TBP Balochi

بلوچستان ءَ زورانسری آوار جنی ءِ درچ یکشل ءَ برجاہ اَنت پاکستانی پوج ءَ یک ورنایے دزگیر کنگ ءَ پد ناشناسیں جاھے ءَ برتگ، وھدیکہ زورانسری آوار جنی ءِ آماچیں سَے یل کنگ بیتگ اَنت –

بیگواھیں مردم ءِ پجار بابر قمبرانی ءِ نام ءَ زانگ بیتگ کہ دکانداری ءِ کار ءُ بار ءَ کنگ ءَ اِنت – اے گرگ بیتگیں مردم بلوچستان ءِ بنجاھی شھر شال سریاب دگ ءَ گرگ ءُ گار کنگ بیتگ –

زانگ بہ بیت بلوچستان ءَ زورانسری آوار جنی ءِ وئیل ءِ نام اوشتگ ءِ نام ءَ نہ زورگ اِنت آیاں زورانسری آوار جنی ءِ ھلاپ ءَ وی بی ایم پی ءَ گوستگیں ءک دھکے ءَ زھرشانی کنگ ءُ پیداک اِنت –

دومی نیمگ ءَ اے وھد ءَ جامعہ بلوچستان ءِ نودربر یک نومبر ءَ بلوچستان یونیورسٹی ءِ ھاسٹل ءَ بیگواہ بیتگیں دو نودربر فصیح بلوچ ءُ سھیل بلوچ ءِ زورانسری آوار جنی ءِ ھلاپ ءَ زھرشانی ءُ بلوچستان ءَ وانگی پھنات ماٹو کنگ بیتگ اَنت –

ھمے وڑ ءَ پوج ءِ دست ءَ آوار جنگ بیتگیں وھاب بگٹی، زبیر زھری ء سراج اھمد ءُ عدنان مینگل ء ھدا بکش یل کنگ بیتگ اَنت –

وھاب بگٹی بلوچ ریپبلکن پاٹی ءِ رھشون مرید بگٹی ءِ زھگ اِنت – وھاب بگٹی پاکستانی پوج ءِ کارندھاں نصیر آباد ءَ آئی ءِ لوگ ءَ چہ آوار جتگ ءُ برتگ اَت-

زبیر زھری ءُ عدنان مینگل چہ کراچی ءَ ھواریں دمگ بلوچستان ءِ باپاری شھر ھب ءَ پاکستانی چیریں ادارھاں ھمے ماہ ءَ دزگیر کرتگ ءُ برتگ اِت اَنت ھردوکیں نودربر ھب ءَ ڈاکخانہ دگ ءَ یک دکانے ءَ نندوک بیتگ اَنت ھردوک چیریں ادارھاں آوار جتگ اَنت ءُ گوستگیں شپ ءَ یل کنگ بیتگ اَنت –

نبشتانک: بی ایس او آزاد

نبشتہ کار: درپشان بلوچ

دی بلوچستان پوسٹ

بی ایس او ءِ دپتر کوھن اِنت بلوچاں بلکیں وتی زند ءَ پیسر بی ایس او ودی کتگ اے وڑ ءَ بی ایس او ءَ یک دراجیں پندے جتگ، آئی ءِ تہ ءَ بی ایس او ءَ ھرچ وڑیں سکی ءُ سوری وتی اندر ءَ گوازینتگ اَنت –

منی مات نورنسا ھمے گپ ءَ وھد وھد ءِ سر ءَ من ءَ درنزین ایت اگاں بی ایس او مہ بوتیں بلکیں من ترا پیداگ کت نہ کتگ اَت منی مات گوش ایت من سیاست نہ کتگ بلے ھما روچی بی ایس او اتکگ گڑا منی دل ءَ گُشتگ وتی جوانی ءِ سیاست ءَ بی ایس او ءَ بہ کن آں –

منی مات نور نسا گوش ایت من بی ایس او ءَ سیاست بندات کتگ گڑا دل ءَ گُشتگ آروس نہ کن آں بلے پد ءَ دل ءَ زاناں شَک بیتگ من بی ایس او ءَ پارگ باں گڑا چون من ءَ بی ایس او ءِ وشبھوئیں پُلانی گوات لگ ایت –

منی مات نورنسا گوش ایت ھمے ھاتر ءَ من چہ بی ایس او ءَ یک ورنایے گچین کتگ ءُ وتی سانگ ءُ بلوچی دودانی رد ءَ گڑا آروس کرتگ منی اولی واھگ ھمے بوتگ کہ من جنکیں زھگے پیداگ کن آں داں بی ایس او ءَ وت ءَ بندوک بہ کنت ءُ بی ایس او ءِ وشبوھیں پُلاں من ءَ بہ دنت –

