TBP Balochi

نبشتانک: ما پرچا چو جتا جتائیں؟

نبشتہ کار: شاھد اھمد

دی بلوچستان پوسٹ

ھما راج ءِ پدریچ گار بوان بیت وھدیکہ آ راج ءَ وتی جند ءِ سُد ءُ سما مہ بیت چوکہ ما بہ چاریں انوگیں دَور ءَ ھر راج ءِ تہ ءَ الم ءُ زانت ھست اِنت اِش کہ وتی راج ءَ چَہ دری راج ءَ وت ءَ رکین کُت کن اَنت۔

اے دگنیا ءِ تہ ءَ زوراوریں راجے ءَ نزوریں راجے ءِ سر ءَ اُرش کتگ ءُ وتی دروگیں دپتر ءَ را پلا مرزی کتگ ءُ وت ءَ دگنیا ءِ تہ ءَ یک شریں ریاستے ءِ گواچن ءَ پیش کُتگ بلے شما وتی مُھکم کنگ ءِ واستا نزوریں راجے ءِ پدریچ ءَ بنگیج کن اَنت ءُ بلے شال ءَ آسودگی ءَ وتی زند ءَ شری ءِ سر ءَ گْوازین کُت نہ کن اِت پرچاکہ راستیں مردم ءَ شما وَ کُشت کن اِت بلے آیانی سوچ ءُ پِگر ءَ داں ابد ھلاس کُت نہ کن اِت ۔

اگاں راجانی دپتر مہ بوتّین اَنت گڑا اد ءَ ناں کہ بلوچستان ءِ نام ھست اَت نئیکہ بلوچ راج ءِ جند اَت کہ باریں کُجا کُجا بلوچ راج دگہ دگہ ملک ءِ تہ ءَ گستا گستا اَت اگاں ما مروچی گندیں ھر یک راجے ءَ وت ءَ پجار ءِ ھست اِنت ئِےچیا؟ پرچاکہ آیاں وتی راج ءِ راجدپتر پَھریز اِتگ گڑا ما پرچا گستا گستا اَنت؟ ایشی ءِ سبب چے بیت کن اَنت؟

اے گپ وَ راستے کہ اگاں مرچی شما ایردست مہ بوتین اِت گڑا ترا وتی راجدپترے مارشت بلکیں اوں نہ بیتگ اَت۔ راج ھما وھد ءَ مان اِت وھدیکہ آئی ءِ جند ءِ پُسّگ بہ مار اَنت کہ ما پرچا چوں جِتا جِتائیں؟-

ھر پِڑ ءِ تہ ءَ بلوچ راج ءَ من دست بندی کن آں کہ بیا اِت بَھر بہ زیِر اِت آ پڑ سیاست بہ بیت ، ٹیکنولوجی ءُ سائنس بہ بیت، ادب بہ بیت، راجانی دپتر بہ بنت ءُ یا پلسپہ بہ بیت دگہ بازیں پِڑاں گوں وت ءَ ھمگرنچ بہ کن اَنت پرچاکہ سَھت پہ سھت ءَ ءُ روچ پہ روچ دگنیا وتی داباں مٹ کنان اِنت اے دگنیا ءِ دود اِنت ءُ وت ءَ میزان میزان ءَ بدل کنان اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس کونسل ملتان ءِ شھدربرجاہ بلوچستان ءَ چہ بیگواہ بوتگیں دو نودربرانی واست ءَ مروچی پنجاپ شھر ملتان زکریا شھدربرجاہ ءَ چہ یک روانکے کشگ بوتگ کہ آئی ءِ سروکی بلوچ اسٹوڈنٹس کونسل ملتان ءِ چیئرمین حماد بلوچ ءَ کُتگ-

روانک ءَ پشتون اسٹوڈنٹس کونسل ملتان ( بلوچستان ) ءِ چیئرمین اسلام خان ، پیپلز اسٹوڈنٹس فیڈریشن ءِ صدر ناصر خان بڈانی ءُ ایم ایس ایف ءِ صدر جانی بابا ءَ ھوار پروگریسو اسٹوڈنٹس کولیکٹیو ءِ راھشون انم چوھدری ءَ وتی دگہ باسکانی ھمراھی ءَ اے روانک ءِ بھر بوتگ اَنت-

