TBP Balochi

سربوتگیں ھالانی رِد ءَ گوستگیں روچ ءَ یکشمبے ءَ بلوچستان ءَ جھانی وبا کرونا ویروس ءِ نادراھی ءَ آماچ بوتگیں دہ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءَ آماچ بوتگیں درسیں مردمانی کچ سی ءُ دو ھزار ءُ چار سد ءُ چِل ءُ چار ءَ سر بوتگ اَنت-

بلوچستان جان سلامتی ءِ واکدارانی نیمگ ءَ چہ شنگ بوتگیں رپورٹ ءِ رِد ءَ گوستگیں روچ ءَ بزاں یکشمبے ءِ روچ ءَ بلوچستان ءِ پنچ دمگاں پنچ سد ءُ ھپتاد ءُ پنچ مردماں کرونا ٹیسٹ کنگ بوتگ کہ دہ مردمانی تہ ءَ کرونا نادراھی پدر بوتگ ءُ چریشی ءَ پد تنی وھدی بلوچستان ءِ تہ ءَ کرونا نادراھی ءِ آماچ بوتگیں مردمانی کچ ءُ نوکیں کیسانی ھوار بیگ ءَ پد سرجمی ءَ سی ءُ دو ھزار ءُ چار سد ءُ چِل ءُ چار سر بوتگ اَنت وھدیکہ ھپتاد مردمانی رپورٹ تنی وھدی نہ اتکگ –

رپورٹ ءِ رِد ءَ بلوچستان ءِ تہ ءَ کرونا ویروس ءِ نادراھی آماچ بوتگیں یانزدہ مردم وش بوتگ انت، وش بوتگیں مردمانی کچ سِی ءُ دو ھزار ءُ بیست ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ شست ءُ ھپت نادراہ ھست انت کہ سَے نادراہ بلوچستان ءِ نادراھجاہ ءَ الاج کنگ بوھگ ءَ انت ءُ آھانی تہ ءَ سَے ھائی فلو آکسیجن جنگ ءُ اِلاج کنگ بوھگ ءَ انت- تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ پنجاہ ءُ ھشت مردم بیران بوتگ اَنت-

بلوچستان ءِ تیاب دپی شھر گوادر ءَ وتی لوٹانی ھک ءَ گوادر ءَ حق دو تھریک ءِ نندانک مروچی ھپتمی روچ اِنت کہ برجاہ ءَ اِنت-

نندانک ءَ مردمانی آیگ برجاہ ءَ اِنت وھدیکہ شھر ءَ ننداک ءِ ھک ءَ یک روانکے کشگ بوتگ ءُ آ روانک ءِ تہ ءَ گیشتر زھگ ھوار بوتگ اَنت –

اے درگت ءَ مولوی ھدایت الرحمان بلوچ ءَ تران کنان ءَ گوشتگ کہ بلوچستان ءَ ھما مردم نشہ باپاری کنت آ ایف سی ءِ نز ءَ درستاں چہ واجکارتر اِنت – دُرستاں چہ گیش ڈیھ ءِ دوست ھمشی ءَ سرپد بنت کہ آ کرسٹل بھا کنت آئی ءِ گاڑی ءِ دیم ءَ پاکستان ءِ بیرک انچش لگ اِتگ کہ آ آجوئی ءِتھریک ءَ قائد اعظم ھمراہ بوتگ-

آئی ءَ گوشتگ کہ اے وڑیں مردماں بزانکہ نشہ باپاری کنوکاں دمگ ءِ واجکار کنگ بنت وھدے ایف سی ءِ گوم ءَ دیوان بنت گُڑا ھمے مردماں لوٹائین اَنت کہ دُرستاں چہ گیش نشہ بھا کن اَنت – ادارہ ءَ اشی ءَ میر جوڑ کنت، سیمسر ءِ ٹوکن ھمشی ءَ دیگ بنت-

