TBP Balochi

بلوچ نیشنل موومنٹ ءِ بُنجاھی جارکش ءَ سرجمیں ھنکین سرپد کتگ اَنت ءُ گوشتگ کہ شھید بانُک کریمہ بلوچ اولی سال روچ ءُ انسانی ھکّانی جھانی روچ ءِ درگت ءَ مراگشاں اَڑ بدے اَنت-

جارکش ءَ گوشتگ کہ بانُک کریمہ بلوچ گوستگیں سال ءَ بیست ءُ یک دسمبر ءَ پاکستانی چیریں ادارھاں کینیڈا ءِ شھر ٹورنٹو ءَ جتگ ءُ لاش کورے ءَ دور داتگ دانکہ آ کوش ءِ نشانیاں گار بہ کنت بلے بانُک کریمہ ءِ ھون ءِ ترینُزک دُژمن ءِ بدیں چھرگ ءِ سر ءَ پدر بوتگ اَنت کہ اِشانی گار کنگ دُژمن ءِ وس ءَ چہ ڈن اِنت پرچاکہ ھون وتی منّانک وت اِنت-

آئی ءَ گوشتگ کہ، اے راست اِنت بانُک کریمہ ءِ کوشکار چہ گرگ ءَ ڈن اَنت بلے بلوچ راج ءُ سرجمیں جھان ءَ کوشکار ءِ چھرگ دیستگ آ اشی ءَ ھچ وڑ شموشگار نہ بنت –

جارکش ءَ گوشتگ کہ یک یک ءَ بانُک کریمہ ءِ ھمراہ چست کتگ ءُ آزار جاھاں برتگ اَنت , آزار جاھاں شھید کتگ اَنت ، آئی ءِ کھول نشانگ کتگ ءُ گُڈی ءَ آئی ءَ را وتی ڈیھ ءِ یل کنائینگ ءَ لاچار کتگ ءُ آ کُشتگ ءُ ھمے وڑ آئی ءِ لاش ءِ کم شرپی کنگ بوتگ ، مردم تُپنگ ءِ زور ءِ جنازہ ءِ بھر زورگ ءَ داشتگ اَنت ، اے سرجمیں وئیل وتی پدری کنت کہ بانُک کریمہ بلوچ ءِ کُشکار چینچو بے دل ءُ چمّ جھل اَنت ءُ راجی ءُ انسانی ارزشت ءَ کپتگیں رستر اَنت-

آئی ءَ گْوشتگ کہ گل ءِ بُنجاھی ءُ جھلی ءَ بانُک کریمہ بلوچ ءِ سیاسی چست ءُ ایر ، جد ءُ جُھد دیمونیاں سُھرچکیں دروت ندر کنگ ءِ ھاتر ءَ مراگش برجم دار ایں-

جارکش ءَ گوشتگ کہ بلوچستان ءَ پاکستانی زوراکی ءُ انسانیت سوچوکیں زالم ءَ چہ یک انسانی نگیگی ءَ ودی بوتگ- دہ دسمبر ءَ اقوام متھدہ ءِ نیمگ ءَ چہ انسانی ھکّانی جھانی روچ ءِ درگت ءِ سر ءَ سرجمیں ھنکین مراگشاں برجم بدار اَنت ءُ جھان ءِ مردماں پاکستانی زُلم زوراکیاں چہ سرپد بہ کن اَنت-

بلوچستان ءَ زورانسری آوارجنی ءُ بیگواھی ءِ درچ یکشل ءَ برجاہ انت –
دی بلوچستان پتر ءَ سربوتگیں ھالانی رِد ءَ پاکستانی پوج ءَ دو ورناہ زورانسری آوار جتگ ءُ بیگواہ کتگ –

گیشیں ھالانی رِد ءَ گوستگیں روچ ءَ بلوچستان ءِ بنجاھی شھر شال ءِ دمگ سریاب کیچی بیگ ءَ پاکستانی پوج ءُ چیریں ادارھانی کارمنداں ربنواز ساتکزئی چہ گِس ءَ آوار جتگ ءُ گوں وت برتگ –

