TBP Balochi

سر بیتگیں ھالانی رد ءَ گوستگیں روچ ءَ روکپتی بلوچستان ءِ دمگ سراوان ءَ ایرانی گجر ءِ تیرگواری ءَ تیل کشیں یک مردمے بیران بیتگ –

وئیل سراوان ءِ سیمسری دمگ کلگان ءَ بیتگ کہ اود ءَ ایرانی سپاہ ءَ یک تیل کشیں گاڑی ءِ سر ءَ تیرگواری کرتگ ءُ چریشی ءَ گاڑی ءِ ڈرائیور بیران بیتگ –

بیران بیتگیں مردم ءِ پجار اسلم آجزئی ء نواب جھمنند کینار بست سراوان ءِ نام ءَ زانگ بیتگ –

گیشیں ھالانی تہ ءَ گوشگ بیتگ کہ اسلم آجزئی پنجگور ءَ واتر سراوان ءَ روگ ءَ بیتگ کہ اود ءَ ایرانی گجر ءَ آئی ءِ سر ءَ تیرگواری کرتگ ءُ چریشی ءَ آ بیران بیتگ-

ھمے وڑ ءَ روکپتی بلوچستان ءَ انسانی ھکانی واستا کارکنوکیں بلوچ کمپعن فعالین ءِ گوشگ اِنت کہ اے سال ءَ ایرانی گجر ءِ تیرگواریاں لس مردمانی بیرانیانی تہ ءَ گیشی اَتکگ کہ نوکیں سال ءِ بندات ءَ تنی وھدی بازیں تیل کش ءُ لس باپاری مردم ایرانی گجر ءِ تیرانی ھرجان بیتگ اَنت –

زانگ بہ بیت روکپت ءُ رودراتکی دوئیں بلوچستان ءِ سیمسر “کش اِتگیں لکیر ” ءِ آ دیم ءُ اے دیم ءَ نندوکیں مردمانی زرکاری گوں سیمسر ءَ بندوک اِنت کہ اے سیمسر ھردوکیں نیمگاں بند بیگ ءِ سوب ءَ ھزارانی مردم پہ چُنڈے نان ءَ مھتاج اَنت –

روکپتی بلوچستان ءَ دگہ یک وئیلے ءَ دو مردم بیران بیتگ اَنت ءُ یک مردمے زدگ بیتگ-

وئیل روکپتی بلوچستان ءِ بنجاھی شھر دزاپ ءِ ھند نصر آباد ءَ یک گاڑی ءِ چپ بیتگ ءُ چریشی ءَ دو مردم بیران ءُ یکے زدگ بیتگ –

روکپتی بلوچستان ءِ انتزامیہ ءِ سروک اھمد ثمری ھسینی ءَ گوشتگ کہ پولیس ءِ بنجل ءَ ھال سر بیتگ کہ نصر آباد ءَ یک گاڑی ءِ چپ بیتگ –

اھمد ثمر ھسینی ءِ گوشگ اِنت ھال ءِ سر بیگ ءَ پولیس ءِ کارمند ءُ انتزامیہ ءَ وئیل جاہ ءَ سر بیتگ اَنت ءُ اود ءَ زدگ ءُ بیران بیتگیں مردم چِست کنگ بیتگ ءُ نادراہ جاہ ءَ سر کنگ بیتگ اَنت –

سربوتگیں ھالانی رِد ءَ بلوچستان ءِ دمگ پنجگور ھزدار، کیچ، سوراب کوھلو ءَ تیرگواری وئیلاں دو مردم بیران وھدیکہ کوھلو ءَ بور تری پاٹ کپگ ءَ یک مردمے بیران بیتگ –

گیشیں ھالانی رِد ءَ ھزدار ءِ دمگ کھنڈ ءَ ناشناسیں مردمانی تیرگواری ءَ یک مردمے بیران بوتگ –

بیران بوتگیں مردم ءِ پجار احمد خان ء علی بخش ءِ نام ءَ چہ بوتگ – پولیس ءِ رِد ءَ وئیل زاتی جیڑہ ئِے سر ءَ بوتگ، پولیس ءَ ارزی نبشہ کتگ ءُ وئیل درگت ءَ گیشیں پٹ ءُ پول کنگ ءَ انت –

کیچ ءَ دُزانی تیرگواری ءَ یک مردمے بیران، دزاں گاڑی گوں ٹیلاں بُرتگ –

وئیل کیچ ءِ کوھی دمگ کلبر ءَ دیم ءَ اتکگ کہ دزانی تیرگواری ءَ علیم نامیں مردمے بیران بوتگ –

ھمے وڑ پنجگور ءِ دمگ وشبود ءَ دُزانی تیرگواری ءَ یک مردمے ٹپی بوتگ –

پولیس ءِ رِد ءَ وشبود ءَ سَے سلاہ بندیں مردم مختار ء خیر جان ءِ دکان ءَ پُترتگ ، دکان ءَ بیست ھزار کلدار ءُ آئی ءِ سیونٹی پرپٹ گوں وت برتگ – پولیس رِد ءَ ھمے وھد ءَ محمد حیات دکان ءَ سربوتگ دُزانی تیرگواری ءَ آئی ءَ دست ءُ پاداں تیروارتگ –

ٹپی بوتگیں مردم سول ھسپتال ءَ برگ بوتگ –

ھمے وڑ ناگ ءُ سوراب ءِ میان ءَ دُزاں دو زمباد گاڑیانی سر ءَ تیرگواری کتگ دؤئیں گاڑیاں ڈیک وارتگ ءُ چپی بوتگ انت –

اھوالکار رِد ءَ سوراپ لیوز پوسٹ ءِ نزیک ءَ دو گاڑیاں ناگ ءَ چہ کمے دور سی پیک شھدگ ءِ سر ءَ گوزگ ءَ بوتگ انت – پیسرا چہ دگ بستگیں دُزاں گاڑی والا پہ اوشتگ ءَ دست داتگ اَنت ءُ نہ اوشتگ ءِ سوب ءَ دزاں تیرگواری کتگ چریشی ءَ پشت گاڑی ءِ ٹیر بسٹ بوتگ دومی گاڑی ءَ ٹکر اِتگ چریشی ءَ دؤئیں گاڑی چپی بوتگ انت –

