TBP Balochi

بلوچستان ءِ بُنجاھی شھر شال ءَ پاکستانی بیرک بھاکنوکیں دکانے ءِ سر ءَ دزبمب اُرشے بوتگ جانی تاوانانی ھال اِنت –

سربوتگیں ھالانی رِد ءَ مروچی شال ءِ دمگ رودرتکی شھدگ ءَ ناشناسیں مردماں پاکستانی بیرک بھاکنوکیں یک دکانے ءِ سر ءَ دزبمب اُرشے کتگ-

بمب اُرش ءِ آسر ءَ بیرک بھا کنوک ءَ ھوار چار مردم زدگ بوتگ اَنت ءُ پہ دوا درمان کنگ ءِ ھاتر ءَ نادُراھجاہ ءَ سر کنگ بوتگ اَنت –

دومی نیمگ ءَ میڈیکل سپرنٹنڈنٹ سول ھسپتال ءِ ڈاکٹر جاوید اختر ءَ گْوشتگ تراک ءِ آسر ءَ امان الله خلجی بیران بیتگ ءُ پولیس کارندھے ءَ ھوار چار مردم زدگ اَنت ءُ پولیس کارندہ ءِ جاور نگیگ اَنت-

زانگ بہ بیت بلوچستان ءَ گیشتر چاردہ اگست ءِ درگت ءَ پاکستانی بیرک بھاکنوک ءُ اسٹالز ءُ مچّیانی سر ءَ بیتگیں اُرشانی زمہ واری بلوچستان ءَ برجاھیں سلاہ بندیں جھد ءِ آجوئی لوٹوکیں گلاں زرتگ اَنت-

گوستگیں روچ ءَ شال ءِ شھر ءَ دو جتاجتائیں جاھاں بمب تراک بوتگ اَت ءُ بندات ئِے تراک پولیس کارندھانی سر ءُ دومی پاکستانی بیرک ءِ یک اسٹال سر ءَ بوتگ اَت اے دوئیں اُرشانی زمہ واری بلوچ لبریشن آرمی ءِ جارکش جیئند بلوچ ءَ زرتگ اِت اَنت-

دنیگت ءَ اے اُرش ءِ زمہ واری ھچ ءَ گل ءَ نہ منّ اِتگ-

دی بلوچستان پوسٹ پتر ھال ءَ سر بیتگیں ھالانی رد ءَ بلوچستان ءِ دمگ مستونگ دتو ءَ سال دوھزار ءُ ھبدہ ءَ بیست اکتوبر ءَ آوار جنگ بیتگیں حفیظ اللہ ء مھمد اعظم یل کنگ بیتگ ءُ وتی لوگ ءَ سر بیتگ –

حفیظ اللہ ءِ یل بیگ ءِ ھال وائس فار بلوچ مسنگ پرسنز ءَ راست کرتگ ءُ گُشتگ کہ حفیظ اللہ ء مھمد اعظم مروچی یل کنگ بیتگ ءُ وتی لوگ ءَ سر بیتگ –

وائس فار بلوچ مسنگ پرسنز ءَ گُشتگ کہ حفیظ اللہ ءِ کیس وائس فار بلوچ مسنگ پرسنز ءَ سرکار ءَ سر کرتگ ءُ آئی ءِ یل کنگ ءِ لوٹ کرتگ –

آئی ءَ گُشتگ کہ بیگواھیں مردمانی یل بیگ وشی ءِ ءُ سرکار ءَ ھمے اُمیت اِنت کہ دراھیں بندیگیں مردماں یلو کنت ءُ آیانی لوگانی چراگاں وشنود کنت –

ھمے وڑ ءَ کیچ ءَ یک مردمے پوج ءِ دست ءَ بیگواہ کنگ بیتگ –

ھالانی تہ ءَ گُشگ بیتگ کہ کیچ گومازی ءَ رزاک ء شمبے ھان پاکستانی پوج ءَ دزگیر کرتگ ءُ ناشناسیں زنداناں برتگ –

