TBP Balochi

سر بیتگیں ھالانی رد ءَ گوستگین شپ ءَ ھب گڈانی ءَ دو گاڑیانی ٹکر ورگ ءِ سوب ءَ چار مردم ھما جاہ پہ جاہ ءَ بیران بیتگ اَنت –

وئیل لک بدوک ءِ ھند ءَ پیش اتکگ کہ اود ھَ کنٹینرے ءَ مھر گاڑی ءِ دام کرتگ کہ چریشی ءِ آسر ءَ چار مردم بیران بیتگ اَنت –

بیران بیتگیں مردمانی پجار خلیل مستری جھمنند اوتھل، مجید گونگہ لاکھڑا، زاھد گونگہ لاکھڑا ءُ مھمد شاھد گونگہ لاکھڑا ءِ ناماں زانگ بیتگ اَنت کہ اشانی سیادی عمرانی گوٹھ لاکھڑا لسبیلہ ءَ اِنت –

کنٹینر ءِ کلینر ءِ رد ءَ کنٹینر چہ کراچی ءَ چمن ءَ روگ ءَ بیتگ لک بدوک ءِ ھند ءَ بریکانی فیل بوگ ءِ سبب ءَ آؤکیں بس رکینتگ ءُ کوہ ءَ ٹکر جتگ ءُ چریشی ءَ گاڑی ءِ سر ءَ کپتگ –

ایس ایچ او گڈانء راشد بزنجو ءِ رد ءَ گاڑی کنٹینر ءِ چیر ءَ چیر تر اِتگ ءُ چریشی ءَ بازیں کوششاں چار مردمانی جون کش اِتگ اَنت وئیل ءَ شال ءُ کراچی ءِ میانی رپت ءُ آمد مھتل بیتگ –

زانگ بہ بیت بلوچستان ءَ ھمک روچ بازیں کچے ءَ دگانی سر ءَ مردمانی سر ءُ جان تاوان بیگ ءَ اَنت –

سربوتگیں ھالانی رِد ءَ بلوچستان ءِ دمگ شال، نوشکی ، کیچ مستونگ ءَ جتا جتائیں وئیلاں سئے مردم بیران بوتگ ءُ سئے ٹپی، وھدیکہ بلوچستان ءِ بنجاھی شھر شال ءَ زالبول پروفیسر ءِ جون ھاسٹل ءَ دست کپتگ-

گیشیں ھالانی رِد ءَ بلوچستان ءِ بنجاھی شھر شال ءَ سردار بھادر خان ویمن شھدربرجاہ ءِ ھاسٹل ءَ اسسٹنٹ پروفیسر ڈاکٹر شائستہ ءِ جون دست کپتگ –

ڈاکٹر شائستہ کراچی ءِ نندوک بوتگ آئی ءِ مرگ ءِ درگت ءَ ھچ وڑیں ھال سر نہ بوتگ اَنت اژدری چار ءُ ٹپاس ءِ ھاتر ءَ پروفیسر ءِ جون بی ایم سی نادراھجاہ ءَ برگ بوتگ – اے درگت ءَ گیشیں پٹ ءُ پول برجاہ انت –

بلوچستان ءِ بنجاھی شھر شال ءَ دگ ءِ وئیلے ءَ دو مردم بیران بوتگ اَنت –

وئیل شال ءِ دمگ کچلاک ءَ دیم ءَ اتکگ کہ ٹریلرے بریک فیل بوگ ءِ سوب ءَ ڈیکر کنگ ءَ دو مردم بیران بوتگ – پولیس ءَ بیران بوتگیں مردمانی جون دست گپتگ ءُ نادراھجاہ ءَ سر کتگ انت اژدری چار ءُ ٹپاس ءَ پد جون کھول ءِ ھوالگ ءَ دیگ بیتگ اَنت-

ھمے وڑ نوشکی کلی شریف خان دگ ءِ سر ءَ پک اپ گاڑی ءُ پرپٹے ءِ ڈیک ورگ ءَ دو مردم زدگ بوتگ اَنت-

وئیل ءَ زدگ بوتگیں مردم ٹیچنگ ھسپتال نوشکی ءَ سر کنگ بوتگ انت –

دومی نیمگ ءَ کیچ ءَ ناشناسیں مردمانی تیرگواری ءَ یک مردمے بیران بوتگ –

وئیل کیچ ءِ بنجاھی شھر تربت ءَ میری میتگ ءَ دیم ءَ اتکگ کہ ناشناسیں مردمانی تیرگواری ءَ ملا واحد جھمنند میری نامیں مردمے بیران بوتگ – وئیلے درگت ءَ ھچ وڑیں سرپدی نہ رس اتگ کہ کجام سوب ءَ مرد جنگ بوتگ –

ھمے وڑ ءَ مستونگ ءَ ناشناسانی تیرگواری ءَ یک مردمے زدگ بیتگ –

وئیل دبوج ءِ وھد ءَ دیم ءَ اتکگ کہ مستونگ ءِ ھند ٹنڈلان ءَ سلاہ بندیں مردماں تیرگواری کرتگ ءُ یک مردمے زدگ کرتگ-

تیرگواری ءَ زدگ بیتگیں مردم ءِ پجار کریم ازبک نام ءَ زانگ بیتگ، زدگ بیتگین مردم نواب غوث بخش رائیسانی نادراہ جاہ ءَ برگ بیتگ –

