TBP Balochi

سربوتگیں ھالانی رِد ءَ بلوچستان ءِ دمگ ڈھاڈر ءُ ڈیرہ مراد جمالی ءَ تیر گواری ءِ وئیلاں دو مردم بیران ءُ یکے ٹپی بوتگ –

گیشیں ھالانی رِد ءَ ڈھاڈر ءَ بس اسٹاپ ءِ نزیک ءَ ناشناسیں مردمانی تیرگواری ءَ یک مردمے بیران یکے ٹپی-

ڈھاڈر ءِ دمگ لھڑی ءَ بس اسٹاپ ءِ نزیک ءَ ناشناسیں سلاہ بندیں مردمانی تیر گواری ءَ یک مردمے بیران ءُ یکے ٹپی بوتگ، سلاہ بندیں مردم تتکگ ءُ شُتگ انت –

بیران ءُ ٹپی بوتگیں مردمانی پجار عبدالمجید ء باردین ٹالانی بیران بوتگ وھدیکہ عبدالستار ء محمد ھاشم ٹپی بوتگ، دؤئیں مردم اژدری چار ءُ ٹپاس ھاتر ءَ دمگی نادراھجاہ ءَ سرکن بوتگ انت –

ڈیرہ مراد جمالی ءَ ورنائے ءَ وت ءَ وت تیرے جتگ ءُ وتکشی کُتگ-

پولیس ءِ رِد ءَ ڈیرہ مراد جمالی ءِ دمگ تمبو ءَ چیزل آباد میتگ ءَ ورنائے ءَ وت ءَ وت تیر جتگ ءُ وتکشی کُتگ –

وتکشی کنوکے پجار حبیب اللہ بنگر ءِ نام ءَ چہ بوتگ کہ لوگی جیڑہ ئِے سر ءَ آئی ءَ وت ءَ وت ٹی ٹی پسٹل ءِ سر ءَ تیر جتگ ءُ کُشتگ –

دمگی پولیس ءَ لاش دست گپتگ ءُ نادراھجاہ ءَ سر کتگ اژدری چار ءُ ٹپاس پد لاش کھول ءِ ھوالہ کنگ بوتگ –

نبشتانک: چم

آزمانک: سعادت حسن منٹو

رجانک: میرین بلوچ

دی بلوچستان پوسٹ

آئی ءِ سرجمیں بدن ءَ چہ آئی ءِ چم من پ سک دوست بوت اَنت ءُ آئی ءِ چم راستی ءَ ھمے ڈول ءَ اِت اَنت کہ تھار ماھیں شپے ءَ چوں کہ موٹر گاڑی ءِ ہیڈلائٹس بزاں کہ بنی آدم آئی ءَ زوت گند اِیت ءُ بلے شُما اے ھم بے پوہ مہ بہ اِت کہ آئی ءِ چم سک باز زیبناک اَت اَنت بیھ اے وڑ نہ انت، چی ءَ کہ من زیبناک ءُ بد زیبناکی ءِ باز اِزت ءَ کناں بلے من پھلی لوٹاں کہ اے چمانی بابت ءَ بس ھَمینکس گُشگ لوٹاں کہ آ زیبناک نہ اِت اَنت بلے ایشاں چہ اَبید آئی ءِ تہ ءَ بے کساس جزبگ ھست اَت منی ءُ آئی ءِ چمانی نند ءُ نیاد یک نادْراہ جاھے ءَ بوت من اے نادراہ جاہ ءِ نام ءَ گُشت نہ کناں چی ءَ کہ ایشاں چہ منی رجانک ءَ ھچ وڑیں سیتّ نہ رس اِیت بس شُما ھمے پوہ بِہ بہ اِت کہ یک نادْراہ جاھے ءَ اَت آں ءُ ھمود ءَ منی یک سکیں دوستیں سْیاد ءِ بُرّ ءُ بین کنگ ءَ پد وتی زندگی ءِ گُڈی ساہ ءَ زورگ ءَ اَت ءُ انچوش بزاں کہ من ایشانی ھمراہ داری ءِ لائِک نہ آں ءُ بیمارانی جان سلامتی ءِ من دلبڈی ھم دات کُرت نہ کن آں بلے من وتی لوگ بانُک ءِ پھیم اسرار ءِ واست ءَ روگ لوٹ اِیت چی ءَ کہ من وتی دوست ءُ سْیاد ءَ وتی مھر ءُ دوستی ءِ منانک ءَ بہ دے آں بیسہ بہ کن کہ من ءَ سک کوپت بوگ ءَ ات ءُ نادراہ جاہ ءِ نام ءِ گرگ ءَ من ءَ سک نپرت اَت سرپد نیاں چی ءَ پہ، پرچیکہ یک رندے ءَ بمبئی ءَ وتی پیریں ھمسائگ ءِ دست ٹپی ات ءُ من ءَ جے،جے نادراّہ جاہ ءَ برگ کپت ءُ ھما جاہ ءَ ،،کیوژ کوالٹی ڈیپارٹمنٹ ،، ءَ من ءَ کم چہ کم یک ءُ نیم گنٹہ ءَ نندگ لوٹ اِت ھما جاہ ءَ من ءَ ھما مردم ءِ نند ءُ نیاد بوت چو آسن ءِ وڑ ءَ سرد ءُ بے گِھار ات من ھما نگاھانی گپ ءُ تران کنگ ءَ اتاں کہ من ءَ سک دوست اَت اَنت ءُ دوستی ءِ بابت ءَ تھنائی بستار ھست اَنت سک باز ارزان ات، اگاں تو ھم اے نگاہ بِہ دیستین ات اَنت ءُ تئی ھم دل ءُ دماگ ءَ ھچ وڑیں پژدر دیم ءَ نیاتکگ اَت اے ھم ارزان ات،کہ تئی ءُ ھمائی ءِ بابت ءَ راہ ءُ راہ بندانی واھشت بہ کنت تو ھم گْوشتگ اَت ” بے کساس نِزوریں نگاہ اَنت” بلے وھدے من اے جنک ءَ را دیست ءُ درستاں چہ پیسر من ءَ آئی ءِ نگاھاں دیوانگ کُرت آ پردہ پوش اَت بلے ھجاب ئِے چست ات ءُ آئی ءِ دستاں شیشگے دوائی ات ءُ آ جزل وارڈ برآمدہ ءِ دیم ءَ کسانیں بچِکّ ءِ ھمراھی ءَ پیداک ات من ھمائی ءِ دیم ءَ چارگ ءَ اتاں گڑا آئی چم چو بلائیں ءُ نا کسانیں ،نا شِینزیں، نا نیل ءُ نا سبزین ات اَنت، یک دگہ ڈولیں رنگے ءِ روژنائی ودی بوت منی گام اوشتات اَنت ءُ آ ھم اوشتات ءُ ھمائی ءِ وتی ھمراھیں بچک ءِ دست گپت ءُ لرزگ ءِ آواز ءَ گوں گُشت ئِے” تو زاناں اتک کُرت نہ کن ئے؟” بچک ءَ وتی دست ھلاس کُت ءُ تُرندیں آواز ءَ گوں گُشت ئِے “من ءُ تو روگ ءَ اِیں-

