TBP Balochi

ریاست مئے پرزندانی سرا دروگیں کیس جنت ءُ آھاں رسانکدراں پیش داریت – ورنا پٹ ءُ میداناں تیرانی آماچ کنگ بنت پدا رند ءَ ھمے ڈرامہ کنگ بیت کہ آ پولیس یا اے ٹی ایپ ءَ گوں دیم پہ دیمی ءَ جنگ بوتگ انت- ماما قدیر بلوچ

دی بلوچستان پوسٹ

سندھ ءِ مزن شھر کراچی ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ یک سد ءُ نود ءُ پنچ روچ سرجم بوتگ –

انسانی ھکانی کمیشن چئیرمین باجی نزہت، شائین ثانیہ ءُ دگہ مردماں بنجل ءِ ترءُ تاب کرتگ ءُ بیگواھیں مردمانی کھولانی گون ءَ دلپدردی درشانتگ –

ھمے وھد ءَ وائس پار بلوچ مسنگ ہرسنز ءِ رھشون ماما قدیر بلوچ ءَ گوشتگ کہ بے گور کپن ءَ بلوچ ورناھانی لاشانی بے ھرمتی کنگ بوھگ انت – جنگل ءُ شیپ ءُ کورانی تھا مئے رھشون ءُ ڈیھے پرزند شھید کنگ چگل دئیگ بوھگ انت – ٹارچر سیلانی تھا آھانی سرا زوراکی کنگ ءَ دلے سیر نہ بیت پدا آھانی لاشانی بے ھرمتی ءَ کن انت –

آئی گوشگ ات کہ ریاست تدبیر سوجیت ءُ پدا ھما دمان ءَ مئے پرزنداں ناشرکار گوشیت ءُ دیما کاریت، آھانی سرا دروگیں کیس جنت ءُ آھاں رسانکدراں پیش داریت – ورنا پٹ ءُ میداناں تیرانی آماچ کنگ بنت پدا رند ءَ ھمے ڈرامہ کنگ بیت کہ آ پولیس یا اے ٹی ایپ گوں دیم پہ دیمی جنگ بوتگ انت ءُ آھاں گوں کالعدم گلاں گوں ھمگرنچ کن انت –

ماما قدیر بلوچ ءَ گوشتگ کہ پرایمنیں راجداری ءَ بھر زورگ مھلوکے بنکی ھک انت بلے مئے گوارا ادا راجداریں باسک آوار جنگ بیگواہ کنگ بنت، کھول سک باز مازگی نادراھی دچار بنت، شد کشیں زھرشانی بنجل پچ کنگ بیت بلے ھکومت ءِ گوش ءَ مورے نوارت، آ گنگ ءُ کر انت –

نبشانک: هسابجار ءِ گدار نویسی ءِ سپر
 
نبشتہ کار: اصغر بلوچ

دی بلوچستان پوسٹ

جوھر لال نھرو وتی سرگوست (Autobiography) نبشتہ کنت ، دگنیا ءِ تہ ءَ گرانتریں کار وتی باروا نبشتہ کنگ اِنت منی دل ءَ چد ءُ گرانتریں کار وتی سنگتے ءِ باروا نبشتہ کنگ انت ” کیہُر ” هسابجار ءِ  دومی گدار انت-

 هسا ءِ اولی گدار ” کلیر ءِ وانگ ءَ پد ، هسا ءِ گدار نویسی ءِ یک پہناتے کہ من ءَ سک دوست بوتگ ات انت؛ آ هسا ءِ کارستانی زبان ءُ گپتار ات انت –  کلیر ءِ پلاٹ سک تچک انت ، چو گیدی کسہی  رنگ ءَ یک شل ءَ دیم ءَ روان انت  ءُ هسا ءَ کارستانی امبار یے جتگ همے کارستانی بازیں سُر ءُ پُر ءُ گِر ءُ دار ءَ  کلیر ءِ کہ آ گدار ءِ  شاه کارست انت،  چیر تریت ءُ همدا وتی شاه کارست ءِ مارشتانی درانگازگ ءَ بے سوب بوتگ بلے اے یک ہنچیں باوستے کہ دیمتر ءَ اشی ءِ سرا گپ  کنگ ءِ گنجائش ودی بوت کنت  –

اسلہ منی جند همے سرپد بیت کہ هسا ءَ کلیر ءِ نبشتہ کنگ ءِ ساهت ءَ وتی کارستاں چہ گیش سرهال ءَ گوں گیش تر مہر ءُ مُحبت انت ( بوتگ ) چُش ہوں بوت کنت  کہ اے هسا ءِ یک لاشعوری جُھدے بوتگ ۔
 اے گپ ءَ هچ وڑیں شک ءِ نیست کہ منظر نگاری هسا ءَ جوانیں رنگے ءَ کُتگ البتہ دگہ یک پہناتے ” کلیر ” ءِ نزوری درا بیت،  آ هسا ءِ  پہ وتی گدار ءَ زور  بلوچی چاگرد ءَ پدّر کنگ ءَ اِنت ، ءُ همدا وانوک تکانسر بیت چیا کہ هسا تامری رنگ ءَ ازباباں پیش دارگ ءِ جُهد ءَ اِنت۔ بازیں وانوکے ءَ بلکیں هسا ءِ اے کوشست دوست بہ بیت ۔ بلے من ءَ یک وانوکے ءِ بستار ءَ دوست نہ بوتگ اَت۔ اے کار یک گدار نویسی ءِ نہ انت  کہ آ بلوچی ءُ بلوچ راجدپتر ءِ هیزک ءُ داس ءِ پہازگ ءِ زمہ واری ءَ بزوریت۔ پرچا کہ ناں گدار نویس اهوالکارے ءُ ناں گدار یک انسائیکلوپیڈیا یے گدار  ءِ اندر ءَ اے گنجائش پشت نہ کپیت کہ تو چیزاناں اے رنگ ءَ بہ درانگاز ئے ، چیریشی آسر ءَ گدار ءَ یک نزوری یے ودی بیت، آ ایش بیت کہ گدار وتی ابرمی رپتار ءَ در کئیت ؛ واکیا وتی اسل اوشت ءَ چہ گیش اوشتوک بنت۔ دومی رنگ ءَ انچش کہ بُرز ءَ نبشتہ کتگ انت ، گدار چہ منظر نگاری ءِ سیمسراں آدیم روت ءُ یک تامری رنگ ءُ دُروشمے رجیت۔ ہردیں گدار نویس اے رنگ ءَ نبشتہ بہ کنت ،گڈا آ اے دگہ واکیاهانی گوما انصاف کُت نہ کنت -اے ڈول ءَ گدار نویس یک واکیا ءِ سرا  انچو زور دنت ءُ داریت ءُ آ دگہ واکیا ڈالچار بنت۔ پہ درور  ءَ هسا ءَ گدار ” کلیر ” ءِ تہ ءَ همے بس ءَ سوار بوگ ءِ واکیا انچش داشتگ آ دیم ءَ جُنزگ ءِ وڑا نہ اَت۔ اگاں اے واکیا ءِ جند چارگ بہ بیت گڑا پلاٹ ٹہینگ ءَ پہ  ( plot Development ) اینچو هژدری نہ انت۔ پہ گدار نویس ءَ المی انت آ اے بزانت کہ کجام واکیا  ءَ چنت وهد ءُ ساهت ، چنت تاک ءُ تاکدیم بہ دنت- چیا کہ اے وڑیں واکیاهاں چہ گدار مزن بوت کنت – بلے گدار ءِ تخلیقی پہنات جهل کپیت مارا همے نزوری گدار ” کلیر ” ءَ گندگ بنت بلے هسا ءِ انوگیں گدار ءِ وانگ ءَ پد من همے چار ات کہ هسا ءَ ” کلیر ” ءُ کیہُر ءِ نبشتہ کنگ ءِ نیام ءَ یک دراجیں پندے بُرتگ هما دُراھیں نزوری کہ من ” کلیر ” ءِ درگت ءَ نشان داتگ اتاں ، آ ادا گندگ نہ بنت – اد ءَ هسا بازیں رنگ ءَ سوبمند بوتگ ۔

  کیہُر دادین ءِ کسہ انت کہ هسا ءَ سرگوستی دروشم ءَ نبشتہ کتگ گدار ءِ بامرد، شاه مرد وتی زند ءِ کسہ ءَ آرگ ءَ اِنت اے کسہ گوں دادین ءِ مات ءِ مرگ ءَ بندات بیت ۔

مات ءِ مرگ ءِ وهد ءَ دادیں طفل ءُ کسان انت آئی ءِ مات ءِ مرگ ءَ پد ، دادیں ءِ گوهار دادین ءِ گر ءُ دار ءَ کن انت – بلے بے ماتی ءُ چوروئی ءِ زند امینچک گران انت کہ کارست ءَ نادره ءُ بے تاهیر کن انت –  داں آئی ءِ سر گنوکانی نادرهجاه ءَ کپ ایت نادره جاه ءَ چہ چُٹگ ءَ پد ، دادین فکٹری ءَ کار ءَ بیت همے فکٹری ءَ دادین ءَ گوں کرشی نامیں همکارے ءَ مھر بیت بلے کرشی چہ آئی ءِ زند ءَ گار ءُ بیگواه بیت کرشی ءَ پد، دادیں گوں دگہ جنکاں دست گلائیش بیت ابید ءِ چہ اشی ءَ آ کرشی ءِ مهر ءُ محبتاں بے هال نہ بیت ۔ کرشی ءِ شوهاز آئی ءِ زند ءِ بهرے جوڑ بیت ءُ دادین ءِ سر پیر ءُ زیارتاں کپ ایت، ءُ منجاری کنت دادین زند ءِ بازیں وهدے گوازینگ ءَ پد پدا وتی هلک ءُ میتگ ءَ روت ءُ شہناز آئی ءِ زند ءَ کئیت دادین ءِ مجگ ءَ کہ یک چیزے چہ در کسانی ءَ چُش وروک ءَ وران انت ءُ کئیت ، آ زانگ لوٹ ایت کہ آئی ءِ مات ءِ مرگ ءِ سبب چے بوتگ ؟ دُرگنج ( شہناز ءِ مات ) ءِ کِسہ چی انت ؟ بلے دادین ءَ هما روچ ءَ وتی جستانی پسو رسیت کہ آ یک رندے وتی زند ءِ بڈ ءُ باراں بوجیت ءُ یک دیمے ایر کنت دیم پہ زیارت ءَ راهادگ بیت نوکی ءِ منوگرانی گشگ ءُ لیکہ اش انت کہ گدار ءَ رمسی دروشم ( Chronological order ) ءَ نبشتہ کنگ زوراکی یے باید اِنت گدار رمسی کید ءُ بنداں آجو بہ بیت اگاں ما هسا ءِ گدار ءَ نوکی ءِ باوست ءِ رد ءَ تپاسگ ءِ جهد بہ کناں سرسری بلکیں ءَ وانوکاں اے گدار رمسی  گدارے گندگ ءَ بئیت بلے هسا ءَ وتی واکیاهاں یک هم رمسی دروشم ءَ نچین نہ داتگ من اے گپ ءَ پمشکہ گُشگ ءَ اوں ، چیا کہ هسا ءَ دادین ءِ زند ءِ چندے واکیا درچتگ ءُ زُزتگ انت ءُ دومی گپ اش انت کہ هسا گدار ءَ انچیں جاهے ءَ بارت ءُ آسر کنت کہ اود ءَ هم آئی ءِ زند ءِ اڑ ءُ جیڑه سرجمی ءَ هلاس نہ انت – 

