TBP Balochi

بلوچستان ءَ کرونا نادراھی ءَ ھشتاد ءُ دو نوکیں کیس رپورٹ بیتگ اَنت، بلوچستان ءِ سرکار ءِ جارکش لیاقت شاھوانی ءَ باندا بلوچستان ءِ باپاری بنجلانی بند کنگ ءِ پِرینتگ –

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں ھشتاد ءُ دو دگہ نوکیں کیس دیم ءَ اتکگ ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ھزار ءُ شش سدو ءُ شست ءُ دو ءَ سر بوتگ اَنت- بیست ءُ چار ادارانی میان ءَ بلوچستان ءِ تہ ءَ کرونا نادراھی ءَ آماچ بوتگیں شست ءُ نُھ مردم وش بوتگ اَنت – وھدیکہ یک دگہ مردمے اے نادراھی ءَ چہ بیران بوتگ –

جاندراھی بنشون ءِ نیمگ ءَ چہ شنگ بوتگیں رپورٹ ءِ رد ءَ بلوچستان ءَ چار شمبے ءَ یک ھزار ءُ نوزدہ مردم کرونا ٹیسٹ کنگ بوتگ اَنت کہ آھانی تہ ءَ شست ءُ چار شال، نُھ ھزدار، لسبیلہ پنچ، کیچ ءَ سَے ءُ گوادر ءَ یک کرونا کیسے رپورٹ کنگ بوتگ –

بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ھزار ءُ شش سد ءُ شست ءَ دو ءَ سر بوتگ اَنت، رپورٹ ءِ رِد ءَ گوستگیں بیست ءُ چار ادارانی میان ءَ شست ءُ نُھ مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ نوزدہ ھزار ءُ پنچ سد ءُ چل ءُ دو انت –

رپورٹ ءِ رِد ءَ گوستگیں بیست ءُ چار ادارانی میان ءَ جھانی وبا کرونا وائرس ءَ یک دگہ نادراہ ءِ بیران بوتگ ،وھدیکے گوستگیں چار روچانی میان ءَ کرونا وائرس ءِ آماچ بوتگیں ھپت نادراہ بیران بوتگ اَنت – نادراھی ءَ بیران بوتگیں مردمانی کچ درسی دو سد ءُ بیست ءُ دو انت – ھستیں کرونا کیسز ھشت سدو نود ھشت اَنت – کرونا وائرس ءَ آماچ بوتگیں یازدہ نادراہ بلوچستان ءِ نادراہ جاھاں برگ بوتگ انت –

جاندراھی رپورٹ ءِ رِد ءَ شال ءَ بیست ءُ چار ادارانی میان ءَ پنچ سد ءُ ھشتاد ءُ ھپت مردم ءَ کرونا ٹیسٹ کنگ بوتگ اے میان ءَ کرونا دگہ شست ءُ چار کیس دیم ءَ اتکگ اَنت-

رپورٹ ءِ رِد ءَ گوستگیں روچ ءَ بلوچستان ءِ شھدربر جاھاں دو سد ءُ یازدہ مردمامی کرونا ٹیسٹ کنگ بوتگ کہ آھانی تہ ءَ یازدہ نودربرے کرونا نادراھی پدر بیتگ –

رپورٹ ءِ رِد ءَ بلوچستان ءِ تہ ءَ جھانی وبا کرونا وائرس ءِ نادراھی گیشتر تالان بوگ ءِ ھشت درسد انت- وھدیکہ شال ءَ گیشتر تالان بوگ ءِ ھشت اشاریہ شش درسد سربوتگ –

دومی نیمگ ءَ بلوچستان ءِ سرکار ءِ جارکش لیاقت شاھوانی ءَ وتی چاگردی رسانکجاہ ٹوئٹر ءَ ٹویٹ کرتگ ءُ گوشتگ کہ باندا سرجمیں بلوچستان ءَ باپاری، دُکان ءُ مارکیٹ بند کنگ بنت اِنت –

آئی ءَ گوشتگ کہ شمبے ءُ یک شمبے ءَ سرجمیں دُکان ءُ مارکیٹ بند کنگ بنت ءُ آ دگہ روچاں سھری داں شش بج ءَ ابید اژدری وردنی درمان جاہ، دکان (انڈور و آوٹ ڈور) ءِ سر ءَ پابندی جنگ بس ھوٹل سر کنگی ءَ پچ بنت اِنت –

