TBP Balochi

نبشتانک: دژمن ءَ پُروش وارتگ

نبشتہ کار: ھکیدہ بلوچ

دی بلوچستان پوسٹ

گوھر ءُ تِلائیں سر پہ واجہ ءِ سُجدگ کنگ ءَ کدی رزا نہ بَہ اَنت ، چی ءَ کہ آ ماتیں گُلزمین ءِ ھکّیں وارس ءُ واھُند اَنت گوں تو  داں تُپنگ ءِ گُڈّی تیر ءَ جنگ کن اَنت ، بلے تئی لگوریں لشکر ءِ بیمّ ءُ پاتراپاں کدی ھم پُشت ءَ پد نہ کنز اَنت۔ اے گنوک اَنت! ھو اے گنوک اَنت پہ وتی مِسکیں ھاک ءِ وشبو ءَ ، بلکیں پہ وتی وشبوئیں ھاک ءِ موکگ ءَ سرانی دیگ ءَ ھِچبر  چَک ءُ پَد نہ بَہ اَنت جُنزان اَنت دیم پہ مِھلب درنزیں مِنزل ءَ کہ باندا گُلیں راج پہ ابد اے زُوراکیں ھاکم ءِ پادانی چیر ءَ مہ بیت۔

بلکیں آ وت وتی گُلزمین ءُ ماتیں مرزبُوم ءِ واھُند ءُ وتواجہ بِہ بیت۔  وتی نیلیں زِر ءِ ھُدابُند  بہ بیت کہ مرچی باروٹیانی دست ءَ لیلام بُوَگ ءَ اِنت مرچی گُلامی ءِ اے بدّیں جاورانی تہ ءَ گنجیں زِر ءِ واجہ وتی زِر ءِ پاند ءَ شُت نہ کنت، گُڑا اے زُوراکانی سانکل مارا مرچی پُروشگی اَنت دانکہ باندا مئے آیوکیں پدریچ جِند ءِ گُلزمین ءِ سر ءَ باروٹی مہ بیت
پرے ھاتِر ءَ مارا زانگی اِنت کہ من وتی ماتیں گُلزمین ءِ چُک آں، من ءَ وتی گُلزمین رکینگی اِنت من ءَ ھون ءِ ھار تاچینگی اِنت گُلزمینءِ پراہ ءُ شاھگانیں دلبند ءِ سر ءَ ، بلے وتی گُلزمین بکشاھگی نہ اِنت۔

مرچی بلوچ راج ءِ جُھد ءُ جنگ ءَ دژمن تہ ءَ کْواپگ ءُ اَنچوش سرین پروش کُتگ کہ آئی دست بس بلوچ ءِ گیرت ءِ پادمال کنگ ءَ اَبید دِگہ ھچّ ءَ نہ رس اِیت آ نہ بلوچ ءِ جنگ ءَ پروش دات کنت ، نیکہ بلوچ راج ءَ بلکیں بلوچ راج ءِ اے جنگ ءَ دژمن پُروش داتگ ءُ سرین پُروشتگ ، اَنچوش کہ بنگلہ دیش ءَ پاکستان ءُ آئی ءِ بے مُزّیں پوج ءَ زانت کہ من دو ٹُکّر ءَ بُوگاں، گُڑا آئی ءَ وتی تاکت زُور ءُ واک کارمرد  کُت۔ بنگلہ دیش ءِ زھگ ءُ زالبولاں گوں وتی درندگی بِندات کُت مرچی پاکستان ءِ ھیوانیں لشکر ھمے درندگی ءَ بلوچستان ءَ گوں بلوچ راج ءَ کنگ اِنت ، بلے نوں ما زان اِیں کہ پاکستان وتی گُڈّی روچان اِنت۔ بس مارا ھاموش بُوَگی نہ اِنت ، بلکیں وتی سر ءَ بوؤکیں زُلم ءُ زُوراکیانی بگیر ءَ آواز چِست کنگی اِنت ءُ اَملی میدان ءَ گوں وتی جھدکاراں یکجاہ ءُ ھواری ءَ کار کنگی اِنت دانکہ دُژمِن پہ بے سوبی واتر بِہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں شپ ءَ پنجگور ءَ بیتگیں ھورانی سوب ءَ دیوالے کپتگ ءُ چریشی ءَ نوید ء منظور بیران بیتگ ءُ بازینے زدگ بیتگ اَنت –

پنجگور ءَ بیتگیں ھوراں مھلوک ءَ بازیں کچے ءَ تاوان بیتگ اَنت چریشی ءَ تسپ ءُ دگہ جاھاں توپانی ھوراں مھلوک ءِ لوگ ءُ کمپان ڈورینتگ ءُ دور داتگ اَنت چریشی ءَ نندوکیں مھلوک ءَ بازیں کچے ءَ تاوانباری بیتگ اَنت –

گوستگیں شپ ءَ ڈپٹی کمشنر عبدالرزاق ساسولی ءَ توپان گپتگین جاھاں تر ءُ تاب کرتگ ءُ مھلوک ءَ را کمک ءِ پیش کَش کرتگ اَنت اے وھد ءَ بی این پی عوامی ءِ رھشوب شکیل اھمد ءَ ھوار دگہ مردم آئی ءِ ھمراہ بیتگ اَنت –

چاگردی رسانکجاھاں پنجگور ءَ کپتگیں لوگانی اکس ءُ چیر تر اِتگیں گاڑی ءُ دگہ گران بھائیں سامانی اکس ءُ تامر گندگ بنت کہ آیانی تہ ءَ گندگ ءَ کیت دمگ ءَ بازیں کچے ءَ توپانی بیتگ –