گاڑیاں سواریں یک مردمے کمے ٹپی بوتگ انت –

کوھلو ءَ کلندرانی مری ٹک ءِ وت ماں وتی زاتی جیڑہ ءِ سر ءَ جنگ ءُ چوپ ءَ دو مردم ٹپی بوتگ اَنت –

ٹپی بوتگیں مردمانی پجار کریم بخش ءُ منیر احمد ءِ نام ءَ چہ بوتگ انت –

ٹپی بوتگیں مردم ڈی ایچ کیو نادراھجاہ کوھلو ءَ برگ بوتگ انت اے درگت ءَ پولیس گیشیں پٹ ءُ پول کنگ ءَ انت –

بلوچستان ءِ دمگ کوھلو کاھان ءَ بور ءِ تری پاٹ کپگ ءَ یک مردمے بیران بوتگ –

بیران بوتگیں مردم ءِ پجار محمد سلیم ء سعیدو شیرانی نام ءَ چہ بوتگ –

سر بیتگیں ھالانی رد ءَ مروچی کیچ ءَ ایف سی ءِ کارمنداں یک کسان سالیں زھگے جنسی زوراکیانی ءِ نشانگ کرتگ ءُ پد ءَ بے ھوشی ءِ جاوراں چگل داتگ –

دمگی مردمانی رد ءَ چارشمبے ءِ روچ ءَ فرنٹیئر کور (ایف سی) ءِ کارندھاں کیچ ءِ دمگ ھوشاپ ءَ دَہ سالی ئیں زھگے جنسی زوراکیانی نشانگ کرتگ ءُ پد ءَ بے ھوشی جاوراں چگل داتگ ءُ چریشی ءَ پد کھول ءَ آ تربت ءَ نادراہ جاہ ءَ سر کرتگ –

زھگ ءِ پجار مراد امیر ءِ نام ءَ بیتگ ھوشاپ ءِ میتگ گریڈ بازار ءِ نندوک گوشگ بیگ ءَ ایں، دمگی مردمانی رد ءَ اے زوراکی وئیل ھما وھد ءَ دیم ءَ اتکگ کہ زھگ وتی برات ءِ ھمراھی ءَ جنگل ءَ شتگ بیتگ کہ اود ءَ ایف سی ءِ کارمنداں آئی ءِ مستریں برات لَٹ ءُ کُٹ کرتگ ءُ تاچینتگ ءُ پد ءَ آئی ءِ کستریں برات گپتگ ءُ آئی ءِ گون ءَ بدکاری کرتگ ءُ بے ھوشی جاوراں چگل داتگ –

چرے وئیل ءِ پژدر ءَ ھوشاپ ءِ مھلوک ءَ دگ بند کرتگ ءُ زھرشانی کرتگ ءُ زھگ ءِ واستا انساپ ءِ لوٹ کرتگ-

دمگی مردمانی رد ءَ زھگ ءِ مستریں برات ایف سی ءَ وتی گور ءَ برتگ ءُ آئی ءَ را وئیل ءِ ھلاس کنگ ءُ زر ءُ بیھار داتگ اَنت کہ زھرشانی ءَ ھلاس بہ کن اِت ءُ گپ ءَ رپ ءَ دپہ بہ کن اِت –

وئیل ءِ پژدر ءَ سیاسی پاٹیانی نیمگ ءَ زھر ءِ درشان کنگ بیتگ ءُ چاگردی رسانکجاھاں جسٹس پور مراد امیر ءِ نام ءَ ھیش ٹیگ کارمرد بیتگ –

بلوچستان ءِ آجوئی لوٹوکیں سیاسی گل بلوچ نیشنل مومنٹ ءَ وتی شنگ کرتگیں بیان ءِ تہ ءَ گوشتگ کہ اے اولی رند نہ اِنت بلوچستان ءَ چوشیں وئیل درپیش بیگ ءَ اَنت –

آئی ءَ گوشتگ کہ پاکستانی پوج ءِ نیمگ ءَ بازیں زالبول، چک اے رستری ءِ آماچ اَنت کہ باز وئیل دیم ءَ نیتکگ اَنت کہ اشانی مستریں سوب مھلوک ترس ءُ لَج ءُ میار ءِ سوب ءَ وتی سر ءَ بیتگیں زوراکیاں پدر کرت نہ کن اَنت –

ھمے وڑ ءَ بلوچستان ءَ بندوکیں انسانی ھکانی پانکجنیں گل ایچ آر سی پی ءَ ٹوئٹر تندجاہ ءَ اے وئیل ایر جتگ ءُ گوشتگ کہ اے وئیل سک پدرناکیں وئیلے ءُ اشی ءِ کُتگکار ایف سی ءِ کارمند دزگیر کنگ ءُ مراد امیر ءَ انساپ دیگ بہ بیت –

وئیل ءَ پد چاگردی رسانکجاھاں ٹوئٹر کمیپئن بندات کنگ بیتگ ءُ اے وھد ءَ ٹوئٹر ءَ آئی ءِ انساپ ءِ واستا بلوچستان ءَ بندوکیں جتا جتائیں تکاں بندوکیں مردم زھر ءِ درشان ءَ کنگ ءَ اَنت –

ھمے وڑ ءَ ٹوئٹر تندجاہ ءَ گوستگیں سنیٹر فرحت اللہ بابر ءَ نبشتگ کرتگ کہ چاگردی رسانکجاھاں گوشتگ کہ تربت ءَ مراد امیر نامیں زھگے ءِ گون ءَ بدکاری ءِ ھال ترگ ءَ اِنت ءُ آ اے وھد ءَ ھسپتال ءَ تھتیگ اِنت ءُ سرکار ء کانودان اے وئیل ءِ سر ءَ تچکیں پَٹ ءُ پول بہ کن اَنت ءُ کھول انساپ دیگ بہ بیت –

