TBP Balochi

سر بیتگیں ھالانی رد ءَ پنجگور ءَ جامع مسیت ءِ دیم ءَ گراؤنڈ ءَ کم نھاداں وردنی سامان ایر کنگ بیتگ اَنت –

سامانانی نھاد ڈپٹی کمشنر عبدالرزاق ساسولی ءَ رمزان ماہ ءَ کم نھادی ءِ دکانانی بندات کرتگ اَنت کہ دانکہ نیزگاریں مھلوک زرت بہ کن اَنت ءُ وتی روچاں تیلانک دات بہ کن اَنت –

ھمے وھد ءَ اسسٹنٹ کمشنر پنجگور امجد ھسین سومرو اسسٹنٹ کمشنر گوارگو برکت الہ بلوچ جاڑیگ بیتگ اَنت –

ڈپٹی کمشنر ءَ گوشت کہ پنجگور ءَ اے بازار ءَ کم نھادی ءِ مول ءُ مراد رمزان ءِ اھترام اِنت ءُ یکے دومی ءِ درداں سرپد بیگ ءُ رنجانی کم کنگ اِنت –

آئی ءَ گوشت کہ زمران ءِ ماہ ءَ تاجرانی مزنیں کردے بیت آ سامانانی نھاداں کم بہ کن اَنت ءُ دانکہ مھلوک شریں رنگے ءَ سامان زرت بہ کن اَنت –

آئی ءَ گوشت کہ اد ءَ مھلوک ءَ بازار ءِ نھاد ءَ کمتر سامان دز کپ اَنت کہ مھلوک کمیں نھاداں وتی اژدری ساماناں زرت کن اَنت –

آئی ءَ گوشت کہ بازار ءَ پرائس کنٹرول کمیٹی ھروھد ءَ تر ءُ گرد کنت ءُ دکاندارانی نھادانی پَٹ ءُ پول کنگ ءَ وتی وھد ءَ دے اَنت –

زانگ بہ بیت بلوچستان ءِ بازیں جاھاں زمران ءِ ماہ ءَ کم نھاد جاہ چاگردی رسانکجاھاں آیانی گندگ ءَ کاینت –

بارڈر ٹریڈیونین ءِ رھشوناں تربت پریس کلب ءَ سیمسر ءِ بندش ءِ ھلاپ ءَ پریس کانفرنس کنان ءَ گوشتگ کہ بازیں روچاں سرکار ءِ نیمگ ءَ سیمسر بند کنگ بیتگ ءُ اود ءَ بازیں کچے ءَ مردم گَٹ اَنت ءُ زوالی ءِ نیمگ ءَ روان اَنت –

بارڈر ٹریڈ یونین ءِ گوشگ اَت کہ اے سیمسر ءَ بند کنگ ءُ اود ءَ مردماں تن ءُ شد ءَ زلیل کنگ انسانی لڑ ءَ بژنیگے ءِ کہ اے سیمسر ءَ مروچی چُنت روچ اِنت ءُ تنی وھدی “چار مردم تن ءُ شد ءَ بیران بیتگ اَنت ” آیاں گوشت کہ نِی گیش دگہ لاش کَل کُت نہ کن ایں سرکار ءُ مزنیں واکداراں گوں دزبندی اِنت آ سیمسر ءَ پچ بہ کنت ءُ مھلوک ءَ ھلالیں روزگار ءِ کَٹگ ءِ موہ ءَ بہ دنت –

آیاں گوشت کہ اے سیمسر تھنا کیچ ءِ مردمانی ناں بلوچستان ءِ کُنڈ کُنڈانی مھلوک ءِ واستا یک درے کہ چرے در ءَ مھلوک وتی گزران ءَ کنگ ءَ اِنت –

آیاں گوشت کہ چرے در ءَ مردمانی آس روک بند ءُ اگاں اے در بند کنگ بیت گڑا بلوچستان ءِ جاورھال سومالیہ ءِ رنگ ءَ پیش کن اَنت کہ اد ءَ مردم ھنچش شد ءَ لاچاری ءُ نیزگاری بنت –

آیاں گوں اھوالکاراں گپ کنان ءَ گوشت: کیچ ءِ ڈی سی ءَ داں بیست ءُ سَے اپریل ءَ زبان کرتگ کہ سیمسر ءِ جیڑہ گیشنگ بیت اِنت ءُ مھلوک ءِ زورگار پَچ کنگ بیت اِنت –

آیاں گوشت کہ اگاں بیست ءُ سَے اپریل ءَ ڈی سی ءَ وتی زبان سرجم نہ کرت گڑا بارڈر ٹریڈ یونین دوبر ڈی بلوچ ءَ دگ ءَ بند کنت ءُ نند اِت ڈاں ھما وھد کہ سیمسر ءِ جیڑہ نہ گیش اِت –

