TBP Balochi

روکپتی بلوچستان ءِ جانسلامتی ءِ گوشگ اِنت کہ روکپتی بلوچستان ءِ ھند بنگلان ءَ یک میتگے ءَ کرونا نادراھی گیش بیتگ ءُ اود ءَ جانسلامتی ءَ “سھر ” جاور نگیگ گوشتگ اَنت –

جانسلامتی ءِ گوشگ اِنت کہ بنگلان ءِ میتگ گابریک ءَ جھانی نادراھی روچ پہ روچ گیش بیان اِنت کہ اے کسانیں میتگ ءَ کرونا وائرس ترندی ءَ مانشان اِنت –

آئی ءِ گوشگ اِنت کہ تنی وھدی اے میتگ ءَ بیست کس کرونا نادراھی ءِ آماچ بیتگ اَنت ءُ گیشی ءِ گمان اِنت –

جانسلامتی ءِ گوشگ اِنت کہ اگاں سرکار ءَ اے میتگ دلگوش نہ کرت گڑا اے میتگ ءَ کرونا وتی ھرجان جت کنت –

ھمے رنگ ءَ گوستگیں روچ ءَ میناب ءَ یک مردمے کرونا وائرس ءَ بیران بیتگ ءُ روکپتی بلوچستان ءِ آ دگہ شھراں ھم کرونا وائرس ءِ بازیں کیس گوستگیں روچاں رپورٹ بیتگ اَنت کہ آیانی تہ ءَ کرونا وائرس ءِ زوریں جاہ ایرانشھر گوشگ بیتگ –

گوستگیں روچاں ایرانشھر ءَ چِل ءُ نُھ کس وائرس ءِ آماچ بیتگ اَنت کہ اشانی پجیگ ءَ درسی پنچ ھزار ءَ برز اَنت ءُ داں بندات ءَ دو سد ءَ گیش مردم بیران بیتگ اَنت –

چاگردی ترامجاھاں کجام ھم نام ءَ جوڑ بوکیں گل شھیدانی کم شرپی اِنت- ماما قدیر بلوچ

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ نُھ روچ سرجم بوتگ – جتا جتائیں پگرانی منوگراں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گوم ءَ باوست کنان ءَ گوشتگ کہ میان استمانی پڑ ءَ بلوچ راج ءَ تاوان رسگ ءَ اِنت ءُ دومی نیمگ ءَ ھمدا ڈیھ ءِ تہ ءَ ھر دو مردم پاد کیت چاگردی ترامجاھاں درشان دنت کدی وتن نام ءَ، کدی فکری کونسل، کدی اتھاد ءِ نام ءَ گل ءِ دیم ءَ کاریت، اے بلوچ راج ءُ شھیدانی ھونانی کم شرپی نہ انت؟ –

آئی ءِ گوشگ اَت کہ گلامی انسان ءِ زندے درسیں رگ ءُ بند ھما کہ گوں چاگرد ءَ ھمگرنچ انت آھاں تباہ برباد کنت ءُ انسان ءَ بس یک بُتے جوڑ کنت ءُ یل دنت، گلامی ءِ سوب ءَ انسان وتی راستیں ھستی ءَ ھم بیھیال کنت –

آئی ءِ گوشگ ات کہ سیاسی گلامی راجی بھر بانگی ءِ امل کہ سرجمیں چاگرد ءَ درگان درگان کنت ءُ یک راجے ءَ ٹولی ٹولی، گل ءُ پاٹیانی دروشم ءَ کاریت کہ یکجاھی ءِ بدل ءَ ایوکی ءِ منوک بنت –

ماما قدیر بلوچ ءِ گوشگ ات کہ سیاسی گلانی رھشونیں مردماں جتائیں لیکہ بزاں واھشت، نارہ، گپ ءُ باوست دو روچی دیمروئی کارانی تہ ءَ گلائیش کنت ءُ آھاں زورگیر ءِ لوٹانی چیر ءَ کنگ ءِ جھد ءَ کنت ھما کہ چہ زورگیر نیمگ ءَ سرجم ءَ واک دیگ بوتگ انت –