بلوچستان ءَ سیاسی مردمانی گوشگ اِنت یک نیمگے ءَ سرکار بیگواھیں مردماں کمے کساساں یلو کنت ءُ دومی نیمگ ءَ آوار جنگ ءُ بیگواہ کنگ اِنت –

میان استمانی جانسلامتی ادارہ ءِ نیمگ ءَ شنگ بوتگیں رپورٹ ءِ تہ ءَ شال بیست ءُ دو سال گوازگ ءَ پد ھم دومی دنز ءُ گبارتریں شھر نامینگ بوتگ –

زانگ بہ بیت میان استمانی جانسلامتی ادارہ ءَ نوزدہ سد ءُ نود ءُ نھ ءَ میکسکیو ءَ پد شال دومی دنز ءُ گبارتریں شھر نامینتگ ات گڑا بلوچستان ءِ سرکار ءِ نیمگ ءَ چہ گامگیج زورگ بوتگ ات ءُ دنز ءُ دوتانی ھلاس کنگ ءِ ھاتر ءَ دہ ھزار رکشہ دستیگ کرتگ ءُ ھشتاد چہ گیش ھِشت جنیں بھٹوں شھر ءَ چہ ڈن کوچگ ءَ برگ بوتگ اِت اَنت ، بلے بیست ءُ دو سال ءَ گوزگ ءَ پد ھم سرکار شال ءِ دنز ءُ دوتانی ھلاس کنگ ءَ سوبین نہ بوتگ –

اے درگت ءَ دنز ءُ دُتانی گر ءُ دار کنوکیں زانتکارانی گوشگ انت کہ شال ءِ دمگ بروری، کروٹ آباد ءُ کچلاک ءِ کریشنگ پلانٹ آں چہ در آؤکیں دنز ءُ دوت شھر ءَ ھراب کنگ ءَ انت کریشنگ پلانٹاں چہ در آؤکیں دنز ءُ دوت شال ءِ گوات ءَ گوں ھوار بنت چریشی ءَ شال ءِ گوات شپ ءُ روچ دنز ءُ گبار بیت انت بازیں وھداں اے دنز ءُ گبار ھنچوش باز بیت انت کہ بالگردانی رؤگ آیگ ھم بند بیت انت –

مڈیانی شوھازکار ءِ بنشون ءِ رِد ءَ شال ءِ بیست ءُ پنچ کریش پلانٹانی تہ ءَ ھر سال پنجاہ ھزار ٹن کریش پیداک بیت اِنت چریشی ءَ سرکار ءَ دو کروڈ ءُ نیم زر نپ رس ایت- اے کریشنگ پلانٹاں چہ در آؤکیں کریش ناکہ تھنا شال ءِ لوٹاں سرجم کنت بلکیں ملک ءِ دگہ کارانی تہ ءَ ھم کارمرز بیت کت کن اَنت –

آھانی گوشگ انت کہ اکترآباد ءِ کریش پلانٹ کہ ھست انت کہ چلتن ءِ کوھاں پروشگ انت ءُ اود ءِ ڈولداری ءِ ھم ھلاس کنگ انت – بلوچستان ءِ آمیدگس ءَ ھم کریش پلانٹ دمگ ءِ دنز گبار سوب جوڑ کنگ ءِ ءُ آئی ءِ ڈولداری ءِ ھراب کنگ ءِ درشان داتگ ءُ کریش پلانٹ شھر ءَ ڈن درکنگ ءِ ھکم داتگ –

دیمروئی کارانی ھاتر ءَ کوھانی پروشگ ءُ ڈوک ءُ ریک جوڑ کنگ کار المی بوت کنت بلے ھمے کار شھر ءِ تہ ءَ یا نزیک گورے دمگاں کنگ بہ بیت اے ناکہ ھمودے چاگرد ءِ سر ءَ جیڑہ ودی کنت بلکیں مردمانی جانانی سر ءَ ھم اثر کپیت –

