نبشتانک: شھید مولابکش دشتی لھتے یات ءُ ترانگ
نبشتہ کار: انور اسلم
دی بلوچستان پوسٹ
سد بران دل ءَ لوٹ اتگ کہ دو دانک پہ واجہ مولابخش ءَ نبشتہ بہ کن آں بگندے دل ءِ گرانیں بار کم بہ بنت دگہ دزگٹی ھم نہ بوتگ وھد ءُ موہ هم رس اتگ بلے یکیں ھبر ءَ من مدامی وت ءَ را سک میاریگ کتگ کہ پرچا من چار لبز پہ واجہ مولابخش ءَ مہ نبیساں، واجہ مولابخش منی یک روچگیں ھمراھے نہ ات من وتی نودربری ءِ ھفت ءُ ھشت سال کُبلیں گوں آئی ءَ نزیک ءَ گوازینتگ ات،سداں مجلس ، سداں گپ ءُ ھبر ،سھب ءُ بیگھانی نند ءُ نیاد هر ڈولیں گپ ءُ تران! نزاناں بن گپ ءَ چہ کجا بندات بکناں ءُ آئی ءِ بابت ءَ چے نبشتہ بکناں ھپت ءُ ھشت سال ءِ ھمرائی پت ءُ چکی، استاد ءُ شاگردی ءِ هزاراں ترانگ سداں سوج ءُ پنت،سداں مسکرا،بلے نوں آئی ءِ داتگیں مھر، سوج ءُ پنت ،یات ءُ ترانگ منی زند ءِ مجتی همراه انت –
من اگاں مرچی وت ءَ بے پولنگیں ورنایے زاناں یا وتی باتن ءَ پولنگی نہ گنداں, دیوان ءُ مجلسے ءَ دو گپ ءُ ھبر کت کناں گڑا واجہ مولابخش ءِ هما یات داتگیں سبقاں پرچا کہ آئی ءَ مارا مدام دلبڈی دات آئی ءَ مارا مدام نسیھت کتگ ءُ گشتگ کہ شما ورنا وانندہ سیاست کن ئے گڑا شمئے واستا کتاب ءِ وانگ المی ایں،دانکہ شما وتی سرزمین ءِ وتی راج ءِ ءُ میان استمانی تاریخ ءَ سرپد بہ بَے سیاست ءِ بنکی چیز وانگ انت، راجانی ءُ وطن ءِ تاریخ ءِ سر پد بوگ انت،سیاست ءِ توک ءَ جھل ءُ برزی هر روچیگیں کارانت بلے سیاسی راھبر ءِ یا سیاسی نودربر ءِ زمہ واری بیت کہ آ وت ءَ، وتی جماعت ءَ وتی پکر ءُ نظریہ ءَ چوں بدار اِیت ؟ بازیں وھداں بازیں ھالاتاں مان گیشگ وتی سیاسی نظریہ ءِ رکینگ وتی نظریہ ءِ برجم دارگ ھم سیاسی راھبر ءُ سیاسی نودربرانی سوبمندی بیت۔
من گوں واجہ مولابخش ءَ سک نزیک بوتگ اوں، من اگاں دو روچ ءَ کیچ ءَ نہ شتگاں گڑا مگربانی وھد ءَ من ءَ الم فون ئِے کتگ منی ھال ئِے گپتگ کہ انور تو دو روچ انت گندگ بوگ ءَ نہ ئے، کیچ ءَ نیاتگ ئے چے تئی دزگٹی بوتگاں؟ آئی ءِ وتی مزنی ات آئی ءِ وتی مهر ءُ مھبت اتاں پہ من ءَ چوشیں گپ ءُ مھر باز اَنت کسانیں مدتے ءِ ھمرائی یے نه ات مئیگ ءُ آئی ءِ واجہ مولابخش ءِ ھرمجلس ءُ دیوان ھر گپ ءُ مھر ھر روچ منی چمانی دیم ءَ انت،آئی ءِ علم سیاست ءُ جاورانی سر ءَ تاریخ ءِ سرءَ بے کچ ءُ کساس ات مدام میان استمانی سیاست ءُ جاورانی سر ءَ آئی ءَ تجزیہ کت، آئی ءَ وتی زند ءَ استمانی ءُ میان اُستمانی ءُ بلوچستان ءِ سیاست ءُ جاورانی سر ءَ ھرچ ڈولیں تجزیہ کہ کت ئِے ھما وڑ بوت ھما وڑ ما دیست پرچا کہ آئی کر ءَ علم ھست ات تجربہ ھست ات بلوچستاں ءُ ملک ءِ جاور ءُ سیاست ءِ سر ءَ مدام گپ ءُ تران کت گشت ئِے من زندگ باں یا نہ باں بلے من ءَ بلوچستان ءِ جاور سک نا گیگ گندگ ءَ پیداک انت۔
