TBP Balochi

سیکی بازار ءَ پاکستانی پوج ءِ سر ءَ اُرش کُتگ دو کارمند کُشتگ ءُ دو ٹپی کُتگ اَنت – میجر گْوھرام بلوچ

سربوتگیں ھالانی رِد ءَ گوستگیں شپ ءَ ناشناسیں سلاہ بندیں مردماں پنجگور ءِ دمگ پروم ءَ پاکستانی پوج ءِ سر ءَ اُرش کُتگ –

اُرش پروم ءَ سیکی بازار ءَ پاکستانی پوج ءِ سر ءَ کنگ بوتگ چریشی ءَ پاکستانی پوج تاوان بار بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں گوَستگیں شپ ءَ پنجگور ءِ دمگ پروم ءَ سیکی میتگ ءَ پاکستانی پوج ءِ یک گاڑی ءِ سر ءَ مزنیں سلاھانی گون ءَ اُرش کتگ، چریشی ءَ چہ پوج ءِ دو کارمند ھما جاہ ءَ مرتگ ءُ دگہ دو سک زدگ بوتگ اَنت-

جارکش ءَ گْوھرام بلوچ ءَ دیمتر ءَ گوَشتگ کہ زورگیریں پوج ءِ دو گاڑی بوتگ اَنت آھاں چہ یک گاڑی سیکی میتگ ءَ اوشتاتگ کہ ھمے وھد ءَ سرمچاراں آئی ءِ سر ءَ اُرش کتگ- دو پوجی کارمند گاڑی ءَ چہ ڈن اوشتوک بوتگ اَنت کہ اُرش ءِ آسرا ھمے دوئیں کارمند جاہ پہ جاہ ءَ مرتگ اَنت وھدیکہ گاڑی ءَ سواریں دگہ دو کارمند سک زدگ بوتگ اَنت –

گُڈسر ءَ آئی گوَشتگ کہ بلوچستان ءِ آجوئی ءَ تاں زورگیریں پاکستانی پوج ءِ سر ءَ مئے اُرش برجاہ مان اَنت-

سربوتگیں ھالانی رِد ءَ بلوچستان ءِ دمگ ڈیرہ اللہ یار ءَ میر دوران خان کھوسہ میتگ ءَ لین ءِ تارے سِدگ ءُ کپگ ءَ بیست دھکانکارانی گِس سُتکگ ءُ پُر بوتگ انت –

گیشیں ھالانی رِد ءَ مروچی چار شمبے ءَ میر دوران خان کھوسہ میتگ ءَ گوات ءِ تیز بوگے سوب ءَ لین ءِ تار سستگ انت ءُ دھکان کار ءِ گِس ءِ سر ءَ کپتگ اَنت چریشی ءَ دھکان ءِ گِس بُنگپتگ ءُ آس ءِ برانزاں دومی دھکانکارانی گِس ھم گپتگ ءُ چریشی ءَ کساس بیست ءَ چہ گیش گِس ستکگ ءُ پُر بوتگ اَنت –

بزگر ءُ دھکان کاراں وتی کمک ءِ وت زِلّوانی سر ءَ آپ کشیتگ ءُ آس توسینگے جُھد کُتگ- بلے انگت آھانی وس ءَ نبوتگ –

ھال ءِ سربوگ ءَ جعفرآباد ءِ ڈپٹی کمشنر رزاق خان خجک ءَ ڈیرہ اللہ یار ءِ میونسپل فائر برگیڈ چیف افیسر سلیم خان ڈومکی آس کُشگے ھاتر ءَ ھال کُتگ –

ڈیرہ اللہ یار میونسپل کمیٹی فائر برگیڈ ءَ وت ءَ وئیل جاہ ءَ سر کُتگ بازیں ادار ءَ پد آس توسینتگ –

اے درگت ءَ دمگے زمیندار میر دوران خان کھوسہ ءِ گوشگ انت کہ آس لگگ ءِ سوب ءَ مئے دھکان کارانی گِس ءُ آھانی وردنی ءُ دگہ سامان سُتکگ انت ، دھکان کار اے گرمی ءَ بے سر ءُسامانی نشتگ ءُ ھکومتی کمک ءِ ودار ءَ انت، دمگی انتزامیہ ءُ صوبائی حکومت ءَ لوٹ ایت کہ اشانی تاواناں پُر بہ کنت ءُ اشاں کمک بہ کنت –