ھمے درگت ءَ حماد بلوچ ءَ گوشتگ کہ فصیح بلوچ ءُ سھیل بلوچ بلوچستان شھدربرجاہ ءَ چہ بیگواہ کنگ بوتگ اَنت کہ آ مطالعہ پاکستان ءِ بھر ءَ وانگ بوتگ اَنت آ بلوچستان شھدربرجاہ ءِ تہ ءَ چہ بیگواہ کنگ بوتگ اَنت بلے تنی وھدے اشانی درگت ءَ شھدربرجاہ ءِ انتزامیہ ءَ ھوار قانون ءِ داروکیں ادارھاں اے گپ ءِ ھچ زانت نیست کہ یک ادارھے ءَ کیمرہ بند پرچا بنت؟ وھدے نودربر وانگجاھاں مُھر نہ اَنت گُڑا دگنیا ئے کجام کُنڈ ءَ ھم مُھر بوت نہ کن آں پرچاکہ یک وانگجاھے ءَ چہ مھرتر دگہ ھچ جاگہ ءَ پھازگ ءِ ھاتر ءَ مُھر نہ بنت-

آئی ءَ گوشتگ کہ نو جُست اے چِست بیت پشتون اسٹوڈنٹس فیڈریشن ءِ چیئرمین ءَ را ھمے شھدربرجاہ ءِ ھاسٹل ءَ زھر دیگ بیت بلے پد ءَ ھم مئے پھازگ ءِ ھاتر ءَ پٹ ایں کیمرہ ءَ مارا بندی رس اَنت ءُ وھدے فصیح بلوچ ءُ سھیل بلوچ ءَ بیگواہ کنگ بنت بلے پد ءَ ھم اے ادارہ ءِ کیمرہ کہ کش ءَ پھازگ ءِ ھاتر ءَ لگتگ اَنت نو آ ھم مارا بندی گندگ کاینت اشی ءِ سبب چی اِنت ءُ ھمے کیمرہ وھدے مئے ازت ءِ سر ءَ کیت گُڑا ھمے کیمرہ مئے مات ءُ گھاراں تُرسینگ ءِ ھاتر ءَ شھدربرجاہ ءَ کارمرز کنگ بنت بلے پد ءَ ھم اے انتزامیہ بے وس ءُ لاچار گندگ کیت-

آئی ءَ گوشتگ کہ نو ما چی سرپد بہ بہ ئے بلوچستان شھدربرجاہ ءَ اے وئیلانی تہ ءَ کئی دست مان اِنت یا اے ادارہ ءِ ھستیں پاکستانی پوج کئی چیردستی ءَ کار ءَ اَنت ھمکورچی آیانی ساڑی بوگ ءَ اے وڑیں وئیل ءَ بوگ ءَ اَنت- کہ آئی ما دُرست گوں تُرندی ءَ ایر جن ایں ءُ ھکومت وھد ءِ سر ءَ نودربراں زوت آیانی یل کنائینگ ءِ ھاتر ءَ لوٹ کنگ ءِ ھمراھی ءَ ھمینچو قانون داروکیں ادارھاں چہ لوٹ کن ایں اے دوئیں نودربراں ھوار سرجمیں بیگواھیں مردم زوت چہ زوت یل بہ کن اَنت –

بلوچستان ءِ تیاب دپی شھر گوادر ءَ وتی ھک ءَ ، گوادر ءَ حق دو ، تھریک ءَ نندانک ءَ مروچی ھشتمی روچ اِنت برجاہ ءَ اِنت ، نندانک ءَ مردمانی آیگ برجاہ ءَ اِنت وھدے کہ شھر ءَ نندانک ھک ءِ یک روانکے رکشہ یونین ءَ کش اِتگ-

شھر ءَ وائی چوک ءَ مردمانی مزنیں کچے ءَ ساڑی اَنت – وھدے کہ مکران ءِ آ دگہ دمگاں ھم مردمانی آھگ مزنیں کچے برجاہ ءَ اِنت-

مروچی زھرشانی کنوکاں وتی دستاں گوادر لسبیلہ ءِ چہ گچین ءِ باسک پاکستان اسمبلی اسلم بھوتانی ، باسک بلوچستان اسمبلی حمل کلمتی ءُ سنیٹر کھدہ بابر ءِ بیگواھی اکس چست کتگ ءُ آیانی یل کنائینگ ءِ ھم لوٹ کتگ-

گوستگیں روچ ءَ ھدایت الرحمان بلوچ ءَ وائس فار بلوچ مسنگ پرسنز ءِ چیئرمین نصراللہ بلوچ ءُ ماما قدیر ءَ گوں تران کنان ءَ گْوشتگ کہ مئے اے مردم ھم بیگواہ ءَ اَنت وتی بُنجل ءَ اشانی اکساں ھم ایر بہ کن-

