TBP Balochi

سر بیتگیں ھالانی رد ءَ پنجگور ءَ بس ءُ یک کسانیں گاڑی ءِ میان ءَ ٹکروری بیتگ، چریشی ءِ آسر ءَ کار گاڑی ءَ سواریں دو کس بیران بیتگ اَنت –

بیران بیتگیں مردمانی پجار شاھد خان ءُ مھمد عمران گوشگ بیگ ءَ اَنت سوراب ءِ جھمنند اَنت –

وئیل پنجگور ءِ دمگ گومازی ءَ دیم ءَ اتکگ کہ اود ءَ دو گاڑیاں ٹکر وارتگ چریشی ءَ سوارب ءِ جھمنندیں دو کس بیران، وئیل ءَ پد انتزامیہ ءَ سر بیتگ ءُ بیران بیتگیں مردم چست کنگ ءُ نادراہ جاہ ءَ رسینگ بیتگ اَنت –

بلوچستان ءَ ھمک روچ دگانی سر ءَ بیتگیں وئیلاں لس مردمانی جان ءُ ساہ زوالی دیمپان اَنت، چاگردی مردمانی گوشگ اِنت کہ گیشتریں وئیل دگانی پُرشت ءُ پروشی ءُ گاڑیانی ڈرائیورانی بے دلگوشی ءَ دیم ءَ آیگ ءَ اَنت –

سر بیتگیں ھالانی رد ءَ بلوچستان ءِ دمگ بولان ءَ ننگ ءِ نام ءَ زالبولے ءَ ھوار دو مردم کُشگ بیتگ اَنت –

وئیل بولان ءِ دمگ کھٹن گوٹھ یار مھمد شاھوانی ءَ دیم ءَ اتکگ کہ اود ءَ سیاہ کاری ءِ بھتام ءَ زالبولے ءَ ھوار دو مردم کُشگ بیتگ اَنت –

بلوچستان ءِ دگہ دمگاں ھم سیاہ کاری ءِ بھتام ءَ زالبولانی کوش چاگردی رسانکجاھاں آیانی ھال پیداک اَنت انتزامیہ ءِ نیمگ ءَ تنی وھدی اے وڑیں وئیلانی گر ءُ دار ءَ مزنیں گامیج گندگ ءَ آیگ ءَ نہ اِنت –

ھمے رنگ ءَ نوشکی ءَ دگ ءِ وئیلے ءَ ورنایے بیران بیتگ –

گیشیں ھالانی رد ءَ نوشکی ءِ دمگ کلی مینگل ءُ کلی بادینی ءِ چار راہ ءَ ٹوڈی کار ءُ پرپٹے ءِ میان ءَ ٹکر وری بیتگ کہ چریشی ءَ کلی قادر آباد ءِ جھمنندیں مھمد بلال نامیں ورنایے بیران ءُ مھمد صادق زدگ بیتگ –

بلوچستان ءَ دگ ءِ وئیلاں ھمک روچ بازیں کچے ءَ مردمانی زدگ ءُ بیران بیگانی ھال بازیں رنگے ءَ گندگ ءَ آیگ ءَ اَنت –

گوستگیں روچاں کراچی ملیر بحریہ ٹاؤن ءِ نور مھمد گبول گوٹھ ءُ عبداللہ گبول گوٹھ ءَ پولیس ءِ چیردستی ءَ دمگی مردمانی زمین ءُ لوگاں پچگرگ یکشل ءَ برجاہ اَنت –

دی بلوچستان پوسٹ

زمینانی نہ دیگ ءِ سر ءَ نندوکیں مردماں برانز کتگ ءُ چریشی ءِ پژدر ءَ پولیس ءَ مردمانی سر ءَ تیرگواری ءُ لَٹ شاپی ھم کرتگ ءُ چاگردی رسانکجاھاں شنگ بیتگیں اکسانی تہ ءَ گندگ بیت کہ لس مردم ٹپی اَنت –

ھمے درچ ءَ چاگردی رسانکجاھاں ھم بحریہ ٹاؤن ءِ اکس شنگ بیگ ءُ #SayNoToBarhiaTowan ءِ ھیش کارمرد کنگ بیگ ءَ اِنت –