نبشتانک: جنز ءِ ھمراھاں ھمگام اَت

نبشتہ کار: شیردل بلوچ

دی بلوچستان پوسٹ

لھتیں انچیں کارست ھست کہ ھچبر بے ھیال کنگ نہ بنت، اگاں مردم ند ءَ چست مہ کنت، گڑا لھڑیں پاھار باتن ءَ بے تاھیر کن اَنت، راستی پدر کنگ بیت اگاں کسے وتی زند ءِ سرجمیں واھشتاں پہ وتی راج ءِ وشیں باندات ءِ واستا ندر بہ کنت، گڑا ھما راجدپتر ءِ تہ ءَ ابدمان بیت ءُ آ راج ءِ نام ءُ شان زانگ بیت۔

بلوچ راج دپتر انچیں پرزندانی کسھاں سرکیل اَنت، پہ لج ءُ ننگ ءَ ھیشی سرانی کربان کنگ کوماں زند بکشائیت، مرچی بلوچ مات ءُ گُھار ، ورنا ءُ کماش راجی جھد ءِ پڑ ءَ دراھیں تھراں گوں اَنت، آشوبی تب ءِ دارگ سوبمندی ءِ پدیانک بوت کن اَنت ءُ تپاکی المی اِنت، تپاکی ءَ ابید منزل ءِ سر بوگ وابے ءُ ھیالے زانگ بیت۔

من چہ دوھزار شش ءُ ھپت ءَ راجی جھد ءِ جنز ءَ چارگ ءُ گندگ ءَ آن ءُ اے ھبر باز اُشکتگ چہ لھس مھلوک ءَ بگر داں گلانی باسک ءُ رھشوناں!
ھمے گوشتگ اِش سوبمندی ءِ واستا مارا یکمشت بوگ لوٹ اِیت انچو یک جان بوگی اِنت ، چُش کہ لنکُک ءِ درد تیوگیں بدن ءَ را سما بیت، ھمے پیم ءَ راجی درد، گلامی ءِ مارشت، ھور جنزگ راجی آجوئی ءِ وشیں باندات ءِ مستاگ بوت کنت ۔

راجی شھیدانی کارست بے درور اَنت، چہ ھمے شھیداں یکے شھید” مھمد اپزل اُرپ ء گورگیج بلوچ اِنت واجہ ءِ آریپیں پِت ءِ نام بشیر اھمد اِنت، آ ماں نوزدہ سد ھشتاد ءُ نُھ ءَ ودی بوت ءَ ءُ آواران کلّرو ھاجی شمبے ءِ میتگ ءَ جاہ منند اَت ءُ بُنکی وانگ ءُ زانگ چہ آواران ءَ دَربرتگ ئِے ، وھدیکہ من گوں آئی اولی رند ءَ پائو گُڈوپ ءَ سنگتے گس ءَ ڈیک وارت ، منی نزّ ءَ دوھزار سیزدہ اَت ءُ زمینچنڈ ءَ رند اَت، آئی ءِ نام ءَ را چد ءُ ساری اُشکتگ اَت ، آئی ءِ نہ ترس ءُ دلیری ءِ گپ بوگ ءَ اَت، اے ھمے دَور ءَ آواران ءِ دمگ ءَ روچ پہ روچ جاور ھال نگیگ بوان اِت اَنت، سرجمیں دمگ پوجیانی بُنجل جوڑ اَت ، چہ کوچگاں جھدکاریں سنگت یک کر بوان اِت اَنت، مردمانی در پہ دری بندات بوت، ھر روچ بے گناھیں مردمانی گرگ ءُ لٹ دیگ ءُ گسانی آس دیگ بوگ ءَ اَت اَنت، ھر روچ زوراکی ءِ نوکیں ھال اُشکنگ بوان اَت۔

دومی رند ءَ دوھزار پانزدہ ءُ شانزدہ ما کولواہ ڈیک وارت ءُ منی ءُ آئی ءِ نزدیکی وداں بوت، گڑا ما ھر روچ یکجاہ بوت ایں” گورگیج ھاموش تب اَت، مھروانی ءَ ابید بھادریں سنگتے اَت،اے گپ من باز جاھاں اُشکتگ اَت بھادر سادگ بیت، لُچ ءُ لالچی نہ بیت، آئی توک ءَ سادگی ھست اَت، اگاں جاھے ءَ رد کپتگ بزاں دھوکہ ئِے وارتگ اَت گڑا اے آئی ءِ سادگی بوتگ-

وھدیکہ آئی پِت ءَ را بزاں “بشیر اھمد ءَ پوج چست کنت سالے ءِ نزدیک ءَ زنداں بیت ءُ گورگیج ءِ نیمگ ءَ کلوہ دیم دینت ءُ گوش اَنت ئِے بیا لگور بہ بو تُپنگ ءَ دَور دے ،اگاں نیاتک ئے تئی پِت ءِ کُنٹ دور دیگ بیت، کھول ءِ مردم لاچار ئِے کن اَنت ءُ گوش انت ئِے تو بیا نیا ئے تئی پِت ءِ کُنٹ ءَ دَور دینت، اے دراھیں گپّ آئی گوشاں نہ پتر اَنت ءُ مردم گوں گورگیج زَھر بنت ءُ گورگیج وتیگاں چہ گستا بوت ءُ گوں راجی جنز ءِ ھمراھاں ھمگام بوت ۔

سی ءُ یک بھاران دوھزار ھژدہ ءَ ٹوھیں لشکر کشی ءِ تہ کپ اِیت ءُ آئی ءِ ھمراہ شھید شئیب جان اُرپ لکی بلوچ بیت، لشکر ءَ گوں ڈیک وارت اِش ءُ دیم پہ دیم دُچار کپت اَنت ءُ جنگ بندات بیت، ھمے میانجی ءَ دگہ دو سنگت جنگ ءِ تہ ءَ کپ اِیت ءُ جنگ سک ءَ دراجکَش بیت لشکریانی کُمک ءَ بالگرد کا اَنت ” لکی جان ، ھوار سئے سنگت زدگ بیت، بَلے! لکی جان ءَ گورگیج داں گُڈی ساھتاں سمبال اِیت گڈسر ءَ لکی جان آئی چَمانی دیم ءَ شھید بیت، پوجیگ ھمے ھال ءَ شنگ ءُ تالان کن اَنت کہ گورگیج ھم جَنگ بوتگ، آیاں گورگیج ءِ گوشی بزاں( موبائل ) پوجیگانی دست ءَ کپتگ اَت، کھول ءِ مردم نادراہ جاہ ءَ رو اَنت ءُ پَٹ ءُ پول کن اَنت، گندگ نہ بیت، پوجیگ کُنٹاں ھچ کس ءَ را پیش نہ دار اَنت، شک انچو بیت کہ گورگیج زدگ اِنت، جنگ جاہ دَر کپتگ ءُ بوت کنت، دگہ جاھے ءَ کپتگ ءُ شھید اِنت، سنگت پَٹ ءُ پول ءَ ئِے بنا کن اَنت، سیمی روچ وت کیت راھسرے گندگ بیت تُن گژن ءَ باز تکانسر اَت، لاگر ءُ بے ھاٹیگ اَت، بھادرے اَت، بچکندگ ءَ اَت روہ ئِے پُرنور اَت۔

پندل سازیں ” اِستان ءَ گوں وتی دلاراں پُشت ءَ ئِے کپتگ اَت، بیست ءُ ھشت اُستپان دوھزار بیست ءَ ماں سیستاں بلوچستان ءِ دَمگ سراوان ءَ شھید کنگ ءَ ئِے بے مراد سوبمند بنت، بلوچ راج چہ تمردیں جنگولیں پرزندے دائم ءَ جُتا کنگ بیت، راج گمیگ بیت دژمن شادان بوت اَنت۔

مات شھیدی ءِ ھال ءَ ئِے سھی بیت ، گُڑا ھمے وڑ گوش اِیت من ءَ منی زھگ ءِ مرگ ءَ یکیں ھبرے ءَ تور اینت کہ آ گوں لگوریں دژمناں جنگ ءِ پڑ ءَ جَنگ نہ بوت، بزاں کہ راجی سنگر ءِ تہ ءِ دلار ءُ لگوراں پہ دُز جنگی ءَ جت ،من ءَ بس ھمے یکیں ھبر درد اِنت ھو بوت کنت، زانگ نہ بیت ساھگریں ملکموت کدی کیت ءُ ساہ ءَ ئِے پچ گپت؟- ساہ کئی دست ءَ گرگ بیت ءُ کجا بیت؟ – آجوئی ءِ جھد ءِ پڑ ءَ شھید بوگ مزن نامی یے چیدگ اِنت ۔