آئی ءِ گوشگ اَت کہ مارا اے وڑیں پہ نامی ئیں چاگردی ترامجاھاں جوڑ بوکیں گلاں چہ پھریزگ ءُ سیاسی گلامی ءَ چہ رکگی انت – ریاست ھما وڑ ءَ کہ وتی داشتگیں کاسگ چٹاں پروٹوکول دنت ءُ ورنایانی آوار جنی، کشت کوش، نشہ باپاری ءَ دیم ءَ برگ ءَ انت اے وڑیں نام نھادیں گلانی کمگ ءَ بلوچ پرزندانی یل کنائینگ ءَ دوری پروشت ءُ پروش کنگ ءَ انت –

سر بیتگیں ھالانی رد ءَ بلوچی زبان ءِ مزن نامیں شائر اکبر زپر ءِ کسان سالیں زھگ ھمل زپر شومک ءِ نادراھی ءَ بیران بیتگ –

ھمل زپر کراچی ءَ آگاھان ھسپتال ءَ شومک ءِ نادراھی ءَ جاندراھی ءَ بیتگ کہ بازیں وھداں پد آ مروچی بیران بیتگ –

بلوچستان ءَ سالانی تہ ءَ بازیں کچے ءَ مردم شومک ءِ نادراھی ءِ آماچی ءَ بیران بیگ ءُ زوال بیگ ءَ اَنت – بلوچستان ءَ بندوکیں مردمانی گوشگ اِنت بلوچستان ءَ شومک ءِ نادراھی ءِ ھاسیں گر ءُ دار ءِ نہ بوگ ءُ ھسپتال ءِ نیستی ءَ سالانی تہ ءَ بازیں مردمے شومک ءِ نادراھی ءَ وتی وھداں آسر کن اَنت –

ٹی بی پی ءَ اوست ویلفئیر آرگنائزیشن ءِ چیئرمین مھمد جان دشتی ءَ پدردی درشان کنان ءَ گوشتگ کہ ھمل زپر اولی نادراہ بیتگ کہ آ اوست ءَ دست گپتگ ءُ آئی ءِ واستا وتی کمک ءُ جھد کرتگ اَنت –

مھم جان دشتی ءَ گوشت کہ ھمل زپر ءِ واستا اوست ویلفیئر ءَ بلوچستان ءَ کمپئن ءُ دگہ کار کرتگ اَنت بلے بژن کہ آئی ءِ ساہ رکینگ نہ بیت –

آئی ءَ گوشت کہ اوست ویلفیئر ءِ چیردستی ءَ تنی وھدی بازیں نادراھانی جاندراھی بیتگ ءُ بازینے انگت بیگ ءَ اِنت –

مھم جان دشتی ءَ گوشت کہ ھمل زپر سال دوزھزار ءُ نوزدہ ءَ شومک ءِ نادراھی ءِ آماچ بیتگ ءُ آ کراچی ءَ برگ بیتگ اود ءَ آئی ءِ جاندراھی بیگ ءَ بیتگ بلے آئی ءَ مروچی شومک ءِ گڈی جنگ آسر کتگ ءُ امروز یلہ کرتگ –

آئی ءَ گوشت کہ اوست ویلفیئر ءَ ھمل زپر ءَ پد دومی نادراہ اورنگزیب مھراب تسپ پنجگور ءِ نندوک بیتگ کہ آئی ءِ پونز ءِ تہ ءُ شومک ءِ نادراھی بیتگ ءُ آئی ءِ بُر ءُ برین بیتگ ءُ چریشی ءَ آ دراہ بیتگ –

آئی ءَ گوشت کہ سیمی نادراہ برین ٹیومر ءِ نادراہ راھیل اسگر جھمنند میری گلگ بیتگ اشی ءِ جاندراھی ھم سوبمند بیتگ ءُ چارُمی شاری ھاسل مزاری کھن کیچ ءِ نندوک بیتگ ءُ ایشی ءِ جاندراھی ھم سوبمند بیتگ –

آئی ءَ گوشت کہ بلوچستان ءَ ھاسیں نادراہ جاہ ءُ ڈاکٹرانی نہ بیگ ءَ بلوچستان ءِ نندوکیں مردم کراچی ءُ دگہ شھراں رو اَنت اود ءَ آیانی درچ ءُ کرچ ءَ گنجائش سک باز اَنت –