سندھ ءَ بندوکیں اھوالکار وینگس ءَ تامربندے شنگ کرتگ ءُ نبشتگ کہ دمگی مردمانی لوگاں تاجر ءُ سندھ ءِ سرکار ءَ پروشگ ءَ اِنت آئی ءَ گوشتگ کہ پروشوک ھما مردم اَنت نندوکیں مردماں اوٹ داتگ ءُ نادینتگ اَنت آئی ءَ گوشتگ اے جمھوریتے ءِ –

چاگردی رسانکجاہ ٹوئٹر ءُ نامی ئیں تندجاہ فیس بک ءَ اے زوراکیانی پژدر ءَ بلوچ تکاں زھرشانی یکشل ءَ برجاہ اَنت –

ھمے درگت ءَ ھپیز بلوچ ءَ نبشتگ کرتگ کہ چاچا فیض مھمد گبول ء مراد گبول وتی زمینانی پھریزگ ءَ بحریہ ٹاؤن ءَ نہ منّگ ءِ سر ءَ دزگیر کنگ بیتگ –

ھمے درگت ءَ اھوالکار مبشر زئدی ءَ نبشتگ رمزان ءِ ماہ ءَ بحریہ ٹاؤن زورانسری زمیناں پولیس ءِ کمک ءَ گیرکانودی ءَ زور گرگ ءَ اَنت مردماں بیھار دیگ ءَ اَنت ءُ مھلوک ءَ دزگیر کنگ ءَ اَنت (روٹی کپڑا مکان) دیوکیں پاٹی پی پی بلاول بھٹو زرداری ٹیگ کرتگ ءُ اے گپ کتگ اَنت –

ھمے درگت ءَ بلوچ یکجھتی کمیٹی کراچی ءِ نیمگ ءَ زمینانی زوگری ءِ ایر جتگ ءُ گوشتگ کہ اے دمگی مردمانی گون ءَ زوراکی ءِ ایشی ءِ ھلاپ ءَ مھلوک یکجاہ بہ بنت ءُ توار چست بہ کن اَنت –

بلوچ یکجھتی کمیٹی ءَ باندا بزاں آدینگ ءِ بیگاہ ءِ ھپت ءَ داں شپ ءِ ادار دوزار ءَ چاگردی رسانکجاہ ٹوئٹر ءَ #SavNoToBahriaTown ءِ کارمرد کنگ ءِ جار جتگ –

بلوچ یکجھتی کمیٹی کراچی ءَ چہ سندھ ءِ سرکار ءَ لوٹ کرتگ ءُ گوشتگ کہ آ ے زورگری ءَ ھوار مہ بیت بلکیں دمگی مردمانی زمینانی برگ ءَ میل ایت –

آئی ءَ گوشتگ کہ اے جاھاں بلوچ ءُ سندھی کرناں آباد اَنت ءُ اے زمین آیانی پِت ءُ پیروکی اَنت باید اے زمیناں مردم پاد کنگ مہ بنت –

پاکستانی پوج ءِ سر ءَ بلوچستان ءِ بازین ھند ءُ جاھاں اُرش یکشل ءَ بیگ ءَ اَنت لس مردمانی رد ءَ اُرشاں پوج ءَ جانی ءُ مالی تاوانانی دیمپانی کنگ کپگ ءَ اِنت –

گوستگیں روچ ءَ بیتگیں اُرش پوج ءُ موباھل ٹاور ءِ سر ءَ کنگ بیتگ اَنت چریشاں سلاہ بندیں مردماں پوج ءُ ٹاور ءَ تاوانباری کرتگ اَنت –

گوستگیں روچ ءَ کیچ ءَ ھواریں دمگ دشت پِٹوک ءَ پاکستانی پوج ءِ سنگر ءِ سر ءَ سلاہ بنداں اُرش کرتگ اَت کہ اُرش ءِ زمہ واری بلوچستان لبریشن فرنٹ ءِ جارکش میجر گوھرام بلوچ ءَ منّ اِتگ اَت –