نندانک ءَ ساڑی ئیں مردماں گوشتگ کہ اے سئیں گچین کتگیں مردم مئے ءُ اے شھر ءِ ھاتر ءَ زندگی ءِ ھساب ءَ نہ اَنت اگاں زندگ ءُ سلامتاں گُڑا وتی شھر ءُ دمگ ءَ چہ دیر بدار اِت-

گوادر ءَ نندانک ءَ اے گچین کتگیں مردمانی ابید آل پارٹیز ءَ ھوار راج دوست پارلیمانی گلاں ھم ایر جنگ ءَ اَنت-

مروچی نندانک ءَ گپ تران کنان ءَ مولوی ھدایت الرحمان بلوچ ءَ گْوشتگ کہ سے روچ ءَ اگاں ٹرالرز ءَ تیاب ءَ چہ در نہ کُت اَنت گُڑا سی پیک دگ ءَ کار کنگ ءَ نیل ایں ءُ سرجمیں شھدگانی سر ءَ نندانک کن ایں-

دومی نیمگ ءَ ھکومت ءِ نیمگ ءَ چہ ھچ وڑیں دیوان چست ءُ ایر نہ بوتگ-

پنجگور ءِ جاھمنند رخسار بلوچ ءَ گوشتگ کہ آئی ءِ برات ھشت سالاں پیش پاکستانی پوج ءَ آوار جتگ ءُ بیگواہ کتگ کہ ھنگت گار انت دیم ءَ آرگ نہ بیت –

رخسار بلوچ ءِ رِد ءَ آئی ءِ برات عبیداللہ دہ اپریل سال دوھزار سینزدہ ءَ پاکستانی پوج ءَ دگہ چار سنگتانی ھمراھی ءَ لوگانی نزیک ءَ آوار جتگ ءُ گوں وت برتگ انت –

رخسار بلوچ ءِ رِد ءَ لھتے ماھاں پد عبیداللہ ءِ ھمراھی ءَ آوار جنگ بوتگیں مردم یل کنگ بوتگ ءُ وتی لوگاں سر بوتگ انت بلے منی برات ھنگت گار ءُ بیگواہ انت –

رخسار بلوچ ءَ وتی برات عبیداللہ ءِ زورانسری آوار جنی ءِ سرجمیں رپورٹ بیگواھیں مردمانی پانجنیں گل وائس فار بلوچ مسنگ پرسنز ءِ بنجل ءَ جما کُتگ انت ءُ سرکار ءَ چہ لوٹ کُتگ کہ آئی ءِ برات دیما آرگ بہ بیت ءُ ھک دئیگ بہ بیت –

بلوچستان ءِ پُرشت پروشیں دگانی سوب ءَ ھمک روچ وئیل بوگ ءَ انت ھمے سال ءِ اکتوبر ماہ ءَ نُھ سد ءُ نود ھپت دگ ءِ وئیل دیم ءَ اتکگ انت کہ یک سد ءُ بیست ءُ شش مردم چہ وتی زند ءَ زبھر بوتگ انت وھدیکہ اے وئیلاں چہ یک ھزار ءُ سَے سد ءُ ھشتاد ءُ نُھ مردم زدگ بوتگ انت –

بلوچستان یوتھ ءُ سول سوسائٹی ءِ نیمگ ءَ چہ شنگ بوتگیں رپورٹ ءِ رد ءَ گوستگیں ماہ ءَ بلوچستان ءِ جتاجتائیں ھند ءُ دمگاں دگ وئیلاں وئیل دیم ءَ اتکگ انت کہ شال، کلات، مستونگ، کردگاپ ءُ پشین ءَ دوسد ءُ چِل ءُ ھپت دگ وئیلاں سَے سد ءُ سِی ءُ چار مردم زدگ ءُ سِی ءُ دو مردم بیران بیتگ۔ ھزدار، بیلہ، سوراب، آواران ءَ چار سد ءُ بیست ءُ ھشت دگ وئیلاں پنچ سد ءُ ھپتاد ءُ ھپت مردم زدگ، بیست ءُ ھپت مردم بیران بیتگ اَنت –

رپورٹ ءِ رد ءَ ژوب، لورلائی، کلہ عبداللہ، مسلم باگ، زیارت، کلہ سیف اللہ ء یک سد ءُ شست ءُ سَے دگ وئیلاں دوسد ءُ شست مردم زدگ ءُ سِی ءُ دو مردم بیران بیتگ انت ءُ وھدیکہ گوادر، پسنی، جیونی، تربت، پنجگور، بسیمہ، واشک، نوشکے، ھاران، سیندک، چاگے، نوکنڈی، دالبندین ءَ سبی ءُ نُھ دگ وئیلاں شست ءُ سَے مردم زدگ ءُ چاردہ مردم بیران بیتگ-