آئی ءِ کرشی ءِ شوهاز انگت نہ سرجم انت – ءُ هسا ءِ گدار ءِ آسر چُش لسی ( Traditional ) گدارانی وڑ ءَ نہ انت اے هسا ءِ سوب مندی انت ءُ ادا هسا ساڑاهگی انت ” کلیر ” ءِ پلاٹ تچک انت هچ وڑیں جهلانکی نیست ءُ هچ وڑیں جہلی ءُ بُرزی ودی نہ بیت  – کلیر ءِ سرین ءِ پُرُشگ ءَ گوں وانوک سرپد بیت کہ کلیر ءِ زند ءِ آسر کجا روت ءُ سربیت کارست ءِ اندر ءَ ہوں هچ وڑیں سُر ءُ پُر گندگ ءَ نہ ئیت پلاٹ ءِ تچک بوگ ءِ پد ءَ کارستانی تب ءُ نفس یک رنگی ءِ آماچ بوتگ انت بلے ادا کسہ آ وڑ نہ انت “کیہُر “ءِ  پلاٹ هسا ءَ چاروی detective گدارانی وڑا ساچتگ کجام واکیا کجا سرکشیت ؟ هچ زانگ نہ بیت۔ وانوک دائمی پول ( تجسس ) ءِ توکا انت هسا وتی کارستاں یکپارگی وانوک ءِ دست ءَ نہ دنت ؛ ناں کہ آهانی اندر ءِ ہر تک ءُ پہناتاں اول سرا تالان کنت مردم دیست کنت کہ بامرد دادین ءِ تب ءُ نفسیات ءَ مجتی بدلی ءُ سدلی ودی بوهان انت اے بدلی کسہ ءَ ابرمی رنگ ءُ لزتے دیئنت اسلہ هما جُست کہ آهانی پسوانی شوهاز ءَ دادین انت۔