گوھرام بلوچ ءِ گوشگ اَت پانگس ءِ سنائپر توپک ءِ گون ءَ اُرش کرتگ ءُ یک پوجی کارمندے کُشتگ –

ھمے وڑ گوادر ءَ ھواریں شھر پسنی ءَ پاکستانی کوسٹ گارڈ ءِ سر ءَ سلاہ بندیں مردماں دزبمبے چگل داتگ ءُ سلاہ بند درایگ ءُ روگ ءَ سوبمند بیتگ اَنت –

دومی نیمگ ءَ بلوچ ریپبلکن آرمی ءِ جارکش بیبگر بلوچ ءَ بیتگیں اُرش ءِ زمہ واری منّ اِتگ ءُ گوشتگ اَت کہ مئے سرمچاراں پسنی ءِ شھر ءَ کوسٹ گارڈ ءِ گاڑی ءِ سر ءَ دزبمبے چگل داتگ ءُ چریشی ءَ یک کارمندے مرتگ ءُ دو زدگ بیتگ اَنت –

ھمے رنگ ءَ بلوچستان ءِ دمگ کلات ءَ موباھل ٹاور ناشناسیں مردمان نشانگ کرتگ ءُ سوتکگ –

دومی نیمگ ءَ بلوچ سلاہ بندیں گل یونائیٹڈ آرمی ءَ کلات ءَ بیتگیں اُرش ءِ زمہ واری منّ اِتگ –

یونائیٹڈ بلوچ آرمی ءِ جارکش مرید بلوچ ءَ رسانکدراں شنگ کرتگیں درشان ءِ تہ ءَ گوشتگ کہ گوستگیں شپ ءَ کلات ءِ دمگ کیشان شیخڑی ءَ موباھل ٹاور نشانگ کرتگ ءُ آئی ءِ مشینری سُتکگ اَنت –

سر بیتگیں ھالانی رد ءَ بلوچستان ءِ بنجاھی شھر شال ءَ پشمبے ءُ آدینگ ءِ روچ ءَ سرکار ءِ پرمان ءَ کرونا نادراھی ءِ سوب ءَ لاک ڈاؤن ءَ سرجمیں بازار بند ءُ نھاد دگہ دکان بند کنگ بیتگ اَنت –

گوستگیں روچاں شال ءَ یک نھاد جاھے ءَ باپاری مھلوک ءَ سرکار ءِ کرتگیں بند مانیاھورتگ ءُ چریشی ءَ جنگ ءُ چوپ بیتگ اَود ءَ بازیں مردمے زدگ بیتگ اَت-

ھمے رنگ ءَ بلوچستان ءِ شھر پنجگور ءَ ھم کرونا نادراھی ءِ سوب ءَ بند آرگ ءِ پرمان کنگ بیتگ –

سرکار ءِ گوشگ ءَ دکان بند کنگ بیتگ اَنت ءُ شھر ءَ ھوار باپاری دکان ھم بندی ءَ گندگ ءَ اتکگ اَنت –

پنجگور ءَ ڈاکٹرانی گوشگ اِنت نادراھی ءِ گیش کپگ ناوشی یے کہ چریشی ءَ مردم وت ءَ پھریز بہ کن اَنت ھما کہ جاور جانسلامتی ءِ نیمگ ءَ مردماں گوشگ بیتگ اَنت باید مھلوک ھما گپاں بہ منّ اِت ءُ وت ءَ پھریز بہ کن اَنت –

پنجگور ءِ ڈاکٹرانی گوشگ اِنت ڈسٹرکٹ ھیدکواڑٹر ھسپتال پنجگور ءَ تنی وھدی ھشت سد ءُ بیست ءُ مردمانی ویکسینیشن کنگ بیتگ اَنت –

زانگ بہ بیت جھان ءِ وبا کرونا میان اُستمانی جانسلامتی ءِ رد ءَ بیمناک اِنت کہ چریشی ءَ بازیں انسانی جان رکگ ءَ نہ اَنت کہ اے وھد ءَ ھندوستان ءَ بازیں مھلوکے ھمے نادراھی ءِ آماچ اِنت ءُ بازیں مردماں کرونا ءِ دیم ءَ پروش وارتگ –

