TBP Balochi

ٹی بی پی کارست

نیلسن منڈیلا

پولکار: حکیم بلوچ

دی بلوچستان پوسٹ

18 جولائی 1918ءَ زرباری افریقہ ءِ مویزو دمگ ءِ مدیبا ٹک ءِ رھشون نکوسی مفکنیسوا گڈلا ءُ نونکافی نوسیکینی ءِ لوگ ءَ ودی بیتگیں رولیھالا منڈیلا ءِ سَے ھکیگیں گوھار ءُ دگہ سَے ماتاں چہ شش برات ءُ سَے گوھار ھم بیتگ اَنت۔ رولیھلا منڈیلا ءِ پِت مفکنیسوا گڈلا وتی ٹک ءِ مستر بیتگ ءُ آ 1930 ءَ وھدے رولیھلا منڈیلا دوازدہ سالی گونڈوے بیتگ بیران بیتگ۔

رولیھلا منڈیلا کہ جھان ءَ نیلسن منڈیلا ءِ نام ءَ زانگ ءُ پجارگ بیت اِنت۔ آئی ءَ نیلسن ءِ نام آئی ءِ بنداتی وانگجاہ ءِ اُستاد مِس مدنگانے ءَ داتگ اَت کہ اے ھما وھدءِ دود بیتگ کہ درستیں وانگ جاہ ءِ زھگاں عیسائی نام دیگ بیتگ اَت۔

نیلسن منڈیلہ چہ فورٹ ھیر شھدربرجاہ ءَ آرٹ ءِ تہ ءَ بیچلرز کنگ ءَ بیت کہ یک زھرشانی ءَ بھر زیرگ ءِ سبب ءَ کشگ بیت اِنت ءُ ایشی ءِ سبب ءَ آ وتی ڈگری ءَ سرجم کُت نہ کنت، ءُ پد ءَ چہ یونیورسٹی ءُ آف ساؤتھ افریقہ ءِ ھساب ءَ سرجم کنت ءُ پہ وتی گریجویشن ءَ فورٹ ھیر ءَ رؤت۔ ھمے وھد ءَ آ ویٹ واٹر سرینڈ شھدربرجاہ ءَ چہ قانود وانگ ایل ایل بی کنگ بندات کنت، بلے آئی ءِ گپانی رد ءَ آ یک جوانیں نودربرے نہ بیت ءُ پمیشکا وتی وانگ ءَ سرجم کُت نہ کنت ءُ 1952 ءَ وانگ ءَ یل دنت ءُ پد ءَ 1962 ءَ لندن شھدربرجاہ ءَ وانگ بندات کنت بلے پد ءَ وتی وانگ ءَ نیم بندگ ءَ یل دنت۔ نیلسن منڈیلا 1989 ءَ وتی ایل ایل بی ءَ سرجم کنت وھدے آ زندانی بیت۔

نیلسن منڈیلا کَے بیتگ

جھان آئی ءَ بازیں ناماں زانت، نیلسن، مدیبا، منڈیلا، رولیھلا ءُ دگہ بازیں نام۔ نیلسن منڈیلا زرباری افریقہ ءَ اسپیت پوستانی سیاھیں مردمانی سر ءَ زلم ءُ زوراکی، لُٹ ءُ پُل، سیاھاں کم شرپ کنگ ءُ کم سرپد بیگ، افریقہ ءِ راستیں مردماں وتی گلام دارگ آیاں، وانگ جاھاں، کار جاھاں، سیاست ءَ برابری نہ بیگ ءُ بازیں جاھاں کہ اسپیت پوستانی روگ آیگ بیت اود ءَ نبشتہ کنگ کہ کُچک ءُ سیاھاں اِد ءَ آیگ ءِ اجازت نیست۔ ھما درستیں زوراکی کہ چہ آیانی سبب ءَ افریقہ ءِ سیا پوستیں مھلوک بزگ ءُ وار بیتگ اَنت آیانی ھلاپ ءَ جھد کنوکیں رھشون نیلسن منڈیلا ءِ نام ءَ زانگ بیت اِنت۔

نیلسن منڈیلا ءِ جھد ءُ کرد

زرباری افریقہ ءِ مدیبا ٹک ءِ مستر ءِ لوگ ءَ ودی بیتگیں نیلسن منڈیلا چہ کسانی ءَ سیاست ءَ ھبناک ءُ اسپت پوستانی زوراکی اپارتھیڈ، رھبند کہ سیاھانی ایر دست کنگ ءِ ھاتر ءَ اڈ دیگ بیتگ آئی ءِ بگیری ءَ زھرشانی ءَ ھوار بیتگ، چہ نودربری وھد ءَ آئی ءَ زھرشانیاں بھر زرتگ، پد ءَ نیلسن منڈیلا ءُ آئی ءِ ھمراھاں افریقن نیشنل کانگریس یوتھ لیگ اڈ داتگ اَت، کہ افریقن نیشنل کانگریس ءِ نودربرانی گلے بیتگ۔ نیلسن منڈیلا چوناھا پر ایمنیں لیکھانی منوگر بیتگ، بلے 21 مارچ 1960 ءَ زرباری افریقہ ءِ دمگ شارپ ویل ءَ پولیس ءِ تیرگواری ءِ سبب ءَ بیران بیتگیں 69 زھرشانی کنوکیں مردمانی کوش ءَ پد اخمونتو وی سویزی جنگی گلے اڈ داتگ اَت کہ اِشی ءَ سرکار ءَ تاوان بار کنگ ءِ ھاتر ءَ جھد کُتگ۔ نیلسن منڈیلا ءِ گپانی رد ءَ “اے گُشگ رد بیت کہ ما انگت ھم پر ایمنیں جھد ءَ برجاہ داشت کنیں وھدے سرکار مئے پرایمنیں لوٹانی پسہ ءَ مئے سر ءَ تیر گواری کنت مار ءَ کُشگ ءَ اِنت ءُ تاکت کارمرز کنگ ءَ اِنت۔”

نیلسن منڈیلا ءَ افریقہ ءِ راستیں واھند بزاں کہ سیاہ پوستانی مستری آیانی آجوئی ءُ اسپیت پوستانی زوراکی آیانی ایردستی ءُ نسل پرستی ءِ ھلاپ ءَ نہ تھنا زیرباری افریقہ ءَ جھد کُتگ بلکیں آئی ءِ جھد اے ھم بیتگ کہ سرجمیں افریقہ ءَ یک ھواریں پترے بہ بیت ءُ مھلوک ھواری ءَ وتی آجوئی ءِ وت واجھی ءُ وتی شرپ ءِ رکینگ ءِ ھاتر ءَ جھد بہ کن اَنت۔ نیلسن منڈیلا چیریں گل ساؤتھ افریقہ کمیونسٹ پارٹی ءِ باسک ھم بیتگ۔

نیلسن منڈیلا ءِ جھد ءُ ترندیں لیکھانی سبب ءَ اسپیت پوستیں واکداراں آئی ءَ بیست ءُ ھپت سال ءَ زندانی کُتگ اَت۔ 1962 ءَ دزگیر بیتگیں نیلسن منڈیلا بیست ءُ ھپت سال زندانی بیگ ءَ پد 1990 ءَ یل کنگ بیت اِنت۔ اپرتھائیