TBP Balochi

بلوچستان لبریشن فرنٹ ءَ راگے ءَ پوجی چوکی ءِ سر ءَ بیتگیں اُرش ءِ زمہ واری منّ اِتگ ءُ گوشتگ کہ واشک ءِ دمگ راگے ءَ بلوچ آباد ءَ بیست ءُ یک نومبر ءَ مگرب ءِ وھد ءَ چوکی ءِ سر ءَ سرمچاراں اسنائپر گون ءَ اُرش کرتگ ءُ یک کارندھے کشتگ –

آئی ءَ گُشتگ کہ اشی ءِ ھواری ءَ راکٹ ءُ نوکیں سلاھانی گون ءَ چوکی نشانگ کرتگ ءُ چریشی ءِ آسر ءَ چوکی ءَ جاڑیگیں کارندہ مرتگ ءُ زدگ بیتگ اَنت –

میجر گوھرام بلوچ ءَ گُشتگ کہ مھلوک ءَ گوں دزبندی کن آں آ زورگریں پوج ءَ چہ دور بہ بنت ءُ راگے ءِ دمگ ءَ دمگی مردم پوجی بنجل ءَ روگ ءُ آیگ ءَ اَنت آیاں بیھاری سرپدی ءَ دے آں کہ آ دشمن ءَ چہ دور بہ بنت اگاں ناں گڑا وتی جانی تاوانانی زمہ وار وت بہ بنت-

آئی ءَ گُشتگ کہ زورگریں پوج ءِ سر ءَ اُرش زیردستیں بلوچستان ءِ آجوئی ءَ داں برجاہ بنت-

یوئیفا چمپئین لیگ فٹبال گوازی برجاہ انت ءُ گوستگیں شپ ءَ یورپئین فٹبال ءِ شانزدہ ٹیماں گوازی کتگ شانزدہ ٹیمانی تہ ءَ ایلکس، انٹر ، مانچسٹر سٹی ، لیور پولءَ دو دو، رئیل میڈریڈ ءُ اسپورٹنگز سَے سَے، آر بی لیپزگ ءَ پنچ وھدیکہ مِلن ءَ یک گول ءَ باج برتگ گوازی وتی نام ءَ کُتگ –

گوستگیں شپ ءَ یوئیفا چمپئین لیگز ءِ اولی گوازی بیسکٹاس ءُ ایجکس ءِ میان ءَ بوتگ کہ ایجکس ءَ دو گول ءَ باج برتگ وھدیکہ بیسکٹاس ءِ نیمگ ءَ یک گول ءِ اسکور کنگ بوتگ –

دومی گوازی انٹر ءُ شاکتر ءِ میان ءَ بوتگ کہ انٹر ءِ لیبیاں جوانی ءَ گوازی کنان ءَ دو گول اسکور کتگ بازی بُرتگ انٹر ءِ نیمگ ءَ ھردو گول انٹر ءِ لیبی اِی. ڈیزیکو ءَ داتگ انت-

اسپورٹنگ ءُ دورتمونڈ ءِ میان ءِ بوتگیں گوازی ءَ اسپورٹنگ ءَ سَے پہ یکے ءَ بازی بُرتگ ءُ گوازی وتی ٹیم ءِ نام ءَ کتگ –

چارمی گوازی مانچسٹر سٹی ءُ پی ایس جی ءِ میان ءَ بوتگ پی ایس جی ءِ نیمگ ءَ یک گول ءِ اسکور کنگ بوتگ وھدیکہ ماچسٹر سٹی ءِ لیبی آر.اسٹرلنگ ءُ جی. جیسس ءَ یک یک گول ءِ اسکور کتگ باج بُرتگ –

ایٹریٹیکو میڈریڈ ءُ میلن ءِ میان ءَ بوتگیں گوازی ءَ میلن ءِ نیمگ ءَ یک گول ءِ اسکور کنگ بوتگ کہ میلن ءِ لیبی جے. میسیاس ءَ داتگ وھدیکہ میڈریڈ ءِ نیمگ ءَ ھچ گول اسکور کنگ نہ بوتگ –

