانشتجاہ ءِ کمپیوٹر سائنس بھرگ ءَ بی ایس ءِ گڈی سمسٹر ءِ نودربر بیتگ ءُ گوں ایشی ءَ ھوار یک درسرکاری وانگجاھے ءَ انگریزی زبان ءُ کمپیوٹر ءِ ھیل دیگ ءِ پرز ءَ پیلو کنگ ءَ بیتگ۔ آئی ءِ زاتی زانشت، راجی کار، دیمونی ءُ نہ ترسی ءِ یک سرجمیں بابے اَت۔

جارکش ءَ گوشتگ کہ شھید صبر اللہ بلوچ یک بے تواریں سنگتے بیتگ بلے مھکم توکل ءُ راستیں سنگتے بیتگ آ کسان امری ءَ ھم گوں راجی زرمبشت ءَ ھمگرنچ بیتگ۔ 2021 ءَ آ گل ءَ ھوار بیتگ ءُ زوت گل ءُ لس مردمی نیٹ ورک ءَ جوانیں کردے پیلو کرتگ۔ چہ آئی ءِ بودناکی، سنگینی ءُ گل ءِ زانشت ءَ آئی ءَ کسانیں وھدے ءِ تہ ءَ گوں ھما مردماں ھوار کرتگ کہ آیانی سر ءَ نہ تھا ءَ ستک کنگ بیت کرد ءُ رازداری ءِ زمہ واری ھم دیگ بیتگ۔

جارکش ءَ گوشتگ کہ دوھزار ءُ بیست ءُ سے ءِ میان ءَ آ ریاستی پوج ءِ چمانی تہ ءَ اتکگ آ مزنیں ترسے ءِ دیمپان بیتگ۔ بلے صبر اللہ ءَ پدکنز ءُ بے توار بوگ ءَ ابید گھگیری ءِ راہ گچین کرتگ۔ آ راجی پُرکاریاں چہ درکپتگ ءُ سلاہ بندیں گھگیری ءِ لڑ ءَ ھوار بیتگ ءُ نوکیں لڑا جنگی پرز ءِ پیلو کنگ ءَ بیتگ۔ آ سک چیریں ءُ مزنیں کارانی بھر بیتگ ءُ یک مزنیں وھدے ءَ دژمن تاوان داتگ ءُ جتاجتائیں ھنداں کار ءَ بیتگ۔

جارکش ءَ گوشتگ کہ صبر اللہ یک سکیں مھکم توکلیں سنگتے بیتگ۔ آ زاتی نام ءُ ستا ءِ لوٹوک نہ بیتگ بلکیں گوں آجوئی ءِ مول ءَ ھمگرنچ ءُ لیکہ ءِ راستی ءِ سر ءَ سدک بیتگ، گوں توکل ءُ جوانمردی ءَ داں گڈی ءَ دم ءَ جھد کنگ ءَ بیتگ۔

جارکش میجر گھرام بلوچ ءَ گوشتگ کہ چہ ھمبلانی شھیدی ءَ گل ءَ نہ ترس ءُ پرز شناسیں ھمبلانی تاوان بیتگ۔ بلے آیانی دیمونی پہ مئے جھد ءَ ھما رژنائیں چراگ اَنت پہ آھوکیں پدریچاں رھشونی ءِ بنشون جوڑ بنت۔

چہ ھب ءَ سربوتگیں ھالانی رِد ءَ پولیس ءُ لس مردمی پوشاک گوریں کارمنداں لاسی دگ ءِ مسلم وانگجاہ ءَ بیڑ بُرتگ ءُ چہ چکاس ھال ءَ چاگردی باسک ءُ بلوچ یکجھتی کمیٹی ءَ سیادی داروکیں باسک ماھزیب بلوچ دزگیر کنگ ءِ جھد کتگ –

چم دیستیں شاھدانی رِد ءَ پولیس ءُ لس مردمی پوشاک گوریں کارمنداں چکاس ھال چپ ءُ چاگرد ءَ انگر کُتگ ءُ ماھزیب بلوچ دزگیر کنگ ءِ جھد کتگ، بلے پدا ھم ایندگہ نودربر ءُ ماسٹرانی کمک ءَ ماھزیب برگ ءَ نہ اشتگ –

پولیس نیمگ ءَ چکاس ھال ءِ واکدار پیسر ءَ ھال دیگ بوتگ انت ماھزیب بلوچ ءِ بگیری ءَ تِری ایم پی او (مینٹیننس آف پبلک آرڈر) ءِ رِد ءَ مقدمہ نبشتہ انت –