دومی نیمگ ءَ ھمے سال ءَ اکتوبر ءِ ماہ ءَ ھزدار شاشان ھوٹل ءَ پوج ءَ طارق نامی ورناھے زورانسری آوار جتگ ءُ بیگواہ کتگ –

اھوالکار ءِ رِد ءَ شال ءَ پوج ءِ دست ءَ آوار جنگ بوتگیں ورناہ لھتے سالاں پیش ھم وتی پت ءِ ھمراھی ءَ آوار جنگ بوتگ بلے رند ءَ ماھی ءَ پد یل کنگ بوتگ انت –

ھزدار ءَ چہ طارق ءِ نظام الدین ھمے سال شش اکتوبر ءَ آوار جنی پد بیگواہ کنگ بوتگ کہ انگت یل نبوتگ –

بلوچستان ءَ زورانسری آوار جنیانی بگیری ءَ شال ءَ برجاھیں بیگواھیں مردمانی پانکجنیں گل وائس فار بلوچ مسنگ پرسنز ءَ ھستیں وھد ءَ بلوچستان ءَ زورانسری آوارجنینانی سر ءَ پدردی درشانتگ –

گل ءِ رِد ءَ بلوچستان ءَ زورانسری آوارجنیانی درچ یکشل ءَ برجاہ انت بلے ھستیں وھد ءَ اشِی ءِ تہءَ گیشی آرگ بوتگ وھدیکہ ھمے سال ءِ ھمے ماہ ءَ دوازدہ نودربراں گیش آوار جنی ءِ آماچ بوتگ انت –

وائس فار بلوچ مسنگ پرسنز ءَ لوٹ کتگ کہ سرکاری ادارہ ءُ انسانی ھکانی گل بلوچستان ءَ برجاھیں زورانسری آوارجنیانی سر ءَ گامگیج بہ زور انت –

سربوتگیں ھالانی رِد ءَ بلوچستان ھائی کورٹ ءَ بیگواھیں انسانی ھکانی باسک راشد حُسین بلوچ،  نودربر رھشون زاکر مجید بلوچ ءِ زورانسری آوارجنی ءِ درگت نبشتہ کُتگیں کیس رد کُتگ انت – زورانسری آوار جنگ بوتگیں جمیل احمد سرپرہ ءَ ماما قدیر بلوچ ءِ اے سی ایل لسٹ ءِ درگت ءَکیس ھم رد کنگ بوتگ –

بلوچستان ھائی کورٹ ءَ رد کتگیں کیسانی درگت ءَ پرگینگی سرکار ءِ نیمگ ءَ جوڑ کنگ بوتگیں کمیٹی ھکم داتگ کہ اے کیسانی درگت ءَ پولکاری ءُپرّیس بہ کنت، اے پیسلہ ھائی کورٹ ءِ جج محمد ہاشم کاکڑ ءُ نزیر احمد خان نیمگ ءَ کنگ بوتگ –

بلے بیگواھیں مردمانی کھولاں ھائی کورٹ ءِ نیمگ ءَ چہ کنگ بوتگیں پیسلہ ءِ سر ءَ دلپروشی درشان کُتگ ءُ گوشتگ کہ سالاں چہ ما پیشی جنگ ءَاِنت بلے انگت کیس رد کنگ بوتگ انت ءُ آمیدگس ھک دئیگ ءَ ابید کھولاں مایوس کنگ ءَ اِنت –

آھانی گوشگ ات کہ ادا آمیدگسانی آزاتی ءِ سر ءَ جست چِست بیت اِنت، ھائی کورٹ ءِ پیسلہ ءِ بگیری بیگواھیں مردمانی کھول سپریم کورٹ ءِنیمگ ءَ رؤنت –

بیگواھیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءِ نام آئی سی ایل تہ ءَ بوھگ ءَ آمیدگس ءَ شُتگ بلےآئی کیس سر ءَ ھچ گوشگ نبوتگ –