پنجگور ءِ مردمانی گوشگ اِنت کہ بازیں وھدے بیت ھور نہ بیتگ ءُ ڈکال بیتگ بلے اے گورتگیں ھور ءَ دھکانکاراں ھوار دمگ ءَ دگہ مردم ھم تاوان بار کرتگ اَنت، آیانی گوشگ اِنت دھکانکارانی بند ءُ ڈگار ھم تاوان بیتگ اَنت بیتگ اَنت باید سرکار مئے نیمگ ءَ ھم دلگوش ءَ گور بہ کنت –

ھمے وڑ ءَ بیتگیں ھوراں پنجگور ءِ شھر ءِ جتا جتائیں پانزدہ لین ءِ کھمبہ کپتگ اَنت ءُ بازجں جاھاں لین نیست اِنت –

واپڈا ءِ رد ءَ فیڈر مین لائن ءِ پنچ کھمبھانی کپگ ءَ لین ءِ سرجم ءَ بند کنگ بیتگ اَنت پنچ برانچانی کھمبھانی کپگ ءَ دمگ ءَ بجلی بند بیتگ اَنت اشانی ھواری ءَ شھر ءِ دگہ جاھاں ھم بجلی نہ بیگ ءِ اسرمندی کپتگ اَنت –

ھمے وڑ ءَ مروچی ھم مکران مولم شناس ءَ گوشتگ کہ مکران ءِ بازیں جاھاں ھورانی گمان ھست اِبت چریشی ءَ داں باندات ءَ آئی ءَ ھورانی گوارگ ءِ گمان پدر کرتگ –

سر بیتگیں ھالانی رد ءَ بلوچستان ءِ دمگ کیچ ءَ پاکستانی پوج ءَ بیڑ برتگ ءُ سَے برات دزگیری ءَ پد بیگواہ کرتگ اَنت –

گیشیں ھالانی رد ءَ گوستگیں شپ ءِ ساھت سَے ءَ کیچ ءِ بنجاھی شھر تربت ءِ ھند کلگ ءَ پوج ءَ بیڑ برتگ ءُ اود ءَ سَے برات، ندیم، نسیم ءُ شوکت ء سعید جھمنند بدرنگ کولواہ دزگیر کنگ ءَ پد ناشناسیں زنداناں برگ بیتگ اَنت –

ھمے وڑ ءَ پاکستانی پوج ءُ چیریں ادارھانی چیردستی ءَ جوڑ بیتگیں ٹولی “ کہ آئی ءَ ڈیتھ اسکواڈ ءِ نام ءَ زانگ بیت اِنت ” دو مردم اش دزگیر کرتگ ءُ بیگواہ اش کرتگ اَنت ئِے –

گیشیں ھالانی رد ءَ بیست ءُ ھپت اپریل ءَ سرکاری پلامرزی ءَ جوڑ بیتگیں ٹولی ءِ کارندھاں کیچ ءِ دمگ تمپ دازن ءَ دو مردم دزگیر کرتگ ءُ ناشناسیں زنداناں برتگ اَنت، بیگواہ کنگ بیتگیں مردمانی پجار اسماعیل ء داد کریم جھمنند دازن ءُ منھاب ء علی جھمنند دازن ءِ ناماں زانگ بیتگ اَنت –

دمگی مردمانی رد ءَ ڈیتھ اسکواڈ ءِ کارندھاں سَے شمبے ءِ شپ ءَ ھردوکیں مردم آوار جتگ ءُ برتگ اَنت ءُ گمان کنگ بیگ ءَ اِنت کہ ھردوکیں ورناہ پوج ءِ دست ءَ دیگ بیتگ اَنت –

زانگ بہ بیت گپتگیں ورنایانی تہ ءَ منھاب چریشی ءَ پیسر دو رند ءَ گرگ ءُ لَٹ ءُ کُٹ کنگ ءَ پد یلہ کنگ بیتگ اَت ءُ انی پد ءَ یک رندے آوار جنگ ءُ بیگواہ کنگ بیتگ –

ھمے رنگ ءَ بلوچستان ءِ تیابدپی شھر گوادر ءِ گٹی ڈور ءَ ھمے سال ءِ سال ءِ یازدہ مارچ ءَ آوار جنگ بیتگیں نودربر چراگ بلوچ ء مراد بکش یلہ کنگ بیتگ – وی بی ایم پی ءَ ورنا ءِ یلہ کنگ ءِ راستی گوشتگ –

نبشتانک: دِرتگیں پُچّ ءُ ھالیگْیں لاپ

نبشتہ کار: ڈاکٹر شکیل بلوچ

دی بلوچستان پوسٹ

ِدرتگ پُچّیں مردم ءَ کجام کار بِندات کُرت گُڑا آئی ءَ گْوں جوانی ءَ سرجم کنت۔ پرچے کہ آئی ءِ مَگزانی (دماغ) تہ ءَ ایوک ءَ وتی کارانی پیلو کنگ ءِ بابت ءَ جْیڑگ ءِ مارِشت ودی بیت زندمان ءِ تہ ءَ آئی ءِ مول ءُ مراد آئی ءِ کوپگاں داتگیں کار کہ آئی ءَ را زمہ واری دیگ بوتگ، ھما کارانی سرجم کنگ ءُ آسر کنگ اِنت۔