بلوچستان ءَ ھمک روچ رُدم زرتگیں وئیلاں لس مردمانی زدگ ءُ بیرانیانی ھال رسانکدراں شنگ بیگ ءَ اَنت ءُ اے درگت ءَ دمگانی انتزامیہ ءَ لس مردم بے سوبی گوشگ ءَ اَنت –

گوستگیں روچاں بلوچستان ءِ باپاری شھر ھب ءَ دُزانی تیرگواری ءَ یک مردمے بیران بیتگ اَت –

بیران بیتگیں مردم ءِ کوش ءِ ھلاپ ءَ سیاسی ءُ چاگردی مردماں زھرشانی کرتگ ءُ انتزامیہ ءَ دُزانی گرگ ءِ لوٹ کرتگ، سیاسی مردمانی گوشگ اَت کہ اگاں انتزامیہ ءَ دُز نہ گپت اَنت گڑا زھرشانی درچ گیش کنگ بنت –

جائو ءَ پاکستانی پوج ءِ پانگس ءِ سر ءَ دورجنگیں توپک ءِ گون ءَ اُرش کتگ ءُ یک کارمندے کُشتگ- گوھرام بلوچ

سربوتگیں ھالانی رِد ءَ مروچی چارشمبے ءَ آواران ءِ دمگ جائو ءَ عطا محمد گوٹ میتگ ءَ برجاھیں پاکستانی پوج ءِ پانگس ءِ سر ءَ ناشناسیں سلاہ بندیں مردماں اُرش کُتگ –

اُرش ءَ پاکستانی پوج ءَ جانی تاوان رس اتگ، وھدیکہ سلاہ بندیں مردم درایگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں چار شمبے ءِ روچ ءَ سھب ءِ ادار یازدہ ءَ جھل جائؤ ءَ عطا محمد گوٹ میتگ ءَ برجاھیں پاکستانی پوج ءِ پانگس ءِ سر ءَ دور جنگیں توپک ءِ گون ءَ اُرش کُرتگ ءُ یک پوجی کارمندے کُشتگ-

گڈسر ءَ میجر گْوھرام بلوچ ءَ وتی درشان ءِ تہ ءَ گوشتگ کہ زورگیریں پاکستانی پوج ءِ سر ءَ مئے اُرش بلوچستان ءِ آجوئی ءَ تاں برجاہ مان انت –

میاں استمانی ادارھاں بیدے یک دو درشان ءَ دگہ ھچ وڑیں گامگیج نہ زرتگ وھدیکے پاکستانی ریاست ءَ بیگواھیں مردمانی سرا وڑ وڑیں بھتام جنگ ءَ ابید وتی آمیدگس آں نیاؤرتگ انت – ماما قدیر بلوچ

دی بلوچستان پوسٹ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ سئے روچ سرجم بوتگ – جھدکار ایڈوکیٹ خالدہ قاضی بلوچ، بلخ شیر بلوچ ءُ دگہ مردماں بنجلے تر ءُ تاب کرتگ ءُ بیگواھیں مردمانی کھول ءِ گوما دلپدردی درشانتگ –

زھرشانی بنجل وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچستان ءِ تھا ھزارانی کچ ءَ مات ءُ گھار برات وتی دوستیگیں مردمانی ودار ءَ انت، بیگواھیں مردمانی کھول مدامی ھمے امیت ءِ ودار ءَ انت کہ بلکیں آھانی دوستگیں مردم یل کنگ بہ بنت، بابرکتیں رمضان ءِ ماہ بہ بیت یاکہ ائید بہ بیت بیگواھیں بلوچانی کھول وتی دوستیگیں مردمانی راہ ءَ چاران انت –

آئی ءِ گوشگ ات کہ وائس فار بلوچ مسنگ پرسنز ءَ ھوار بیگواھیں مردمانی کھول ءُ جتائیں گلاں گوں سیادی داروکیں جھدکار زھرشانی ءُ روانک ءُ دگہ وڑ ءُ پئیماں ڈیھہ ءُ میان استمان ءَ بیگواھیں بلوچانی جیڑہ ءَ دلگوش کنائینگ ءَ انت بلے میان استمانی گلاں بیدے یک دو درشان ءَ دگہ ھچ وڑیں گامگیج نہ زرتگ وھدیکے پاکستانی ریاست ءَ بیگواھیں مردمانی سرا وڑ وڑیں بھتام جنگ ءَ ابید وتی آمیدگس آں نیاؤرتگ انت –

ماما قدیر بلوچ ءِ گوشگ ات کہ بیگواھیں مردمانی ھاتر ءَ مدامی توار چست کنیں، کجام ھم وھد ءُ موسمی جاور بہ بنت ما وتی دوستیگیں مردماں پہ زوراکیانی دیمپان بیگ ءَ پہ زنداناں یلا دات نہ کنیں- اے رد ءَ میان استمانی چاگرد ءَ دلگوش دئیگ لوٹیت –

بلوچ یکجھتی کمیٹی ءَ ایران ءَ ھواریں سیمسر ءِ بندش ءِ ھلاپ ءَ وتی شنگ کرتگیں بیان ءِ تہ ءَ گوشتگ کہ بند کرتگیں بارڈر ءَ تیل ءِ باپاری کنوکیں ھزارانی مھلوک ءِ زرکاری ھمے بارڈر ءِ سر ءَ بیگ ءَ اِنت ءُ اے بارڈر ءَ ابید سبب ءَ بند کنگ انسانی ھکانی لگتمالی اِنت بارڈر ءَ ھواریں مردم اے اے بندش ءِ سوب ءَ باپاری ءَ ھواریں کھول شد ءَ لاچاری بیگ ءَ اَنت –

