TBP Balochi

یوئیفا چمپئین لیگ فٹبال گوازی برجاہ انت ءُ گوستگیں روچ ءَ شانزدہ ٹیماں گوازی کُتگ اشانی تہ ءَ بائرن، مانچسٹر یونائیٹڈ، چیلسیا، سیویلا ءُ لیلی ءَ گوازی برتگ وھدیکہ مالمو ءُ زینٹ، ینگ بوئز ءُ اٹلنٹا، بارسلونا ءُ بینفیکا دیمیگ بوتگ انت –

سَے شمبے شپ ءَ بوتگیں یوئیفا چمپئن لیگ ءِ اولی گوازی ڈینامو کئیو ءُ بائرن ءِ میان ءَ کنگ بوتگ کہ بائرن ءَ دو پہ یک گول ءَ باج برتگ ءُ گوازی وتی نام ءَ کتگ –

ڈیناموکئیو ءُ بائرن ءِ میان ءَ بوتگیں گوازی ءَ ڈیناموکئیو ءِ لیبی ڈی.ھارمش ءَ یک گول ءِ اسکور کُتگ وھدیکہ بائرن ءِ لیبی آر.لاؤندوسکی ءُ کے کامن ءَ یک یک گول ءِ اسکور کُتگ ءُ گوازی وتی ٹیم ءِ نام ءَ کتگ –

گوستگیں شپ ءَ بوتگیں دومی گوازی وئیلارئیل ءُ مانچسٹر یونائیٹڈ میان ءَ بوتگ کہ مانچسٹر یونائینڈ ءَ دو گول ءَ بازی برتگ وھدیکہ وئیلا رئیل ءِ نیمگ ءَ ھچ گول اسکور کنگ نہ بوتگ –
مانچسٹر یونائیٹڈ ءِ نیمگ ءَ کرسٹانیو رونالڈو ءُ جے.سینچو ءَ گول اسکور کُتگ انت –

چیمپئن لیگ ءِ سیمی گوازی چیلسیا ءُ جوئنٹس میان ءَ بوتگ کہ چیلسیا جوئینٹس ٹیم ءِ دیم ءَ چار گول اسکور کُتگ بازی بُرتگ –
چیلسیا ءِ نیمگ ءَ اسکور کنگ بوتگیں گولانی تہ ءَ ٹی.چلوبہا، آر جیمس، سی.ھیڈسون، ٹی.ورنر ءَ یک یک گول ءِ اسکور کتگ گوازی وتی نام ءَ کتگ –

چارمی گوازی بینفیکا ءُ بارسلونا ءِ میان ءَ بوتگ کہ ھردو ٹیمانی لیبیاں جوانیں لیب پیش داشتگ بلے ھر دو ٹیم گول اسکور کنگ ءَ بے سوب بوتگ انت –

پنچمی گوازی ءَ سیویلا ءَ والسبرگ ءِ دیم ءَ دو گول ءَ بازی برتگ – سیویلا ءُ والسبرگ میان ءَ بوتگیں گوازی ءَ سیویلائے لیبی جے.جورڈن ءُ آر.میر ءَ یک یک گول ءِ اسکور کتگ –

یوئیفا چیمپئن لیگ ءِ ششمی گوازی مالمو ءُ زینٹ میان ءَ بوتگ کہ ھردو ٹیم یک یک گول ءَ دیمیگ بوتگ انت – ھپتمی گوازی ءَ لیلی ءَ آر بی ءِ دیم ءَ یک گول ءَ باج برتگ وھدیکہ لیلی ٹیم ءِ نیمگ ءَ ھچ گول اسکور کنگ نبوتگ – آر بی ءِ لیبی جے.ڈیوڈ ءَ یک گول ءِ اسکور کتگ گوازی وتی ٹیم ءِ نام ءَ کتگ –

یوئیفا ءِ ھشتمی ءِ گوازی ءَ ینگ بوائز ءُ اٹلنٹا سَے سَے گول ءَ دیمیگ بوتگ انت –

بلوچ نیشنل مومنٹ ءِ بنجاھی سیکرٹری جنرل ڈاکٹر مراد بلوچ ءَ گُشتگ کہ مشکہ ءَ پاکستانی پوج ءَ انور ء مھمود، غفور ء مھمود، زھری خان ء جمعہ، امداد ء زھری خان، رشید ء فتح مھمد دزگیر کرتگ ءُ گوں وت برتگ اَنت – پاکستانی پوج ءَ بندیگ جاہ ءَ انور ء مھمود کُشتگ ءُ لاش کھول ءِ دست ءَ داتگ –

ڈاکٹر مراد بلوچ ءَ گُشتگ کہ اے مردم دزگیری ءِ وھد ءَ پاکستانی پوج ءَ بیھار داتگ ءُ گوشتگ اَنت کہ اگاں گپ ڈن ءَ دراتک گڑا اشی ءِ ترندیں چکاس پرشما ایر کنگ بیت اِنت -اے بیھار ءِ رند پد ءَ پاکستانی پوج ءَ انور ء مھمود کُشگ ءِ دروشم ءَ پیش کتگ – انور ءِ مستریں برات ءَ ھوات سیاد انگت ءَ درکانونی دزگیری ءَ اَنگ ءُ آیانی بارو ءَ گچ ھال نیست اِنت مارا گمان اِنت پوج آیاں ھم کُش ایت –