درتگ پُچ مُردِنی دل ساپ ءُ بے تماھیں مردم بنت۔ آ زِندمان ءِ آ دگہ تماھاں چہ بیگَانَگ بنت پمیشکا آئی ءِ بے تماھی ءُ دِگہ تک ءُ پَھناتاناں چہ بْیگَانَگی آئی ءَ را گْیشتر مْوہ دنت کہ آ وتی زمہ ءِ داتگیں کاراں گْوں جوانی ءُ دل ساپی سرجم بہ کنت سْیرلاپ ءَ را اگاں ما گْوں درتگ پُچ ءُ شُدیگیں مردم ءَ تپاوت ءِ شَاھْیم ءَ کَیل بہ کن اَنت ءُ بہ چکّاس اَنت گُڑا سْیر لاپ کَدی ھم گْران ءُ مشکلیں کاراں چو درتگ پُچّ ءِ پیم کرت نہ کنت پرچا کہ سْیرلاپیں مردم ءِ مَگز (دماغ) چہ زِندمان ءِ دِگہ تَماہ ءُ ھیش ءُ ھیاشیاں پُرکیل اِنت آئی ءَ را کدی ھم پہ یک گْران ءُ مشکلیں کارے ءِ کنگ ءِ واست ءَ گْوں ھُورتی ءَ جْیڑگ ءُ پَھمگ ءِ موہ نہ رس اِیت۔ پمیشکا آ گْوں دگہ بازیں اڈ ءُ جنجالاں گُلائیش بیت ءُ پہ گْرانیں کار ءِ کنگ ءَ آئی ءَ را سوشونی (پالیسی) ٹاھینگ ءِ وھد نہ رَس اِیت۔

اَگاں آشوبی پِڈ ءَ بہ چار ئے ءُ چمشانکے بہ دے ئے گُڑا رودپتر ءِ تہ ءَ کجام دیار ءَ اگاں آشوبی زُرمبشت چِست کنگ بوتگ گُڑا آھود ءَ اِے زُرمبش ءِ چِست کنوک ھم ھما جاہ ایردست ءُ درتگ پچ ءُ شدیگ لاپیں مردم بُوتگ اَنت پرچا کہ ھالیگیں لاپ مردم ءَ جْیڑگ ءُ مارَگ پرماہ اِیت سْیرلاپ ءَ را چے سر درد کہ آ پہ اِے پیمیں کاراں وتی مگز ءَ گْرامبار بہ کنت ءُ وتی ھَیش ءُ ھیاشْیں وھد ءَ زوال بہ کنت۔

اگاں مُلکاری ءِ پِڈ ءَ بہ چار ئے گُڑا راجی گل بہ بنت یاں کہ نودربر گل بہ بنت گُڑا آئی ءِ تہ ءَ درتگ پُچ ءُ شدیگ لاپیں باسک گْوں دل پَھکی ءَ وتی مُلکاری ءَ کن اَنت، اگاں کجام گل ءِ رھشونی شُدلاپ ءُ واریں مَھلوک ءِ چْیردستی ءَ بُوت گُڑا آئی ءِ پُروش دیگ یک نہ بوتگیں گپّے پرچے کہ بَزّگیں مھلوک ءِ باندات آئی ءِ ادارہ ءُ گَل اِنت۔

سْیرلاپ ءُ آسودگْیں مردم کدی بزّگیں مھلوک ءِ درد ءَ آ پیم ءَ سرپد بوت پَھم اِت کُرت نہ کنت اینکس کہ یک شُدلاپ ءُ بَزّگے دومی بزّگ ءُ شُدلاپ ءِ درد، بزّگی، گژنگی ءُ واری ءَ سرپد بیت۔

واجہ ناکو کارل مارکس جاھے ءَ وتی ھیالے درشان کنت ءُ گْوش اِیت کہ “ھما مردم کہ آیاں گرمی ءُ سارتی چہ دَریگاں (کھڑکی) دیستگ ءُ گُژنگی ایوک ءَ وانگی آنی تہ ءَ ونتگ گُڑا انچائیں بنی آدم ءِ رَھشونی ءَ کُرت نہ کنت” مَن ناکو کارل مارکس ءِ اِے گپّ ءَ گْوں تَچک ءَ تپاک دار اِیں پرچے کہ رَھشون مردم ھما وھداں بیت کہ آ چاگرد ءِ تہ ءَ لس مھلوک ءِ درد، گم، سکی ءُ سْوریانی وھد ءَ گْوں بزّگیں لس مھلوک ءَ ھمگِرنچ اِنت، وھدے کہ آ چاگرد ءِ تہ ءِ زوراکیاں گِند اِیت گُڑا آ جْیڑ اِیت کہ مئے مھلوک ءِ سر ءَ پرچے چُشیں زُلم ءُ زوراکی بوگ ءَ اِنت ھمے جْیڑگ ءِ مارِشت آئی ءَ را بے تاھیر کنت، آئی ءَ را تکانسُر کنت، گُڑا آ شپ ءُ روچ اے جْیڑھانی گْیش ءُ گیوار کنگ ءِ واست ءَ جْیڑ اِیت ءُ اَمَلی پِڈ ءَ کار کنگ بِندات کنت، آ اِے کاراں یک مجلسے (کمیٹی)، گل، یاں کہ پارٹی ءِ چْیر دستی ءَ بِندات کنت وھدے کہ اِے مردم کہ ھر سکّی ءُسوریاں گْوں وتی بزّگیں مھلوک ءَ ھوَار بُوتگ گُڑا آ ایشانی درداں گْوں دل ءِ جُھلانکی ءَسرپد بیت آ وتی مھلوک ءِ تَب ءَ(نفسیات) سرپد بیت ءُ ھما پیم ءَ آیاں گْوں نند اِیت ءُ پاد کیت ءُ آیانی جْیڑھاں گْیش ءُ گْیوار کنت۔