منی مات نور نسا گوش ایت بلے واجہ ھدا ءَ منی اے پریات ءُ زاری ھچ گوش نداشت ءُ چریشی ءَ تو پیداگ بیت ئے دل ءَ ھنچیں جیڑگ پیداگ کتگ بچکے مہ بوتیں شرتر بچک وتی پت ءِ ھبر ءَ گپت ءُ دگہ جاھے ءَ روت ءُ بی ایس او ءِ وشبوھیں گوات من ءَ نہ لگ ایت –

وقتے تو رُست ءُ مزن بوت ئے منی اولی بر ءَ تی دستانی تہ ءَ وشبوھیں پُلے تو پمن آورتگ اَت وشبوھی ءَ من ءَ گنوگ کتگ اَت گوش ئیگ ءَ زمستانی شپانی باپیں شپے اَت من ءَ امباز کنگ ءَ اَت –

تئی پت چوناھیگا بی ایس او ءَ گوں بندوک بیتگ اَت زاناں مردماں وش نیتک بی ایس او درگان درگان اش کُت تئی پت ءَ ھم وتی ھنکین ءَ سر ایر کت ءُ بی ایس او ءِ وشبوھیں زر ءَ ایر بُک ایت –

منی عمر ھم شتگ ءُ تھار اِنت بلے دل انگت گوش ایت بی ایس او ءِ وشبواں وتی امبازاں بہ زور تو زان ئے پرچا؟ اناں –

بہ گوش آں بی ایس او ءَ چنکس ورنا وتی راہ ءَ تاجگیں ٹپانی درمان ءَ ھازگ کتگ اَنت؟ چنکس سراں اے بی ایس او ءِ رژنائیں چراگ ءَ وتی راہ ءِ منزل ءَ برگ ءَ وتی ساچستی راہ گچین کتگ اَنت –

ھما سر بی ایس او ءَ دیم ءَ برگ ءَ بیتگ اَنت ھما سر بی ایس او ءِ مظبوطی ءَ جنزگ ءَ بیتگ اَنت ھما سرانی گڈگ ءُ پروشگ ءَ بی ایس او ءِ سر ءَ بندش، بی ایس او ءِ سیاست ءَ گٹگیر کنگ، بی ایس او ءِ پتر ءَ پروشگ ءُ درگان درگان کنگ، بی ایس او ءِ شر شریں لیڈرانی گرگ ءُ گار کنگ –

مروچی ھزاراں بی ایس او ءِ لیڈراں وتی ءُ جان ھمے بی ایس او ءُ بلوچانی ھک گیری ءُ نودربرانی زانگ ءِ ھاتر ءَ قربان کتگ اَنت، بی ایس او ءِ ھزاراں باسک ءُ لیڈر شھید کنگ ءُ زنداناں بندیگ کنگ بیتگ اَنت ھزاراں مردم ھمے راہ ءِ دور کنگ ءَ ترسینگ ءُ میتگاں در پہ در کنگ بیتگ اَنت ھزاراں زھگ چہ بی ایس او ءَ گستا کنگ بیتگ اَنت –

اما تو کجام بی ایس او ءِ گپ ءَ ئے من بی ایس او آزاد ءِ گپ ءَ آں من ھما بی ایس او ءِ گپاں آئی ءِ تہ ءَ ھمک مردم ءَ سیاست دربرتگ ھما زھگ کہ آئی ءَ بی ایس او ءِ چموکیں بیرک دست ءَ بیتگ –

بلے یک گپے گوش آں انگت ءَ نا بی ایس او ءَ دمبرتگ نا بی ایس او ءِ لیڈراں، داں انگت ءَ بی ایس او ءِ لیڈر جنگ ءَ آں داں انگت ءَ بی ایس او ءِ لیڈر زمزیلانی تہ ءَ بندیگ اَنت ءُ زوراک ءِ دیم ءَ مھکم اَنت –

مروچی بی ایس او ءِ پنجاہ ءُ چارومی سالروچ اِنت ھمے ھاتر ءَ منی عمر ءَ چِل ءُ چار سال سرجم کتگ بلے یک روچے ءَ ھم نہ دیستگ کہ بی ایس او ءَ دمبرتگ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سر بیتگیں ھالانی رد ءَ روکپتی بلوچستان ءِ بنجاھی شھر دزاپ “زاھدان ” ءَ تھیلسیمیا ءِ نادراھاں زاھدان میڈیکل سائنسز یونیورسٹی ءِ دیم ءَ درمان نہ بوگ ءُ بے سوبیں درمانانی بگیری ءَ زھرشانی کرتگ –