اے جاوراں بلوچستان ءَمزنیں تاوانے بیت اد ءِ سیاست ءُ اد ءِ معشیت،تعلیم ءُ روزگار ،آؤکیں پدریچ ءَ پپ باز نا گیگ انت ,امن وتی زند ءَ یک روچے نا امیتی ءَ نہ دیست بلکیں یک روچے آئی ءِ دپ ءَ چوشیں گپ هم در نیتک کہ آئی ءِ پکر ءِ ھمراہ چہ آئی ءِ گپاں نا امیت بہ بنت، واجہ مولابخش ءِ توک ءَ سبر ءُ برداشت سک باز ات بلکیں ھمے سبر ءُ برداشت ءَ ھم نامے درآؤرتگ ات ئِے ،آئی ءَ ھرچ کار ے کہ کت گوں سنگتانی شور ءُ سلا ءَ کت ئِے تنظیمی ماملاتانی توک ءَ آئی ءَ کستری ءُ مستری پرک بِھ نہ داشت آئی ءِ دل ءَ درستانی مانا یک ات واجہ مولابخش ءِ بازیں شریاں چہ دگہ یک شری یے ایش ات کہ سنگتاں کار ءِ گرگ ءُ جلسه جلوساں کامیاب کنگ ءِ یک مزنیں تجربھے ات من ءَ اگاں یاد بہ بیت 28اکتوبر2009 ءَمیر غوث بخش ءِ یات ءَ نیشنل پارٹی ءُ بی ایس او پجار ءِ نیمگ ءَ یک مزنیں ءُ تاریخی جلسھے ٹاون کميٹی تربت ءِ چاردیواری ءِ توک ءَ برجم دارگ بوت ھمے جلسه ءَ بی ایس او پجار ءِ مرکزی کابینه ءِ حلف برداری ھم بوت حلیم بلوچ چیئرمیں جوڑ بوتگ ات من ھم ھمے کابینه ءِ اگدہ دار اتاں گوں گڑا جلسه که ھلاس بوت مھلوک گیشتر شتگ اتاں پارٹی ءِ ءُ ما بی ایس او ءِ لھتے سنگت جلسه ءِ سر ءِ تگرد ءُ اسٹیج ءِ سامان چست کنگ ءَ اتاں من ءَ توارئِے کت که منی واستا یکے ءِ کر ءَ سگریٹے پچ گر من چه سنگتے ءِ کر ءَ سگریٹے پچ گپت ءُ آئی ءَ دات من ءَ گشت ئِے باز دیراں پد ما کیچ ءَ تاریخی جلسھے کت ءُ مرچی اے جلسه ءِ کامیابی ءَ شمئے بی ایس او ءِ سنگتانی ءُ پارٹی ءِ سنگتانی مزنیں جھد ءُ کوشستے بوتگ ءُ شما سنگتاں سک کار کتگ ،جلسه ءِ انتظام ڈسپلن ءُ کامیابی ءَ کمیٹی سربراہ جان محمد بلیدی، ملا برکت ءُ پارٹی ءِ ایندگہ سنگتاں شمارا بی ایس او ءِ سنگتاں من مبارک باد دے آں آئی ءَ ھر وھد ءَ مارا سنگتاں دلبڈی داتگ ءُ مئے راھدربری یے کتگ۔
مولابخش ءَ وتی تیوگیں زند پہ بے تما ءُ بے لالچ ءَ گوازینت ، آئی ءَ اگاں تما ءُ لالچ بداشتیں گڑا آئی ءَ پارٹی بازیں مدتاں سرکار ءَ بوتگ آئی جند ھم کیچ ءِ ناظم بوت ءُفنڈ ءُ اسکیم ءُ دراھیں واک ءُ اختیارانی واھند ات بلے پہ ھشکیں دست ءَ پہ وش نامی ءُ ازت وتی اقتدار ءِ وھدے سرجم کت یک روچے یکے ءَ پہ آئی ءَ لنکک چست نہ کت کہ توئے مولابخش ءَ وتی اقتدار ءِ وھداں اے ردی کتگ یا چوشیں کارے کتگ کہ اد ءِ مھلوک ءَ نکس ءُ تاوانے بہ رس ایت، آئی ءِ چم وتی عوام وتی سنگتانی ءُ مھلوک ءِ دیم برزات انت چی ءَ کہ آ تچک ءُ ساپیں رھبرے ات لیڈرے ات ایماندار ءُ مخلصیں سیاست داں ءُ جھد کار ات، مولابخش مدام تچک ءُ ساپیں سیاست ءِ جهد ءَ ات مدام بلوچ ءُ بلوچستان ءِ بزگیں عوام ءِ وش ھالی ءِ جھدے کت گپ ئِے جت آئی ءِ زند ءِ مستریں جھد ات کہ دگنیا ءِ ھرچ کجاہ کہ نندوکیں بلوچ ءَرا اے ھالاتاں یک نمائندہ جماعتے زرورت اِنت ءُ نیشنل پارٹی اے ھورکیں کنڈ ءَ پر کت کنت زوتاں یا دیراں ! من ءُ واجہ مولابخش کہ مدام پارٹی افس ءِ آخری دوئیں مردم بوتگ آں داں 3:30ءَ نشتگیں دو پہ دو ءَ گپ ءُ تران کتگ برے سواری یے گون بوت ءُ برے ما پارٹی افس بند کتگ ءُ ساھگے ءَ اوشتاتگیں سائیکل یا گاڑی یے اتکگ ما دست داتگ واجہ ئِے لوگ ء برتگ گوں بلے بے منی ءَ آئی ءَ ایوک ءَلوگ ءِ روگ سک تور اِتگ کہ انور اے گرم ءَ شدیکیں لاپ ءَ بے سبارگ ءَ تو کجا روئے! پرچا میار کن ئے ! بلے من آتسلا داتگ برے گشتگ کہ منی گاڑیانی روگ ءِ وھد انت برے من گشتگ کہ واجہ من گرم ءُ سبارگ ءَ مشکور ءِ لوگ ءَ رواں ،من اگاں بے ھیال نیاں 16 جون ات من ءُ واجہ ایوک ء پارٹی ءِ دپتر ءَ نشتگ اتاں سنگت وتی وھد ءُ پاسانی ھساب ءَ پاداتکگ ات ءُ شتگ اتاں ھر کس وتی وتی گساں۔
من ءَ گش ایت من وتی زند ءَ یک مورے نہ کشتگ’ پر امنیں جد ءُ جھد پر امنیں سیاست رزلٹ دنت، من ءَ گش ایت کہ من 18جون ء روگ ءَ اوں کراچی ءَ پد ءَ چہ ھما دیم ءَ کوئٹہ رواں26 جون ءَ پارٹی ءِ سنٹرل کمیٹی انت اے وھد ءَ من بی ایس او ءِ قائم مقام سیکریٹری جنرل اتاں من ءَ گشت ئِے تو ءُ چیئرمیں حلیم کدی روگ ءَ ات بی ایس او ءِ سنٹرل کمیٹی ءَ پد ءَ شما بیا ات کوئٹہ ءَ پارٹی ءِ سنٹرل کمیٹی ءَ بھر بزور اِت گپ ءُ سیاست ءِ سیک اے من گو شر واجہ ما زور پارٹی ءِ سنٹرل کمیٹی ء شرکت کناں ،ھمے روچ ءِ 3 بج ءَ رند ما دوئیناں دپتر بند کت من گشت واجہ تئی گاڑی کج انت گشت ئِے ھپتگے بیت منی گاڑی ءَ ٹیل مان نیست, اے گپ نہ منی واستا نوک ات نہ واجہ ءِ جند ءِ واستا چی ءَ کہ آئی ءَ نہ زر ءُ مال ھست ات نہ دگہ کاروبارے’من گشت سک گرم انت گڑا رویں چئیرمین حلیم وتی برات ءِ دکان ءَ بیت آوانی کر ءَ سواری بیت ترا لوگ ءَ سر کن انت گشت ئِے ساھگے ءَ اوشتاں سائیکلے یا گاڑی یے کیت من ءَ سر کنت لوگ ءَ اگاں سواری یے نیاتک رند ءَ چیئرمین حلیم بیت یا حفیظ نودزی ءَ فون ئِے کناں ما داں دیراں دکانے ءِ ساھگ ءَ اوشتاتیں سک گرم ات ھم پد ءَ سھتے ءَ رند ٹھیکدار زبیر گوں وتی گاڑی ءَ اتک ءُ مارا دیست ئِے اوشتات که شما جاگھے روئے شمارا سر کناں گڑا واجہ مولابخش ءَ درائینت من ءَ لوگ ء سرکن گوں ھمے روچاں واجہ کراچی ءَ شت من ءُ چئیرمین حلیم ءُ بالاچ برکت شتیں کلات ءَ بی ایس او ءِ سنٹرل کمیٹی ءَ که 21-22 جون بوگ ءَ ات ،پد ءَ چما دیم ءَ من ءُ چئیرمین حلیم شتیں کوئٹہ ءَ پارٹی ءِ سنٹرل کمیٹی ءَ بھر زرت ، واجہ مولابخش یک روچے پیسر ءَ کوئٹہ ءَ سر بوتگ ات گڑا ما کوئٹہ ءَ ایم پی اے ھاسٹل ءَ ھپت ءُ ھشت روچ ءَ یک جاگہ بوتیں، ھر سھب ءَ مھلہ من ءَ فونے کت کہ بیا منی کمرہ ءَ من ءُ چئیرمین حلیم ھم ھر روچ سھب داں شپ واجہ مولابخش ءِ مجلس ءَ نشتیں گوں ھر روچ سھت11 ءَ رند سنگتانی آیگ شروع بوت کمراہ ءَ چہ سنگت ءَ پر اَت سیاست ءُ مجلس ات گپ ءُتران ات داں ھپت ءُ ھشت روچاں واجہ مولابخش ھمود ات پد ءَ وت ءُ واجہ اکرم دشتی کراچی ءَ شت انت، شھادت ءِ پیسری بیگاہ واجہ مولابخش ءَ من ءَ فون کت پہ یکے زامنی ءِ واستا جست ئِے کت دومی بیگاه ءَ من ءُ سنگتے جناح روڈ ءَ گران اتیں کہ سید ھوٹل ءَ رویں چاھے وریں مارا ڈاکٹر انعام دچار کپت من ءَ واجہ مولابخش ءِ جست ئِے کت کہ باریں واجہ شتگ یا ھمد ءَ انت من گشت کہ اے بری واجہ ءَ کوئٹہ ءَ دیراں داشتگ سیاست ءُ مجلس بوتگ گشت ئِے من سرپد نہ بوتگاں تو ھم من ءَ ھال نہ داتگ کہ واجه ھمد ءَ انت من گڑا واجہ ءِ مجلساں پشکپتگاں اے رندی، ھیر اے دمان ءَ ما دوئیں اجازت بوتیں ،من داں زھری مسیت ءِ دیم ءَ سر بوتاں مگرب ءِ وھد اَت من ءَ گوھرام ءَ فون کت گپ ئِے پرشتگ اتاں کہ واجہ مولابخش ءَ مارا یل دات ! اے سھت پہ من ءَ گش ئے کیامتے ات منی اندامیں جان لرزگ ءَ لگ ات ھمے سھت ءَ چئیرمین حلیم ءَ من ءَ فون کت تو کجائے زوت کن بیا ایم پی اے ھاسٹل ءَ من وتی ھمرائیگی نہ بوتاں من یک دو گام ءَ شت اوں چیئرمیں محراب مری ءَ گوں دچار وارت منی چمانی پرشگ ئِے دیست جست ئِے کت انور ھیر انت ؟من ھمے بدیں ھال دات چئیرمیں محراب چہ من ءَ گیشتر پرشت منی دست ئِے گپت ما دوئیں دست ماں دست بوتیں اے سھت ءَ من نزانت ما چوں ایم پی اے ھاسٹل ءَ سنگتانی کر ءَ سر بوتیں ڈاکٹر یاسین،چئیرمین حلیم، چئیرمین واحد رحیم، میر عبدلخالق،رحمت صالح ،چیئرمین اسلم ءُ کلیں سنگت ایم پی اے ھاسٹل ءَ ساڑی اتاں پد ءَ ما کلیں سنگت کوئٹہ پریس کلب ءَ شتیں پریس کانفرنس ءَ پد من ءُ چئیرمین حلیم،مختار چھلگری شپ ءِ سھت یک بج ءَ چہ کوئٹہ ءَ در کپتیں پہ کیچ ءَ جنازہ ءِواستا ما دومی روچ ءَ سھت چار بج ءَ دشت کوهک ءَ سر بوتیں جنازه ءَ ما پشت کپتیں بلے قبرستان ءَ شت فاتحہ ونت ءُ مگرب ءِ وھد ءَ ما چہ کوهک ءَ در اتکیں دیم پہ کیچ ءَ مئے گاڑی کوھک ءِ کور ءَ داں دیراں میّن بوت ما شپ کپتیں شپ ءِ بے وھد ءَ سر بوتیں شپ ءُ روچ ءِ سفر ءَ سک زند ءُ پند اتیں من شپ ءَ مشکور انور ءِ بیٹک ءَ وپتاں گڈی گپ کہ من گوں ھچ سنگت ءَ نہ کتگ، ھمے شپ ءَ من وپتاں واجہ مولابخش منی واب ء اتک گشیگاں مئے گوما اکسے کشگ ءَ انت یک کشے ءَ مشکورے اوشتارینت دومی کش ءَ چیئرمین حلیم ءُ دیم ءَ من ءَ اوشتارینت ءُ گشت ئِے شما مہ رَو اِت من ءَ یل مہ کن ات۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