یوئیفا ءِ کلبانی میان ءَ بوتگیں ششمی فٹبال گوازی لیور پول ءُ پورتو ءِ میان ءَ بوتگ کہ لیور پول ءَ دو گول ءَ بازی برتگ وھدیکہ پورتو ءِ نیمگ ءَ چہ ھچ گول اسکور کنگ نہ بوتگ – لیور پول ءِ نیمگ ءَ چہ ٹی.الکنتارہ ءُ ایم سالھ ءَ یک یک گول ءِ اسکور کُتگ پورتو ءَ چہ بازی برتگ –

کلب ءُ آر بی لیپزیگ ءِ میان ءَ بوتگیں گوازی ءَ آر بی ءِ لیبیاں جوانیں لیب پیش داشتگ ءُ کلب ءِ دیم ءَ پنچ گول اسکور کتگ- وھدیکہ دیمے ٹیم ءَ ھچ گول اسکور کت نہ کتگ آربی ءَ پنچ گولاں باج برتگ –

یوئیفا چمپیئن لیگ ءِ گوستگیں شپ ءَ بوتگیں ھشتمی گوازی شیریف ءُ رئیل میڈریڈ ءِ میان ءَ بوتگ – رئیل میڈریڈ ءَ جوانی ءَ گوازی کنان ءَ سَے پہ زیرو گول ءَ باج بُرتگ – رئیل میڈریڈ ءِ لیبی ڈی الابا ، ٹی.کروس ءُ بینزیما ءَ یک یک گولے اسکور کتگ گوازی وتی ٹیم ءِ نام ءَ کُتگ –

بلوچستان ءِ دمگ شال ءَ جتاجتائیں وئیلاں یک مردمے بیران ءُ پنچ ٹپی بوتگ اَنت-

سربوتگیں ھالانی رِد ءَ شال ءَ سریاب دگ ءَ بی بی زیارت ءِ نزیک ءَ یک ٹرکے تیز روگ ءَ بوتگ یک مردمے لگت ئِے داتگ ءُ بیران بیتگ-

بیران بوتگیں مردم ءِ پجّار غلام اسحاق ءِ نام ءَ چہ بوتگ-

پولیس ءَ آئی ءِ لاش چست کتگ ءُ نادُراھجاہ ءَ برتگ ءُ پہ گیشیں چار ءُ ٹپاس ءَ کنگ ءَ پد کھول دست ءَ داتگ-

ھمے وڑ شال ءِ دمگ پشتون آباد محمد خیر دگ ءَ یک گسے ءَ گیس سلنڈرے ترک اِتگ ءُ گیس ترکگ ءِ آسر ءَ نیامت اللہ ء بشیر احمد ، قدراللہ ، نازیہ ءُ دگہ یک زالبولے سُتکگ ءُ ٹپی بوتگ اَنت –

ٹپی بوتگیں مردم پہ الاج ءِ ھاتر ءَ نادُراھجاہ ءَ برگ بوتگ اَنت-

بلوچ سرڈگار ءِ سر ءَ انسانی ھکانی جیڑہ بحران ءِ نیمگ ءَ شُتگ – ماما قدیر بلوچ

انسانی ھکانی میاں استمانی روچ، دہ دسمبر ءَ وائس فار بلوچ مسنگ پرسنز ءِ نیمگ ءَ کراچی ءَ مراگش ءِ برجم دارگ بیت اِنت –

وائس فار بلوچ مسنگ پرسنز ءِ رھشون ماما قدیر بلوچ ءَ وتی شنگ کرتگیں درشان ءِ تہ ءَ گوشتگ کہ بلوچ سرڈگار ءِ سر ءَ انسانی ھکانی جیڑہ بحرانیءِ نیمگ ءَ شُتگ کہ بلوچ پرزند آوار جنگ بیگواہ کنگ بوھگ ءَ انت، ابید کانود آھاں زندانی کنگ، زانگولیں جونانی دست کپگ، یکجاھیں کبرانی درآھگ ءُ سی ٹی ڈی ءِ گیر کانودی بید رھبندی بیڑ برگ کہ چریشی ءَ چادر ءُ چاردیوالی لگتمالی بوھگ انت اےھمنچو ایر جنگ بہ بنت کہ کم انت –