ھمے وڑ ءَ سبی، نسیر آباد، ڈیرہ مراد جمالی، جاپر آباد، سوئی، کوھلو، مچ، اوستہ محمد ءَ یک سد ءُ بیست دگ وئیلاں یک سد ءُ پنجاہ ءُ پنچ مردم زدگ ءُ بیست ءُ یک مردم بیران بیتگ اَنت۔

رپورٹ ءِ رد ءَ کسان سالیں زھگ عبدالجبار یک سالے ءَ پیش دگ وئیلے ءَزدگ بیتگ اَت، ھمے ماہ اکتوبر ءَ بیران بیتگ –

گیشتگان میتگ ءَ پوجی کاروان ءِ سر ءَ اُرش کتگ ءُ پنچ کارمند کُشتگ اَنت – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ زامران اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءَ کیچ پنجگور ءِ نیام ءَ زامران ءِ دمگ گیشتگان ءَ تر ءُ گرد کنوکیں پاکستانی پوج ءِ گشتی کاروان ءِ سرا پیسر ءَ چہ سنگر گپتگ ءُ گوں نوکیں ءُ وتکاریں سلاھاں اُرش کتگ-

جارکش ءَ گوشتگ کہ زورگیریں پوج ءِ دو گاڑی اُرش ءِ زد ءَ اتکگ ءُ پوج ءِ پنچ کارمند مرتگ ءُ بازینے زدگ بوتگ – وھدیکہ دوئیں گاڈی سک باز تاوان بار بوتگ اَنت-

جارکش ءَ گوشتگ کہ مدامی وڈا زورگیریں پوج ءِ جارکشیں گل آئی ایس پی آر وتی پوجیانی کوش آں چیر دیگ ءِ بے سوبیں جھد ءَ کنان ءَ تھنا یک کارمندے ءِ کوش ءَ منّگ ءَ اِنت۔ کہ آھانی پروش ورگ ءِ نشانی اِنت-

جارکش بیبگر بلوچ ءَ گڈسر ءَ وتی درشان ءِ تہ ءَ گوشتگ کہ بلوچستان ءِ آجوئی ءَ تاں زورگیریں اِستان ءِ بگیریءَ مئے جنگ برجاہ مانیت –

پاکستانی پوج ءِ شعبہ تعلقات عامہ (آئی ایس پی آر) ءَ پنجگور ءَ پاکستانی پوج ءِ سر ءَ اُرش ءَ یک کارندھے ءِ بیرانی راست کرتگ –

آئی ایس پی آر ءِ رد ءَ پوج ءِ سر ءَ اُرش ءَ چہ ڈیرہ اسماعیل خان ءِ جھمنندیں سپاھی خلیل اھمد بیران بیتگ-

زانگ بہ بیت گوستگیں روچ ءَ بلوچستان ءِ دمگ کیچ ءُ پنجگور ءِ میانی دمگ زامران گیشگان ءُ زیارت ءَ سلاہ بندیں مردماں پاکستانی پوج ءِ سر ءَ اُرش کرتگ اَت –

اُرشاں پوج ءَ جانی تاوانانی دیمپانی کنگ کپتگ اَت – اُرشاں پد دمگی مردمانی رد ءَ جنگجاہ ءَ پوج ءِ بازیں گاڑی ءِ سر بیتگ –

بلے تنی وھدی اے اُرش ءِ زمہ واری کس ءَ نہ من اِتگ-

بلوچستان ءِ بنجاھی شھر شال ءَ دو نودربرانی بیگواھی ءِ ھلاپ ءَ مروچی شانزدھمی روچ ءَ نودربرانی زھرشانی نندانک برجاہ اِنت ءُ مروچی نودربراں دراھیں وانگجاہ بند کرتگ اَنت-

نودربرانی گوشگ اِنت کہ مئے زھرشانی ھما وھد ءَ برجاہ بیت اِنت کہ دانکہ ھردوکیں نودربر یل کنگ نہ بنت ءُ اگاں نودربر یل نہ بیت اَنت گڑا بلوچستان ءِ دگہ جاھاں ھم وانگ جاہ بند کنگ بنت –