شال ءِ کریش پلانٹانی نزیکیں دمگ بروری، ہزارہ ٹان ءُ کروٹ آباد ءِ جھمنندیں مردم ساہ کشگ ، پُپ ءُ سینگ ءِ نادراھی ءِ اماچ بوان انت –

اے درگت ءَ فاطمہ جناح چیسٹ اینڈ جنرل نادراھجاہ ءِ ڈاکٹر محمود شاھوانی ءِ گوشگ انت کہ اے نادراہ جاہ ءِ نزیک ءَ ھم کریش پلانٹ ھست انت چریشی ءَ جاندراھیں مردم ھم دم، سی او پی ڈی ءُ سیلی کوسز ءِ نادراھی آماچ بوگ ءَ انت ، اگاں اے وڑیں مردمانی ھما وھد ءَ الاج کنگ مہ بیت گڑا شومک ءِ نادراھی آماچ بوت کن انت –

دنز ءُ گبار ءِ گر ءُ دار کنوکیں زانتکارانی گوشگ انت کہ اگاں سرکار شال ءَ ساپ ءُ پلگارگ لوٹیت گڑا چپ چاگردے کریش پلانٹاں دور بہ بارت –

ایس ایس ایف ءِ نیمگ ءَ جتا جتائیں شھدربرجاھاں برجاھیں آنلائن رجسٹریشن، نیشنل ایم ڈی کیٹ کمپیوٹرائزڈٹیسٹ ءُ ڈائریکٹریٹ بلوچ ءِ پشتمان ءَ بلوچستان ءِ نودربرانی واستا رزروڈ نشستانی سر ءَ بھر زورگ ءِ راہ ءُ رھبندانی بارو ءَ سرپدی سیشن گوستگیں روچ ءَ برجم دارگ بیتگ –

سیو اسٹوڈنٹس فیوچر ءِ نیمگ ءَ برجم داشتگیں نیاد ءَ تلو ءِ سر ءَ ڈبہ گل ءِ باسک بانک عالیہ بلوچ ءَ زرتگ سرپدی نیاد ءَ اتکگیں مردمانی میان ءَ گل ءِ سروک فضل یعقوب بلوچ ءُ کسان کمک سرکماش نعمان بلوچ بیتگ اَنت –

نیاد ءَ انٹرمیڈیٹ کالجز، میڈیکل کالجز ءُ یونیورسٹیانی بھر زورگ ءِ واھگداریں نودربراں بازیں کچے ءَ بھر زرتگ –

نیاد ءَ نیشنل ایم ڈی کیٹ کمپیوٹرائزڈ ٹیسٹ، جتا جتائیں یونیورسٹیاں برجاھیں آنلائن رجسٹریشن ءِ راہ ءُ رھبندانی بارو ءَ گپ ءُ باوست ءُ رھشونی کنگ ءِ ھوار ھواری ءَ ٹیسٹ ءُ رجسٹریشن ءِ ڈیمو سرجم ءَ ملٹی میڈیا ءِ ڈسپلے ءَ پیش دارگ بیتگ اَنت –

اشانی ھواری ءَ بلوچستان ڈائریکٹریٹ کالجز ءِ نیمگ ءَ بلوچستان ءِ نودربرانی واستا ھم انٹرمیڈیٹ، بیچلرز ءُ ماسٹرز ءِ واستا بھر زورگ ءِ راہ ءُ رھبندانی سرجمیں سرپدی گشتگ اَنت –