زانگ بہ بیت ماھزیب بلوچ زورانسری آوار جنگ بوتگیں سیاسی باسک راشد حسین ءِ گھار زتگ انت، ءُ آئی ءَ راشد ءِ یل کنگ ءَ ھوار بلوچستان ءَ زورانسری آوارجنیانی بگیری ءَ کراچی ءُ ھب ءَ بلوچ یکجھتی کمیٹی چیر دستی ءَ زھرشانیاں کار کتگ – آ چدوپیسر آ باز براں دزگیر ھم کنگ بوتگ –

ماھزیب بلوچ ءِ رِد ءَ واکداراں دزگیری ءِ وھد ءَ آ بیھار داتگ ءُ گوشتگ کہ اگاں آ بلوچ یکجھتی کمیٹی ءِ پلیٹ فارم ءَ کار کنگ ءَ دیست گڈا نشانگ کنگ بیت ءُ ھمے امر مناں ایپ بی آر ءِ نیمگ ءَ ٹءکس نوٹس ھم دیم دیگ بوتگ –

آئی ءَ گوشتگ کہ تنی وھدی مناں ھژدہ سال ھم سرجم نہ ایں ءُ ناکہ ھچبر ٹیکس ریونیو ءَ رجسٹر کنائیں اِتگ ءُ ناکہ منی گور ءَ انچو جائیداد ھست کہ ٹیکس بدیاں، بلے پدا ھم اے درسیں سرءُ پُر ءُ منی سیم کارڈ ءِ بند کنگ ءُ منی ترءُ تاب ءِ ھمراھی ءَ مناں تُرسینگ ءِ جھد کنگ بوگ ءَ انت –

آئی ءَ گوشتگ کہ مئے لوٹ ریاست ءِ رھبندانی رِد ءَ انت ،پُرایمنیں زھرشانی مئے ھک ایں ءُ ما وتی دوستیگیں مردمانی یل کنائینگ ءِ ھاتر ءَ زھرشانی ھک ءَ کارمرز کنگ ءَ ایں –

بلوچ اسٹوڈنٹس ایکشن کمیٹی ھزدار ھنکین ءِ نیمگ ءَ چہ وش آتکی مراگشے “دم نہ بُرتگیں بلوچ ورنایانی نام ءَ” برجم دارگ بوتگ-

شنگ بیتگیں درشان ءَ گوشگ بیتگ کہ مراگش جتا جتائیں بھرانی توک ءَ تران ، پینل ڈسکشن ، پٹ ءُ پولی تاک، کتاب میڑہ، بلوچی چاپ، ڈاکومنٹری، شَیر ءُ شائری ءَ ھوار ساز ءُ زیملی بھر ھوار بوتگ اَنت۔

بساک ءَ وتی شنگ کتگیں درشان ءَ گوشتگ مراگش ءِ ھاسیں مھمان بنجاھی سنگت اُزیر بلوچ ءُ جویریہ بلوچ بیتگ اَنت۔ دیوان ءِ بندات چہ بلوچ راجی سوت ءَ کنگ بوتگ ءُ چہ ایشی ءَ پد دو پٹ ءُ پولی تاک یکے رسانکدر ءِ سرھال ءَ جویریہ بلوچ ءَ ءُ دومی بلوچستان کتاب کاروان ءِ سرھال ءَ نبیل رھیم بلوچ ءَ ونت۔ ھمے پیم سَے ڈاکیومنٹری تامربند ھم پیش کنگ بوت کہ آیانی تہ ءَ نمیرانیں زاھر بلوچ ءِ سر ءَ تامربند، بلوچستان کتاب کاروان ءُ سیمی اَبدالعزیز کُرد ءُ اَبدالکریم شورش ءِ سر ءَ تامر ھوار اِت اَنت۔

شنگ بیتگیں درشان ءَ گوشگ بیتگ دیوان ءِ دومی بھر بلوچستان کتاب کاروان ءِ سر ءَ پینل ڈسکشن اَت کہ آئی ءِ مھمانداری مدسر بلوچ ءَ کُتگ ءُ مھمان سنگت مبارک بلوچ، آسپ بلوچ ءُ ریاز بلوچ بیتگ اَنت۔ سنگتاں بلوچستان کتاب کاروان مھم ءِ مکسد، ارزشت، اڈاند ءُ سوبمندی ءِ سر ءَ وتی ھیال درشان کتگ اَنت۔
مراگش ءِ دیمی بھرانی تہ ءَ گُشتانکی بھر ھوار اَت، گُشتانکارانی تہ ءَ گل ءِ بنجاھی ھالرسانی کارگشاد اُزیر بلوچ، بنجاھی کمیٹی ءِ باسک جویریہ بلوچ ءُ ھزدار ھنکین ءِ کارگشاد رمیز بلوچ ھوار بیتگ اَنت۔

