TBP Balochi

بلوچستان ءِ بنجاھی شھر شال ءَ ناشناسیں مردماں بیرک بھا کنوکیں ریڑھی ءِ سر ءَ دزبمبے چگل داتگ-

اے وئیل شال سرکی دگ چلتن گھی مل ءِ نزیک ءَ پیش اتکگ کہ اود ءَ پاکستانی بیرک بھا کنوکیں دکان ءِ سر ءَ دزبمبے چگل دیگ بیتگ –

بلے تنی وھدی دگہ جانی تاوان نہ بیتگ اَنت، تراک ءِ ھال ءِ سربوگ ءَ سیکیورٹی لشکر ءُ پولیس سر بیتگ ءُ دمگ اش انگیر ءَ کرتگ ءُ بم ڈسپوزل اسکواڈ ءِ کارمند بمب تراک ءِ پَٹ ءُ پول ءَ بندات بیتگ اَنت –

زانگ بہ بیت بلوچ آجوئی لوٹوکیں سلاہ بندیں گل بی ایل اے ءَ اشی ءَ پیسر شال ءَ ھمے رنگیں سَے اُرش شال ءِ جتا جتائیں جاھاں کرتگ اَنت کہ اود ءَ پاکستانی بیرک بھا بیگ ءَ بیتگ اَنت –

بی ایل اے ءِ جارکش ءَ رسانکدراں شنگ کرتگیں بیان ءِ تہ ءَ گُشتگ کہ بی ایل اے یک رندے پد ءَ بلوچ مھلوک ءَ سرپد کنت کہ ھروھد ءِ رنگ ءَ اے بر ءَ ھم زورگریں پوج ءِ وتگڑیں آجوئی جشن ءِ مراگشاں دور بہ بنت، بلوچ سرمچار کجام ھم وھد ءَ اے وتگڑیں مچی ءُ جشن ءُ دشمن ءِ گوشگ ءَ مراگش داروکاں نشانگ کت کن اَنت – بی ایل اے بیھار ءَ پد اگاں کسے اے اُرشانی نشانگ ءَ اتک گڑا آ وتی زمہ وار وت بیت اِنت مارا کسے ءِ ھمدردی نہ کپ ایت اِنت –

تنی وھدی اے اُرش ءِ زمہ واری ھچ گل ءَ نہ من اِتگ –

ٹی بی پی پتر ھال ءَ سر بیتگیں ھالانی رد ءَ بلوچستان ءِ پنجگور ءَ سلاہ بندیں ہرپٹ سواراں تیرگواری کرتگ ءُ یک مردمے کُشتگ ءُ یکے زدگ کرتگ –

گیشیں ھالانی رد ءَ وئیل پنجگور ءِ دمگ تسپ پھنچی ءَ دیم ءَ اتکگ کہ اود ءَ سلاہ بندیں مردماں تیرگواری کرتگ ءُ یک مردمے زدگ کرتگ ءُ یکے کُشتگ –

بیران بیتگیں مردم ءِ پجار مھمد ھسین ء جمعہ ءُ زدگ بیتگیں مردم ءِ پجار مھمد علہ ء رحمت ءِ نام ءَ زانگ بیتگ –

دمگی مردمانی رد ءَ ھرد وتی پرپٹ ءَ سوار بیتگ ءُ وتی لوگ ءَ روگ ءَ بیتگ اَنت کہ ناشناسیں پرپٹ سواریں مردماں تیرگواری ءِ نشانگ کرتگ اَنت –

بیران ءُ زدگ بیتگیں مردم پولیس ءَ چست کرتگ ءُ ھسپتال ءَ سر کرتگ اَنت –

زانگ بہ بیت چریشی ءَ پیش پنجگور ءَ یک کسان سالیں زھگے پرپٹ ءِ دمب ءَ گران کنگ ءَ پد کشگ بیتگ اَت کہ آئی ءِ وئیل ءِ پشدر ءَ بلوچستان ءِ جتا جتائیں جاھاں زھرشانی ھم بیتگ اَنت بلے تنی وھدی آئی ءِ کشندہ دزگیر کنگ نہ بیتگ اَنت –