ھمے رنگ ءَ بلوچ نیشنل مومنٹ ءِ رھشون ڈاکٹر نسیم بلوچ ءَ وتی ٹوئٹر تندجاہ ءَ گوشتگ کہ پاکستان ءِ زوراکی مرچی پدر اَنت بلے جھان ءِ انسانی ھکانی گل انگت ءَ وتی بے تواری ءَ گوں نشتگ اَنت ءُ اود ءَ کسان سالیں زھگ پاکستانی پوج ءِ دست ءَ رستری ءِ نشانگ کنگ بیگ ءَ اَنت –

ھمے وڑ ءَ بلوچ اسٹوڈنٹس ایکشن کمیٹی ءِ گوستگیں چیئرمین ڈاکٹر نواب بلوچ ءَ نبشتگ کرتگ: ما وتی میتگ ءِ تہ ءَ چوشین وئیل نہ دیستگ بلے ما ڈیرہ بگٹی، کوھلو، پنجگور ءُ تربت ءَ اے وئیل دیستگ اَنت کہ اود ءَ زالبول ءُ زھگانی ترسینگ ءُ آیانی گون ءَ بدکاری کنگ بیگ ءَ اِنت کہ اشاں درستاں پاکستانی پوج کنگ اِنت بلے اشانی جست گریوک نیست اِنت –

ھمے وڑ ءَ بلوچ اسٹوڈنٹس ایکشن کمیٹی ءِ سرکماش سبیحہ بلوچ ءَ ٹوئٹر ءَ ٹوئٹ کرتگ ءُ گوشتگ کہ اے وئیل انسانیت ءِ بگیری ءَ بلاھیں جرمے ءُ اے وڑیں وئیلاں ھواریں مجرم ترندیں سزا دیگ بہ بنت –

در بی بی نامیں چاگردی رسانک کارمرد کنوکے ءَ ٹوئٹر ءَ گوشتگ کہ وتی نام ءُ وتی رکینگ ءِ ھاتر ءَ کھول ءِ مردم زور دیگ بہ بنت –

آئی ءَ گوشتگ کہ اے درستانی دیم ءَ پدر اِنت کہ اے مئے زند ءِ جیڑہ اِنت اگاں مروچی ما بے توار بہ ایں گڑا ھمے رنگ ءَ ھیات بلوچ، رسول بکش ءُ مراد امیر ءِ رنگ ءَ اے وڑیں زوراکی گیش ودان کن اَنت –

زانگ بہ بیت بلوچستان ءِ تہ ءَ انسانی ھکانی گل ءُ راجداریں گلانی نیمگ ءَ بلوچستان ءِ تہ ءَ ایف سی ءَ ھوار دگہ سرکاری گلانی نیمگ ءَ انسانی ھکانی لگتمالی ءِ درانگازی ءَ کنگ ءَ اَنت –

راجداریں گلانی گوشگ اِنت کہ بلوچستان ءَ پاکستانی پوج ءُ چیریں ادارہ بلوچ مھلوک ءِ کُشت ءُ کوش، زورانسری آوار جنی ءُ آیانی گون ءَبدکاری کنگ ءِ بھتام ءَ جنگ ءَ اَنت –

بلوچستان ءِ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ دوسد ءُ نود روچ سرجم بوتگ – چہ کلات ءَ درمحمد بلوچ، محمد افضل، داد محمد ءُ دگہ مردماں بنجل ءَ تر ءُ تاب کرتگ ءُ بیگواھیں مردمانی کھولانی گون ءَ دلپدردی درشان اتگ – زورانسری آوار جنگ ءُ بیگواہ بوتگیں انسانی ھکانی باسک راشد حسین بلوچ ءِ مات ءَ بنجل ءَ اتکگ ءُ وتی زھرشانی نبشتہ کنائینتگ –

راشد حسین بلوچ ءِ مات ءِ گوشگ اَت کہ اسلام آباد ءَ زھرشانی ءَ پد پاکستان ءِ سر وزیر عمران خان ءَ بیگواھیں مردمانی کھولانی گون ءَ دچار کپتگ ءُ آئی ءَ گوشتگ کہ بیگواھیں مردمانی جیڑہ گیش گیوار کنگ بیت بلے دنیگت ءَ ھچ وڑیں گامگیج زورگ نہ بوتگ –

آئی ءِ گوشگ ات کہ منی چُک متحدہ عرب امارات ءَ چہ زورانسری آوار جنگ ءُ پاکستان ءَ آرگ بوتگ، گواہ بوگ ءَ ابید کمیشن ءُ آمیدگس ءَ پیشیانی میان ءَ من ءَ گوشگ بیت کہ راشد حسین پاکستان ءَ نہ انت بلے راشد حسین ھمے ملک ءِ جھمنند ات ھمے ھاتر ءَ پاکستان متحدہ عرب امارات ءَ چہ لوٹ بہ کنت کہ راشد حسین کجا انت –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ اَت کہ بلوچ پرزندانی زانگولیں جون، بمبگواری ءَ چہ ویران بوتگیں جاہ ءُ دوار گام گام ءِ سر ءَ زورگیر ءُ سامراجاں بلوچ سرڈگار ھون ریچ کرتگ چرے زانت ءُ سرپدی ءَ بلوچ راج وتی رکینگ ءِ ھاتر ءَ پرایمنیں جھد ءِ ھر وھد ءَ سھریں رو بوگ ءَ ساڑی انت –

آئی ءِ گوشگ ات کہ پاکستانی پوج بلوچ چکچینی وتی درسیں تاکت ء کارمرز کنگ ءَ انت – زالبول چُک، ورنا، پیریں ھچ کس نہ بچتگ کہ بلوچستان ءِ تہ ءَ بنگلہ دیش ءِ راجدپتر پچ کنگ بوگ ءَ انت –

ماما قدیر بلوچ ءِ گوشگ اَت کہ پاکستان ءِ اسٹبلشمنٹ، چیریں ادارہ، ڈیتھ اسکواڈ ءُ پاکستان ءِ رسانکدر شریں وڑے ءَ پرکار انت – بلوچاں کاپر گوشگ ءُ آھانی کشت ءُ کوش بوگ ءَ اِنت – اے زوراکیاں چہ کسانیں گونڈو ھم بکشگ بوگ ءَ نہ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ غلام قادر ءِ کوش ءِ زمّہ واری منّ اِتگ ءُ گوشتگ کہ گوستگیں شپ ءَ مئے سرمچاراں مشکے، جاؤ، واشک ءُ رخشان ءِ راستی ڈیتھ اسکواڈ ءِ سرکماش علی حیدر محمد حسنی ءِ دست ءِ راست میر غلام قادر محمد حسنی جھمنند پتک تیر باران کُتگ ءُ کُشتگ –