شھید مھمداپزل اُرپ گورگیج بلوچ ءَ ھوار راج ءِ شھیداناں سھرچکیں دروت گوشاں آجوئی جنز ءِ شھید نمیران انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءُ بندوکیں بوکسور مستپا ریگی جھانی بوکسنگ پولینڈ ءَ دیم دیگ ءَ نامینگ بیتگ –

مھمود نھتانی گوشگ اِنت کہ مستپا ریگے ایران ءِ راجی بوکسنگ ءَ ھوار کنگ بیتگ ءُ آ دَہ روچ ءَ رند جھانی بوکسنگ ءَ دیم دیگ بیت اِنت –

مستپا ریگی کَے اِنت؟ مستپا ریگی ءِ اُمر بیست سال اِنت آ روکپتی بلوچستان ءِ بنجاھی شھر زاھدان ءَ ودی بیتگ –

ھمے وڑ ءَ پنچ سال ءَ پیش آئی ءَ تھران ءَ بوکسنگ ءِ وھد ءَ کسانیں زھگانی بوکسنگ ءِ میان ءَ آئی ءَ تلاہ ءِ داد رس اِتگ –

روکپتی بلوچستان ءَ بندوکیں مردمانی گوشگ اِنت ورنایانی تہ ءَ مستپا ریگی ءِ رنگیں ورنا نیستی ءِ ھساب ءَ اِنت اے اولی ورناہ اِنت آئی ءَ اے کَچ ءَ جھد ءُ جَپا کرتگ ءُ دیم ءَ شتگ –

سر بیتگیں ھالانی رد ءَ بلوچستان ءِ دمگ مستونگ ءَ دگ ءِ وئیل ءَ بلوچی زبان ءِ شائر گل جان ء عبدالباقی بیران بیتگ ءُ دو کس زدگ بیتگ اَنت –

وئیل مستونگ ءَ میجر چوک ءَ دیم ءَ اتکگ کہ اود ءَ پرپٹانی ڈیگ ورگ ءَ بلوچی زبان ءِ شائر گل جان ء عبدالباقی ءَ ھوار سَے زدگ بیتگ اَنت، زدگ بیتگیں مردم نادراہ جاہ ءَ سرکنگ بیتگ اَنت ءُ اود ءَ گل جان ءَ درد نہ سگ اِتگ ءُ ساہ داتگ اَنت –

بلوچستان ءَ ھمک روچ بیتگیں دگ وئیلاں مھلوک پہ سپر کنگ ءَ ترس ءُ بیمی اَنت ھمک روچ پیش اتکگیں وئیلاں بازیں ھسابے ءَ مردمانی بیرانی ءُ زدگ بیگانی ھال یکشل ءَ چاگردی رسانکجاھاں شنگ اَنت –

گوستگیں روچاں نوشکی ءُ پنجگور ءَ دگ ءِ وئیلانی ھلاپ ءَ آل پارٹیز ءَ زھرشانی کرتگ ءُ گوشتگ کہ سرکار ھما کچ ءَ بے وس بیتگ کہ بلوچستان ءَ سپر کنگ یک مرگے ءِ ساہ ءِ گرگ جوڑ بیتگ –

آیاں گوشتگ اَت کہ سرکار اگاں دگانی سر ءَ بیوکیں وئیلانی بارہ ءَ گامیج نہ زور ایت گڑا اے زھرشانی درچ دیم ءَ گیش کنگ بیت اِنت –

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانی ءَ شال ءِ پریس کلب ءِ نوک گچین بیتگیں کابینہ ءَ را مراد باتی گوشتگ ءُ کہ اھوالکاری ءِ رھبنداں شریں رنگے ءَ پیلو کنوکیں بلوچستان ءِ اھوالکاری ءِ کرد ستاکرزی اِنت –