تو کہ کورے ئے” من ھمے اُشک کرت ءُ پد ءَ جنک ءِ چم دوبار ءَ چار اِت اَنت ءُ آئی ءِ سرجمیں بالاد ءَ بس من آئی ءِ چم دیست اَنت چو کہ من ءَ سک دوست اَت اَنت من دیم ءَ رواں بوتاں ءُ آئی ءِ کر ءَ سر بوتاں ءُ آئی ءَ چم گوں چماں چار اِت اَنت ءُ آئی ءَ گُشت “بْرانز بُت کُجا چہ گرِگ بیت؟” راستیں گپ ایش اِنت کہ ھمے دمان ءَ ایکسرے ڈیپارٹمنٹ ءَ شتاں منی یک سنگتے کار ءَ اَت ءُ من ھمیشی ءِ گندگ ءَ اتکگ اتاں من ھمے جنک ءَ را گُشت بیا من ترا ھمود ءَ بر آں من ھم ھمود ءَ روگ ءَ آں جنک ءَ وتی ھمراھیں بچک ءِ دست گِپت ءُ منی ھمراہ بوت اَنت منی دگہ کسے ءَ را ڈاکٹر صادق جُست کُت گڑا سرپد بوتاں کہ آ بْرانزبُت ءَ گوں دست گٹ اَت دروازگ بند اَت ءُ ڈن ءَ نادْراھانی رِد لَگ اِتگ اَت ءُ من دروازگ ٹُکّ ٹُکّ کُرت تُوکی نیم ءَ تُرندیں آوازے اتک ” کے ئے؟دروازگ ءَ ٹُکّ ٹُکّ مہ کن” بلے من دروازگ پد ءَ ٹُکّ ٹُکّ کُرت ءُ دروازگ پچ بوت ءُ ڈاکٹر صادق پہ ما جُنڈان ءُ نُرُنڈان ءُ بد گُشان ءَ گوں اَتک ءُ اوشتات ” اوہ تو ئے؟” ھاں براس من بس تئی گندگ ءَ اَتکگاں دپتر ءَ شُت آں گڑا سرپد بوتاں تو اد ءَ ئے “بیا توک ءَ ” من جنک ءِ دیم ءَ چار ات ءُ گُشت۔ “بیا بلے بچک ءَ ڈن ءَ بل” ڈاکٹر صادق ءَ من ءَ گُشت” اے کَے اِنت؟” من پسو دات” سرپد نیاں اے کے اِنت بلے ایکسرے ڈیپارٹمنٹ ءِ جُست ءُ پُرس ءَ انِت پمشکا من گُشت بیا، من ترا براں ” ڈاکٹر صادق ءَ دروازگ ءِ دپگئش پچ کُرت من ءُ ھما جنک توک ءَ اتک اِیں چار پنچ نادراہ ات اَنت ڈاکٹر صادق ءَ زوت ءَ چہ زوت ایشانی سکرینگ کُرت ءُ پد ءَ موکل دات اَنت اشاں چہ پد کوٹی ءِ تہ ءَ بس ھما دوئیں بچاں ءُ من ءُ ھما جنک ڈاکٹر صادق ءَ من ءَ جُست کُرت ” ایشی ءِ چہ نادراھی یے؟” من ھمے جنک ءَ چہ جُست گِپت۔ “چہ نادراھی یے تئی؟بْرانزبُت ءِ واست ءَ ترا کُجام ڈاکٹر ءَ گُشتگ؟” تھاریں کوٹی ءَ جنک ءَ من ءَ چار اِت ءُ من ءَ پسو ئِے دات”من ءَ ھچ سرپدی نیست کہ منی نادرائی چی یے ؟ منی ھلک ءَ یک ڈاکٹرے ھست اِنت آئی ءَ گُشتگ بْرانزبُت بہ کنائین” ڈاکٹر صادق ءَ گُشت مشین ءِ دیم ءَ بیا آ دیم ءَ روگ ءَ ات اناگاہ ءَ مشین ءَ ڈیک وارت ئِے ءُ ڈاکٹر پہ زھرکنی گون بُرزیں آواز ءَ گوں آئی ءَ را گُشت ” ترا زاناں اے گندگ ءَ نیایگ ءَ اِنت ؟ ” جنک ھاموش بوت ءُ ڈاکٹر ءَ پردہ چِست کُرت ءُ اسکرین ءِ پُشت ءَ اوشتارینت ئِے پد ءَ آئی ءَ سوئچ پچ کُرت من شیشگ ءِ تہ ءَ چہ دیست من ءَ آئی پھلوگانی ھڈّ گندگ ءَ اتک اَنت آئی ءِ دل ءِ ھم یک نیمگے ءَ سیاھیں نشانے اَت ءُ تیز دریکگ ءَ اَت ڈاکٹر صادق ءَ پنچ شِش منٹ ءَ تاں آئی ءِ پَھلوگ ءُ ھڈّ چار اِت قَنت ءُ پد ءَ ڈاکٹر ءَ سوئچ بند کُرت ءُ کوٹی روژناہ کُرت ءُ من ءَ گوں گپ ءُ تران ئِے کُرت کہ” ایشی ءِ سینگ بلکُل ساپ اِنت ” جنک چو سرپد نہ اَت بلے آئی ءَ زانت کہ منی گْور کہ بُرز اَنت ءُ مزن مزن انت ءَ گشان ئِے زرت ءُ شر کُرت گْور ءَ ئِےچیر دات اَنت پد ءَ وتی سِتر ءِ ( نکاب) پٹ ءُ پول ءَ لَگ اِت سِتر یک نیمگے ءَ ” ٹیبل” ءِ سرا اِیر اَت من وت دیم ءَ روان کُرت ءُ آئی ءِ سِتر چِست کُرت ءُ آئی ءَ را دات ڈاکٹر صادق ءَ رپورٹ نبشتہ کُرت ءُ آئی را گُشت ئِے “تئی نام کے انت؟” جنک ءَ سِتر چِست کرُت ءُ پسو دات۔ “جی منی نام ھنیپہ (حنیفہ ) اِنت” ڈاکٹر صادق ءَ آئی نام چِٹّی ءِ سر ءَ نبشتہ کُت ءُ آئی ءَ را دات “برو، وتی ڈاکٹر ءَ پیش بہ دار ئِے ” جنک ءَ چِٹّی زُرت ءُ وتی زنچِک ءِ گوربند ءِ تہ ءَ چیر دات وھدے کہ آ ڈن ءَ در اَتک گڑا من وتی بے مکسدیں وڈّ ءَ آئی ءِ پُشت پُشت ءَ روان اَتاں بلے من ءَ آئی ءِ سر ءَ پَکا بیسہ اَت کہ ڈاکٹر صادق ءَ من ءَ شکی ئیں چمّاں گوں چار اِت ھما جاہ ءَ کہ من ءَ مُردنی اے وڑ کہ شُما لِیک اِنت چُشیں ھِچ وڑیں جیڑہ نیست اَت ۔

ایشی ءَ ابید منّاں کہ من ءَ بس آئی ءِ چم سک دوست بوتگ اَت اَنت من آئی ءِ پُشت ءَ روان اَت اَنت آئی ءَ وتی ھمراھیں بچک ءِ لنکُک ئِے گِپتگ اَت وھدے کہ ھما (تانگہ) اَسپ گاڑیانی اوشتگ جاہ ءَ سر بوتاں گُڑا من ھنیپہ (حنیفہ ) جُست کُرت “ترا کُجا روگی اِنت ؟” آئی ءَ یک دمکے ءِ نام گِپت بلے من ھم لھتے دروگ ءُ موگ بست ءُ گُشت کہ ” من ھم ھمے جاہ ءَ روگ ءَ آں من ترا گِس ءَ سر کناں ” وھدے کہ من دست گِپت ءُ اپس گاڑی ءَ سوار کُرت ءُ نادینت گُڑا من ءَ انچو گُمان بوت کہ منی چم ھم برانزبُت ءِ شیشگ ءَ اَت ۔

کہ من آئی ءِ گوشت ءُ پوست ھچ وڑ ءَ گندگ ءَ نیاتک اَنت ءُ بس آئی ءِ بالاد گندگ ءَ کیت بلے آئی ءِ چم آ ھکیکت ءَ سک شر ءُ زیبناک اَت اَنت، گُش ئے دگہ دابیں دل کشی یے ھست اَت بلے منی دل ءَ لوٹ اِت کہ آئی ءَ ھَدّ ءَ بہ ننداں گند ءُ نندے بکناں بلے اے جیڑ اِت کہ کسے گِند اِیت گُڑا من آئی ءِ ھمراھیں بچک آئی ءِ کِرّ ءَ نادینت ءُ من دیم ءَ نِشتاں ءُ اپس گاڑی روان بوت گڑاں ھنیپہ ءَ گوں من گپ ءُ تران بنگیج کُرت ” ءُ من ءَ گُشت ئِے تو کے ئے ؟” من گُشت من سعادت حسن منٹو حسن آئی ءَ گُشت اے منٹو نوں چی یے؟” ” کشمیریانی یک زاتے ءِ نام اِنت ” ” من ھم کشمیری یے آں ” ” ھو ” اما کنگ وائس اَنت ” من دیم ترّرینت ءُ گُشت ” اے وَ بُرزیں زاتے آئی ءَ کند اِت ءُ آئی ءِ چم گیش ءَ چہ گیش دل کش بوت اَنت من وتی زندگی ءِ تہ ءَ وڑ وڑیں زیبناکیں چم دیستگ اَت بلے آ چم کہ ھنیپہ ءِ چم اَت اَنت، بے وڑ دل کَش اَت اَنت، چو نہ زانت کہ آئی ءِ چمانی تہ ءَ چے ھست اَت کہ آئی ءِ چمانی دل کَشی ءِ وجہ اَت من چِد ءُ پیسر ءَ ھم گُشتگ اَت کہ آ اِینچو زیبناک نہ اَت اَنت بلے پد ءَ ھم منی دل ءَ سک لگّگ ءَ اِت اَنت من گوں بھادری ءَ گوں وتی اَگل (دماگ ) کار بَست ءُ آئی ءِ مودانی یک کالکے کہ آئی ءِ انیچّگ ءِ سر ءَ چہ آئی ءِ چم چیر اَت اَنت ، من لنککانی سر ءَ چہ چِست کُرت ءُ انیچّگ ءِ سرا ایر کُرت اَنت۔