نبشتانک: پاکستان دْروگے

نبشتہ کار: آئیشہ بلوچ

دی بلوچستان پوسٹ

اگاں تو دنیا ءِ دپتر ءَ وان ئے گُڑا سرپد بَہ ئے کہ دنیا ءِ ھر راج ءَ راجی بامرد ءُ نمیران بنت اگاں ما دنیا ءِ دیمروئی کُتگیں راج ءُ آیانی ڈیھاں بچار ایں گُڑا ما زان ایں کہ ھمے ڈیھ ءِ واھُند سرجمیں راج اَنت ءُ پیسر ءَ گلام اِت اَنت یا ابرمی آپت ءُ اندوھاں دُچار کپت اَنت گُڑا آیاں وتی راجی آجوئی ءِ ھاتر ءَ بے کساس کربانی داتگ ءُ وتی راجی ءِ بزگی مار اِت پمیشکا آیاں وتی راج ءُ سرڈگار دوست اِنت ءُ مُدام راج ءِ دیمروئی ءِ واست ءَ جُھد کن اَنت لھتے درور انچوشکہ جاپان جھان ءِ دومی مستریں جنگ ءِ وھد ءَ ایٹم بمب ءِ برانز ءَ سُتک ءُ پد ءَ بازیں وھد ءَ زمین چنڈی بیرانیاں ھم آماچ بوت۔ چین ءَ بچار جاپان ءِ گلام بیتگ وھدے کہ بےکساس جُھد ءُ کربانیانی رند ءَ آجو بوت گُڑا آیانی تہ ءَ راجدوستی ودی بوت ءُ پد ءَ وتی راج ءِ دیمروئی ءِ واست ءَ تچ تاگ اش کُت پرانس، برتانیہ اٹلی بزاں سرجمیں یورپی راج جھانی جنگاں پد جنگی بیرانی ءُ گلامی ءِ مارشت ودی بیان ءَ راجدوستی یے آیانی تہ ءَ ودی بوت۔ ما بنگلہ دیش ءَ بہ گِند ایں کہ ھمے راج ءَ ھم پہ وتی راجی آجوئی ءَ دژمن ءِ ھر وڑیں لگتمالی، چُکچینی، زالبولانی بے شرپی، کُشت ءُ کوش، گِسانی ماندارگ ءُ آزاری سگان ءَ وتی راجی آجوئی ءِ جُنز دیم ءَ بُرتگ ءُ راج اش آجو کُتگ۔

اگاں تو جھانگیر برتانیہ ءِ ھلاپ ءَ ھندوستان ءِ راجی آجوئی ءِ جُنز ءَ چمشانکے دئے گُڑا ترا بے کساس راجی بامرد ءِ نام گِندگ ءَ کیت انچوشکہ مَوّیران الاگومتوکُن، دھیران چِناملے، اھمداُلہ، منگل پانڈے، مھمد ھسن دیوّبندی، اِنایت الہ مشرکی، چندرہ شنکر آزات، بھاگوتی چرن، شباش چندرہ بوس، سردار ولو بائی پٹیل، نیرو، گاندی، بتو کشور دت، یوجندر شُکلا، ونیاک سروارکر ءُ مُلانا ابولکلام آزات ءِ وڑیں دگہ ھزاریں راجی بامرد اَنت کہ آیاں پہ راجی آجوئی ءَ زورگریں برتانیہ ءِ زِندان ءُ سیلولر جیل ءِ وڑیں آزارجاہ سگ اِت اَنت۔
ھمے داب ءَ ھندوستان ءِ راجی آجوئی جُنز ءِ دپتر ءَ شیرزالانی نام ءُ داستان ھم ترا وانگ ءَ رس اَنت انچوشکہ بانُک لکشمی سھیگل، آرونا سیپ اَلی، میڈم بھکاجی کاما، میڈم ھزرت ماھل، کاملا نھرو، کسترو گاندی، رانی لکشمی بَھی، اوشنا مھتا ءُ اینی بسنت ءِ وڑیں شیرزال کہ آیاں پہ وتی راجی آجوئی ءَ جُھد کُت۔ وتی لس مھلوک ءَ گلامی ءِ مارشت ءُ راجی ءِ آجوئی بستار ءُ ارزِشت ءِ سرپدی دیان ءَ راج ءِ تہ ءَ آشوب اش ودی کُت۔ ھندوستان 30 جون ءِ روچ ءَ وتی راجی جُنز ءِ نمیران ءُ بامردانی یات ءَ شاتکامی کنت۔

وھدیکہ انگریز ءَ زانت کہ نی ھندوستان ءِ راج یکمُشت اِنت، چہ من ءَ آجوئی لوٹگ ءَ اِنت ءُ ایشانی راجی آجوئی ءِ جُنز سوبمند بوُان اِنت گُڑا ڈیوائیڈ اینڈ رول ءِ بُنیات ءَ انگریز سرکار ءَ مُلا سیئت اھمد ھان، مھمد اَلی جناہ، الامہ اکبال ءُ لیاک اَلی وڑیں کاسگ چٹّ ودی کت ءُ پاکستان ءِ وڑی بے ابرمی اِستانے اڈ کُت نی شُما بچار اِت کہ زاناں چہ اِے مُلا سیئت اھمد ھان، مھمد اَلی جناہ، الامہ اکبال، لیاک اَلی ھان ءُ کسے انگریزانی زِندان ءُ آزارجاہ بیتگ؟ ءُ زاناں پاکستان ءِ لوٹوکے انگریزاں پاھو داتگ؟-