بلوچستان ءِ راجدپتر ءُ بلوچستان ءِ بلوچاں وتی سازکاری ءُ نگیگیں جاور ھالانی تہ ءَ زوراکی ءُ ایردستی ءِ بگیری ءَ پُرایمنیں جُھد کُتگ – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ پنچ روچ سرجم بوتگ – چہ ھزدار ءَ محمد اشرف، خیرمحمد بلوچ، علی محمد ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ اگاں شما پُرایمنیں جھدے برورداں باور کنگ لوٹ ایت گڑا دیمونی دیگ ءَ چک ءُ پد مہ بہ اِت بلے دیمونی دیگ ءَ ھوار وت ماں ھور یکجاہ بوگ المی انت ، وت ماں وت ءَ بگیری دارگ ءِ پائدگ بس دژمن ءَ اِنت-

آئی ءِ گوشگ اَت کہ اے گپ ءَ ھر یک مردمے سرپد انت کہ بلوچستان ءِ راجدپتر ءُ بلوچستان ءِ بلوچاں وتی سازکاری ءُ نگیگیں جاور ھالانی تہ ءَ زوراکی ءُ ایردستی ءِ بگیری ءَ پُرایمنیں جُھد کُتگ –

ماما قدیر بلوچ ءِ گوشگ ات کہ اے بے زمیر ءُ ریاستی چاریگ پہ ملام ءِ ھاتر ءَ ورناہانی دلاری ءَ کن انت اے بے زمیر ھمساھگ ءُ دمگی پائدگ ءَ چست ورنایانی بارہ ءَ سرپدی زورگ ءَ سوبمند بنت ءُ آ ریاست ءِ سُر ءُ پرانی کمک ءَ وت ءَ وت اے وتن دوستیں ورناہانی دیم ءَ آھاں چہ گیش وتن دوستی ءِ باور کنائینگ ءِ جھد ءَ کن انت ءُ گوں آھاں ھوار بنت ءُ بلوچ ورنایانی درگت ءَ وتی ھاکماں سرپدی دے اَنت –

آئی ءِ گوشگ ات کہ بلوچ راج ءَ کساس ھپت دھک انت کہ پاکستانی زوراکیانی دیمپان انت – پاکستان ءَ بلوچ راج ءِ اوست پشت ءَ یل داتگ بلوچاں ٹوپ ءُ برزی اُرشاں چہ چیر ترینگ ءِ جُھد ءَ انت –

سربوتگیں ھالانی رِد ءَ گوستگیں روچ ءَ پنچ شمبے بیگاہ ءِ ادار شش ءَ ناشناسیں سلاہ بندیں مردماں مند ءُ دشت ءِ میانی دمگ بانسر ءَ پاکستانی پوج ءِ نوک جوڑ بوتگیں پانگس ءِ سر ءَ اُرش کُتگ – اُرش ءَ پاکستانی پوج ءَ جانی ءُ مالی تاوان رس اتگ، سلاہ بندیں مردم در آیگ ءُ رؤگ ءَ سوبمند بوتگ اَنت-

ھمے وڑ بلوچستان ءِ کاروباری شھر ھب ءَ نزر چورنگی ءَ برجاھیں پاکستانی پوج ءِ پانگس ءِ سر ءَ ھم دست بمب اُرشے بوتگ – اُرش ءَ پاکستانی پوج ءَ جانی ءُ مالی تاوان رس اتگ – ارشکار درآیگ ءُ رؤگ ءُ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ ھردو اُرشانی زمہ واری منّ اِتگ ءُ گوشتگ کہ مئے سرمچاراں پنچ شمبے ءِ روچ ءَ کیچ ءِ دمگ مند بانسر ءَ پاکستانی پوج ءِ نوک جوڑ بوتگیں پانگس ءِ سر ءَ دور جنگیں ءُ مزنیں سلاھانی گوما اُرش کُتگ، اُرش ءَ زورگریں پوج ءِ دو کارمند کُشتگ اَنت-