مستونگ ءَ چار سال پیش بیگواہ بوتگیں یک مردمے یلو کنگ بیتگ ءُ وتی لوگ ءَ سر بیتگ –

سربوتگیں ھالانی رِد ءَ چہ مستونگ ءَ 20 اکتوبر 2017 ءَ زورانسری آوار جنگ بوتگیں عبدالغفار ء محمد صالح چار سال ءَ رند یلو بوتگ ءُ وتی لوگ ءَ سر بوتگ –

بلوچ بیگواہ بوتگیں مردمانی توار چِست کنوکیں گَل وائس فار بلوچ مسنگ پرسنز ءَ عبدالغفار ء محمد صالح یل بوگ ءِ گپ راست کُتگ-

وائس فار بلوچ مسنگ پرسنز عبدالغفار ء محمد صالح یل بوگ یک وشی یے ءُ گوشتگ کہ بیگواھیں مردمانی یل بوگ ءَ یک جوانیں گامگیجے کہ ما اشی ءَ یک جوانیں وڑے ءَ چار ایں ءُ اے اُمیت کن ایں کہ سرکار آ دگہ بیگواھیں مردماں یل کنائینگ ءَ ھم باور کنائین اِیت ءُ گماں گوں دوچاریں کھولاں مدامی پہ اے ازابیں زند ءَ رکین اِیت-

ھمے وڑ کیچ ءِ دمگ بلیدہ ءِ ھند الندور ءَ مروچی سُھب ءَ پاکستانی پوج ءَ بیڑبرتگ ءُ زوراکی کنان ءَ یک بلوچ ورنایے زورانسری آوار جتگ ءُ بیگواہ کتگ –

آوار جنگ بوتگیں ورنا ءِ پجّار شھاب ء بشیر نام ءَ چہ زانگ بوتگ-

گوستگیں یک ھپتگے ءِ تہ ءَ بلیدہ ءِ دمگ میناز ءَ پنچ کسان سالی ئیں نودربر آوار جتگ ءُ بیگواہ کنگ بیتگ اَنت تنی وھدی بیگواہ اَنت-

زانگ بہ بیت بلوچستان ءِ جتاجتائیں دمگاں اگاں یک بیگواھیں مردمے یل کنگ بیت گُرا دگہ دہ آوار جنگ ءُ بیگواہ کنگ بیت بلوچستان ءَ چُشیں روچے نہ اِنت مردم بیگواہ کنگ نہ بنت-

چاردہ اگست یک سیاھیں روچے ، راج زورگریں لشکر ءِ مُچیاں چہ گستا بہ بنت- میجر گوھرام بلوچ

بلوچستان لبریشن فرنٹ ءَ تربت ءِ دمگ آپسر ءَ چوکی سر ءَ بوتگیں دزمب اُرش ءُ جاؤ ءَ بوتگیں پوج چوکی ءِ سر ءِ اُرشانی زمہ واری منّ اِتگ اَنت-

بی ایل ایف ءِ جارکش میجر گْوھرام بلوچ ءَ ناشناسیں ھندی ءَ رسانکدر ءَ شِنگ کتگیں وتی یک درشانے ءِ تہ ءَ گْوشتگ کہ مئے سرمچاراں کیچ ءِ بُنجاھی شھر تربت ءَ گوستگیں شپ ءَ سھت ھشت ءُ بیس ءُ پنچ دمان ءَ آپسر آپدوک کور ءِ سر ءَ ھستیں پوج ءِ چیک پوسٹ گوں دزبمب ءَ نشانگ کتگ-

دزمب چیک پوسٹ ءِ تہ ءَ کپتگ ءُ چریشی ءِ آسر ءَ چیک پوسٹ ءِ تہ ءَ ساڑی ئیں پوج ءِ کارندہ مرتگ ءُ ٹپی بوتگ اَنت –