درشان ءِ تہ ءَ گوشگ بوتگ کہ اے ریاستی چاریگ واشک ءِ تہ ءَ ڈیتھ اسکواڈ ءِ سرکماش ءُ آئی ءِ کارمنداں واشک ءُ بازیں دمگ پتک، بسیمہ، راگے ءُ ناگ ءَ بلوچ پرزندانی آوار جنی ءُ شھیدی ءَھوار لس مھلوک ءِ گِسانی لٹ ءُ پُل ءَ اشانی بلاھیں کرد بوتگ – دمگی دُز ءُ ڈنگاں چہ سرکار ءِ نیمگ ءَ غلام قادر محمد حسنی ءِ آشرواد گون انت –

جارکش ءَگوشتگ کہ بازیں لشکر کشیاں ڈیتھ اسکواڈ ءِ سرکماش علی حیدر محمد حسنی ءِ اے دست راست زورگیریں پوج ءَ ھوار بوتگ ءُ وتی کارمند پیشگام کرتگ انت – اے ٹولی ءِ کارمنداں مساپر کشیں کوچ ءُ دمگی مھلوک ءِ مال مڈیانی لٹ ءُ پُل ھوار دگہ بازیں چاگردی سلکاریاں ھوار انت اے وڑیں مردم ھچ وڑ ءَ بکشگ نہ بنت –

گڈسر ءَ جارکش ءَ گوشتگ زر لالچ ءَ زورگیریں پوج ءُ ڈیتھ اسکواڈ ءِ ھمراھداری کنوک راھے راست ءَ بیا انت اگاں ناں گڑا بیمناکیں سزا دیگ بنت –

بلوچی زبان ءِ کوھیں کلات سید ھاشمی ءِ 95 بوتن ءِ روچ

ٹی بی پی ستاشانی

مروچی بلوچی زبان ءِ کوھیں کلات ءُ پہ بلوچی زبان ءَ جھد کنوکیں سر سید ھاشمی ءِ نود ءُ پنچمی بوتن ءِ روچ سرجم بیتگ-

مروچیگ ءَ نود ءُ پنچ سال پیسر 21اپریل 1926 ءَ ماں گنجیں گوادر ءَ مھمد شاہ ءِ گس ءَ چم پچ کنوکیں بلوچی زبان ءِ استال سید ھاشمی ءَ وتی چم پَچ کرتگ اَنت –

سید ھاشمی ءَ پہ بلوچی زبان ءَ بے کساسیں جھد کرتگ اَنت ءُ سید ھاشمی بلوچ لبزانک ءُ زبان ءِ تہ ءَ مزنیں ارزشت ءِ داریت کہ روچ ء مروچی بلوچی لبزانک سید ھاشمی ءِ رند پداں جنزان اِنت ءُ روان اِنت –

سید ھاشمی بلوچی زبان ءَ ابید فارسی، عربی، اردو ءِ تہ ءَ آئی ءَ لچہ پر بستگ ءُ بلے آئی ءَ پہ وتی زبان ءِ دیمروئی ءَ بلوچی زبان گچین کرتگ ءُ بلوچی زبان ءَ بازیں کتاب نبشتگ کرتگ اَنت –

سید ھاشمی ءِ تنی وھدی ھژدہ وانگی کتاب چاپ ءُ شنگ بیتگ اَنت ءُ تنی وھدی آئی ءِ بازیں وانگی پہ چاپگ ءَ ایر اَنت –

سید ھاشمی ءِ بوتن ءِ روچ ءَ بلوچ لبزانکارانی نیمگ ءَ چاگردی رسانکجاھاں آئی ءِ بوتن ءں روچ ءَ شاتمانی درانگاز کن اَنت –

اے روچ ءِ درگت ءَ ٹی بی پی بلوچی سید ھاشمی ءِ نود ءُ پنچمی روچ ءِ درگت ءَ آئی ءِ ستاشانی ءَ گوں اے شَیر ءَ پہ وانوکاں ندر کنت –

بیا ھمبل ءُ بیا ھمدل ءُ بیا ھم سر ءُ ھمکار
گالانی رزیناں پتو ، گلکار ءُ چکنکار

گال بنگش ءُ گال آسر انت بودشت ءِ بھار ءِ
گوں گالے پد ءَ مرتگیں ھر دھل کنت تیجار

بنگیج کناں نام ءَ ھما بنگش ءِ گال ءِ
ھمگرنچ انت ھمے ” گال” گوں بے دروریں گالار

دلگوش بکن ، گوش بدار ، بوان گوں نام ءَ
گوں نام ءَ جھاں پروریں ، مھران ءُ پھلکار

ساڑاھگ ھدا کرز ایت جھانانی (جھان)ءَ
رودینوک انت ، بے کچھیں بکشوک انت ءُ مھرار

مز روچ ءِ گھیں واجہ انت (بے جیڑہ ءُ تران)
تئ ھزمت ءَ دست بستگ، کمک ءِ تئی واستار

تچکیں رہ ءُ رھبند ءَ مۓ رھدربری ءَ کن
آیانی راہ ءَ کہ تئ مھر بوتگ انت گنج گوار

آیانی راہ ءَ اناں کہ زھر اش سر ءَ ساھیل
نے کہ راہ ءَ آیانی کہ وت گار انت ءُ گمسار

نی بوان گوں بے کچہ ءُ آریپیں زبانے
یا گوں دلے بوھیریں ءُ منوگریں گوشدار

سر بیتگیں ھالانی رد ءَ وفاقی وزیر دفاعی پیداوار زبیدہ جلال ءُ ایران ءِ وزیر روڈ ءُ شھید ترقی مھمد اسلامی ءَ مروچی کیچ ءَ ھواریں دمگ مند ءُ پشین ءِ سیمسری راہگوزی پچ کرتگ –

