TBP Balochi

بلوچستان ءِ بنجاھی شھر شال، شاھرگ ءُ تمپ ءَ پاکستانی پوج ءُ نام وتگڑیں آجوئی ءِ شاتکامی اسٹالز ءِ سر ءَ بوتگیں اُرش ءِ زمّہ واری بلوچ آجوئی لوٹوکیں سلاہ بندیں گل بلوچ لبریشن آرمی ءَ منّ اِتگ انت –

بی ایل اے ءِ جارکش جئیند بلوچ ءَ رسانکدراں وتی شنگ کرتگیں درشانانی تہ ءَ گوشتگ کہ مئے سرمچاراں مروچی یک شمبے ءَ شال ءَ پولیس ءُ وتگڑیں آجوئی ءِ شاتکامی اسٹالز ءِ سر ءَ اُرش کتگ –

آئی ءَ گوشتگ کہ مئے سرمچاراں سرینا ہوٹل ءِ ڈن ءَ پولیس ٹرک تراک ناکیں شوروانی نشانگ کرتگ، تراک ءَ دو پولیس کارمند نیاز احمد ءُ علی اکبر مُرتگ انت ءُ دوازدہ کارمند ٹپی بوتگ اَنت وھدیکہ ٹپی بوتگیں مردمانی تہ ءَ چاردہ اگست ءِ وتگڑیں آجوئی ءِ شاتکامی ھاتر ءَ اسٹالز جنوک ھم ھوار انت-

جارکش ءَ گوشتگ کہ چریشی ءَ پیش بی ایل اے ءَ باز براں پولیس ءُ لیویز مکن کرتگ کہ آ زورگیریں پاکستان ءُ آئی ءِ پوج ءِ گوشگ ءِ پد ءَ بلوچ راجی زرمبشت دیم ءَ اڑاند بوگ ءَ پھریز بہ کن انت، ءُ چاردہ اگست ءِ دابیں زورگیر ءِ پرپکنڈھاں بلوچستان ءِ تہ ءَ برجاہ دارگ پد کنز بہ بنت بلے اے لشکر ءِ تہ ءَ لھتے ھنچیں سیاھیں روباہ ھست انت کہ زورگر ءِ گوشگ ءِ پد ءَ سرمچارانی مکبری، لس بلوچانی سر ءَ بیڑ برگ ءُ آھانی آوارجنی ءُ دگہ سلکاریاں ھوار انت اے اُرش ھما ادارھانی ھاتر ءَ بیھارے اگاں راج دژمنی ءَ پد کنز نہ بوت اَنت گڑا اُرشانی تہ ءَ ترندی آرگ بیت انت –

آئی ءَ دیمتر ءَ گوشتگ کہ بی ایل اے ءِ سرمچاراں سریاب دگ ءِ سر ءَ سدا بھار ٹرمینل ءِ نزیک ءَ پاکستانی آجوئی ءِ شاتکامی ءِ ھاتر ءَ جتگیں اسٹالز ءِ سر ءَ دستی بمب اُرش ءِ کتگ کہ اُرش ءَ اسٹال جنوک مردم زدگ بوتگ اَنت –

جارکش ءَ گوشتگ کہ بی ایل اے بلوچ راج ءَ یکرندے پد ءَ مکن کنت کہ مدامی ءِ وڑ ءَ اے سال ءَ ھم آ چہ پاکستانی پوج ءِ وتگڑیں شاتکامی مراگشاں چہ گستہ بہ بنت بلوچ سرمچار کجام ھم وھد ءَ اے مراگش ءُ دژمن گوشگ ءِ پد ءَ مراگش اڈ دیوکانی سر ءَ اُرش کرت کنت – بی ایل اے بیھار ءَ پد ھم کسے مراگشاں شُت ءُ اُرشاں چہ آئی ءِ تاوان رس ایت گڑا اشی ءِ زمّہ وار آ وت انت ءُ ھچ وڑیں ھمدردی ءِ تلبداری گوشگ نہ بیت –