اِنُا ءُ ناں کہ ایشانی سْیاد ءُ وارسے انگریز ءَ کُشت ءُ نَیکہ چہ ایشاں کسے ءَ نِکوبار آئیلینڈ اینڈ پورٹ آپ بلیر بدنامیں “سیلولر جیل” ءَ زِندے گْوازینتگ۔ البت دگہ ھزارانی کَچ ءَ ھندوستان ءِ راجی آجوئی ءِ جُھدکار انگریزانی زِندان ءُ آزارجاہ ءَ لٹ شاپی ءُ آزاری ءِ دیمپان بوت اَنت۔ بزاں انگریز ءَ پاکستان مُپت ءَ اڈ کُت پمیشکا آزات ھندوستان ءِ رھشون ءُ کانگریس ءِ کارمستر مُلانا ابولکام آزات ءَ 1946 ءَ گْوشت کہ اے پاکستان پہ ھُشکنات ھِند ءِ مُسلماناں یک بیرانی یے چریشی ءَ مسلمان بھر ءُ بانگ بنت، پاکستان ھم پد ءَ پْروش ایت ءُ بنگلہ دیش جُتائیں مُلکے جوڑ بیت۔ پاکستان پْروشت ءُ پْروش ءَ رند یک استانے نہ بیت بلکیں پاکستان ءِ جِند پہ کار ءُ باری مردماں یک دُکانے جوڑ بیت ءُ پاکستان ھچبر دیمروئی نہ کنت۔ پہ مُلانا ابوکلام ءِ پیشگْوشیانی گیشتر وانگ ءُ زانگ ءَ شُما چہ گوگل ءَ ھم شوھاز کُت کن اِت۔

نی ما گِند ایں کہ 1971 ءَ کاسگ چٹّیں مھمد اَلی جناہ ءُ لیاکت الی ھان ءِ دو راجی سسا ءِ پاکستان پْروشت ءُ مرچی پاکستان ءِ مھلوک بھٹو ءِ سِلکاریں پاکستان ءَ ناامُیتیں زِند گْوازینگ ءَ اَنت اود ءَ ناں مُزّ ءُ انساپے ھست ءُ ناں کہ وشھالی ءُ دیمروئی یے ھست نَیکہ چد ءُ پد دیمروئی یے کنت اے مُلک ءَ سندہ ءِ لھتے جاگیردار ءُ وڈیرہ۔ پنجاب ءِ چوھدری ءُ انڈسریلسٹ، پشتونانی ٹیکنوکریٹ ءُ بیروکریٹ۔

بلوچستان ءِ لھتے راجدروہ ءُ کوڑائیں میر ءُ سردار ءُ پوج پہ وتی سِلکاری ءَ جُنزینگ اِنت۔
مرچی پاکستان یک سد ءُ بیست بلین ڈالر ءِ وامدار اِنت، مُلک ءَ بے کساس بے روزگاری ءُ گرانبھائی اِنت ءُ اِے بے پوریاگِری ءُ، ڈنّی وام ءُ گرنبھائی تْرُندی ءَ ودان اِنت۔ اِے مُلک ءِ تہ ءُ چاریں نیمگاں بے کساس جنگی جیڑہ اَنت۔ پوج ءُ سیاستدان ئِے سرجمی ءَ سِلکار اِنت۔ پاکستان ءِ مھلوک، بِہ گر پاگواجہ تاں چپڑاسی ءَ، دْراہ دو لمبر اَنت۔
اے ملک ءِ مستریں ھتر ءُ تُرس راجمستری اِنت چی ءَ کہ اگاں مُلک ءَ راجمستری بیت گُڑا ماں گچینکاری ءَ مُدام پنجابی باج بر اَنت کہ آیانی سْیاسی سیٹ گیشتر اَنت چریشی ءَ سندھی راجدوست پائدگ زور اَنت ءُ سندھودیش ءِ آجوئی لوٹ اَنت پمیشکا چہ وتگڑیں گچینکاری ءَ پوج ءِ ترامگیج پی پی پی ءَ سوبمند کن اَنت کہ پی پی پی سندہ ءِ آجوئی لوٹوکیں راجدوستانی ھلاپ ءَ ھمیشانی مستریں سِلاہ اِنت انچوشکہ بلوچستان ءِ راجدوستیں گلانی ھلاپ ءَ دژمن راجدروھیں دمگی سردار ءُ میراں کارمرز کنت۔
دْروگیں کشمیر ءِ نام پاکستانی پوچ داں ھپتدہ سال ءَ بزگیں پاکستانی مھلوک ءَ پُلگ اَنت۔ مرچی بنگلہ دیش جی ڈی پی ءُ دیمروئی ءِ پھناتاں چہ پاکستان ءَ باز دیم ءَ شُتگ بلے پاکستان پُشت ءَ روان اِنت بے ھال مہ بَہ اِت من ھما بنگلہ دیش ءِ ھبر ءَ آں پیسر ءَ پاکستان گلام بیتگ۔

ماں اِے مُلک ءَ جمائیت الدوار ءُ ٹی ایل پی ءِ وڑیں بازیں وتگڑیں اسلامی نیکراھی گل پہ وتی سیاسی پائدگاں پوج ءَ اڈ کُتگ اَنت ءُ بازیں اِے وڑیں گل سِند ءُ بلوچستان ءَ راجدوستی ءِ ھلاپ ءَ کارمرز بوگ ءَ انت البت ھمے اسلامی سِلاہ بندیں گلاں پاکستان ایپ اے ٹی ایپ ءِ گرے لِسٹ ءَ سرکُتگ ءُ نی زیتیں روچاں بلیک لِسٹ ءَ ھم کیت اِنت۔

بلے پاکستان ءِ مھلوک انگت ءَ بے سُدّ اِنت چی ءَ کہ اِے مُلک یک راجے ءِ نہ انت اِے بے راجیں مُلک وَ لھتیں امیریں مردمانی اِنت، اِے مُلک پاپاجونز آنی اِنت۔
اگاں اِے مُلک ءَ پہ کربانی ءَ آجو بوتیں یا اِے مُلک ءَ راجی آجوئی ءِ مامردے بوتیں۔ یا مھمد الی جناہ انگریزاں پاھو بہ داتیں گُڑا بلکیں پاکستان ءَ دیمروئی بہ کُتیں ءُ پاکستان ءِ مھلوک ءَ بہ زانتیں کہ اے مُلک ءَ ما کربانی داتگ ءُ مرچی مئے مُلک ماں بدیں جاوران اِنت۔ چوناھا اِے مُلک ءَ پنجابی، سندھی، بلوچ ءُ پشتو ءِ وڑیں راج بندیگ اَنت ءُ اے دْراھیں چہ پاکستان ءَ وتی ڈیھ ءُ راج ءِ آزاتی لوٹ اَنت۔

شالا ھمے تیوگیں زیردستیں راجاں آجوئی بہ رسات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ٹی بی پی رسانکدری اھوالکار ءِ رد ءَ گوستگیں شپ ءَ چاگردی رسانکجاہ ٹوئٹر ءَ روکپت ءُ رودراتکی بلوچستان ءِ میان ءَ “کش اِتگیں لکیر ” سیمسر ءِ بندش ءِ ھلاپ ءَ کیمپئن کارمرد کنگ بیتگ –

کیمپئن بلوچ یکجھتی کمیٹی ءِ نیمگ ءَ بندات کنگ کہ چریشی ءَ بلوچ سیاسی ءُ چاگردی مردماں وتی وتی زھرشان ءِ درشان کرتگ اَنت –

چاگردی رسانکجاھاں کارمرد کنوکیں مھلوک ءِ گوشگ اِنت کہ سرکار ءَ سیمسر بند کرتگ ءُ چریشی ءَ ھزارانی کچ ءَ لاپ والینگی ءَ تیل باپاری ءَ بندوکیں مردم دوئیں نیمگاں گَٹ اَنت –

آیانی گوشگ اِنت بلوچستان ءِ مھلوک ءَ روزگار ءِ نہ دیگ ءِ سوب ءَ مردم پہ وتی گزران ءَ سیمسر ءِ باپاری ءَ کنگ ءَ اَنت کہ آیانی یکیں در ھمے سیمسر اِنت کہ اشی ءِ بند کنگ ءَ ھزارانی مھلوک شد ءُ گژن ءُ نیزگاری ءِ دیمپانی ءِ آماچ بیان اَنت –

مھلوک ءَ سرکار ءُ مزنیں واکداراں لوٹ کرتگ ءُ گوشتگ کہ زوت ءَ چہ زوت اے سیمسر ءَ پَچ بہ کنت ءُ اود ءَ دوئیں نیمگاں گَٹیں مھلوک ءَ آیگ ءَ بِل ایت –

آیانی گوشگ اِنت کہ سیمسر ءَ گَٹ تیل باپاری کنوکیں گاڑیانی ڈرائیور تُن ءُ شد ءِ دیمپان اَنت کہ تنی وھدی سَے کَس بیران بیتگ اَنت –

آیانی گوشگ اِنت کہ سیمسر بند، دگہ روزگار نیست بلوچ کُجا بہ رو اَنت کجام روزگار ءَ بہ کن اَنت کہ آیانی گزران بیت بہ کنت –

زانگ بہ بیت گوستگیں روچاں سیمسر ءِ بندش ءِ ھلاپ ءَ پنجگور ءُ تربت ءَ زھرشانی کنگ بیتگ ءُ تربت ءَ سی پیک دگ ھم یک روچے ءَ بند کنگ بیتگ –

چریشی ءَ پد دمگدارانی سدکی ءَ زھرشانی کنوکیں مردماں دگ پچ کرتگ ءُ سیمسر ءِ پچ کنگ ءِ لوٹ کرتگ –

سیمسر ءَ ھواریں تیل باپاری ءَ ھردوکیں نیمگانی مردمانی آسراتی تھنا یکیں سیمسر اِنت کہ اشی ءِ بند بیگ ءَ ھزارانی مھلوک ءِ روزگار ءِ دیم ءَ ٹنگر جنگ اِنت –

مھلوک ءِ زھرشانی ءُ لوٹانی کنگ ءَ ابید ھم سرکار ءِ نیمگ ءَ سیمسر ءِ پچ کنگ ءُ گَٹیں گاڑیانی ڈرائیورانی یلہ کنگ ءِ گامگیج گندگ ءَ آیگ ءَ نہ اَنت –

وئیل مستونگ، ھزدار، نوشکی ءَ دیم ءَ اتکگ اَنت کہ اود ءَ تیرگواری ءُ دگ ءِ وئیلاں سَے مردم بیران بیتگ اَنت –

سر بیتگیں ھالانی رد ءَ مستونگ ءَ بس اڈے نزیک ءَ ناشناسیں سلاہ بندیں مردمانی تیرگواری ءَ یک مردمے بیران بیتگ کہ آئی ءِ پجار مھمد عاصم ء مصطفیٰ علیزئی ءِ نام ءَ زانگ بیتگ –

جون چِست کنگ بیتگ ءُ غوث بکش نادراہ جاہ ءَ برگ بیتگ بلے وئیل ءِ بارہ ءَ سرپدی نہ بیتگ –

ھمے رنگ ءَ مستونگ ءَ دگ ءِ وئیلے ءَ یک مردمے بیران بیتگ کہ آ پنجگور ءِ جھمنند گوشگ بیتگ –