بلے آئی ءَ ھراب نہ لیک اِت۔ من انگت دگہ وڑے کُرت کہ آئی ءِ دست زُرت ءُ وتی دست ءَ کُرت کمو کَجّ اِت بلے اے وڑ ءَ ھم آئی ءَ ھچ نہ گُشت ءُ ھچ وڑیں ناوشی نہ کُرت ئِے ءُ انگت وتی ھمراھیں بچک ءَ را گشت ئِے کہ ” ترا چی انت تو منی دست ءَ زور دیگ ءَ ئے ؟ ” من زوت زوت آئی دست یل دات ءُ بچک ءَ جُست گِپت کہ ” شُمئے گِس کُجا اِنت ؟” بچک ءَ دست ءِ سرا اشارہ کُرت کہ ” ھمے آ بازار ءَ ! ” اپس گاڑی ھمے بازار ءِ نیمگ ءَ ترّ اِت بازار سک رش اَت رو ءُ آ ھم سک باز اَت اپس گاڑی وار وار ءَ روان اَت ءُ دگّ چو کہ کڑ ءُ بینٹ اَت ءُ ھما دکّہ گران اِت اَنت یکوئی آئی ءِ سر منی کوپگاں لگ اِت ءُ منی دل ءَ گُشت کہ آئی ءِ سر ءَ وتی زانسراں ایر بہ کناں ءُ آئی ءِ چماں بہ چاراں بس بہ چاراں! کمُکیں وھد ءَ پد آئی ءِ گِس ءَ سر بوتاں بچک ءَ اپس گاڑی والا ءَ پہ اوشتگ ءَ گُشت وھدے کہ اپس گاڑی اوشتات ءُ آ جھل ءَ ایر اتَک۔ ھنیپہ نشتگ اَت من آئی ءَ گُشت” تئی گِس ءَ سر بوتگاں ” گُڑا ھنیپہ ءَ وتی دیم تر اِینت ءُ من ءَ گوں وتی ھزار نازیں چماں چار اِت ئِے ۔ گُشگ ءَ اَت کہ” بدرو کُجا ئے ؟” من آئی ءَ را جُست کُت کہ ” کُجام بدرو ؟” ءُ آئی ءَ گُشت ” ھما بچک کہ منی ھمراہ اِنت ” من بچک ءِ نیمگ ءَ چار اِت کہ آ اپس گاڑی ءِ کر ءَ اَت ءُ من گُشت ” اے وَ اوشتاتگ ” ” شر! ” ھمے وڑ گُشت ئِے ءُ بدرو ءَ توار ئِے جت” بدرو! من ءَ تو جھل ءَ ایر کن ۔” بدرو ءَ آئی ءِ دست گِپت ءُ بازیں مشکلے ءَ گوں ایر کُرت ۔ من ترندی ءَ گوں ھیران بوتاں۔ پُشت پُشت ءَ روان بوتاں ءُ بچک ءَ جُست گِپت “چہ گپے اے وت زانان ایر اَتک نہ کنے؟” بدرو ءَ پسو دات ” جی نا اِیشی ءِ چم ھراب انت اے نہ گند اِیت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: زاناں تو پہ راجی زُبان ءَ چے کُت کن ئے؟

نبشتہ کار: آئیشہ بلوچ

دی بلوچستان پوسٹ

بلوچ راج ءِ وڑ ءَ تُرکی ءِ زیردستیں کُرد راج ءَ ھم آیانی راجی زُبان کُردی ءُ زازاگوارنی ماں وانگجاھاں وانینگ نہ بنت۔ تُرکی ءِ زیردستی کُردستان ءَ کُرد زبانانی وانگ ءُ زانگ ءَ ھوار کردی زبان ءِ شائِری ھم بلاھیں گُناھے ءُ بلکیں کُرد راج وتی گم ءُ شادے ھمے وتی دود ءُ ربیدگ ءِ رِد ءَ آسر کُت نہ کن اَنت۔ بزاں زورگیریں تُرکی کُرد راج ءِ سر ءَ وڑ وڑیں کھر ءُ زورانسری کنت۔
البت ھمے راج ءَ وتی گلامی مار اِت ءُ مرچاں ھر کُرد راج ءِ بْرات ءُ گْوھار، واجہ ءُ ھاتون، کماش ءُ ورنا ءُ نودربر ءُ اُستاد دْراہ وتی دزھُورکی ءِ ھر ساھت ءُ دمانے پہ وتی زُبان ءِ دیمروی ءَ دے اَنت۔ ھر کُردے وتی گِس ءَ وتی راجی زُبان ءِ درونتاں وت وان ایت ءُ پد ءَ وتی راجی زُبانی نبشتہ ھیل کنت۔ بزاں سیلپ سٹڈی ءِ آسر ءَ وتی راجی زُبان ءَ وت دربر اَنت۔ ھر کُرد مرچاں وتی راجی زُبان ءِ ھزمتکار ءُ جُھدکار اِنت۔ ھر یکے ءَ وتی پنچ پنچ کُردی ءُ زازاگورانی ءِ وٹس ایپی دربرجاہ ءِ گل اڈ کُتگ ءُ وتی دمک ءِ مردماں ماں، ٹیلی گرام ءُ وٹس ایپ ءَ کُردی زُباناں وانین ایت۔ اگاں شُما چہ پیسبُک ءَ بہ چار اِت گُڑا شُمارا بے شمار کُرد وانگجاہ ءِ پیسبُکی تاکدیم ءُ گل وت پہ گِندگ ءَ رس اَنت کہ اود ءَ ھر چیزے ماں کُردی زُباناں نبشتہ اَنت۔ توری یوٹوب ھم بہ بیت بہ گِند ئے اود ءَ ھم شُمارا کُردی زُبانانی دربرگی چینل رس انت کہ کُرد زالبول وتی راج ءَ کُردی زُبان ءَ وانینگ ءَ اَنت۔ ھر کُرد ءِ گْوھار ءُ برات ماں چاگِردی رسانکدراں وت ماں وت وتی زُبان ءَ گپ ءُ رپ ءَ بنت۔ ھر یکے وت ءَ گوں پَھر ءُ ناز ءَ گْوش ایت کہ من کُردے آں ءُ من وتی وس ءُ واک ءِ ھساب ءَ راج ءِ ھزمتکارے آں۔

یک کُرد دزگْوھارے ءَ گوں من گپ ءُ رپ ءَ گْوشت “اگاں ما کُرد وتی راجی زُبان ءَ بہ وان ایں گُڑا بزاں ما وت ءَ گوں وتی راجی آجوئی ءِ لوٹوکیں سِلاھبندیں گل پی کے کے ءَ ھمگرنچ مار ایں چی ءَ کہ اگاں ما وتی راجی زبان ءَ وان این ءُ دربر ایں گُڑا ما زُبان دوست بہ ایں۔ وھدیکہ ما زبان دوست بیتگ ایں گُڑا ما ابرمی راج دوست بہ ایں ءُ پد ءَ راجدوست وَ ڈیھ دوست بنت۔ بِہ گِند ئے وھدیکہ یک راجے ڈیھ دوست بیتگ ءُ وتی راج ءِ گلامی ئِے ماراتگ گُڑا ھما راج وتی راج ءُ ڈیھ ءِ گلامی ءَ وَ نہ منّ ایت بلکیں پہ وتی راجی آجوئی ءَ آشوبے رُدین ایت۔”

نی بیا اِت ءُ کمیں بہ جیڑ ایں کہ زاناں ما بلوچ راج ءَ پہ وتی راجی زُبانانی دیمروئی ءِ ھاتر ءَ ماں اِے پِڑ ءَ چے کُتگ ءُ مئے راجی آجوئی ءِ لوٹوکیں راجی رھشُون ءُ راجدوستیں مردماں پہ راجی زُبانانی دیمروئی ءَ چونیں جُھد اَنت ءَ مرچیگیں وھد ءَ چے کُتگ؟ بلے راستی وَ ھمیش اِنت کہ ما ھچ نہ کّتگ ءُ پہ راجی زُبانانی دیمروئی ءَ ما انگت ءَ ھم ھچ نہ کنگ ءَ ایں۔ اگاں بِہ گِند ئے توری راجی شائِر بہ بنت یا مئے راجی رھشُون دْراہ وتی گپ ءُ تران ءِ وھد ءَ راجی زُبان براھوھی ءُ بلوچی ءِ زگریں گالاں ڈالچار کنان ءَ پارسی ءُ ھندی ءِ گالاں ماں بلوچی ءِ گُپتاری ءَ جاہ دے اَنت گُڑا راج چَہ اِے وڑیں ناسرپدیں شائِر ءُ رھشُوناں چونیں اُمیتے دار ایت کہ اِے راجدوستیں شائِر ءُ رھشُون پہ راجی زُبانانی وانگ ءُ دیمروئی ءِ ھاتر ءَ وتی ٹَک(ٹرائیب) ءِ مھلوک ءُ وتی منّوگراں پنت ءُ سوج بہ کن اَنت کہ وتی راجی زُباناں بہ وان اَنت دربر اَنت۔ ما بے ھال مہ بہ ایں کہ پاکستان ءِ ٹھینوک بنگالیاں ھم ھما وھد ءَ وتی راج ءِ گلامی مار اِت وھدیکہ آیانی زُبان ءَ سرکاری درجگ دیگ نہ بیتگ اَت ءُ پہ زُبان ءِ پھریز ءَ آیاں 21 مارچ 1953 ءَ وتی سر ندر کُتگ اَنت۔ واجہ ڈاکٹر ناگُمان بلوچ گْوش ایت “داں وھدے کسے زُبان دوست مہ بیت آ راجدوست بیت نہ کنت” پمیشکا ما تچک بہ زان ایں کہ راجی آجوئی ءِ آشوب بے راجی زُبان ءِ وانگ ءُ نبشتہ دربرگ ءَ نئیت۔

باید انت ماں گلامی ءِ زمانگ ءَ مارا پارسی ءُ ھندی وتی وانگجاھاں لِمٹ کنگی لوٹ ایت ءُ ما ھمروچ وتی دزھُورکی ءِ نیم ساھتیں وھدے پہ براھوھی ءُ بلوچی درونتانی وانگ ءَ بہ دے ایں۔ چوناھیگا مرچی ھر وانگجاھے ءِ کتابے ماں انگریزی ءَ اَنت گُڑا باید اِنت ما وتی سرجمیں ھاٹیگ ءَ پہ بلوچی ءُ انگریزی ءِ میتز، پِزکیس، بیالوجی ءُ سائنس ءِ وڑیں کتابانی وانگ ءَ بہ دے ایں کہ اِے دْراہ کتاب ماں انگریزی ءَ انت۔
نی باید اِنت نیکراھیں مُلائی تبلیگ ءِ وڑ ءَ ما دْراہ بلوچ یکجاہ بہ این ءُ راج ءَ راجی زُبان ءِ بابت ءَ سرپدی بہ دے ایں کہ ما بلوچ ایں، بلوچی مئے وتی راجی ءُ ماتی زُبان انت پمیشکا پہ مارا بلوچی وانگ ءُ زانگ ءِ ھیل گِرگ ءَ یک ھپتگے لگ ایت۔ باید اِنت ما وتی راجی زُبان ءِ درونت، نبشتانک، آزمانک ءُ گْوشکنداں وانان ءُ بلوچی لبزانک ءَ ھیل گِر ایں۔

اگاں ما دْراہ بلوچ راج کُرد راج ءِ وڑ ءَ پہ وتی راجی زُبانی دیمروئی ءِ واست ءَ جُھد بہ کن این ءُ وتی راج ءَ ماں پیسبُک ءُ وٹس ایپی وانگجاھاں وانین ایں گُڑا مئے راجی زُبان ھم گیدی ءِ دگریں زُبانانی ڈول ءَ دیمروئی کن اَنت۔ اے مئے ھر بلوچ ءِ زمہ واری اِنت کہ پہ بلوچی زُبان ءِ دیمروئی ءَ ما ھر یکے وٹس ایپی، ٹیلی گرام ءُ پیسبُکی گلاں اڈ کن این ءُ وتی نزیکیں سْیاداں بلوچی بہ وانین ایں۔ باید انت ما ھر باسک زیت بلوچی زُبان ءَ دربر این ءُ دیم ءَ وتی لوگ ءِ مردم، سْیاد ءُ سْیالاں ھم وانین ایں۔

من گُڈسری یک گپے گْوشگ لوٹ آں کہ مئے راج ءِ تہ ءَ لھتیں بدیں مردم ھست اَنت کہ پہ نودربرانی دلپْروشی، راج ءِ تہ ءَ بکڑے ودی کنگ ءِ ھاتر ءَ دژمن ءِ پلہ مُرزی ءَ ھمے پوتاری کن اَنت کہ بلوچی زُبان ءَ نبشتہ سْیاھگ نیست پمیشکا بلوچی وانینگ نہ بیت بلے من راج ءَ دلجمی ءَ گْوشگ لوٹ آں کہ راستی مُدام باج بارت ءُ راستی ءِ نیمگ ءَ باز رندگیر کا اَنت ءُ راستی ءِ کاروان مُدام بز بیت پمیشکا راست ءُ رواج گپتگیں سید رھبند ءِ نبشتہ رھبند ءِ جُھدکار ءُ ھزمتکار بے کساس اَنت کہ آ ھر یکے ءَ سید رھبند ءِ رِد ءَ بلوچی درونت اڈ کُتگ ءُ وتی دمگ ءِ راج بلوچی وانیگ ءَ انت۔ ما دلگوش بَہ ایں کہ بے رھبند ءُ وتگڑ ناں وت وان اَنت ءُ نَیکہ راج ءِ وانینگ ءَ کِل اَنت۔ ایشاں ناں وت رھبند ءُ درونتے ھست ءُ نَیکہ نودربرانی جُستانی پسّو دیگ ءِ ھاٹیگ ءُ منّانکے اش ھست۔ اِے بس راہ ڈنگر ءُ راہ ءِ کُچک ءِ داب وک اَنت بلے کاروان وتی مِنزل ءِ نیمگ ءَ روان کنت ءُ سر بیت۔

گالوار وَ ھر زُبان ءَ بنت ءُ باید اِنت ما ھر یکے وتی گالوار ءِ رِد ءَ گپ بہ کن ایں بلے راجی زُبان ءِ نبشتہ ماں یکیں سْیاھگ ءَ بہ دار ایں ما بس ھمے سرپد بِہ بَہ ایں کہ راجی زُبان ءِ نبشتہ ءِ دیمروئی بلوچی ھر گالوار ءِ دیمروئی اِنت کہ توری رکشانی بہ بیت یا توری سلیمانی ءُ مکُرانی گالوار بہ بنت کہ چریشی ءَ ھر گالوار ءِ گالاں ھاٹیگ رس ایت ءُ راجی زُبان ءِ زگریں گال گار ءُ بیگواہ نہ بنت انچوشکہ مرچاں پارسی ءُ ھندی مئے زُباناں بے کساس تاوان دیگ ءَ اَنت۔

بلوچی مئے وتی شھدیں زُبان اِنت ءُ بلوچی مئے راجی پجّار اِنت۔ بیا اِت وتی راجی زُبان ءَ وت دربر اِت ءُ دیم ءَ ھم وانین اِت۔ بلوچ راج ءِ پدریچ شالا وتی راجی زُباناں ما وانگجاھاں وانات اَنت، بلوچ میزران بات اَنت ءُ بلوچی دیمروئی بہ کنات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سوراب ءَ پاکستانی پوج ءَ ماما قدیر بلوچ ءِ دو برازتکاں ھوار پنچ ورناہ زورانسری آوار جتگ ءُ بیگواہ کتگ ۔

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ سوراب ء پاکستانی پوج ءَ وائس فار بلوچ مسنگ پرسنز ءِ رھشون ماما قدیر بلوچ ءِ دو برازتک محمد آصف ریکی، آلہ دین ریکی ء شبیر احمد ریکی جاھمنند دمب سوراب زورانسری آوار جتگ ءُ ناشناسیں جاھاں برتگ انت ۔

اے ورناھانی ھمراھی ءَ دگہ سئے ورنا عرفان ء محمد حکیم ریکی، ذالقرنین ء حاجی فرید ریکی جاھمنند دمب سوراب وھدیکے سیمی ءِ پجار دنیگت ءَ نبوتگ، پاکستانی پوج ءَ آوار جتگ ءُ بیگواہ کتگ انت ۔

دمگی اھوالکار ءَ گوں ٹی بی پی ءَ تران کنان ءَ گوشتگ کہ پاکستانی پوج، فرنٹیر کور ءُ چیریں ادارھانی کارمنداں اول ءَ سوراب ءِ سرجمیں بازار وتی انگیر ءَ کُتگ پدا یک دکان ءَ بیڑ برتگ کہ اودا ماما قدیر بلوچ ءِ برازتک محمد آصف ءُ آلہ دین ریکی آوار جتگ انت ۔

اھوالکار ءِ گوشگ انت کہ دکان ءَ ڈن دگہ سئے ورناہ ھم آوار جنگ بوتگ۔ ساڑئیں گواھانی رِد ءَ فرنٹیر کور ءُ چیریں کارمنداں ورناہ دکان ءَ چہ آوار جتگ ءُ ھما دمان ءَ سیاھیں پوشاکاں گوں دیم بستگ انت ءُ گاڑیاں سوار کُرتگ انت ۔

آوار جنگ بوتگیں ورناھانی کھولاں آھانی زورانسری آوار جنی ءِ بگیری ءَ ارزی نبشتہ کنائینتگ بلے دنیگت ءَ اے درگت ءَ ھچ وڑیں گامگیج زورگ نبوتگ ۔

زانگ بہ بیت ماما قدیر بلوچ گوستگیں یک دھک ءَ گیش انت کہ بلوچستان ءَ زورانسری آوار جنیانی بگیری ءَ وائس فار بلوچ مسنگ پرسنز ءِ گل ءِ نام ءَ توار چست کنگ ءَ اِنت ۔ ماما قدیر بلوچ ءِ چُک جلیل ریکی سینزدہ فروری سال دوھزار نُھ ءَ شال ءَ سریاب دگ ءِ سرا آوار جنگ بوتگ اَت ۔ سئے سال ءَ پد جلیل ریکی ءِ زانگولیں جون کیچ ءِ دمگ مند ءَ دست کپتگ ات ۔

جلیل ریکی بینک ءَ ھم کار ءَ بوتگ کہ لھتے وھد ءَ پد آ کار یلا داتگ ءُ نواب اکبر خان بگٹی ءِ گل جمہوری وطن پاٹی ءَ ھوار بوتگ ۔ نواب ءِ شھیدی ءَ پد آئی ءِ ھمگرنچی نواب ءِ نماسگ براھمدگ بگٹی گوں بوتگ ات کہ آ بلوچ ریپبلکن پاٹی ءِ بنجاھی سیکریٹری اھوالکار گچین کنگ بوتگ ات ۔

وتی زھگ ءِ زورانسری آوار جنی ءُ بیگواھی ءَ چہ بگر آئی ءِ جون ءِ دست کپگ ءَ پد ھم ماما قدیر بلوچ وتی زھرشانی برجاہ داشتگ ۔

نبشتانک: کُلُک ءِ پُروشگ

نبشتہ کار: اِٹگر کِیرِٹ

رجانکار: التاپ منیر

دی بلوچستان پوسٹ

پِت منا یک شَریں بُتوکے نہ زُریت ءُ نہ دَنت۔ مات ءَ وا چونی ءَ گُشت شَر، بلئے پِت ءَ منا مہ کن کُت “ما پَرچا ترا بہ دَیاں؟” آئی ءَ مات ءَ گوں گُشت ” ما پَرچا آرا یکے بُزوراں بہ دَیاں؟ انچو کہ گپ چہ آئی دَپ ءَ دَر نہ یتکگ تو اوشتاتگے۔”پِت ءَ گُشت کہ من زرّ ءِ شرپ ءَ نہ کناں، اگاں من انوں کَسانی ءَ ھیل مہ کناں گُڈا کدی ھیل کناں؟ ھما گونڈو کہ آھانی لوٹ لُنٹ ءِ سُرینگ ءَ گوں پیلو کنگ بنت مَزن بنت بلاہیں پوک بنت کہ آ پدا اسٹال آنی سرا چہ دُزی کن اَنت چیاکہ آسانی ءَ چیزے رَسگ آھانی ھیل ءُ عادت جوڈ بوتگ۔

پمیشکہ یک شَریں بُتُک ئے بَدل ءَ آئی پہ من یک چینی بد ڈولیں ھوک ءِ کُلُکے زُرت کہ آئی پُشت ءِ زیل ءَ یک پَتن ایں کَڈکے ھست اَت, ءُ نوں من مَزن باں شَر باں، نوں من یک پوکے نہ بَاں۔
منا نوں ھر سُہب ءِ سَرا یک کوپے شیر چاہ وَرگی اَت، بِلّے کہ منا ھچ دوست نہ بوت۔ منا ہر کوپے بَدل ءَ یک شِکِلے {اسرائیل ءِ کلدار} رَست۔ من کلدار کُلُک ءِ تہا مان کُت اَنت، ءُ وھدے تو ایشرا پو سُرینایے ژیلیک ژیلیک کنت۔ وھدیکہ کُلُک پُر بیت ءُ ژیلیک ژیلیک نہ کنت وھدے تو پوسُرینایے گُڈا من یک شَریں بُتُکے پہ وت زوراں۔ پِت گُشیت ھمئے رنگ ءَ ھیلکاری بیت۔
راستی ءَ ھمئے ھوک دلکش اِنت، آئی ءِ پونز سارت اِنت وھدے تو دستے بہ جَن یے ءُ آ بچکندیت وھدے تو کلدارے آئی ءِ تہا دور بہ دئے، بلئے چہ دُرساں وشتریں چیز ایش اِنت کہ آ بچکندیت وھدے تو کلدارے ھم آئی دور مہ دَئے۔ من آئی ءَ را نامے دات، من آرا گُشت پیساچسن، یک مَردکے ءِ نام ءِ پدا کہ آ یکبرے مئے نزیک ءُ گوْر ءَ نِشتگ اَت ءُ منی پِت ءَ وت ءَ را اَچ آئی گِستہ کُت نہ کُت۔ پیساچسن منی آدگہ لیبوک آنی پیما نہ اِنت، آ گیشتر شاتکام اِنت، آئی تہا چِراگ نیست، اِسپرنگ ءُ بیٹری نیست کہ آئی تہا چئے سَر بہ کَش اَنت۔ بس ھمئے ھیال بہ کن کہ چہ ٹیبل ءِ سرا دور مہ کنت۔ “پیساچسن، دِلگوش ءَ گوْر کن! تو چین ءَ جوڈ بوتگے،” من آرا سرپد کناں وھدیکہ آرا من چہ ٹیبل ءَ جہل پَرش ءِ سرا سر کَشْگ ءَ گِنداں، ءُ آ منی نیمگہ بچکندیت ءُ پہ اوپار پہ من ودار کنت کہ من آرا وتی دست ءِ سرا بِگراں ءُ جہل ءَ ایر بہ کناں۔ من پہ آئی بچکنداں پہک ءَ گنوک اوں، اے ھمائی ھاتر اِنت کہ من ہر سُہب ءِ سرا شیرچاہ وراں، ھمئے واستہ کہ من آئی تہا یک کلدارے ایر کُت بہ کناں ءُ بہ گِنداں کہ آئی بچکند پَکلوکے ھم بدل نہ بیت۔ ” منا گوں ترا مہر اِنت، پیساچسن،” من آئی را رَند ءَ ھمئے گُشاں۔ “باور کن تو من ءَ چہ مات ءُ پِت ءَ چئے گیش دوست بئے۔ او من ترا ھر وھدا دوست داراں، مسلہ نہ اِنت چئے کہ بہ بیت، راستی ءَ اگاں تو چُنڈ چُنڈ ھم بہ بئے۔ بلئے چہ ٹیبل ءِ سرا دور کنگ ءِ ھیال ءَ ھچ وتی ذہن ءَ میار!”
زِی پِت اتک، پیساچسن ءَ چہ ٹیبل ءِ سرا زُرتے، ءُ زور ءِ سرا سُرینگ ءَ لَگ اِت یے۔ ” دلگوش کن، اَبا، من آئی را گُشت، “تو پیساچسن ءَ لاپ دردے دَیگائے۔”
بلئے پِت ءَ گپ گوش نہ داشت۔ “اے آواز کنگ ءَ نہ اِنت، تو زانے ایشی متلب چئے اِنت، یوآوی؟ باندا ترا تئی شَریں ءُ شررنگیں بُتُک رَسیت۔” سک شَراِنت،ابا، ” من گُشت۔ باز وشیں گپے کہ منا منی شررنگیں بُتُک رَسیت۔ نوں بس کن پیساچسن ءِ سُرینگ ءَ ، ایشی ءَ را درد ءُ دور بوئگ ءَ اِنت۔ پِت ءَ پیساچسن ءَ واتر ٹیبل ءِ سرا ایر کُت ءُ مات ءِ توار کنگ ءَ شُت۔ یک مِلٹے ءَ پد مات ءَ را کَشْان ءَ، ءُ ہتھوڑی ءِ دست ءَ اَت واتر اتک۔ “بچار، من راست اِت اوں،” آئی مات ءَ را گُشت۔ “آ نوں زانت کہ چیزانی شَرپ ءَ چون کن اَنت۔ انچوش اِنت، یوآوی؟” “بلکل من زانی، من گُشت، “شَریں، بلئے ہتھوڑی چئے واستہ اِنت؟” ” اے تئی واستہ اِنت،” پِت ءَ گُشت ءُ ہتھوڑی ئے منی دست ءَ دات۔ “بس دلگوش ءَ گوْر کن.” “شَریں من دلگوش ءَ گوْر کناں،” من گُشت، ءُ منا راستی ءَ دلگوش گوْر اَت بلئے لہتیں مِلٹ ءَ پدا پِت ءَ دَمبُرت ءُ آئی گُشت، گُڈا جُنز دیما پُروش کُلُک۔” “چئے؟” من جُست کُت، “پیساچسن ءَ پُپُروشاں؟” “ھئو، ھئو، پیساچسن ءَ،” پِت ءَ گُشت۔ “بُرو، ایشی ءَ پُروش۔ تو ھما شَریں ءُ شررنگیں بُتُکے ھقدارے، تو آئی واستہ سک باز مھنت کُتگ۔”