بی ایل اے ءِ جارکش جئیند بلوچ ءَ وتی دگہ شنگ کرتگیں درشان ءِ تہ ءَ گوشتگ کہ مئے سرمچاراں گوستگیں روچ ءَ ھرنائی ءِ دمگ شاھرگ ءَ زرد آلو ءِ ھند ءَ پاکستانی پوجی کارندہ بمب اُرش ءِ ھما وھد ءَ نشانگ کتگ اَنت کہ آ زرد آلو چیک پوسٹ ءَ گوں پَرپٹاں در اتکگ اَنت – تراک ءِ آسر ءَ دشمنیں پوج ءِ یک کارندھے ھما دمان ءَ مرتگ ءُ وھدیکہ پرپٹ ءَ سک باز تاوان رس اتگ-

جارکش ءَ دیمتر ءَ گْوشتگ کہ بی ایل اے سرمچاراں آدینگ ءِ شپ ءَ کیچ ءِ دمگ تمپ ءِ ھند تگران آباد ءَ دشمن ءِ چیک پوسٹ ءِ سر ءَ گوں گرنیڈ لانچر ءُ دگہ سلاھانی ھمراھی ءَ نشانگ کتگ – اُرش ءَ دشمنیں پوج ءَ جانی ءُ مالی تاوانانی دیمپان چست کنگ کپتگ-

جارکش ءَ دیمتر ءَ گوشتگ کہ مئے گل بلوچ لبریشن آرمی دوئیں اُرشانی زمہ واری ءَ منّ اِیت ءُ داں ڈیھ ءِ وتواجھی ءَ جُھد برجاہ بیت-

بلوچستان ءِ بُنجاھی شھر شال ءَ یک بمب تراکے ءَ کم چہ کم دو سیکورٹی کارمند بیران ءُ ھشت کارمنداں ھوار دوازدہ مردم ٹپی بیتگ-

بنداتی ھالانی تہ ءَ گوشگ بیتگ کہ اے تراک ءَ سیکورٹی لشکر نشانگ کنگ بیتگ ءُ چریشی ءَ سیکورٹی کارمنداں جانی تاوانانی دیمپانی کنگ کپتگ-

سربوتگیں ھالانی رِد ءَ بلوچستان ءِ بُنجاھی شھر ماں شال ءَ بُنجاھی شھدگ ءِ سر ءَ سرینا ھوٹل ءِ ڈن ءَ چار راہ ءِ سر ءَ یک تراکے بوتگ-

تراک نشانگ پھازوکیں کارندہ بوتگ اَنت ءُ تراک ءِ آسر ءَ پولیس ءِ دو کارندہ مرتگ ءُ ھشت کارندھاں ھوار دوازدہ مردم ٹپی بوتگ اَنت –

تراک ءِ انچش تُرند بوتگ کہ نزیکیں ماڑیانی کانچ پروشتگ اَنت ءُ شھر جکسیتگ-

تراک ءَ چہ رند پاکستانی پوج ءَ دمگ انگر ءَ کتگ ءُ گیشیں پٹ ءُ پول برجاہ ءَ اِنت –

بوتگیں تراک ءِ زمہ واری انگت ءَ ھچ وڑیں گل ءَ نہ زرتگ –

بلوچستان ءِ بنجاھی شھر شال ءَ ھوار دگہ جاھاں ھم سیکورٹی لشکر یکشل ءَ نشانگ کنگ بیگ ءَ اِنت چرے نشانگاں سیکورٹی لشکر ءَ جانی ءُ مالی تاوانانی دیمپانی کنگ کپگ اِنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ چار سد ءُ سَے روچ سرجم بیتگ – نیشنل پاٹی ءِ اکرم رمضان، گوستگیں دمگی آرگنائزر گوادر ءُ آئی ءِ ھمرھاں اتکگ ءُ پدردی درشان اِتگ –