ڈاکٹر مراد بلوچ ءَ گوشتگ کہ پاکستانی پوج بلوچستان ءَ ناشریں جنگی کرداں ھم سر گوز کنگ اِنت اد ءَ جنگی جرمان گوستگ – گوستگیں روچاں یک نیمگے ءَ پاکستانی پوج مردماں زورانسری آوار جنیانی تہ ءَ گیشی آرگ اِنت دومی نیمگ ءَ مردمانی کُشت ءُ کوشاں گیش کنگ اِنت – چہ کولواہ ءَ گوستگیں دَہ روچاں دو زالبولاں ھوار نُھ مردم زنداناں برگ بیتگ اَنت –

آئی ءَ گشتگ کہ پاکستانی پوج ءَ جنگی جرمانی ھساب دیگی اِنت – ما امیت کن ایں یک روچے ءَ دنیا پاکستان ءِ زوراکیانی سر ءَ گامگیج زور ایت ءُ بلوچ نسل کُشی ءِ دارگ ءِ واستا کرد ءَ پیلو کنت اگاں اے رند ءَ ھپتاد ءِ دھک ءِ رنگ ءَ پاکستان ءِ جنگی جرماں کانون ءِ سر ءَ آرگ نہ بیت گڑا آ بنگالی ءُ بلوچاں پد دومی راجانی نسل کُشی ءَ ھچ دستاں نہ لرزین ایت –

ڈاکٹر مراد بلوچ ءَ گُشتگ کہ پاکستان اگاں اے سرپد بیگ اِنت آ زوراکی ءُ زُلمانی زور ءَ بلوچ راجی جنز ء آجوئی ءِ دزکش کنگ ءَ اِنت بلے اے آئی ءِ وس ءَ چہ ڈن اِنت بلوچ راج پاکستانی زوراکی ءُ زُلمانی دیم ءَ جزبگ ءِ گون ءَ مِک اِنت آئی ءِ آسر زوت یا دیر ءَ چہ پاکستان ءَ جتا بیگ ءُ بلوچستان ءَ آجوئی ءِ دروشم ءَ گندگ بیت اِنت –

ھمے سال ءَ بلوچستان ءِ دمگ مچ ءَ پوج ءِ دست ءَ زورانسری آوار جنگ بوتگیں ودود ساتکزئی ءِ گُھار گُل زادی بلوچ ءَ گوشتگ کہ منی برات ودود ساتکزئی ءِ زورانسری آوار جنی ءَ چار ماہ سرجم بوتگ بلے ھنگت آئی سلامتی درگت ءَ مار ءَ ھچ وڑیں ھال سر نبوتگ –

آئی ءِ گوشگ ات کہ بیست ءُ پنچ نومبر ءَ شال پریس کلب ءِ دیم ءَ ودود ساتکزئی ءِ آوارجنی ءِ درگت ءَ پریس کانفرنس ءُ چہ نوشکی ءَ زورانسری آوار جنگ ءُ بیگواہ بوتگیں نصیب اللہ بادینی ءِ کھول ءِ ھمراھی ءَ زھرشانی کنیں –

ودود ساتکزئی ءِ گھار گل زادی بلوچ ءَ درسیں انسان دوستیں مھلوک ءَ چہ لوٹ کُتگ کہ آئی ءِ برات ءِ یل کنائینگے ھاتر ءَ توار چست بکن انت گوں ءُ زھرشانی ءَ ھوار بہ بنت –

دومی نیمگ ءَ بلوچ سوشل میڈیا ایکٹوسٹانی نیمگ ءَ بیست ءُ پنچ نومبر ءَ چاگردی ترامجاہ ٹوئیٹر ءَ ودود ساتکزئی ءُ نصیب اللہ بادینی ءِ زورانسری آوار جنی ءِ بگیری ءَ ٹویٹر کمپئین ءِ برجم دارگ بوھگ ءَ اِنت –

زانگ بہ بیت بلوچستان ءَ بیگواھیں مردمانی جیڑہ روچ پہ روچ گیش بوھان انت ءُ ھتم بوھگے نام ءَ نزانت –

بلوچستان ءَ بیگواھیں مردمانی پانکجنیں گل وائس فار بلوچ مسنگ پرسنز ءُ دگہ ملکی ءُ درملکی انسانی ھکانی گلاں بلوچستان ءَ آوار جنگ بوتگیں مردمانی زمہ وار پاکستان ءِ چیریں ادارہ ءُ پوج نامینتگ اَنت –

گوستگیں روچاں بلوچستان ءِ سر وزیر ءَ وتی شنگ کرتگیں درشان ءِ تہ ءَ گوشتگ ات کہ ما چارگائیں بیگواھیں مردم ڈنی ملکاں نہ شُتگ انت، بلے بیگواھیں مردمانی کھولاں سر وزیر ءِ اے درشان رد کُتگ ءُ گوشتگ کہ مئے گور ءَ گواہ ھست انت کہ آھانی دوستیگیں مردم ریاستی ادارھاں آوار جتگ انت –

بلوچستان ءِ تیاب دپی شھر گوادر ءَ وتی لوٹ ءِ ھک ءَ ” گوادر حق دو تھریک ” ءِ نیمگ ءَ چہ شھر ءِ مچی ایں ھند وائی چوک ءَ نندانک نُھمی روچ ءَ ھم برجاہ ءَ اِنت – مروچی بلوچستان ھکومت ءِ نیمگ ءَ چہ یک مزاکراتی کمیٹی گوادر ءِ نندانک جاہ ءَ اَتکگ ءُ گپ ءُ تران اِش کتگ –