آئی ءَ گوشت کہ اوست ویلفیئر وتی کمک ءُ راج ءِ کمک ءَ وتی وس ءَ کار کنگ ءَ اِنت کہ باید مزن مزنیں ادارہ بلوچستان ءَ نادراھانی نیمگ ءَ دلگوش بہ دے اَنت ءُ دانکہ مردمانی زند بہ رک اِت بہ کنت –

وئیل شال، ڈیرہ مراد جمالی ءُ چاگی ءَ پیش اتکگ اَنت کہ اود ءَ تیرگواری ءُ دگ ءِ وئیلاں زھگے ءَ ھوار سَے مردم بیران ءُ نُھ زدگ بیتگ اَنت –

سر بیتگیں ھالانی رد ءَ شال داں ژوب ءِ شھدگ ءِ سر ءَ بادنزئی ءِ ھند ءَ ڈپٹی کمشنر ژوب ءِ گاڑی ءُ پرپٹے ءَ ٹکر وارتگ چریشی ءَ پرپٹ سوار بیران ءُ ڈپٹی کمشنر ژوب شیھک بلوچ زدگ بیتگ –

زدگ بیتگیں ڈی سی درمان کنگ ءَ شال ءَ برگ بیتگ ءُ اود ءَ ھسپتال ءِ رد ءَ آئی ءِ جان ناگیگی ءَ گھتر اِنت –

دومی نیمگ ءَ دکی ءَ اشکرانی چات ءَ زھرناکیں گیس ءِ تراک ءَ ھشت مردم زدگ بیتگ اَنت –

مائنز انسپکٹر صابر شاہ ءِ رد ءَ دکی ءَ اشکرانی کھن ءِ تہ ءَ زھرناکیں گیس ءِ سوب ءَ تراک بیگ ءَ پد ریسکیو ءِ دزکمکی کار برجاہ اَنت ءُ کاریزکار تہ ءَ ستکگ ءُ زدگ بیتگ اَنت ءُ اشانی تہ ءَ ھشت کاریزکار کشگ بیتگ اَنت –

سُتکگیں کاریزکارانی تہ ءَ عبدالغفار ء شمس اللہ بارکزئی، نیک مھمد ء فداد مھمد ھوتج، بخت اللہ ء عبدالحد، نعمت اللہ ء سید اللہ، مھمد صدیق ء پیر مھمد، منظور اھمد ء عبدالحلیم ءُ مطیع اللہ ء مھمد ساگزئی ھوار اَنت –

آ ڈی ایچ کیو دکی ءَ برگ بیتگ اَنت بنداتی دار ءُ درمان ءَ پد شال ءَ برگ بیتگ اَنت اود ءَ زدگ بیتگیں مردمانی تہ ءَ ھشت کسانی جاور نگیگ گوشگ بیگ ءَ اَنت –

ھمے وڑ ءَ چاگی ءَ یک گاڑی ءَ زھگے لگت داتگ ءُ کُشتگ –

ھسپتال ءِ رد ءَ چاگی ءِ ھند مچ ءَ یک گاڑی ءَ زھگے لگت داتگ ءُ زدگ کرتگ ءُ آ نادراہ جاہ ءَ سر بیتگ ءُ اود ءَ آئی ءَ درد نہ سگ اِتگ ءُ بیران بیتگ –

ھمے وڑ ءَ ڈیرہ مراد جمالی ءِ ھند حیلانی مارکیٹ ءَ ناشناسیں مردمانی تیرگواری ءَ تاجر راجہ ھان زدگ بیتگ –

زدگ بیتگیں تاجر سول ھسپتال ڈیرہ مراد جمالی ءَ برگ بیتگ ءُ اود ءَ گیشیں درمانی ءَ سکھر ءَ برگ بیتگ ءُ اود ءَ آئی ءَ ساہ داتگ ءُ بیران بیتگ –

پولیس ءِ رد ءَ جرمکار وئیل کنگ ءَ پد تتکگ ءُ شتگ ءُ اے درگت ءَ پولیس گیشیں پَٹ ءُ پول کنگ ءَ اِنت –

سر بیتگیں ھالانی رد ءَ گوستگیں شپ ءَ کیچ ءِ بنجاھی شھر تربت آبسر ءَ کھدہ یوسپ بازار ءَ کرکٹ گراؤنڈ ءَ ناشناسیں مردماں تیرگواری کرتگ ءُ مزمل نامیں مردمے کُشتگ –