وی بی ایم پی ءِ رھشون ماما قدیر بلوچ ءَ ھمے اتکگیں مردمانی میان ءَ گپ کنان ءَ گوشتگ کہ بلوچ راج ھرکجا ریاستی زُلم ءُ زوراکیانی آماچ اِنت ءُ ھمود ءَ ھمک روچ زانگول کرتیں جون دور دیگ بیگ ءَ اَنت ءُ بیگواھیانی تہ ءَ بے کساس گیشی آیگ ءَ اِنت بلوچستان ءِ جاور ھال کسے ءَ چیر نہ اَنت ریاستی زُلمانی دیمپانی ءَ پُر ایمنیں جھد بھادری ءَ گوں کنگ ءَ اِنت –

ماما قدیر بلوچ ءَ گُشتگ کہ بیگواھیں مردمانی کھول بازیں سالاں انساپ ءِ دروازگ ءَ ٹگ ءَ اَنت بلے اد ءَ درست گنگ ءُ کور اَنت بیگواھیں مردمانی کھول رسانکدراں وتی پریات ءَ سر کنگ ءَ اَنت بلے گوشداروک نیست اِنت ریاستی زُلم ھما وڑ ءَ بلوچانی سر ءَ برجاہ اَنت –

آئی ءَ دیمتر ءَ گُشتگ کہ راجاں مرگ امباز کرتگ ءُ وتی راجی سنچ مٹ کرتگ ءُ یک سر بلندیں راجے ءِ بستار ءَ دیم ءَ اتکگ اَنت با بد بھتیں بلوچ یک منزلے ءِ نزیک ءَ سر بیگ ءَ بہ ایں اود ءَ مارا مرگ ءَ گیش گلامی ءِ ترس ءُ آئی ءِ ھلاپ ءَ نپرت مئے گلامی ءِ توک ءَ لومپ بیت اِنت پر ایمنی ءَ مروک ءُ کشوک کسے ترس یا شک ءَ نہ بیت اِنت اشی ءَ پرچا مارا یاتگیری بیت اِنت کہ اود ءَ شما کُشگ ءُ گار کنگ بہ اِت اِنت –

نبشتانک: مئے اَہد ءِ سماجی کارکن

نبشتہ کار: سعید احمد بلوچ

دی بلوچستان پوسٹ

من نزاناں مروچیگیں مئے مردم وت ءَ پہ نام کنگ ءِ واستا چونیں چونیں ہنر ساز اَنت گُش اَنت کہ کیچ ءَ یک پینٹر ءِ بوتگ آئی ءَ وتی ہرچ نِبشتہ کُتگیں چیزانی سر ءَ وتی نام نِبشتہ کُتگ گُڑا شہید فدا یک روچے همے پینٹر ءِ کر ءَ شُتگ ءُ جُست ءِ گپتگ کہ تو وتی نام ءَ وتی اڈ کُتگیں یا نِبشتہ کُتگیں چیزانی سر ءَ پرچی نِبشتہ کنے گڑا آئی ءَ دراھینتگ کہ من ءَ مردم پجا بیار اَنت شہید ءَ گُشتگ کہ تو وت انچو شوک جوڑ بکن کہ مردم ترا وت دربگیج اَنت گُشگ ءِ مول ءُ مراد همیش اِنت اَنچیں کار بکن مردم تئی وت شوهاز ءَ در بہ کپ اَنت-

اَنچو من یک روچ باز دیر اِنت من ءَ ماه ءُ سال یاد نہ بنت وش نیوز ءِ یک مراگش ءِ قدیر لقمان تران کنگ ءَ اَت قدیر لقمان انوگیں سوشل ویلفئر ءِ ڈاریکٹر اِنت آ گُشگ ءَ اَت کہ یک مردے است اِنت گوادر ئیگ اِنت ءُ باز وهد اِنت کہ معذوریں گوانڈوانی وانگ ءِ توامیں هرچ ءُ درچ ئے وتی کوپگاں زُرتگاں ءُ تنی وہدی من نزانی مردم کئے اِنت ءُ انوں لہتیں وهد اِنت هال اهوال نیست هُدا بزانت مالی هالت ءَ نزور بیت ءِ دئیگہ سبب ئے کار بکن بلے پہ نام مکن-