وئیل کھڈ کوچہ ءَ دیم ءَ اتکگ کہ اود ءَ مساپر بریں وین ءُ ٹوڈی گاڑی ءِ میان ءَ وئیل دیم ءَ اتکگ کہ وئیل ءَ بیران بیتگیں مردم ءِ پجار خلیل احمد ء محمد یعقوب جھمنند پنجگور ءِ نام ءَ زانگ بیتگ کہ پولیس ءِ اے ایس آئی ءِ نوکر اِنت –

ھمے وڑ ءَ تفتان ءَ دگ ءِ وئیلے ءَ سَے مردم زدگ بیتگ اَنت –

وئیل آر سی ڈی شھدگ ءَ پیش اتکگ کہ اود ءَ پک اپ گاڑی ءُ پرپٹے ءِ میان ءَ ٹکروری بیتگ کہ چریشی ءَ سَے مردم زدگ بیتگ اَنت –

زدگ بیتگیں مردمانی پجار عبدالباسط،عبدالوحید، محمد ءِ ناماں زانگ بیتگ اَنت ءُ تفتان ءِ لیویز ءَ گاڑی ءِ ڈرائیور دزگیر کرتگ –

ھمے رنگ ءَ ھزدار ءَ دراکھالہ عبدالرؤف اسٹاپ ےَ یک پک اپ گاڑی ءِ میان ءَ دگ ءِ وئیل بیتگ کہ چریشی ءَ یک مردمے بیران ءُ سَے زدگ بیتگ اَنت –

جون ءُ زدگ بیتگیں مردم ریسکیو ءِ کارمنداں نادراہ جاہ ءَ سر کرتگ اَنت –

ھمے وڑ ءَ نوشکی ءِ دمگ ٹاڑیز ءَ زمباد گاڑی ءِ ٹکر ءَ یک کسان سالیں زھگے عید محمد ءِ غلام شاہ جھمنند تاڑیز زدگ بیتگ ءُ آئی ءِ پادانی پُرشگ ءَ نوشکی ءِ نادراہ جاہ ءَ سر کنگ بیتگ –

ھمے وڑ شال ءَ سریاب دگ ءَ کیچی بیگ ءَ ناشناسیں مردمانی تیرگواری ءَ مظفر اھمد نامیں مردمے زدگ بیتگ –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ شش روچ سرجم بوتگ – مستونگ ءَ چہ راجدار ءُ چاگردی باسک محمد رمضان بلوچ، درمحمد بلوچ، ءُ دگہ پگرے منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ وی بی ایم پی ءَ مدامی میان استمان ءَ را بلوچستان ءِ تہ ءَ انسانی ھکانی لگتمالیانی نیمگ ءَ دلگوش کنائینگ ءِ جُھد کُتگ – کہ جنگی جُرم ءُ انسانی ھکانی بگیر دارگ ءَ ریاست ءِ بگیری ءَ میان استمانی کانودانی رِد ءَ کاروائی بہ کنت ءُ بلوچ راج ءَ ریاستی زلم ءُ زوراکیاں چہ بہ رکین ایت –

آئی ءِ گوشگ ات کہ ما وتی گل ءِ پتر ءَ چہ اے امیت ءِ درشانی کن ایں کہ میان اُستمان ءِ سیکرٹری جنرل بلوچستان ءِ تہ ءَ انسانی ھکانی لگتمالی بلوچ راجداریں باسکانی زورانسری آوار جنی ءُ آھانی تیر سپتگیں جونانی دور دئیگے گر ءُ دار ھاتر ءَ ناکہ تھنا پاکستان ءِ سر ءَ زور بہ دنت بلکیں بلوچ راج ءَ اے زلم ءُ زوراکیاں چہ رکینگ ءِ ھاتر ءَ جوانیں گامگیج بہ زور ایت –

ماما قدیر قدیر بلوچ ءِ گوشگ ات کہ مروچی پُر ایمنیں جھد کمزور ءُ بے وارس پھمگ مہ بیت کہ لھتے گیر زمہ واریں مردم گیر سنجیدھیں مردمانی گیر زمہ واریں امل ءَ چہ درگان درگان کن انت – اگاں بلوچ ءِ ھمراھاں چہ کسے اے وڑیں جھدے بہ کنت شھیدانی رِتکیں ھوناں وتی مول ءُ مرادانی ھاتر ءَ کارمرز بہ کن انت کہ ما پڑ ءَ جنگ داریں –

دومی نیمگ ءَ یک جولائی ءَ دوھزار دہ ءَ میان غنڈی ءَ لکپاس ءِ نزیک ءَ پاکستان ءِ چیریں ادارھانی دست ءَ زورانسری آوار جنگ ءُ بیگواہ بوتگیں شمس الدین ءِ کھول ءِ نیمگ ءَ ھژدہ اپریل ءَ ٹویٹر کمپئین ءِ چلائینگ بوگ ءَ انت –

اے درگت چاگردی ترمجاہ پیس بُک خالدہ قاضی سی سیکینڈ ءِ یک کسانیں تامرے شنگ کرتگ ءُ گوشتگ کہ منی ناکو شمس الدین بلوچ یک جولائی دوھزار ءُ دہ پاکستانی چیریں ادارھاں میان غنڈی لکپاس ءِ نزیک ءَ زورانسری آوار جتگ بیگواہ کتگ کہ نوں یازدہ سال سرجم بوتگ کہ انگت بیگواہ انت –

آئی ءَ وتی تامرے تہ ءَ دیمتر ءَ گوشتگ کہ شمس الدین ءِ ھاتر ءَ آئی ءِ کھول ءِ نیمگ ءَ ھمے یکشمبے ءَ ھژدہ اپریل شپ ءِ شش ءَ تاں دوازدہ بج ءَ ھیش ٹیگ #saveshamsbaloch بنام ءَ ٹویٹر کمپئین چلائینگ بیت آئی ءَ چہ چاگردی ترامجاہ کارمرز کنوکاں لوٹ کتگ کہ کمپئین ءَ بھر بہ زور انت –