مزکراتی کمیٹی ءِ باسک صوبائی وزیر خزانہ ظھور بلیدی، احسان شاہ ءُ لالا رشید تلو ءَ نشتگ ءُ مولوی ھدایت الرحمان بلوچ ءِ لوٹ گوشداشتگ اَنت ءُ گوشتگ کہ سرجمیں لوٹ ھک اَنت ما جُھد کن ایں گپ ءُ رپ ءَ اے جیڑہ ءَ بہ گشین ایں –

ھمے درگت ءَ مولوی ھدایت الرحمان بلوچ ءَ گْوشتگ کہ اے سی پیک دیمروئی ءَ مارا بے ازت، زاہ ءُ شُد ءَ چہ ابید دگہ ھچ نداتگ، آئی ءَ گْوشتگ کہ تیاب ءَ ٹرالرنگ ءِ تہ ءَ گیشی اَتکگ ءُ کوسٹ گارڈ زوراکی ھم گیش بوتگ اَنت –

آئی ءَ گوشتگ کہ گوستگیں روچاں کوسٹ گارڈ ءِ کارندھاں یک لاچاریں رکشہ ڈائیورے گپتگ ءُ رکشہ ءَ لڈاتگیں روگن وتی کبزہ ءَ کتگ اَنت –

آئی ءَ گْوشتگ کہ اے گریب ءِ رکشہ اگاں مہ گپت ایں گُرا پاکستان پروشتگ اَت؟ آئی ءَ دیمتر ءَ گْوشتگ کہ ایف سی ھزار درسد ءَ اُلس دُژمن اَنتءُ کوسٹ گارڈ ھم ھزار درسد ءَ اُلس دُژمن اِنت – آئی ءِ گْوشگ اِنت کہ سیمسر ءَ پاکستانی پوج ءِ آفیسر زر گرگ ءَ دلگوش اِنت –

ھکومت ءِ نیمگ ءَ اَتکگیں مردماں گوشتگ کہ لھتے جیڑہ اد ءَ گِشّ اِت کن اَنت ءُ لھتے جیڑھانی گیواری ءِ ھاترءَ مولوی ھدایت الرحمان گوں جتا نندگ ءُ گپ کنگ لوٹیت –

گُڈی ھالانی رد ءَ ھکومتی کاسد ءُ نندانک ءَ نشتگیں مردمانی میان ءَ نند ءُ نیاد بے سوب بوتگ اَنت ءُ ھمے درگت ءَ مولوی ھدایت الرحمان بلوچ ءَ گوشتگ کہ داں پھازگی لشکریانی زُلم ءُ ٹرالرنگ ءِ ھلاسی نہ بوت اے زھرشانی برجاہ بیت –

بلوچستان ءِ دمگ کیچ ءَ ناشناسیں مردماں پاکستانی پوج ءِ پانگس ءِ سرءَ اُرش کُتگ

ھندی اھوالانی ردءَ اُرش کیچ دمگ ءِ ھنکین تمپ کلاھو ءِ ھند ءَ بستگیں لشکریانی پانگس ءِ سرءَ مروچی بیگاہ ءَ شش ءُ نیم ءِ وھدءَ بیتگ۔

اھوالانی ردءَ اُرش ءِ آسر ءَ لشکریاں جانی تاوان ءِ دیمپانی کنگ کپتگ، بلے داں انگت اے درگت ءَ واکدارانی لیکہ دیما نئیتکگ۔

زانگ بہ بیت اے ھنکینانی تہءَ بلوچ آجوئی لوٹوکیں سلاہ بندیں گل مدام لشکریانی سرءَ اُرشانی زمہ واریاں من اَنت، بلے مرچیگیں اُرش انگت ھچ گل ءَ نہ من اِتگ۔

زورانسری آوارجنیانی درچ یکشل ءَ برجاہ انت – ماما قدیر بلوچ

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ سَے روچ سرجم بوتگ –

زھرشانی بنجل ءَ گل ءِ سر کماش نصراللہ بلوچ، کمک سرکماش ماما قدیر بلوچ ءُ بیگواھیں مردمانی کھولاں وتی دوستیگیں مردمانی یل کنگے لوٹ کُتگ ءُ دگہ تک ءُ پھناتاں سیادی داروکیں مردماں بنجل ءِ تر ءُ تاب کُتگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے درگت ءَ گل کمک سرکماش ماما قدیر بلوچ ءَ گوشتگ بلوچستان ءَ زورانسری آوارجنیانی درچ یکشل ءَ برجاہ انت –

آئی ءِ گوشگ ات کہ دو نودربرانی زورانسری آوار جنی ءِ بگیری ءَ بیست روچ انت کہ شاھدربر جاہ ءِ نودربر زھرشانی کنگ ءَ انت ءُ سوبہ ءِ درسیں زانشجاھاں زانشتی سرگرمی ماٹو کنگ بوتگ انت بلے سرکار ءِ گوشاں مورے نوارت –

آئی ءِ گوشگ ات کہ بلوچستان ءَ زورانسری آوار جنیاں بیمناکیں جاور ھال ءِ ودی کتگ ھر تک ءُ پھناتاں سیادی داروکیں مردماں ھمے ترس انت کہ کجام ھم وھد ءَ آ بیگواہ کنگ بہ بنت –

وائس فار بلوچ مسنگ پرسنز ءِ رھشوناں ایمنسٹی انٹر نیشنل ءِ نیمگ ءَ بیگواھیں درگت ءَ شنگ کرتگیں رپورٹ پلا مرزی کتگ گوشتگ کہ درسیں انسانی ھکانی گل اے سنگینیں جرم ءَ پاکستان ءِ سر ءَ بندش بہ جن انت کہ زورانسری آوار جنی ءِ درچ بہ بیت –