ھائی کورٹ ءِ نیمگ ءَ بیگواھیں مردمانی کیسانی درکنگے درگت ءَ بیگواھیں راشد حسین بلوچ ءِ گھار فریدہ بلوچ ءِ گوشگ انت کہ بلوچستان ءِ ھائیکورٹ ءَ راشد حسین ءَ ھوار درسیں بیگواھیں مردمانی کیس سوبائی سرکار ءِ جوڑ کتگیں کمیٹیانی سر ءَ یل داتگ ءُ در کتگ انت – اے جج ءَ اولیروچ ءَ بیگواھیں مردمانی کھول کم شرپ کتگ اَنت ءُ گوشتگ کہ گِساں بہ نند اِت –

فریدہ بلوچ ءِ گوشگ ات کہ کھولانی گور ءَ بازیں منانک بوھگ ءَ ابید آمیدگس ءِ نیمگ کیس دراج کش کنگ بنت یا دگہ ھُنر ھیلاں کیس رد کنگبنت – آئی ءِ گوشگ ات کھولاں داں ھک نرسیت آ پد کنز نہ بنت ءُ ھمک تک ءُ پھناتاں توار چست کن انت –

بلوچستان ءِ دمگ نوشکی ءِ جھمنندیں جنت ھاتون ءَ گوشتگ منی زھگ بشیر اھمد چار سال ءَ پیسر چہ نوشکی یَ پوج ءُ چیریں ادارھانی کارمنداں منی چمانی دیم ءَ آوار جتگ –

جنت ھاتون ءَ گشتگ کہ زورانسری ءِآوار جنی ءِ سبب ءَ من چُک ءِ گماں گنوکاں زھگ آمیدگس ءَ پیش کنگ بہ بیت دانکہ آئی ءِ سپائی ءِ موہ بہ رس ایت-

جنت ھاتون ءِ رد ءَ آئی ءِ زھگ بشیر اھمد ء مھمد رمزان مھمد ھسنی یازدہ اگست دوھزار ءُ ھبدہ ءِ شپ ءِ وھد ءَ ایف سی ءُ چیریں ادارھانی کارمنداں لوگ ءِ سر ءَ بیڑ برتگ ءُ آوار جتگ ءُ گوں وت برتگ –

آئی ءَ گُشتگ زھگ ءِ آوار جنگ ءِ وھد ءَ آوار جنوکانی گور ءَ من پریات کرتگ دز چِست کرتگ ءُ گُشتگ منی زھگ ءَ مہ بر ایت بلے پوج ءُ دگہ ادارھاں منی گپ دلگوش نہ کرتگ ءُ من ءَ لٹ ءُ کُٹ کرتگ ءُ منی زھگ گون وت برتگ –

جنت ھاتون ءَ سرکار ءُ انسانی ھکانی ادارھاں گوں دزبندی کرتگ ءُ گوشتگ کہ آ منی زھگ ءَ دیم ءَ بہ یار اَنت ءُ من ءَ انساپ بہ دے اَنت –

بلوچ اسٹوڈنٹس ایکشن کمیٹی اوتھل ھنکین ءِ لوامز بنزہ ءِ نیمگ ءَ یک لبزانکی مراگشے برجم دارگ بیتگ کہ اے مراگش ءَ جتا جتائیں پھناتاں لبزانک ءِ سر ءَ گپ ءُ تران بیتگ اَنت ءُ اشی ءِ ھواری ءَ مراگش ءَ بُک اسٹال ھم جنگ بیتگ –

مراگش ءَ جتا جتائیں تھر ماتی زُبان ءُ اَئی ءِ اَرزشت، بلوچی ءُ بِراھوئی ءِ لبزانکی نَمیرانیں کَوْاس آیانی زند ءُ اِزم ءِ سر ءَ گَپ ءُ تِران، بلوچی ءُ بِراھوئی شئیِر ءُ شاھِری، گُشندھی دیوان گُڈی بَھر بساک ءِ” نوْشت” ءِ اِسٹال بوتگ –