ھمے وھد ءَ سیمسرانی دوئینانی نیمگانی مزن واکدار جاڑیگ بیتگ اَنت ءُ ھمے درگت ءَ وفاقی وزیر زبیدہ جلال ءَ گوشتگ کہ اے سیمسر ءِ پچ کنگ دوئیں نیمگانی مردماں پہ وشی یے –

زبیدہ جلال ءَ گوشتگ کہ سیمسر ءِ پچ کنگ ءَ دوئیں نیمگاں جھمندیں مردمانی باپاری ءِ تہ ءَ نپ بیت اِنت –

ھمے وڑ ءَ بیست دسمبر ءَ دوزھزار ءُ بیست ءُ زبیدہ جلال ءَ گبد ریمدان ءِ سیمسر پچ کرتگ اَت کہ اود ءَ لس مردمانی راھگوزی بیتگ –

زانگ بہ بیت گوستگیں بازیں روچاں تربت ءُ پنجگور ءَ باپاری مردمانی نیمگ ءَ سیمسر ءِ بندش ءِ ھلاپ ءَ زھرشانی ءُ دگانی سر ءَ نندانک بیتگ اَنت –

گوستگیں روچاں بارڈر ٹریڈ ایسوسی ایشن ءِ رھشوناں گوشتگ اَت کہ زمران ءَ ھوار بازیں جاھاں سیمسر بند اَنت ءُ اود ءَ تنی وھدی چار ڈرائیورانی بیرانی تن ءُ شدانی سبب ءَ پیش اتکگ اَنت –

بارڈر ٹریڈ ایسوسی ایشن ءِ گوشگ اِنت کہ اے سیمسراں ھما مردم گوست کن اَنت کہ آ بس واجھانی مردم اَنت لس مردمانی واستا بارڈر بند اِنت ءُ لس گریب ءُ نیزگار ھمود ءَ تن ءَ مرگ ءَ اَنت –

ھمے رنگ ءَ بیست ءُ پنچ اپریل ءَ نیشنل پاٹی ءَ بارڈر ءِ بند بیگ ءِ ھلاپ ءَ زھرشانیانی جار جتگ اَنت ءُ بارڈر ٹریڈ ایسوسی ایشن ءِ گوشگ اِنت باید بارڈر لس مردمانی واستا پچ کنگ بہ بیت دانکہ بلوچستان ءَ ھواریں نیزگار وتی لاپ ءَ وارت بہ کن اَنت –

نبشتانک: نمیرانیں استاد سگارِ بلوچ شھید بلّا مری ءِ جھد

نبشتہ کار :عبدالواجد بلوچ

دی بلوچستان پوسٹ

انسانی راجدپتر گواہ انت کہ اے دنیائے تہا وھدے زند زاھری دنت گڑا اے زانگ بیت کہ ساہ برجم انت تنیگت، بلے انساناں کدی اے پگر نکتگ کہ اے زندگ بوھگے سوب ءُ وسیلہ چونین انت؟ برے برے سما بیت اے جھان ءِ ابدمانی کسّہ سک دراج انت ءُ اے ابدمانی ءِ اندرا ھما ھون ھوار انت کہ ھمک ساھت زندے گیمرتگیں درچک ءَ گوں ھوناں آپ دئیگ ءَ انت دنیائے تہا اے دود انگت است کہ زور آوریں تاگتاں ھر وھدا نزور ءُ نادست رسیں راجانی لگتمال کنگ ءَ نوکیں نوکیں پندل ساز اتگ، ھمے رنگ ءَ اے خطہ ءِ تہ ءَ بلوچ ھما راج انت کہ روچ ء مرچیگ ءَ لگتمال انت پمشکا کہ ھُدا ءَ بلوچ ءَ یک سیریں کدرتی مڈّیاں چہ پُرّیں زمین ءِ بکشاتگ پرتگیز بہ بنت یا کہ انگریز یا ھما تاکت کہ انگریزانی گلام انت آ گلام پاکستان ءِ رنگ ءَ مرچی بلوچ ءِ سرڈگار سر ءَ قابض انت ۔

اے قبضہ گیریت ءِ ھلاپ ءَ بلوچ اولی روچ ءَ بگر دانکہ مرچی مزاحمت کنگ انت جنگ دئیگ انت ۔ بلوچے راجدپتر اے گواہی ءَ دنت کہ بلوچستان ءِ ھکّگیں فرزنداں اے سرڈگارے رکھینگ ءَ پہ ھر رنگیں دیمونی داتگ، پرتگیزانی ھلاپ ءَ ھمّل جیھندے تمردی بہ بیت یا کہ گوکپروش ءَ بلوچ خان نوشیروانی ءِ شیر مردی ھمے رنگ ءَ خان کلات میر محراب خان ءِ جنگے میان ءَ گوں انگریز ءَ ھما گپ کہ “من اگاں جنگ کت نکناں بلے پہ وتی سرڈگار ءَ مُرت کناں ” جنگانی اے کسّہ افسانہ یا میتھالوجی رِد ءَ جوڑ کتگیں وت گڑیں کسّہ نہ انت بلکیں اے بامرداں راجدپترے تہا وتی سرڈگار ءَ پہ وتی ھون ریتکگ انت ءُ اے زمین ءِ پھازگے جھد کتگ.