مروچی ما ہرچی پہ نام کنیں مرچی ما پریس کانفریس کنیں کہ ما چُش کُتگ آ کُتگ ءُ ما دیما چو کنیں بِل اِت یار اے بزگیں کوم ءَ گیشتر بزگ مکن اِت چیزے کنگی اِنت بکن اِت بلے سوشل میڈیا ءُ میڈیا ءِ توکا مکن اِت میدان(گراؤنڈ) بکن اِت-

من داد دیاں هما مرداں کہ آیانی ذاتی کُتگیں کار یک اداره ئے ک‍ُتگیں کاراں هم دیم ءَ تِر انت بلے من تنی وہدی آیانی یک اَکس ئے هم نہ گنداں نزاناں اے چتوریں سسٹمے ما بندات کُتگ هور ءَ مردمے ءِ لوگ آپ ءَ کمُک ءِ کنگ ءِ بدل همیش اِنت چار اَکس بہ کش سوشل میڈیا ءَ بدے آ بزگ ءَ گیشتر ازیت بکن –

مروچی مئے سماجی کارکن ءَ کُمکی ساز ءُ سامان ءِ گیشتر کیمتی کیمره ءُ موبائل گون پہ اَکس ئے کشگ ءَ تنی وہدی شوکیں مراگش کیچ ءَ منی چمّاں نہ گوستگ کہ آ علمی بنیاد ءَ بہ بیت تنھا کیچ لیٹریری فیسٹول کہ آ ناں یک اداره ءَ چیردستی ءَ بوت ءُ ناں کہ انوگیں فاونڈیشن ءُ سوسائٹی آیانی آ کیچ ءِ نودربرانی وتی جُھدانی مُز اَت کہ شریں وڑے ءَ سوبمند بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی اوگانستان ءِ بُنجاھی شھراں چہ تالبان ءِ دستگیری ءَ رکینگ ءِ ھاتر ءَ زی امریکہ ءِ سروک جو بائیڈان ءَ ھم امریکی لشکر ءَ پرمان داتگ کہ تالبان جنگی کاروان، سنگر ءُ بُنجاھانی سر ءَ زیت جنگی بالیکُراب B-52 ءُ دِگہ جنگی مِیزائیلانی تْرُندیں اُرش کنگ بہ بنت۔ بائیڈن ءِ ھمے جنگی پرمان ءَ پد امریکی B-52 جنگی بالیگُراباں گوریچی ولایت جوزجان ءِ شبرگان بُنجاھی شھر ءَ تالبان ءِ کاروان ءَ اُرش کنان ءَ 200 تالبان کُشتگ اَنت، ھمے اُرشاں پد اوگان لشکر ویل ءِ جاہ سربوتگ زدگیں تالبان دزگِیر کُتگ اَنت۔

دگہ یک ھالے ءِ رد ءَ دومی نیمگ ءَ ھِلمند ولایت لشکرگاہ ءَ ھم امریکی B-52 جنگی بالیگُراب ءُ میزائیلانی اُرش برجاہ اَنت چریشی ءَ اوگان تالبان ءَ جنگانی دیمپانی اِنت –

زانگ بہ بیت کہ اوگانستان ءِ تہ ءَ تالبان راجمستری سرکار ءِ ھلاسی ءُ وتی زورانسری ئیں نیکراھی اسلامی شرھیت ءِ رھبندانی اڈ کنگ ءَ اوگانستان ولایتانی بُنجاھی شھر ءُ دمگاں دزگِیر کنان اِنت۔ دومی نیمگ ءَ اوگانستان ءِ راجی لشکر، راجی آشوبی گل ءُ آزات ھیالیں راجدوستیں پاٹی تالبان ءِ زورانسری ءِ بگیری ءَ گھگری کنگ ءَ انت۔

اوگان لشکر ءَ وتی شنگ کرتگیں ھالانی تہ ءَ اوگانستان ءَ بیست ءُ چار ادارانی تہ ءَ 572 تالبان جنگول کُشگ ءُ 309 ٹپی کنگ ءِ ھال شنگ کرتگ اَنت –

اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 572 تالبان جنگول کُشتگ ءُ دِگہ 309 ٹپی کرتگ اَنت۔

راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرھار، لولمان، گزنی، پکتیا، کندھار، اُرزگان، ھِرات، پراہ، جوزجان، سرئے پُل، ھِلمند، نِمروز، ٹکھر، کُندوز، بدکشان ءُ کاپیسا ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشترّیں سرپدی دیان ءَ گْوشت کہ ولایت ھِلمند ءِ بُنجاھی شھر لشکرگاہ ءِ نزیکیں کُوچّگاں اوگان راجی لشکر ءِ بالیگراباں جنگی اُرش کنان ءَ 54 ناشرکاریں تالبان ءِ جنگول کُشتگ ءُ دِگہ 23 زدگ کُتگ اَنت، اے اُرشاں تالبان ءِ بازیں سِلاہ ءُ جنگی ساز ءُ سامان ھم تباہ کنگ بوتگ اَنت۔ گیشتریں سرپدی یے دیان ءَ گْوشت ئِے کہ لشکرگاہ شھر ءِ تہ ءَ تالبان گل ءِ مستریں جنگی سروگان مولوی ھِجرت ھم اوگان راجی لشکر ءِ جنگی بالیگُرابانی اُرش ءَ کُشگ بیتگ۔
ولایت کندھار ءِ ڈند ءُ زری دمگ ءِ نزیکیں ھند ءُ دمگاں ھم اوگان راجی لشکر ءَ گوں بالیگُراباں جنگی آپریشن کنان ءَ 47 تالبان جنگول کُشتگ ءُ دِگہ 26 زدگ ھم کُتگ اَنت۔ ھمے آپریشن ءَ دژمن ءِ 6 پرپٹ ءُ دِگہ سِلاہ ءِ کوت ھم تباہ کنگ بیتگ اَنت۔

ھرات شھر ءِ نزیکیں دمگاں گوں اوگان راجی لشکر ءِ بالیگرابانی بمب گْواری، آشوبی سِلاھبند ءُ راجدوستییں گلانی کُمک ءَ راجی لشکر ءِ جنگی اُرشاں 17 ناشرکاریں تالبان کُشگ ءُ دِگہ 19 زدگ بیتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

کندھار ولایت ءِ دمگ ڈند ءُ نزیکیں کوچّگاں اوگان راجی لشکر ءِ جنگی بالیگُراباں ارش تالبان ءِ 26 جنگول کُشتگ ءُ دِگہ 6 زدگ کِتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

ھمے وڑ ءَ ولایت ٹکھر ءَ اوگان راجی لشکر ءَ گوں جنگی بالیگرابانی کُمک ءَ آپریشن کنان ناشرکاریں تالبان ءِ ولایت کندوز ءِ نام داتگیں گورنر مولوی شاہ مھمود گوں دِگہ 12 جنگول ءَ کُشتگ اَنت۔ ماں ٹکھر ولایت ءِ دِگہ دمگے ءَ رستک دمگ ءِ گورنر اِجازلھک ھم گوں 8 جنگول ءَ کُشگ بیتگ اَنت۔

ھمے پیم ءَ ولایت نگرھار ءِ دمگ شرزاد ءَ ھم اوگان راجی لشکر ءِ بالی گُرابانی اُرش ءَ 33 ناشرکاریں تالبان کُشگ ءُ 30 ٹپی بوگ ءَ ھوار راجی لشکر ءَ راہ ءُ دگانی سر ءَ ناشرکاریں تالبان ءِ 15 چیریں بمب ءُ شور ھم پدرا ءُ ناکار کُتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 385 تالبان جنگول کُشگ ءُ 210 ٹپی بیتگ اِت اَنت۔ اوگان راجی لشکر ءَ ھمے جنگی اُرش نگرھار، لوگر، گزنی، پکتیا، میدان، واردک، کندھار، ھِرات، پراہ، جوزجان، سمنگان، ھِلمند، ٹکھر، بلگان ءُ کاپیسا ءِ ھند ءُ دمگاں کرتگ اَت اَنت۔