لَبزانکی مراگش ءِ بِندات ءَ بُنزہ ءِ کارگُشاد سنگت نادر بلوچ ءَ وتی ھیال لَبزانک بُنگپ ءِ سر ءَ درشان کُت ءُ گُشت کہ اگاں ما وتی لَبزانک ءِ مہ وان ایں ءُ نِبشتہ مہ کن ایں گُڑا اے گَپ ءَ ما دلجم بہ بہ ایں کہ درامد کَس نہ اِت ءُ مئے لَبزانک ءِ گِھتری پہ کار نہ کنت ۔

آئی ءَ گُشت مارا سید ھاشُمی ءُ سَباہ دشتیاری ءِ رنگ ءَ کار کنگی اِنت ءُ جُھد دارگی نہ اِنت دیم ءَ کنزگی اِنت-

ھمے وڑ ءَ اولی بھر ءِ پَچ بوگ ءَ گوں سنگت جمال منظور ءَ وتی دانک ماتی زُبان ءُ آئی ءِ اَرزشت ءِ سر ءَ درشان کُت ءُ گُشت کہ زُبان راجانی پَجار اِنت یک راجے ءِ مَرگ ءُ زِندگ بوگ چہ زُبان ءِ پِراہ ءُ شاھگانی ءَ زانگ بیت۔

ھمے وڑ ءَ ماں دیوان ءَ بھر زیروکیں باسکاں بلوچی زُبان ءِ نمیرانیں کوْاسانی زِند ءُ اِزم سر ءَ گَپ ءُ تران کنگ بوتگ ۔

مراگش ءَ سید احمد ءَ بلوچی زُبان ءِ گِرانبھاھیں کوْاس واجہ کریم دشتی ءِ زِند ءُ اِزم کُلانی دیم ءَ پَدّر کُت ۔

ھمے وڑ سنگت بِراھیم گُل ءَ بلوچی زُبان ءِ بابا واجہ سید ظھور شاہ ھاشُمی ءِ زِند ءُ اِزم ءِ سر ءَ وتی دانک دَراھینت اَنت سنگت ساجد بلوچ ءَ بلوچی زُبان ءِ پکیریں کلمکار واجہ سَباہ دشتیاری ءِ زِند ءُ اِزم ءِ بابت ءَ گَپ ءُ تِران کُت ۔

ھمے وڑ ءَ دیوان ءِسیمی بَھر ءَ بِراھوئی شئیِر ءُ شائری ء دگہ واجہ گل خان نصیر سر ءَ گپ ءُ تران بوتگ ءُ سنگتاں شئیر ونتگ اَنت ۔ گُڈ سر ءَ نودربریں گُشندہ ساکِم بشیر ءَ وتی اِزم ءِ زیبداری دیوان ءِ دیم ءَ پیشداشتگ ۔

مراگِش گُڈی سیمسراں سنگت اسلم بلوچ ءَ وتی ھیال درشان کت اَنت ایشی پد بُنزہ ءِ کارگُشاد ءَ لبزانکی مراگش ءِ ھلاسی ءِ جار جت-