دادین ءَ گیش وانوک هدوناک انت۔ چُش کہ( 1)مات ءِ مرگ ءِ سبب چے بوتگ ؟ (2)ماسی دُرگنج ءِ راستی چی انت ؟( 3) پت ءَ لوگ ءُ جاگہ چیا یلو کتگ انت؟(4) کرشی کجا شتگ؟( 5)کرشی دادین ءَ دو وار دپ ءَ کپیت کہ ناں؟ گدار انچو پُر پیچ انت کہ هچ چیز وانوک ءَ یکجاه دست نہ کپ انت ادا هسا ءَ  دگہ جوانی ءُ استادی یے پیش داشتگ آ اِش انت کہ  کارست ءُ آهانی نام ءَ داں هما وهد ءَ پدر نہ کنت ، ہردیں آهانی زلورت نہ انت- اشی ءِ جوانیں درورے دادین ءِ پت ءِ همراه ءُ همساهگ سازجن اِنت۔ کہ آ گدار ءَ گندگ بیت آئی ءِ هستی ءِ ارزشت هم سک باز انت بے آئی ءِ تران ءَ بازار ءِ تب ءُ  ماحول ٹہینگ ءَ نہ انت آئی ءِ سازانی ءُ شعرانی توار مئے گوشاں کپ ایت – بلے جند ءِ گدار ءَ  هچ جاہ ءَ درا نہ بیت ابید ء چہ اشی گدار ءَ آئی ءِ ارزشت سرجمی ءَ برجاه انت اے مزنیں کمالے هسا ءِ گدار نویسی ءِ دگہ شری یے اش انت کہ آ وتی کارست ءُ آوانی چپ ءُ چاگرد  ءَ جوانی ءَ سرپد انت هسا زانت کہ ہر چاگرد ءِ وتی گال ءِ گالوار ، لبز ءُ بزانت بنت اے شری هسا ءِ ہر دُک گدارانی تہ ءَ زاهر انت هسا بجار ءِ گدرانی چاگرد وتی هند ءُ دمگانی هساب ءَ تران کن انت ۔ چہ همیشی ءِ کُمک ءَ کارست یا کارستانی تب ءُ زانت درانگاز بیت ءُ کارست نا ایوکا ابرمی رنگے تالان کن انت بلکیں آ وتی هند ءُ دمگ ، اهد ءُ باری ، قوم ءُ زبان ءُ آوانی نیام ءَ آهانی دگیری یے ودی بیت همے هساب ءَ ہر کارست ءِ وتی لبز ءُ ترکیب انت دادین ءُ شہناز یکیں لوگ ءِ چُک انت بلے شہناز پہ درور ، نوکیں دور ءَ رُستگ ءُ مزن بوتگ آئی ءِ گال ءُ گالوار ، لبزانی رنگ ءُ دروشم ہر دُک مَٹ ءُ بدل انت آئی ءِ گالرد چہ دادین ءِ ساچست ءُ ترکیب ءَ چٹ جتا انت ءُ چہ اشی ءَ آئی ءِ آواز ءِ ریچ هم بدل انت ءُ اے بدلی تب ءُ لسان ، تبک ءُ زانشت ، دور ءُ باریگ ءِ دگیری یے ودی کن انت ءُ اے دگیری مانائی دروشم ءَ هواری ءَ پرک کنان انت گُڈ سرءَ من اے گُشگ لوٹاں ، اے گدار ءَ هسا ءَ تخلیقی دروشم ءَ یک مزنیں سپرے جتگ هسا ءِ زبان تامدار ءُ پُر مانا انت کہ اے وڑیں جهد وانوک ءَ ” کلیر ” ءَ کم گندگ ءَ کیت – پہ درور:
(1) بے مات ءَ زندگی سُتکگیں جنگلے ( 2)من چو ورُّودیں درچکے ءَ رُدان اتاں (3)من اتاں کہ دارانی تہ ءَ ہشکیں دارے اتاں ( 4)پہ ایوکی ءِ اوگارگ ءَ زرے بوگ لوٹگ ءَ اتاں(5) بے وسی ءِ ژیمب ءَ چہ درکپگ ءَ بے وس اتاں هسا بجار ءِ اے گدار ءِ باوست ءَ بازیں گپ ءُ تران بوت کُت کنت گُڈ سر ءَ بس همے گپاں گوں هلاس کنگ لوٹاں هسا ءَ ” کلیر ”  ءُ ” کیہُر ” ءِ میان ءَ دراجیں پندے جتگ بلے منزل انگت دیما انت هسا ءَ دگہ پندیے بُرّگی انت-
 

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: نبشتگیں دِیوال

نبشتہ کار: ڈاکٹر شکیل بلوچ

دی بلوچستان پوسٹ

کماش ءَ ھمے گپّ گُشت کہ “شَکُو چُشیں گپّ ءَ مکن کہ منی دِل سَگ اِت نہ کنت وتی چادر ئِے چَنڈ اِت ءُ دست ءِ ھَسا ئِے زُرت پاد اَتک گْوشتے کہ مات آئی ءِ مَٹّ ءَ دوبر پیداک کرت نہ کنت ساھتے ءِ بے تواریءَ پد وتی چمّ ءِ ارس ئِے پَھک کُرت اَنت ءُ یک ھیسکارگے جَتے ءُ گْوشتے کہ
“وشّیاں گْون ءُ سکّیاں ھمراہ نہ بنت”
“اِے زَر چِنیں ھمبل ھِچ کَسی دوزواہ نہ بنت”

گْوں اِے گپّ ءِ گْوشگ ءَ آ بے تواری ءَ رَھادگ بوت۔ کَماش ءِ اِے گپّ ءَ من ءَ سکّ گَمیگ کُرت من یک جْیڈگے ءِ تہ ءَ کپت اوں۔ تاں چَم چِست کُرت کماش ءِ پاد بْرمشانی توار مدان مدان گار بُوان بُوت۔

من ھم چہ لْوگ ءِ پْیشگاہ ءَ پاد اتک ءُ دیم پہ کُوچگ ءَ رھادگ بُوت آں۔ وھدے منی چَم میتگ ءِ دیوالے ءِ سر ءَ کپت گُڑا لَھتیں کْوھنیں لبز اَنگت نبشتہ اَت۔ من انچُش مار اِت کہ اِے لبز من ءَ توار دیگ ءَ اَنت ءُ بازیں جُستانی پَسّواں لْوٹگ ءَ اَنت۔ اِے اھد سازیں لَبز اَنچش بے ھاٹیگ ءُ بے وسیں دابے ءَ توار ءَ اَنت چُشکہ یک مُرگی چُورُویے وتی کُدوہ ءِ توک ءَ وتی مات ءِ ودار ءَ چِری چِری بہ کنت۔ ھمے پیم ءَ من لَبزانی بَزّگی دیست من ءَ اھدیگیں ھمبلانی ترانگاں گْور جَت، منی زیمیں دل ءِ ٹپّانی درد گْیش بوت اَنت من انچش مار اِت کہ دیوالانی سر ءِ ناسرجمیں لَبز چو مُرگی چُورو ءِ پیم ءَ ھما اھد سازیں دستانی زھیراں روچ پہ روچ جُشان اَنت مَن وھدے دیمتر ءَ رھادگ اِتاں یک شپانکے ءَ ڈِیک وارت ءُ گُشتے سنگت کُج ءَ روگ ءَ ئے بلے من اِے گپّ ءِ پسّو نہ دات ءُ پْیسر ءَ گْوشت کہ دیوالانی سر ءِ لَبزانی کِسّھاں درشان بہ کن گوں من۔