پیساچسن گوں رنجیگیں بچکند ءَ منی نیمگہ بچکند اِت ءُ زانت یے کہ آئی ھلاسی ءِ کسہ سرجم اِنت۔ جہندم سر شَر ءُ وشرنگیں بُتُک ءَ را بہ بات۔ من وتی سنگت ءِ سرگ ءَ ہتھوڑی ئے بہ جَناں؟ “من آ بُتُک ءَ نہ لوٹ آں۔” من ہتھوڑی ءَ را واتر پِت ءَ را دات۔ “پیساچسن منا بس اِنت۔” “تو پہمگ ءَ نائے،” پِت ءَ گُشت۔ شَر اِنت، اے ھیلکاری اِنت، بیا، من تئی واستہ پُروشانے۔” پِت ءَ ہتھوڑی چِست کُتگ اَت، ءُ من مات ءِ بَزگیں چماناں ءُ پیساچسن ءِ پُرشتگیں بچکند چار اِت ءُ من زانت کہ اے گوں من کپتگ، اگاں من ھچ مہ کناں گُڈا آ مُرتگ۔ “ابا”۔ من آئی پاداں کپت اوں۔ “چئے، یوآوی؟” پِت ءَ گُشت، ہتھوڑی ئے انگتہ دست ءَ اَت ءُ گوات ءِ تہ ءَ شیہکگ ءَ اَت۔ “من دِگہ یک کلدارے لوٹ آں،” من دست ٹال کُت۔ “منا دِگہ یک کلدارے بہ دِے کہ باندا سُہب ءِ شیرچاہ ءَ رَند من آئی تہا ایر کنانے۔ او پدا ما آرا باندا پُروشاں، من وادہ کناں۔” “دِگہ کلدارے؟” پِت ءَ بچکند اِت ءُ ھمئے ہتھوڑی ءَ را ٹیبل ءِ سر ءَ ایرے کُت۔ “ھئو، گِندے؟ من بچکے سرپدی رُدوم دات،”من گُشت۔ “باندا”۔
منا ارساں گُٹ ءَ گیتگ اَت۔
وھدیکہ آ چہ کوٹی ءَ دَراتک اَنت من پیساچسن ءَ سک ءَ زور ءَ امباز اِت ءُ منی چمانی ارس یل ءَ بوت اَنت۔ پیساچسن ءَ ھچ نہ گُشت،بس منی دست آنی دل ءَ بے تِرک ءُ تواری درْیہنتے۔ “رنجیگ مہ بو،” من آئی گوش ءَ ھلوت کُت، “من ترا رَکیناں۔”
شپ ءَ من ھمئے ودار ءَ اِت اوں کہ پِت ٹی وی ءِ چارگ بس بہ کنت ءُ بووپس ایت۔ پدا من بے تِرْک ءُ تواری ءَ پاد اتکوں ءُ پیساچسن ءِ ھمراھی ءَ وش وشوک ءَ بے برمش ءَ چہ بارانڈہ ئے چیرا چیروکی ءَ در اتکوں۔ سک دیرا ما پیدل ءَ تہاری ءِ تہا روان بوتاں دانکہ مئے سر کُنٹکیں ڈگارے ءَ کپت۔ “ھوک پہ ڈگار ءَ گنوک اَنت،” من پیساچسن ءَ گُشت انچو کہ من آرا ڈگارے ءِ ھاکانی سرا ایر کُت، “ھاس ڈگار گوں کُنٹکاں۔ ترا اِدا دوست بیت۔” من پسو ءِ ودار کُت بلئے پیساچسن ءَ ھچ نہ گُشت، ءُ وھدے من آئی پونز ءَ را دست جَت کہ خدا حافظ بہ کنانے آئی منا پہ رَنج چار اِت۔ آئی زانت کہ آ منا واتر ھچبر نہ گِندیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوادر ءَ کُنٹانی ھور ءِ بندش ءِ سوب ءَ تیل باپاری مھلوک ءَزھرشانی کرتگ ءُ ڈپٹی کمشنر ءِ کارگس ءِ دیم ءَ نندانک جتگ –

دی بلوچستان پوسٹ

زھرشانی بنجل ءَ سیاسی پاٹی ءُ دمگی سروک، اسرمندیں کُنٹانی ھور ءُ دریاورداں ھوار بازیں کچے ءَ مھلوک ءَ بھر زرتگ –

آیاں گوشت کہ کنٹانی ھور ءِ بندش ءِ سوب ءَ ھزارانی مھلوک بے روزگاری ءِ آماچ اَنت ءُ چریشی ءَ مھلوک دپارے نگن ءَ زبھر بیان اَنت –

آیاں گوشت کہ کُنٹانی ھور ءَ کار ءُ بار کنوکیں مردم دمگی اَنت ءُ چرشی ءَ بازیں کچے ءَ مردمانی روزگار ءِ بندش ءَ آیانی گون ءَ اے زوراکی ءِ بیگ ءَ اِنت –

آیاں گوشت کہ زرکاری ءِ بندش مھلوک ءَ شُد کُشی ءِ آماچی اِنت کہ باید سرکار اے کار ءُ باراں پچ بہ کنت ءُ دمگی مردماں روزگار بہ دنت –

بلوچستان ءَ اے وھد ءَ ھمک جاہ ءَ روزگار ءِ ھاتر ءَ زھرشانی یکشل ءَ برجاہ اَنت ءُ مھلوک ءِ گوشگ اِنت سرکاری واکداراں روزگار بند کرتگ ءُ چریشی ءَ ھزارانی کچ ءَ مردم بے روزگاری ءَ نشتگ اَنت –

ابید جار ءُ بازیں لوڈشیڈنگ ءِ ھلاپ ءَ زھرشانی ءَ زمیندار ایکشن کمیٹی ءَ بلوچستان ءِ دراھیں بنجاھی شھدگ بند کرتگ اَنت، ھمے رنگ ءَ پنجگور ءَ ھم تیل باپاری مھلوک ءَ سی پیک دگ ءِ سر ءَ زھرشانی نندانک جتگ –

بلوچستان ءَ سرکاری ملازماں پد زمیندارانی نیمگ ءَ بازیں کچے ءَ زھرشانی کنگ بیگ ءَ اِنت – زمینداراں لکپاس ءِ ھند ءَ شال کراچی ءَ ھواریں بنجاھی شھدگ بند کرتگ ءُ نشتگ اَنت ھمے رنگ ءَ شال داں ژوب ءُ شال چمن ءِ بازیں جاہ وھدیکہ مستونگ پنچپائی ءِ ھند ءَ شال تفتان شھدگ بند کنگ بیتگ –

زمیندارانی ایکشن کمیٹی ءِ بنجاھی رھشون ھاجی عبدالرحمان بازئی ءَ گوشت سرکار زمینداراں دگانی بند کنگ ءَ لاچار کنت اِنت – آئی ءَ گوشت زمینداراں بلوچستان ءِ بازیں جاھاں کساس بیست ءُ دوجاھاں دگ بند کرتگ اَنت –

زمینداراں کولپور ءَ بلوچستان ءَ سندھ ءَ ھواریں شھدگ بند کرتگ، ھمے رنگ ءَ یارو ءِ ھند ءَ چمن ءَ شال ءَ ھواریں دگ بند کنگ بیتگ – زمیندارانی نیمگ ءَ دگانی بند بیگ ءِ سوب ءَ دگانی سر ءَ گاڑیانی لین کتاری ءَ گندگ بنت-

عبدالرحمان بازئی ءَ گوشت کہ بلوچستان ءِ سرکار بس دو اداراں بجلی دیگ ءَ اَنت – بجلی ءِ بندش ءِ سوب ءَ رُستگیں کشار ءُ زمینداراں بازیں کچے ءَ تاوانباری آماچ اَنت –

ھمے رنگ ءَ پنجگور ءَ تیل باپاری مھلوک ءَ سی پیک دگ بند کرتگ ءُ زھرشانی بندات کرتگ –

زھرشانی ءَ سیمسر ءَ تیل باپاری ءَ ھواریں کسان ءُ مزنیں گاڑیانی واھنداں سی پیک دگ ءِ سر ءَ ھاھج یاسین مارکیٹ ءِ نزیک ءَ نندانکی زھرشانی جتگ ءُ نشتگ اَنت –

زھرشانی ءَ بی این پی ءِ بنجاھی جوائنٹ سیکرٹری میر نزیر اھمد ءُ بس اونرز ایسوسی ءِ سروک آغا شاہ ھسین ءُ گوستگیں نازُم پروم عبید اللہ بلوچ ءُ دگہ سیاسی ءُ چاگردی مردم ھوار اَنت –

آیاں گْوشت دمگ ءَ ھزارانی مردمانی والینگ بس ایران ءِ سیمسری ءَ ھوار اِنت ایران ءِ سیمسر ءِ بند بیگ ءَ گاڑیانی واھند ءُ ڈرائیور دُزی ءُ ترندیانی سوب ءَ ھزارانی مردم لاچار ءُ پریشانیانی دیمپان اَنت –

آیاں گوشت کہ سیمسر ءِ کار ءُ بار پچ کنگ بہ بیت ءُ مردمانی پھزداری کنگ بہ بیت –

زانگ بہ بیت گوستگیں بازین روچاں بلوچستان ءَ نوکریاں ھوار بازیں پھناتاں مردم زورگار ءِ ھاتر ءَ زھرشانی کنگ ءَ اَنت –

سرکاری واکدار اے درچ ءَ مردمانی سدکی دیگ ءَ گندگ بیگ ءَ نہ اَنت –

جوائنٹ ایکشن کمیٹی جامعہ بلوچستان ءِ لوٹاں سرجم بہ کن اَنت، جامعہ ءَ نودربرانی یونین ءِ سر ءَ بندش ءَ نہ منّاں – جارکش

بلوچ اسٹوڈنٹس آرگنائزیشن ءِ بنجاھی جارکش ءَ وتی یک شنگ کرتگیں درشانی ءَ گُشتگ کہ جوائنٹ ایکشن کمیٹی جامعہ بلوچستان ءِ لوٹانی پلامرزی کرتگ ءُ گْوشتگ کہ جامعہ بلوچستان مالی تنگدستی ءِ آماچگاہ جوڑ کرتگ استاد ءُ ملازمینانی الاؤنسز ءِ نیمسلونگ کنگ بژنیگی یے استاد آفیسران ءُ ملازمیناں ھاؤس ریکوزیشن ءُ دگہ الاؤنسز ءَ ابید پگار دیگ ءَ اَنت –