آئی ءَ گوشت کہ انیگیں دور ءَ اھوالکاری یک ھنچیں تَکے کہ اشی ءَ انسانانی زندگی بندوک اِنت – اھوالکاری ءِ درچ ءَ چاگرد ءَ ھمک روچ جنزوکیں جوانیاں چارگ ءُ اھوالکارانی سنچ داریں کرد ءِ نہ کُٹوکی درکاری ءَ روان اِنت – اھوالکاری ھما تک اِنت کہ مھلوک ءِ مازگانی تہ ءَ جُھلانکیں کرد ءِ پِرینوک اِنت ءُ مھلوک ءِ لڑانی تہ ءَ ھر تک ءَ بے تھمبلی ءِ آماچی ءَ کپان اَنت بلے اھوالکاری ءِ ھمک تکاں چریشاں ھوار کپگ ءُ وتی زمہ واریانی تہ ءَ گیشی کنان اَنت –

آئی ءَ گوشت : مروچی اے دور ءَ کہ اود ءَ یک نیمگے ءَ بلوچستان ءَ رسانکدر بند کنگ بیتگ اَنت اھوالکارانی پُرکاریانی راہ ءِ دیم ءَ ڈنگر جنگ ءُ جتائیں ترسینگانی کارمرد کنگ بیگ ءَ اَنت ءُ دومی نیمگ ءَ بلوچستان ءِ اھوالکار چہ وت ءَ وتی پرز ءَ پیلو کنگ ءَ اَنت، بلوچستان ءِ اھوالکارانی اے ناگیگیں دور ءَ آیانی بے کچوئیں کرد ستاکرزی اِنت –

آئی ءَ وتی درشانی ءِ گڈی ءَ گوشتگ کہ ما یک رندے پد ءَ نوک گچین بیتگیں سروک عبدالخالق رند ءُ جنرل سیکرٹری بنارس خان ءَ ھوار کابینہ ءِ آ دگہ باسکاں مراد باتی گوش آں ءُ امیت داراں کہ نوک گچین بیتگیں کابینہ المی ءَ داران کن اَنت ءُ پلگاریں رنگے ءَ جد ءُ جھد ءَ جنزان بنت –

بلوچ لبریشن آرمی ءِ جارکش جیئند بلوچ ءَ ناشناسیں جاھے ءَ رسانکدراں گوں گپ کنان ءَ گوشتگ کہ بی ایل اے ءِ سرمچاراں گوستگیں روچ ءَ شال ءِ دمگ زرغون ءَ اشکرانی کھن ءُ آئی ءِ پھزداری کنوکیں لیویز پوسٹ ءِ سر ءَ اُرش کرتگ – طور شار ءِ ھند گھاٹ ءَ کُرتگیں اُرش ءَ لیویز کارمنداں وتی پوسٹ یلہ کرتگ ءُ تکگ اَنت ءُ سرمچاراں لیویز کارندھانی پوجی ساز ءُ سامان دستیگ کرتگ ءُ اشکرانی کھن ءِ مشینری مانداشتگ اَنت –

آئی ءَ گوشت: چریشی ءَ پیسر بی ایل اے سرمچاراں بیست ءُ شش مارچ ءَ طالب لیز دمگ ءُ کھوسٹ ءِ ھند ءَ اشکرانی کھن نشانگ کرتگ – اُرشانی زمہ واری ءَ بلوچ لبریشن آرمی منّ ایت –

آئی ءَ دیمترا گوشت: بلوچ لبریشن آرمی اشکرانی کھن ءِ ٹھیکداراں گشین اِیت ءُ گوش ایت کہ آ زورگریں پوج ءِ کمک ءَ بند بہ کن اَنت، گوستگیں روچاں اُرش کرتگیں اشکرانی کھن ءِ ٹرک کارمرد بیتگ ءُ پوجی کارمند لس مردمانی دروشم ءَ بیتگ ءُ ھرنائی ءُ کَش ءُ گوری دمگاں سر بیتگ ءُ پوجی آپریشن ءَ بھر اش زرتگ، بلوچ آبادیانی سر ءَ بیوکیں اے آپریشن ءَ اشکرانی کھن ءِ ٹھیکدارانی کمک تچکی ءُ دشمنیں پوج ءَ گون بیتگ –

جارکش ءَ گوشت کہ ھما اشکرانی کھن ءِ ٹھیکیدار زورگریں پوج ءِ گون ءُ ھمکوپگ اِنت آئی ءَ ھرچ رنگ ءَ بلوچ راجی آمیدگس ءَ سزایانی دیمپانی کنگ کپ ایت – ما دشمن ءِ ھمکاریں دراھیں ٹھیکیداراں سرپد کن ایں کہ آ شکرانی کھن ءِ کار ءَ بند بہ کن اَنت اگاں ناں گڑا جانی تاوانانی زمہ وار وت اَنت –