پنجگور ءَ دو جتاجتائیں جاھاں پاکستانی پوج ءَ ڈیتھ اسکواڈ ءِ دست ءَ سے مردم آوار جنگ ءَ پد بیگواہ کنگ بوتگ اَنت-

سربوتگیں ھالانی رِد ءَ پاکستانی پوج ءَ پنجگور ءِ دمگ کیلکور سری گڈگی ءَ یک لوگے ءِ سر ءَ بیڑبرتگ ءُ دو مردم آوار جتگ-

پاکستانی پوج دست ءَ آوار جنگ بوتگیں مردمانی پجّار نواز ء عیسیٰ ءُ اللہ بخش ء سخی داد ناماں چہ زانگ بوتگ اَنت ءُ پوج ءَ اللہ بخش پد ءَ یل کتگ ءُ وھدیکہ نواز انگت بیگواہ ءَ اِنت-

دمگی مردمانی رِد ءَ پاکستانی پوج ءَ لشکر کشی ءِ وھد ءَ لوگانی تہ ءَ ساڑی ئیں زھگ ءُ زالبولانی سر ءَ زوراکی کتگ آ لَٹ ءُ کُٹانی نشانگ کتگ اَنت ءُ پوج دست ءَ آوار جنگ بوتگیں ورنا نواز عطاشاد ڈگری کالج تربت ءِ یک نودربرے –

دومی نیمگ ءَ گوستگیں روچ ءَ پنجگور ءِ دمگ وشبود ءَ پاکستانی پوج ءِ چیردستی ءَ جوڑ بوتگیں ٹولی ڈیتھ اسکواڈ ءِ کارندھاں یک مردمے آوار جتگ ءُ گوں وت برتگ آوار جنگ بوتگیں مردم ءِ پجّار فیض ء وحید نام ءَ چہ زانگ بوتگ-

بلوچستان ءِ برجاھیں آجوئی ءِ جنگ ءَ بی ایل اے اے وھد ءَ بلوچستان ءَ جنگانی تہ ءَ پُرکاریں گلے ءِ رنگ ءَ گندگ ءَ کیت اِنت –

بی ایل اے بارو ءَ گوشگ بیت کہ بی ایل اے وتی اُرشانی تہ ءَ جنگی مزنیں رپک ءُ ھنراں کاربند اِیت ءُ پاکستانی پوج ءِ بنجلانی سر ءَ اُرش کنت –

بی ایل اے ءِ بارو ءَ گوشگ بیت اِنت کہ آئی ءِ کمان سوھیں رنگے ءَ وتی اُرشانی کنگ ءَ پیسر دراھیں تک ءُ پھناتانی چارگ ءَ پد آئی ءِ نشانگ کرتگیں نشانگ ءَ پاکستانی پوج ءَ بازیں کچے ءَ جانی تاوانانی دیمپانی کنگ کپ ایت اِنت –

بی ایل اے ءِ بارو ءَ گوشگ بیت کہ آ انیگیں بلوچستان ءِ آجوئی ءِ جنگ ءَ مستریں گل زانگ بیت اِنت –

بی ایل اے ءِ بارو ءَ گوشگ بیت اِنت کہ آئی ءَ وتی گل ءِ تہ ءَ جتا جتائیں ناماں ونگ ٹھینتگ اَنت کہ آ پاکستانی پوج ءَ بازیں ھسابے ءَ تاوانانی دیمپانی ءِ ھاٹیگ ءَ دار اَنت –

بی ایل اے ءِ بارو ءَ گوشگ بیت اِنت کہ گوست ءَ بی ایل اے ءِ سروک جنرل اسلم اوگانستان ءَ یک وتکُش بمب تراکے ءَ نمیران بیتگ اَت ءُ چریشی ءَ پد بی ایل اے ءِ سروک بی ایس او آزاد ءِ گوستگیں سروک بشیر زیب نامینگ بیتگ اَت –

بی ایل اے ءِ بارو ءَ گوشگ بیت کہ جنرنل اسلم ءِ نمیرانی ءَ پد بی ایل اے ءِ اُرشانی تہ ءَ گیشی آیگ ءَ گندگ اتکگ –