سر بیتگیں ھالانی رد ءَ سیستان ءُ بلوچستان ءَ ایرانی پولیس ءَ یک ٹن ئِے ءُ دو سد سیر تریاکانی دستیگ کنگ ءِ ھال رسانکدراں شنگ کرتگ –

ایرانی پولیس ءِ رد ءَ دستگیں کرتگیں تریاک سیستان ءُ بلوچستان ءِ دمگ سراوان ءَ کرتگ اَنت –

پولیس ءِ رد ءَ گوستگیں روچ ءَ چیریں ھالے ءِ پرمان ءَ پولیس ءُ دگہ چیریں ادارھاں دمگ انگیر کرتگ کہ اود ءَ پولیس ءَ بیڑ برتگ ءُ چریشی ءَ نشہ باپاریانی بنجل ءَ تیرگواری کنگ بیتگ –

پولیس ءِ رد ءَ نشہ باپاریاں پولیس ءِ تیرگواری کرتگ ءُ ھردوکیں نیمگاں تیرگواری ءَ پد نشہ باپاری چستگ ءُ تتکگ اَنت ءُ آیاں وتی نشہ سامان چگل داتگ اَنت –

پولیس ءِ رد ءَ اود ءَ پولیس ءَ یک ٹن ئِے ءُ دو سد سیر تریاک دزکپتگ ءُ آیانی بنجل ءَ سِلاہ ھم دزکپتگ اَنت –

پولیس ءِ گوشگ اِنت کہ اے نشھی سامان سیستان ءُ بلوچستان ءَ اتکگ اَنت ءُ ڈیھ ءِ دگہ استاناں شنگ ءُ شانگی ءَ چِن ءُ لانچ ءَ بیتگ اَنت کہ پولیس ءَ چیریں ھال ءِ سر بیگ ءَ اے بے سوب کرتگ اَنت –

دمگی مردمانی نیمگ ءَ اے ھال ءِ راستی پدر نہ بیتگ ءُ گوست ءَ ھم ایرانی واکداراں چوشیں چیزانی دستیگ کنگ ءِ ھال ماں رسانکدراں شنگ کرتگ اَنت –

زانگ بہ بیت سیستان ءُ بلوچستان ءَ بازیں مردمے نشہ باپاری ءِ سر ءَ دزگیر کنگ ءُ پد ءَ آیاں نشہ باپاری ءِ بھتام ءَ پاھو دیگانی ھال رسانکدراں شنگ بیتگ اَنت –

لس مردمانی گوشگ اِنت کہ سیستان ءُ بلوچستان ءَ دگہ روزگار ءِ نہ بیگ ءَ باز مردم نشہ باپاری ءِ وڑیں کارانی دیمپان اَنت ءُ چریشی ءَ چہ آیانی زندمان ءَ تاوانباری ھم بیگ ءَ اِنت –

سربوتگیں ھالانی رِد ءَ بلوچستان ءِ دمگ شال، ھزدار، گوادر ءُ دکی ءَ جتا جتائیں وئیلاں سَے مردم بیران ءُ دو ٹپی بوتگ –

گیشیں ھالانی رِد ءَ دکی ءَ اشکرانی کاریز ءَ ھاک کپگ ءِ سوب ءَ یک کاریز کارے بیران بوتگ، بیران بوتگیں کاریزکارے پجار محمد داؤد ء اختر جان جھمنند افغانستان ءِ نام ءَ چہ بوتگ –

مائنز ءِ بنشون ءِ رِد ءَ سَے شمبے ءَ دکی ءَ اشکرانی کاریز ءَ ھاک ءِ کپگ ءِ سوب ءَ اے مرد بیران بوتگ چات ءِ پھازداراں جون دست گپتگ نادراھجاہ ءَ سر کتگ کہ اود ءَ اژدری چار ءُ ٹپاس پد آئی ءِ جون بنکی ھنکین ءَ دیم دیگ بوتگ –