آئی ءَ دیمتر ءَ گوشتگ کہ پنچ شمبے ءِ روچ ءَ ھب ءِ شھر ءَ نزر چورنگی ءَ زورگریں پاکستانی پوج ءِ پانگس ءِ سر ءَ مئے سرمچاراں دز بمب اُرشے کُتگ-

آئی ءَ گوشتگ کہ دز بمب پانگس ءِ تہ ءَ کپتگ چریشی ءَ زورگریں پوج ءِ یک کارمندے مُرتگ- پاکستانی پوج ءِ تیرگواری ءَ راھگوزی ءِ ٹپی بوگ ءِ ھال اِنت –

جارکش میجرگْوھرام بلوچ ءَ وتی درشان ءِ گڈسر ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

بلوچستان ءِ دمگ کیچ ءِ ھند زامران نوانو ءَ سیمسر ءَ گوزگ ءَ بازیں وداراں یک گاڑی ءِ ڈرائیور تن ءُ شد ءَ بیران بیتگ –

گوستگیں روچاں جتا جتائیں ھالانی تہ ءَ چاگردی رسانکجاھاں ھال شنگ بیگ ءَ اَنت کہ روکپتی ءُ رودراتکی بلوچستان ءَ سیمسر ءَ تن ءُ شد ءَ سَے مردم بیران بیتگ اَنت بلے تچکی ءَ اے ھالانی راستیں گپ دیم ءَ نیاتکگ اَنت –

دی بلوچستان پوسٹ نیوز پتر ھال ءَ اے درگت ءَ تیل باپاری ءَ ھواریں مردماں گوں رھوت کرتگ ءُ تیل ءِ باپاری ءَ ھواریں ڈرائیورانی رد ءَ نوانو سیمسر ءَ تیل برداری گاڑی ءِ ڈرائیور استاد فضل ءَ تن ءُ شُد اوپار کُرت نہ کتگ ءُ بیران بیتگ –

ڈرائیورانی رد ءَ چریشی ءَ پیسر دشت ءَ ھواریں مردم ھم بارڈر ءِ گوزگ ءِ وداری ءَ تن ءُ شد ءَ بیران بیتگ –

تیل ءِ باپاری ءَ ھواریں ڈرائیورانی رد ءَ اے وھد ءَ ھزارانی کچ ءَ گاڑی پاکستانی سیمسری سیکورٹی پورسز ءَ داشتگ اَنت ءُ آیاں زورانسری کار گرگ ءَ اِنت –

آیاں گوشت کہ ترندیں گرمی ءَ ھزارانی ڈرئیور اے وھد ءَ ایف سی ءِ چیردستی ءَ روکپت ءُ رودراتکی سیمسر ءَ ٹٹ ءِ واستا گار جنگ ءَ اَنت –

آیاں گوشت کہ بازیں مردمانی آپ ءُ وردنی ھلاس بیتگ اَنت بلے آیاں سیکورٹی پورسز نا آیاں دیم ءَ روگ ءَ کِلگ اِنت نا پُشت ءَ کِلک اِنت –

آیاں گوشت کہ بلوچستان ءِ سیاسی پاٹی ایرادی بیان بازی ءَ یلہ بہ کن اَنت آیانی زندگیانی رکینگ ءِ جھد ءَ بہ کن اَنت –

زانگ بہ بیت گوستگیں روچاں بارڈر ءِ بندش ءِ سوب ءَ تربت ءُ پنجگور ءَ بازیں کچے ءَ زھرشانی کنگ بیتگ اَنت –

نبشتانک: بلکیں سر نہ بوتاں میتگ ءَ

نبشتہ کار : سیپ بلوچ

دی بلوچستان پوسٹ

بھشتیں زمین ءِ دنزانی وشبو چوناھیگا وش اَنت گوشگ ئیگ ءَ دنزانی تہ ءَ تئہ وشبو ھوار اَنت چِد ءُ گیشتر وشبوتر اَنت هرچ وهد گْوات کہ کش اِیت گْوات ءِ وشبوه ءَ چہ بهشت ءِ در گندگ ءَ کیت برے برے گْوات هنچو جیڑگی کنت کہ اے گْوات ءِ گْونیں دنزانی وشبوه من ءَ تئی بچکندگ ءِ چیدگی یات کیت هاں بلے اے تاک ءَ من بازیں یات ءِ مان کن آں بلکیں اے تاک ءَ گْوات تئی میتگ ءَ بیاریت ءُ تئی چم ء بہ کپ اِیت-