زھرشانی کنوکاں گوشتگ کہ تھیلسیمیا ءِ نادراھی ءَ آماچیں زھگاں نا درمان ھست ءُ اگاں اد ءَ درمانے ھست آ بے سوبیں رنگے ءَ آیاں رسگ ءَ اِنت –

آیانی گوشگ اِنت کہ سرکار ءَ اشی ءِ چن ءُ لانچ نہ کرتگ ءُ چریشی ءَ نادراھاں بازیں اڑ ءُ جنجالانی دیمپانی اِنت –

تھیلسیمیا ءِ نادراھانی گوشگ اِنت کہ اد ءَ ھما درمان دیگ بیگ ءَ اَنت آ یکدم ناکارہ اَنت ءُ آ ھچ درد ءِ داوا بیگ ءَ نہ اَنت ڈیھی دروشم ءَ جوڑ بیتگیں درمان مردمانی زند ءُ جان ءَ پجگ ءَ نہ اَنت-

آیانی گوشگ اِنت کہ اے درمان اد ءَ پہ تھیلسیمیا ءِ واستا آیگ ءَ اَنت باید اشانی سر ءَ بندش جنگ بہ بیت پرچا کہ اے درمان تھیلسیمیا ءِ کار ءَ ھچ آیگ ءَ نہ اَنت ءُ باید سرکار ڈنی درمان نادراھاں دات بہ کنت دانکہ آیانی واستا گھتری اتک بہ کنت-

زھرشانی میڈیکل سائنس ءِ واکداراں زھرشانی کنوکاں گپ کرتگ ءُ ایانی جیڑہ ءِ گشینگ ءِ واستا سدکی داتگ –

ایرانی سرکاری کچ ءَ کساساں سیستان ء بلوچستان ءَ تھیلسیمیا ءِ نادراہ ڈیھ ءِ آ دگہ جاھاں باز گیشتر اَنت کہ اد ءَ ھمک سال گیشتر نادرھانی کیس رپورٹ بیگ ءَ اَنت –

بلوچستان ءِ دمگ گوادر ءُ پنجگور ءَ دو وئیلاں دو مردم بیران ءُ دو مردم ٹپی بوتگ اَنت-

سربوتگیں ھالانی رِد ءَ پنجگور ءِ دمگ گوارگو ءَ فتح علی بازار ءَ دو گاڑیاں وت ماں وت ءَ ڈِک وارتگ ءُ ڈک ورگ ءِ آسر ءَ یک مردمے بیران ءُ دو ٹپی بوتگ اَنت-

بیران بوتگیں مردم ءِ پجّار جاپر ء حبیب ءُ آئی ءِ چُک انور جاپر گوں مھردل ء خیر محمد ٹپی بوتگ اَنت –

ٹپی ءُ بیران بوتگیں مردم ءِ لاش نادُراھجاہ ءَ سر کتگ اَنت-

دمگی مردمانی رِد ءَ اے دوئیں گاڑی تیل کش بوتگ اَنت کہ وت ماں وت ءَ ڈِک وارتگ ئے-

ھمے وڑ ءَ بلوچستان ءِ تیاب دپی شھر گوادر ءِ ھند سربندر ءَ یک ورنایے ءَ وتکشی کتگ –

وتکشی کنوکیں ورنا ءِ پجّار سیف اللہ نام ءَ چہ بوتگ-

دمگی مردمانی رِد ءَ سیف اللہ وتکشی سوب بے روزگاری ءُ تنگدستی بوتگ آئی ءَ وتی زندگی بے زار بوتگ ءُ وتکشی کتگ ئِے-

زانگ بہ بیت بلوچستان ءِ اے اولی رند نہ اِنت کہ وتکشی کتگ ئِے اشی ءَ چہ ساری ھم چُشیں وئیل دیم ءَ اَتکگ اَنت –

بلوچستان ءَ زورانسری آوار جنیانی درچ یکشل ءَ برجاہ انت دو ماھانی میان ءَ بازیں مردمے پاکستانی پوج ءَ زورانسری آوار جتگ ءُ بیگواہ کتگ اَنت –

نوکتریں ھالانی رِد ءَ پاکستانی پوج ءَ یک دگہ ورنایے زورانسری آوار جتگ ءُ بیگواہ کتگ –

اے ورناہ پاکستانی پوج ءَ بلوچستان ءِ باپاری شھر چہ ھب چوکی ءَ آوار جتگ ءُ بیگواہ کتگ – ورنایے پجار عامر ء محمد اکبر جھمنند آواران تیرتیج ءِ نام ءَ چہ بوتگ –