آئی ءِ گوشگ ات کہ مروچی بلوچستان ءِ تُرس ءِ ودی بوتگ مردم ماژگی نادراھی آماچ انت آئی ءِ گوشگ ات کہ اے سنگینیں جرم ءِ بگیری ءَ بلوچ راج ءَ یکجاہ بوھگ ءُ توار چست کنگی انت –

سربوتگیں ھالانی رِد ءَ بلوچستان ءِ دمگ پنجگور ءَ پوج ءِ بُرزی ءُ جھلی لشکر کشی برجاہ انت وھدیکہ پوج ءَ ھاران ءَ گِس ءِ سر ءَ بیڑ برتگ ءُ چُک ءُ زالبول بیھار داتگ انت –

گیشیں ھالانی پنجگور ءِ دمگ بالگتر ءَ سُھبگینیں پوجی لشکر کشی برجاہ انت دمگی اھوالکار ءِ رِد ءَ دمگ ءِ تہ ھر سھت ءُ دمان ءَ تیر بمبانی ھم توار پیداک انت –

اے ھم ھال آھگ انت کہ سلاہ بند ءُ پوج ءِ میان ءَ میڑ ءِ بوتگ بلے تنی وھدی ھچ وڈیں جانی تاوانانی ھال نیست اِتنت –

پنجگور ءَ چہ اھوالکار ءِ رِد ءَ ادار چار ءُ نیم ءِ نزیک ءَ پنجگور ایف سی بنجل ءَ چہ بالگرد چست بوتگ ءُ ھمے دمگ ءِ نیمگ ءَ شُتگ انت –

دومی نیمگ ءَ ھاران ءِ دمگ لجے ءَ پاکستانی پوج ءَ کشمیر دینا محمد حسنی ءِ گِس ءَ بیڑ برتگ چُک ءُ زالبول بیھار داتگ انت ءُ لٹ کٹ ھم کتگ انت –

  نوبل گیس

نبشتہ کار: بی، کے بلوچ

دی بلوچستان پوسٹ

دیگرے وھد ءَ یونیورسٹی ءِ درچکانی پُلّانی وشبو اں آئی ءِ گین پر کرتگ ءَ شپ ءِ نمب روچ ءِ اکری برمشاں کہ بلگ ءَ ات انت چی مسیت ءَ آئی ءَ وتئی راہ تاب دات دیم پہ مین گیٹ ءَ روگان ات مُرگ درچکانی سرا درنگ کنگ ات انت ، دو شررنگیں کاڈ گپ جناں روگ ءَ ات انت دیم پہ  گرزل ہاسٹل ءَ ڈیپارٹمنٹاں چی درستیں ٹیچراں چھوٹی کتگ ءَ دراتکگ ات انت وتئی قالونی ءَ روگان ات انت  “اے آر داد صاحب” انچش مدامی یے وڑ ءَ سرے جھال ات جیڑگ ءَ ات یک نوکیں کتاب ءِ دست ءَ ات ءِ چی بس  پوائنٹ گوزگ ءَ ات، دومی شفٹ ءِ نودربر بس ءِ اِنتزار ءَ نشتگ ات آں بس پوائنٹ ءَ! فارمیسی ڈیپارٹمنٹ ءِ دیم ءِ گراسی ءَ  لاتیں نودربر جنک ءُ بچک یک نودربرے سالگرہ منانیگ ءَ ات انت بسانی گیرو گار ات ،   بی، اس، او ءِ سرکل ءَ بچک ءُ جنیکے  کش مکش نشتگ ات انت ءُ یک ءُ دومی ءِ چماں چرگ ءُ رومانس کنگ ءَ ات انت  سردی ءَ چی مزہ زیرَگ ءَ ات انت ۔

سردی لھم لھم ءَ ھیر دیگ ات  ھرکس دٍرھَگ ءَ ات وتئی دست ءِ کوٹانی کیسگ ءَ کُتگ ات انت ءُ ھرکس سر گپتگ ات پہ روگ ءَ ، یونیورسٹی ءِ وھد ھلاس بوتگ ءَ!! آ جیڑگ ءَ ات وتی چپ ءُ چاگردے مردماں چارگان ات آئی درستانی دپ ءُ دیمانی سر ءَ یک بیماری  دیستگ ءَ ، اے درست نادْراهی ءِ آماچ انت تپی انت۔