بلوچستان ڈیھ ءِ پشکپتگیں اُستانانی نگاھاں چارگ بیگ ءَ اِنت نیم ءَ گیش آبادی لکیر ءِ چیر ءَ زندگی گوازینگ ءَ لاچار اَنت سرکار ءِ نیمگ ءَ روزگار ءِ نہ رسگ ءَ اُستان ءِ ورنا وتی کمک ءَ وت زرکاری ءِ واستا کپان ءُ پرشان اَنت – اے رنگ ءَ جاور بہ بنت روزگار مہ بیت بارڈر بندش بژنی گپے –

ایران ءَ ھواریں بارڈر ھمک روچ چہ بلوچستان ءَ ھزاراں مردم لاپ والینگ ءَ دیم ءَ پہ سیمسر ءَ دے اَنت – زرکاری ءِ تنگدستی ءَ تیل باپاری ءَ اے مردم ھمک روچ تنگ کنگ بیگ ءَ اَنت ءُ گیر انسانی رویشانی گون ءَ پیش بیگ ءَ اَنت – ھمود ءَ یک نیمگے روزگار ءِ اے دروشم ءَ سدانی کچ ءَ کھول دیم روشنائی ءِ نیمگ ءَ بیتگ اَنت – سیمسر ءِ دوئیں نیمگاں باپاری مردم زوراکیانی نشانگ کنگ بیگ ءَ اَنت کہ اشی ءِ راستی لھتے ماہ ءَ پیسر ایرانی پوج ءِ نیمگ ءَ تیرگواری ءَ بازیں کچے ءَ گاڑیانی ڈرائیور کُشگ بیتگ اَنت –

بلوچ یکجھتی کمیٹی وتی درشان ءِ گڈسر ءَ سرکار ءُ دراھیں ھاکماں گوں دزبندی کنت ایران ءَ ھواریں سیمسر زوت ءَ چہ زوت پچ کنگ بہ بیت دانکہ لاپ والینگ ءِ شوھاز ءَ درپہ دریں ڈرائیور وتی لوگانی چراگ ءَ روک کت بہ کن اَنت – اگاں سیمسر ءِ بندش ءِ بارہ ءَ زوت پچ کنگ نہ بیت گڑا اے باپاری ءَ ھواریں مردمانی تنگ کنگ بند نہ بیت گڑا بلوچ یکجھتی کمیٹی پُر ایمنی ءِ رنگ ءَ گامگیج زورگ ءِ ھک ءَ داریت –

سر بیتگیں ھالانی رد ءَ بلوچستان ءِ دمگ منگچر ءَ تیرگواری ءِ وئیل ءَ تحصلدار معسود بگٹی زدگ بیتگ، زدگی ءِ جاوراں مستونگ ءِ نادراہ جاہ ءَ سر کن بیتگ –

پولیس ءِ رد ءَ مروچی منگچر ءِ ھند چھوٹانگ ءَ یک بیڑے ءِ وھد ءَ جرمکاراں تیرگواری کرتگ ءُ چریشی ءَ تحصلدار مسعود بگٹی زدگ بیتگ –

زدگ بیتگیں مسعود بگٹی درمانی ءَ مستونگ ءَ برگ بیتگ ءُ اود ءَ آئی ءِ بنداتی ٹپانی درمانی بندات بیتگ –

زانگ بہ بیت گوستگیں روچ ءَ سی ٹی ڈی ءَ ھم چار سلاہ بندیں مردمانی کُشگ ءِ ھال رسانکدراں شنگ کرتگ اَت –

سی ٹی ڈی ءِ بنشون ءَ ٹاہ داتگ اَت کہ بولان ءِ دمگ ءَ ناشرکارانی بنجل ءَ بیڑ برتگ ءُ اود ءَ لشکر جنگوئی ءَ بندوکیں چار کس جتگ ءُ کُشتگ اَنت –

سی ٹی ڈی ءَ گوشتگ کہ اے مردم شال ءَ مزنیں بمب تراک ءُ دگہ ناشریانی چِن ءُ لانچ ءَ یتگ اَنت –

زانگ بہ بیت لشکر جنگوئی گیشتر ھزاراہ برادری ءِ کوشانی زمہ واری ءَ منّگ ءَ اِنت –

گوستگیں وھداں بازیں ھزارہ ءِ جنگ ءُ کُشگ بیتگ اَنت کہ آیانی گیشتریں زمہ واری لشکر ء جنگوئی ءَ ھوار داعش ءُ دگہ نیکراھی ءِ نام ءَ بندوکیں دگہ گلاں منّ اِتگ اَنت –