جارکش میجر گْوھرام بلوچ ءَ دیمتر ءَ گْوشتگ کہ ما گوں بلوچ راج ءَ را دزبندی کن ایں آ پوجی چیک پوسٹاں ، سرکار ءِ کمکاراں ءُ دشمنیں پوج ءَ چہ گستا بہ بنت – چاردہ اگست پاکستانی آجوئی ءِ درگت ءَ چہ مردماں جتاجتائیں پندلانی سر ءَ بُنجلاں لوٹائینگ ءَ اَنت – آ چہ اشاں گستا بہ بنت، سرمچار آھاں کجام ھم وھد ءَ نشانگ جوڑ کُت کن اَنت – چاردہ اگست یک سیاھیں روچے – اے روچ ءَ پاکستان جوڑ بوتگ اَتکگ ءُ بلوچستان دستگیں کتگ ءُ ھپت کرناں چہ مئے سر ءَ زورانسر اِنت-

جارکش ءَ دیمتر ءَ گْوشتگ کہ بلوچستان لبریشن فرنٹ ءِ سرمچاراں ضلع آواران ءَ جاؤ ءِ دمگ بارگیں گزی ءَ ھستیں پوجی چوکی ءِ سر ءَ گوں راکٹ ءُ مزنیں سلاھاں نشانگ کتگ – اے اُرش ءَ دشمنیں پوج ءَ جانی ءُ مالی تاوان چست کنگ کپتگ-

میجر گْوھرام بلوچ ءَ گْوشتگ زورگریں لشکر ءِ سر ءَ اُرش داں زورگرگپتگیں بلوچستان ءِ آجوئی ءَ برجاہ بنت-

سر بیتگیں ھالانی رد ءَ اوگانستان ءَ برجاھیں تالیبان ءُ اوگان لشکر ءِ میان ءَ بازیں جاھاں برجاھیں جنگ ءُ چوپاں تالیبان ءَ جانی تاوانانی دیمپانی اِنت –

دومی نیمگ ءَ اوگان لشکر ءَ وتی ھمروچی ئیں ٹیوٹر جاراں گْوشتگ کہ گْوستگیں بیست ءُ چار ادارانی تہ ءَ اوگان راجی لشکر ءَ وتی تْرُندیں جنگی اُرشاں 361 تالبان جنگول کُشتگ اَنت ءُ دِگہ 145 ٹپی کرتگ اَنت۔

راجی دیمپانی ءِ کارگس ءَ گیشتریں سرپدی دیان ءَ گْوشتگ کہ اوگان راجی لشکر ءَ اِے ٹوھیں جنگی اُرش ولایت نگرگار، کُنر، لوگر، پکتیا، پکتیکا، میدان، واردک، کندھار، سرئے پُل، ھلمند، کندوز ءُ بلگان ءِ ھند ءُ دمگاں کرتگ اَنت۔

راجی دیمپانی ءَ وتی یکشلیں ٹیوٹر پیگاماں گیشتریں سرپدی یے دیان ءَ گْوشت کہ ولایت کندھار ءِ ڈند، زَھریہ ءُ تھتپُل ءِ نزیکیں کُوچّگاں اوگان راجی لشکر ءِ بالیگراباں جنگی اُرش کنان ءَ تالبان ءِ 47 ناشرکاریں تالبان جنگول کُشتگ اَنت ءُ دِگہ 25 زدگ کُتگ اَنت، اے اُرشاں تالبان ءِ 2 چیریں سنگر سِلاہ، جنگی ساز ءُ سامان ھم تباہ کنگ بوتگ اَنت۔ ھمے وڑ ءَ زی ئیں دِیگر ءِ وھد ءَ ولایت بلگ ءِ ڈھادی دمگ ءَ اوگان راجی لشکر ءِ جنگی بالیگُرابانی اُرش ءَ 150 تالبان جنگول مُرتگ ءُ دِگہ 19 ٹپی بوتگ اَنت ءُ اے اُرشاں ھم تالبان ءِ بازیں جنگی آسراتی ءُ سلاہ ءِ کوت ھم تباہ کنگ بیتگ اَنت۔

ولایت ھِلمند ءِ بُنجاھی شھر لشکرگاہ ءُ آئی ءِ نزیکیں دمگاں اوگان راجی لشکر ءِ جنگی بالیگُرابانی بمب گْواری ءُ راجی لشکر ءِ اُرشاں ناشرکاریں تالبان ءِ 3 جنگی سروک ءَ ھوار 76 تالبان کُشگ ءُ دِگہ 30 ٹپی بوتگ اَنت۔ اے اُرشاں تالبان ءِ بلاھیں جنگی سلاہ ءِ کوت ھم تباہ کنگ بوت اَنت۔