آئی ءِ گوشگ اِنت کہ ھماں 71 ءَ پاکستان پروشتگ ءُ آ سوگات داتگ اَنت بلے مئے چُک اگاں ردی ءَ دیوالانی سر ءَ نبشتہ بہ کن اَنت پاکستان مردہ باد گُڑا آ بیگواہ کنگ بنت ءُ آیانی تیرسُپتگیں لاش دست کپ اَنت –

مولانا ھدایت الرحمان ءَ نصراللہ بلوچ ، ماما قدیر ءَ گوں دزبندی کتگ کہ سینٹر کھدہ بابر ءِ اکس ءَ بیگواھیں مردمانی بُنجل ءَ بہ جنت ھما اِنت کہ نندانک بنداتگ بوتگ کھدہ بابر بیگواہ انت –

آئی ءَ گوشتگ کہ اپریل یا جون ءَ یک لکّے مردم ءِ ھمراھی ءَ شال ءَ زھرشانی کن ایں چریشی ءَ بلوچستان ءِ کُنڈ کُنڈ ءَ مردم ھوار بنت-

ًًامیر جماعت اسلامی بلوچستان مولانا عبدالحق ھاشمی ءَ گوادر ءَ نندانکیں زھرشانی ءَ گپ ءُ تران کنان ءَ گوشتگ کہ من ءَ ریاست ءِ ادارھانی نیمگ ءَ فون اَتکگ شما انٹرنیشنل سٹی ءِ ھیال ءَ بدار اِت- من اشاں گوشگ لوٹاں ما اے انٹرنیشنل سٹی ءَ لانت دیم دے ایں مئے ایمنی تُرس ءِ تہ ءَ بدل کتگ – منی دریاورداں گُژنگ کنت ءُ آیانی گیرت ءِ سر ءَ اُرش کنت –

آئی ءَ گوشتگ کہ من آں گوشگ بوتگ کہ تو راھبندانی ھلاپ ورزی کنگ ءَ ئے – من گوش آں بیا اِت من شمارا راھبنداں وانیناں – ما سرجمی زوری ءِ ھمراھی ءَ گوادر ءَ نندانک ءِ ھمراھداری ءَ کن ایں – نو سرجمیں بلوچستان ءَ اشی ءِ آسر دست کپ اَنت – زاناں ریاست ءِ ادارہ ءِ کار دُزیں مردم بلوچستان ءِ سر ءَ آرگ اِنت-

مشکے ءَ پوج ءِ دست ءَ آوار جنگ بوتگیں مردم ءِ لٹ کٹاں چہ بیران

سربوتگیں ھالانی رِد ءَ بلوچستان ءِ دمگ مشکے ءَ دہ روچ پیش پاکستانی پوج ءِ دست ءَ زورانسری آوار جنگ ءُ بیگواہ کنگ بوتگیں مردمے زندانانی تہ ءَ بازیں لٹ کُٹ ءَ چہ بیران بوتگ –

زورانسری آوار جنی ءَ پد کُشگ بوتگیں مردمے پجار انور ءِ محمود ءِ نام ءَ چہ بوتگ –

اھوالکار ءِ رِد ءَ اے مرد ھمے ماہ ءِ یانزدہ رمس ءَ پاکستانی پوج ءَ مشکے ءَ کسانسالیں امداد ء یوسف، حسین ء گاجی خان، نصیر ء یوسف ءُ امداد ءِ یوسف ءِ ھمراھی ءَ آوار جتگ ءُ بیگواہ کتگ –

پاکستانی پوج ءَ گوستگیں روچ ءَ بزاں یکشمبے روچ ءَ انور ءِ ٹپ ءُ ٹوریں جون کھول ءِ ھوالگ ءَ داتگ کہ سک باز لٹ کُٹ کنگ بوتگ – انور ءِ ھمراھی ءَ زورانسری آوار جنگ بوتگیں مردمانی ھنگت تاں ھچ وڈیں ھال اھوال ءِ نیست –

زانگ بہ بیت بلوچستان ءِ تہ ءَ اے اولی وئیل نہ انت اشی ءَ پیش ھم بلوچستان جتا جتائیں ھند دمگاں اے وڈیں وئیل دیم اتکگ انت –