دمگی مردمانی رد ءَ مزمل سرکار ءِ جوڑ کرتگیں کشندہ ٹولی کہ آ“ ڈیتھ اسکواڈ” ءِ نام ءَ توار پِر جنگ بیت آئی ءَ گوں بندوک بیتگ –

دومی نیمگ ءَ بلوچستان ءِ آجوئی ءَ لوٹوکیں سلاہ بندیں گل بلوچستان لبریشن فرنٹ ءِ جارکش میجر گواھرم بلوچ ءَ مزمل ءِ کوش ءِ زمہ واری منّ اِتگ –

میجر گوھرام بلوچ ءَ رسانکدراں شنگ کرتگیں وتی درشانی ءَ گوشتگ کہ گوستگیں شپ ءَ مزمل پنام ءِ مزو ء حاصل ءِ سر ءَ تیرگواری کرتگ ءُ کُشتگ –

میجر گوھرام بلوچ ءَ شنگ کرتگیں بیان ءِ تہ ءَ گوشتگ کہ کشتگیں مردم ریاستی چاریگی ءِ ھواری ءَ بلوچ زرمبشت ءِ ھلاپ ءَ ریاستی جوڑ کرتگیں سلاہ بندیں گل ڈیتھ اسکواڈ ءِ پرکاریں باسکے بیتگ –

زانگ بہ بیت بلوچستان ءِ باز جاھاں بلوچ سلاہ بندیں گلانی نیمگ ءَ سرکاری جوڑ کرتگیں گل ڈیتھ اسکواڈ ءَ بندوکیں مردمانی کوش ءُ آیانی کوش ءِ زمہ واری یکشل ءَ رسانکدراں شنگ بیگ ءَ اَنت –

گوستگیں روچاں کیچ شَے کھن ءَ ملا عزیر نامیں مردمے سلاہ بندیں مردماں تیرگواری کرتگ ءُ کُشتگ اَت –

ملا عزیر ءِ کوش ءِ زمہ واری بلوچ لبریشن آرمی ءِ جارکش جیئند بلوچ ءَ منّ اِتگ اَت –

جیئند بلوچ ءِ گوشگ اَت کہ ملا عزیر سرکاری ءِ پوجی آپریشنانی کمکاری ءُ دگہ سُر ءُپراں دزمانجن بیتگ –

نبشتانک: میتگ ءِ سُتکگیں بانڈم

نبشتہ کار: سَیپ بلوچ

دی بلوچستان پوسٹ

مرچی تئی یات ءَ دل گْوش ایت پہ تو کاکدے نبشتہ بہ کن آں بلے زندمان ءَ وتی تب مٹینتگ مرچی اے ساهت ءَ مولم هما دْروشم ءَ اِنت کہ من گوں سنگتے ءَ ارادو کتگ اَت کہ تئی چارگ ءَ کایاں یار چَمانی ارس چوناها سک لاچار کنگ آں بلے پرچا کہ تئی یات ءَ چیدگ کتگ بلے جهد کن آں کہ تاک ءَ پہ تو سرجم بہ کن آں-

اے رمزان ءِ پنچمی روچ اَت کہ آئی ءِ کلوه اَتک کہ بیا دیر اِنت دچار نہ کپتگیں گڑا من گوں دگہ سنگتے ء‍َ شَور ٹاهینت ءُ درکپتاں دیم پہ آئی ءِ سبز ءُ زیبائیں میتگ ءِ نیمگ ءَ اے روچ ءَ موسم سک وش اَت هور اَت ترمپ ءُ گْوات اَت سارتی بلے یار اے روچ ءَ وهد ئِے تیگ ءَ آیگ ءَ اِت آں دل ءَ نہ گُشت کہ روچگ بو من زانت تو ورگ ءَ ئے کہ مدامی روچگ نہ بوتگ ئے وارتگ هاها گڑا ما اتک ایں دکان ءِ دیم ءَ سینکل تیل ءُ آئل کرت ءُ سامان ورگی چیز ءُ سگریٹ هم زرت گوں کہ آ سگریٹ سک کش ایت گڑا ما در اتک ایں دیم پہ پُشتی راه ءَ کمو سپر ءَ رند وهدئِے کسان کسانیں میتگ گْوست اَنت سگریٹے روکت کشان بوتاں کہ موسم دگہ دْروشمے ءَ اَت پد ءَ مهروانیں همبلے ءِ دیدار ء‍َ روْگ ءَ اِت آں-