اگاں اِے پیمیں مردم کہ آ گْوں بزّگیں مھلوک ءَ سیادی دار اِیت، یک گلے ءِ رھشونی ءَ بہ کنت گُڑا آ اَمَلی پِڈ ءَ ک باز کار کرت کنت۔ بزّگیں مھلوک ھم آئی ءَ را کبُول کنت۔

یک گلے (تنظیم) ءِ تباھی ھما وھداں بِندات بیت کہ آئی ءِ رھشونی (قیادت) یک دَریں مردمے ءَ را گْوں بہ بیت کہ آ نہ کہ تئی چاگرد ءِ تب (نفسیات) ءَ سرپد اِنت ءُ نہ کہ سکّی ءُ سوریانی وھداں آ گْوں بزّگیں لس مھلوک ءَ ھمگرنچ بُوتگ گُڑا اِے پیمیں مردم ءَ را یک گلے ءِ رھشونی ءِ ڈُبّہ سر ءَ دیگ یک اھمَکّی ءُ ناسرپدی یے۔ وھدے کہ یک رھشونے تئی ھلک ءُ میتگ ءِ مَھلوکءِ ھِچ تب ءَ مَہ زَانت، تئی درداں ھوار مہ بِیت، تئی سکّی ءُ سوریاں چہ دُور بہ بیت، گُڑا آ پہ ھاک تئی راج ءِ یاں کہ نودربر گلءِ سروکی ءَ کرت کنت ؟-

رودپتر اِے گواھی ءَ دَنت کہ ھر وھداں آشوبی جُنز چہ بَزّگیں مھلوک ءَ بِندات بُوتگ۔بلے مئے بد بَھتی اِیش اِنت کہ ما ھما مردماں کار اَنت وتی راجی گل یاں نہ نودربر گَلانی رَھشونی ءِ ڈُبّہ ءَ سر ءَ دے اَنت کہ آ نہ مئے چاگرد ءِ تب ءَ سرپد اِنت ءُ ناکہ مئے سکّی ءُ سوریاں گْوں ھمگرنچ اِنت دومی بلوچ ءِ بلاھیں بدبَھتی ایش اِنت کہ مروچی بلوچ مُلکاری چہ بلوچ ھَند ءُ دمگاں چِست کنگ ءُ دُور کنَگ بوتگ ءُ شَھر ءُ بازاراں پہ نام گِپت بَرگ بُوتگ۔

بادشاہ تب ءُ تُرند تبْیں رَھشون یک گلے (تنظیم) ءَ پہ انچُش ءُ نکس و تاوان اِنت۔ ھمے پیم ءَ یک تیزیں کینچِینے گُد ءُ پُچّ ءَ چے پیم ءَ دِرّ اِیت، تل تل کنت دور دنت ھمے پیم ءَ یک بادشاہ ھیال ءُ تُرند تبیں رھشونے وتی گل (تنظیم) ءَ پُروشت ءُ پْروش ءِ آماچ کنت من ءَ یات اِنت کہ من جاھے ءَ گْوں شَھرے ءِ یک کامریڈے ءَ نشتگ اِتاں گُڑا من گُشت کہ منی ھنکین ءَ منی ھمساھگے ءِ کاشِیگْیں کُڈّک یک ناشرکاریں دُزّے ءَ سُتکگ ءُ پُر کرتگ، گُڑا آئی ءَ من ءَ اِے پیم ءَ پَسّو دات ءُ گْوشت “شَرّ اِنت آ وتی واست ءَ یک سیمنٹ ءِ مکانے تعمیر کنائین اِیت”من ھما وھد ءَ اِے گپ مار اِت کہ پہ بزّگیں راج ءَ نُوں ھداوند ءِ جِند اِنت کہ رَھشونی ما بازاراں کاٹن پْوشاناں سر اِنت-

آ اِے گپ ءَ نہ جْیڑ اِیت کہ اِے وھداں کہ بَزّگیں مھلوک ءِ لْوگ سوچگ بُوتگ تاں وھدے کہ آ پہ وت بقولِ شَھری کامریڈ ءِ یک سیمنٹ ءِ مکانے تعمیر بہ کنت آئی ءِ جاورھال چے پیم بنت وھدے کہ اِے پیمیں مَزن شان ءُ بادشاہ تبیں مردم رھشون جْوڑ کنگ بُوت گُڑا یکبرے آ سک نا امیتی پیداک کنت، ناتپاکی ودی بیت، پُرشت ءُ پُروش بیت۔ بلے اگاں وھدیکہ کہ بَزّگ ءُ شدلاپیں (پِیماز واراں) مار اِت کہ اِے بادشاہ تبیں مردم مئے رھشونی ءَ کُرت نہ کن اَنت ءُ مئے دوزواہ ھم بوت کرت نہ کن اَنت گُڑا تو اِے گپّ ءَ گْوں جْوانی ءِ سر ءَ بہ پَھم ءُ سرپد بُو کہ تئی رھشونی ءِ روچ پہ لَنکُک ھساب بنت۔ وھدے کہ ایشاں وتی زُرمبِشت الھان کرت گُڑا ھِچ پیمیں تاگت اِے بَزّگ ءُ شُدلاپیں ( بقولِ لھتیں مردمانی ءَ پیماز وارانی) جُنز ءِ دیم ءَ اوشتات کُرت نہ کنت۔ آ وتگڑیں رھشونی ءِ بَگیری ءَ وتی ادارہ ءُ گل ءِ دیمپانی زُرمبشت ءَ بِندات کن اَنت گُڑا تو بہ سمجھ ءُ بہ پَھم کہ اِے یک پُرشت ءُ پروشے نہ اِنت بلکیں اِے پہ نودربر گل ءَ یک وشّیں بانداتے ءُ اے گل ءِ سوبمندی ءِ چِراگ یک گامے آ دیم اِنت۔