آئی ءِ گوشگ ات کہ ھمے ھاتر ءَ زلم ءُ زوراکیانی سر ءَ جوڑ بوتگیں ھاکمانی پالیسیانی بگیری ءَ وائس فار بلوچ مسنگ پرسنز انسانی ھکانی میاں استمانی روچ ءِ درگت ءَ کراچی ءَ ھمے سال ءِ دہ دسمبر ءَ مراگش ءِ اڈ دَنت –

آئی ءِ گوشگ ات کہ نیشنل ڈیموکریٹک پاٹی ءُ بلوچ یکجھتی کمیٹی کراچی ءِ یکجاھی ءَ چہ وائس فار بلوچ مسنگ پرسنز ءِ مراگش گُڈی دروشم ءِ دئیگ بیت اِنت –

بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی ءَ مروچی چار ھزار ءُ چار سد ءُ نود دو روچ سرجم بوتگ – مروچی ھاران ءَ چہ رضا محمد بلوچ، نور احمد بلوچ ءُ دگہ مردماں بنجل ءِ تر ءُ تاب کتگ بیگواھیں مردمانی کھولاں گوں دلپدردی درشانتگ –

سبی ءَ سلاہ بندین مردماں بند ءُ ساچی کمپنی ءِ سر ءَ اُرش کرتگ، اُرش ءَ کمپنی ءَ تاوان بوگ ءِ گمان کنگ بیتگ اَت،اُرش ءِ زمہ واری بلوچ سلاہ بندیں گل بی ار جی ءَ منّ اِتگ-

بلوچ ریپبلکن گارڈز ءَ رسانکدراں وتی شنگ کرتگیں درشان ءِ تہ ءَ اُرش ءِ زمہ واری منّ اِتگ ءُ گوشتگ کہ مروچی مئے سرمچاراں سبی ءِ دمگ کو- باروزئی ءَ پاکستانی پوج ءِ بند ءُ ساچی شرکت ءِ سر ءَ کار کنوکیں کارندہ دیرواک بمب تراکے ءِ نشانگ کرتگ اَنت –

آئی ءَ گُشتگ کہ بمب تراک ءِ آسر ءَ یک کارندھے مرتگ ءُ دو زدگ بیتگ اَنت –

جارکش ءَ گُشتگ کہ پاکستانی پوج ءِ چیردستی ءَ کار کنوکیں کمپنی ءُ پوج مئے نشانگ ءِ تہ ءَ اَنت ءُ اشانی سر ءَ گیش ترند اُرش ءِ ھواری ءَ بلوچستان ءِ آجوئی ءَ داں برجاہ مان اَنت –

بلوچستان ءِ تیاندپی شھر گوادر ءَ ھک دو زرمبشت ءِ زھرشانی دَھمی روچ ءَ برجاہ بیتگ، زھرشانی نندانک ءَ جتا جتائیں ھنداں مردم آیگ ءُ بھر زیرگ ءَ اَنت –

زھرشانی نندانک ءِ سروکی ھک دو زرمبشت ءِ سروک مولانا ھدایت الرھمان ءَ مروچی ءَ چہ دَہ روچ ساری بندات کرتگ اَت کہ آئی ءِ نندانک ءَ گوادر ءِ نامی ئیں چوک وائی چوک ءَ برجاہ اِنت زھرشانی نندانک ءَ ھواریں مردمانی گوشگ اِنت اے چوک ءِ نام مٹ کنگ ءُ دھرنا چوک ءِ نام پِر کنگ بہ بیت-

زھرشانی ءَ مروچی انجمن تاجران کیچ ءُ گوادر ءَ وتی جارانکانی تہ ءَ گوشتگ کہ نندانک ءِ پلامرزی ءَ باندا بزاں پشمبے ءُ آدینگ ءَ دو روچ ءَ سرجمیں دکان سرجمی ءَ بند کنگ بنت-