گڈسر ءَ نودبرانی بیتگیں سرگپ ءِ بارو ءَ درپیشیں جیڑہ گیش ءُ گیواری کرتگ اَنت –

لچہ یاتگیری: شہید مُبشر ہوت پنام شاہ دوست جان نام ءَ

لچہ کار: اصغر سخی

دی بلوچستان پوسٹ

دیدگیں شاہ دوست ترا سہریں سلام
ما تئی ہمراہیں  پگر ءِ  گام پہ گام
ساجی ءُ دشت ءُ دڑامب ءُ کُلبراں
مشکے ءِ کبّند ءُ پُلیں زامُران
کولواہ، ڈنڈار، پرومی سیمسراں
اے تئی مہرانی جنگی سنگراں
تو نمیراں کُت وت ءَ شاہ دوست جان
آجوئی جنگانی جنگی داستان
رتکگیں ہونانی آشوب ءِ نشان
پہر بندیت پہ ترا تئی گوکدان
سنگتیں ما تئی وپائے ہمبلیں
دیدگیں گومازی ءِ ما میرلیں
ما مجید بریگیڈ ۓ جنگی توکلیں
ما اسد جان انت ءُ سلمان ھملیں
زندگی مرگ ءَ چہ پد بندات تئی
پہ سپت نازینک جنتیں مات تئی
گاجیان اُستاد ہستیں برات تئی
کُہسراں مانیت مُدامی یات تئی
بانُکیں مہوش روچ ءِ جاہ جنت
دژمناں زاناں تئی اللہ جنت
چو کریمہ بانک ءَ نامدار بیت
آجوئی جار ءَ مئے ہر جاہ جنت

بلوچستان لبریشن فرنٹ ءِ جارکش میجر گْوھرام بلوچ ءَ پاکستانی پوج ءِ سر ءَ بوتگیں اُرشانی زمہ واری منّ اِتگ ءُ گْوشتگ کہ یکشمبے بیگاہ ءَ سرمچاراں کیچ ءَ تمپ ءِ دمگ آزیان ءُ برت ءَ پاکستانی پوج ءِ پانگسانی سر ءَ اسنائپر رائفل ءَ گوں اُرش کتگ ءُ زورگریں پوج ءِ دو کارندہ کُشتگ اَنت –

میجر گْوھرام بلوچ ءَ دیمتر ءَ گْوشتگ کہ شش اگست ءَ پاکستانی پوج ءَ پیراندر ءُ دراج کور ءَ لشکر کشی کنان ءَ لَس مھلوک لَٹ ءُ کُٹانی نشانگ کتگ اَنت ءُ واتر بوگ ءَ سرمچاراں آواران ءِ دمگ دراج کور ءَ پاکستانی پوج ءِ یک گاڑی یے گوں چیرکتگیں تراکے ءَ نشانگ کتگ، اے اُرش ءِ آسر ءَ پوج ءَ جانی ءُ مالی تاوان چست کنگ کپتگ-

جارکش ءَ دیمتر ءَ گْوشتگ کہ راج پوجی کاروانانی ءُ آیانی ھمکاراں چہ ءَ وت ءَ گستا بدار اَنت ، سرمچاراں کجام وھد ءَ نشانگ کت کن اَنت ءُ اے اُرش داں بلوچستان ءِ آجوئی ءَ برجاہ بنت-

اوگانستان ءِ بازیں جاھاں تالیبان ءُ اوگان لشکر ءِ میان ءَ جنگ ءُ چوپ برجاہ اَنت، گوستگیں روچ ءَ امریکی جنگی بالیگاں ھم بازیں جاھاں بمبگواری کرتگ ءُ اود ءَ بازیں کچے ءَ جانی تاوانانی گمان کنگ بیتگ اَنت –

دومی نیمگ ءَ اوگانستان ءِ بازیں جاہ تالیبان ءِ دستیگی ءَ گندگ ءَ آیگ ءَ اَنت ءُ دو نیمی جنگ ءُ چوپاں بازیں تالیبانی کوش ھم اوگانستان ءِ لشکر ءَ شنگ کرتگ اَنت –