اے کسانیں کشک ءَ وهد من دَور کت اے کوه ءُ پیش ءُ کاش ءُ کاهانی زیبائی ءَ من ءَ وتی اندر ءَ برت من یکْوئی آئی ءَ را زاه دات ءُ گشت یار جنت ءَ نشتگ مهرانی مهروان پوره اے کوه ءُ چمگ اے کْوش ءُ پیش ءُ اے هند ءِ زیبائی منی پشت ءِ سنگت ءَ کند اِت ءُ گوشت تو وَ مرگ کتگ مهلوک شهر ءُ بازارانی توسیپ ءَ کنت تو اے پیش ءُ دازانی توسیپ ءَ گیش نہ ئِے گاماں تیز کن وهد هم جنزان اِنت جمبر سر ءَ اِنت هور مئے جند ءَ گر ایت ءُ اے کشک وت کور ءَ چہ روگ ءَ اِنت-

گڑا من کند اِت ءُ گشت یار مرچی جمبر ءُ هور ءُ اے موسم ء‍َ من ءَ ٹوهینگ ءَ انت گڑا ما نوں سنگت ءِ جاه ءُ دوار نزیک کتگ اَت گڑا ما اتک ایں سنگت ءِ میتگ ءَ سر بوت ایں آ در اتک چہ کڈک ءَ گوں من پر امباز بوت کندگ ءُ مسکراه گڑا ما نشت ایں دیوان کت نندگ ءَ گوں آئی ءَ دراھینت سیپو یار سگریٹے بن دے هاهاها من سگریٹے کش اِت ءُ بن دات ما سگریٹ کش اِت ءُ کندگ مسکراه آ منی گونیں سنگت پوره پشل ات مئے دیم ءَ هاهاها دانکہ شپ نزیک بوگی اَت من سنگت ءَ را ءَ رکست ءُ درشت ایں منی واتر بوگ ءِ وهد ءَ گوشی سگریٹے یار بن دے بلکیں نوں زند موه دنت یکجاهی ءِ یا نہ دنت منی چوناها چمانی ارس در اتکاں بلے من کند اِت ءُ گشت یکجاه بہ ایں دنیا سک کسان اِنت گڑا ما دراتک ایں چہ اود ءَ واتر همے بارگیں کوهانی کشک ءَ دانکہ پہ وتی هند ءُ دمگ ءَ اتک ایں، بلے چشیں مهروانیں سنگت من تنگی وتی زند ءَ کم هاسل کتگ بلے نہ دیستگ ،چندے وهد ءَ رند من کہ درملک ءَ رپتاں سال ءِ نہ بوتگ اَت کہ آ شهید کنگ بوتگ من اکس ءَ ئِے هم چار اِت کت نہ کت کن آں آئی ءَ مرچی سَے سال ءَ رند اتک آں وهد ئِے دل ءَ لوٹ اِت کہ آئی ءِ میتگ ءَ رواں مات ءَ ئِے چاراں بلے اے کشک ءَ من روگ زانت آیگ نزانت اے کوه ءُ پیش داز ڈنگر دار چمگانی آپ کوه لمب ءِ کهچر درست گریوگ ءَ اِت اَنت همے کہ میتگ ءِ نزیک ءَ سربوتاں هشکیں ستککیں بانڈم اِت آں بے مردمی ءَ اے میتگ هنچو ابیتک اَت کچکی وکگ ءِ هم نیست اَت مردم ءَ نزانت کہ اے پُر پچکندیں میتگ کجا لڈ اتگ ءُ شتگ-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

گوستگیں روچاں کیچ ءِ بنجاھی شھر چہ تربت ءَ پاکستانی پوج ءِ دست ءَ دزگیر بیگ ءَ پد بیگواہ بیتگیں دو نودربرانی زورانسری آوار جنگ ءِ ھلاپ ءَ بلوچ نودربرگلانی نیمگ ءَ ترندی ءَ ایر جنگ بیگ ءَ اَنت –

دزگیر کنگ ءُ بیگواہ بیتگیں سھیل احمد ء رفیق احمد یونیورسٹی آف مینجمنٹ اینڈ ٹیکنالوجی لاھور ءِ بیچلرز فائنل سیمسٹر ءِ نودربرے ھمے رنگ ءَ فیصل بلوچ تربت یونیورسٹی ءِ بی ایڈ ءِ نودربرے –