ھمے وڑ ءَ چاگردی رسانکجاھاں دیستگیں اکساں بلوچستان شھدربرجاہ ءَ بیگواہ بیتگیں دو نودربر سھیل بلوچ ءُ فصیح بلوچ ءِ یل کنگ ءِ واستا پوسٹر ھم چِست کنگ بیتگ اَنت-

زانگ بہ بیت گوستگیں روچ ءَ اُستان ءِ سرکار ءِ بنجاھی کمیٹی ءِ باسک وزیر ھزانہ ظھور بلیدی، احسان شاہ ءُ لالا رشید گپ ءُ تران ءِ ھاتر ءَ اتکگ اِت اَنت –

بلے سرکاری کمیٹی ءِ گپ ءُ تران بے سوب بیتگ اَت ءُ دھرنا ءِ برجم کنگ ءَ نندانک ءَ نشتگیں مردماں وتی ھیال ءُ لیکہ درشان کتگ اِت اَنت –

بلوچ اسٹوڈنٹس آرگنائزیشن ءِ بنجاھی کمیٹی ءِ دیوان چیئرمین ظریف رند ءِ پاگواجھی ءَ بیتگ۔ گل ءِ کار ءُ کونسل سیشن ءِ سر ءَ ھاسیں پیم ءَ گپ ءُ تران کنگ بیتگ ءُ کونسلرانی گچین کاریاں ھوار سیشن ءِ کاراں گُڈی دروشم دیگ بیتگ۔

دیوان ءَ بلوچستان ءِ انیگیں جاورھال، گل ءِ جیڑہ، بیست ءُ دومی راجی کونسل سیشن ءُ آیوکیں وھدے ھاتر ءَ گامگیج ءِ بنگپ ءِ سر ءَ پُریں گپ ءُ تران کنگ بیتگ ءُ ھاسیں پیسلہ کنگ بیتگ اَنت۔

بلوچستان ءِ تہ ءَ نوکیں سیاسی چِست ءُ ایر ءِ سر ءَ اُرت چاری کنگ بیتگ ءُ گوادر ءِ لس تھریک ءَ آشوبی بدلی ءِ بندات گُشگ بیتگ۔ اے وھد ءَ گوشگ بیتگ کہ بلوچ نودربرانی بیگواھی ءِ بگیری ءَ نودربرانی زھرشانی ءُ نندانک چہ دھکاں برجاھیں زلم ءُ زوراکیانی ھلاپ ءَ ورنایانی نا دوستی ءُ گھگیری ءِ درشان اِنت۔ چہ اِشی ءَ پیسر ھاسیں پیم ءَ گوستگیں دو سالاں چہ بلوچستان ءَ چِست بیوکیں آشوبی توار لس مھلوک ءِ جزبگانی درشانی اِنت بلے بد بھتی ءَ چہ درستیں جُنزاں راہ نہ رسگ ءِ سوب ءَ آ پد ءَ اوشت آماچ بیتگ اَنت کہ اِشی ءَ سوب رھشونانی نہ بیگ اِنت۔ پمیشکا بی ایس او ءِ بنجاھی رھشونانی کرد اے بھرانیں جاورانی تہ ءَ اژدری اِنت۔