ھمے لڑاں ھمے سال ءِ سِی ءُ یک مئی ءَ بولان ءَ پاکستانی پوج ءِ بنجلے ءِ سر ءَ اُرشے ءَ بیست ءُ چار پوجی کُشگ ءُ یکے زندگی ءَ دزگیر کنگ بیتگ اَت –

بی ایل اے ءِ جارکش جیئند بلوچ ءَ ھمے اُرش ءِ زمہ واری منّ اِتگ ءُ گوشتگ اَت کہ بنجل ءَ جاڑیگیں بیست ءُ چار پوجی کُشتگ اَنت ءُ یک لانس نائیکے دزگیر کرتگ ءُ گوں وت برتگ ءُ بنجل ءِ سرجمیں سِلاہ ءُ شورو گوں وت برتگ اَنت –

بی ایل اے ءَ وتی بیان ءِ تہ ءَ گُشتگ اَت کہ اے اُرش “فتح اسکواڈ ” ءَ کرتگ ءُ چریشی ءَ فتح اسکواڈ ” ءِ سَے سرمچار ھنگل مری پنام ءِ لیلا، آفتاب جتک پنام ءِ وشین ءُ شاہ ویز زھری پنام ءِ سارانگ ھمے جنگ ءَ نمیران بیتگ اَنت –

بی ایل اے ءَ مروچی دو ماہ ءَ پد یک پنجاہ دمان “ملٹی ” تامرے وتی تندجاھاں شنگ کرتگ-

تامر ءِ تہ ءَ گندگ بیت پوجی بنجل ءِ سر ءَ اُرش ءُ آئی ءِ اُرش ءَ پیسر بیتگیں شوربندی یک مزنیں جنگی کمانی ءِ رنگ ءَ گندگ ءَ کاینت اِنت –

اے پنجاہ منٹی تامر بند ءَ بی ایل اے ءِ سرمچارانی دیم ڈب اِتگ ءُ آئی ءِ کمان سوھیں رنگے ءَ وتی ھمراھاں بنجل ءِ سر ءَ اُرش ءِ سوھی ءَ سرپدی دیگ ءَ اِنت –

دومی نیمگ ءَ سرکاری تکاں ھم اے اُرش ءِ ھال راست بیتگ ءُ سرکاری تکاں بازیں پوجیانی مرگ ءِ ھال ھم رسانکدراں شنگ بیتگ اَنت –

سرکاری تکاں اے اُرش بلوچستان ءَ یکشلیں اُرشانی لڑ گوشگ بیتگ ءُ سرکاری بازیں تکاں اُرش ءَ پد دمگانی سر ءَ لشکر کشی ھم کنگ بیتگ اَنت –

سر بیتگیں ھالانی رد ءَ گوستگیں روچ ءَ سلاہ بندیں مردماں بلوچستان ءِ دمگ کیچ مند ءَ پاکستانی پوج ءِ چوکی ءِ سر ءَ اُرش کتگ ءُ پوج ءَ جانی تاوانانی دیمپانی بیتگ –

دومی نیمگ ءَ بلوچستان لبریشن فرنٹ ءِ جارکش میجر گْوھرام بلوچ ءَ رسانکدراں شِنگ کتگیں وتی یک درشانے ءِ تہ ءَ اُرش ءِ زمہ واری منّ اِتگ ءُ گْوشتگ کہ شمبے ءِ روچ ءَ بیگاہ ءِ وھد ءَ سرمچاراں مند اپسی کھن ءُ باغ زوا ءِ میانی ھمزھی کوہ ءِ سر ءَ ھستیں چوکی ءِ سر ءَ اسنائپر اُرش کتگ ءُ یک کارندھے کُشتگ – اشی ءَ پد چوکی ءِ سر ءَ گوں وتکاریں سلاھاں نشانگ کتگ- سیمسر ءَ نزیک اے دمگاں بازیں پوجی چوکی جوڑ کنگ بوتگ اَنت کہ ٹٹ جنوکیں کمپنیانی پھازداری کنگ ءَ اَنت-