شپانک ءَ من ءَ چْو کْوھنیں دردوارے ءَ زیمیں دلے پسّو ئِے دات ءُ گُشتے کہ منی ھنکین ءِ دیوالانی سر ءِ نبشتگ کہ آیاناں اھد سازیں دستانی پَنجگاں نبشتہ کرتگ اَنت اِے اھد ءِ زوراک ھر روچ منی میتگ ءِ دیوالانی سر ءَ ناسرجمیں کِسھانی لبزاں کروج اَنت بلے انگت دیوالانی سر ءِ باندات ءِ رژنائیں روچانی وداریگیں شکّلیں لبزانی نشان ءُ چیدگ انگت زاھر اَنت۔ انگت مردم انچُش مار اِیت کہ اِے لبزاناں ھانی ءِ وداریگیں شے مرید چہ کبر ءِ ادیرہ ءَ در اھتگ ءُ گْون وتی اھد سازیں دستاں دوبر نبشتہ کرتگ اَنت۔

ساھتے ءِ ھاموشی ءُ بے تواری ءَ چہ پد شِپانک ءَ وتی توار بُرز تر کنان ءَ انچیں جزبگیں دابے ءَ گپّ جنَگ بِندات کُرت کہ آ گپّاں منی جان ءِ گْیمرتگیں پُٹ پاد اَتک اَنت من ھمے پَھم اِت کہ شِپانک وتی دِل ءِ دیریگ ءُ تند بستگیں بَڈاساں گْوں من کَشّگ لوٹگ ءَ اِنت۔

“سنگت اِے لبز اِے لبز نہ اَنت بلکیں اِے ناسرجمیں کِسّہ اَنت۔ من اِے گپّ ءَ ھما دلوَتاناں گْوشگ لْوٹ آں کہ سَتَر شُما دراجیں پَند بہ بُرّ اِت ءُ بیا اِت اِے لبزانی کَروجگ ءَ بلے!
بلے! اِے لبز گْوں ھچ کسّ ءَ کروجگ نہ بنت، کروجگ نہ بنت گْوں ھچ کسّ ءَ۔

من آیاناں گْوشگ لوٹ آں کہ منی میتگ ءِ دیوالاناں ھم درد مان، منی میتگ ءِ دیوالاناں ھم یک مارشے گْوں، منی ھنکین ءِ دیوال ھم یک کْرنے ءِ وداریگ اَنت، منی میتگ ءِ دیوالانی تہ ءَ ھم یک ناسرجمیں کِسّھے نبشتہ اِنت کہ آ شئے مرید ءِ داب ءَ بانوریں ھانی یے ءِ ودار ءَ انت۔ آ انگت پُر امیتیں دابے ءَ چو کْوہ ءَ مِکّ اَنت۔ اگاں لبزاں کروج اِت بلے دیوالاں شُما دور دات کُرت نہ کن اِت۔ دیوال زیکیں روچ ءَ چْو کوہ ءَ مِکّ بُوتگ اَنت، مَروچی ھم مِکّ اَنت ءُ آیوکیں روچاں ھم مِکّ بنت اِے گپّ ءَ چِہ پد شِپانک رَھادگ بُوت ءُ من ھم دیم پہ کُچگ ءَ ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ

نودان بلوچ

دی بلوچستان پوسٹ

ھو من بلوچے آں
مُھکمیں من راجے آں
سر زمین ءِ دلبند ءَ
چہ کدیم ءُ کرناں من
چہ مھر گڑھ ءَ پیداکاں
سِنگ ءُ ڈوک ءُ بانڈم آں
مئے نشان گواھی اَنت
اے بلوچ ءَ ساہ بکش اَنت
پہ نوکیں زندمانے ءَ
دلکشیں جھانے ءَ

تھاری ءَ نوں مانشانتگ
مئے گلیں اِستان ءَ
ھو بلوچستان ءَ
اے زمین ءِ بچ آں کہ
ساہ ءُ جان ءَ بکشا اَنت
پہ وتئی وتن مات ءَ
ھو من بلوچے آں