زانگ بہ بیت کہ ولایت ھِلمند ءِ بُنجاھی شھر لشکرگاہ دو ھپتگ پیسر ناشرکاریں تالبان ءِ دست ءَ کپتگ اَت۔ پد ءَ اوگان راجی لشکر ءَ ٹوھیں جنگی آپریشن کنان ءَ تالبان ءَ پْروش دات ءُ شھر چہ اوگان تالبان ءَ آجو کنائنت۔ یات بہ بیت کہ لشکرگاہ ءِ جنگ ءَ اوگان راجی لشکر ءِ ڈائریکٹر جنرل آپ ملیٹر آپریشن جنرل سمھی سھات وت سرپانی کنگ ءَ اِنت۔

راجی آشوبی گلانی کُمک ءَ اوگان راجی لشکر ءَ تالبان ءِ اُشاں پْروش دیان ءَ گوریچی ولایت بلگ ءَ دھادی دمگ ءِ کوچگ کودبرک چہ تالبان ءِ دستگیری ءَ آجو کنائینتگ اَنت۔
دومی نیمگ ءَ تالبان ءِ سنگر ءُ جنگی کاروانانی سر ءَ امریکی B-52 جنگی بالیگرابانی اُرش ھم یکشل ءَ برجاہ اَنت۔ ولایت کاپیسا ءِ دمگ نجراب ءِ کوچگ تپائے اھمدبیک ءَ امریکی جنگی بالیگراباں بمب گْواری کنان ءَ 2 پاکستانی ءَ ھوار 12 تالبان جنگول کُشگ بیتگ اَنت۔ اِے امریکی اُرش ءَ تالبان ءِ نامداریں جنگی کماندار کاری زھیر، کاری اُسامہ، کاری آباس ءُ کاری زیل گُل ھم کُشگ بوت اَنت۔

زانگ بہ بیت کہ چہ ایشی ءَ پیشی روچ ءَ اوگان ءِ راجی لشکر ءِ تْرُندیں جنگی اُرشاں 579 تالبان جنگول کُشگ ءُ 161 ٹپی بیتگ اِت اَنت۔ اوگان راجی لشکر ءَ ھمے جنگی اُرش ولایت نگرگار، ھوست، لوگر، پکتیا، کندھار، ھرات، پراہ، جوزجان، سمنگان، ھِلمند، ٹکھر، کندوز ءُ پنجشیر ءِ ھند ءُ دمگاں کرتگ اَت اَنت۔

دومی نیمگ ءَ اوگانستان ءِ واستا امریکہ ءِ نمائندگ زلمے خلیل زاد سَے شمبے ءِ روچ ءَ قطر ءَ رھاد بوتگ کہ اود ءَ اوگان تالیبان ءِ رھشوناں گوں دُچار کپ ایت اِنت –

ھمے وڑ گوستگیں روچ ءَ چاگردی رسانکجاہ ٹوئٹر ءَ ھم سینکشن پاکستان ھیش ٹیگ بزاں پاکستان ءِ سر ءَ بندش جنگ ءِ لوٹ کنگ بیتگ اَنت –

اے ٹوئٹر ھیش بازیں جھانی مردماں کارمرد کرتگ ءُ یورپی ڈیھاں اے ھیش ٹیگ ٹرنڈ بیتگ ءُ آیانی بھتام اِنت کہ پاکستان اوگانستان ءَ برجاھیں جنگ ءَ تالیبان ءَ چیرکائی کمک کنگ ءَ اِنت –

نبشتانک: منی گار بوّگ ءَ ساری

نبشتہ کار: براھیم گُؔل

(ھشتُمی بَھر)