جارکش ءَ گوشت کہ نوزدہ سد ءُ نود ءُ ھشت ءِ بنگیج ءِ رد ءَ ناجائزیں وڑ ءُ پیمانی جھد کنگ بیگ ءَ اِنت ردیں پالیسانی کرپشن ءُ ٹگی ءُ ھنرانی سوب ءَ جامعہ بلوچستان مالی تنگدستیانی آماچ بیتگ –

جارکش ءَ وتی بیان ءِ تہ ءَ گوشت کہ بلوچستان ءَ وانگی ادارہ گیشتر مزن شھدربرجاہ نزیکیں مردماں مزنجں اگدواں نادینگ ءَ اَنت دراھیں شھدربرجاھاں نودربر سیاسی پرکاریاں سرجم ءَ بندش جنگ بیتگ اَنت بی ایس او ءَ ھروھد ءَ کیمپس پالٹکس ءِ سر ءَ بندشی ءِ ھلاپ ءَ جد ءُ جھد کرتگ ءُ آؤکیں وھداں ھم دومی دیمروئی واھگداریں گلاں گوں ھوار بیت اِنت ءُ نودربرانی یونیز ءِ بندش ءِ ھلاپ ءَ جد ءُ جھد کنت –

جارکش ءَ گوشت کہ بی ایس او جامعہ بلوچستان ءَ استاد آفسر ءُ ملازمینانی جائزیں لوٹانی پلامرزی ءَ کنت کہ آ کیمپس پالٹکس ءِ سر ءَ بندشی ءُ سیاسی پُرکاریانی بندش ءِ ھلاپ ءَ جد ءُ جھد ءَ ھمراھداری کنت –

بلوچستان ءِ دمگ کیچ ءِ ھند چہ تمپ ءَ پاکستانی پوج ءَ یک مردمے درزگیر کنگ ءَ پد بیگواہ کرتگ –

سر بیتگیں ھالانی رد ءَ گوستگیں روچ ءَ پاکستانی پوج ءُ چیریں ادارھاں تمپ ءِ دمگ سرنکن ءَ شاہ دوست نامیں مردمے ءِ لوگ ءَ بیڑ برتگ ءُ زالبول ءُ چُکانی سر ءَ سر ءَ زوراکی کنان ءَ یک مردمے دزگیر کنگ ءَ پد ناشناسیں زنداناں برتگ –

دزگیر کرتگیں مردمے پجار علی ھیدر ء دلجان ءِ نام ءَ زانگ بیتگ –

زانگ بہ بیت گپتگیں ورناہ چریشی ءَ پیسر ھم پاکستانی پوج ءِ دست ءَ دزگیر کرتگ ءُ بیگواہ کرتگ ات ءُ لھتے ماھاں پد یلہ کنگ بیتگ، گوستگیں روچ ءَ یک رندے پد ءَ دزگیر کنگ بیتگ –

بلوچستان ءَ مردمانی بیگواہ کنگ ءِ درچ یکشل ءَ برجاہ اَنت داں انیگ ءَ سدانی کچ ءَ مردم چہ بلوچستان ءَ بیگواہ اَنت کہ اشانی تہ ءَ نودربر، ڈاکٹر، انجینئر، استاد ھوار اَنت –

ھمے وڑ گوادر ءَ سیزدہ اکتوبر دوھزار ءُ ھبدہ ءَ گوادر ءَ پاکستانی پوج ءُ چیریں ادارھانی دست ءَ آوار جنگ بیتگیں دشت شولی ءَ سیادی داروکیں فدا ء رحیم بکش ءُ شھنواز ء جلال خان گوادر ءَ یل کنگ بیتگ اَنت ءُ وتی لوگاں سر بیتگ اَنت –

ھالانی تہ ءَ گوشگ بیتگ کہ فدا ءُ شھنواز گوستگیں چار سالاں پیسر پوج ءُ چیریں ادارھانی دست ءَ آوار جنگ بیتگ اَنت ءُ مروچی اے دوئیں یلہ بیتگ اَنت –

دمگی مردمانی رد ءَ اے ھردوکانی ھمراھی ءَ مسلم نامیں ورنایے ھم آوار جنگ بیتگ کہ آ تنی وھدی گار ءُ بیگواہ اِنت-

دومی نیمگ ءَ بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ دو سد ءُ شست ءُ ھپت روچ سرجم بیتگ –

وائس فار بلوچ مسنگ پرسنز ءِ گوشگ اِنت بلوچستان ءَ گار ءُ بیگواھیں مردم دیم ءَ آرگ بہ بنت اگاں کسے ءَ جرمے کرتگ گڑا آئی ءَ سرکار وتی کانودانی رد ءَ آمیدگس ءِ پرمان ءَ سزا بہ دنت

دومی نیمگ ءَ گوستگیں روچ ءَ شال کراچی ءَ رؤکیں نودربر سید حاسل ءِ دزگیری ءَ ھلاپ ءَ چاگردی رسانکجاہ ٹوئٹر ءَ آئی ءِ یل کنگ ءِ واستا چاگردی رسانکجاہ کامرد کنوکانی نیمگ ءَ سیوی سید ھاسل ھیشٹیگ کامرد کنگ بیگ ءَ اِنت –

بلوچستان ءَ بندوکیں سیاسی ءُ چاگردی رسانک کارمرد کنوکانی گوشگ اِنت پاکستان بلوچانی گچین ءُ وانوکیں ورنایاں گرگ ءُ گار کنگ ءَ اِنت –

آیانی زھر ءِ درشان اِنت کہ اے تچک ءَ بلوچانی پدریچ کُشی ءِ برابری ءَ یک شوربندی ءِ چِن ءَ لانچ کنگ بیتگ ءُ ھمک نوک رُستگیں ورناہ وتی وانگی پرکاریاں ھم الکاپ ءَ دیم ءَ شُت کنگ ءَ نہ اِنت –

بلوچ اسٹوڈنٹس آرگنائزیشن ایکشن کمیٹی ءِ بنجاھی پتر ءِ نیاد ءِ درگت ءَ رسانکدراں بنداتی گپ ءُ تران پریس کانفرنس ءَ تران کنان ءَ گل ءِ رھشوناں گوشت کہ بلوچ اسٹوڈنٹس ایکشن کمیٹی ءِ دومی بنجاھی نیاد پتر بہ نام ءِ شھید پروفیسر رزاق زھری، سنگت الیاس بلوچ ءُ بنام ءِ گوستگیں کسان کمک سرکماش فیروز بلوچ 26تاں 28 مارچ 2021 ءَ کراچی ءَ برجم دارگ بیتگ- بنجاھی پتر نیاد بنداتی دو روچاں بندیں کوٹی ءَ تران ءُ سیمی روچ ءَ سوگندی برجم دارگ بیتگ –

آئی ءَ گوشت کہ بندیں کوٹی ءَ تران ءَ اولی روچ ءِ بندات گوستگیں سرکماش ڈاکٹر نواب بلوچ ءَ بنداتی ءَ تران کرتگ کہ چریشی ءَ پد گل ءِ کار ءُ کارگردی، ھال ءُ ایراد ءُ سرجمی، رھبند داری، گل ءِ لوٹ، دمگی ءُ میانی اُستمانی راجداری جاورھال ءُ آؤکیں کارانی بنگپ ءِ سر ءَ دمگانی سر ءَ باوست بیتگ –

پریس کانفرنس تران کنان ءَ دومی بنجاھی پتر نیاد ءِ سر ءَ گپ کنان ءَ بساک ءِ بنجاھی رھشوناں گْوشت: دو روچی بندیں کوٹی ءَ بنجاھی نیاد ءِ پتر ءَ دمگ سروکاراں گل ءِ گوستگیں دو سالانی کارانی زانتکاری ءَ ایراد، باوست ءُ جست ءُ پرس، رھبندی سازی ءِ بنگپ ءِ سر ءَ گل ءِ رھبند جھلانکی ءِ ھورتی ءِ ٹپاسگ ءَ پد رھبندی ءِ اژدری ءِ دیم ءَ آرگ ءُ وھدیکہ گل ءِ مُھر(لوگو) مٹ کنگ بیتگ –

آیاں گوشت کہ گل ءِ لوٹانی بنگپ ءَ انیگیں گَلی ءُ نودربر راجداری ءِ سر ءَ مزنیں جیڑوانی سر ءَ سرجمی باوست ءُ تران ءَ پد آؤکیں دو سالاں گل ءِ نیاد ءُ شَوربندی کرتگ اَنت ءُ آؤکیں بنگپ ءِ سر ءَ بنجاھی نیاد پتر ءَ آیانی منّ اِتگیں لوٹ المی کرتگ اَنت -بنجاھی نیاد پتر ءِ دراھیں بنگپانی المی باوستاں پد بنجاھی بنزہ ءُ بنجاھی کارکنوکیں پُرکارانی تچک دیم آؤرتگ –