چو بانُکیں کریمہ ءَ
ڈیوا ئِے یہ دست ءَ اَت
شھر ءُ میتگاں گول اِت
اے مِرمِرانکیں آس ءَ را
دات ئِے جنگے ءِ رنگے
سُرمگیں منی بولان
داں گوادر ءُ چاغی ءَ
دیدگیں منی پُسّگ
سرمچار ءُ یاگی اَنت
تَوک ءِ سانکلاں پروشاں من
پہ وتی من باندات ءَ
ھاک ءِ وشبوہ ءِ یات ءَ
ھو من بلوچے آں

زندگی، منی مرگ ءَ
پد نوں بنا بیتیں
ما انکلابی ایں
پہ زالم ءَ جوابی ایں
سنگراں منی سنگت
نشتگاں وداریگ اَنت
پہ بام ءَ سُھب ءِ راھچاراں
ھو من بلوچے آں۔

بلوچستان ءِ دمگ گڈانی دو پرپٹانی ڈیک ورگ ءَ یک مردمے بیران –

دی بلوچستان پوسٹ

گیشیں ھالانی رِد ءَ گڈانی ءَ دو موٹر پرپٹانی ڈیک ورگے ءِ سوب ءَ یک مردمے بیران بوتگ – بیران بوتگیں مردمے پجار بشارت ءِ نام ءَ چہ بوتگ –

اھوالکار ءِ رِد ءَ بشارت کراچی ءِ نندوک انت شپ بریکنک یارڈ پلاٹ نمبر نود ءُ چار ءِ منیجر بوتگ –

وئیل تیز رؤگے سوب ءَ دیم ءَ اتکگ کہ دؤئیں پرپٹاں ڈیک وارتگ – ڈیک ورگے سوب ءَ بشارت سک باز ٹپی بوتگ ـ کہ آ نادراھجاہ ءَ برگ ءَ بوتگ انت نیم راہ ءَ بیران بوتگ –

ھمے وڑ گوستگیں روچ بلوچستان ءِ باپاری شھر ھَب چوکی ءَ دارو ھوٹل ءِ نزیک ءَ دگ ءِ وئیلے ءَ یک مردمے بیران بیتگ –

وئیل ءَ پد ایدھی ءِ واکدار سر بوتگ اَنت ءُ بیران بیتگیں مردم ءِ جون ءِ چِست کرتگ ءُ نادراہ جاہ ءَ برتگ اش، بیران بیتگیں مردم ءِ پجار صبغت اللہ ء کریم ءِ نام ءَ زانگ بیتگ –

بلوچستان ءِ بنجاھی شھر شال ءَ جتا جتائیں وئیلاں سَے مردم زدگ بیتگ اَنت ءُ سَے مردم بیران اَنت، لورلائی ءَ جونے دست کپتگ –

دی بلوچستان پوسٹ

سربوتگیں ھالانی رِد ءَ بلوچستان ءِ بنجاھی شھر شال ءَ شمبے ءِ روچ ءَ ناشناسیں سلاہ بندیں مردمانی تیرگواری ءَ یک مردمے بیران بوتگ –

وئیل شال ءِ دمگ جناح ٹاؤن ءَ دیم ءَ اتکگ کہ ناشناسیں مردماں رکشہ ڈرائیور محمد اسمائیل ءِ سر ءَ تیرگواری کتگ ءُ کُشتگ ءُ تتکگ ءُ شتگ انت –
دمگی پولیس ءَ جون دست گپت دمگ ءِ نادراھجاہ ءَ سرکتگ اژدری چار ءُ ٹپاس ءَ پد جون کھول ءِ گور ءَ سر کنگ بوتگ – وئیل ءِ درگت ءَ گیشیں پٹ ءُ پول پولیس کنگ انت –

اھوالکار ءِ رِد ءَ شال ءَ دگہ تیرگواری ءِ وئیلے ءَ یک مردمے بیران یکے ٹپی بوتگ – ریسکو بنشون ءِ رِد ءَ شال ءِ دمگ سریاب ءَ شمبے ءِ روچ ءَ گِر ءُ چیل ءِ میان ءَ توپک ءِ آس برگ ءِ سوب ءَ یک مردمے بیران ءُ یکے ٹپی بوتگ، بیران ءُ ٹپی بوتگیں مردم نادراھجاہ ءَ برگ بوتگ انت –

ھمے وڑ شال برما ھوٹل ءَ سریاب دگ ءَ تیرگْواری ءِ وئیلے ءَ یک مردمے بیران بوتگ – بیران بوتگیں مردمے پجار منور احمد ء محمد عمر ءِ نام ءَ چہ بوتگ۔

جون نادراھجاہ ءَ سرکنگ بوتگ ءُ اژدری چار ءُ ٹپاس ءَ پد کھول ءِ دست ءَ دیگ بیتگ۔

شال ءَ سلینڈر گیس ترکگے وئیلے ءَ زالبول ءَ ھوار دو مردم ٹپی دمگی پولیس ءِ رِد ءَ شمبے ءِ روچ ءَ شال کوکا سی ءَ حاجی فتح خان دگ ءِ سر ءَ لوگ ءَ گیس سلینڈر ءِ ترک اتگ، سلینڈر ءِ ترکگ ءِ سوب ءَ نادر فتح خان ءُ زبیدہ ستکگ ءُ ٹپی بوتگ انت دمگی پولیس ءَ ٹپی بوتگیں مردم نادراجاہ ءَ سر کرتگ انت ءُ وئیلے درگت ءَ پٹ ءُ پول کنگ انت –