گپے زان ئے زندگی هرچ پڑ ءُ دْروشم ءَ نوکیں رنگے پیشداریت هنچوش کہ زمستان ءِ بیگاہ ءِ ملاریں زیبائی ءَ شین ءُ نون اے هما گپ اِنت بلکین شمشکار نہ ئے اے ساهت ءَ بلے من ءَ وتی اندر ءَ جاگہ مدے پرچا کہ من سپر ناتوامیں مساپرے آں ، منی منزل ءَ را آسری ءِ اُمیت مان منی هرچ وهد بهشت چمانی ندارگ اِنت-

من یک شپے مات ءَ را گشت من ءَ ترا دوست آں؟ مات ءَ کند اِت کہ تو نی گنوکے کجام مات ءَ وتی چک نادوست اِنت ، اے ساهت ءَ منی سر مات ءِ زانسر ءَ اَت ، منی چم ءُ دلْگوش گٌوں گْوانکو ءَ اِت آں بلے من ابکہ بوتاں چار اِت مات جیڑگ ءَ اِنت ءُ منی بالاد ءَ چارگ ءَ اِنت ، گڑا من هچ نہ گشت مات ءَ گریوْاناسکیں بچنکدے ءَ گشت کہ ابا تو واکی نوں جوان بوتگ ئے من همے جیڑگ ءَ آں کہ تو واکی نی سالونک بوْگ لوٹ ئے
گڑا من مات ءِ هبر ءَ را پهم ءُ گشت اما جان منی واب زوت سالونکی ءِ سمهبگ ءَ اِنت ، بلے مات ءَ گشت کہ من تئی کسانی ءَ تنگی سَیر مهر نہ آں چو زوت بانور ءِ وابانی آدینک مبو کہ من ترا سک گیر بیاراں ، دانکہ من واب شتاں مات ئے زانسر ءَ، واب شت آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ بنجاھی شھر دُزاپ ءَ پانزدہ میل دور میر جائو ءِ دگ ءَ دو گاڑیاں ٹکر وارتگ چریشی ءَ ھشت مردم زدگ بیتگ اَنت –

گیشیں ھالانی رد ءَ مروچی دُزاپ ءَ دو گاڑیاں ٹکر وارتگ کہ اود ءَ ھشت مردم زدگ بیتگ اَنت –

زدگ بیتگیں مردمانی چِست کنگ ءَ دمگدار سر بیتگ ءُ چِست کنگ بیتگ اَنت ءُ ھاتم النبی انبیا دُزاپ ءِ نادراہ جاہ ءَ سر کنگ بیتگ اَنت –

ھمے رنگ ءَ سراوان ءَ ناشناسیں مردمانی تیرگواری ءَ ایرانی سپاہ ءِ دو گجر جنگ بیتگ اَنت –

گیشیں ھالانی رد ءَ سراوان ءِ دمگ شستون ءَ ناشناسیں مردمانی تیرگواری ءَ سپاہ ءِ دو کارندہ کُشگ بیتگ اَنت –

کُشگ بیتگیں گجرانی پجار ھاشمی ءُ نصیری ءِ ناماں زانگ بیتگ اَنت –

کُشگ بیتگیں گجرانی بارہ ءَ سیکورٹی بنشون ءِ نیمگ ءُ تنی وھدی دگہ ھال دیم ءَ نیتکگ اَنت – زانگ بہ بیت روکپتی بلوچستان ءَ چیزے وھد بیت کہ ایرانی سیکورٹی ادارہ ءُ دگہ ادارھانی سر ءَ اُرشانی ترندی گندگ ءَ آیگ ءَ اِنت ءُ گیشتر گجرانی کوشانی زمہ واریاں سلاہ بندیں گل منّگ ءَ اَنت بلے اے گجرانی کوش تنی وھدی ھچ گل ءَ نہ منّ اِتگ اَنت –