بنجاھی نیاد پتر ءُ نوکیں نیاد بنزہ ءِ گچین کنگ ءَ گوستگیں سرکماش ڈاکٹر نواب بلوچ گچینکاری ءِ سروک نامینگ بیتگ ھمے رنگ ءَ بنجاھی گوستگیں کارگشاد سلمان بلوچ ءُ شال ھنکیں گوستگیں سروک ذکیہ بلوچ گچینکاری ءِ باسک نامینگ بیتگ اَنت – گچینکاری ءِ بنجاھی بنزہ ءُ بنجاھی پرکارانی باسکانی واستا گچینکاری کرتگ گڑا چریشی ءَ ڈاکٹر صبیحہ بلوچ گل ءِ سروک، شبیر بلوچ کسان کمک سرکماش، آصف بلوچ کارگشاد، ھالد بلوچ کسان کمک کارگشاد ءُ عارف بلوچ دودمان ھالرسان ابید دیم ءَ اوشتوکی ءَ دارگ بیتگ اَنت ھمے رنگ ءَ بنجاھی کمیٹی ءِ واستا ڈاکٹر سمیہ بلوچ، رفیق بلوچ، یاسر بلوچ، وحید عباس، اعجاز بابا ءُ اظھر بلوچ ابید دیم ءَ اوشتگی ءَ دارگ بیتگ اَنت –

آئی ءَ گوشت کہ بنجاھی کونسل سیشن ءِ سیمی روچ ءَ سوگندی دیوان بیتگ کہ چریشی ءَ گچینی ءِ مھمان بلوچ کواس مھمد الی تالپور بیتگ، سوگندی تران ءَ گوستگیں سروک نواب بلوچ ءَ اتکگیں مردمانی دیم ءَ تران کرتگ چرشی ءَ پد نوک گچین بیتگیں کابینہ ءَ گوستگیں سروک ڈاکٹر نواب بلوچ ءِ دستاں سوگند زرتگ –

دیوان ءَ سوگندی ءَ اتکگیں مردمانی دیم ءَ دیوان ء گچینی ءِ مھمان استاد مھمد علی تالپور، پروفیسر ڈاکٹر منظور بلوچ، خرم علی نیئر ءُ نوک گچین بیتگیں ڈاکٹر صبیحہ بلوچ ءَ تران کرتگ –

ھمے وھد ءَ سوگندی ءِ وھد ءَ بساک ءِ سَے ماھی تاک “ نوشت ” ءِ دیمدراھی بیتگ ءُ سُرسنگار ازمی مجلس ءِ نیمگ ءَ مرتگیں چاگرد ءِ بہ نام یک تلوی ڈرامہ پیش کنگ بیتگ ھمے رنگ ءَ سوگندی ءَ گڈی ءَ “ ساز ءُ زیملی دیوان ” برجم کنگ بیتگ کہ چریشی ءَ بلوچ گشندہ استاد خالق فرھاد، استاد سلیم بلوچ ءُ ثناء ساحل ءَ وتی جوانیں ازمی ءَ وشنودی کرتگ –

پریس کانفرنس ءَ گپ کنان ءَ نوک گچین بیتگیں سروک ڈاکٹر صبیحہ بلوچ ءَ گوشت کہ من پہ یک نوک گچین بیتگیں گل ءِ سرکماشی ءِ سوبمندی ءَ کونسل سیشن ءِ دراھیں باسک، گل ءِ گوستگیں بنزہ، بلوچ نودربر، وتی شرپمندیں استاد ءُ بلوچ راج ءَ مراد باتی گوش آں ءُ من سرپد باں بلوچ اسٹوڈنٹس ایکشن کمیٹی ءِ سوبمندی ءِ کونسل سیشن گل ءِ سسا پگر ءُ پھتوئیں باسکانی جد ءُ جھدانی برورد اَنت ءُ ھمے سسا پگریں باسکانی جد ءُ جھد ءِ برورد ءَ مروچی گل ءِ بنزہ مھکمیں رنگے ءَ اوشتاتگ –

آئی ءَ گوشت کہ ما سرپد بہ ایں بلوچ اسٹوڈنٹس ایکشن کمیٹی ءِ سوبمندیں کونسل سیشن بلوچ نودربر راجداری ءَ یک جوانیں گامگیجے ما ھمے اھد ءِ ھمراھی ءَ در اتکگ اِنت بلوچ نودربر راجداری ءِ ھستیں جیڑھاں سسائیں پگر ءِ ھمراھی ءَ دیمپانی ءَ کن ایں ءُ مروچی بلوچ نودربرانی راجداری سسائیں پگر ءِ بنھشتاں برجاھیں راجداریں جد ءُ جھد ءِ ھلاس کنگ ءَ مپتیں رویشاں زور کُٹینگ ءَ اَنت نودربراں مھکمیں راجداری ءِ جد ءُ جھد ءِ مٹ ءَ بھر ءُ بانگی ءِ راہ ءَ پیشدارگ ءَ اَنت –

نوک گچین بیتگیں سرکماش بلوچ اسٹوڈنٹس ایکشن کمیٹی صبیحہ بلوچ ءَ گوشت کہ ما نودر راجداری ءَ ھستیں وتگڑیں راجداری ءُ وتگڑیں گلی رویشاں چیلنج کنگ ءَ مھکم اِنت پرچاکہ ما سرپد بہ ایں بلوچ چاگرد ءِ جوڑیشتی ءُ دیمروئی ءِ واستا اژدری اِنت بلوچ ورنایاں زانت ءِ دیمروئی ءِ دوست راجداری ءِ سسائی ءِ بنریشگاں گوں بہ بیت اگاں مروچی بلوچ ورناہ وتمانی، پروری ہیروازم ءُ وش کنوکیں اوگامانی آماچ بیت اَنت گڑا اے مئے اجلی زوال بیت اِنت –

آئی ءَ گوشت کہ بلوچ اسٹوڈنٹس ایکشن کمیٹی ءِ نودربر راجداری ءِ انیگیں اے وتگڑیں رویشانی ھلاسی ءِ واستا سسائیں پگر ءُ گلی بنریشگانی سر ءَ زانت ءُ زانشتی راجداری ءِ شاھانی تُرکینگ ءَ وتی دراھیں توان ءَ المی کنگ ءُ بلوچ اسٹوڈنٹس ایکشن کمیٹی ءِ راجداری پند مھکم ءُ مھکمیں راجی ادارھانی بردست اِنت –

آئی ءَ دیمتر ءَ گوشت کہ ما سرپد بہ ایں گسر بیتگیں راجی دیم ءِ واستا مھکمیں ادارھانی گون ءَ بندوکیں اِنت ابید مھکمیں ادارھاں راجی ءُ چاگردی دیمروی المی نہ اِنت ھمے رنگ ءَ بلوچ چاگرد ءَ گیر اداراتی سنچ ءَ تُرکینگ ءَ اَنت اے سوچ ءِ دیم ءَ دیوال ءِ پیم ءَ اوشتگی اِنت وھدیکہ مروچی بلوچستان ءَ نودربر ناگیگیں جاورھالانی آماچ اَنت بلوچستان ءِ جاوراں کہ وھدے کسے ءِ چم اَنت گڑا ما یک تچکی ءَ گُشت کن ایں یک زانوکیں رنگے ءَ شوربندیں وڑے ءَ بلوچ چاگرد تھاریں کڈ ءَ دور دیانی ءِ آماچی ءِ کنگ ءَ وانگی لڑا کرناں پُشت کنان اَنت –

آئی ءَ گوشت کہ بلوچ اسٹوڈنٹس ایکشن کمیٹی ءِ اے وانگی نزام ءَ “سیاہ ءُ تھاریں وانگی نزام ” گوش ایت ءُ اے نزام ءُ وانگی پشتکپی ءِ ھلاپ ءَ جد ءُ جھد ءَ وتی المی سرپد بیت اِنت ما اے سنگینی ءِ سر ءَ بلوچ راجدوست ءُ دگہ نودربر گلاں گوش ایں کہ اے وھد ءَ ما وتی دراھیں تھ ئِے جیڑھاں ھلاس بہ کن ایں “ سیاھیں تھاری ءَ وانگی نزام ءِ ھلاپ ءَ ھمسنتی ءِ جد ءُ جھد ءِ راہ ءَ ھوار کنگ اِنت –

پریس کانفرنس ءَ گڈی ءَ صبیحہ بلوچ ءَ گوشت ما اے پریس کانفرنس ءِ زور ءَ بلوچستان ءِ دراھیں راجدوست ءُ دیمروئی دوستیں نودربر گلاں گوش ایں کہ بلوچ اسٹوڈنٹس ایکشن کمیٹی ءِ بلوچستان ءِ نودربراں درپیشیں سنگینیں جیڑھانی گشینگ سنگل ایجنڈہ ءَ دراھیں گلاں ھمسنتی ءِ جد ءُ جھد ءِ ساجو ایں ءُ ما زوت بلوچستان ءِ نودربرانی سنگینین جیڑہ ءُ آیانی گشینگ ءَ دراھیں نودربر گلاں یک درافٹ نودربر جیڑھانی گیشینگ ءَ ھمسنتی ءِ جد ءُ جھد ءِ امیتی ءَ سر کن ایں –