مروچی شال ءَ سردار بھادر خان ومن یونیورسٹی، بولان میڈیکل کالج شال، بلوچستان یونیورسٹی آف انفارمیشن ٹیکنالوجی، انجنیرنگ اینڈ منجمنٹ سائنس، سائنس کالج شال، پوسٹ ڈگری کالج سریاب روڈ، پولی ٹکنیک کالج سریاب ءُ گرلز ڈگری سرجم ءَ بند کرتگ اَنت ءُ وانگی پھنات ماٹو کرتگ اَنت-

ھمے وڑ ءَ بلوچستان بار کونسل ءَ گوستگیں روچ ءَ زھرشانی نندانک ءَ نشتگیں نودربراں گون نیاد کرتگ ءُ بیگواھیں نودربرانی یل کنائینگ ءِ کمک ءِ سدکی داتگ اَنت –

زانگ بہ بیت ھمے ماہ نومبر ءِ یک ءَ بلوچستان شھدربرجاہ ءِ ھاسٹل ءَ دو نودربر سھیل بلوچ ءُ فصیح بلوچ بیگواہ کنگ بیتگ اَنت –

نودربرانی بھتام اِنت کہ اے ھردوکیں نودربر ریاستی ادارھاں برتگ اَنت بلے سرکار نا آیاں یل کنگ اِنت ءُ نانکہ آیاں آمیدگس ءُ دگہ جاھاں پیش کنگ اِنت-

نودربرانی بیگواھی ءِ ھلاپ ءَ گوستگیں روچ ءَ لاھور ءَ بلوچ اسٹوڈنٹس کونسل ءِ نیمگ ءَ ھم زھرشانی کنگ بیتگ اَت –

بلوچستان ءَ سیاسی ءُ نودربر رھشونانی گوشگ اِنت کہ اگاں ریاست ءِ اے رویش برجاہ بیت اَنت گڑا بلوچستان ءِ آؤکیں پدریچ ترس ءَ کجا ونت کنت نا کہ آ دیم ءَ شت کنت –

سیاسی مھلوک ءِ گوشگ اِنت کہ بلوچستان ءِ گیشتریں وانگجاہ مٹ کنگ ءُ پوجی بنجل جوڑ کنگ بیتگ اَنت اود ءَ پوج ءِ چار گزاری بیگ ءَ اِنت بلے اشاں ابید اود ءَ نودربرانی بیگواھی جیڑگ پرمائیت –