نبشتانک: بے مَٹیں زالے اَت

نبشتہ کار: لطیف سخی

دی بلوچستان پوسٹ

بَرے بَرے دِل چونیں لھڑیں ترانگاں سَرّیچ بیت دائمی جیڑگانی پل ءَ اوشت ایت زند ءِ سرھال ءُ دراجیں کشکاں سرموش کنت ءُ ابدمانیں مَردماں چار اِیت ،بلے دراجیں کِشکاں سَر کپگ ءَ پد کنزگ روان بوگ بازیں داباں مَردماں کنجیں مانتراں سَر کن انت بلے کجام ھم چیزے لوٹ ایت ترا آئی ءِ دَست کَپَگ پ بلاھیں لوٹے الَم کپ ایت ۔مَردمانی اوست ھم بازیں جاھاں کَپ انت پرچا کہ نا امیتی ءِ سیمسراں مَردم پہ گال وتی واستا گچین نہ کنت ، پَد ءَ زند ءِ انچیں سوج انت ترا تئی جند ءِ ھستی ءِ سکین ءَ چہ ترا دُز اِیت ءُ چیر دَنت بَرے تو یک دابے ءَ مار ئے انچو گُمان بیت ترا کہ من زند ءِ روچ وتی سَرجم کُتگ انت دِل ھمے جُست ءُ پُرساں گوں سَریچ بیت نہ زاناں پرچا؟گْوش انت بنی آدم چہ وتی جند ءِ نزیک ءَ دوست ءُ ھمبل ھمائی ءَ دار ایت کہ آئی ءِ واستا مدام ھما دراجیں پیچ ءُ تاباں وداریگ بوتگ آئی ءِ سَرشونی کُتگ ئِے – مَردم بازیں رَند ءَ چو مولماں گوں بَدل بنت بازیں ھد ءَ مَردمانی بِستاراں سَرپَد نہ بنت، بازیں جیڑھانی سر ءَ گَپ کَش انت ،وتی نزدیکیں مَردماں آئی ءِ بالاد ءُ کِرداں ایر دے انت انچو گش ئے ھمے ھَمبل ءَ وتی سَرپد نہ انت بلے پھمَگ ھم ھچ آئی ءِ واستا اینچو ارزشت نہ دار اِیت پرچا؟ آ وتی کَرساں کَشّگ لوٹ انت۔

شَپ جَتی ات رَمس 2015-7-9 ات من گوں دل ءِ موجاں یک گسے ءِ لَڑ ءَ نشتگ اتاں لَٹے منی دست ءَ ات من زمین ءَ کونڈ جنگ ءَ اتاں پَرچا کہ شَپ ات ماھکانی ات گْونڈل گوازی ءَ ات اَنت ،من ھم ھمے ھیالانی رَم ءَ نِشت انت گْونڈی ءِ ترانگانی مَنگیر گِپت ءُ نشتاں کُچکانی وَکگ ات چِرتاں ھم گوں وازاں پاس وتی دَپ ءِ وازاں پہ وت لیٹینتگ ات بلے من سما ھم نہ کُت من چے مارگ ءَ آں ؟ من زَمین ءُ آزمان ءِ جھلی ءُ بُرزی گواز کنگ بنگیج کُت کہ ترانگاں پِراموش بہ باں بَلے من وتی وَس ءُ واک جَت بلے انگت من ھِچ شَموشکار نہ بوتاں ۔

پَرچا کہ گُش اَنت مَردم تْرس ءِ وھم ءَ یک بَرے دل ءَ ایر بہ گیج ایت گڑا دائم آئی ءِ نز ءَ چیلِک ھم سیاہ مارے ءِ رنگ ءَ گِندگ بیت ،پَمیشکا من ءَ ھمے تْرس دل ءَ ایر گِپتگ ات کہ من وتی نز ءَ ھمے گْونڈو دیستگ ات آں بلے یک ناپرسیں جَنگلے ات لیب ءُ گوازی، ھُوکانی توار ءُ لولکانی چِلی چِلی ات، درچکانی تاک ھم گیمُرتگ ات اَنت، ھَر نیمگ ءَ زورانسری ات بلے جَنگل ھمے ھُوکانی انگیر ءَ ات ھَروچ من ھم شُت آں کہ گوں ایوکی ءَ بہ ننداں دل ءِ لھڑاں سارت بہ کن آں پرچا کہ من ءَ مُدام وھد ءِ ھیال اتکگ ات آں من لوٹ ات ایوکی ءَ بہ نندان ءُ وت ءَ جُست بہ کن آں، پَسو ھم وت بِہ دے آں بازیں ھَد ءَ من پَسو ھم وتی جِند ءِ داتگ ات اَنت بلے من وت مار اِتگ ات، زند ءِ دراجیں سَپر بہ بیت یا بنی آدمانی گیش ءُ مانگیش دْرست من ءَ وتی نز ءَ ھمے داب ءَ گندگ ءَ اتک انت، گوں ھمے دانکاں من ھیالاں شُت آں داں دیر ءَ من اُھون ھم نہ کُت ھِچ نہ سَمار اِت من نہ لوٹ ات واب ھم بہ کپاں کسہ آسر مہ بیت بلے انگت من جیڑگ ءَ اتاں داں سَما کُت ءُ سھب ءَ ٹِک داتگ روچ پَکَل ءَ میتگ ءِ کوھانی سَر ءَ بْرانز گران ءُ دیم پہ روچ ءِ بَرکت ءَ گام جنان اَت ۔