بلوچ اسٹوڈنٹس کونسل لاھور ءَ چہ کیچ ءَ بیگواھی بیتگیں نودربرانی زورانسری آوار جنی ترندی ءَ ایر جتگ ءُ گوشتگ کہ بلوچ ورنایانی زورانسری آوار جنگ ءُ بیگواہ کنگ بلوچ راج ءِ سر ءَ زوراکیانی نہ کُٹوکیں درچے –

نودربرانی ھمک روچ آوار جنگ ءُ بیگواہ کنگ نودربرانی اندر ءَ یک تُرسے ءَ مانشان کنگ اِنت کہ اشی ءَ ھما کَچ ءَ ایر بہ جن ئے کم اِنت – نودربرانی زورانسری آوار جنگ اے اولی رند نہ اِنت بلکیں چریشاں پیسر بلوچ نودربر زورانسری آوار جنیانی دیمپان اَنت، اشی ءِ راستیں گپ ایش اِنت کہ بلوچ نودربراں وانگ ءُ زانتی تکاں آیانی راہ ءَ ڈنگر جنگ اِنت – ریاست ءِ زمہ واری بیت اِنت آ بلوچ نودربراں آسراتی بہ دنت آیاں وانگ ءَ بِل ایت ءُ دیمروئی ءِ راھاں پچ بہ کنت بلت بژنیگیں گپ ایش اِنت آسراتی ءِ دیگ ءَ ابید ریاست آیانی ءِ زانت ءِ چراگ ءَ کُشگ ءَ اَنت کہ چریشی ءَ آیوکیں وھداں بیمناکیں جاور ودینگ بنت –

زانگ بہ بیت کھول ءِ رد ءَ سھیل احمد ءُ فیصل بلوچ سِی ءُ یک مارچ ءَ کیچ ءِ دمگ شارگ ءَ ھما وھد ءَ زورانسری آوار جنگ بیتگ اَنت کہ آ چہ وتی لوگ ءَ دیم پہ شکار ءَ روگ ءَ بیتگ اَنت –

ورنایانی زورانسری بیگواھی ءِ سر ءَ بلوچ اسٹوڈنٹس کونسک رھیم یار ھان ءِ جارکش ءَ وتی درشانی ءَ گوشتگ کہ چہ تربت ءَ بیگواہ بیتگیں نودربرانی بیگواہ کنگ یک پدریں ھالے – بلوچ نودربراں آوار جنگ گوستگیں دو دھکاں نہ کُٹوکیں رنگے ءَ برجاہ اَنت – ھمک روچ بلوچ نودربرانی آوار جنگ ءُ گار کنگ بلوچ نودربرانی دلانی تہ ءَ یک ترسے ءِ تالان بیگ ءَ اِنت – اے جاورھالانی دیمپانی بلوچ نودربراں پنجاپ ءِ وانگجاھانی دیم ترینتگ بلے گوستگیں لھتے سالاں پنجاپ ءِ وانگجاھاں وانوکیں بلوچ نودربر زورانسری آوارجنیانی درچ برجاہ اِنت – بلوچ نودربرانی آوار جنگ آیاں وانگ ءَ گستا کنگ اِنت –

بلوچ ایجوکیشنل کونسل بھاولپور ءِ جارکش ءَ وتی شنگ کرتگیں درشان ءِ تہ ءَ گوشتگ کہ بیگواھیں مردمانی جیڑہ ءَ بلوچستان ءَ یک ناوشیں جیڑھے ءِ مانشان اِتگ اَنت ھمک روچ کجا نا کجا بلوچاں چِست کن اَنت ءُ بیگواہ کن اَنت یک دراجیں مُدتے ءَ بلوچ نودربر ھمے زورانسری ءِ بیگواھی ءَ آماچ اَنت –

آئی ءَ گوشت کہ اے اولی وئیل نہ اِنت کہ بلوچ نودربر زورانسری ءِ بیگواھی ءِ آماچ اَنت بلکیں اشی ءَ پیسر ھزارانی کچ ءَ بلوچ نودربر زورانسری آوار جنگ ءُ بیگواہ کنگ بیتگ اَنت بلوچ نودربراں اے وڑ ءَ بیگواہ کنگ زانت ءُ زانشت ءَ دور کنگ ءِ بروبری اِنت –