دی بلوچستان پوسٹ

مِھروان ! منی راج مُدام دومی ءِ چمداری ءِ اوست ءَ نِند ایت داں کہ تو آئی ءِ کار ءَ آسانی بیار ئے ءُ آ پد ءَ پہ وشّی وتی کار ءَ بِہ کنت بَلے ھمے راج کدی نہ جیڑ ایت کہ مُدام وشّیانی تہ ءَ بِہ بہ بہ اِت گُڑا وشیانی تام روت،مُدام کہ چِیزے مُپت ءَ بِہ رسیت داں آ چیز ءِ تام روت اَنچو کہ ” گوس بھار گْوش ایت کہ واجہ سَید زھور شاہ ھاشمی ءَ را ناٹاپیں ملکموت ءَ اے گپ ءِ موہ نہ دات کہ کمیں وھد زِندگ بہ بوتین ءُ واجہ سَید ساھب ءَ اے بلوچی زُبان ءُ اربی زُبان ءِ نام ءُ آبانی اڑ ءُ جنجال گِیش ءُ گیوار بُہ کُتین ۔

اگاں ھمے زُبان ءِ اربی ءُ بلوچی نامانی ءُ آبانی اڑ ءُ جنجالانی سر ءَ تو اگاں جُھد بِہ کن ئے ترا چی بیت؟ ھمے کار کہ واجہ سَید زھور شاہ ھاشمی ءِ نیم دَگ ءَ اوشت ءِ آماچ بوت ھمے کار ءَ تو دیم ءَ بِہ بَرئے ترا چی بیت؟ ھمے واجہ سباہ دشتیاری ساھب اِنت کہ سَید ءِ گِسر کپگ ءَ چہ رَند واجہ ءَ زُبان ءِ سرجمیں بار وتی کوپگاں زُرت ءُ زُبان ءِ ھر تَک ءُ پھنات سباہ ءَ پہ مُھکمی بُرت ءُ منزل ءَ را دات ، بَلے واجہ 2011 ءَ ماں شال ءِ دلبند ءَ گونڈلیں تیرانی آماچ بوت ءُ کاروان پد ءَ اوشت ءِ آماچ بوت۔

ھمے لُمھیں شھید بانُک کریمہ بلوچ ءِ دَرور ءَ بِہ دیاں ، بانُک ءَ وتی جُھد داں کُجا کُجا سر نہ کُتگ ، ھما جاہ ءَ بُرتگ ئِے کہ ما ءُ تو ھِچ ھیال کُت نہ کن ایں ، کینڈا ءِ وڑیں جاھے ءَ بانُک ءِ ڈولیں شِیر زالے ءُ ھساریں جُھدے بِہ کنت جُھد ءَ کُجا بِہ بارت تو وت بِہ جیڑ ھمے ” سَید ءُ سباہ ءُ کریمہ ” کہ مرچی اَچ ما جتا کنگ بیتگ اَنت گُڑا مرچی گون نہ اَنت منی ءُ تئی واست ءَ گِسر کپتگ اَنت پہ وتی گُلزمین ءَ گِسر کپتگ اَنت پہ وتی راج ءَ گِسر کپتگ اَنت پہ وتی زُبان ءَ گِسر کپتگ اَنت یک سَیدے کہ سرجمیں زُبانے زندگ کُت کنت گُڑا تو سرجمیں راجے ءِ تو پرچا یک مُشت نہ بے ءُ زُبان ءَ ھساریں سنگراں نہ بَر اِت-

مِھروان ! من دوشی سک گِریتگ من سرجمیں شپ ءَ گِریتگ کہ منی راج پرچا ایوک ءَ یکّے ءِ سر ءَ اوشتوک بیت پرچا منی راج یک مُشت نہ بیت ! من ءَ پد ءَ سک تُرسیت کہ من ءَ چہ پَد منی راج ءِ آکبت کُجا کُجا سر بیت ” اے رمگ ءَ گُرک وارت ” بَلے اِنّا مِھروانُک منی گار بوگ ءَ ساری ترا اے ھیال برجم دارگی اِنت کہ تئی راج یک مُشت نہ بیت گوں تو تئی راج ءَ زُبان ءِ گم نہ اِنت تئی راج وت دوستیں راجے تئی راج ءَ را زَرّ ءُ تِلاہ ءِ درکار اِنت بس تئی راج لوٹ ایت کہ منی ایش ءُ تما پِیلو بِہ بنت تئی راج پہ ایش ءِ پُشت ءَ سک بازیں بےزات ھست اَنت وتی گُھارانی گُشان ءَ اوں بھا کن اَنت۔