نبشتانک: ایردستی ءِ مارشتاں

نبشتہ کار : شیردل بلوچ

دی بلوچستان پوسٹ

گپّ وھدے جپا کشی ءِ بہ بیت،گڑا من ءَ کسے سک ءَ باز گیر کیت، ھر وھد ءَ دیستگ اَت، گوں وتی کاراں دسگٹ اَت، ایندگہ براتانی مسترین اَت، اے ھبر مئے بلوچ چاگرد ءِ تھ ءَ باز بوتگ، انچو گُش اَنت مستریں برات پِت ءِ بوہ ءَ کنت ءُ مستریں گُھار مات ءِ گس ءِ تھ ءَ مُدام گوں اِزت ءِ نگاھاں چارگ بیت، مستریں وَ ھر وھد ءَ وتی کسترینانی ھیالداری ءَ کن اَنت ءُ مھر اِش دے اَنت ،گس ءِ بازیں کارانی ڈُبّا مستریں برات ءِ کوپگاں بیت، اگاں کسے ءِ اولی زَھگ بَچکے بوت،گڑا ھمے ھبر کنگ بیت، اگاں نہ مُرت ءُ زندگ بوت، زوت گوں وتی پِت ءَ کاراں ھمکوپگ بیت، چہ اے گپّ ءَ ھمے پّدر بیت، بلوچ راج ءَ را نیزگاری ءُ بزّگی چہ ازل ءَ گوں اِنت، بلوچ راج مدام زورمندیں زوراکانی زور ءِ دیمپان بوتگ ءُ وتی پجار ءِ زمین ءِ رکینگ ءَ لج ءُ ننگ ءِ پھازگ ءِ میڑ دیگ ءَ بوتگ بلوچ راج جھان ءِ دیریگیں ( قدیمیں) راجانی لڑّ ءَ گوں اِنت۔

من جُھد ءُ جپاکش ءِ گپّ ءَ کنگ ءَ اَتاں ،گڑا ھمے مردم شھید نوربکش پنام بالاچ اِنت، آئی آریپیں پِت ءِ نام واجہ درویش بلوچ جاہ آھو کوھڑو ءِ جاہ منندے، بُنکی وانگ چہ وتی ھنکیں ءِ مزن وانگجاہ ( ھائی اسکول ) ءَ کوھڑو ءَ تاں دھمی تبک ءَ دربارت، پد ءَ گوں کاراں دسگٹی ءَ ھوار دوازدھمی ءُ چاردھمی تبک ءِ چکاساں بھر زوریت سوبمنند بیت، پہ گس ءِ مردمانی شاتکامی ءَ پوریاگیری کنت، چہ لھتیں وھد ءَ رند دگر ءِ گور ءَ پہ شریکی زَرّ زوریت ءُ وتی ھند ءَ بزان کوھڑو جاہ آھو ءَ ورگ ءُ وردِن ( پرچون ) ءِ دُکانے پچ کنت ءُ وتی کستریں براتے” دُکان ءِ سر ءَ نادین ایت، وتی چاگرد ءِ تھ ءَ زوت وت ءَ را منارین ایت ءُ دومی کسے وام ءُ بدل ءِ کار ءَ اتکگ، وتی ھند ءَ مزنیں نامے ھدُابُند بیت ۔

بلے! ایردستی ءِ مارشتاں نندگ ءَ نیشت ءُ گوں آجوئی ءِ جُنز ءِ کاروان ءَ ھوار بوت،چہ دراھیں کاراں دست کش بوت، وتن ءِ آجوئی ءِ جھدکارانی لڑّ ءَ گوں بوت، روچ ءُ شپ نہ زانت ئِے گرانیں راہ ءِ دارجیں سپر ءَ پند بُراں بوت مُدام بہ دیستیں گوں راجی جُنز ءِ کاراں دست گلائیش اَت، جاہ آھو (جھاؤ ) ءِ سرکیلیں سنگتانی لڑّ ءَ گوں اَت۔

ایردستی انچیں نادراھی یے چہ بدیں ھِلّت ءَ سریچ اِنت، ھما تئی سسایے مردماں نہ اَنت آ وَ مدام ننداں ترا ڈوبار اَنت، کدی جند ءِ یکراہ ءُ منزلے ھمراھانی گوشگ ھم ھست اَنت،پمشکا ما مُردگ پرست گوشگ بیں، ھما سنگت جُتا کنگ بوتگ اَنت گڑا ھماواں ساڑایاں بلے! زی زندگ ءُ پند جنگ ءَ اَت ڈیھ ءِ دژمناناں تورینتگ اَت ئِے مارا ھم برداشت نہ بوت، پمشکا مارا مردگ پرست گوشگ بیت یار بالاچ جان پھل کن اگاں دست ءَ ردی یے بوتگ ما چو نہ زانتگ تو نیم راہ ءَ وتی اُمبر ءِ ورنائی ءِ روچاں چہ راج ءَ دُور ءُ گستا کنگ بہ ئے ۔ راجی ءُ آشوبی گُشندہ : “اُستاد منھاج مکتیار” شائرے ءِ شَیر ءَ چو گوش ایت ۔