پد ءَ وت دل ءَ جیڑ اِت ئِے اے کجام نادْراھی انت غلامی ءِ نادْراھی انت پدا  وت پسو ءِ دات! غلامی ءِ تَپ ءَ گپتگ انت غلامی ءِ تپ کس ءَ مگرات غلامی انچیں بیماری کہ آئی پہ ھچ درمان نیست، پرچا کہ غلام اں اے چرت ءُ گڑتی نیست ات کہ آ زندگ انت یا مرتگ انت ، پرچا کہ غلام پہ جیڈگ ناروائیں چیزے ءُ غلام ھچبر نہ جیڑ اِت آئی ءِ مجگ بانج انت  پدا غلام ایں انسان ءِ مجگ اے گپ ءَ بِھ تیار نہ انت کہ آ غلام انت ۔ اے درستیں غلام وتی ترس ءَ وتی باتن ءَ چیر دَیگ انت ۔آ اے پدّرکنگ نہ لوٹ انت کہ آ غلام انت ،آئی ءَ زپت ءُ شرکنیں بچکندے لنٹانی سر ءَ پروشت  پد ءَ گپ ءَ لگ اِت مئے چاگردے درستیں اسکول; کالج; کتاب جاہ; شاہ دربر جاہ; ءَ ڈسپنسری ءُ اِسپتال موجودگیں حالت ءَ صرف ءُ صرف غلامی ءِ سنکل زنجیر آں گیشتر مضبوط کنگ انت! ھمئے غلامی ءِ گرنیں سَنکلاں مخلوق بہ وڑ بستگ ءُ تاوانے بَھر کُتگ مئے لیڈر ءُ لیٹریناں ھچ پرک نیست اے پہ غلامی ھلاس کنگ ءَ ھچ کنگ ءَ نہ اَنت  بس ھمئے غلامی کوٹی ءِ دریگ گیش کنگ ءَ اَنت ، نیکہ مئے استاد ءُ دانشوار شرین نودربر پیداک کنگ انت انت نیکہ سائیس ئے پڑ ءَ ترا شریں سائنسدان دست نہ کپ ایت، نیکہ مدرسھاں ترا  شرین  نودربرے دستنکپیت، مولا ءُ عالم ھم انچش درد نہ وار انت ، ھرچ پڈے مردماں بچار ھمئے غلامی وروک ءَ وتی ھماچ کُتگ انت اَگاں کسے پہ غلامی ءِ ھلاپ ءَ گپ بکنت بزاں وتئی مرگ ءُ زند ءَ جنگ ءَ انت مئے دیم ءَ چشیں بازین مثال ھست کہ آھاں پہ غلامی ھلاپ ءَ گپ کُتگ چُش صباہ دشتیاری ءَ کُشگ ءُ دور دیگ بیتگ انت ھمئے واستا مخلوق گپ نہ کنت ، بلئے پہ گنوکاں کس ءَ ہچ بستارے نیست ! اے بے سرہیں چاگرد ءَ وتئی روح بابت ءَ جیڑگ ہم مخلوق ءَ تُرسیت جاگہ ءِ مُلاھانی تُرس انت جاگہ پرشتانی تُرس انت  ھُدا بیچ ءَ گار انت من ءَ باز جاگہ ءَ ھمئے سما کپ ایت کہ اے غلام ماس ءَ پیداک نہ کرتگ انت بلکیں ءَ ریہتگ انت، ھمئے وستا اے چورُک جوڑ بیتگ انت ۔ آئی دیم ءَ شررنگیں میڈم ءَ ایکسیوز می، گوشت ءُ گوست آئی ءِ ھیالنی مَنجل ءِ شکوندیم ءِ کُت  یکبرے پد ءَ جیڑگ لگ ایت مئے غلام این چاگرد چیخوف ءَ وتئی افسانہ “اپنے خول کے اندر کا آدمی” ءِ تہ ءَ وشیں دابیا دَرنگازی  کُتگ غلامی ءِ باز قسم ھست چش کہ یک ملک ءِ دومی ملک ءَ وتئی غلام کنت، یہ اسپیت پوستیں مردماں سیاہ پوستیں مردم  وتئی غلام کُتگ انت انچش کہ الجزائر ولا فرانس والا اں وتئی غلام کُتگ ات انت ! بلئے اے دگہ وڑایں غلامی ءِ کِسّہ ءِ،” غلام ” نوں مین گیٹ ءَ راستگ ات، راہ ءِ اے دیم ءُ آ دیم کُت شری ءَ چاریت ءِ پدا گوست راھے آ دست شت  ایلکس ہیلی ناول  ROOT ءِ دست ءَ اَت اش بگل ءِ بن ءَکت ءِ وتئی شال ءِ لمب ءِ شر کُتاں جیب ءَ چہ ٹوشوپیپرے، کشیتے  وتئی عینک ءِ صاف کُت سگریٹ ءِ روک ءِ کُت سگریٹءِ دوت ءِ چی پونز ءَ کشتاں زانگ بوت حاصل سگریٹی ءِ ، لُنٹ ءِ سوریت انت زانگ بوت گپ ءَ لاگیت اَنبرآں شال گیشتر سردیں یہ من پیر تِر آں گون وت ءَ لبجگ ءَ ات اگاں من پیر آں گُڑا “آمان ” ءِ ماس ءَ منی جنین ءَ بئے اے گپ نا کتگ گوں من اگاں من پیر آں آ ھم پیر بیت منی مجگ ھم کارا نہ انت گوں وت رپٹان بوت دیم پہ چائے شائے ءِ ہوٹل ءَ شُت نشت ویٹرے زانت غلام ءِ چاہ ءَ کجام اِنت بے جُست ءَ غلام ءِ دیم ءَ ڈیبل ءِ سر ءَ  سیلمانی چاہ ھیر ءِ کُت چاہ ۔ غلام وتسرا وت بچکندگ ءَ ات  انچش سَما بوت پورے چیزے بہ ھال کنگ ءِ جُھد ءَ کنگ ءَ ات کشئے مردومانی ھیال نہ ات بلکیں کسی ھیال ءَ نہ ات ھموش ات ھماہ وتئی بی آر سی ءِ نودربری ءِ ترانگ ءَ کپتگ ات  آئی ءَ ھما وتئی کلاس ءِ درستیں سنگت یاد پیداک ات آں آئی درستاں چہ گیش ھما سیاہ پوست این مزنیں لونس ءُ گھنگرو پوٹ ءُ گھنگرو ریش این سنگت یات پیداک ات آ گون وتئی رنگ ءُ دروشم ءَ یک سرجمیں نیگرو ات آئی نام کلاس ءِ سنگتاں “نوبل گیس” کُتگ ات آئی ءِ نام ھمئے وست کالاس ئے سنگت اں نوبل گیس کتگ ات پرچا کہ آئی ءَ کسی گون ءَ ری یکٹ نہ کُت متلب آئی گوں کسی کارے کار نیست ات چُش کہ آ دگہ ہاسٹل ءِ نودربر جھلی کناں نا تُرس انت ھرچ  کارے کہ ھیانی دل لوٹیت کناں مستی ، لیب ،گوزی شیتانی بلئے نوبل گیس ءَ گون کسی گوناں گپ نکُت آئی ءَ وتئی سر ءَ ھچ یکین نیست ات آ ھمئے سرپد کنگ بیتگ ءَ تو غلام ءِ تو ھچ گپ نہ زانے معاشرے ءَ آئی ءَ را گپ ءِ حق نا داتگ ات  آ روچ ءِ وھد ءَ کلاس ءَ پد بس وتئی کوٹی ءِ ایک دریگ ءُ دومی دریگ تک شُت آئی ءَ ھم دل ءَ لوٹیت کہ من ڈن برو آں بلئے ھمئے بدرنگی ءَ آئی را نگیگ کُتگ اَت ڈن ءَ ، سنگتانی ، مردمانی دیوان ءَ کم شریک بوت ھر وھد ءَ آئی را کم شرپ کنگ بوت آئی ءَ ھر وھد ءَ ھمے پھمیتگ ات کہ مخلوق ، سنتگ، استاد درست آئی دگہ وڑ چار آں پورو آ یک عام این انسان نہ اِنت آئی ءَ ھر وھد ءَ ھمے اھساس دیگ بوتگ تو غلام ءِ نکیب ءِ کم زات ئے ھمے باز این سبب ات اں کہ آئی ءِ گوں کسے گپ نہ کُت اَگاں  کسے آئی ءَ را گپ ءِ جُست ءِ بکنتیں ھم جواب نہ دنت آ ھر وھد ءَ وتی تہ ءَ بند ات ۔