جارکش ءَ گوشت کہ دومی نیمگ ءَ لیویز کارمنداں ھمک وھد سرپد کنگ ءَ ابید ھم بلوچ سرمچارانی دیم ءَ اوشتانک بیگ ءَ اَنت چریشی ءِ سر ءَ آیانی سر ءَ اُرش کرتگ ءُ اگاں سرپد نہ بوت اَنت گڑا اے اُرش ترند کنگ بنت –

نبشتانک: لالا مُکتار جان ابدمان بوت

نبشتہ کار :مِرزُک بلوچ

دی بلوچستان پوسٹ

منءَ یات اِنت 2014 ءِ سال ءَ وھدے پاکستانی لشکر پروم ءَ کہ ایر کپت ءُ میتگ پہ میتگ گردگ ءَ اَت لوگ پہ لوگ کماش ءُ ورنایاں لٹ ءُ کُٹ کنگ ءَ اَت وتی بیم ءَ مھلوک ءِ دل ءَ سرکنگ ءِ جُھد ءَ اَت مھلوک ءَ را ھمے گُشگ ءَ اَت وتی سرمچاریں زھگاں بیار اِت چینکس سنگت کہ شھران اَت اَنت آ ھم کوہ ءَ شُت اَنت کہ شھر ءَ دگہ جنجالے مہ بیت منی برات ھم شھری سنگتے اَت آ ھم گار بوت گڑاں ابا ءَ ءُ منی گوھار ءَ من ءَ جُست کُرت کہ تئی برات کُج ءَ اِنت من گُشت آ گوں وتی سنگتاں سگار کنڈ ءَ پکنک ءَ شُتگ ابا ءَ گُشت اے ھالتانی تہ ءَ پکنک ءَ شُتگ؟ من پہ دروگ ابا رازی کُرت شپ کہ بوت اباءَ پد ءَ من ءَ جُست کُرت شپ ءَ نئیت ؟ من گُشت نا دومی شپ گوست پد ءَ سیمی شپ کہ بوت گُڑاں پد ءَ من ءَ جُستے کُرت من دروگ بست ءُ اباءَ سک زھر گپت شپ ءِ 3 بج ءَ موٹرسیکلے توار بوت من زانت کہ برات اِنت وتی سیکل چہ دور ءَ بندے کُرت کہ ابا مزانت من شُتاں دیمایے ءُ گُشت ابا تئی سر ءَ سک زھر ءَ اِنت گڑاں تُپنگے چیر دات ءُ لوگ ءَ اتک اباءَ سک زھر گپت ءُ گُشت ھالتاں بچار انگت تو ابید پکنک ءَ نہ بئے ھیر ابا شُت وپت گُڑاں برات ءَ گُھار گُشت من ءَ سنگت گون اَنت آ کوچگ ءَ اَنت سک شُدیگ اَنت گُھار ءَ ورگ شر کُرت برات ءِ شلوار ءِ پادگ پہ ربڑ بستگ اَت اَنت گُھار ءَ دوتک اَنت برات ءَ من ءَ گُشت تو ورگ آں سیکل ءِ سر ءَ ایر کن من داں تُپنگ ءَ کار آں من ورگ سیکل ءِ کر ءَ بُرت آں برات اتک ما ھدا ھافظی کُرت۔

8 ماہ گوست پد ءَ ما وتی برات ءِ چارگ ءَ شُت اِیں برات ءِ پاد تراول اَت اَنت گُھار ءَ دیست گُڑاں گُشت من مِرات آں لالو تئی پاداں چے بوت ءَ برات ءَ گُشت مئے سر ءَ بالی گُراباں اُرش کُرت ءَ من ءَ وار نہ بوت ءَ کہ وتی بوٹاں پاد ءَ بہ کن آں بس شپاد ءَ در کپتگ آں ما کُلیں سنگت یک پہ یک بوتگ اِیں من 3 روچ ایوک ءَ بوتگ آں تھنا من ءَ وتی تُپنگ گون بوتگ داں 3 روچ ابید پیشّانی کونش آں دگہ ورگ نہ بوتگ پد ءَ سنگتاں من ءَ پد جتگ ءُ دست گپتگ پمیشکہ انگت منی پاد تراول اَنت ما دو روچ نشت اِیں رند ءَ برات ھدا ھافظ کُرت ءُ در کپت اِیں۔