بلوچ پرزندانی آوار جنی ھما روچ ءَ بندات بوتگ وھدیکہ پاکستانی ریاست ءَ پوجی لشکر کشی کُتگ ءُ ھزارانی کچ ءَ بلوچ آوار جتگ ءُ شھید کرتگ اَنت – ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ چار روچ سرجم بوتگ – بی ایس او ءِ شکور بلوچ، بالاچ بلوچ، کامریڈ اسرار بلوچ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچ راجی جُست راجدپتری ءُ گیشگیواری جیڑہ ءُ بیگواھیں بلوچ پرزندانی جیڑہ ھم چہ ھمے جست ءَ ھمگرنچ انت – بلوچ راج ءِ زند اے ریاست ءَ تباہ کتگ پرچاکہ بلوچ راج ءَ اے زورانسری زوگری ءِ بگیری ءَ پُرایمنیں جُھد کتگ –

آئی ءِ گوشگ ات: کہ بلوچ پرزندانی آوار جنی ھم چہ ھما روچ ءَ بندات بوتگ وھدیکہ پاکستانی ریاست ءَ پوجی لشکر کشی کُتگ ءُ ھزارانی کچ ءَ بلوچ آوار جتگ ءُ شھید کرتگ اَنت – ھستیں وھدے جاورھال سال دوھزار ءَ چہ برجاہ انت –

ماما قدیر بلوچ ءَ دیمترا گوشتگ کہ ھزارانی کچ ءَ مردم کوھلو، کاھان، ڈیرہ بگٹی، مکران، مشکے، آواران ءُ جاؤ ءِ دمگاں بیمناکیں بمبگواریانی سوب ءَ بلوچ وتی لوگ، جاہ ءُ دوارانی یلہ دیگ ءَ لاچار بوتگ انت کہ نوں سِند ءُ دگہ دمگاں در پہ دری زند گوازینگ ءَ انت –

آئی ءِ گوشگ ات: کہ بیگواھیں بلوچانی کھولاں پاکستان آمیدگس ءَ بگر ھر تک ءَ توار چست کُتگ بلے ھچ جاہ ءَ آھانی گون ءَ ھک کنگ نہ بوتگ – اے انسانی زوراکیاں پاکستان ءِ آزادیں رسانکدر، پاکستان ءِ نام نھادیں انسانی ھکانی گل ءُ پاکستان سول سوسائیٹی، نام نھادیں دیمروئی لوٹوکیں دانشورانی ھمراھی ءَ بلوچ پارلمنٹ پرست گل تچکی ءَ ھوار انت –

جھل جاؤ ءَ اُرش ءَ پد رندگیری کنوکیں پاکستانی پوج ءِ سر ءَ اُرش کتگ، دو کارمند کُشتگ ءُ دو زدگ کتگ اَنت- میجر گْوھرام بلوچ

سربوتگیں ھالانی رِد ءَ آوران ءِ دمگ جھل جاؤ ءَ ناشناسیں سلاہ بندیں مردماں پاکستانی پوج ءِ راہ بستگ ءُ اُرش کُتگ، اُرش ءَ پاکستانی پوج ءَ جانی ءُ مالی تاوان بوتگ – سلاہ بندیں مردم جنگ جاہ ءَ درآیگ ءُ رؤگ ءَ سوبمند بوتگ انت –

دومی نیمگ ءَ بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ گوستگیں روچ ءَ جھل جھاؤ ءَ پوج ءِ سر ءَ اُرش ءَ پد مروچی زورگیریں پوج ءَ سرمچارانی رندگیری کنان ءَ آھاناں نشانگ کنگ ءِ واستا دیم پہ کوہ ءَ جنزان بوتگ-

جارکش ءَ گوشتگ کہ مئے سرمچاراں پیسر ءَ چہ ھال سربوتگ گڑا آھاں سنگر گپتگ ءُ پاکستانی پوج ءِ سر ءَ اُرش کتگ – کاروان ءَ ھواریں دو موٹر سینکل ٹوھیں اُرش ءِ زد ءَ اَتکگ اَنت چریشی ءَ چہ سینکلاں سواریں دو پوجی کارمند مرتگ ءُ دو زدگ بوتگ اَنت-

میجر گوھرام بلوچ ءَ گوَشتگ کہ بلوچستان ءِ آجوئی ءَ داں زورگیریں پوج ءِ سر ءَ مئے اُرش برجاہ مان انت –