مِھروان !من چی بُہ گُش آں؟تئی راج ترا گوں یک مُشت نہ بیت نہ اِت گوں بَلے ترا ھر وڑ ءَ مُھکم بوگی اِنت ترا سَید بوّگی اِنت ترا سباہ بوگی اِنت ترا کریمہ بوگی اِنت ءُ ترا وتی راج یلو دَیگی نہ اِنت۔

بِلّے کہ مرچی تو تھنا ئے ، بِلے کہ ترا کَس گون نیست ،بَلے بُہ جنز ءُ روان کن، اے من پہ دلجمی گْوشت کن آں کہ ، باندا سرجمیں راج تئی ھمراہ بوگ ءَ پہ لاچار بیت ترا تئی زُبان زورگ ءُ رَوگی اِنت دیم پہ منزل ءَ من ساری ءِ بَھرانی تہ ءَ ترمپ ءُ ھورانی دَرور داتگ اَت کہ ” تْرمپ تْرمپ ءَ دریا جوڑ بیت ” بِہ چار شھید ریھان ءَ کہ کمانڈر اسلم ءَ دست ءِ وت بمب بست ءُ پِدائی ئِے کُت ، بِہ چار ھمبل مرچی سرجمیں راج پِدائی اِنت۔

مِھروان ! منی گار بوگ ءَ ساری من ءَ ھمے یکیم بِہ کن کہ من ءَ چہ پَد تو منی زُبان ءَ کوہ گساراں سر کن ئے ءُ منی زُبان ھر ھُمک گِس ءَ مان ایت منی زُبان تئی میار اِنت مِھروان-
روان اِنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کرتگیں درشان ءِ تہ ءَ گْوشتگ کہ دوشمبے ءِ بیگاہ ءَ شال ءِ شھر رودرتکی شھدگ ءِ دمگ شیر جان اسٹاپ ءِ نزیک ءَ یک دکانے گوں دزبمبے ءَ نشانگ کتگ ءُ تباہ کتگ – نشانگ کتگیں دکان تھنا بی ایل اے ءِ گُڈی بیھار ءَ چہ پد زورگریں پاکستان ءِ وتساچیں شاتکامی آجوئی “جشن آزادی” ءِ درگت ءَ اسٹال جنگ بوتگ ءُ بیرک ءُ دگہ چیز بھا کنگ بوگ ءَ بوتگ بلکیں اد ءَ سادھیں پوشکانی تہ ءَ پولیس ءِ کارندہ بلوچ سرمچارانی چاریگی ءِ ھاتر ءَ نادینتگ بیتگ اَنت – نشانگ بوتگیں دکان ءِ واھُند وت یک پولیس کارندھے بوتگ – اُرش ءِ آسر ءَ دکان ءِ واھُند ءَ ھوار چار مردم زدگ ءُ یکے مرتگ – اے اُرش ءِ زمہ واری ءَ بی ایل اے منّ اِیت-

بوتگیں اُرش ءَ دکان ءِ تہ ءَ ساڑی ئیں لھتے مردم زدگ بوتگ اَنت – بی ایل اے تچکی ءَ اے بیھار ءِ جار شِنگ کتگ کہ راج ءُ لَس مھلوک زورگریں پاکستان ءِ وتگڑ ءُ وتساچیں شاتکامی ءِ مچّیاں ءُ اسٹالز ءَ چہ وت یک گستائیں جاھے ءَ بدار اَنت کہ گُڑا ناں آ وتی تاوانانی زمہ وار وت بنت – اے تراک ءِ آسر پیسر ءَ چہ کم کتگ دانکہ راھگوازاں جانی تاوانانی دیمپان مہ بنت – ما اے تچکی ءَ گْوشگ لوٹ ایں کہ مئے آؤکیں اُرشانی تہ ءَ تُرندی گیش کنگ بنت-