بَس من ایوکی مار ات گُش ئے ھَلک مُلک کوہ ءُ دار پیش ،لوگ ،ماڑی منی سر ءَ بار انت، مَردم کس ودی ھم نہ کنت انچوش گُش ئے میتگ انسَر اِتگ ھَرکس چہ دوشیگیں ھُوکانی تْرس ءَ وتی گِس ءُ دَمک ءُ دَراں کَپتگ کَس کسی نہ انت تھنا من اِت آں بَس بَرے ایوکی ءَ گِریواں، بَرے بَس کناں داں چاریں نیمگ ءَ چار ات کس منی تسلہ دیگ ءَ گندگ نہ بوت ، من آستونک ءِ لَمباں بَرے زوراں ارساں پَھک کناں بَرے ننداں دیم ءَ آزمان ءَ کنان ءُ وتی واب ءِ کسھانی لوٹاں لوٹ آں؟ آیانی پَسواں لوٹ آں بلے ھِچ نہ منزل ھست اَت پمن ءَ نہ ایوکی ءَ وت ءَ ساڑا آں۔

ھمے ھیالانی تہ ءَ روچ میزان میزان ءَ نیم روچ ءِ ساھتاں سَر بوت، میتگ ءَ ھم وتی جاک ءُ سلوات بندات کُت ، منءَ ھمے سما بوتگ ات گُش ئے دوشی ءُ سھب ءِ نیام ءَ ھمے ھَلک ءَ ھَور ءُ انگیریں گواتے اتکگ ءُ مَردم پتاتگ انت ئِے ، مَردم پمیشکا ٹوک ءُ توار ءَ کپتگ انت، پد ءَ سما کُت بَلکیں من نہ اشکتگ میتگ ءِ مردمانی کوکار ءُ جاک گوں ھمے ھیالانی تہ ءَ مَن وتی آ نندگ جاہ بدل کُت دیم پہ لوگ ءِ نیمگ ءَ رھادگ بوت آں بَلے ھمے گپانی ءُ دوشیگیں آگھی ءَ، پد ءَ مَن ءَ سَک چہ ھُوکاں تْرس ءُ بیمے ودی بوتگ ات من نہ لوٹ ات بِہ گریواں بلے دِل دارگ نہ بوت من ایوک ات آں کسے ءَ پہ تسلہ ھم دست ماں سر ءَ مان شانَتگ اَت ،اناگت ءَ منی سَر ناکو میار ءِ میتگ ءَ کَپت آ جاہ مئے لوگانی راستیں پھنات ءَ ات ،من سَر کپاں ھمے میتگ ءَ شُت آں منی ھیسکارگانی توار بَس ھست ات پرچا کہ من بازیں گریوگاں تُستگ ءُ دمبرتگ اَتاں بس ھیسکارگ انگت دل ءَ نشتگ ات کسے ھم منی بار ءَ نہ مار اِیت ءُ من سَر کپاں ءُ چوریانی داب ءَ اناگت ءَ ماسی گُلین ءِ آیگ ءِ ھال ھمے میتگ ءَ ھست ات ماسی گُلین باز وش تب ءُ دلیریں زالے ات آئی ءَ مُدام لوٹ ات کہ من بہ ننداں زکر ءُ تاھت ءُ کسھاں مَردمانی تباں وش بہ کناں ۔ گُڑا من ھم سَر جھل بوگ ءُ ھمے دوشیگیں بے وابی ءُ ھُوکانی کوکار ءُ جاکاں سَرگران چو چوریگانی داب ءَ اڑان ءُ کپان دیم پہ ھمے میتگ ءَ سَر بیت آں داں لوگ ءِ دَپ پَچ اَت مَردمانی وش نیادی ءُ ٹھک ءُ ملار اَت، گَپ اَت داں من گِدان ءِ نزدیک ءَ سَر بیتاں آب ءُ یک زالے دَر اتک ءُ منی نز ءَ ماسی گُلین ات بلے پد ءَ سما کُت ماسی گلین نہ ات داں ھمئے ھیالانی ءُ جُستءُ پُستانی رَم ءَ من ھمے کُڈک ءَ سَر بیت آں ماتی گلین ھمد ءَ نشتگ ءُ دیوان ئِے وش کُتگ اَت منی دوشیگیں گریوگاں انگت دل ءِ لھڑ نہ کُٹ اتگ اَنت، گْریوگ دَر نہ بنت بلے ھیسکارگ دلءَ ایر شُتگ ماسی گُلین ءَ مار ات ءُ من ءَ کش ءَ ئِے نندارینت ءُ چاہءُ آپ ئِے کُت مَردم پاد اتک انت ھمے کہ ماسی ءِ گپانی وازمندگ اِت انت دائم ۔ من ءَ ماسی ءَ تسلہ دات ءُ من پاد اتک آں کمو اے نیمگ ءَ ماسی ءِ ھیزَک ءِ لَمب ءَ پاد وتی دراج کُت انت بلے دوشیگیں تْرس انگت دل ءَ ات منءَ واب نہ اَتک ۔ واب ءُ آگھی ءِ توک ءَ ماسی گُلین اتک ءُ منءَ جُست ئِے کت تو ابا کجا بوتگ ئے؟ ترا کے ءَ آؤرتگ مئے ھند ءَ؟ تو ءُ گْونڈَل نہ تْرس اتگ ئے ؟ ھمے گپاں گوں من یکبرے پد ءَ دوشیگیں یاتانی تہ ءَ گریوگ بندات کُت ماسی گُلین ھم ھیران بوت ءُ من ءَ وش کنگ ءِ باز تسلہ دات ئِے من وش بوت آن ءُ ماسی ءِ جُستانی پسو دات انت ۔