ھمے وڑ اوگان راجی پھزگ ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 579 تالبان جنگول کُشتگ اَنت ءُ دِگہ 161 ٹپی کرتگ اَنت۔ راجی پھزگ ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرگار، ھوست، لوگر، پکتیا، کندھار، ھرات، پراہ، جوزجان، سمنگان، ھِلمند، ٹکھر، کندوز ءُ پنجشیر ءِ ھند ءُ دمگاں کرتگ اَنت۔

راجی پھزگ ءَ وتی یکشلیں ٹیوٹر پیگاماں گیشترّیں سرپدی دیان ءَ گْوشت کہ ولایت ھِلمند ءِ بُنجاھی شھر لشکرگاہ ءِ نزیکیں کُوچّگاں اوگان راجی لشکر ءِ بالیگراباں جنگی اُرش کنان ءَ تالبان وتکشی گلانی سرکماش بشیر انیس گوں دِگہ 3 ھاسیں کمانداراں ھوار 63 ناشرکاریں تالبان ءِ جنگول کُشتگ اَنت ءُ 17 زدگ کُتگ اَنت، اے اُرشاں تالبان ءِ بازیں سِلاہ ءُ جنگی ساز ءُ سامان ھم تباہ کنگ بوتگ اَنت۔

گیشتریں سرپدی یے دیان ءَ گْوشت ئِے کہ ولایت کندھار ءِ ڈند ءُ زری دمگ ءِ نزیکیں ھند ءُ دمگاں ھم اوگان راجی لشکر ءِ جنگی بالیگُرابانی اُرش کُتگ چریشی ءَ 16 تالبان جنگول مُرتگ ءُ دِگہ 6 ٹپی بوتگ اَنت۔ اے اُرشاں تالبان ءِ 8 سنگر، 3 پِرپٹ ءُ سِلاہ تباہ کنگ بیتگ اَنت، ھرات شھر ءِ انجیل دمگ ءَ راجی لشکر ءِ جنگی اُرشاں 9 ناشرکاریں تالبان کُشگ ءُ دِگہ 5 زدگ بیتگ اَنت ءُ ماں اے جنگی اُرشاں تالبان ءِ بازیں جنگی آسراتی ءُ سِلاہ ءِ کوت ھم تباہ کنگ بیتگ اَنت۔

راجی آشوبی گلانی کُمک ءَ اوگان راجی لشکر ءَ تالبان ءِ اُشاں پْروش دیان ءَ گوریچی ولایت بلگ ءَ دھادی دمگ ءِ کوچگ کودبرک چہ تالبان ءِ دستگیری ءَ آجو کنائینتگ اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 572 تالبان جنگول کُشگ ءُ 309 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرھار، لولمان، گزنی، پکتیا، کندھار، اُرزگان، ھِرات، پراہ، جوزجان، سرئے پُل، ھِلمند، نِمروز، ٹکھر،کُندوز، بدکشان ءُ کاپیسا ءِ ھند ءُ دمگاں کرتگ اَت اَنت۔

دومی نیمگ ءَ اوگانستان ءِ بنجاھی شھر کابل ءَ سروک اشرف گنی ءِ سروکی ءَ سیاسی جاور ءُ جنگی جاورھالانی سر ءَ نیاد کنگ بیتگ –

نیاد ءَ سیاسی مھلوک ءِ سروکاں بھر زرتگ ءُ دمگانی ناگیگیں جاورھالانی سر ءَ گپ ءُ باوست ءُ نوکیں گامگیجانی سر ءَ سوڑگ بیتگ اَنت –