بلوچ لبریشن آرمی یکرندے پد ءَ اھد کنت کہ داں بلوچ ڈیھ ءِ وتواجھی ءَ مئے جُھد برجاہ بنت ءُ داں آجوئی ءَ دشمن ءِ وتساچیں شاتکامی وڑیں وتگڑیں پندلاں سوبیں بوگ ءَ نیل اِیت-

آزاد دستونک: بولان

حکیم بلوچ

دی بلوچستان پوسٹ

جنگانی مزن شانیں پِڑ اِنت بولان
آفتاب ءِ ھونانی زِر اِنت بولان

لیلا ءُ شاویز ءِ سنگر اِنت بولان
پہ دشمناں آس ءُ انگر اِنت بولان

ماما ءِ سنگتانی میار اِنت بولان
اسلم ءِ ھونانی کشار اِنت بولان

راجی ننگ ءِ دیمپان اِنت بولان
ریھان ءِ پادانی نشان اِنت بولان

مرید ءِ گزلانی ھانل اِنت بولان
بشیر ءِ شئرانی سمل اِنت بولان

ایرانی آمیدگس ءِ پرمان ءَ دو کس پاھو دیگ بیتگ اَنت، سیستان و بلوچستان ءَ بازیں کچے ءَ مردم نشہ ءُ دگہ وئیلانی سر ءَ ایرانی آمیدگس ءِ پرمان ءَ پاھو دیگ بیتگ اَنت –

ایرانی آمیدگس ءِ اے ھکم نامہ ءِ سر ءَ دری ڈیھاں ھوار ایران کار کنوکیں انسانی ھکانی گل ایر جنگ ءَ اَنت ءُ آ گُشگ ءَ اَنت ایران باید بندیگیں مردماں آمیدگسانی تہ ءَ تچک تچکیں پلگارگ ءِ موہ ءَ بہ دنت –

بلوچ کمپین فعالین ءِ رد ءَ ایرانی سرکار ءُ آمیدگس ءِ پرمان ءَ دو زندانی بلوچ کرمان ءِ مزنیں زندان ءَ پاھو داتگ اَنت –

ھردوکیں مردمانی پجار ھاجی نبی نوتی زھی ءُ ابراھیم قنبرزئی ءِ ناماں زانگ بیتگ اَنت –

اشانی بارو ءَ گُشگ بیت اِنت اے ھردوک پنچ سال ءَ پیسر نشہ ءِ باپاری بھتام ءَ دزگیر کنگ ءُ کرمان ءَ برگ بیتگ اَنت –

اشانی بارو ءَ گُشگ بیت اِنت کہ اشانی دزگیری ءِ وھد ءَ اے مردمانی گور ءَ دگہ نشہ ازباب ھم در نہ نیتکگ اَنت –

بلوچ کمپین فعالین ءِ رد ءَ اے مردمانی پاھو دیگ ءَ اشانی کھول ھم گُڈی گندک ءَ ھِلگ نہ بیتگ اَنت –

بلوچ کمپین ءِ فعالین ءِ رد ءَ اشانی ھواری ءَ گوستگین ماہ ءَ دگہ پنچ مردم مشھد، اسپھان ءُ کرمان ءَ پاھو دیگ بیتگ اَنت –

اشانی نام زبیہ اللہ ھومزی، مھراللہ سنجرانی ء ھبیب اللہ جھمند زاھدان، اعظم کیازئی ء سھراب جھمنند زاھدان، سید اسماعیل کرد تمینی ءُ مجید گلہ بچہ ءِ ناماں بیتگ اَنت –

اے گیشتریں مردم نشہ باپاری ءِ بھتام ءَ گرگ ءُ پاھو دیگ بیتگ اَنت چد ءُ پیسر ھم چوشیں کیس بیتگ اَنت –

وئیل بلوچستان ءِ دمگ شال، ھب، ھزدار ڈیرہ اسمائیل خان ءُ نسیراباد ءَ تیرگواری ءُ دگہ وئیلاں زالبولے ءَ ھوار پنچ مردم بیران بیتگ اَنت، چار زدگ بیتگ اَنت ءُ پولیس کارمندے ءِ جون دست کپتگ –