شنگ بیتگیں درشان ءَ گوشگ بیتگ گل ءِ رھشوناں دم نہ بروکیں ورنایانی سر ءَ تران کنان ءَ گوشتگ کہ دم نہ بروکیں بلوچ ورنا ھما اَنت کہ وڑ وڑیں سکی، جیڑہ ءُ جنجال، اِستانی تُرس ءُ بیم، زندانی ءُ ایدگہ سکیاں پد ھم گْراونڈ ءَ اوشتوک اَنت ءُ نہ تھنا سیاسی اَمل ءِ بھر اَنت بلکیں سیاسی اَمل ءَ گیش یکجاہ ءُ بلوچستان ءِ کُنڈ کُنڈ ءَ سر کنگ ءِ جُھد ءَ اَنت۔ اے سپر زاھر ءَ بگندئے وش بہ بیت بلے وتی تہ ءَ ھمک وڑیں سکیاں پُر اِنت، بلے پہ راج ءَ جھد نہ کنگ ءِ ھزار ھَیل ءُ بھانہ ءَ یکِر تھنا یک سکینے پہ سیاسی اَمل ءَ درکار اِنت آ ھما ورنایانی ھاٹیگ ءُ مات ءُ گْوھارانی ھمت ءُ جزبگ اَنت۔ اے دم نہ بروکیں جھدکارانی برورد اِنت کہ دنیا ءِ کجام ھم کُنڈے ءَ کسے پہ پَھر وتی پجّار ءَ گوں بلوچ ءَ بندوک اَنت ءُ آئی ءَ ھم سکین رس ایت۔

شنگ بیتگیں درشان ءَ گوشگ بیتگ دیوان ءِ دومی بھر شَیر ءُگ شائری اَت کہ ورنایاں وتی شَیر ونت اَنت ءُ مراگش ءِ اتکگیں مردمانی دلگوش گْور کُت۔ ھمے پیم مراگش ءَ بلوچی چاپ ھم ھوار اَت کہ سنگتاں بلوچی سوتانی سر ءَ بلوچی چاپ جت کہ آ بلوچ ءِ دودانی زیملی بھرے۔

بساک ءَ گوشتگ مراگش ءَ بلوچستان کتاب کاروان ءِ کتاب میڑھے ھم جنگ بیتگ کہ آئی ءِ تہ ءِ سائنسی، ادبی، دپتری، سیاسی، شھزانتی، سماجی ءُ ایدگہ سرھالانی سر ءَ کتاب ایر کنگ بیتگ اَنت۔ مراگش ءِ گُڈی بھر ساز ءُ زیملی بھر بیتگ کہ آئی ءِ تہ ءَ بلوچ گُشندھاں سوت الھان کُتگ۔ دیوان ءِ سرجمیں بھرانی سوبمندی ءَ برجم دارگ ءَ پد دیوان آسر کنگ بوتگ۔

دی پروپیسر

نبشتانک :دلمراد بلوچ

رجانک: مھروز ھمّل

دی بلوچستان پوسٹ

گوستگیں روچاں تربت ءِ دمکاں یک ڈرونے دو پرپٹ سوارانی دمب ءَ کپتگ ات – ڈرون تامر ءَ ساپ ساپ ءَ گندگ بیت کہ پرپٹ سوار کدی اے دمک ءُ کدی دومی دمک ءَ پترگ ءَ انت دومی نیمگ ءَ پاکستانی پوج ءِ گاڑی یے ھم ھمے نیمگ ءَ روگ ءَ انت کہ ھمے نیمگ ءَ پرپٹ سوار روگ ءَ انت – اناگت ءَ تنکیں دمکے ءَ پرپٹ سوار چماں اندر بنت ءُ پاکستانی پوج ءِ گاڑی ھم ھما نیمگ ءَ روت –

گندگ ءَ گُش ئے اے کسانیں تامُرے، بلے اے تامر ءِ گُڈسر ءَ چو ھندی تامرانی وڑ ءَ ھیرو ءِ سوبمندی ءُ ولن ءِ مرگ ءَ تامر ھلاس نہ بیت، بلکیں کیچ وتی دو زھگاں ببا دنت – آیانی تہ ءَ یکے امجد بشام اِنت ءُ دومی سبراللہ – سبراللہ ءِ درگت ءَ من ءَ ھاسیں سرپدی نیست، بلے امجد بشام … امجد بشام ءِ مرگ ءَ منی چم وتی جاہ ءَ ھنچوش مار ایت کہ لنککانی بوگاں ارس شل ایت –