ھزدار ءَ لزو ءُ گزگی حیات ءَ باد ءَ دو جتائیں تیرگواری ءِ وئیلاں دو مردم ٹپی بوتگ –

تیرگواری ءِ وئیلاں ٹپی بوتگیں مردمانی پجار عبدالغنی ءُ شاہ زمان ء خالد ءِ ناماں چہ بوتگ انت –

پولیس ءِ رِد ءَ عبدالغنی کراچی شھدگ ءِ سر ءَ تیرگواری کنگ ءُ ٹپی کنگ بوتگ وھدیکہ شاہ زمان نزیکیں سیاد ءِ لوگی جیڑہ ءِ سر ءَ تیرگواری کُتگ ٹپی کتگ –

ٹپی بوتگیں مردماں پاد ءَ تیر وارتگ کہ آ ٹیچنگ نادراھجاہ ءَ برگ بوتگ انت دؤئیں وئیلانی درگت ءَ پولیس پٹ ءُ پول کنگ ءَ انت –

دومی نیمگ ءَ بلوچستان ءِ بنجاھی شھر شال ءَ سریاب کسٹم دمگ اے جی ایس کالونی نزیک ءَ یک مردمے ءِ جون ءِ دست کپتگ ـ جون سول ھسپتال ءَ برگ بوتگ –

وھدیکہ بلوچستان ءِ تیاب دپی دمگ گوادر ءَ ھم گوستگیں روچ ءَ بلدیہ دیریگیں ٹینکر ءَ جون ءِ دست کپتگ ات کہ پجار ھاتر ءَ نادراھجاہ برگ بوتگ –

ریاست ءَ بلوچستان ءِ تہ ءَ ڈیتھ اسکواڈ کشت ءُ کوش ءِ کنگ ءِ ھاتر ءَ مھار بڈا داتگ ءُ یل داتگ اَنت – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار دوسد ءُ نود ءُ ھشت روچ سرجم بوتگ – بلوچستان سوسائیٹی مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ وتی ھیال درشان کُت ءُ گوشت کہ دانشوراں ڈیتھ اسکواڈ ءِ ستاہ چو اے وڑ ءَ کُتگ کہ وھدیکہ زوراکیں ھاکم یا زورگیر کانود ءِ دائرہ ڈن وتی بگیری ءَ داروکیں پپرایمنیں جھد ھلاس کنگ ءِ ھاتر ءَ ھنچیں ٹولی جوڑ کنت کہ آوار جنی ءُ کشت ءُ کوش بہ کنت آئی ءَ ڈیتھ اسکواڈ گوش انت –

آئی ءَ گوشتگ کہ اولی رند ءَ اے تاوان ھما وھد ءَ میان استمانی رسانکدرانی زیبائی جوڑ بوتگ وھدیکہ برتانیہ ءِ سرکار ءَ ھمے وڑیں ڈیتھ اسکواڈ شمالی آئرلینڈ ءَ جوڑ کرتگ چریشی ءَ بدنام ءِ زمانگ ءِ بہ جن چگل دے پالیسی ءَ ریپبلکن آرمی ءِ بازیں مردمے کُشت ءُ کوش کتگ بازیں ملکاں کُشت کوش زریئہ ترس ءُ بیم پیداگ کتگ –

ماما قدیر ءِ گوشگ ات کہ بلوچستان ءِ تہ ءَ بلوچ ءِ پرایمنیں جھد دیمروئی ءُ راج ءِ ھوار بوگ ءَ تُرس ءِ آماچ بوتگیں پاکستان وتی مولانی گرگ ءِ ھاتر ءَ ھمے وڑیں گیر انسانی ڈیتھ اسکواڈ جوڑ کرتگ اے ڈیتھ اسکواڈ بلوچ ءِ پُرایمنیں جھد ءَ ھمگرنچیں نودربر، وکیل، ڈاکٹر ءُ اھوالکاراں ھوار ھر پڑا سیادی داروکیں ءُ کماشیں بلوچانی آوار جنی ءُ آھانی کوشاں ھوار انت –