3 ماه ءَ رند منی ناکو ءَ من ءَ گشت ھرچ وھد ءَ مُکتار فون کنت من ءَ ھال بہ دئے من ءَ کارے ھست 4 ماه ءَ پد برات ءَ فون کُرت ما برات گهاراں گپ کُرت من پد ءَ ناکو ءِ ھیال ءَ کپت آں ءُ برات ءَ را گُشت فون ءَ کٹ مہ کن ئے ناکو ءَ روچے گُشتگ آرا گوں تو کارے ھست برات ءَ گُشت شریں جلدی توارے کن من ناکو توار کُرت بلئے فون اسپیکر ءِ سر ءَ اَت گُڑا ناکو ءَ سلام ءُ دعا کُرت پد ءَ گشت ئِے بیا وتارا لشکر ءِ دیم ءَ پیش کن اگاں پیش نہ کن ئے گُڑاں منی ءُ تئی ھچ سیادی نیست برات ءَ گشت ناکو تئی برات زهگ ءَ را گوں وتن ءَ اشک انت من ءَ ھچ سیادی چہ زمین ءِ سیادی ءَ جتا کُرت نہ کنت منی سیاد ،منی سنگت منی گلزمین اِنت ھمد ءَ ناکو ءَ فون کٹ کُرت۔

پد ءَ دیر دیر ءِ سرءَ گوں لالا ءَ گپ بوتگ2017 ءَ رمزان ءِ 15ءِ شپ ءَ من ءَ سنگتے ءَ فون کُرت کہ پاکستانی لشکر ءِ ءُ سنگتانی میان ءَ جنگ بوتگ ءُ مُکتار جان شھید بوتگ بس ھمے گپ ءَ ھوار منی چمانی اَرس یلہ بوت اَنت من ھرچ وڑ جُھد کُرت من ءَ پاداں گس ءِ نیمگ ءَ نہ بُرت منی چم سیاہ بوتاں ءُ دل تُست من کمیں کور ءِ تھ ءَ نشت آں ھمد ءَ منی تروزتک اتک من ءَ دست ءَ گپت ئِے ما لوگ ءَ سر بیتاں چار آں کُل پیسر ءَ گریوگ ءَ اَنت اے تیوگیں شپ ما پہ گریوگ گوازینت رند ءَ زمین ءِ دوستیں سالونک ءَ را آؤرت اِش آئی جان ءَ را شُشت اِش ءُ منی گُھار ءَ وتی لاڈکیں برات رُکست کُرت رند ءَ من، منی کستریں برات،ابا جان ءُ میتگ ءِ مُردماں مُکتار جان ءِ نماز جنازہ ءَ پد مُکتار جان پہ مُجتی زمین ءِ باھوٹ کُرت بلئے من ءَ انگت اے گپ باور بوگ ءَ نہ اَت کہ منی لالا چہ ما پہ مُدامی سستگ ءُ شُتگ جنازہ ءَ رند کُلیں مُردم شُت اَنت بس تھنا مئے کھول ءِ مرُدم پشت کپت اَنت اباءَ کستریں برات ءِ دست گپت ءُ شُت من زانت کہ من وتی لالا پہ مجُتی گلزمین ءِ باھوٹ کُرتگ من باز پریات کُرت منی چم تھار بوت اَنت منی تروزتک ءَ گُشت بہ رویں من گُشت لالا ھمد ءَ اِنت ما کُجا رو اِیں؟ آئی ءَ گُشت لالا نوں گلزمین ئیگ اِنت پاد ءَ بہ رویں ما چہ ھمد ءَ لالا رُکست کُرت ءُ در کپت اِیں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں روچ ءَ کیچ ءِ سامی ءَ ناشناسیں سلاہ بندیں مردماں پاکستانی پوج ءِ بنجل ءِ سر ءَ اُرش کرتگ-

دمگی مردمانی رد ءَ اُرش ءَ دمگ ءَ بازیں وھداں تراک ءُ تیرانی توار بیتگ- دومی نیمگ ءَ بلوچ سلاہ بندیں گل بلوچستان لبریشن فرنٹ ءَ بیتگیں اُرش ءِ زمہ واری منّ اِتگ –