پرچے کہ شُدلاپ ءُ (پیماز واراں) بزّگیں مردماناں وتی چاگرد ءِ سُوچن ءَ بہ گِر تاں بَندیک ءَ گم پِر اِنت۔ آ وتی بزّگ ءُ درتگ پُچّ ءِ درد ءَ زانت، آئی شدلاپی ءَ مار اِیت۔ گُڑا وھدے کہ آ جُنزے بِندات کنت گُڑا آئی ءِ جُنز ءَ را یک دردے گْوں، یک پِگرے گْوں، یک لیکھَے گْوں، آ مگَزی پِڈ ءَ (دماغی حوالہ) مھکم اِنت، آئی ءَ را نہ تئی زمینی ھُدا بے سوب کرت کنت ءُ نہ کہ تئی پِلینڈیں بِیھار ءُ پاد تراپ ھاں البت تاں لھتیں وھد ءَ پہ پِلینڈی (پروپیکنڈہ)،،رِپک ءُ ھُنر سادگیں مھلوک ءَ رد دے ئِے بلے وھدے کہ تئی جِند ءِ سِرپانی تہ ءِ مردماں تئی بَدیں نیّت ءُ تئی پِلینڈی ءِ رازاں سرپد بُوت اَنت گُڑا تو بہ پَھم کہ تئی زَوال چہ ھما روچ ءَ بِندات بیت۔

اِے گپ ءَ کسّے بہ گْوش اِیت کہ من شُدلاپیں بزّگیں مھلوک ءِ ایردست کنگ ءِ ھاتر پندل سازی کن اِیں گُڑا بِزاں کہ آئی ءَ وتی زندمان ءِ تہ ءَ یک مَستریں ردی یے کرتگ ءُ سکّ ءَ ھرابیں گامگیجےزُرتگ پرچے کہ رودپتری تاکانی تہ ءَ اِے گپ نبشتہ اِنت کہ ھر وھد ءَ آشوبی جُنز وھدے کہ پاد اَتکگ گُڑا باج بَزّگیں مھلوک ءَ بُرتگ ءُ بَزّگیں مھلوک سوبمند بوتگ گُڑا تو اِے گپ ءَ سرپد بوگ ءِ کوشست ءَ بہ کن کہ وھدے شُد لاپاں تو چے پیم ءَ پُروش دات کرت کن ئے۔ اِے تئی نا بِزانتی ءُ آس ءُ آپ ءِ گْوازی اِنت – شُدلاپ سوبمند بات اَنت مُدام –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ دمگ دشتیاری ءَ ناشناسیں سلاہ بندیں مردمانی تیرگواری کسانیں سالیں زھگے بیران بیتگ-

بیران بیتگیں زھگ ءِ پجار سام ء اسلام جدگال ءِ نام ءَ زانگ بیتگ، چرے تیرگواری ءَ اسلام جدگال زدگ بیتگ –

وئیل گوستگیں دبوج ءِ پیسر دیم ءَ اتکگ کہ اود ءَ پجار نہ بیتگیں گاڑی سواراں اسلام جدگال ءِ سر ءَ تیرگواری کرتگ ءُ چریشی ءَ اسلام جدگال زدگ بیتگ ءُ آئی ءِ زھگ سام بیران بیتگ، اسلام دشتیاری ءِ ھند گونڈو ءِ نندوک اِنت –

ھمے وڑ ءَ روکپتی بلوچستان ءِ بنجاھی شھر دزاپ ءَ سلاہ بندیں مردمانی تیرگواری ءَ یک مردمے بیران بیتگ –

گیشیں ھالانی رد ءَ وئیل گوستگیں روچ ءَ دزاپ ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ حمزہ رخشانی ء سیداھمد نامیں مردمے کُشتگ –

وئیل ءَ پد پھزداراں دمگ انگیر کرتگ ءُ اُرشکارانی پشتگیری کرتگ ءُ چریشی ءَ اُرشکار ءُ پھزدارانی میان ءَ تیرگواری بیتگ ءُ اُرشکار تچگ ءُ روگ ءَ سوبمند بیتگ اَنت –

وئیل ءِ بارہ ءَ گیشیں سرپدی نہ بیتگ اَنت –

بلوچستان ءِ تہ ءَ اے وھدی درساں گیش ورنا نشانگ کنگ بوگ ءَ انت بلوچستان ءَ پیسلہ سازی نوں پوج یا آئی ءِ جھلی ادارہ کنگ ءَ انت- ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد روچ سرجم بوتگ – چہ ڈیرہ غازی خان ءَ عبدالستار بزدار، نور محمد، عزیز اللہ بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

بیگواھیں نودربر رھشون زاکر مجید بلوچ ءِ مات ءَ بنجل ءَ اتکگ ءُ زاکر مجید ءُ بیگواھیں زاھد کُرد بلوچ ءِ ھاتر ءَ زھرشانی نبشتہ کنائینتگ –

زاکر مجید بلوچ ءِ مات ءِ گوشگ ات کہ اسلام آباد ءِ زھرشانی ءَ دو ماہ پرگوستگ کہ اود ءَ پاکستان ءِ انسانی ھکانی وزیر ءَ مارا باور کنائینتگ کہ شمئے بیگواھیں مردم یل کنگ بنت بلے روچ مروچی ھچ وڑیں گامگیج زورگ نہ بوتگ –

آئی ءِ گوشگ ات کہ مئے زھگاں ھچ وڑیں گناہ نہ کتگ اگاں آھانی سر ءَ بھتام ھست گڑا پاکستان ءِ آمیدگس ھست انت آ ھمود ءَ آرگ بہ بنت –

آئی ءِ گوشگ ات کہ پت وتی راج ءِ ھدمتکارے بوتگ آئی ءَ وانگ جاہ ءُ دگہ ادارھانی جوڑ کنگ ءِ ھاتر ءَ جھد ءَ بوتگ بلے آ ھم گچین کاری ءِ روچ ءَ کُشگ بوتگ منی گوما اے ریاست بازیں ناھکی کنگ ءَ انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ پاکستان ءِ جوڑ بوگ ءَ بہ گر تاں روچ ء مروچی پاکستانی پوج ءَ بلوچستان ءِ تہ ءَ پنچ رند ءَ پوجی لشکر کشی کتگ بلوچستان ءِ مردم ھچبر ھک دیگ نہ بوتگ انت – انسانی ھکانی گل مدامی رپورٹ دے اَنت کہ بلوچستان ءِ ھر کنڈ ءُ دمگ ءَ نودربر ءُ دگہ سُرپرانی چیردیگ پوجی بنجل جوڑ کرتگ انت کہ اود ءَ آ بندیگ کنگ بنت ءُ آھاں ٹارچر کنگ بیت –

ماما قدیر بلوچ ءِ گوشگ ات کہ دوھزار ءُ یک ءَ چہ بلوچستان ءَ مزنیں کساسے ءَ پوج ساڑی انت ءُ آئی ءِ نیم پوجی ٹولی ایف سی ءَ بلوچستان ءِ تہ ءَ ایمنی ءِ نام ءَ کنٹرول ءُ پولیس ءِ پاور وتی دست ءَ کتگ –

آئی ءِ گوشگ ات کہ بلوچستان ءِ تہ ءَ اے وھدی درساں گیش ورنا نشانگ کنگ بوگ ءَ انت بلوچستان ءَ پیسلہ سازی نوں پوج یا آئی ءِ جھلی ادارہ کنگ ءَ انت – انسانی ھک نہ بنت، سیاسی جیڑہ یا دیمروئی یا سیکورٹی ھرجاہ ءَ پوجی اسٹبلشمنٹ دزمانجنی کنگ ءَ انت –

برت کور ءَ جوانتاک ءُ سنگانی سر ءَ پاکستانی پوج ءِ سر ءَ بوتگیں اُرشانی زمّہ واری منّ ایں – میجر گوھرام

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ تمپ ءَ پاکستانی پوج ءِ پانگس ءِ سر ءَ اُرش کُتگ، اُرش تمپ ءَ برت کور ءَ برجاھیں پاکستانی پوجی سر ءَ کنگ بوتگ اُرش ءِ آسر ءَ پاکستانی پوج ءَ جانی ءُ مالی تاوان رس اِتگ –

ھمے وڑ ءَ گوستگیں شپ ادار نُھ ءَ ناشناسیں مردماں سنگانی سرا برجاھیں پاکستانی پوج ءِ پانگس ءِ سر ءَ دز بمب اُرشے کُتگ –

دومی نیمگ ءَ پنجگور ءِ دمگ گچک ءَ ناشناسیں سلاہ بندیں مردماں پاکستانی پوج ءِ کاروان ءِ سر ءَ اُرش کُتگ، اُرش ءَ پاکستانی پوج ءَ بازیں جانی مالی تاوان ءِ رس اِتگ –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تھ ءَ اے اُرشانی زمّہ واری منّ اِتگ ءُ گوشتگ کہ مئے سرمچاراں پنچ شمبے ءِ بیگاہ ءِ ادار ھپت ءَ کیچ ءِ دمگ تمپ ءَ برت کور ءَ برجاھیں زورگیریں پاکستانی پوج ءِ پانگس ءِ سر ءَ دورجنگ ءُ دگہ مزنیں سلاھانی گون ءَ اُرش کتگ- اُرش ءَ پاکستانی پوج ءِ دو کارمند مرتگ ءُ بازینے زدگ بوتگ اَنت-

جارکش ءَ وتی درشان ءِ تہ ءَ گوشتگ کہ پنجگور دمگ گچک جوان تاک ءَ مئے سرمچاراں مروچی نیم بیل ءِ ادار یک ءَ زورگیریں پاکستانی پوج ءِ کاروان ءِ سر ءَ اُرش کتگ – کاروان ءَ ھواریں گاڑی ءُ سَے پرپٹانی سر ءَ راکٹ، دورجنگ ءُ دگہ مزنیں سلاھانی سر ءَ اُرش کتگ –

اُرش ءَ گاڑی تاوان بار بوتگ ءُ گاڑی ءَ سواریں درسیں کارمند مرتگ انت وھدیکہ پرپٹ سوار ھم اُرش ءِ زد ءَ اتکگ انت ٹپی بوتگ ءُ تچگ رؤگ ءَ سوبمند بوتگ انت –

جارکش ءَ دیمتر ءَ وتی درشان ءَ گوشتگ کہ گوستگیں شپ ءِ نُہ مئے سرمچاراں سنگانی سر ءَ نادراھجاہ ءَ برجاھیں زورگیریں پاکستانی پوج ءِ پانگس سر ءَ دزبمب اُرشے کتگ –