سربوتگیں ھالانی رِد ءَ بلوچستان ءِ دمگ مستونگ ءَ سلاہ بندیں مردمانی تیرگواری ءَ یک مردمے بیران وھدیکہ شش ٹپی بوتگ انت –

گیشیں ھالانی رِد ءَ مستونگ سنگر کراس ءَ ناشناسیں مردمانی تیرگواری ءَ ابابکی ٹک ءِ سرکماش سردارزادہ میر محمد خان ابابکی بیران بوتگ ءُ وھدیکہ دگہ شش مردم ٹپی بوتگ اَنت –

ٹپی ءُ بیران بوتگیں مردم نواب غوث بخش رئیسانی نادراھجاہ ءَ سر کنگ بوتگ انت بلے تنی وھدی وئیل ءِ درگت ءَ گیشیں سرپدی سرنبوتگ کہ کجام سوب ءَ جنگ بوتگ انت –

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ مستونگ ءَ پاکستانی پوج ءِ پانگس ءِ سر ءَ اُرش کُتگ –

اھوالکار ءِ رِد ءَ اُرش مروچی یکشمبے روچ ءَ اسپلنجی تلخ کاوی ءَ برجاھیں پوجی پانگس ءِ سر ءَ کنگ بوتگ –

بنداتی ھالانی رِد ءَ تنی وھدی ھچ وڈیں جانی تاوان ءِ ھال نیست ءُ پوجی بنشون ءِ نیمگ ءَ ھم ھچ وڈیں گپ دیم ءَ آرگ نہ بوتگ –

زانگ بہ بیت اے دمگاں چدوپیسر ھم پاکستانی پوج ءِ سر ءَ اُرش کنگ بوتگ اُرشانی زمّہ واری بلوچ آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمہ واری ھچ گل ءَ نہ منّ اِتگ –

بلوچستان ءِ دمگ کیچ ءِ بنجاھی شھر تربت ءَ بلوچ کواس ءُ شائر عطاشاد ءِ یات ءَ عطا شاد ڈگری کالج تربت ءَ لٹریری سوسائٹی ءِ چیردستی ءَ یک مراگشے گورنمنٹ عطا شاد ڈگری کالج تربت ءَ آڈیٹوریم ءَ برجم دارگ بیتگ –

مراگش ءَ کالج پرنسپل، لیکچرار ءُ نودربراں بازیں کچے ءَ بھر زرتگ ءُ عطا شاد ءِ شائری ءُ راجی ھدمت ءِ سر ءُ گشتانک ءُ آئی ءِ ستاشانی کرتگ –

بھر زیروکیں مردمانی تہ ءَ عبید اللہ جوسکی، سالم رحیم، گلاب اھمد، شعیب شاداب، بلوچ خان، امیر بکش کریم ءُ رفیق عاجز ھوار بیتگ اَنت –

آیاں گوشتگ کہ عطاشاد ءِ زند ءُ ازم ءِ سر ءَ گپ کنان ءَ گوشت کہ عطاشاد اردو ءُ بلوچی زبان ءِ مزن نامیں شائرے ءِ بیتگ ءُ بلوچی زبان ءِ تہ ءَ آئی ءِ شائری ءِ تہ ءَ بازیں تکاں پھناتاں سان زرتگ –

آیاں گوشت کہ عطا شاد ءَ وتی شائری ازم ایوک ءَ وتی تہ ءَ نہ داشتگ بلکیں آئی ءِ شائری پراھشاھیگان بیتگ ءُ چریشی ءِ تہ ءَ آشوبی چھرگ گندگ بیت اِنت –

اے درگت ءَ بلوچی زبان ءِ شائر ءُ بلوچی ءِ استاد اللہ بکش ھسرت ءَ ڈبو پیلو کرتگ ءُ اشی ءَ ابید نودربر ءُ استادانی نیمگ ءَ ھم شَیر ءُ شائری بیتگ ءُ چریشی ءَ گوشداروکاں جوانیں رنگے ءَ گوشداشتگ اَنت-