دیمتر ءَ گُشگ بیتگ کہ بی ایس او ءِ یک کیڈر ودی کنوکیں گل ءِ بستار ءَ چہ راج ءَ چُشیں جاوراں کشگ ءِ ھاتر ءَ راجی رھشونانی دیم ءَ آرگ ءِ کار تیز ءَ چہ تیز تَر کنگ لوٹ ایت۔ ھمے درگت ءَ بی ایس او ءِ بیست ءُ دومی کونسل سیشن سک باز مھم اِنت۔ ءُ اے کونسل سیشن ءَ بی ایس او ءِ پھازگ ءَ اڈ دیگ ءَ گوں بی ایس او ءِ بُنکی لیکہ ءُ ڈسپلن ءَ زندگ کنگ مئے مول اِنت۔ گوں اِشی ءَ ھوار بی ایس او ءِ جھدکار شھید ھانی بلوچ ءِ یاتگیری ءَ کونسل سیشن ءِ برجاہ دارگ کنونشن ءِ ارزشت ءَ ودین اِیت پرچہ کہ جھدکارانی زند ءِ گرانی ءُ ھاسیں پیم ءَ جنینانی دردناکیں زند چاگردی زوراکیانی درشانی اِنت۔ اے زوراکی ءَ پروش دیگ ءِ ھاتر ءَ کہ المی شئے اِنت آ راجی گل ءِ دروشم ءَ ھست بیگ اِنت آئی اڈ دیگ ءُ دارگ وھد ءِ المی لوٹ اِنت۔

کونسل سیشن ءِ کارانی سر ءَ چمشانک دیان ءَ دلجمی ءِ درشان کنان ءَ بنجاھی رھشوناں گُشتگ کہ مھمانجل ھنکین ءُ بنجاھی سنگتانی مھنت ستا کرز اَنت ءُ گیشتر زمہ واری بھر کنگ بیتگ اَنت۔

بنجاھی کمیٹی ءَ گل ءَ دوازدہ ھنکینانی نیمگ ءَ شور کُتگیں کونسلرانی گچین کُتگ ءُ آیاں دلجمیں دروشم ءِ داتگ اِش کہ اِشی رد ءَ شال ھنکین ءِ پانزدہ کونسلر، تُربت ھنکین ءِ دہ، مستونگ ءِ پنچ، کوھلو ءُ کوہ سلیمان ءِ سَے، نصیرآباد ءِ ھپت، خضدار ءِ ھپت، اوتھل ءِ پنچ، چہ ھب ءَ یک، نوشکی ءَ دو، خاران سَے، پنجگور دو، ءُ ڈائسیپورا ءِ چار کونسلر کونسل سیشن ءَ بھر زیر اَنت۔ اے رد ءَ بنجاہ ءَ ھوار ھپتاد ءُ ھپت بنجاھی کونسلر کنونشن ءَ بھر زور اَنت۔ وھدیکہ کونسلراں ابید گل ءِ سنئیر کیڈرز کواسانی دروشم ءَ سیشن ءَ بھر زور اَنت۔

بنجاھی کمیٹی ءِ پیسلہ ءِ رد ءَ 28 نومبر ءَ نوک گچین بیتگیں اگدہ دارانی سوگند زیرگی دیوان روچ ءَ دو بج ءَ شال پریس کلب ءَ برجاہ دارگ بیت وھدیکہ شپ ءَ نھ بج ءَ آشوبی دیوان ءِ برجاہ دارگ بیت اِنت۔

بلوچستان ءِ دمگ سبی ءَ پوج ءِ سر ءَ بیتگیں بمب تراکے ءَ یک کارندھے بیران بیتگ، دو زدگ بیتگ اَنت –

گیشیں ھالانی رد ءَ سبی ءِ دمگ بابر کچ ءِ ھند ءَ جھالڑی ءَ پاکستانی پیراملٹری فورس ایف سی ءِ کارمند تر ءُ تاب ءَ بیتگ اَنت کہ کل کرتگیں شوروانی زد ءَ اتکگ ءُ یک کارندھے مرتگ ءُ دو زدگ بیتگ اَنت –

ھال ءِ سر بیگ ءَ سیکورٹی فورسز وئیل جاہ ءَ سر بیتگ ءُ پَٹ ءُ پول اش بندات کرتگ ئے-بیران ءُ زدگ بیتگیں کارندہ سی ایم ایچ سبی ءَ برگ بیتگ اَنت –

اے دمگ ءَ بلوچ آجوئی دوستیں گل جاڑیگ اَنت بلے اے اُرش ءِ زمہ واری تنی وھدی کس ءَ پہ وت ءَ نہ زرتگ –