نبشتانک: کدی منی ودار آسر بیت

نبشتہ کار : جلال اهمد

دی بلوچستان پوسٹ

سال دو ھزار ءُ ھبدہ ءَ ما دوئیں یکّیں وانگ جاه ءَ وانگ ءَ اَت اِیں من کلاس ءِ تہ ءَ پُشت پُشت ءَ نِشتگ اَت آں ءُ آ دیم دیم ءَ کلاس ءِ نشتگ اَت نوکی آئی ءَ هشت روچ اَت کہ آ مئے وانگ جاه ءَ اتکگ اَت پہ وانگ ءَ هما روچ ءَ چہ آ من ءَ دوست بُوت ءُ آئی ءِ گوم ءَ من ءَ مھر بُوت بلے من گُشت نہ کُت کہ من ءَ گوں تو مِھر اِنت من چارِت من اگاں بُگشان ءِ بِگندے آ زِد بکنت گڑا اے گپ پہ ما دوینانی واستا مسلہ ءِ جوڑ بیت کنت من مدام جُھد کُرت کہ مرچی گُشانے باندا گُشانے بلے من کہ آئی ءِ دیم ءَ هر وھد ءَ اتکاں گڑا من ءَ اے هاٹیگ مان نہ بیت کہ من بُگشانی کہ تو من ءَ دوست بئے هچ بر من گُشت نہ کُت همے پیم ءَ بلے من مُدام نیم چمّی آ چارتگ اَت آ هم شَک اَت کہ اے من ءَ را دائم چاریت الّم اِشی ءَ وڑے هست بلے من ءَ گُشت ئِے نہ کُت گڑا همے وڑ ءَ یک بلاھیں مُدّتے گوست کہ آ وانگ جاه ءَ نیتک من همے دوران ءَ سک نہ گِیگ بُوت آں هر وھد من کلاس ءَ بے مُوڑ اَت آں پریشان اَت آں منی سنگتاں هم منی جاور دیست آ هم بے چاڑ بُوت اَنت چیا کہ چوناھا کِلاس ءَ مسکرائی کنوکیں نودربر من اَت آں گڑا دائم سنگتاں من ءَ جُست کُرت کہ تو مرچاں پریشان ءِ گمیگ ءِ هیر اِنت تو مدام کلاس ءَ لُچّی کُتگ مسکرائی کُتگ نوں تئی هما کندگ ءُ مسکرائی کُج اَنت؟ من گُشت هو یار هیر اِنت من گِمیگ نہ اوں منی جان وش وش نہ اِنت چوناها منی جان وش وش اَت بلے من سنگتانی تسّلی دیگ واستا بھانہ کُرت گڑا مُدّتے گوست آ گِندگ نہ بُوت من سک ابیتک اَت آں دائم گمیگ اَت آں گڑا من یک سُھبے زوت مھلا وانگ جاه ءَ سر بُوت آں کلاس ءَ کس نیست اَت اولی نودربر من اَت آں کہ کلاس ءَ نِشت آں من ءَ چہ کموکے رند من دیست داں آ هم کلاس ءَ دروازگ ءَ پُوتِرت ءُ گُشت ئِے ” اسلام علیکم” من پسّو دات “وعلیکم اسلام” گڑا آ وتی جاه ءَ نِشت مُدّتے بیتگ اَت کہ آ وانگ جاه ءَ گِندگ نہ بُوتگ اَت گڑا منی اولی روچ همیش اَت کہ من آئی ءَ را جُست کُرت کہ تو دِیرے وانگ ءَ نہ یتکگے هیر بُوتگ ؟ من ءَ آئی ءَ پسّو دات کہ “منی مات نادرواه بُوتگ” من گُشت هُدا رهم بکنت نوں گڑا تئی مات ءِ تبیئت چون اِنت”آئی پسّو دات” شُگر الله ءِ نوں وش اِنت همے روچ ءَ چے آئی ءَ هم اے گپ پھمت کہ اے من ءَ باز دوست داریت نوں من ءَ دائم دل ءَ اَت کہ من یک روچے ایوک ءِ بِگنداں ءِ الّم گُشان ئِے کہ تو من ءَ سک دوست بئے همے وڑ ءَ چیزے روچ ءَ رند من پد ءَ زوت مھلا یک روچے وت ءَ را وانگ جاه ءَ سر کُرت بلے اے روچ ءَ آ مھلا نہ یتک گڑا وهد گوزان بُوت مئے شش ماھی چکّاس نزیک ءَ رس ات اَنت گڑا چکّاسانی وهد ءَ آ منی گور ءَ اَتک کہ تو من ءَ ریازی کمو سرپدی بدئے منی سمج ءَ اِچ نہ یّتکگ گڑا همے روچ ءَ ما دوئیں شُت اِیں کلاس ءَ چے ڈنّ ءَ ما دوئیں نِشت اِیں من آئی ءِ سرپدی دیگ بِندات کُت من هم ریازی سک نہ زانتگ اَت بلے کمو باز زانتگ اَت گڑا من آئی ءَ را همے سوالانی سرپدی دات کہ اے سوالانی وهد ءَ آ وانگ ءَ نہ یتکگ اَت من داں نیم ادار ءَ آئی ءَ را همے چیزانی باره ءَ سرپدی دات گڑا آئی ءَ شرّیں وڑے ءَ پھمِت اَنت نوں آئی ءَ گُشت کہ منی سمج ءَ جوانِیں وڑے ءَ اتکگ اَنت همے وھد ءَ گڑا من آئی ءَ را گُشت کہ من ءَ گوں تو گپے هست من ترا بُگشان ئِے تو دل ءَ نہ کن ئے؟ آئی من ءَ را گُشت کہ بُگش من چیا دل ءَ کن آں؟ گڑا همے وھد ءَ من گُشت کہ من ءَ گوں تو سک باز مھر اِنت تو من ءَ باز دوست بئے من کہ اے گپ کُت گڑا آئی ءَ بِچکند اِت ءُ گُشت کہ اے هرابیں گپے نہ اِنت من اے گپ ءَ دل ءَ نہ کن آں پد ءَ من ءَ آئی ءَ گُشت کہ نوں چکّاس نزیک اَنت تو دائم بیا من ءَ سرپدی بدئے هما وھد ءَ کہ تو پارگ بئے من گُشت اے باز وشّیں گپے گڑا من ءُ تو مُدام کلاس ءَ ڈن کائیں یات کنے بِلّے شرّیں لمبراں گوں چکّاس ءَ کامیات بہ ایں آئی ءَ هم منی گپ ءَ گوں تِپاک کُرت من ءَ گُشتے اے بازجوانیں گپے ما هر دویناں وتی چکّاس ءِ تیاری بِندات کُت مدام وانگ جاه ءَ ما دوئین هور نِشت اِیں ءُ وتی سبک یات کُرت اَنت سے روچ ءَ رند چکّاس بندات بُوت اَنت ما هر دئیناں وتی چکّاس دات اَنت همے پیم ءَ گُڈّی پیپر ءَ روچ ءَ من دِگہ کلاسے ءَ پیپر دیگ ءَ اَت آں ءُ آ دِگہ کلاسے ءَ من ءَ چے پیسر آئی ءَ وتی پیپر لِکّت ءُ هلاس کُرت اَت منی کلاس ءَ دراهیں نودربراں وتی پیپر داتگ اَت اَنت ءُ دْراھیں شُتگ اَت اَنت وتی گِس آں من بس پشت کپتگ اَت آں منی پیپرے هم کمو بچّتگ اَت من پیپر کہ سرجم کُرت کلاس ءَ چہ ڈن دراتکاں چاراں دان آ دیوال ءِ کَش ءَ اُوشتاتگ من گُشت هال کن باریں تئی پیپر چوں بُوت آئی ءَ پسّو دات کہ شر بُوتگ پد ءَ من ءَ آئی ءَ گُشت کہ نوں چکّاس هلاس بُوت اَنت ده روچ ءَ زِمستان ءِ چُٹی اَنت گڑا انشاالله چُٹی آں رند دُچار کپ اِیں من گُشت شر اِیں زندگ بہ ایں اَلّم گِندگ بہ ایں گڑا من ودار کُت دان ده روچ گوست یازدهمی روچ بیت من شُتاں وانگ جاه ءَ اے روچ رِزلٹانی روچ اَت آ هم من ءَ چے کمو رند وانگ جاه ءَ سر بُوت من ءُ آ ءُ سرجمیں کلاس ءِ نودربر نِشت اِیں هر کس همے ودار ءَ نِشتگ اَت کہ باریں من چینچو لمبر گِپتگ کمو وھد گوست وانگ جاه ءِ پُشتی نیم ءَ گوازی کنگ ءَ جاه ءَ سرجمیں وانگ جاه ءِ نودربر یک جاه بُوت اَنت ءُ رزلٹانی اِیلان بیت ما ودار کُت کہ مئے نام باریں کدی کیت ما کامیات اِیں یا نہ آ کلاسانی نام گوست اَنت نوں مئے کلاس ءِ باری بیت مئے کلاس ءِ یک لمبر ، دو لمبر ءُ سِے لمبر دِگے نودربر اَت آں چار لمبر من ءُ پنچ لمبر آ بُوت
گڑا من واتر وتی کلاس ءَ شُت آں نِشت آں جیڑگ ءَ اَت آں همے وهد ءَ آ اَتک کلاس ءَ دپ ءَ من ءَ گوانک اِش کُرت کہ کمو بیا ڈنّ ءَ
من شُت آں گڑا انچوش کہ من آئی گور ءَ سر بُوت آں من ءَ آئی ءَ گُشت کہ من تئی مِھرانی وامدار آں من گُشت چی ءَ گُشت ئِے کہ تو من ءَ باز سرپدی داتگ تئی وجہ ءَ من پنچمی لمبر گِپتگ تئی من باز باز منتوار آں همے سات ءَ من گُشت نہ اے گپ ءِ نہ اِنت من کہ چیزے زان آں منی هک اِنت کہ ترا هم بُگشاں گوں
گڑا همے وگد ءَ آئی ءَ من ءَ گُشت کہ تو باز زانے تئی هرچ گپ جوانیں مانایے داریت تئی گپ من ءَ باز دوست بنت من گُشت تو من ءَ سک کلاگ بندے گُشت ئِے نہ هکیکت من ءَ تئی گپ باز دوست بنت گڑا گپ گپ ءِ سر ءَ من ءَ گُشت ئِے کہ هما ساھت چینچو زیبدار اَنت کہ من تئی گِندگ ءَ مُھتاج بہ باں ءُ تو منی ودار ءَ بکن ئے پد ءَ انچو هم گُشت ءِ کہ ودار کنگ گران اِنت هم بلے ودار کنگ ءِ ساھت ءَ مردم چینچو باریں گپ وتی دل ءَ بارت ءُ کاریت پد ءَ گُشت ئِے کہ ودار ءِ وھد ءَ وڑ وڑیں جیڑهانی دیمپاں بُوگ کپ ایت بلے اگاں ودار آسر بہ بیت گڑا آئی ءِ لذّت رؤت آئی ءِ شِیرکنی هلاس بیت من اے گپ گوشداشت اَنت ءُ همے ساھت ءَ موسم سک وش اَت سرگوات شِیکگ ءَ اَت جمبراں ساھیل کُتگ اَت گڑا ما هر دویناں وتی گپ هلاس نہ کُت اَنت ءُ هور بِندات بیت ما شُت اِیں وتی کلاس ءَ نِشت اِیں هور ءِ هلاس بُوگ ءَ رند من ءَ آئی ءَ گُشت کہ مرچی موسم ءَ بِچار چینچو دِلکش اِنت بیگاه ءِ ساھت پنچ ءَ بیا من تو تیاب دپ ءَ دُچار گپ ایں من گُشت شرّیں اَلّم کایاں
گڑا من بیگاه ءِ ساھت پنچ ءَ شُت آں آ من ءَ چے پیسر تیاب دپ ءَ نِشتگ اَت من هنچو کہ آئی ءِ گور ءَ سر بُوت آں من وش اَتک کُت ءُ آئی ءَ وش اَتک ءَ رند من ءَ همے گپ پد ءَ گُشت کہ ودار کنگ باز وش اِنت من ءَ نیم ادار بیت کہ من تئی ودار ءَ بُوتگ آں من ودارے ڈولداری جوانیں پیمی ءَ مار اتگ من ءَ گُشت ئِے کہ تیاب ءَ بِچار چینچو زیبا اِنت چول آں بِچار گُش ئے گوات ءِ وداریگ اَنت باریں کد کیت آ روچ کہ تو هم منی ودار ءَ کن ئے وھد رواں بُوت نوں مگرب ءِ وهد بُوت گڑا همے وھد ءَ آئی ءَ وتی پندُول ءَ چہ کسانیں ڈائری ءِ در کُرت ءُ من ءَ دات ءُ گُشت ئِے تو اے ڈائری توک ءَ چیزے نِبشتہ بکن ءُ من ءَ بِدئے گڑا من اے شعر نِبشتہ کُرت-