ہیومن رائٹس کونسل آف بلوچستان عبداللہ عباس ءَ اوار جنی ھال راست کتگ گوشتگ اے ورناہ بیست ءُ سَے نومبر ءَ ھب چوکی ءَ چہ پی سی او گیس اسٹیشن ءَ چہ آوار جنگ بوتگ –

عبداللہ عباس ءِ رِد ءَ ورناہ تیرتیج آواران ءِ جھمنند انت کہ پوجی لشکر کشی ءَ چہ بیزار بوتگ ءُ چہ اود ءَ در اتکگ ءُ اے وھدی کھول ءِ ھمراھی ءَ ھب چوکی ءَ نندوک بوتگ –

دی بلوچستان پوٹ اھوال پتر ءَ سر بیتگیں ھالانی رد ءَ زورانسری بیگواھی ءِ آماچیں نودربر شفیع اللہ سَے ماہ ءِ بیگواھی ءَ پد یل بیتگ ءُ وتی لوگ ءَ سربیتگ، وھدیکہ چہ گچگ ءَ دزگیری ءَ پد بیگواہ بیتگیں گزین ءُ صنم بلوچ ءُ کماشیں درے خان ھم یل کنگ بیتگ اَنت۔

شفیع اللہ ھمے سال ءَ اگست ءِ ماہ ءَ کانک ءِ نزیک ءَ چہ آئی سنگتانی ھمراہ پاکستانی پوج ءِ دست دزگیری ءَ پد ناشناسیں ھند ءَ برگ بوتگ اَت۔

شفیع اللہ ءِ یل بیگ ءِ ھال ءِ سدکی بیگواھیں بلوچانی یل کنائینگ ءِ ھاتر ءَ جھد کنوکیں گل وائس فار بلوچ مسنگ پرسنز ءَ کُتگ ءُ لوٹ کُتگ کہ ڈیھی لشکریانی دست ءَ بندیگ ءِ دگہ مردم ھم دیم ءَ آرگ بہ بنت۔

وھدیکہ یک ماہ ساری چہ گچگ ءَ زورانسری بیگواھی ءِ آماچ بیتگیں دو کسانسالیں برات ءُ گوھار صنم ء جمیل ءُ گزین ء جمیل ءُ درے خان مروچی یل کنگ بیتگ اَنت۔

زانگ بہ بیت کہ دوئیں زھگ ءُ کماشیں مرد گوستگیں ماہ ءَ بزاں اکتوبر ءَ دزگیر کنگ ءَ پد لشکریاں وتی ھمراھی ءَ بُرتگ اِت اَنت کہ چہ اِشی ءَ پد آیانی درگت ءَ ھچ اھوال نہ رس اتگ اَت وھدیکہ دومی نیمگ ءَ لشکریاں ھندی مردم لوٹارینتگ ءُ چہ ھند ءَ لڈگ ءِ پرمان داتگ اَت-

چہ گچگ ءَ بیگواھیں کسانسالیں صنم ء جمیل ءُ گزین ء جمیل ءُ درے خان ءِ زورانسری بیگواھی ءِ درگت ءَ وتی شنگ کُتگیں درشان ءِ تہ ءَ بلوچ نیشنل موومنٹ ءِ جارکش ءِ گُوشتگ اَت کہ سرجمیں بلوچستان ءِ پیم ءَ گچگ ءَ چہ دزگیر کنگ ءَ پد بیگواہ بیتگیں زھگانی کھول ءُ سرجمیں میتگ گوستگیں یک مزنیں مدتی ءَ چہ پاکستانی پوج ءِ زوراکیانی آماچ اَنت۔ اے زھگانی پیروک میر درے خان ء کریم مھمد کریم پاکستانی پوج ءَ سَے ماہ پیسر دزگیر کنگ ءَ پد بیگواہ کُتگ ھمے کھول ءِ زھگ ءُ جنین آدم پیسر ھم پوج ءَ بازیں ھپتگاں داں وتی بندی جاھاں لٹ ءُ کُت کُتگ اَنت۔

بلوچستان ءِ بنجاھی شھر شال ءَ پریس کلب ءِ دیم ءَ چہ نوشکی ءَ زورانسری آوار جنگ بوتگیں نصیب اللہ بادینی ءُ مچ ءِ جھمنند ودود ساتکزئی ءِ کھولاں آھانی زورانسری آوار جنی ءِ بگیری ءَ مروچی زھرشانی کتگ –

زھرشانی ءَ نودربر ، سیاسی ءُ چاگردی گلانی باسک ءُ بیگواھیں مردمانی کھولاں بھر زرتگ –