اماں گُلین ءَ وتی دراجیں کسھانی رَم بُنگیج کُت گشت ئِے منی چک نوں اے رھسراں تھنائی ءَ مَرو ءُ مہ گرد تو چُکے ئے پد ءَ ترا شپاں تُولَگ، ھوک ءُ روبا بَر انت ،انوں تو آھانی دستاں لگُشتگ ئے پد ءَ ترا بگند انت، تو بے سمائی ءَ ماں جنگلاں مَرو گوں ھمے دانکاں ماسی پد ءَ وتی بُزانی کدیم کنگ ءَ شت، من دیر ءَ ودار کُت بلے پد ءَ ماسی گُلین واتر نہ بوت، من پہ وتی میتگ ءَ رھادگ بوت آں داں سالے ءَ پد ماسی گُلین ءَ لوگ ءَ واتر کُت داں کھول ءِ مَردماں ھمے گُشت ماسی ءَ کوڑھیں دگنیا سے ءُ چار ماہ پیسر یل کُتگ منی چمانی ارس یل بوت اَنت ءُ من پہ ارمانیں دلے پد ءَ وتی میتگ ءَ واتر بوت آں۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ بنجاھی شھر شال ءَ سَے شمبے ءِ روچ ءَ پریس کلب ءِ دیم ءَ بیگواھیں بلوچانی یل نہ کنگ ءِ ھلاپ ءَ زھرشانی کنگ بیتگ –

ھشت جون دوھزار ءُ نُھ ءَ مستونگ ءَ بیگواہ بیتگیں بی ایس او آزاد ءِ گوستگیں کسان کمک سرکماش ءُ بلوچ سیاسی رھشون زاکر مجید ءِ مات ءِ دزبندی ءَ زھرشانی کنگ بیتگ –

ھمے وھد ءَ زاکر مجید ءِ مات ءَ میان اُستمانی ادارھاں گوں دزبندی کرتگ ءُ گوشتگ کہ آ منی بیگواھیں بچ ءَ ھوار دراھیں بیگواھیں مردمانی یلہ کنائینگ ءِ ھاتر ءَ وتی کرد ءَ پیلو بہ کنت –

زاکر مجید ءَ دوازدہ سال آئی ءِ بیگواھی ءَ گوزگ ءِ ھلاپ ءَ زھرشانی بیگ ےُ زھرشانی ءَ دگہ بیگواھیں مردمانی کھول، کبیر بلوچ، ھسان کمبرانی، ھزب اللہ کمبرانی، گلام فاروق، زپر اللہ بنگلزئی ءِ کھولاں ءُ بلوچ نودربر گلاں ھوار وائس فار بلوچ مسنگ پرسنز ءظ وائس چیئرمین ماما قدیر بلوچ، بلوچ نودربر رھشون ڈاکٹر مھرنگ بلوچ، ھالدہ کازی ءُ جتا جتائیں تکاں بندوکیں مردماں بازیں کَچے ءَ بھر زرتگ –

زھرشانی ءَ ھواریں زالبول ءَ چُکاں بیگواھیں مردمانی اکس ءَ پلے کارڈز چِست کرتگ ءُ بیگواھیں مردمانی یل کنگ ءِ اوگام جتگ –

ھمے وھد ءَ زاکر مجید ءِ مات ءَ گوشت: منی بچ ءَ ھوار زاھد کرد ءَ دگی بیگواھیں ورناہ یلہ کنگ بہ بنت -آئی ءَ گوشت کہ ما سالاں درد ءُ رنج سگگ ءَ اِنت –

آئی ءَ گوشت ما وتی دوستیگیں مردمانی یلہ کنائینگ ءِ واستا ھمک در ٹک اِتگ اَنت بلے کسے ءَ مئے گپ دلگوش نہ کرتگ اَنت –

زھرشانی ءَ ھواریں مردماں تران کنان ءَ گوشت: بلوچستان ءَ پاکستان ءِ کانودانی مسام ھپتاس ءُ سَے ءُ انسانی ھکانی مسام سرگوز کنگ نہ بیت اِنت – پاکستان ءِ دگہ دمگاں سیکورٹی پورسز مسام بندانی بگیری ءَ شھریاں وتی شھری سرپد بیت اِنت ءُ آیاں لَٹ ءُ کُٹ نہ کنت بلے بلوچستان ءَ لَٹ ءُ کُٹ، زورانسری زانگول کرتگیں جون دزکپگ ءَ اَنت –

آیاں گوشت کہ بلوچستان گوستگیں بازیں سالاں زھرشانک تہ ءَ گوزگ اِنت ما اے ریاست ءَ روڈ، بجلی، ھسپتال نہ لوٹگ ءَ اِنت وتی جگرانی ٹکرانی یلہ کنگ ءِ لوٹ ءَ کنگ ءَ ایں –

زھرشانی کنوکاں گوشت کہ بلوچستان ءَ بیگواھی ءِ جیڑہ انسانیت ءِ مستریں جرمانی یک دروشمے ءِ ندارگ اِنت –

آیاں گوشت مک اے مات، گوھارانی تچک ءُ راستگیں لوٹ ئِے کہ بازیں سالاں بیگواک بیتگیں مھرانی چیراگانی دیم ءَ آرگ ءِ لوٹ ءَ کنگ ءَ اَنت اگاں آ ریاست ءِ ملزم اَنت گڑا آمیدگساں پیش کنگ بہ بنت –