کچھی ءَ بیگواھیں مردمے ءِ جون دست کپتگ –

اھوالکار ءِ رِد ءَ ڈیرہ مراد جمالی ءِ دمگ کچی ءَ سنی لیویز کارگس ءِ نزیک ءَ دو روچ ءَ پیش بیگواہ بوتگیں مردمے ءِ جون دست کپتگ –

جون ءِ پجار میر مجیب الرحمن جتوئی ءِ نام ءَ چہ بوتگ کہ دو روچ ءَ پیش سنی لیویز کارگس ءِ نزیک ءَ چہ بیگواہ بوتگ – شمبے ءِ روچ ءَ آئی ءِ تیر سپتگیں جون چمب ءَ دست کپتگ –

متحدہ عرب امارات وڑیں ڈیھ ءَ زورانسری آوار جنی ءُ بے رھبندی ءَ پاکستان ءَ دیم دئیگ مہزبیں راجانی ھاترا پہ پدردی بہ بیت- ماہ زیب بلوچ

دی بلوچستان پوسٹ

سندھ ءِ مزن شھر کراچی ءَ ماما قدیر بلوچ ءِ رھشونی ءَ وائس پار بلوچ مسنگ پرسنز زھرشانی برجاہ، زھرشانی ءَ مروچی چار ھزار یکسدو نود ءُ چار روچ سرجم بوتگ –

بی آر سی ءِ سرکماش وھاب بلوچ، ماہ گنج بلوچ، شال ءَ چہ ھوران بلوچ ءُ دگے مردماں بنجلے ترءُتاب کرتگ ءُ بیگواھیں مردمانی کھول ءِ گوم ءَ دلپدردی درشانتگ –

بیگواھیں انسانی ھکانی باسک راشد حسین بلوچ ءِ مات ءُ آئی برازتک ماہ زیب بلوچ ءَ ھم بنجل ءَ اتکگ ءُ وتی زھرشانی نبشتہ کنائینتگ –

ماہ زیب بلوچ ءِ گوشگ ات کہ راشد حسین بلوچ ءِ متحدہ عرب امارات وڈیں ڈیھ ءَ زورانسری آوار جنی ءُ بے رھبندی ءَ پاکستان ءَ دیم دئیگ مہزبیں راجانی ھاترا پہ پدردی بہ بیت – راشد حسین بلوچ ءَ پاکستان ءَ راہ دئیگ ءَ پد چیریں جاہ ءَ بندیگ کنگ بوتگ ءُ ھمے گوشگ ءَ انت کہ تتکگ –

آئی ءَ گوشتگ کہ پاکستانی ادارھانی نیمگ ءَ راشد حسین بلوچ ءَ باگی گوشگ آئی ءِ زندے درگت ءَ مئے ترس گمان ءَ گیشتر کنگ انت – انسانی ھکانی ادارہ پاکستان ءَ ھوار متحدہ عرب امارات ءَ راشد حسین ءِ درگت ءَ پسو بہ لوٹ انت ءُ آئی ءَ یل بہ کنائین انت –

وائس فار بلوچ مسنگ پرسنز ءِ رھشون ماما قدیر بلوچ ءَ گوشگ ات کہ بدبھتی ءَ بلوچ ءِ دنیگت ءَ واب سیر نہ انت، نوں بلوچ ایردستی ءِ نشہ ءَ سرور مھسوس کنگ ءَ انت – بیگواھیں مردمانی یل کنائینگے ھاتر ءَ سیاسی پڑانی سرا پرایمنیں جدوجھدے ھاترا جوانیں گامگیج زورگ ءَ نہ انت –

آئی ءِ گوشگ ات کہ مروچی ریاستی ادارہ سیاسی پڑانی بگیری ءَ گامگیج زورگ ءَ انت، کہ آھانی تھا دروگیں کیسانی نبشتہ کنگ ءُ آھانی آوار جنی پد شھید کنگ، راجداریں گل ءُ نودربر گلانی سرا بندش جنگ ھوار انت –

ماما قدیر بلوچ ءَ گوشتگ کہ اے درساں ابید ھم راجی ھار (سیلاب) دارگ نبیت بلے ھنچوش کہ راجی سیلاب راجی جزبگ ءُ پگری نزریات شعور ءَ چہ سریچ بہ بیت –