زھرشانی ءَ پیسر پریس کلب ءِ دیم ءَ پریس کانفرنس کنان ءَ نوشکی ءِ جھمنند نصیب اللہ بادینی ءِ کھول ءِ گوشگ ات کہ ھمک روچ بلوچستان ءِ جتا جتائیں ھند ءُ دمگاں چہ زورانسری آوار جنگ بوتگیں مردمانی کھول وتی درد ءُ رنجاں بڈا بند اَنت ءُ امیت ءِ گوم ءَ کائنت اد ءَ پریس کلب ءَ وتی دردانی درشانی ءَ کن انت ما ھم ھمے کھولاں چہ یکے ئِے –

اھوالکاراں گوں تران کنان ءَ نصیب اللہ بادینی ءِ کھول ءِ گوشگ ات کہ نوشکی ءِ دمگ قاضی آباد ءِ جھمنند ورنائیں نودربر نصیب اللہ بادینی سال دوھزار ءُ چاردہ ءِ بیست ءُ پنچ رمس ء پاکستان ءِ چیریں ادارھانی کارمنداں نوشکی ءِ دمگ قاضی آباد ءَ آئی برات ءِ چمانی دیم ءَ دکان ءَ چہ آوار جتگ ءُ بیگواہ کتگ آئی ءِ زورانسری آوار جنی ءَ مروچی ھپت سال سرجم بوتگ –

کھول ءِ گوشگ ات کہ نصیب اللہ وانندھیں نودربر ءُ فرمانبرداریں ورنایے بوتگ اشی ءَ ابید ملک ءِ تہ ءَ آ ٹیکوانڈ ءِ گولڈ میڈلسٹ ئے، بلے ھپت سال ءِ گوزگ ءَ پد ھم آئی ءِ وش ءُ سلامتی ءِ ھچ ھال اھوال نیست –

آھانی گوشگ ات کہ ما جست کنگ لوٹ ایں یک پوزیشن ہولڈر نودربر ءُ گولڈ میڈلسٹیں ورنایے پرچا چوں گیرکانودی ءُ بے رھبندی آوار جنگ ءُ بیگواہ کنگ بیت ءُ ھما کار کہ آئی ءَ نہ کُتگ ھما کارے سزا دیگ بیت اِنت – وھدیکہ ملک ءِ تہ ءَ وتی کانود ءُ رھبند آمیدگس ھست انت گڑا پرچا یک ورنایے ماورائے کانود اے وڑ بیگواہ کنگ بوتگ کہ آئی ءِ زورانسری آوار جنی ءِ ھمراھی ءَ آئی ءِ گِس درد ءُ ازابی زند گوازینگ ءَ لاچار انت –

آھانی گوشگ ات کہ ما ھک ءُ انساپ ءِ سر ءَ اوست داریں ھمے ھاتر ءَ چہ وتی نیمگ ءَ پیسلہ کنگ ءُ گڈی رایہ ءِ دہگ ءَ ابید ھمے گوشیں اگاں نصیب اللہ بادینی ءِ ھر وڑیں بھتامے ھست یا ھر وڑیں جُرمے آئی ءَ کُتگ گڑا ملک ءِ تہ ءَ کانود ھست آمیدگساں آرگ بہ بیت آئی ءَ بگیری ءَ ارزی نبشتہ کنگ بہ بیت کیس کنگ بہ بیت آئی ءِ سر ءَ ھروڑیں بھتامے لگ ایت سزا دیگ بہ بیت مار ءَ ھچ وڑیں گپ نیست بلے اے وڑ یک مردمے ءَ ماورائے عدالت آوار جنگ ءُ آئی ءِ بیگواہ کنگ انسانی ھکانی بگیری دارگ انت –

نصیب اللہ بادینی ءِ کھول ءِ گوشگ ات کہ ما اقوام متھدہ، ایمنسٹی انٹرنیشنل، ہیومن رائٹس واچ کمیشن آف پاکستان، ایشین ہیومن رائٹس کمیشن ءَ ھوار درسیں ادارھاں چہ لوٹ کنیں کہ آ نصیب اللہ بادینی ءِ زورانسری آوار جنی ءَ گامگیج بہ زور انت ءُ آئی ءِ یل کنائینگ ءَ وتی کرد ءَ پیلو بہ کن انت –

مچ ءِ جھمنند گل زادی ھم زھرشانی ءَ ھوار بوتگ ءُ وتی برات ودود ءِ یل کنائینگے ھاتر ءَ زھرشانی کنگ انت –