ڈیفنس آف کاہان ءَ 1840 ءَ مری بلوچانی انگریز ہلاپ ءَ چھاپہ مار جنگ گوں نوکیں دابی ءَ راجدپتر تہا انگت نمیران انت بلوچ ءِ کلیں زند گوں زور آوراں جنگ دئیگ ءُ مزاحمت کنگ ءَ گوزگ انت بلے اے راج ءَ تنیگا دم نبرتگ اے مزاحمت ءِ درچ انگت برجاہ انت بیست ءُ یکمی کرن ءَ بلوچ ءَ وتی نگرھیں سر پہ اے گلامی ءُ قبضہ گیریت ءِ ھلاپ ءَ کربان کتگ انت. ھمے مزاحمت ءِ پڑ ءَ یک شانزدہ سالی ایں ورنائے وھدے پاکستان ءِ ھلاپ ءَ مری بلوچانی اولی مزاحمت ءَ ھوار بیت گڑا آ ورنائے کمٹمنٹ تمردی ءُ یک کاملیں گوریلائے بوھگے گواہی ءَ آئی کلیں کردار دنت ھو آ ورنا بلّا مری اُرپ جلال بلوچ بیت-

مرچیگیں وھدا بلوچ راجی جُنزے تہا ودی بوتگیں بُرز ءُ جھلی، پروشت ءُ پروشی، گروہی سیاست ءُ ادارھانی تقدس ءِ پادمالی ءَ پد بازیں مھلوکے چہ اے جُنزا گستا بوتگ بازینے لگور بوتگ بلے شھید بلّا مری پہ اے جنزا ھما سگار ات کہ وھدے دژمن ءِ سرا حملہ آور بوت گڑا گرندے پئیما دژمن ءَ سرین پروش کنگ آئی حکمت بوتگ. کسے اگاں یکشلہ پنجاہ سال اے مزاحمت ءِ ھمراہ بوھگ ءُ ھچ دم نہ برگ ءُ یک خالصیں گوریلائے اگاں شوہاز کنگ لوٹیت گڑا باھید انت شھید بلّا مری ءَ بوانیت. کمٹمنٹ ءُ نظریاتی جنگے مطالعہ کنگے وھدا بلوچ سرڈگارے سرا اگاں کسے تھیسس نبشتہ کنگ لوٹ ایت گڑا آ الم بامردانی یک لڑے وھدے جوڑ کنت گڑا اے لڑے تہا بلّا مری ءِ تمردی ءِ کسہ الم نبشتہ بیت. پانزده سال یکشلہ وتی کہول ءَ چہ دور بوھگ ءُ فقط اے مزاحمت ءِ دیم ءَ برگ ءَ پہ وتی انرجیاں دیوکیں سر بلّا مری ات-

بلے بژن سد بژن کہ بلّا مری ءِ گڈی واہش “کہ ھلاس نبوھوکیں جنگے تہا گوں دژمن ءَ دیم پہ دیم آس گواری کنان ءَ چوں کماشیں سدّو مری ءَ تیراں وتی دلبند ءَ پیوست بوھگ ءَ بگنداں سرجم نہ بوت، بلکیں بلّا مری ءِ دلبندا ھما تیر پیوست بوت کہ آ تیر درامدے نہ ات بلکیں وتیگے ات -شھید بلّا مری سگارِ بلوچ اے دیمونی بلوچ راجدپتر ءَ گوں سُھریں ھرپاں نبشتہ کنگ بنت ءُ الم ھما تیر کہ درامدے نبوتگ آ ھم پاشک بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: کرونا ویروس ءُ جاندْراھی ءِ بستار

نبشتہ کار: ابدلستار بُگٹی

دی بلوچستان پوسٹ

جاندْراھی ھُدا ءِ داتگیں مستریں داد اِنت بلکیں تو ھمے سرپد بَہ ئے کہ ماں پْراھگ ءَ چَہ ھُدا ءِ دْرستیں داداں مستریں داد ھمے یکیں جاندْراھی اِنت چی ءَ کہ بنی آدم گوں یک انچیں چاگِردے بندوک انت کہ ماں اِے چاگِرد ءَ لس مھوک اِے ٹُنڈا، لَنگ، کَر، کور ءُ دگہ نیم جانیں مردماں ھچ شرپ نہ دنت۔ مرچیگیں کار ءُ باری دنیا ءَ توری ھچ ھر وڑیں گلے بہ بیت نیم جاناں وتی گلاں کار ءُ باسکی نئیل اَنت۔ یک نیم جانے ءَ ماں گِس ءَ ھم ھچ کدر ءُ بستار نیست انت! ءُ اِے چیزاں ما دْراہ جْوان سرپد ایں پمیشکا ما گْوش ایں جاندْراھی ھُدا ءِ مستریں داد اِنت۔

برے برے مئے ھاشے درد کنت، پاد ءُ دست ءَ چیزے لگ ایت، کلگ ءُ تپ، کوکارگ یا برے برے لاپ دردی نادْراہ بہ ایں گُڑا ما ھما وھد ءَ وتی جاندْراھی ءِ بارہ سک پریشان بَہ این ءُ ھمے پھم ایں کہ اگاں جان ھست گُڑا زِند ھست بے جان ءَ زِند ھم بے لِزت بیت۔

اگاں تئی جان سرجمی ءَ دْراہ انت ءُ تو نیم جان نہ ئے بزاں تو وش بھتے ئے ءُ جاندْراھی ءِ بستار ءَ ھما مردم جْوان زانت وھدے کہ آ نیم جان بوتگ۔ اگاں ترا جان ھست گُڑا تو پہ وتی لاپ ءِ شوھاز ءَ کارے کُت کن ئے، وتی ھلک، چُک ءُ نماسگانی کُمک بہ ئے۔ اگاں تو نیم جان بَہ ئے گُڑا تئی زِند ھم بیران اِنت ءُ تو پہ ھلک ءِ مردماں ھچ بستارے نہ دار ئے پمیشکا باید اِنت انسان وتی جان ءِ ھیال ءَ بہ کنت ءُ وت ءَ ناں کہ تھنا نادْراھیاں بہ پھریز ایت بلکیں وت ءَ چَہ دگ ءِ ویلاں رکین ایت، مردم موٹل ءُ پرپٹاں ھم تْرُند رشتی ءَ مہ جُنز ایت۔

چوناھیگا مرچیگیں دیمروئی کُتگیں زمانگ ءَ بنی آدم ءَ پہ وتی جان ءِ پھریز ءَ سک باز جُھد ءُ دلگوش کنگ لوٹ ایت چی ءَ کہ مرچاں کارگساں وڑ وڑیں مشین کارمرز بوگ ءَ اَنت۔ دو پادیں پَرپٹ ءُ دگ چہ کسان ءُ مزنیں موٹلاں پُر اَنت۔ گساں لائین ءُ گیس ءِ ویل ھم کس باز بیگ ءَ اَنت گُڑا لیب ءُ گْوازی ءِ وھد ءَ ھم مردم ءَ ویل ءِ آماچ بوگ ءِ گُمان ھست۔