اے درگت ءَ ڈیوا ءُ دگہ ازم پیش کنگ بیتگ اَنت ءُ کالج لٹریری سوسائٹی ءِ چیئرمین پروفیسر ندیم اکرم ءَ تران کنان ءَ گشتگ کہ وھدیکہ من کالج لٹریری سوسائٹی ءِ چیئرمین بیتگ اَنت گڑا من پہ وت ءَ اے گپ پھرے سرپد بیتگ اَنت من یک ادبی گلے ءِ سروک نامینگ بیتگ اَنت ءُ چریشی ءَ پد من گیش وتی توجہ ھمے کار ءِ سر ءَ کرتگ ءُ من منی ٹیم گیش لبزانکی کارانی سر ءَ دلگوش بیتگ اَنت –

مئے گل ءِ بندات بیتگ ما اے مراگش برجم داشتگ ءُ دیم ءَ ھم اے وڑیں مراگش برجم دارگ بنت –

مراگش ءِ گڈسر ءَ پرنسپل ءَ مراگش ءَ بھر زیروکیں نودربراں داد ءُ بلوچی سوگات “بلوچی پیش کتگ اَنت –

انگلش پریمیر لیگ فٹبال میڑ ءِ تہءَ گوستگیں روچ ءَ شانزدہ ٹیم دیم پہ دیم بیتگ اَنت، اِشانی تہ ءَ چلسی، لیورپول، ایسٹن وِلا، ویٹفورڈ، وولفز ءُ نوروِچ سٹی ءَ گوازی بُرتگ اَنت۔

وھدیکہ نیوکاسٹل، برینٹفورڈ، برنلی ءُ کرسٹل پیلس ءِ گوازی ءِ آسر ءَ ھمک چاریں ٹیم ءَ سَے سَے گول آورتگ ءُ دویں لئیب برابری ءَ ھلاس بیتگ اَنت۔

چلسی ءُ لیسٹر سٹی ءِ گوازی ءِ تہ ءَ چلسی ءَ سَے گول آورتگ ءُ لئیب وتی نام ءَ کُتگ، چلسی ءِ نیمگ ءَ گول آروکیں لئیبیانی تہءَ اے. روڈیگر، این .کانٹے ءُ سی. پولیسٹک ھوار اَنت۔

ھمے پیم ءَ ویٹفورڈ ءَ جوانیں لئیب پیش داشتگ ءُ پریمیر لیگ ءِ یکیں چہ جوانتریں ٹیم مانچسٹر یونائیٹد چار گول داتگ ءُ باج بُرتگ۔ وھدیکہ مانچسٹر ءَ تھنا یک گول ءِ دات کُتگ۔

ویٹفورڈ ءِ نیمگ ءَ گول کنوکیں لئیبی جے. کنگ، آئی. سار، جے. پی ءُ ای. بوناوینچر ھوار اَنت وھدیکہ مانچسٹر ءِ ھاترءَ ڈی. وین ڈی بھیک ءَ گول کُتگ۔

پریمیر لیگ ءِ شمبے ءِ گوازیانی تہءَ دگہ یک جوانیں گوازی ءِ لیورپول ءُ آرسنل ءِ نیام ءَ بیتگ کہ لیور پول چار گول ءَ چہ باج بُرتگ۔ لیور پول ءِ نیمگ گول کنوکیں لئیبیانی تہ ءَ ایم. سلاہ، ایس. مانے، ڈی. جوٹا ءُ ایم. ٹکومی ھوار اَنت۔ وھدیکہ آرسنل ءَ لیورپول ءِ دیما ھچ گول آورت نہ کُتگ۔

مروچی ھم پریمیر لیگ ءِ دو گوازی مانچسٹر سٹی ءُ ایورٹن، اسپرز ءُ لیڈز ءِ نیام ءَ لئیب کنگ بنت۔

بلوچستان ءِِ دمگ ھرنائی ءَ سلاہ بندیں مردمانی اُرش ءَ اشکرانی کاریز ءَ کار کنوکیں سَے کاریزکار بیران بیتگ اَنت۔