گل زادی بلوچ ءَ پریس کانفرنس کنان ءَ گوشتگ کہ بلوچستان ءَ زورانسری آوارجنی نوکیں گپے نہ انت اد ءَ ھر سیمی گِس اے گیر کانودی امل ءَ اسرمند انت ھر وڑیں مردم ءَ زورانسری آوار جنگ ءُ بیگواہ کنگ میان استمانی انسانی ھکانی رِد ءَ یک جُرمے ءُ من ھم ھمے گیر کانودی امل ءَ چہ اسرمند بوتگ ءُ شمئے دیم ءَ اتکگ انت –

آئی ءِ گوشگ ات کہ منی بیست ءُ دو سالی ئیں برات ودود ساتکزئی ھمے سال ءِ دوازدہ اگست ءَ فرنٹیر کور ءُ چیریں ادارھانی کارمنداں آوار جتگ ءُ بیگواہ کتگ کہ پد ءَ رند ءَ آئی ءِ ھچ ھال نیست انت –

گل زادی ءِ گوشگ ات کہ آئی ءِ برات ودود ساتکزئی آئی ءِ سنگت نثار ء اسمائیل شاہ گِس ءَ چہ لوٹینتگ ءُ گوں وت برتگ – ھمود ءَ ساڑی ئیں چم وت دیستگیں گواھانی رِد ءَ گِس ءَ کمے دور ایف سی ءِ دو گاڑی اوشتوک بوتگ وھدیکہ آھانی ھمراھی ءَ سیاہ شیشگیں گاڑی ءِ ھم گون بوتگ – نثار ءَ گپ گپ ءَ منی برات بُرتگ ءُ ھماھانی گور ءَ سر کُتگ وھدیکہ آ ھماھانی نزیک ءَ شتگ ءُ سر بوتگ انت گڑا لس مردمی پوشاک گوریں کارمنداں منی برات ءِ دیم ءَ پُچ ءِ داتگ ءُ گاڑی تہ ءَ دور داتگ ءُ گوں وت برتگ –

گل زادی ءِ گوشگ ات کہ شما سرپد ات کہ اے وھدی بلوچستان ءِ تہ ءَ تُرس ءِ ودی بوتگ – دمگی چم دیستیں گواہ تُرسگ انت – منی برات یک نودربرے ءُ چُٹی ءِ وھد ءَ وتی برات ءِ ھمراھی ءَ اشکرانی کاریز ءَ مزوری کار کتگ ءُ روبرکت ءِ وھد ءَ گِس ءَ اتکگ اے مرد ءَ دھوکہ ءُ دروگیں درشانی ءَ ودود ساتکزئی گرائینتگ –

ودود ساتکزی گوھار ءِ گوشگ ات کہ یک مردمے ءِ جند آوار جنگ ءَ ایوک ءَ ھمائی ءِ جند بیگواہ نہ بیت بلکیں آئی ءِ سرجمیں کھول ھمے درد ءُ ازاب ءِ آماچ بیت اِنت منی برات ودود ساتکزئی ءِ زورانسری آوار جنی ءَ مئے سرجمیں کھول ازابی زند گوازینگ انت ءُ ما آئی یل بوگے راہ چاریں –

گل زادی ءِ گوشگ ات کہ ما مدامی بیگواھیں مردمانی پانکجنیں گل وائس فار بلوچ مسنگ پرسنز ءِ بنجل ءَ وتی زھرشانی نبشتہ کنائینتگ وھدیکہ سرکار ءَ چہ لوٹ کتگ ودود ساتکزئی ءِ یل کنائینگ ءَ گامگیج بہ زوریت بلے انگت مار ءَ ھک دیگ نہ بوتگ – ما یک رندے پد ءَ سرکار دمگی ءُ میان استمانی انسانی ھکانی گلاں چہ لوٹ کن ایں کہ ودود ساتکزئی ءَ ھوار درسیں بیگواھیں مردمانی یل کنائینگ ءِ ھاتر ءَ وتی کرد ءَ پیلو بہ کن انت –

گل زادی ءِ گوشگ ات کہ ایندگہ بیگواھیں مردمانی کھولانی وڑ ءَ ما ھم ھمے لوٹ کن ایں کہ اگاں ھر کسی ءِ سر ءَ بھتامے ھست گڑا ملکی کانودانی رِد ءَ آمیدگس ءَ آرگ بہ بنت کانودی لوٹ سرجم کنگ بہ بنت –