ٹی بی پی پتر ھال ءَ سر بیتگیں ھالانی رد ءَ کیچ ءِ دمگ دشت کشاپ ءَ گوستگیں روچ ءَ پاکستانی پوج ءَ یک وانگجاھے ءِ دستیگ کرتگ ءُ وتی بنجل جوڑ کرتگ –

دمگی مردمانی رد ءَ گوستگیں روچ ءَ پاکستانی پوج ءَ دمگ ءَ جنکانی وانگجاہ دستیگ کرتگ ءُ نشتگ ءُ وتی بنجل جوڑ کرتگ –

دمگانی مردمانی رد ءَ دمگ ءِ مردم دیم پہ پوجی کمان ءِ نیمگ ءَ شتگ اَنت کہ مئے جنکانی وانگ جاہ ءَ دستیگ مہ کن اد ءَ مئے جنکیں زھگ وانگ ءَ اَنت ءُ تو اد ءَ نندے مئے چون ونت کن اَنت –

دمگی مردمانی رد ءَ پوج ءِ گور ءَ روگ ءَ پد پوجی کارمنداں میتگیِں سروک ءَ پسو داتگ ءُ گوشتگ کہ ما چرے جاہ ءَ پاد اتک نہ کن ایں کہ ما ٹاور ءِ نگھپانی ءَ اتکگ اِنت –

میتگیں مردماں مزن واکداراں گوں دزبندی کرتگ ءُ پاکستانی فرنٹرکور ایف سی ءِ کلینگ ءَ گامگیج بہ زور اَنت ءُ دانکہ مئے جنکیں زھگ ونت بہ کن اَنت –

دشت کیچ ءُ گوادر ءَ ھوارین دمگے کہ اشی ءِ گیشتریں آبادی پوجی زوراکیانی سوب ءَ گوادر، تربت، روکپتی بلوچستان ءُ ھب ءُ کراچی ءَ ھوار بلوچستان ءِ جتا جتائیں جاھاں شتگ اَنت –

زانگ بہ بیت بلوچستان ءِ بازیں وانگجاہ پوجی بنجلانی تہ ءَ مَٹ کنگ بیتگ اَنت ءُ اود ءَ زھگانی زندگی تھاری ءِ شِلاں کپتگ اَنت ءُ دمگ ءُ میتگاں ھزگاریں مردماں لَڈ ءُ بار کرتگ ءُ بلے اود ءَ نیزگاریں مردم دراتک نہ بیتگ ءُ آ انگت ءَ اے زوراکیانی دیمپانی ءَ کنگ ءَ اَنت –

بلوچستان ءَ سیاسی ءُ نودربرگلانی گوشگ اِنت بلوچستان ءَ وانگی درچ ءَ یکدم پُشت چگل دیگ بیتگ ءُ ھنچیں جاھاں وانگ ھست اود ءَ یک استادے ھم نگواہ ایت –

نبشتانک: بے سَریں واب

نبشتہ کار :معراج لعل

دی بلوچستان پوسٹ

زندگی یک وابے ءُ ھمے واب ءِ تہ ءَ ھاگہ بوگ ءُ واب گندگ یک مزنیں ارزشت ئِے دار ایت۔ پرچہ کہ ھمے آگہی ءِ واب ءِ سوب ءَ تو واب کپت نہ کن ئے اگاں تو واب کپت ئے گُڑا بزان الم تو پشت کپتگ ئے۔ چیا کہ زندگی ءُ وھد دو اَنچیں کّزب ءُ بے ریائیں چیز اَنت کہ پہ ھچ کس ءَ نہ اُوشت اَنت ءُ مھتل نہ بنت۔

آیاناں ھداوند ءَ ایوک ءَ بید ء تچگ ءَ دگہ ھچ سوج نہ داتگ آیانی کار ءُ کسب بس آیگ ءُ سر گوز کنگ ءُ روگ اِنت گُڈی چکاس ءِ گُڈی پیپر اَت ھر کس پہ جاھے ءَ کپتگ اَت ءُ رٹا جَنگ ءَ اَت لھتے چکاس جاہ ءِ دپ ءَ اُوشتاتگ اَت ءُ چکاس جاہ ءِ پچ بوگ ءِ ودار ءَ اَت ءُ چیزے منی پیمیں یک کُنڈے ءَ نشتگ اِت اَنت ءُ سگریٹ کَشگ ءَ اِت اَنت یک اجبیں چاگردے ودی بوتگ اَت اَنچو سماہ بوگ ءَ اَت کہ جَنت ءُ دُوزہ ءِ پیسلہ بوگ ءَ اِنت۔

بلےمن گوں وتی دائمی لگوشتگیں باتن ءَ رنگ جَنگ ءِ جُہد ءَ اِت آں ءُ جیڑگ ءَاتاں کہ چکاس ءَ پد راواں مہر گُل ءِ واستا وتی گواجار ءَ بَہ راں مہرگل چہ کسانی ءَ گوں من ہور ءُ تور بوتگ اَت ءُ پہ یکے دومی ءَ ماں ساہ بھر کُتگ اَت مہرگُل ءِ وتی واھشت اَت کہ تو تاکہ وانگ ءَ ھتم نہ کن ئے منی لوٹگ ءَ کس رھادگ مہ کن پرچہ کہ من نہ لوٹ آں منی کماش ءَ را یک بھانہ ءِ بہ رس ایت ءُ ترا پہ من مہ زُور اِیت ءُ تو شر زان ئے منی اولی ءُ آکری منزل تو ئِے ءُ من پہ تو سر بوگ ءَ ہرچ پیمیں پند بُرّ اِت کن آں۔

پُریں پنچ سال ءَ رند من وتی مزن شاہ دربر جاہ ءِ وانگ گُڈی ءَ آرت ءُ سر کُتگ اَت ءُ نوں دگہ ھچ ڈولیں بھانہ پہ مہر گُل ءِ پت ءَ پشت نہ کپتگ اَت کہ آ منی زُورگ ءَ انکار بہ کنت پرچہ کہ من یک وانندگیں بچکے اِتاں ءُ باندا پونشی شریں کار ءُ روزگارے ہم کُت کن آں چکاس ھتم بُوت اَنت دُرائیں سنگت یک یک یک بُوت اَنت چیزے گس ءَ شُت ءُ چیزے شال ءُ کراچی ءَ من ہم وتی شُشتگیں پُچاں چِنگ ءُ نزارگ ءَ اتاں ءُ بیگاہ ءِ ساہت ءَ درآیگ ءِ ارادہ کُتگ اَت من ہمے جل ءُ مہ جلانی توک ءَ اِت اَنت کہ چہ دست گوانکو ءَ مُہر گُل ءِ کُلوے اَتک”منی بے آسریں مہر تو کُجا ءِ بیا من ءَ زُوت چداں چہ بَر کہ من بربادی ءِ نیمگ ءَ رھادگ کنگ بُوگ ءَ آں “ من ھیران بوت آں گورے کُلواہ ءَ من زُوت زُوت ءَ پسو دات کہ ” ھداوند تئی دژمناں چُش کنات گپ چی اِنت ساپ ساپ بُہ گش“ آئی ءَ پسو دات” منی دپ ءُ دل اے ھبر ءِ گُشگ ءَ نہ گِراں کہ اے دھر ءِ زالم من ءَ چہ تو سندگ ءَ آں ، منی کماش ءَ ابید ء جُست ءُ پُرس ءَ منی سانگ ءِ ھبر سستگ ءُ دو روچے میان ءَ منی آروس ءَ بندات کنگ ءَ اِنت – اے وڑ چتور بیت کنت ناں نہ بیت، اے وڑ من بُوگ ءَ نیلاں آئی ءَ پد ءَ پسو دات”من ءَ چہ تو ابید دگہ کس نیست ناں مات ناں پت ناں برات ناں گُھار دُرس زالم جوڑ بُوتگ اَنت اے چو رستر ءَ من ءَ ورگ آں ، بازیں گِروگ ءَ منی چم تہار بُوان اَنت بلے اے دھر ءِ زالماں انگت منی سر ءَ رحم نئیت بیا من ءَ بَرّ کہ چد ءُ رند منی زندگ بوگ ءِ زیادھیں وڑ نیست“ منی اندر ءَ بے وسی ودان بُوت ءُ رنگ رنگیں جن، جاتو، پرّی، مَلایک گوں من ھم دیوان بوت آں ہرچ یکے من ءَ وتی نیمگ ءَ کشگ ءَ اَت منی وابانی بستگیں ماڑی ءَ کَروجگ ءَ اِت اَنت، منی تمامیں دیستگیں واب ءُ واھگ ءُ واھشتاں یک گرنچے ءِ تہ ءَ بندگ ءَ ات اَنت۔ منی زبان ھشک بوان اَت چمانی رژنائی ءَ پچ گِران اِت اَنت منی نِز من سکرات ءِ توک ءَ آں ءُ زندگی ءِ گُڈی سیمسراں رس اِتگ آں من ءَ نوں چد ءُ گیش برداشت بُوگ ءَ نہ اَت من چاریں نیمگاں دز موش کنگ ءَ لگ اِتاں کہ چیزے چاراں وت ءَ کُشان ءُ ھتم کنان اِنت بازیں دزموش کنگ ءَ پد من ءَ ھچ دست نہ کپت بید ء یک قلمے ءَ کہ مُدام منی دیم ءِ جیب ءَ بُوتگ من دست اَنچو بُرت پہ قلم ءَ کہ پادا یار تو انگت ءَ وابے ٹائم نیست پشت کپ آں من تو ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ گوستگیں روچ ءَ ایرانی پولیس ءَ نشہ باپاری ءُ نشھی موادانی دستیگ کنگ ءِ ٹاہ رسانکدراں داتگ –

روکپتی بلوچستان ءِ پولیس ءِ بنشون سردار اھمد طاھری ءَ رسانکدراں گپ کنان ءَ گوشتگ کہ گوستگیں روچ ءَ یک ھزار ءُ چار سد ءُ چِل ءُ نُھ سیر نشھی مواد دستیگ کرتگ اَنت –

پولیس ءِ بنشون ءِ رد ءَ نشہ باپاریانی ھال چیریں ھالانی تہ ءَ سرپدی بیتگ ءُ چریشی ءَ نیکشھر، ایرانشھر ءُ دلگان ءِ پولیس ءَ نشہ باپاریانی راہ بستگ ءُ آیانی نشہ دستیگ کرتگ اَنت –

اھمد طاھری ءِ گوشگ اِنت اے پولیس ءَ ھال ءِ سر بیگ ءَ پولیس ءَ نشہ باپاریانی ھر چاریں نیمگاں راہ بستگ ءُ آیانی نگاہ ایر کرتگ اَنت –