گیشیں ھالانی رِد ءَ بلوچستان ءِ دمگ ھب ءَ دگ ءِ وئیل ءَ سَے مردم زدگ بوتگ – وئیل ھب ءَ ھوٹل ءِ دپ ءَ دیم ءَ اتکگ کہ تیز رؤکیں گاڑی ءِ ٹیر ترکگ ءُ ھوٹل ءِ دیم ءَ اوشتوکیں مردمانی ڈیکر کنگ ءَ سَے مردم ٹپی بوتگ اَنت – ٹپی بوتگیں مردمانی پجار ڈنہ فیض شیخ، شیراز انور ءُ فدا ھسین ٹپی بوتگ انت – ٹپی بوتگیں مردم ھما دمان ءَ نادراھجاہ ءَ سرکنگ بوتگ انت –

وڈھ لیوز ءِ رِد ءَ وئیل گوستگیں شپ ءَ شال داں کراچی ءَ رؤکیں دگ ءِ سر ءَ سونارو ءَ دیم ءَ اتکگ کہ مساپر کشیں کوچ ءَ گون گاڑی ءَ ڈیک وارتگ چریشی ءَ اسد اللہ ء محمد خان ھما دمان ءَ بیران بوتگ، بیران بوتگیں مردم ءِ جون نادراھجاہ ءَ سر کن بوتگ اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بوتگ –

دگہ وئیلے شال ءَ دیم ءَ اتکگ کہ دو ٹولیانی جنگ ءُ چوپ ءُ تیرگواری ءَ یک مردم ءِ ٹپی بوتگ –

پولیس ءِ رِد ءَ وئیل شال ءَ کمبرانی دگ کلی باریزھی ءَ دیم ءَ اتکگ کہ دو ٹولیانی میان ءَ جنگ ءُ چوپ بوتگ ءُ تیرگواری ءَ محیب اللہ نامیں مردمے ٹپی بوتگ – ٹپی بوتگیں مردم پولیس ءَ دست گپتگ ءُ نادراہ جاہ ءَ سر کتگ وئیل ءِ درگت ءَ پولیس پٹ ءُ پول برجاہ انت –

ھمے وڑ ڈیرہ اسمائیل ھان ءَ ناشناسیں مردمانی تیرگواری ءَ کسٹم ءِ سَے کارمند بیران ءُ یکے زدگ بوتگ – پولیس ءِ رِد ءَ کسٹم کارمند بلوچستان ءَ چہ خیبرپختونخواہ ءَ آؤکیں مردمانی چیک ءُ تان ءَ بوتگ انت کہ ھمے وھد ءَ دو پرپٹاں سواریں چار مردم اتکگ ءُ تیرگواری ءِ کتگ چریشی ءَ کسٹم کارمند تاج نصیر ءُ فاروق خان ھما دمان ءَ بیران بوتگ انت ءُ فاروق جان ءَ ٹپی بوتگ کہ رند ءَ ٹپانی درد نہ سگتگ ءُ نادراھجاہ ءَ بیران بوتگ ءُ یکے ٹپی انت –

نصیر آباد ءَ گیرت ءِ نام ءَ زالبول ءِ کُشگ بوتگ – ھالانی رِد ءَ نصیر آباد ءِ دمگ پولیس تانہ نوتال ءِ کبول شاہ کبرستان ءِ نزیک ءَ برات ءَ گیرت ءِ نام ءَ وتی گھار صغری کُشتگ ءُ تتکگ پولیس ءَ جون دست گپتگ ءُ نادراہجاہ ءَ سر کتگ –

دومی نیمگ ءَ ڈیرہ اسمائیل خان ءَ پولیس کارمند ءِ جون ءِ دست کپتگ جون تانہ کڑی کیسور ءَ بلوٹ ھند ءَ پولیس کارمند غلام عباس ءِ جون دست کپتگ – ھمے گوشگ بوگ ءَ انت کہ غلام عباس بلوٹ شریف زیارت ءَ شتگ بوتگ کہ ھمود ءَ آئی ءِ جاور نگیگ بوتگ انت ءُ بیران بوتگ –