بس ھمئے بدرنگی ءِ جیڑ ات آئی ءَ بچکند ات ھم نہ کُت آئی ءِ دیم سیاہ ات دنتان اسپیت درا بوت ات انت پد ءَ سنگتان آئی مزاک جوڑ کُت، آئی ءِ ڈکمیں مید ، سیاہ این پوست پہ آئی ءِ ایڈز بیماری چی کم نہ اِت اَنت آ وتی بد رنگی گوں سک پرشان اَت! اے بد رنگی ءَ آئی را نفسیاتی بیمارے جوڑ کتگ اَت آ روچ پہ روچ کسارے ءُ بربادی نیمگ ءَ روگ ءَ ات ھر روچ آئی نفسیاتی بیماری مزان بیان ات آئی پہ وت ءَ یک ھم چُشین مردم نیست ات کہ آ آئی ءَ وتئی دوست بہ گوش ایت آئی پرشانیں مزاجے سبب ءَ یا آئی ءِ بدرنگی ءِ سبب ءَ آئی ءِ کسی گون ءَ شرین تعلقات نیست ات آئی ءَ را کس ءَ وتی ھمرا نہ کُت اگاں پکنک ءَ شوتاں کس آئی ءِ کش ءَ سیٹ ءِ سر ءَ نہ نیشت گوں پورو آئی ءَ گندگیں بیماری پر ات آئی ءِ کلاس ءِ باز این نودربر اں آئی ءَ را وتی غلام جوڑ کُتگ ات آئی را وتئی کاپیانی لیکگئے فرمات اگاں آئی کار کُتاں پد ءَ سنگت آں آئی را چِرّک کُت ءُ گشت  “سنگنیں غلام الم ءَ وتی واجہ ءِ عزت ءَ بہ کن انت” آئی ءَ پہ وتئی شررنگ کنگ ءَ باز این جُہد ءِ کُت بلئے مپت آئی ءَ وڑ وڑ این کوسمیٹک کارمرز کُت بلئے ھچ پرک نہ کپت پہ آئی ءِ پٹاں ءُ آئی ءِ سیاہ این پوست ءَ اکرے آئی ءَ دمبرتگ ءَ وتئی پٹاں چش کرسٹیانو رولنڑو ءَ کسانے کُتاں نوں آئی دم برتگ ءَ گون ھُدا ءَ  جنگ کنگ آ سرپد ءَ کہ ھُدا ءَ آ غلام جوڑ کُتگ ءُ دیم داتگ غلامی ہمک بستگیں زمزیلاں آرا مارشت ئے دات کہ آ بئے اے بدرنگی ءَ چہ آجوں بوت نہ کنت داںکہ زندگ انت آئی ءِ چم چہ بے وسی ءُ زہر ءَ ارساں کیل بوت انت اناں آوت ءَ را اے پیمیں کار ءَ نئیلیت آنوں مردے ہبدہ سال عمر ءَ انت پہ گریوگ ءَ مزن انت آئی ءَ وتئی ارس پہک کرت انت نپادنی سر ءَ شت ءُ وپت وتی چم ئے مچ کرت انت  وتی ھیالنی تہ ءَ گار بوت گوں ہمک گوزوکیں روچ ءَ آ ھمئے جُھد ءَ کنگ ات کہ آ راز چہ بیت کنت یک انسان ءِ پوست سیاہ انت ءُ بدرنگ ءِ پدا یک انسان ءِ چُش بھشتی حورے ءَ شوک ءُ ڈول دار انت اسپیت انت آ ھر کسی کرا نشت آئی ءِ گپ ھمیش ات مردم سیاہ ءُ اسپیت آں پرچا؟ ھر کس ءَ وتی وڑ ءَ پسو دات کسے ءَ بائیو ءِ زبان ءَ جواب دات کسے ءَ گُشت ماس سیاہ بیت چُک سیاہ بیت کسے گُشت “دو پاد ءِ ماس ءَ چار پادے پت ءَ” بلئے اے درستیں جواب اں آ متمین نہ کُت اے اش کُتگیں گپاں گوں آئی ءَ وتارے تسلا دات نہ کُت ۔