اشی ءِ ھواری ءَ سھیل احمد ءُ فیصل بلوچ ءِ سلامتی ءِ یل کنگ ءِ واستا بلوچ اسٹوڈنٹس کونسل لاھور ءِ نیمگ ءَ بیست اپریل ءِ بیگاہ ءِ ساھت ھپت ءَ بہ گر داں یازدہ ءَ ٹوئٹر ءَ کمپئن بنگیج کنگ ءِ جار جتگ چریشی ءِ آئی ءَ دراھیں نودربر، سیاسی ءُ چاگردی گلاں ھوار زند ءِ ھمک تکاں بندوکیں مردماں بھر زورگ ءِ دزبندی کرتگ –

ھمے وڑ ءَ بلوچ اسٹوڈنٹس کونسل بھاولپور ءُ رھیم یار ھان ءَ بلوچ کونسل لاھور چیپٹر ءِ ٹوئٹر کمپئین ءِ پلامرزی ءِ جار جتگ ءُ دراھیں نودربر، انسانی ھکانی گل، زانت دوست ءُ انسان دوستیں تکاں بندوکیں مردماں گوں فیصل ءُ سھیل بلوچ ءِ دیم ءَ آرگ ءِ واستا توار چِست کنگ ءَ وتی کرد ءَ پیلو کنگ ءِ دزبندی کرتگ –

ٹوبہ ءَ زورگیریں پوج ءِ پانگس ءِ دو سنگرانی سر ءَ راکلیپٹ ءُ مزنیں سلاھانی گون ءَ اُرش کتگ تباہ کُتگ انت – میجر گْوھرام بلوچ

سربوتگیں ھالانی رِد ءَ یکشمبے شپ ءَ ناشناسیں سلاہ بندیں مردماں بلوچستان ءِ دمگ واشک ءَ پاکستانی پوج ءِ پانگس ءِ سر ءَ اُرش کُتگ، اُرش ءَ پاکستانی پوج ءَ جانی مالی تاوان رس اتگ –

اُرش واشک ءِ دمگ ٹوبہ ءَ برجاھیں پاکستانی پوجی پانگس ءِ سر ءَ کنگ بوتگ – اُرش ءَ پد سلاہ بندیں مردم درآیگ ءُ رؤگ ءَ سوبین بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گْوھرام بلوچ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں یک شمبے ءِ شپ ءِ ادار ھشت ءَ واشک ءِ دمگ ٹوبہ ءَ برجاھیں پاکستانی پوج ءِ پانگس دو سنگرانی سر ءَ راکٹ ءُ دگہ مزنیں سلاھانی گون ءَ اُرش کُتگ –

آئی ءَ گوشتگ کہ اے اُرش ءِ آسر ءَ کوہ ءِ سر ءِ دؤئیں سنگر سرجمی ءَ تباہ بوتگ انت ءُ سنگرانی تھ ئِے کارمند مُرتگ ءُ ٹپی بوتگ انت –

میجر گوھرام بلوچ ءَ گوشتگ کہ اے پانگس ءُ سنگر گوستگیں ماہ ءَ جوڑ کنگ بوتگ انت – ھمک روچ اے پانگس ءَ پاکستانی پوجی کارمند دمگی مردماں آوار جن انت ءُ آھاں لٹ ءُ کٹ کن انت – زیکیں اُرش ءَ پد ھم پاکستانی پوج ءَ یکرندے پد ءَ بازیں مردمے آوار جتگ ءُ بیگواہ کتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ ھشتاد ءُ ھشت روچ سرجم بوتگ – نیشنل پاٹی ءِ کلانیں باسک میر غفار قمبرانی، گوستگیں سرکماش نیاز محمد لانگو، چمن ءَ چہ پی ٹی ایم ءِ عبدالمنان کاکڑ ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ اَت کہ بیگواھیں بلوچانی یل کنائینگ وتی جاہ ءَ اگاں بلوچ اُستانی باسک آپ ءِ ٹانکی ءِ واستا اسمبلی ءِ تہ ءَ قرار داد ءِ پیش بہ کن انت آ اے پوزیشن ءَ نہ انت کہ منّارینگ ءِ ھاتر ءَ زور بہ دے اَنت، اے بس بنجاہ اسلامباد مھربانی بیت کہ اے بیچارگاں آپ بہ دنت یا ناں ھمے گشاں بلوچ باسکانی اے پاکستانی پارلیمانی سیاست بس یک سراب ءِ کہ آئی پُشت تنیگیں بلوچ راج ھزاراں سال بہ تچ ایت بلے انگت تنیگ انت –