آئی ءَ گوشتگ کہ سرجمیں بلوچستان ءَ ڈیتھ اسکواڈ سرپرستی ءُ چیردستی ءَ پاکستانی ھوار آئی ءِ نام نھادیں باسک ھوار انت – گوستگیں بازیں ماھاں ھمک روچ بلوچانی گِساں بیڑ بر انت توپک ءِ زور ءَ مردم اوار جنگ بوگ ءَ انت چادر چاردیواریاں لگتمال کنگ ءَ انت لوگانی تہ ءَ رؤنت ءُ لٹ ءُ پُل کن انت، راہ ءَ رؤکیں مردماں تنگ کنگ ءُ آھانی اوار جنگ ھمک روچی یے کارے جوڑ بوتگ – نوں بلوچستان ءِ تہ ءَ مردمانی ازت ءُ آبرو تھنا ڈن ءَ ناں بلکیں وتی گسانی تہ ءَ ھم پھازگ بوگ ءَ نہ انت –

ماما قدیر بلوچ ءِ گوشگ ات کہ اے چانیگ وارانی اے گیر انسانی بلوچ کش پالیسیاں راجدپتر بنگلہ دیش ءَ بوتگیں کشت ءُ کوش کنوکیں دمگی مردمانی دروشم یات کنت –

بنزہ ءَ شَے حق الاھی بنزہ سرکماش ءُ گمشاد مرید بنزہ ءِ کارگشاد نامینگ بیتگ اَنت، بلوچ اسٹوڈنٹس ایکشن کمیٹی ءِ بنجاھی نوکیں پتر ءَ پد بلوچ ایکشن کمیٹی ءَ بلوچستان ءَ ھوار بازیں جاھاں بنزھانی نوک گچینکاریانی درچ برجاہ ءَ اَنت ءُ گوستگیں روچاں ھزدار، شال ءُ دگہ دگہ جاھاں بیگ ءَ اَنت-

گوستگیں روچ ءَ بیست ھپت اپریل ءَ بساک کراچی شھدربرجاہ بنزہ ءِ یونٹ باڈی دیوان بنزہ کماش ریاض نور ءِ سروکی ءَ برجاہ دارگ بوتگ، دیوان ءِگچینی ءِ مھمان ھنکینی کارگُشاد سنگت پیرجان بلوچ ءُ ھواریں مھمان ھنکینی کماش سنگت نومان خالد بوتگ اَنت –

دیوان ءَ ھنکینی نیادانی دیوان، گوستگیں بنزہ ءِ اھوال، ایراد ءُ سرجمی، گَلی کار ءُ آؤکیں گامگیج ءِ سرھالانی سر ءَ شرّی ءَ تْران کنگ بوتگ-

گل ءِ سرھال ءِ سر ءَ بساک ءِ باسکاں تران کنان ءَ گْوشتگ کہ مئے گَل ءِ بُنھشت راجدوستی ءِ سر ءَ ایر اِنت ھمے ھاتر ءَ مئے سر ءَ الّمی اِنت کہ مئے باوست گیشتر گوں ھمے سرھال ءَ ھمسنت بہ بنت۔ سیاسی گَلانی تہ ءَ شرگداری ءِ ارزشت ءِ سر ءَ آھاں گْوشتگ کہ کارانی شر کنگ ءِ ھاتر ءَ شرگداری کنگ ءَ پیسر ایشی ءِ دْراھیں تَکانی سرپد بوگ الّمی اِنت کہ ایشی ءَ چہ شرگداری ءِ دود دیمروئی کُت کنت۔