آئی ءِ گوشگ اِنت کہ نشہ باپاریانی راہ ءِ گٹ کنگ ءَ آیاں پولیس ءِ سر ءَ تیرگواری کرتگ ءُ چریشی ءَ آ گیش شت بیت نہ بیتگ اَنت ءُ آیاں گُڈی ءَ وتی سلاہ دور داتگ اَنت ءُ وت ءَ پولیس ءِ دست ءَ داتگ –

آئی ءِ گوشگ اِنت موادانی تہ ءَ نُھ سد ءُ چِل ءُ نُھ سیر تریاک ھوار بیتگ اَنت ءُ چار سد ءُ ھپتاد ءُ ھپت سیر ت شیرگ ھوار بیتگ اَنت کہ ڈیھ ءِ دگہ استاناں اشاں برگ ءَ بیتگ اَنت –

آئی ءَ گوشت کہ اے بار سَے گاڑیاں لَڈوک بیتگ اَنت ءُ روگ ءَ بیتگ اَنت کہ گوستگیں بازیں روچاں پولیس اشانی چاریگی ءَ بیتگ ءُ پولیس ءِ چاریگ ءَ اشانی بارانی ھال راست کرتگ ءُ چریشی ءَ پولیس ءَ سرجمیں راہ ءُ در بستگ اَنت –

آئی ءَ گوشت کہ نشہ باپاری ءِ چار کس دزگیر کرتگ ءُ آمیدگس ءِ دست ءَ داتگ اَنت –

سربوتگیں ھالانی رِد ءَ بلوچستان ءِ دمگ شال ءُ لسبیلہ ءَ جتاجتائیں وئیلاں سَے مردم بیران بوتگ وھدیکہ ھب ءُ اوستہ محمد کسانیں زھگے ءَ ھوار دو جون دست کپتگ اَنت –

گیشیں ھالانی رِد ءَ بلوچستان ءِ دمگ لسبیلہ ءَ مسافر کشیں کوچے ءَ پت ءُ چُک لگت داتگ اَنت چریشی ءَ ھردوک بیران بیتگ اَنت-

اھوالکارانی رِد ءَ لسبیلہ دمگ ناکہ کھارڑی ءِ نزیک ءَ چہ شال ءَ کراچی ءَ رؤکیں مسافر کشیں کوچ ءَ پت ءِ ھمراہ ءِ چُک ءَ لگت داتگ اَنت، چریشی ءِ سوب ءَ پت ءُ چُک ھما دمان ءَ بیران بوتگ انت –

بیران بوتگیں مردمانی پجار کلام الدین ء سفر خان ءُ آئی ءِ زھگ حسنین جھمنند ناکہ کھارڑی ءِ ناماں چہ بوتگ انت –

ریسکیو ءَ بیران بوتگیں مردم ھما دمان ءَ نادراھجاہ ءَ سرکنگ بوتگ انت اژدری چار ءُ ٹپاس پد لاش کھول ءِ ھوالگ ءَ کنگ بوتگ انت –

زانگ بہ بیت بلوچستان ءَ دگ ءِ وئیلانی سوب ءَ مدامی بازیں مردمے بیران ءُ ٹپی بنت کہ آھانی تہ ءَ گیشتریں وئیل شال تاں کراچی مزن شھدگ ءِ سر ءَ پیش آیگ ءَ اَنت –

بلوچستان ءِ بنجاھی شھر شال ءَ تیرگواری ءِ وئیل ءَ یک مردمے بیران بیتگ –

تیرگواری ءِ وئیل شال ءِ دمگ سریاب دگ صدام پھاٹک ءَ دیم ءَ اتکگ –

پولیس ءِ رِد ءَ ناشناسیں مردمانی تیرگواری ءَ یک مردمے بیران بوتگ اُرشکار تچگ ءُ رؤگ ءَ سوبمند بوتگ انت – پولیس ءَ لاش دست گپتگ ھسپتال ءَ سرکتگ اود ءَ اژدری چار ءُ ٹپاس ءَ پد لاش کھول ءِ ھوالگ ءَ کنگ بوتگ – وئیل ءِ درگت ءَ ھچ وڑیں سرپدی سر نہ بوتگ اے درگت ءَ پولیس گیشیں پٹ ءُ پول کنگ ءَ انت –

دومی نیمگ ءَ اوستہ محمد شست سالی مردمے ءِ جون ءِ دست کپتگ –

ھالانی رِد ءَ گوستگیں شپ کساس ادار سَے ءَ علی گوھر چوک ءَ ناشناسیں شست سالی ئیں مردمے ءِ جون دست کپتگ – پولیس ءَ لاش دست گپتگ ءُ ھسپتال ءَ سرکتگ ، ھمے گوشگ بوگ ءَ انت کہ سر زاھری آئی ءَ ھچ وڑیں ٹپ ءُ ٹور پر نہ بوتگ بلے اے درگت ءَ گیشیں پٹ ءُ پول برجاہ انت –

ھمے وڑ بلوچستان ءِ دمگ ھب ءَ دارو ھوٹل ءِ نزیک ءِ کبرستان ءَ کسانیں گونڈو ءِ جون ءِ دست کپتگ –

کسانیں زھگ ءِ جون ایدھی ایمبولینس ءَ نادراھجاہ ءَ سرکتگ گونڈو ءِ درگت ءَ گیشیں پٹ ءُ پول برجاہ انت –