ماما قدیر ءِ گوشگ ات کہ گل ءِ نیمگ ءَ میاں استمانی ادارہ گوشگ بوتگ انت کہ بلوچستان ءِ تہ ءَ بلوچانی زورانسری آوار جنی اے جیڑہ سنجیدگی بہ زور انت – میان استمان ءِ دلگوش ءَ وتی نیمگ ءَ ترینگ ءِ ھاتر ءَ زھرشانی دُرسیں وڑ ءُ ڈول وتیگی کتگ انت شدکشیں بنجل، پریس کانفرنس کنگ بوتگ، رسانکی درشان داتگ ءُ مراگش اڈ داتگ اَنت –

آئی ءِ گوشگ ات کہ بلوچ وتی پُرایمنیں جُھد ءَ انسانیت ءِ رکینگ ءِ ھاتر ءَ کانود ءُ رھبندانی رِد ءَ کنگ ءَ انت بلے پاکستانی پوج بلوچاں ناشرکار گوشگ ءِ جھد ءَ انت پاکستانی ھاکم بلوچ ءِ بگیری ءَ ملکانی کمک ءَ کارمرز کنگ ءَ انت –

ماما قدیر بلوچ ءَ گوشتگ میان استمان ءَ وتی چم پچ کنگی انت ءُ بلوچ جیڑہ چار ءُ ٹپاس کنگی انت –

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ ریاستی ڈیتھ اسکواڈ ملا عزیز ءِ کوش زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ تربت ءِ دمگ شے کھن ءَ پاکستانی پوج ءُ چیریں ادارھانی چیردستی ءَ برجاھیں ڈیتھ اسکواڈ ءِ کارمند ملا عزیز تیر باران کُتگ ءُ کُشتگ – ملا عزیز تربت ءُ چپ چاگرداں دمگاں دژمنیں پوج ءِ جوڑ کرتگیں سلاہ بندیں ٹولیانی سرکماشی ءَ کنگ ءَ بوتگ –

جارکش ءَ گوشتگ کہ ملا عزیز ءُ آئی ءِ ٹولی بلوچ راج ءِ بگیری ءَ برجاھیں پوجی لشکر کشی ءُ گِسانی سر ءَ بیڑ برگ ءُ زورگیریں پاکستانی پوج ءَ گوں تچکی ءَ ھوار بوتگ، اے ٹولی بلوچ جھدکارانی آوار جنی ءُ شھیدی ءَ ھم ھوار بوتگ اَنت – اے سال دوھزار ءُ بیست ءُ یک ءِ پروری ماہ ءَ ناصر آباد ءِ کوھی دمگ شورما ءُ چپ ءُ چاگرداں پوجی لشکر کشی ءُ زورگیریں پوج ءَ کمک کنگ ءَ ھم ھوار بوتگ انت –

جارکش ءَ وتی درشان ءِ تہ ءَ گوشتگ کہ بی ایل اے ناصر آباد ءِ کوھی دمگ شورما ءُ چپ چاگردی درسیں مردماں مکن کنت کہ آ اے دمگ ءَ وت ءَ پکنک پؤنٹاں تاں بدار انت کوھانی تہ ءَ آیگ ءَ پھریز بہ کن انت، پاکستانی چاریگ وت ءَ لس مھلوک کن انت ءُ کوھی دمگاں کائنت ءُ چاریگری کن انت ھمے ھاتر ءَ اے دمگاں بلوچ سرمچارانی دست ءَ دزگیری یا وتی جانی ءُ مالی تاوان رکگ ءِ ھاتر ءَ لس مھلوک وت ءَ ھما پکنک پؤنٹاں تاں بدار اَنت –

آئی ءَ گوشتگ کہ بلوچ لبریشن آرمی اے دمگاں بلوچ جھد کار ءُ لس مھلوک بگیری ءَ کار کنوکیں دژمن ءِ چاریگاں زوت آھاں وتی کتکاریانی مز ءَ دنت –