بلوچستان لبریشن فرنٹ ءِ جارکش میجر گْوھرام بلوچ ءَ گوشتگ کہ گوستگیں روچ ءَ سھب ءِ ساھت شَش ءَ پوجی بنجل مارٹرگولھاں گوں مانبستگ – اے یک نوکیں بنجلے کہ چین پاکستاب اکنامک کوریڈور(سی پیک) ءِ سر ءَ چہ دو ماھاں برجم کنگ بیتگ –

میجر گوھرام بلوچ ءَ گوشت: سرمچاراں پوجی بنجل ءَ ھشت مارٹر آس داتگ کہ اے مارٹر بنجل ءِ تہ ءَ کپتگ اَنت ءُ چریشی ءَ زورگریں پوج ءَ جانی ءُ مالی تاوانانی دیمپانی کنگ کپتگ –

جارکش ءَ گوشت کہ اے اُرش بلوچستان ءِ آجوئی ءَ برجاہ مان اَنت –

نبشتانک: لوامز اولڈ ھاسٹل یا برٹش فوجی رجمنٹ

نبشتہ کار: این آر بلوچ

دی بلوچستان پوسٹ

لوامز ءِ آشری وت اَت چہ من اولڈ ھاسٹل ءَ اتک ءُ شپٹ بیت آں ، اد ءَ آیگ ءَ پد گُشے زاناں منی پُنر جنم بیتگ اَت من ھما برٹش ایمپائر ءِ اَھد ءَ وتی چم پچ کُتگ اِت اَنت دراجیں کوھنیں فوجی کوٹی اَت اَنت ، لھتے کوٹی پرشتگ اَت ءُ لھتے وتی گُڈی سیمسراں اِت اَنت درائیں کوٹی یک واڑے ءِ تہ ءَ بند اِت اَنت چَپ ءُ چاگرد ءَ لھتے لیٹ لگ اتگ اَت ءُ ھمے لیٹانی تہ ءَ لھتے تَھنا بس اَنچو اَست اَت بَلے روک بیگ ءَ مرگ کُتگ اِت ئِے۔

من اتک آں کوٹی پچ کُت ءُ کوٹی ءِ پچ کنگ ءَ گوں یک برے من ءَ گُماں بیت کہ اگاں اَسَل ءَ وھدے اِے برٹش فوجی رجمنٹ ءِ بوتیں گڑا اِے کوٹی اَلم ءَ ٹاچر سیل بیتگ اَت اِد ءَ مردم پہ لٹ ءُ کُٹ کنگ ءَ آرتگ اَت ئِے-

دیوال ءِ لگوشتگیں رنگ ءُ موکوانی بستگیں تند ءُ پد ءَ نزاناں گُٹکا یا ماوائی ریتگیں تُک دیوال ءَ انچوش پدر کنگ ءَ اِت اَنت کہ اِد ءَ کسے آرگ ءُ ٹاچر کنگ بیتگ، بازیں لٹانی ھوناں تْرینزّ بستگ اَت ءُ اتکگ ءُ دیوال ءَ لگی اتگ اَنت –

من وت ءَ یک ٹاچر سیلے ءِ تہ ءَ گندگ ءَ اِت آں مُدتے بیت کہ بندی جاہ ءَ بنداں ،نُک ھُشک بوان اَت ، اَنچش سما بیگ ءَ اَت چماں روچ ءِ رنگ شموشتگ اَت ،زمین ءِ سر ءَ کپتگ اَت آں جَند ءُ جُور اَت آں ساہ ءِ زیرگ سَکّ گران بوان اَت ، مردمانی یات چو تامری ءِ دروشم ءَ دماگ ءِ مجگانی تہ ءَ تیز تیز ءَ بدل بوان آت اَنت گُشے زاناں انی نہ انی مجگ ترک اَنت ءُ ھما ماوا ئے تُک ءِ وڑا دیوال ءِ سر ءَ تْرِینزّ بند اَنت-

اچانگ ءَ داں کوٹی ءِ پنکہ سُرگ ءَ لگ اِت من چَک جَت ءُ چار ات داں دومی بچک اَت کوٹی ءِ آئی ءَ پنکہ ءِ بٹن جتگ آت ءُ من ءَ گُشت ئِے ھمش اِنت اولڈھاسٹل اِے گُشگ ءَ پد منی چمانی توک ءِ چارت اِت ءُ گُشے زاناں آئی ءَ زانت کہ من چیزے گُشگ لوٹاں بَلے من ھچ نہ گُشت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