جارکش میجر گْوھرام بلوچ ءَ دیمتر ءَ گْوشتگ کہ مئے اے وڑیں اُرش داں بلوچستان ءِ وتواجھی ءَ برجاہ بنت –

سر بیتگیں ھالانی رد ءَ سیستان و بلوچستان ءُ اوگانستان ءِ سیمسراں ھواریں دمگ زابل ءَ ایرانی چیریں ادارھاں اھل سنت ءَ بندوکیں یک مردمے آوار جتگ ءُ برتگ –

بلوچ کمپن فعالین ءِ رد ءَ گوستگیں روچ ءَ زابل ءِ ھند اسلام آباد لوتک ءَ ایرانی چیریں ادارھاں یک مردمے آوار جتگ کہ اھل سنت ءَ گوں بندوک اِنت –

آوار جنگ بیتگیں مردم ءِ پجار ھاپز صدیق ء مولوی دین مھمد جھمنند اسلام آباد زابل ءِ نام ءَ زابگ بیتگ –

چیریں ادارھاں آئی ءِ آوار جنگ ءِ بارو ءَ دگہ گپ دیم ءَ نیاؤرتگ ءُ آوار جنگ ءَ پد ناشناسیں زنداناں برتگ –

بلوچستان ءِ دمگ گریشہ ءَ دامن شاشان پبلک لائبریری کمیٹی ءِ نیمگ ءَ لبزانکی دیوان بیتگ، نیاد ءَ نودربر ءُ کمیٹی ءِ سرجمیں باسکاں بھر زرتگ ءُ دمگ ءَ دگہ مردماں ھم وت ءَ کمیٹی ءِ بھرمند کرتگ –

نیاد گریشہ ءِ ھنکین گیشتری ءَ وانگی کوٹی ءَ برجم دارگ بوتگ کہ اود ءَ دیوان ءِ پاگ واجہ گوھرام بلوچ ءُ دیوان ءِ گچینی ءِ مھمان گل ھسن بلوچ بیتگ –

نیاد ءَ بھر زیروکیں سروکاں وتی وتی ھیال درشان کرتگ ءُ نودربر پہ وانگ ءِ نیمگ ءَ دلگوش کنگ ءِ کڈن کرتگ اَنت –

آیاں گُشتگ کہ اے بیست ءُ یکمی کرن ءَ دنیا ءَ چنکس دیمروئی کرتگ ءُ مارا وتی دیمروئی کنگ ءَ چی چی کنگی اِنت –

آیاں گُشتگ کہ ابید ء وانگ ءُ زانگ ءَ ھچ راج ءَ دیمروئی نہ کرتگ گڑا باید ما ھم وتی دلگوش ءَ وانگ ءُ زانگ ءَ بہ دے –

آیاں گُشتگ کہ اے راستی ءِ کہ مارا ھچی نیست پہ دیمروئی ءِ واستا بلے ما وتی دیمروئی ءِ واستا وتی جھد ءَ بہ کن ایں دانکہ اے دنیا ءِ تیزیں گاماں ما ھم ھوار بہ ایں –

آیاں گُشتگ کہ اے گپ راستی ءِ بلوچستان ءَ کتاب جاہ، وانگجاہ ءُ وانگی تکاں دگہ آسراتی نہ بوگ ءِ بروبری ءَ اَنت ءُ چرے سبب ءَ ما دنیا ءِ تیزیں گاماں باز پشکپتگ اِنت –

نیاد ءَ گیشتری ءِ بنزہ ءِ واستا نوکیں ارگنائزر ءِ سروک عبدالطیف، ڈپٹی آرگنائزر سنگت گوھرام ءُ کمیٹی ءِ باسک شکر اللہ بلوچ، عبدالحالق بلوچ ءُ شاکر الاھی بلوچ گچین کنگ بیتگ اَنت –

بلوچستان ءَ وانگی تکاں گیشتر نودربر وتی کمک ءَ وت کتابجاہ ءُ دگہ پھناتاں کار کنگ ءَ اَنت –