سر بیتگیں ھالانی رد ءَ روکپتی بلوچستان ءِ دمگ فاریاب ءَ کرومائٹ ءِ کھن ءَ کپتگ ءُ چریشی ءَ دو پوریاگر چیر اِتگ ءُ یکے بیران ءُ یکے زدگ بیتگ –

وئیل روکپتی بلوچستان ءِ دمگ فاریاب ءِ ھند دیراہ ءِ شُر ءَ دیم ءَ اتکگ کہ اود ءَ کھن ءِ کپگ ءَ د کرومائٹ کشوکیں پوریاگر بیران بیتگ اَنت –

فاریاب گورنر علی نیک نفس ءَ اے وئیل راست ءُ کرتگ ءُ گشتگ کہ اے وئیل ءَ یک مردمے بیران ءُ یکے ءِ کرود ءَ چیر ترینتگ ءُ آئی ءِ سرین ءُ پاد ناجوڑ اَنت –

علی نیک نفس ءِ گوشگ اِنت کہ پوریاگرانی مرگ ءِ گیشتریں سوب ھمیش اِنت کہ آیانی آسراتی کم اَنت ءُ چریشی ءَ پوریاگر بیران بیگ ءَ اَنت –

علی نیک نفس ءِ گوشگ اِنت کہ گوستگیں سال ءَ کرومائٹ ءِ کھن ءَ چِل ءُ شش پوریاگر بیران بیتگ اَنت ءُ اشاں ابید ھم بیست ءُ ھپت کس زدگ بیتگ اَنت –

علی نیک نفس گوشگ اِنت کہ باید سرکار اے کارانی سر ءَ دلگوش بہ دنت ءُ پوریاگراں شریں رنگے ءَ پھزداری بہ دنت –