چاگردی رسانکجاہ ٹوئٹر ءَ #Save ZakirMajeedBaloch ءِ ھیش ٹیگ ءِ سر ءَ جتا جتائیں تکاں بندوکیں مردماں درشانی کرتگ ءُ زاکر مجید ءَ ھوار دراھیں مردمانی یلہ کنگ ءِ لوٹ کرتگ اَنت –

دومی نیمگ ءَ شال ءِ پریس کلب ءِ دیم ءَ وائس فار بلوچ مسنگ پرسنز ءِ نیمگ ءَ زھرشانی ءَ چار ھزار ءُ دو سد ءُ ھشتاد ءُ دو روچ سرجم بیتگ –

بلوچستان ءِ جتا جتائیں دمگاں بیگواھیں مردمانی کھول بنجل ءَ اتکگ ءُ وتی زھرشانی اش نبشتگ کنائینتگ اِت –

ھمے وھد ءَ بلوچ اسٹوڈنٹس آرگنائزیشن ءِ انفارمیشن سیکرٹری بالاچ کادر، شکور بلوچ ءَ ھوار این ڈی پی ءَ پدردی درشانی ءَ بنجل ءَ اتکگ اَنت –

ٹی بی پی پتر ھال ءَ سر بیتگیں ھالانی رد ءَ بلوچستان ءِ باپاری شھر ھب ءَ لھتے روچ پیش تیرگواری ءَ ورنایے بیران بیتگ اَت –

وئیل ھب قابوس ھوٹل ءِ نزیک ءَ پیش اتکگ، پولیس ءِ رد ءَ دُزانی دُزی ءِ وھد ءَ پیش اتکگ کہ ڈنگی ءِ وھد ءَ جنگ ءُ چوپ بیتگ چریشی ءَ دُزاں تیرگواری کرتگ ءُ ورناہ کُشتگ –

دمگ ءِ انتزامیہ ءِ گوشگ اِنت کی دُزانی یک ٹولی ءِ کہ شھر ءَ ڈنگی کنگ ءَ اِنت چریشی ءَ پیسر بنجاھی شھدگ ءِ سر ءَ دکانے ءَ ڈُنگی ءِ وھد ءَ جنگ ءُ چوپ ءَ منظور چھٹہ نامین دکان دارے دُزاں تیرگواری کرتگ ءُ کُشتگ –

ھمے رنگ ءَ ورنا ءِ کوش ءِ ھلاپ ءَ مروچی ھب ءِ شھر ءَ دراھیں سیاسی ءُ نیکراھی پاٹیانی نیمگ ءَ یک زھرشانی روانک ءِ کشگ بیتگ بنجاھی شھدگاں تران بیتگ ءُ لسبیلہ ءِ پریس کلب ءَ سر بیتگ –

زھرشانی کنوکانی گوشگ اَت کہ شکیل گجر بلوچ ءِ کشندہ دزگیر کنگ ءُ سرکار ءَ دمگ ءِ انتزامیہ ءَ بیھار دے اگاں یک ھپتگے ءَ انتزامیہ کشندھانی دزگیر کنگ ءَ بے سوب بیت ءُ ھب ءِ دراھیں پاٹی ھمگرنچیں زھرشانی نندانک ءُ ھرتال ءِ جارانک ءَ پرین اِیت –

روانک ءَ بلوچ یکجھتی کمیٹی کراچی ءِ ڈپٹی آرگنائزر عبدالوھاب بلوچ، کے بی بلوچ، زاھد بگٹی ءُ نیشنل پاٹی ءِ گنی بلوچ ھوار بیتگ اَنت –

زھرشانی کنوکاں انتزامیہ ءِ گون ءَ لوٹ کرتگ کہ شھر ءَ دراھیں ڈنکی گیش بیان اَنت شھریانی پھریزگی بہ بیت ءُ اے وئیلاں دزمانجنیں ٹولیانی ھلاپ ءَ ترندیں کاروائی کنگ بہ بیت –

نبشتانک: من گیابان ءُ سنگت

نبشتہ کار: میرزُک بلوچ

دی بلوچستان پوسٹ

بیل ءُ ھمبلانی دیوان من ءَ ھمک ساھت گیر کاینت ھمک ساھت ءَ ھما دیواناں زراں کہ منی چابڑی ءَ گوں من دُچار کپتگ اَنت برے برے سما کن آں منی اُمر ءَ سک باز گوستگ من نِی ورنا ءُ جوان بیتگ اَنت بلے وھدیکہ پد ءَ وتی گوست ءِ ترانگاں کپ آں گوشگ ئیگ ءَ من نوکی نوک بروت ءأ چابڑاں –

اے ھما زمانگ اَت کہ منی بروت نوکی شنزگ ءَ اِت اَنت من ءَ اوپار نہ بوت کہ من لوگ ءَ وش واب بہ بہ آں پرچا کہ من بلوچے آں ءُ بلوچ گلام انت من همک شپ وتی میتگ ءِ دیم ءِ جنگل ءَ شت آں ءُ نِشت آں جیڑ ات وتی راج ءِ ءُ سرمچارانی بابت ءَ گڑا یک روچے من پیسلا کت کہ من گوں سنگتاں همراه بہ بہ آں ءُ هماھانی پئیم ءَ بے واب بہ بہ آں گڑا من در کپت آں منی کھول ءِ مردماں من ءَ گشت تئی انگت اُمر نہ انت کہ تو گوں سنگتاں ھمراہ بہ بئے گڑا من گشت اے راہ ءَ من ءَ اُمر ءِ گَم نہ اِنت من وتی پُچّ زرت اَنت ءُ دیم پہ سنگتانی نیمگ ءَ –