“شھید ءِ رِتکگیں ھونانی یار سوگند اِنت”
” نہ موکت ءَ داں وتی سرڈگار سوگند اِنت”
“ھما کہ لیکھے داران نہ بجُاں نیم راہ ءَ بلوچے ءِ وتی کول ءُ کرار سوگند اِنت”

باید ھمیش اِنت، ما آشوبی یکے دومی ءَ را اوپارگ ءِ جُھد بہ کنیں مئے دژمن یک، راہ ءُ منزل یک اَنت،گڑا ما پرچا یکے دومی ءَاوپار مہ کنیں، بے رھمیں وھد ءِ ءُ بے ھاتریں راجدپتر ءِ راست گوشیں گالاں (لپزاں ) چہ وت ءَ رکّینگ لوٹ ایت، باندات ءِ تاریک ءِ نبیس گوستگیں نبیسوکانی وڑ ءَ کسے ءِ ٹَک، کسے ءِ گلاھشتی کارست، کسے نیمگ ءَ چَمّ نزّی ءُ کسے ءَ گوں ناانساپی نہ کنت، ھرکس وتی کارستانی پُشت ءَ پجارگ بیت۔

مئے ایردستی ءِ سبب لھتیں ٹوھیں نزوری بوتگ اَنت، وت ءَ مزن گند، ءُ دومیگ ءِ کمتر زانگ، مُپاد پرستی ءُ دومیگ ءِ تاوان دیگ، تچکیں ھبر ءِ نہ کنگ دروگ ءِ پَلہ مُرزی، وتی ساڑیگ ءُ دومیگ ءِ ڈوبارگ، ناانساپی ءُ ناتپاکی مئے پدمنتگی ءِ سبب بوتگ اَنت وَ نوں بلوچ راج ءِ گڈی اُوست ءُ پدریچ باندات گوں آجوئی ءِ جُنز ءَ راجی شھیدانی ھواناں بندوک اَنت ۔

شھید ” نوربکش پنام بالاچ بےدرویں جھدکارے اَت آئی ءِ کارست مئے وڑیں نزوریں ندکارانی نیس اتگیں لپزانی ھاجت ئِے نہ اِنت بامرد تاں جھان ھست گیرآرگ بنت، ” نوربکش جان پنام بالاچ بلوچ ءُ سابرجان پنام یاگی بلوچ” رمس ھبدہ کرّا دو ھزار بیست ءُ یک (17/04/2021) ءَ رمزان شریپ ءِ پاکیں روچ ءَ لگور ءُ دُزیں دژمن ءِ تیرانی آماچ بنت،وتی دائمی جاہ رپتگ ءُ نمیران بوتگ اَنت ۔

من شھید ” نوربکش جان ، شھید سابرجان ، کرّا ءِ ءُ سرڈگار ءِ شھیداناں سھرچکیں دروت ندر کناں، آجوئی ءِ جُنز زندگ بات

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

خضدار پولیس کارمند اے ایس آئی غلام سرور ءَ بھتام جتگ کہ خضدار ءِ تحصیلدار ءَ شپ ءَ آئی لوگ ءِ سر ءَ وتی کارمنداں ھوار اُرش کُتگ ءُ لوگ ءَ پرشت پروش کنگ ءَ ھوار لوگ ءِ درستیں مردم لٹ ءُ کُٹ ھم کُتگ اَنت۔

غلام سرور ءِ رد ءَ خضدار ءِ تحصیلدار جواد زھری لوگ ءَ زور پُترتگ ءُ من ءَ ھوار لوگے جنین آدم ھم لٹ ءُ کُٹانی آماچ کُتگ اَنت ءُ لوگ ءَ پرشت پروش کُتگ۔ وھدیکہ جنین آدماں قرآن پاک زرتگ ءُ دزبندی کُتگ گُڑا تحصیلدار ءَ قرآن ءِ ھم کم شرپی کُتگ۔