تیرگواری ءِ وئیل ھرنائی ءِ شاھرگ ھنکین ءَ دیما اتکگ کہ آودہ اُرشکاراں زالاوان ءِ ھندءَ امان اللہ ترین اشکر کاریز ءِ کاریز کار نشانگ کُتگ اَنت۔

لیویز ءِ ردءَ تیر گواری ءِ وئیل ءَ اشکرانی کاریز ءَ کارکنوکیں سَے کاریز کار ھما وھد ءَ بیران بیتگ اَنت، وئیل ءَ پد لشکریاں ھنکین انگیراں کُتگ ءُ کوشکارانی پٹگ بندات کُتگ۔

لیویز ءِ ردءَ کاریزکارانی پجار داں انگت نہ بیتگ، جون ھسپتال ءَ دیم دیگ بیتگ اَنت۔

بلوچستان لبریشن فرنٹ ءِ جارکش میجر گھرام بلوچ ءَ پاکستانی پوج ءِ دیمروی کارانی شرکت ءُ بنجل ءِ سرءَ اُرش ءِ زمہ واری من اِتگ ءُ گُوشتگ کہ نوزدہ نومبر ءَ آدینگ ءِ روچ ءَ تُربت شھر ءِ آبسر ھنکین ءَ سرمچاراں پوج ءِ دیمروی کارانی شرکت فرنٹیئر ورکس آرگنائزیشن (ایف ڈبلیو او) ءِ کار جاہ ءِ سر ءَ اُرش کُتگ ءُ مشینری ءُ دگہ آسراتی بن داتگ اَنت۔

جارکش میجر گھرام بلوچ ءِ رد ءَ پوجی شرکت اِدءَ یک دگ ءِ اڈ کنگ ءَ اِنت کہ آ تُربت ءِ بنجاھی پوجی کیمپ ءَ آپسر ءِ پوجی کیمپ ءَ رؤت۔ پاکستانی ایردستی ءَ دیمروی کار زوراکی ءُ گلامی ءَ گیش کنگ ءِ کوشست اَنت۔ بلوچ مھلوک چہ اِشاں دیر بہ بنت۔

آئی ءَ دیمترءَ گُوشت کہ شانزدہ نومبر سَے شمبے ءِ بیگاہ ءِ ادار پنچ ءُ نیم ءَ سرمچاراں تمپ ءَ گندا در ءِ ھند ءَ بستگیں بُنجل ءِ سرءَ پیسرءَ اسنائپر ءَ گوں اُرش کُتگ ءُ یک کارمند ءِ کُشتگ، آئی ءَ پد بُنجل گوں ایل ایم جی ءُ اے ون گرینیڈ لانچراں گوں نشانگ کُتگ کہ چہ اِشی ءَ لشکریاں جانی ءُ مالی تاوان ءِ دیمپانی کنگ کپتگ۔

جارکش ءَ گُڈ سر ءَ گُوشت کہ مئے اُرش داں بلوچستان ءِ آجوئی ءَ برجاہ مان اَنت۔

نبشتانک: اُمر جان تو چہ درستاں جُتا اِت ئے

نبشتہ کار: میرزُک بلوچ

دی بلوچستان پوسٹ

اُمرجان تو گپ ئِے زان ئے ؟ تو چہ درستاں جُتا اِت ئے تئی گپ ءُ تران، تئی ٹھک ءُ بچکند، تئی ھم کوپگی ھر چیز ءِ تہ ءَ زیبائی مان ات تو مُدام گُشت کہ من ءَ گوں ابا اسلم ءَ گپ ءُ دیوان سک وش بیت سنگت ریھان ءِ کربان بوگ ءَ چہ رند تئی گپ مُدام ھمیش اِت اَنت کہ یار ریھان چون گل بیتگ، ھمے گُڈی ساھت ءَ کہ وتی دُژمن آئی ءِ چمانی دیم ءَ بیتگ ءُ آ پہ کربان بوگ ءَ چون بے کرار بوتگ اُف ھمے ساھت دنیا ءِ درسیں ساھت آں چہ وش تریں ساھت اِنت کہ تو پہ وتی مکھیں گُلزمین ءِ کُٹ ءَ واب بہ کپ ئے ھمے رنگ ءَ تئی گیمرتگیں چم ھم واب کپت اَنت۔