من کہ سر بوت آں دراھیں سنگتاں من ءَ بگل ءَ کت ءُ پد ءَ گشت اڑے اے وَ انگت پَٹکُکے من کند اِت ءُ گشت پَٹکُک چے ءَ گش انت ؟ گُشت اِش اشتاپ مہ بو تو دُرساں زان ئے گڑا من دو ماہ رند زانت سنگت پَٹکُک ھمائی ءَ گش اَننت کہ نوک بروت ئِے بہ شَنز اَنت اَنوں بلئے من پَٹکُکے نہ آں انوں من ءَ سَے سال انت کہ من گوں سنگتاں هواراں –

اگاں منی ھمے کسانیں زندگی ءِ تہ ءَ وش تریں سھت ءُ دمانے گوستگ یا گْوزگ ءَ انت گڑا ھمیش انت کہ من گوں سر ڈگار ءِ بچاں همراھاں منی سنگت من ءَ سک دوست انت آ پہ من باز مھروان اَنت من ھدا ءِ شگر ءَ گِراں کہ من ءَ چُشیں شوکیں سنگتے داتگ ءُ منءَ منی گلزمین بلوچستان ءَ پیداکے کتگے منی مات منی گلزمین انت اے گلزمین ءِ ھمک بچ منی ارواه انت پد ءَ سنگتانی اڈ کتگیں سیاہ چاہ زاناں چتور وش اَنت ھما چاہ کہ گِس ءَ منی گْوھار ءَ جوڑ کتگ اَنت سنگتانی چاہ من ءَ ھما وڑ ءَ وش بنت من ءُ اُمروؔ ھمک بیگاہ ءَ رواں شیپ ءِ لمب ءَ دیوان کن ایں بلئے ایشی دپے نہ انت ماشااللہ گپ ءَ وار نہ دنت من ءُ زنڈ سر گپ گپ ءِ تہ ءَ جنگ کن ایں یکے دومی ءَ همے ریکانی تہ ءَ بُڈّ دئیں ما ھردو داں مگرب ءَ چو جاتو ءَ باں بلئے مارا سک وش بیت ھمے شُگل ما دوئیں شیتان اِنت آ همک سهب ءَ من اُمَروؔ ءَ آپ پِرّیچاں تچاں کور ءِ تہ ءَ وت ءَ چیر دے آں دانکہ سارت نہ بیت من وت ءَ پیش نہ داراں وھدے کہ سارت بیت دو پیالہ چاہ زوریت کیت ما یکجاہ نندیں چاہ وریں من ءَ سک دوست انت منی اُمروؔ جان مئے جان شودگی آپ ءِ سر ءَ یک مزنیں ڈوکے هست همے ڈوک ءِ سر ءَ ما سنگتاں وتی دستانی اکس کشّ اتگ اَنت ءُ هر کس ءَ وتی نام هم نبشتہ کتگ ۔ گرماگ ءَ آپ ءِ سر ءَ گوبز سک باز بیت من ءُ اُمرؔو مچّانی لَمپَشاں زوریں گْوبزاں جن ایں گوبز مئے رند ءَ کپ اَنت برے برے ور انت ھم ابّو کہ چتور درد بیت زاناں بلئے ما ھما شیتان دومی روچ ءَ پد ءَ بندات کن ایں۔ یک شپے ءَ سک هور بوت ءُ سک سارت ات گڑا کُڈّ ءِ تہ ءَ آس روک کت ءُ دیوانے بِنا کت همے سھت ءَ تولگاں باز ھُولّ اِت من ءَ پد ءَ دَلوَت ءُ ساھدارءِ باز دوستی ھست من کُڈّ یل کت ءُ تولگانی نزیکّ ءَ شت آں بلئے تولگ تتک اَنت دیم پہ گیابان ءَ شت اَنت من تولگانی رَند ءَ اُمروؔ منی رَند ءَ ما بَزگیں تولگ بے زار کت اَنت سک سارت اَت گڑا ما واتَر بوت ایں دیم پہ کُڈّانی نیمگ ءَ ما اتکیں سر بوت ایں پد ءَ آس ءِ سر ءَ نشت ایں من ءَ باز وش بیت گوں سنگتاں۔

اَے هدا ! منی سنگتانی کُمک بُو انوں لهتے وھد بیت من چہ اُمروؔ ءَ دُوراں من ءَ هچ وش نہ بیت، منی چم کور انت پہ وتی سنگتانی دیدار ءَ اَبیتک اَبیتکیں دنیا منی چماں بلئے اُمرو ءِ داتگیں چادر انگت من ءَ گون انت من وتی دراج تریں پچ امروؔ ءَ داتگ اَنت ھمے چادر ءِ بدل ءَ، بَزّگ ءِ گْورا سک دراج انت بلئے لج نہ کنت گْور ءَ انت ئِے منی سنگتانی ھمک بچکندگ منی زند ءِ شوک تریں ءُ وش تریں ساھت گیر کاینت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