چاگردی رسانکدر ءَ جنزوکیں یک تامر بندی ءَ پولیس کارمند غلام سرور ٹپی ایں جاوراں گندگ بیت کنت کہ آ ھمے جاورانی تہ ءَ وئیل ءِ سرجمیں اھوالاں گُشگ ءَ اِنت۔

پولیس کارمند ءِ کھول ءِ رد ءَ تحصیلدار ءَ آیانی دو سیاد دزگیر کنگ ءَ پد زورانسری آوار جنی آماچ کُتگ گوں وت بُرتگ اَنت۔

وھدیکہ واکدارانی نیمگ ءَ داں انگت وئیل ءِ درگت ءَ ھچ پئ
یم ءِ لیکہ دیم ءَ نیتکگ۔

بلوچستان لبریشن فرنٹ ءِ جارکش میجر گھرام بلوچ ءَ پاکستانی پوج ءِ سرءَ اُرشانی زمہ واری من اِتگ ءُ گُوشتگ کہ شانزدہ نومبر ءَ گچک ءَ مک ءِ ھند ءَ سرمچاراں پاکستانی پوج ءِ کاروان ءِ یک گاڑی یے ریموٹ کنٹرول بمب ءَ گوں نشانگ کُتگ۔

اُرش ءِ تہءَ گاڑی تباہ بوتگ ءُ آئی ءَ نشتگیں کارمند مُرتگ ءُ ٹپی بیتگ اَنت۔

جارکش ءَ دیمتر ءَ گُوشتگ کہ ھپت نو ممبر ءَ مشکے النگی ءَ پاکستانی پوج ءِ بنجل ءِ سرءَ وتکاریں مزنیں سلاھاں گوں اُرش کُتگ ءُ قوضہ گیریں پوج ءَ جانی ءُ مالی تاوان داتگ۔

جارکش میجر گھرام بلوچ ءَ گُڈ سر ءَ گُوشتگ مئے اُرش داں بلوچستان ءِ آجوئی ءَ برجاہ مان اَنت۔

بلوچ یکجھتی کمیٹی ءَ رسانکدراں وتی شنگ کرتگیں درشان ءِ تہ ءَ گوادر ءَ بوؤکیں ناھکی، پوجی پانگساں راج ءِ کم شرپی ءُ ٹرالر مافیا ءِ گوادر ءَ گیرکانودی ٹرالنگ ءِ بگیری ءَ زھرشانی کنوکیں راجی جھد ءِ پلّا مرزی کُتگ گوشتگ یک نیمگ ءِ گوادر ءِ درگت ءَ دنیائے دیم ءَ ھمے زاھر کنگ بوھگ انت کہ اد دیمرؤئی بوھگ انت سی پیک وڈیں شوربندیاں ادے مھلوک ءِ تقدیر بدل بوھگ انت وھدیکہ دومی نیمگ ءَ راستی ءَ لس مھلوک آپ ءِ وڈیں بُنکی لوٹاں چہ زبھر اِنت دمگی مردم سیکورٹی نام ءَ کم شرپ کنگ بوھگ انت – لس مھلوک زمین ءِ سر ءَ کہ سداں سال ھمود ءَ نندوک انت کہ روچ ءِ باریں چینچو رند ءَ وتی پجار ءَ کنائین انت اشی ءَ ابید ٹرالر مافیا نیمگ ءَ گوادر ءِ جاھمنندیں مردمانی مالی کوش ھم بوھگ انت چریشی ءَ گوادر ءِ دریا ورد پہ چُنڈ ءِ نان ءِ چمدار بوتگ انت –

یک نیمگ ءِ دریا وردانی مالی کوش بوھگ انت ءُ دومی نیمگ ءَ بارڈر ءِ بند بوھگ ءَ راج ءِ روزگار سرجمی ءَ تباہ کنگ بوتگ – ٹوکن سسٹم ءَ گریبیں مردم پہ چُنڈے نان ءِ چمدار کتگ انت – بلوچستان ھاسکر مکران گیشتر مردمانی کاروبار گوں بارڈر ءَ بندوک انت کہ آ بند کنگ بیت ءُ مھلوک لاچار کنگ بیت انت کہ آ منشیات باپاری ءِ وڈیِ گیر انسانی امل ءِ بھر بہ بنت –