آھاں گْوشتگ کہ بُنزہ پہ گَلے ءَ ترومبشت ءِ ادارہ اِنت کہ ھمے ادارہ ءَ پلگار اِتگیں مردم دیمتر ءَ گل ءِ راھشونی ءَ کُت کن اَنت ءُ ایشی ءِ واستا الّمی اِنت کہ بنزہ لبزانک ءِ ھوالہ ءَ مھکم بہ بیت بلے باز براں اے وڑ ءَ ھم گندگ بیت کہ گَل ءِ تَلّو ءَ باز مردم پہ وتی زاتی نَپ ءُ پائدگانی ھاتر ءَ کارمرز کَنت اے وڑیں رَویشتانی گِر ءُ دار ءِ ھاتر ءَ گَل ءِ ھرچ ادارہ ءِ تَچکیں لیکھے ءِ سر ءَ اوشتگ الّمی اِنت- ایشی ءَ ابید زالبولانی کِرد، راجمانی پدریچ، سنچداری، چاگردی رسانکجاہ ءِ نپ ءُ تاوان ءَ ھوار دگہ بازیں سرھالانی سر ءَ دلجمی ءَ باوست ءَ رَند آیوکیں گامگیج ءِ تہ ءَ بُنزہ ءِ ھستیں کابینہ ھلاس کنگ بوتگ ءُ نوکیں کابینہ دیم ءَ آرگ بوتگ-

نوکیں کابینہ ءَ شے حق الاھی بنزہ ءِ کماش، سلیم بلوچ کُمک کماش، گمشاد مُرید بنزہ ءِ کارگُشاد، زیشان بلوچ بنزہ ءِ کُمک کارگُشاد ءُ بختاور بلوچ ھالرسان کمک گچین کنگ بوتگ انت –

پہ ڈیپارٹمنٹ ءُ فیکلٹیانی کوارڈینیشن ءِ ھاتر ءَ صباء بلوچ ءُ عاطف بلوچ پہ سوشل سائنسز کوارڈینیٹر، مَھلِکاہ بلوچ ءُ جاوید اختر پہ نیچرل سائنسز کوارڈینیٹر ءُ سنگت زکریا بلوچ پہ اسکول آف لا ءِ کوارڈینیٹر گچین کنگ بوتگ اَنت-

دیوان ءِ گُڈسر ءَ ھنکینی کارگُشاد پیرجان بلوچ ءَ نوک گچین بوتگیں سنگت سوگند داتگ اَنت ءُ ھمے اُمیت درشان اِتگ کہ نوکیں سنگت گل ءِ کاراں پہ شرّی ءَ دیم ءَ بَر اَنت ءُ ھچ چُشیں کارے ءِ بھر نہ بنت کہ آئی ءِ سَوَب ءَ گَل ءُ گَل ءِ نیاد تاوان بار بہ بنت-

بلوچستان ءِ دمگ کیچ ءِ بنجاھی شھر تربت ءَ گوستگیں روچ ءَ ناشناسیں سلاہ بندیں مردماں پاکستانی پوج ءِ پانگس ءِ سر ءَ اُرش کرتگ ءُ اُرشکار درایگ ءَ سوبمند بیتگ اَنت –

وکداراں اُرش ءِ راستی پدر کرتگ ءُ گوشتگ کہ اُرش ناشناسیں مردماں ایف سی ءِ پانگس ءِ سر ءَ دزبمب اُرش کرتگ ءُ چریشی ءَ چار کارمند زدگ بیتگ اَنت –

دومی نیمگ ءَ بلوچستان لبریشن فرنٹ ءِ جارکش میجر گوھرام بلوچ ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ –

میجر گوھرام بلوچ ءَ رسانکدراں شنگ کرتگیں درشانی ءَ گوشتگ کہ سَے شمبے ءِ شپ ء ساھت ھپت ءُ پنجاہ دمان ءَ سرمچاراں کیچ ءِ بنجاھی شھر تربت ءَ سینما چوک ءِ ھستیں پوجی چوکی ءِ سر ءَ دزبمبے چگل داتگ، بمب تراک ءَ پوج ءَ جانی ءُ مالی تاوانانی دیمپانی کنگ کپتگ –

میجر گوھرام بلوچ ءَ گوشت کہ ما مھلوک ءَ گوں دزبندی کن ایں کہ آ پوجی چوکی، بنجل، پوجی کارواناں دور بہ بنت -دشمن ھروھد ءَ مئے سرمچارانی نشانگ ءِ تہ ءَ اِنت ءُ کجام ھم وھد ءَ آئی ءِ سر ءَ اُرش کنگ بیت اِنت –