وھدیکہ دومی نیمگ ءَ بلوچ سوشل میڈیا ایکٹوسٹانی نیمگ ءَ ودود ساتکزئی ءُ نصیب اللہ بادینی ءِ پہ وشی یل کنائینگ ءِ ھاتر ءَ کمپئین ءِ برجم دارگ بوتگ کہ آئی ءِ تہ ءَ بیگواھیں مردمانی یل کنگ ءَ دیم ءَ آرگ ءُ زورانسری آوارجنی ءِ بگیری ءَ ٹویٹ کنگ بوگ انت –

بلوچستان ءِ تیابدپی شھر گوادر ءَ حق دو تحریک ءِ زھرشانی نندانک مروچی یازدھمی روچ ءَ برجاہ بیتگ، زھرشانی نندانک ءِ پلامرزی ءَ بلوچستان ءِ مکران ءِ دمگ تربت، پنجگور، گوادر ءُ مند پیشکان ءَ ھوار دگہ جاھاں انجمن تاجران ءِ نیمگ ءَ دیگ بیتگیں جار ءِ پد ءَ ھرتال کنگ بیتگ –

گوستگیں روچ ءَ جتا جتائیں جاھانی تاجر برادری ءَ وتی یکشل ءِ جارانک ءَ گُشتگ اَت کہ زھرشانی نندانک لس مھلوک ءِ ھک ءَ بیگ ءَ اِنت چریشی ءِ پژدر ءَ نندانک ءِ گون ءَ ھمسنتی ءِ واستا تاجربرادری دو روچاں داں وتی دکاناں بند کنت –

گوستگیں روچ ءَ سرکاری کمیٹی ءِ باسک ظھور بلیدی ءُ احسان شاہ دوبر نندانک ءَ زھرشانی ءَ نندوکیں مردماں گوں دُچار کپتگ ءُ آیاں یک دزنبشتگیں کاکدے داتگ ءُ گُشتگ کہ سرکار ءَ شمئے سَے لوٹ منّ اِتگ اَنت ءُ زوت وتی کار ءَ بندات کنت-

دزنبشتگیں کاگد ءَ سیمسرانی سر ءَ ایف سی ءِ دور کنگ ءُ انتزامیہ ءِ دست ءَ دیگ ءُ زر ءَ گپتگیں کایک ءُ ٹرالرانی ھلاپ ءَ بیڑ برگ ھوار بیتگ اِت اَنت –

گوادر ءَ حق دو تحریک ءِ سروکی کنوکیں مولانا ھدایت الرھمان ءَ گُشتگ کہ ما گوادر ءَ مزن شھدگ ءِ بند کنگ ءُ ایکپرس کار ءِ بند کنگ گُشتگ اشاں داں سَے روچ ءِ ودار ءَ واتر زوریں ءُ سرکاری کار پداں چاریں –

زھرشانی ءَ بلوچستان ءِ جتا جتائیں جاھاں مردم بھر زورگ ءُ بھر بیگ ءَ اَنت –

زھرشانی نندانک ءَ گوشگ بیتگ کہ اے لوٹانی سرجم بیگ ءَ اے زھرشانی نندانک برجاہ بیت اِنت ءُ اے زھرشانی نندانک ءَ پد دومی نندانک ھم برجم کنگ بیت اِنت کہ آئی ءِ لوٹ بلوچستان ءَ گار ءُ بیگواھیں مردمانی دیم ءَ آرگ ءُ ھرچ کسے کُشگ بیتگ آئی ءِ درگت ءَ کھول سرپد کنگ بہ بنت –

گوادر ءِ راجدپتر ءِ تہ ءَ اے مستریں نندانک گوشگ بیگ ءَ اِنت کہ لس مھلوک ءِ گوشگ اِنت کہ چِد ءُ پیسر چوشیں نندانک نہ بیتگ اَنت –

چہ روکپتی بلوچستان ءَ سر بیتگیں ھالانی رد ءَ دو بندیگیں بلوچ ایرانی آمیدگس ءِ پرمان ءَ کرمان ءِ سنٹرجیل ءَ پاھو دیگ بیتگ اَنت –

پاھو دیگ بیتگیں مردمانی پجار خان مھمد ءُ ستار شاہ بکش جھمنند سرجنگل دزاپ(زاھدان) ءِ ناماں زانگ بیتگ اَنت-

ھالانی تہ ءَ گوشگ بیتگ کہ اے ھردوکیں بلوچ نشہ باپاری ءِ بھتام ءَ گوستگیں سَے سالاں بندیگ بیتگ اَنت ءُ مروچی آ ماں کرمان ءِ سنٹرل جیل ءَ پاھو دیگ بیتگ اَنت –

ھالانی تہ ءَ گوشگ بیتگ کہ ھردوکیں مردمانی کھول گوستگیں روچ ءَ گڈی گندگ ءَ شتگ اَنت ءُ آ دُچاری ھم کنگ بیتگ اَنت –