آئی ءَ گوشتگ کہ دز بمب پانگس ءِ تہ ءَ شُتگ ءُ کپتگ چریشی ءَ پانگس ءِ تھ ئِے کارمند مُرتگ ءُ ٹپی بوتگ انت –

جارکش میجر گْوھرام بلوچ ءَ گوشتگ کہ لس مھلوک پاکستانی پوج ءَ چہ دور بہ بنت – مئے سرمچار کجام ھم وھد ءَ آھاں وتی نشانگ کنت مئے اُرش بلوچستان ءِ آجوئی ءَ تاں برجاہ مان انت –

براس ءِ سرمچاریں سنگتانی شھیدی ءَ ھواری ریاستی ڈیتھ اسکواڈ ءِ کارمند تیرباران کتگ ءُ کُشتگ – بیبگر بلوچ

سربوتگیں ھالانی رِد ءَ گوستگیں شپ ءَ کیچ ءِ دمگ زامران ءَ ناشناسیں سلاہ بندیں مردماں تیرگواری کتگ ءُ مُلا امین نامیں مردمے کُشتگ –

مُلا امین ءِ سر ءَ ھما وھد ءَ اُرش کنگ بوتگ کہ آ زامران ءِ دمگ نوانو ءَ ھوٹل ءَ نندوک بوتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ ملا امین ءِ کوش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ زامران ءِ دمگ ناگ نوانو ءَ ریاستی ڈیتھ اسکواڈ ءِ کارمند ملا امین تیرباران کُتگ ءُ کُشتگ –

جارکش ءَ گوشتگ کہ ملا امین زامران ءِ تھ ئِے ڈیتھ اسکواڈ ءِ سرکماش امین زامرانی ءِ کارندہ ءِ بوتگ کہ آئی ءَ گوستگیں سال ءَ جنوری ءَ پاکستان ءِ ملٹری اینٹلی جنس ءِ میجر ءِ سرکماشی ءَ بلوچ راجی آجوئی سنگر (براس) سنگتانی سر ءَ اُرش کتگ کہ اود ءَ ورنائیں یوسف کرد گوں چار سنگتانی ھمراھی ءَ شھید بوتگ اَنت – اے اُرش ءَ ملا امین تچکی ءَ ھوار بوتگ –

جارکش ءَ دیمترا گوشتگ کہ ملا امین ریاست ءِ سرپرستی ءَ زامران، تمپ ءُ تربت ءَ نشہ باپاری، ملام گرگ، دُزی ءُ ڈنگیاں ھم ھوار بوتگ- ریاستی ڈیتھ اسکواڈ ریاست ءِ گوشگ ءِ پد ءَ بلوچ چاگرد ءَ تُرس ودی کنگ ءُ چاگرد ءِ تہ ءَ راجداری، چاگردی سلکاریانی واستا دارگ بیتگ اَنت اے چاگرد دژمنیں کارندھانی بگیری ءَ مئے اُرش گیشتر بنت ھمے ھاتر ءَ ما چہ لس مھلوک ءَ یکرندے پد ءَ دستبندی کنیں کہ آ چہ اشاں دور بہ بنت –

گڈسر ءَ جارکش بیبگر بلوچ ءَ گوشتگ کہ اے دابیں اُرش بلوچستان ءِ آجوئی ءَ تاں برجاہ مان انت –

جھانی وبا کورونا وائرس ءَ ھندوستان ءَ ھوار بازیں ڈیھ وتی ارجان جتگ اَنت ءُ لکانی ھساب ءَ اے نادراھی ءَ سرجمیں دنیا ءَ مردم بیران بیتگ اَنت –

ھندوستان ءَ تنی وھدی بازیں ھسابے ءَ مھلوک نادراھی ءَ بیران بیتگ اَنت چاگردی رسانکجاھاں اکس ءُ تامر بنداں گندگ بیت کہ اے نادراھی ءَ ھزاراں مردم آسرمند ءُ لاچاری ءَ دگانی سر ءَ کپتگ اَنت، نادراہ جاہ پُر ءُ آکسیجن ءِ کمی ءِ ھال ھم چاگردی رسانکجاہ ءَ پیداک اَنت –

اے وھد ءَ جھانی وبا کورونا نادراھی ءَ سرجمیں جھان ءَ ھندوستان اسرمند تریں ڈیھ گوشگ بیگ ءَ اِنت کہ گوستگیں بیست ءُ چار ادارنہ تہ ءَ سَے لَک ءَ ھشتاد ءُ شش ھزار ءَ گیش کیس رپورٹ بیتگ اَنت ءُ سَے ھزار ءِ کچ ءَ بیرانی بیتگ اَنت –

ھندوستان ءِ جانسلامتی ءِ رد ءَ سرجمیں ڈیھ ءَ کورونا نادراھی ءَ یک کروڑ ءُ ھشتاد ءُ ھپت لک ءُ شست ءُ دوھزار ءَ گیش اَنت ءُ دو لَک ءُ ھشت ھزار ءَ گیش مردم بیران بیتگ اَنت –

ھندوستان ءَ اے وھد ءَ تھیتگیں نادراھانی کچ سِی ءُ یک لَک اِنت ءُ اے نادراھی ءَ وش بیتگیں مردمانی کَچ یک کروڑ ءُ پنجاہ ءُ سَے لَک ءُ ھشتاد ءُ چار ھزار مردم وش بیتگ اَنت –