نبشتانک: پت ءِ پَنت پہ مھروانیں بچ ءَ

نبشتہ کار: ھاتر اسلم

دی بلوچستان پوسٹ

دْروت منی چم ءِ چراگ منی دوزواھیں بچ مرچی منی دل ءَ لوٹ اِت کہ پہ تو نِمدی یے نبشتہ بہ کن آں ءُ ترا لھتیں نسیّت بہ گْوش آں منی جگر نوں شری ءِ سر ءَ دِلگوش کن، تو تھنا اے دنیا ءَ آتگ ئے ءُ تھنا سَپر کن ئے داں کہ زندگ ئے اُمیت کس ءَ چہ مہ دار ، کسی گِلگْ ءَ مہ کن ، کس ءَ بد مہ گْوش ، وت ءَ چہ ھرکس ءَ دُور بہ دار، تو سَتّر دَزگَٹ بہ بہ بَلے کس ءَ مہ گْوش منی کُمَک ءَ بہ کن اے دنیا گوں کس ءَ وپادار نہ بیت، اے مردم کسی مھروان نہ بنت منی ساہ، پَد ءَ مئے چاگرد ءِ وَ گپ کنگ نہ بیت پرچا کہ اِد ءَ کَھر ءِ بادشاھی اِنت، مھر ءِ نام ءُ نِشان نیست ءُ نہ کہ اِد ءِ راجدوست ءُ اِنسان دوستیں مردمان ءَ کَدر ھست-

اگاں تو وتی پت ءِ ھبَر ءَ زور ئے من گْوش آں، وتی کِرّد ءُ کاراں اے دنیا ءِ دیم ءَ آرَگ ءِ جُھد ءَ مہ کن، وت ءَ مُدام چہ دنیا ءَ دُور بہ دار ءُ بس ھچ مہ گْوش ، ھنچوش بہ پھم کہ زی تئی پت مُرتگ ءُ تو انگت پُرسیگ پرچا کہ اے دنیا ءَ یک بَلاھیں رَسمے ھست آ رَسم ترا ھچ وڑ ءَ لگتمال کنگی نہ اِنت-

اگاں تو مَزنیں کِردے ءِ واھند بوت ئے ءُ یک نوکیں جھدے بندات کرت انگت ترا دنیا ءَ شریں نامے نہ رَس اِت گڑا دلجَم بو تئی مرگ ءَ چہ پہ سَرجمیں مردم، تئی دوست دژمن وتی ‘profile’ اَکساں سیاہ کن اَنت، داں لھتیں روچ ءَ تئی اکس ءُ گُشتین ءَ وتی ‘Status’ کن اَنت تئی مرگ ءَ وت ءَ سَک گَمیگ کن اَنت لھتیں شائر پہ تو شھر پِر بند اِیت لھتیں نبشتہ کار پہ تو نمدی ءُ نبشتانک نبشتہ کنت اے سرجمیں مردم وت ءَ تئی مھرانی وامدار کن اَنت-

منی چَمروکیں بَچ، اے دنیا ءِ رسم ھمیش اِنت کہ زندگیں مردم ءَ کَدر نیست آ کہ مر اِیت گڑا آئی ءِ اِزّت آزمان ءَ سر بیت ءُ ھر کس وت ءَ گوں آئی ءَ نزّیک کنگ لوٹ ایت من پمیشکا گْوش آں ترا ھچ گلگ کنگی نہ اِنت اے دنیا ءِ رسم اَنت ءُ ترا اے رسم ھچ وڑ ءَ لگتمال کنگی نہ اَنت پد ءَ مئے چاگرد ءِ رسم انگت گیشتر اَنت اِد ءَ گیشتریں شائر ءُ نبشتہ کار مُرتگیں مردمانی توسیپ ءَ دَزگٹ اَنت آیاں ھچ وھد نہ رَس اِیت کہ زندگیں مردماں اے راہ ءَ بیار اَنت ءُ یک شریں کرد ءِ واھند بہ کن اَنت-