اُمر جان ترا یات اِنت من ءُ تو مُدام چہ وانگجاہ ءِ موکل ءَ پد روگ ءَ بوتیں تو گشت اَڑئے بیا اے راہ ءَ رویں بلکیں ابا اسلم ءَ گوں دُوچار کپیں، گڑا ما مُدام تئی گُشتگیں کشک ءَ اتکاں، برے برے ابا اسلم دیست سلام دعائے کُت برے نہ دیست، آ روچاں کہ نہ دیست تو باز پریشان بوت ئے۔ گشت اَڑئے مرچی کسمت شر نہ اِنت، ترا چنچو مھر اَت گوں ابا ءَ ترا چون مھر اَت گون زمین ءَ تئی ھر گپ ءُ تران ءِ تہ ءَ زمین ءِ بوہ ءُ باس مان بیتگ تو وتی کسان اُمری ءَ چونیں مھروانیں سنگتے اِت ئے تو مدام گُشت من ءَ وتی گُلزمین ءِ ھاتر ءَ مِرگی اِنت من دگہ مَرگ نہ لوٹ آں منی لوٹ ھمیش اِنت چہ ھدا ءَ من پہ زمین کربان بہ باں تو دگہ گپ ئِے زان ئے ؟ تو مرچی منی ھمرائی ءَ گون نہ اِت بلئے منی ساہ! تو زان ئے تئی ھمک گپ تئی ھمک بچکندگ منا کُدین اَنت، کندین اَنت ءُ جیڑگ ھم پرما اَنت تو راست گُشتگ، پہ ما بس زمین ءِ وشبوھی اِنت ءُ ما پہ ھمے زمین ءِ وشبوہ ءَ وتی سالونکیں سرانی کُربان کنگ ءَ ھچ چک ءُ پد نہ بہ ایں یار اُمر جان تئی همک جتگیں گپ تئی کُتگیں لوٹ ءُ واھشتانی وڑ ءَ سرجم بوت انت ءُ تو پہ زمین کُربان بوت ئے۔

اُمر جان تئی جُتائی ءَ چہ پد تئی کمی ءَ چو گوات ءُ آپ ءِ وڑ ءَ مارگ ءَ آں بلئے تو زان ئے تئی بچکندگ من ءَ ھِچ ابیتک بوگ ءَ نیل اَنت چون زیبا اِت اَنت چہ تئی ھیالاں ھِچ در نباں سک باز یات کاینت ، ھما بیگاھانی گردگ وانگ جاہ ءِ وانگ، منی ءُ تئی شپانی چاہ ءِ اَڈ کنگ ءُ سھب ءِ سر ءَ ساھت ھشت بج ءَ تئی موبائل اَلارم ءِ توار کہ مارا پاد ئِے کُت یار چون زھر اتک مارا پہ مباھل ءِ گھنٹی ءِ توار ءَ گندئے۔

پہ وانگ جاہ ءَ روگ ءِ ھاترا جاڑیگ بوگ، یک ءُ دومی ءِ ٹائی ءِ بندگ، چونیں وش ءُ زیبائیں وھد ءُ ساھت اِت اَنت ترا میتگ ءِ پرشتگیں کلات یات اِنت من تو مدام چہ لوگ ءَ در کپتیں تو چہ دُکاناں چیز زُرت ءُ من نان آؤرت من ءُ تو همودا نِشت ءُ وارت اُمر جان تو گپ ئِے زان ئے ترا دوشی واب ءَ دیست هما انت بے ھال نہ باں ھما ساھت کہ ترا چہ سِست ءُ گستا بوت آں گُڑا تئی درستیں گپ، کندگ ءُ مسکرا، مھر منی چمانی دیم ءَ آں سک باز یات پیداک ئے تو پُل جان۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