دستونک

عاقل عزاب

دی بلوچستان پوسٹ

بیا وطن کولیگ بئیں کُربان بئیں
پہ بلوچستان ءَ پَھر ءُ  شان  بئیں

باندئے اوست بندیں گُراباں پہ وتی
کَمّڑیں  تیاب ءُ  زِریں زِروان  بئیں

گوں   مرادیں    جُنزگانی   دْراہیاں
درد   پیوستیں  دلی  درمان  بئیں

تو  کِھیباں  گوں   بِزّر  بانوری ایں
ما  پہ  سالونکی  پتو  کربان  بئیں

شیشَل ءُ  شالی  تَبیں سار اِت بُتے
بھار  چاڑیں سُھبتی تْرمپان  بئیں

اَہد ءِ تہاریں سَنتر ءُ کوْرْیں دَگّاں
رَہگِر اِنت  رُژنے پہ وت  بالان بئیں

ما عزاب گوں  اَنگلاسیں  ساھتاں
پگر  بالیں  ڈیواہی   شَھمان  بئیں

دی بلوچستان پوسٹ

سر بیتگیں ھالانی رد ءَ پاکستانی پوج ءِ دست مند بلو ءَ یک سالے ءَ پیسر آوار جنگ بیتگیں نواز ء دوستین گوستگیں روچ ءَ یلہ کنگ بیتگ ءُ وتی لوگ ءَ سر بیتگ –

نواز دوستگیں یلہ بیگ ءِ ھال بلوچستان ءَ گار ءُ بیگواھیں مردمانی واستا جھد کنوکیں گل وائس فار بلوچ مسنگ پرسنز ءَ ھم راست کرتگ ءُ گوشتگ کہ نواز ء دوستین یلہ کنگ بیتگ ءُ وتی لوگ ءَ سر بیتگ –

وائس فار بلوچ مسنگ پرسنز ءِ چیئرمین نسر اللہ بلوچ ءَ گوشتگ کہ بیگواھیں مردمانی یل بیگ پما وشی یے ءُ ما سرکار ءَ مدام ھمے لوٹ ءَ کنگ ءَ ایں کہ بیگواھیں مردماں یلہ بہ کنت ءُ اگاں کسے ءَ جرمے کرتگ گڑا آ آمیدگس ءَ پیش کنگ بہ بیت –

ھمے وڑ گوستگیں دو روچ پیسر علی بکش ء برات جھمنند کپت پتک بسیمہ یک سالے ءَ بیگواہ بیگ ءَ پد یلہ کنگ بیتگ ءُ وتی لوگ ءَ سر بیتگ –

زانگ بہ بیت بلوچستان ءَ سیاسی پاٹی ءُ انسانی ھکانی واستا کار کنوکیں گلانی گوشگ اِنت کہ بلوچستان ءَ بازیں مردمے گار ءُ بیگواہ اِنت-

آیانی بھتام اِنت کہ بیگواہ کنوکانی تہ ءَ پاکستانی چیریں ادارہ ءُ آیانی جوڑ کرتگیں ڈیتھ اسکواڈ دزمانجن اَنت –

راشد حسین اگاں یلہ کنگ نہ بیت یا آئی ءَ را جانی تاوان دیگ بیت گڑا آئی ءِ زمہ وار عرب امارات اِنت – ماما قدیر بلوچ

دی بلوچستان پوسٹ

انسانی ھکانی باسک راشد حسین بلوچ نہ تتکگ بلکیں پاکستانی چیریں ادارھانی دست ءَ اِنت اشی ءِ گواہ جاڑیگ اَنت – راشد حسین ءَ باگی گوشگ مئے ترس ءِ گماناں گیشتر کنگ اِنت – اے گپ وائس فار بلوچ مسنگ پرسنز ءِ رھشون ماما قدیر بلوچ ءَ کراچی ءِ پریس کلب ءِ دیم برجاھیں ھرتال ءَ کتگ اَنت –

ماما قدیر بلوچ ءِ گوشگ اِنت کہ راشد حسین بروھی ء دیدار حسین بروھی انسانی ھکانی باسکے کہ دُبئی ءَ مزدوری کنگ ءَ بیتگ عرب امارات ءِ چیریں ادارھاں گیرکانودی رنگے ءَ دزگیر کرتگ، کہ شش ماھاں داں آیانی گور ءَ بندیگ بیتگ –

آئی ءَ گوشت کہ چریشی ءَ پد عرب امارات ءَ راشد حسین پاکستان ءِ دست ءَ داتگ کہ ایشی ءِ گواہ ھست ءُ ھیات اَنت بلے نِی پاکستانی سرکار راشد حسین بارہ ءَ نہ منّگ اِنت ءُ کراچی ءَ ناشری بندش جنوکیں آمیدگس روتاکاں تچگ ءِ پنتاک دیگ ءَ اِنت –

ماما قدیر بلوچ ءَ گوشت ما عرب امارات ءَ گْوشگ لوٹ ایں کہ اگاں راشد حسین یلہ کنگ نہ بیت یا آئی ءَ جانی تاوان دیگ بیت گڑا ایشی ءِ زمہ وار عرب امارات بیت اِنت – ما دزبندی کن ایں کہ راشد حسین ءَ عرب امارات یلہ بہ کنائین اِت پرچاکہ ھمایانی چیریں ادارھاں دزگیر کرتگ –

ماما قدیر ءَ گوشگ اَت عرب امارات ءِ نیمگ ءَ اگاں ھچ گامگیج زورگ نہ بیت گڑا ما وتی انسانی ءُ کانودی رھبندانی رنگ ءَ میان اُستمان ءَ ھوار میان اُستمانی آمید گساں راشد حسین ءِ کیس ءَ بریں –