اَڑے بابا من و بہ ھیال آں کہ زانگ جنگ آں! پھل کن- من بَلے اے ھبَراں گوں دگہ کس ءَ نہ گوش آں بس ترا یک سوجے دات کہ مئے چاگرد ھمے آس ءَ سُچان اِنت بلے اے گپّاں گوں دگہ ھچ کس ءَ نہ کن ئے کہ منی پت ءَ من ءَ چوشیں پنتے داتگ بَلے اے پنت ءَ وتی کَستِریں برات ءُ وتی چُکاں اَلّم بہ گوش تو سرپد ئے نوں من وَ تھت ءِ باھوٹ آں بہ گند ئے گیش سپر کت مہ کن آں-

تئی کَماشیں پت رھمدل

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ سیستان ءُ بلوچستان ءِ دارالعلوم زاھدان ءِ شوھاز تسنیف ءِ بنجاہ ءِ سروک استاد ادھم سپاھی ماں نادراھی ءِ سبب ءَ بیران بیتگ –

سنی بلوچی آنلائن تندجاہ ءِ رد ءَ آ ماں گوستگیں روچ ءَ یزد ءِ شھر ءَ یک نادراہ جاھے ءَ ناجوڑی ءِ سبب ءَ بیران بیتگ –

استاد ادھم سپاھی ءِ بارو ءَ گوشگ بیتگ کہ آئی ءَ دارالعلوم ءَ تدریس ءَ گیش دگہ بھراں چُشکہ اربی زبان، لبزانکی بھر، پاری زبان ءُ لبزانک ءِ بھر وتی کلاسانی تہ ءَ نودربراں کرتگ اَنت –

استاد ادھم سپاھی ءِ بارو ءَ گوشگ بیت اِنت آئی ءَ دزاپ ءَ ھوار سیستان و بلوچستان ءِ مزن شھدربرجاہ ءَ ھم استادی ءُ زانت ءُ زانشی ھیل داتگ اَنت ءُ اشی ءَ ابید ھم زاھدان ءِ مزن شھدربر جاہ ءَ ھم استادے بیتگ –

ڈاکٹر ادھم سپاھی ءِ بارو ءَ گوشگ بیت اِنت کہ آ سیستان و بلوچستان ءِ دمگ سیب ءُ سوران ءِ میتگ ءَ ودی بیتگ –

آئی ءَ بازیں المی ءُ ھیلکاری جھداں ھوار نیکراھی وانگجاہ، سرکار ءُ دگہ تکاں مزنیں کردے زانگ بیتگ –

بلوچ اسٹوڈنٹس ایکشن کمیٹی پنجگور ھنکین ءِ نیاد ھنکیں گوستگیں سروک شاھنواز بلوچ ءِ چیردستی ءَ برجم دارگ بیتگ کہ چریشی ءَ بنجاھی کمک ھالرسان عارف بلوچ گچینی مھمان ءُ بنجاھی پتر ءِ باسک وھید اباس ھواریں مھمان بیتگ –

نیاد ءَ بنجاھی سرپدی، گوستگیں جاورھال، شرگداری، گلی رھبند، دمگی ءُ میان اُستمانی راجداری ءِ درگت ءَ گپ ءُ باوست بیگ ءَ پد نوکیں گامگیج ءِ سر ءَ شوربندی ءَ نوکیں ھنکین ءِ گچینی کاری بیتگ کہ چریشی ءَ مختار میرک بلوچ ھنکین سروک ءُ زاھد دوست بلوچ کارگشاد نامینگ بیتگ –