بلوچستان لبریشن فرنٹ ءِ جارکش میجر گوھرام بلوچ ءَ کیچ ءِ دمگ ءَ پاکستانی پوج ءِ سر ءَ بیتگیں اُرش ءِ زمہ واری منّ اِتگ ءُ گوشتگ کہ سَے شمبے ءَ بیگاہ ءِ ساھت پنچ ءُ چِل منٹ ءَ سرمچاراں تمپ کلاھو ءَ پوجی چوکی ءِ سر ءَ اُرش کتگ – ترندیں اُرش ءِ آسر ءَ چوکی ءَ جاڑیگیں پنچ کارندہ مرتگ اَنت – ترندیں اُرش ءِ آسر ءَ بَھ ءُ بکڑ بیوکیں دگہ سَے پوجی نزیکیں کور ءَ تتکگ اَنت چریشی ءَ پد سرمچار چوکی ءِ تہ ءَ پُتریتگ ءُ دراھیں سلاہ دستیگ کرتگ ءُ چوکی سوتکگ –

آئی ءَ گُشتگ کہ ھمے وھد ءَ نزیکیں چوکی ءَ آیانی کُمک ءَ آیوکیں بکتر بند گاڑیانی ھمراھی ءَ اتکگ اَنت چریشی ءَ سرمچاراں ترندیں اُرش کرتگ ءُ پشتکنزینگ ءَ لاچار کرتگ ءُ وت مُھریں جاھاں شتگ اَنت-

میجر گوھرام بلوچ ءَ گُشتگ کہ اے اُرش بلوچستان ءِ آجوئی ءَ داں برجاہ بنت –

بلوچستان ءِ بنجاھی شھر شال ءَ ھستیں بلوچستان شھدربرجاہ ءَ زورانسری آوار جن بیتگیں دو نودربرانی بیگواھی ءِ ھلاپ ءَ زھرشانی درچ یکشل ءَ برجاہ اَنت-

بلوچستان شھدربرجاہ ءُ شال ءَ وانگی ادارھانی بندش ءَ پد زھرشانی ءِ درچ مروچی تربت، موسیٰ خیل، نوشکی، زھری، ھزدار، لورالائی، دالبندین، اوستہ مھمد، قلعہ سیف اللہ ءُ اوتھل ءَ ھوار دگہ جاھاں کالج ءُ اسکول بند کنگ بیتگ اَنت –

نودربر گلانی ھمسنتیں درشان ءِ تہ ءَ گوشگ بیتگ بلوچستان شھدربرجاہ گوستگیں دو ھپتگاں چہ نودربر وتی ھمراھیں نودربرانی بیگواھی ءِ ھلاپ ءَ زھرشانی نندانک ءَ نشتگ اَنت بلے داں انگت ءَ بیگواھیں نودربر دیم ءَ آرگ نہ بیتگ اَنت-

آیاں گشتگ کہ بیگواھیں نودربرانی بیگواھی ءِ ھلاپ ءَ نودربر گلانی نیمگ ءَ بیست ءُ چار نومبر ءَ بنجاھی شھر ءَ ھوار سرجمیں بلوچستان ءَ جامعہ، کالجز، پروپیشنل ءُ نن پروپیشنل وانگی ادارہ ماٹو کنگ بیتگ اَنت-

جار ءَ گوشگ بیتگ کہ ھرکجا کہ انتزامیہ ءِ نیمگ ءَ اگاں بائیکاٹ ءِ بے سوب کنگ ءِ جھد بیت گڑا کجام ھم ناوشی ءِ زمہ واری ادارھانی ءُ انتزامیہ ءُ سروکانی سر ءَ بنت-

زانگ بہ بیت دو نودربر سھیل بلوچ ءُ فصیح بلوچ یک نومبر ءَ بلوچستان شھدربرجاہ ءَ بیگواہ کنگ بیتگ اَنت ءُ چریشی ءَ پد نودربرگلانی نیمگ ءَ زھرشانیانی جار پِرینگ بیتگ اَنت ءُ یونیورسٹی ءِ دراھیں پرکاری بند کنگ بیتگ اَنت –