البت اِے دْراہ انچیں ویل ءُ اندوہ اَنت کہ ھر بنی آدم ءَ نادْراہ وَ نہ کن اَنت ءُ ناں کہ ترا تکانسری دے اَنت چے ءَ کہ کارگسی مشین، موٹل، گیس ءُ لائین اِے دْراہ تئی اِمرُوز بُنکی آسراتی ءَ اَنت کہ تئی زِند ءَ آسودگ کنگ ءَ اَنت ءُ بے ھمے آسراتیاں تو وش ءُ آسودگیں زِندے گْوازینت نہ کن ئے بزاں بے اِے آسراتیاں تو وش نہ بہ ئے۔

بلے ما گِندگ ءَ ایں کہ بنی آدم ءِ مستریں بیرانی وڑ وڑیں نادْراھی اَنت انچوشکہ شوگر، بلڈ پریشر، ھپاٹیٹاس ءُ دگہ باز اَنت کہ لاپ ءِ بے پھریزی ءَ بنی آدم ءِ اندام ءَ گور جن اَنت۔ چوناھا اِے وڑیں نادْراھی یک بنی آدمے ءَ نادْراہ کن اَنت بلے کرونا ویروس ءِ نادْراھی تئی سرجمیں دمک ءُ سْیاداں نادْراہ کنت۔ بزاں اِے نادْراھی یک وبایے، پیڑینوکیں نادْراھی کہ چہ یک مردم ءَ لڈّ ءُ بوج کنان ءَ دومی ءَ گور جنت چریشی ءَ یک ھپتگ ءِ تہ ءَ سرجمیں لوگ ءِ مردماں نادْراہ بنت، تچک بزان کہ ھچ کس ءِ نئیل ایت۔ اِے کرونا ویروس ھر سال ءَ وتی رنگ ءُ دْرشماں بدل کنان اِنت۔ اِے رنگ مٹّی ءَ میڈیکل سائنس ءَ موٹینٹ ءُ آسانیں انگریزی ویرینٹ گْوش اَنت کہ ویروس وتی گُداں مٹّائین ایت۔ مرچی سرجمیں جھان کرونا ویروس ءِ سیمی ویرینٹ ءِ چَول ءَ گور جتگ ءُ ایشی ءِ ھر چول ءُ ویرینٹ چہ گْوستگیں چول ءَ تْرُند ءُ پیڑینوک اِنت اِے نادْراھی بنی آدم ءِ اندام ءَ پْروش دیان ءَ بنی آدم ءِ سیت ءَ کشگ ءَ اِنت۔ جھان ءِ جان سلامتی گل ڈبلیو ایچ او ءِ رِد ءَ کرونا ویروس ءَ بنی آدم ءِ میانجی ئیں سال ءِ پنچ سال کم کُتگ۔ بزاں اگاں یک مردمے ءَ 85 سال ءَ مرگیگ اِنت گُڑا نی ھما مردم 80 سال ءِ اُمر ءَ مِر ایت۔ چی ءَ کہ اگاں ویروس ءِ ہنچمی ءُ ششمی ویرینٹ آتک گُڑاھمایاں کہ ٹُکا جتگ ھمایاں ھم کرونا ویروس پد ءَ نادْراہ کنت۔

چوناھیگا ما بلوچ یک بزگیں راجے ایں پمیشکا مئے دمگاں ناں شَریں نادْراجایے ھست ءُ نَیکہ سرکاری جان سلامتی بُنجاھے ءُ ناں کہ مارا زَر ءُ آسودگی یے ھست کہ اِے نادْراھی یے الاجاں بہ سگ ایں گُڑا باید اِنت ما وت چَہ اِے سِلیں نادْراھی ءَ بہ رکین ایں کہ جاندْراھی ھُدا ءِ داتگیں داد اِنت پمیشکا ما وتی زِند ءَ وشتب بہ دار ایں۔ میان اُستمانی جاندْراھی گل ڈبلیو ایچ او گْوش ایت کہ وتی لوگاں بہ نِند اِت ءُ نادْراھی ءَ سرپد بِہ بَہ اِت۔ مئے بلوچ راج ءِ مستریں مردم ءُ نبشتہ کارانی اے راجی زمہ واری انت کہ ما راج ءِ تہ ءَ کرونا ویروس ءِ بابت ءَ آگاھی بیار این ءُ ویروس ءِ زاھرییاں بِہ گوش ایں۔ اے نادراھی ءِ لھتیں زاھری ایش اِنت۔

• تپ • دَمبُرگ ءُ ژندی • ھُشکیں کُلگ ایندگہ زاھری ایش انت ئِے• ساہ کَشگ ءِ ژندی • دَرد ءُ تورشت • گُٹّ دَوری • باز کمیں مردم لاپ ریچ، پَشّانک یا لِمپُشک ءِ ھال دے اَنت۔

ھما مردماں کہ کمیں زاھری ھست بلے انگت جاندْراہ ءُ ڈڈ اَنت، آ وتی لوگاں ایوکی ءَ بِہ نِند اَنت ءُ وتی ڈاکٹر ءَ ھال ءُ اھوال بہ کن اَنت ھما مردماں کہ کلگ ءُ تپ یا ساہ ءِ کَشگ ءَ ژندی بوگ اِنت گُڑا زیت وتی ڈاکٹراں برو اَنت ءُ وتی پھریز ءَ بِہ کن اَنت دلگوش بہ بہ اِت کہ اے نادْراھی ماں پنچ پیم ءَ پِڑگ ءَ اوشت ایت-

1- ھر ساھت ءَ ما وتی دستاں گوں سابون ءَ بہ شود ایں2- وتی دیم ءَ دست مہ جن ایں، ھاسکن چَمّ، پونز ءُ دپ ءَ چی ءَ کہ ساہ ءِ ٹُنگ چہ ھمد ءَ راہ اَنت۔ 3- وتی دپ ءَ دپوک بِہ جن ایں، چِشَگ ءُ کُلگ ءِ وھد ءَ ما وتی باسک ءَ دپ ءِ دیمپان بِہ دے ایں کہ لِمپ ءِ تْرینزُّک شِنگ ءُ شانگ مہ بنت۔