آئی ءِ گوشگ ات کہ گوادر ءُ مکران ءِ مھلوک ءَ اے زوراکیانی بگیری ءَ اوشتاتگ ءُ زانتکاری ءِ پیسلہ کتگ کہ اشی ءِ ما پلّا مرزی ءَ کنیں ءُ لس مھلوک ءَ لوٹ کنیں کہ شرّیں وڈی ءَ بھر بہ زور انت –

بی وائی سی ءِ گوشگ ات کہ زوراکانی بگیری ءَ یکیں راہ راجکاری ءُ املی جھد انت اگاں ما مروچی اے زوراکیانی بگیری ءَ جھدے پیسلہ نہ کُت گڈا مئے آؤکیں ھر پدریچ ءَ اے زوراکیانی دیمپانی کنگ کپییت –

بی وائی سی ءِ جارکش ءِ گوشگ ات کہ ھوشاپ ءِ وئیل ءَ غفلت کنوکیں ڈی سی کیچ، ایس سی کیچ ءُ ھوشاپ ءِ تحصیلدار وتی اگدھانی سر ءَ برجاہ بوھگ ھک ءِ ٹاہ دیوکانی دیم ءَ شھماتے کرار داتگ ءُ گوشتگ کہ اے کتکارانی برجاہ ءَ چہ پدر بیت انت کہ آمیدگس ءِ نیمگ ءَ اشانی ماٹو کنگے مول زھرشانی ءِ ھلاس کنگ بوتگ وھدیکہ دنیگتہ ماہ ءِ نگوستگ آھانی اگدہ دوبر دئیگ بوتگ چریشی ءَ زاھر بیت اِنت کہ بلوچستان ءَ بلوچانی ھک جنی ءَ سپریم کورٹ ءِ وڈیں ادارہ ھم ھوار انت – اگاں اے ناھکیانی درچ ھلاس نہ بوت گڈا اشی ءِ بگیری ءَ راجی زھرشانی چدوگیشتر ترندی ءَ گوں برجاہ بیت انت –

کیچ اگریکلچرفورم ءُ بلوچستان آفیسرز ایسوسیشن کیچ ءِ یکجاھی دیوان ءِ آپسر ءَ اڈ دئیگ بوتگ –

نیاد ءَ نوکیں کابینہ ءِ اڈ دئیگ بوتگ ءُ تنظیمی امور ءُ دیمتری کارانی بنگپ ءِ سر ءَ تران کنگ بوتگ – درسانی منگ ءَ پد نوکیں کابینہ ءِ اڈ دئیگ بوتگ –

اے نیاد ءَ ھمے گوشگ بوتگ کہ کیچ اگریکلچر فورم ءِ کابینہ بلوچستان ایگریکلچر افیسرز ایسوسیشن ءِ نمائندگی کنت –

اے نیاد ءَ نوکیں کابینہ گچین کنگ بوتگ نوکیں کابینہ سرکماش نادل بلوچ جنرل سیکرٹری جمیل بلوچ جوائنٹ سیکرٹری گلام جان فنانس سیکرٹری نزیر بلوچ ءُ پریس سکریٹری طارق بلوچ گچین کنگ بوتگ انت –

نیاد ءِ گڈسر ءَ درساں نوک گچین بوتگیں کابینہ دلبڈی داتگ –

نوکیں کابینہ ءِ سرکماش نادل شاہ ءُ جوائنٹ سیکرٹری دیمتری کارانی بنگپ ءِ سر ءَ تران کنان ءَ گُوشت فور ٹائر اسٹریکچر ءِ حصول ءَ ھوار جھدے میان ءَ ضلعی کابینہ ءِ بنجاہ ءَ گوں ھمکوپگ انت –