نبشتانک: تھاری

نبشتہ کار: میرین بلوچ

دی بلوچستان پوست

یازدہ سال اِنت من مُدام وانگ جاہ ءَ چہ درکپاں تاں راہ ءِ سر ءَ من مُدام یک مُچّی یے گنداں ءُ ھمے مُچّی ءِ تہ ءَ زھگ ءُ زالبول ءُ یک کماشے ھم گندگ ءَ کیت ءُ ھر یکّے ءِ دست ءَ اکسے ءُ ھر یکّے ءِ دیم شپ ءِ تَھاری ءَ چہ مُج اِتگ اَت بلے من راہ کپتاں چی ءَ کہ من سرپد نہ اِتاں ءُ دومی نیمگ ءَ منی تہ ءَ مارشت ءِ ردوم ھم نیست اَت پمیشکا من نہ جل اِتاں ءُ اَدارُکے ءَ پد ھمے میتگ ءَ یک بلائیں گواتے اتکگ اَت دَنز ءُ مُج اَت ءُ ھچ گِندگ نہ بوت ءُ چاریں کَش ءُ گْوراں تھاری ءَ مانشانتگ اَت من چو کور ءِ ڈول ءَ دست موش کُت ءُ پاد اتکاں ءُ اوشتاتاں ءُ یک نیمگے ءَ من ترس ءُ بیم ءِ آماچ اِتاں آزمان ءَ اوں سیاھیں چادرے مانپوش اِتگ اَت ءُ درائیں استال چیر داتگ ات انت من گار اِتاں بلے من روان اِتاں بازیں پَندے ءِ روگ ءَ پد یک کسانیں شھمے گندگ بوت من ھمے شھم گِپت ءُ روان اڑان ءُ کپان بوتاں بازیں کنڈ ءُ بیٹے ءَ سر کپگ ءَ پد یک پْرشتگیں کمپانے گوں دیوالے ءَ ڈیک وارت بلے من ءَ اَنچوش گُمان بوت کہ اِد ءَ سک باز پْرشتگیں ءُ ڈرتگیں ءُ سوتکگیں کوٹی ھست من کمپان ءِ پُشتی نیمگ ءَ پُترتاں بَلے اود ءَ سک باز مردم کماش پیر ءُ ورنا ھست اِت اَنت بلے ھر یکے وتی کوٹی ءِ تہ ءَ اَت ھر یکّے ءِ مید ءُ ریش چوں وکشی ءُ گنوک ءِ ڈول ءَ اِت اَنت بَلے منی لُنٹ ھُشک اِت اَنت ءُ من سک تُنّگ اِتاں من کماش ءَ را گُشت من تُنگاں بَلے کماش ءِ چم نزور اِت اَنت ءُ کوٹی ھم تھار اَت بَلے دست موش ئِے کُت ءُ من ءَ آپ ئِے دات ءُ دیست ئِے سک باز گل بوت ءُ گُشت ئِے چون اَنت منی زھگ سمُل ءُ مِھلی انگت ءَ منی اکس اِش دست ءَ اَنت راہ ءُ دراں در پہ در اَنت؟ من گوں اجکھی پسو دات جی واجہ تو کے ئے زاناں؟ آئی ءَ ھِیسکگے جت ءُ گُشت ئِے من ڈاکٹر دین مھمد آں من واجہ ءِ دست چُک اِتان ءُ وش نیاد بوتان ءُ گُشت جی ھوں واجہ تنیگت ءَ تئی زھگ بے ھاٹیگ نہ اَنت کہ یزیدیں لشکر ءِ دیم ءَ وتی سر ءَ جھل بہ کن اَنت ءُ زی من دیستگ اَت کہ آمید گِس ءِ دیم ءَ تئی اکس اِش گون اَت ءُ زارشانی کنگ ءَ اَت کماش باریں زاکر جان ءِ ھالاں بہ دے اَبَّا زاکر جان وش ءُ سلامت اِنت آ ، آ دیم ءِ کوٹی ءَ اِنت منی ڈَول ءَ چم ءَ چہ نزور اِنت ھر روچ مات گُل ھاتون ءِ ءُ فرزانہ ءِ نام ءَ گِپت ءُ تکانسری کنت کہ باریں چوں بوت اَنت من در کپتاں ءُ زاکر جان ءَ گوں نند ءُ نیاد کُت نِی آئی ءِ چمانی میم ھم نزور اَت بس من ءَ ھمے گُشت ئِے گُھار فرزانہ ءَ بہ گوش مات ءِ ھیال ءَ بہ دار ءُ منی میتگ ءِ مردماں بس ھمے کلوہ ءَ بِہ دے کہ اَمّئے ھزار گنجیں مڈّی مئے زمین ءِ باھوٹ اَنت ایش شُمئے میار اَنت ایشاں پہ دژمن ءِ اوست ءُ اُمیت ءَ یلہ مہ دے اِنت من پَسّو دات شر تئی کلوھاں سر کناں ءُ من پد ءَ پاد اتکاں کہ واتر بہ باں بلے دگہ لھتیں ورنایانی پُرّ زھیریں نارگ ءُ اوپارانی توار منی گوشاں کپت ءُ ھر یکّے ءِ دست ءَ ھالتاکے اَت وھدے من دلگوش کُت چار اِت داں شبیر ءُ ھزب اللہ ءُ احسان قمبرانی ءُ دگہ لھتین اِت اَنت ءُ چم ئِے دست ءِ ھالتاک ءِ سر ءَ پدّر اِت اَنت کہ ھپت سال ءَ پیسر گار ءُ بیگواہ کُتگیں ماسٹر مراد بکش ءِ جنکیں چُک ءَ آمید گِس ءِ دیم ءَ وت کشی کُتگ ءُ اَمّئے دل ھزار دوا دنت کہ اَمّئے گُھار آمید گِس ءِ دیم ءَ وت کشی مہ کن اَنت بَلے من پسو دات کہ گُھار سیما ءُ ھسیبہ تنیگت ءَ چو بے ھاٹیگ نہ اَنت کہ دژمن ءِ بیم ءُ سانکلاں چہ وت کُشی بہ کن اَنت ءُ من گپ ءَ اِتاں کہ گلانی سروکے پیداک اَت من پاد اتکاں ءُ پد ءَ ھمے ڈرتگیں کمپان ءِ پُشتی نیمگ ءَ در کپتاں ءُ پد ءَ دور سریں راھے ءَ کسانیں چراگے ءِ شھم ءُ لھتے اکس ھم گندگ بوت من ھم ھمے شھم ءَ سر گِپت ءُ راہ کپتاں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