روکپتی بلوچستان ءَ یکشل ءَ بندیگیں مردم پاھو دیگ بیگ ءَ اَنت ءُ آیانی ھال یکشل ءَ رسانکدراں شنگ ھم بیگ ءَ اَنت-

بلوچ کمپئن فعالین ءِ رد ءَ اے سال ءِ بندات ءَ روکپتی بلوچستان ءَ پنجاہ ءُ یک بندیگیں مردم پاھو دیگ بیتگ اَنت ءُ انسانی ھکانی ایران ایمنسٹی ءَ ھم اے وئیل گوست ءَ ایر جتگ ءُ پاھو دیگ ءِ دارگ ءِ لوٹ کرتگ –

نبشتانک: زبان اِنت راجاں زندگ دار ایت

نبشتہ کار : شاھد اھمد

دی بلوچستان پوسٹ

مارا وت ءَ زبان مہ بیت اِنت گڑا ما گار اِت ایں ، زوال اِت ایں ءُ کَسے ءِ پاد ءِ چیر ءَ کپتگ اِت ایں۔ زبان مہ بوتین اَت اسپیکر نہ بوتگ اَت ھشکنوک نہ بوتگ اَت ءُ پد ءَ ترا کس ءَ نہ پھم اِتگ اَت کہ شما کَے اِت ءُ کُجا چے اتگ اِت؟

زبان یک راجے ءِ پجار ءَ دَرَ ءَ کنائین اِیت ءُ چَہ بندر ءَ زبان بنی آدم ءِ ھمراہ اِنت ھربنی آدم ءِ پجار ءَ نام پِر بند اَنت پرچاکہ نام ءِ چیدگ آئی ءَ گار ءُ بیگْواہ نہ کنت اے دگنیا ءِ تہ ءَ ھر چیزاناں پہ چیدگ دیگ ءِ واستا نام بند اَنت اِش۔ اگاں یک زبانے ءِ تہ ءَ گیشاں چِہ گیش گپ ءُ ھبر ،نبشتہ بہ بیت گڑا بزاں زبان مان اِیت چَہ ایشی ءَ ابید ما دومی نیمگ ءَ بچاریں اگاں زبانے ءِ تہ ءَ گپ ءُ ھبر ، نبشتہ کم بہ بیت بزاں نیستی ءِ برابر بہ بیت گڑا زبان ءَ گْوات وتی ھمراھی ءَ بارت ءُ میزان میزان ءَ زبان نادْراھی ءِ آماچ بیت ءُ زُوت مِر اِیت۔

گپے زان اِت زبان مئے زِرد ءُ چمّانی ھدوک اِنت ءُ بلوچستان ءِ ارواہ ءَ را تاھیر دیوک ھمے زبان اِنت کہ شما ھر روچ وت ءَ پہ شان پیش دار اِت کہ ما بلوچ اِنت ءُ بلوچستان مئے دیار اِنت پد ءَ من ترا گْوشگ لوٹ آں کہ زبان مان اِیت بلوچستان مان اِیت پمیشکا ھر راج وتی پھازگ ءَ ھمے زبان ءَ کارمرز کنت شما گند اِت کدی وت ءَ سوتانی تہ ءَ وتی درنگازی ءَ کنگ ءَ اِت کدی تامُرانی تہ ءَ وت ءَ زندگ دارگ ءِ کوشست ءَ اِت۔

انچوکہ شما شری ءِ سر ءَ سرپد اِت کہ بلوچی زبان مئے ماتی زبان اِنت ءُ ما باید اِنت وتی ماتی زبان ءِ پھازگ ءَ تپاک بہ بہ ایں پرچاکہ چہ ایشی ءَ ابید ھم ما اے گپ ءَ شری ءَ سر ءَ اوں سرپد اِنت کہ بلوچی زبان ءِ واھند بلوچ راج اِنت ءُ بلوچ راج وتی جندے سر ڈگار ءَ وتواجہ نہ اِنت ءُ وتواجہ نہ بوگ ءِ سبب ناتپاکی اِنت ءُ ناتپاکی ءِ سبب ءَ بلوچ راج وتی راجی زبان ءَ ھم شموشگ ءَ اِنت۔

بلے مئے وش بھتی اِنت کہ واجہ سید زھور شاہ ھاشمی ءِ وڑیں مردم یک بلوچے ءِ لوگ ءَ ودی بیت ءُ بلوچی زبان ءِ سیاھگ ءِ راست ءَ ھَڑ دنت ءُ جَریدّگ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