“باریں نوں کدی کیت چُش اِیں ساھت”
“جمبری بیت من ءُ تو نِندے دو بر یکجاه”

شعرے لِکگ ءَ رند من ڈائری آئی ءَ را واتر دات گڑا آئی ءَ گُشت کہ من نوں اراده کُتگ کہ رواں وتی هنکین ءَ کہ همودا من ودی بُوتگ آں من ءَ سک زهیر کنت پہ وتی میتگ ءَ بلے تو هِچ پریشان مہ بُو ودار کن اَلّم من پہ تو کایاں
نوں من ءَ چار سال اِنت کہ من ودار کُتگ بلے انگت آ گوں من دُچار نہ کپتگ باریں ودار کدی آسر بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پریمئیر لیگ فٹبال گوازی ءَ گوستگیں روچ ءَ مانچسٹر سٹی ءُ ایورٹون، ٹوٹنہم لیڈزیونائیٹڈ میان ءَ گوازی کنگ بوتگ- مانچسٹر سٹی ءُ ٹوٹنہم لیبیاں جوانیں لیب پیش داشتگ ءُ گوازی وتی نام ءَ کُتگ –

یکشمبے روچ ءَ بوتگیں اولی گوازی مانچسٹر سٹی ءُ ایورٹون ءِ میان ءَ کنگ بوتگ کہ مانچسٹر سٹی ءَ سَے گول ءَ باج بُرتگ وھدیکہ ایورٹون ءِ نیمگ ءَ چہ ھچ گول اسکور کنگ نبوتگ –
مانچسٹر سٹی ءِ نیمگ آر.اسٹرلنگز، آر. ھیرینندز ءُ بی.سلوا یک یک گول ءِ اسکور کُتگ وتی ٹیم کٹارینتگ –

پریمیئر لیگ ءِ دومی گوازی ٹوٹنہم ءُ یونائیٹڈ لیڈز ءِ میان ءَ کنگ بوتگ کہ ٹوٹنہم ءَ یک گول ءَ باج برتگ –

لیڈز یونائیٹڈ ءِ نیمگ ءَ چہ یک گول ءِ اسکور کنگ بوتگ کہ لیڈز ءِ لیبی ڈی.جمس ءَ داتگ وھدیکہ ٹوٹنہم ءِ لیبی پئیری ایمل ءُ ریگیولئن ءَ یک یک گول ءِ اسکور کُتگ یک پہ دو گول ءَ گوازی وتی ٹیم ءِ نام ءَ کنائینتگ –