ھندوستان ءَ بیست ءُ چار ادارانی تہ ءَ سَے ھزار ءُ چار سد ءُ نود ھشت مردم بیران کہ اشانی تہ ءَ ھپت سد ءُ ھپتاد ءُ یک مھاراشٹرا، دوسد ءُ نود پنچ دھلی، دو سد ءُ ھپتاد کرناٹکا، دو سد ءُ پنچاہ چھتیس گڑھ، یکد سد ءُ ھشتاد گجرات، یک سد ءُ پنجاہ ءُ ھشت، راجستان، یک سد ءُ چِل ءُ پنچ جھاڑکھنڈ، یک سد ءُ سِی ءُ ھپت پنجاپ ءَ یک سد ءُ ھپت تامل ناڈو ءَ بیران بیتگ اَنت –

ھندوستان ءَ کورونا نادراھی ءَ درساں گیش بیرانی مھاراشٹرا ءَ بیتگ کہ آیانی کچ شست ءُ ھشت ھزار اِنت چریشی ءَ پد دھلی ءَ پانزدہ ھزار ءُ ھپت سد ءَ گیش، کرناٹکا ءَ چاردہ ھزار، تامل ناڈو ءَ دوازدہ ھزار، اترپردیش ءَ یازدہ ھزار، روکپتی بنگال ءَ نُھ ھزار ءُ ھمے رنگ ءَ پنجاپ ءُ چھتیس گڑھ ءَ ھشت ھزار مردم بیران بیتگ اَنت –

بلوچستان ءَ کورونا ویکسین ءِ گامگیج سُستی ءِ آماچ اَنت ءُ گوستگیں دو ماھانی تہ ءَ اُستان ءَ سِی ءُ سَے ھزار ءُ پنچ سد ءُ پنجاہ ءُ یک مردماں ویکسین جنگ بیتگ اَنت –

ھمے درچ ءَ بلوچستان ءِ سرکار ءِ جارکش لیاقت شاھوانی ءَ گوشتگ کہ اُستان ءَ مھلوک کورونا ایس اوپیز ءِ رنگ ءَ کورونا ویکسی نیشن ءَ الکاپی ءَ زورگ ءَ نہ اَنت، داں انیگ ءَ اُستان ءَ کورونا ویکسی نیشن ءِ کنگ ءِ دیمروئی باز کم اَنت –

جانسلامتی ءِ رد ءَ بلوچستان ءَ کورونا ویکسی نیشن ءِ گامگیج چار مارچ ءَ بندات بیتگ بنداتی ءَ اے ویکسین جانسلامتی ءِ باسکاں جنگ بیتگ بلے نِی یک ماھ ئِے بیت کہ کورونا ویکسین پنجاہ ءَ برز اُمریں مردماں لس مردماں جنگ بیگ ءَ اِنت –

جانسلامتی ءِ رد ءَ اُستان ءَ داں انیگ ءَ سِی ءُ سَے ھزار ءُ پنچ سد ءُ پنجاہ ءُ یک ویکسین جنگ بیتگ اَنت ءُ ھمے رنگ ءَ اُستان ءِ آبادی یک کروڑ ءُ بیست ءُ سَے لَک اِنت، بلوچستان ءَ اے وھد ءَ کورونا ءِ دیم ءِ دارگ ءَ سِی ءُ نُھ ھزار ءُ چار سد ءُ پنچ ویکسین جاڑیگ اَنت ءُ اُستان ءِ بنجاھی شھر شال ءَ ابید دگہ شھراں گوستگیں روچ ءَ بیست ءُ دو مردماں ویکسین جنگ بیتگ اَنت –

رپورٹ ءِ رد ءَ داں انیگ ءَ شانزدہ ھزار ءُ سَے سد ءُ ھپتاد ءُ سَے جانسلامتی ءِ باسکاں کورونا ویکسین اولی بر ءَ وھدیکہ یازدہ ھزار ءُ چار سد ءُ شست ءُ ھپت دومی بر ءَ ھمے رنگ ءَ شست سال ءَ گیش اُمریں مردماں سَے ھزار ءُ شش سد ءُ ھپتاد ءُ پنچ مردماں ویکسین دومی بر ءخ جنگ بیتگ اَنت –

جانسلامتی ءِ گوشگ اَت کہ شال ءَ دراھیں سرکاری ھسپتال ءُ دمگی ہیڈ کوارٹرز ھسپتالاں ماس ویکسء نیشن سینٹر جوڑ کنگ بیتگ اَنت وھدیکہ شال ءَ کماشیں مردماں ویکسین ءِ جنگ ءَ مباھل ٹیم پرمان کنگ بیتگ اَنت –

زانگ بہ بیت بلوچستان ءَ گوستگیں پنچ ادارانی تہ ءَ یک سد ءُ شست نوکیں نادراہ دیم ءَ اتکگ اَنت ءُ اشانی پجیگ ءَ بیست ءُ دوھزار ءُ دو سد ءَ ھپتاد ءُ ھشت نادراھانی کچ ءَ سر بیتگ اَنت –

ھمے رنگ ءَ شست ءُ دو نادراہ وش بیتگ اَنت ءُ اشانی ھواری ءَ وش بیتگیں مردمانی کچ بیست ھزار ءُ پنچ سد ءُ نود ءُ دو ءَ سر بیتگ اَنت –

ھمے وڑ ءَ پنچ ادارانی تہ ءَ یک مردمے بیران بیتگ ءُ سرجمیں بیران بیتگیں مردمانی کچ دو سد ءُ سِی ءُ چار ءَ سر بیتگ اَنت –