امجد بشام وانندگ، یک لیکھی سیاسی باسک، نوکتریں زانشت ءَ سرپد ءُ بی این ایم ءِ گران نھادیں مڈی یے بوتگ – وھدیکہ سال دوھزار ءُ ھبدہ ءَ پوج ءَ آ چست کتگ ات ءُ تاں سالے ءَ بازیں لٹ ءُ کُٹ ءُ ماژگی زوراکی کنگ ءَ پد یل داتگ ات گڑا من ھمے گمان کُت نوں امجد پیشی وڑ ءَ بوت نہ کنت – اے وڑیں زوراکی ءَ پد ھر وڑیں ورنا یے ءِ ھاتر ءَ پیشی وڑ ءَ بوگ ءُ نارملیں مردمے ءِ وڑ ءَ کار کنگ سک گران بیت انت –

بلے امجد ءِ واست ءَ منی شک پہ من شھماتے بوت، پرچاکہ آ پیش ءَ چہ گیشتر مھکمتر بوتگ ات – بلے پد ءَ ھم بازار ءِ تہ ءَ بوگ کہ ھمک روچ پوجی اپسرانی پون کنگ، رندگیری کنگ ءُ ھمے وڑیں جاورانی تہ ءَ یک سرپدیں مردمے ءِ ھاتر ءَ زند گوازینگ سک گران انت – ھمے سوب ات کہ امجد ءَ کوہ ءِ روگ ءِ راہ گچین کُت، کوہ ءِ روگ ءَ پد آئی ءَ گوں کم ھال ءُ اھوال بوت بلے مدامی چہ سنگتاں آئی ءِ دلیری، ایمانداری ءُ سنگتانی ھیال دارگ ءُ مھر کنگ ءِ کسہ منی وڑیں ناچیزے ءَ سربوتگ انت بلے بژن زیکیں روچ ءَ کیچ ءِ دلبند تربت ءِ دمکاں آئی ءِ کسھاں گڈی رند ءَ بال کُتگ ءُ پد ءَ مدامی ءِ ھاتر ءَ بلوچستان ءِ ارسی ئیں گوات ءِ تہ ءَ موج بوتگ انت –

امجد بلاھیں وانندگ ءُ کار کنوکیں سنگتے بوتگ – درستیں سنگتاں آئی ءِ کدر کُتگ، پہ مئے ھاتر ءَ آ بس اُستادے نہ ات آ یک لیکھے ات کہ وانگ ءَ ات، وانینگ ءَ ات، سکارینگ ءَ ات، جست ءَ ات، ءُ جنگ ءَ ات –

نمیرانیں امجد بشام بلوچ بس یک مردمے نہ ات یک باسمائیں ھوالھے ات – آ ھما کلاس، یا گل ءِ درونت جاہ ءَ وانینگ ءَ ات ، ھمود ءَ آشوبی سما ءِ رژن شھمگ ءَ ات – آئی ءِ نودربراں بس کتاب ءِ درونت، زبان یا کمپیوٹر نہ ونتگ ات، آیاں پھمگ ءِ ڈول، جست کنگ ءِ ھوسلہ ءُ راستی ءِ پجار کنگ ءِ ھُنر ھم سِک اِتگ ات –

وانینگ آئی ءَ وتی کار ناں، راج ءِ آجوئی ءِ راہ پھم اِتگ ات – آ ھما تبک ءِ نودربرے بوتگ کہ رژنا، ایمن ءُ سوبمندیں زند آئی ءِ ودار ءَ بوتگ – بلے آئی ءَ وتی اے زند ماتیں سرڈگار ءِ توارے ءَ پہ کربان کُت –

من نہ زاناں کہ بلوچ راجکاری دپتر آئی ءَ کجام نام ءَ یات کن انت، بلے آ پروپیسر اِنت – “دی پروپیسر” بس یک پنامے نہ اِنت اے آئی ءِ سما، ھیلکاری ءُ گھگیری ءِ وامدار اِنت کہ آئی ءَ امجد بشام یک مردمے ءَ چہ پگرے ءِ تہ ءَ بدل کُتگ – آئی ءَ گوں ند ءَ ھم جنگ کتگ، گوں زبان ءَ ھم ،وھدیکہ توپک ءِ چست کنگ ءِ وھد اتکگ گڑا آئی ءَ توپک چست کتگ ءُ دژمن ءِ دیم ءَ سینگ مِک کُتگ –

مروچی کہ ما آئی ءَ الوداء کنگ ءَ ایں گڑا یک اُستادے، رھشونے، سپاھیگے… ھر سَئیں ھواری ءَ اچ ما دور روگ ءَ اَنت، بس یک نامے، یاتے بچ ایت، بس یک پجارے بچ ایت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-