یک روچ ءِ آ مسیت ءِ ملا ءِ کرا شُت کہ آ یک مپتی ءَ آئی ءَ ملا ءَ را ھمئے جُست کُت پد ءَ ھما سوال “انسان چی ءَ سیاہ ءُ اسپیت انت ” ؟ ملا وڑ ،وڑ این لوجیک دات مرد تسلی نہ ات ملاے لوجیک ءَ گون پد ءَ ملا ءَ یک مزنیں گپ کُت  ملا ءَ گوشت حضرت آدم ءِ دو جنین گپتگ یکے جنین ءِ جن ءِ بیتگ ءِ ایک ءِ گُلباگی حور ءِ بیتگ اسپیتیں انسان ھمئے حوریں جنین ءِ چک آں او سیاہ این انسان جن این جنین ءِ چک آں  اے گپ ءِ اشکنگ ءَ گوں آ سک پرشان بوت مایوس ءُ ابیتک بوت واتر بوت اتک وتئی ہاسٹل ءَ وھدے کمرہ ءِ آدینکے دیم ءَ ھوشتات وتئی پوچ ءِ کشتاں جاندرا بوت وتئی جسم ءِ درتسیں آزاہ اں چارگ ءَ لاگیت آئی ھیال آئی ناپگ ءَ شوت دست لاگیت آ پدا جیڈگ لاگیت برین جِنّ ءَ ھم ناپگ پر بیت اَگاں جِنّ ءَ ناپگ پر گُڑا پرچہ ءَ ؟ آدم ءَ پرچہ ھُدا ءَ ناپگ پرکُتگ اے ناپگ ءِ راز چی انت ! آئی اے سوال ھر مردم ءَ کُتگ ات بلئے کس ءَ آئی ءَ شوکیں جواب نہ دات لاتیں مردم ءَ گوشت تو گنوک ءِ پد ءَ آئی مکلوک ءِ سوال کنگ یلا دات کتابانی نیمگ ءَ شوت آئی ءَ “چارلس ڈارون” ءِ کتاب اوریجن آف سپیشیز ءِ وانگ بنداد کُت پدا بائیولوجی ءِ مزنیں کتابانی وانگ ءَ پد جنرنل کتبانی نیمگ ءَ راگب بوت انچوں ریسرچ ءُ پٹّ ءُ پول ءَ پد آ سرپد بوت کہ مُلا ءَ دروگ بستگ اے وڑین ھچ گپ نیست سیاہ پوستیں انسان جن ھانی چُک انت چشین گپ ھچ نیست یک روچے اجیب ایں وقعھاں ءَ گون بوت نوبل گیس ءِ دست دروازگ ءَ گپت ءُ ھون دیگ ءَ ات آئی وتئی ھون دیست آں آ پکا دلجم بوت کہ اسپتین انسانانی ھونے  رنگ ھم سور انت انچش مئے سیانی ھون سور انت اسپیتں انسان ھم اکسیجن زوراں پہ ساہ ءِ کشگ ءَ نیکہ ھُدا پہ اسپتاں دگہ ماہ روچ ءُ جمبر جوڑ کُتگ اے ماہ جمبر روچ کوہ جبل مرگ زند سیکس چک ءِ پیداک کنگ اے دگہ درستیں کار یک وڑ ءَ انت گڑا تپاوت پرچا۔

اگاں غلام آں ما درست غلام این اَگاں واجہ این ما درست واجہ این کس کسیگی غلام نہ انت درست یک ھساب ءَ انت ھما جاگہ کہ ما غلام این مرے نوں شرگندگ ءَ پیداک انت اے مزنیں تکریرے آئی ءَ اکری روچ ءَ کُتگ ات کلاس ءِ پیرول پارٹی ءِ روچ ءَ پارٹی ھلاسی ءَ رند آ واتر بیتگ ءَ وتی ہاسٹل ءِ کمراہ اتکگ ءَ مرچی سک ءَ  واب ءَ شوتگ ءَ  آئی ءِ درستیں بیماریانی ھلاج مرچی  بوتگ ءَ آئی ءِ تکریر ءَ درستیں نشتگینانی چم پچ کُتگ ات انت آئی ءِ تکریر اولی لمبرے اتکگ ءَ  بی آر سی پرنسپل ءَ 25 ھزار  بکشیش ءِ علان کُتگ ات آ بیگہ ءِ وھد ءَ واب چہ پاد اتکگ ءَ درستیں کتاباں چُکگ ءَ دل ءَ دارگ ءَ ات ۔