نیاد ءَ تران کنان ءَ بنجاھی ھالرسان کمک عارف بلوچ ءَ گُشتگ کہ اے وھد ءَ بلوچ نودربر راجداری ءَ یک جوانیں وھدے گوزگ ءَ اِنت ھمود ءَ نودربر زانت ءُ زانش ءِ بنکی درگیجگ ءَ دزبند اَنت – بلوچ اسٹوڈنٹس ایکشن کمیٹی وتی گلی نیادانی زور ءَ نودربراں راجداری، زانت ءُ زانشی ءِ ھیلکاری ءِ واستا زمینی جاورھالاں چاران اِنت – گل ءِ مھکمی ھمے سرپدی نیادانی تہ ءَ اِنت ھمے سبب ءَ بساک ءِ نودربراں زھنی ردوم ءِ واستا یک پالیسی ءِ داریت اِت اِنت دانکہ بلوچ نودربر سیاست ءِ واستا یک مھکمیں ءُ برجمیں پترے ساجو بہ بیت کہ دانکہ آیوکیں وھداں دیم ءَ اتکگیں جیڑھانی دیمپانی ءَ کُت بہ کن اَنت زھنی ردوم ءِ واستا کتاب دودمان ءِ چراگ المی اِنت، کتاب دودمان ءِ تالان کنگ ءَ گل ءِ نیمگ ءَ یکشلیں جھد برجاہ اَنت کہ اے کار ءِ واستا بازیں سوبمندی بیتگ اَنت بلے انگت ءَ اے کاروان دیم ءَ جنزان اِنت – ایشی ءِ ھمراھی ءَ گل ءِ نیمگ ءَ سرجم ءَ وانگ، بلدکاری ءُ دگہ تکاں زانشی نیاد المی ءِ رنگ ءَ دارگ بیگ ءَ اَنت چُشکہ نودبرانی زھنی ردوم ءِ تہ ءَ باز گچینی کرد پیلو کرت کن اَنت –

آئی ءَ گُشتگ کہ بلوچستان ءَ اے وھد ءَ ناوشیں سیاسی، انسانی ناپھتوی ءِ دیمپان اِنت ھمے وڑ ءَ وانگی تک ھم گڈی ساہ ءَ دمینگ ءَ اَنت بازیں جاھاں وانگ ءِ واستا وانگجاہ، شھدربرجاہ نیست اَنت بازیں جاھاں آسراتی نیست اَنت ھمے وڑ ءَ مزنیں وانگجاھاں ھم نودربر بازیں جیڑھانی دیمپان اَنت سرجمیں بلوچستان ءَ وانگی ادارھانی گھتری ءِ واستا بساک ھروھد ءَ پیشگام اِنت – بلوچ دمگاں وانگی تکانی سرپدی ءِ واستا “بلوچ لٹریسی کمپین “بساک ءِ نیمگ ءَ برجاہ اَنت –

بنجاھی پتر ءِ باسک وھید اباس ءَ وتی تران ءِ تہ ءَ گُشت: پنجگور ءِ شھر ءَ گل ءِ باھینگ وشیں گپے یک ھنچیں وھدے بیتگ کہ اد ءَ سیاست ءِ سر ءَ گپ کنگ بیتگ مروچی نودربر گلی پتراں زانتی جد ءُ جھد ءِ بھر بوگ ءَ اَنت بساک ءِ ھمراھانی اے جپاکشیں جھد اَنت کہ مروچی گل بلوچ پھناتاں وتی ریشگ ءَ ایر کنگ ءَ اِنت ءُ نودربرانی سیاسی، زانتی ءُ زانشی ھیلکاری ءِ واستا سرگام اِنت – امیت اِنت کہ پنجگور ھنکین نوکیں گیچین اگدوداع زمینی جاوراں تپاس کنان کن اَنت ءُ سرجمیں پنجگور ءَ نودربر سیاست ءَ برجم دارگ ءَ وتی کرد ءَ پیلو کن اَنت –

گڈی ءَ سرگپ ءِ ھلاسی ءَ گوستگیں کابینہ ھلاس کنگ بیتگ ءُ نوکیں کابنیہ اڈ کنگ بیتگ چریشی ءَ مختار میرک بلوچ سروک، سمیر بلوچ کسان کمک سروک، زاھد بلوچ کارگشاد، عطاء اللہ کسان کمک کارگشاد ءُ عدنان بلوچ ھالرسان نامینگ بیتگ اَنت –