4- ما چہ مردماں کساس یک میڑ ءِ شملگ بہ ایں، کُلگ ءُ چِشَگ ءِ نادْراھیں مردماں دِیر بِہ بَہ ایں 5- نِند ءُ نیاد مہ کن این ءُ بے سیتیں سپراں ھم مہ رو ایں بلکیں وتی لوگاں بِہ نِند ایں۔

بلوچ راج ءَ دزبندی انت کہ وت ءَ را چَہ اے کرونا ءِ نادْراھی ءَ پھریز انت کہ اے نادْراھی تیوگیں ھمساھِگ ءُ سْیاداں بلکیں سرجمیں راج ءَ ھم بے کساس تاوان دنت۔

ھُدا شُمارا ءُ تیوگیں بلوچ راج ءِ بزگیں لس مھلوک ءَ مُدام ٹوھیں نادْراھی ءَ رکین ایت شالا مُدام جاندْراہ ءُ سلامت بات اِت شالا انچوش بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: سید ھاشمی ءِ جھد پہ زبان ءَ

نبشتہ کار: معراج لعل

دی بلوچستان پوسٹ

راجانی راجدپتراں پدر اِنت کہ ھما راج دنیا ءِ تہ ءَ زندگ ءُ مّنگ بنت کہ آواناں زبان ھست ابید ء زبان ءَ ھچ راج ءِ پجار کنگ ءُ شُناسگ نہ بیت زانتکار گُش اَنت کہ اگاں ترا یک راجے پُروش دیگی اِنت گُڑا آئی ءِ زبان ءِ سر ءَ اُرش بہ کن آ وت ھلاس ءُ نیست ءُ نابود بیت اِنت چریشی ءَ ھمے پدر بیت کہ زبان یک راجے ءِ تہ ءَ مزنیں بستارے دار ایت۔

21 اپریل پہ بلوچ راج ءَ یک گران بھائیں ءُ شادکامیں روچے ءَ چہ کمتر لیکگ نہ بیت اے ھما روچ اِنت کہ واجہ سیدزھور شاہ ھاشمی ءَ وتی مبارکیں چم ماں بلوچستان ءِ تہ ءَ پچ کُت اَنت واجہ سر زاہر ءَ وَ یکے بوتگ بلے واجہ ءِ کُرتگیں کار ءُ کسب پہ بلوچ راج ءُ بلوچی زبان ءَ بے کساس اَنت کہ من ستر زور بہ جناں تاکانی تاکاں پُر بہ کناں یا من وتی سرجمیں اُمر ءَ بہ ننداں واجہ ءِ جُھدانی بارو ءَ بہ نویساں منی ھیال ءَ انگت ءَ سرجم نہ بنت چیا کہ واجہ ءِ جند یک جُھد ئِے نام اِنت ءُ آئی ءِ کُرتگیں کار ءُ کسب وتی جاگاہ ءَ واجہ سید زھور شاہ ھاشمی وھدے کہ نند ایت ءُ جیڑ ایت تاں ھمے مار ایت کہ منی زبان لگت مال کنگ بوگ ءَ اِنت منی زبان دری زبانانی تہ ءَ چیر ترگ ءَ اِنت اگاں من چیزے مہ کن آں بوت کنت کہ آوکیں وھداں منی زبان ءِ ھمرائی ءَ منی راج ءِ پد ءُ نشان ھم زاہر مہ بنت پہ زبان ءُ راج دوستی ءِ سبب ءَ واجہ ءَ روچ ءُ شپ یک کُت اَنت سکی ءُ سوری نہ چار ات اَنت بس جُہد کنگ ءَ لگ اِت بلے لہتیں سیاسی ءُ مذھبی گل ھست اَت کہ آ گوں واجہ ءَ تپاک نہ بوت اَنت ءُ آیاں واجہ ءِ جُھد ءَ را یک پلینڈی ءُ دو بُری رنگے دات بلے واجہ سید ءَ آواناں چو اے وڑ ءَ پسو دات کہ ”نہ بوتگ مادنیں راھاں کسے گار ، نہ ترّاں ھرکس ءَ پھک ءَ جواب اِنت“ واجہ سید ھاشمی ءَ ایوک ءُ تھنا ءَ وتی جُھد برجم داشت ءُ بیست ءُ چار ساھتاں نشت ءُ پہ بلوچی زبان ءَ کار کُت۔

چریشاں ابید واجہ ءَ سرجمیں بلوچستان ءِ ھمک کنڈ ءُ دمگاں سپر کُت ءُ لبز چِت ءُ یکجاہ کُت ءُ اشاناں یک لبز بلدے ءِ نام (سید گنج) دات اَنچو گُش اَنت کہ واجہ ءَ را یک سِلیں نادُرھی یے گون بوتگ کہ آئی ءَ انگریزی ءِ تہ ءَ ٹی بی گُش اَنت بلے واجہ ءَ وتی ساہ ءُ جان ءِ پکر نہ کُت ءُ وتی الاج نہ کُت پرچاکہ آئی ءَ ھمے پھمت کہ من ءَ ڈاکٹر پہ الاج ءِ واستا نادُراہ جاہ ءَ تھتیگ کن اَنت ءُ من پہ وتی شھدیں بلوچی ءَ گیش کار کُت نہ کن آں پمشکا واجہ ءَ وتی الاج نہ کُت ءُ دُراھیں زر ءُ دولت پہ وتی مادری زبان ءِ سر ءَ کرچ کُت اَنت چُش کہ من پیسر ءَ گُشتگ اَت کہ منی وس ءُ واک اِنچو نہ اِنت کہ من واجہ سید زھورشاہ ھاشمی ءِ کُرتگیں جھداں گوں وتی چندے لبزاں بیان بہ کن آں گُڈ سر ءَ ھمے گُشگ لوٹ آں تاں بلوچ اھست اِنت واجہ تو نمیران اِنت ءُ شالا بلوچی سبز بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