آئی ءَ مرچی وت ءَ را کمرہ ءِ تہ ءَ بند نہ کُت نیکہ وتی ڈنڈورین پٹانی چیر دیگ ءَ کلاہ ءِ سر ءَ کُت ، آ چُش دلیرین بلوچ نوجوان ءِ وڑ ءَ چہ وتی کمراہ دراتک راہ گپت دیم پہ ءَ کنٹین ءَ چاہ ءِ وارگ ءَ درست آئی ءِ تکریر ءِ تاریپ ءَ کنگ ءَ ات آں آ اے ساھت وترا یک سرجمیں مردم سرپد بئیگ ءَ ات آ ھمئے مراگ ات کہ اے ھر انسان ءِ حق انت کہ آ کم لیکگ مبیت ءُ ھیرجنگ مَہ بیت پہ آئی ءِ رنگ ءُ سیاہ این پوست ءِ سبب ءَ غلام ءِ موبائل رنگ کنگ ءَ ات بار والا اتکگ ات کوپ ءِ چستکنگ ءَ غلام او واجہ غلام تو چاہ انگت ءَ نہ وارتگ تئی موبائل ھم رنگ کنگ ءَ انت غلام گڑ ایت من ھر روچ کہ چاہ وارگ کایاں اِد ءَ یک نوکیں کسھے من ءَ زوریت پہ وت بارت پد ءَ من وتی ھیالنی دنیا گار باں ھاھاھاھا-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ کراچی ءِ شھدربرجاہ ءَ نودربرانی نیمگ ءَ زھرشانی روانک کشگ بیتگ –

زھرشانی شھدربرجاہ ءِ تہ ءَ بندات بیتگ ءُ مزنیں گیٹ ءِ دپ ءَ اتکگ ءُ روانک ءَ بھر زیروکیں مردماں بینرز ءُ پلے کارڈ ءُ بیگواھیں نودربرانی اکس دست ءَ بیتگ اَنت –

زھرشانی روانک ءَ اوگام جنان ءَ نودربراں گوشتگ کہ بلوچستان ءَ بازیں روچاں آوار جنگ بیتگیں دو نودربر سھیل بلوچ ءُ فصیح بلوچ یل کنگ بہ بنت –

آیاں گوشتگ کہ بلوچستان ءِ شھدربرجاہ ءَ دو نودربرانی گار بیگ ءُ انتزامیہ ءِ ھاموشی بژنیگ کنت کہ اے سارتی ءَ آ دگہ نودربر شال ءِ دگہ سر ءَ نشتگ ءُ زھرشانی کنگ ءَ اَنت بلے سرکار ءِ گوشاں مورے ھم نہ وارت اِنت نودربرانی زھرشانی پشتون نودربر ھم ھوار بیتگ اَنت-

زانگ بہ بیت یک نومبر ءَ بلوچستان ءِ مزن شھدربرجاہ ءَ سھیل بلوچ ءُ فصیح بلوچ بیگواہ کنگ بیتگ اَنت ءُ چریشی ءَ پد شال ءِ نودربراں زھرشانی کنان ءَ شھدربرجاہ بند کتگ اَت-

پد ءَ سرکار ءِ نمائندگانی وھد ءِ سر ءَ آیاں شھدربرجاہ چیزے روچ ءِ واستا پچ کتگ اَت ءُ دوبر گوستگیں روچ ءَ شال ءِ دراھیں وانگ جاہ بند کنگ بیتگ اَنت –

نودربرانی گوشگ اِنت اگاں نودربر یل کنگ نہ بیت اَنت گڑا چار شمبے ءَ چہ سرجمیں بلوچستان ءَ وانگ جاہ بند کن ایں ءُ ھچ وانگ جاھاں کلاس گرگ نہ بیت اِنت –

بلوچستان ءَ ھوار گوستگیں روچ ءَ لاھور ءُ ملتان ءُ دگہ جاھاں نودربرانی بیگواھی ءِ ھلاپ ءَ زھرشانی درچ یکشل ءَ برجاہ اَنت –

بلوچستان ءِ دمگ چہ ھزدار ءَ پاکستانی پوج ءِ دست ءَ آوار جنگ ءَ پد بیگواہ بیتگیں مرتضٰی زھری یل بیتگ ءُ وتی لوگ ءَ سر بیتگ –

مرتضٰی زھری اشی ءَ پیسر سال دوھزار ءُ دَہ ءُ دوھزار ءُ پانزدہ ءَ زورانسری آماچ بیتگ اَت ءُ پد ءَ ھمے سال ءَ یک رندے پد ءَ زورانسری بیگواھی ءِ آماچ کنگ بیتگ اَت ءُ دوشیگیں شپ ءَ یل کنگ بیتگ ءُ وتی لوگ ءَ سر بیتگ –

مرتضٰی زھری ءِ بیگواھی ءِ ھلاپ ءَ نودربر گل ءُ وائس فار بلوچ مسنگ پرسنز ءِ نیمگ ءَ زھرشانی کنگ بیتگ اَنت-

مرتضٰی زھری ءِ ناکوزتک ءُ بلوچ نودربر رھشون ڈاکٹر صبیحہ بلوچ ءِ برات شامیر زھری ھم ھمے سال ءَ چہ ھزدار یونیورسٹی ءَ پاکستانی پوج ءِ دست ءَ زورانسری بیگواھی ءِ آماچ بیگ ءَ پد انگت ءَ یل کنگ نہ بیتگ –

وائس فار بلوچ مسنگ پرسنز ءِ چیئرمین نصراللہ بلوچ ءَ مرتضٰی زھری ءِ یل بیگ ءِ ھال راست کرتگ ءُ شامیر زھری ءُ دگہ بیگواھیں مردمانی یل کنگ ءِ لوٹ کرتگ-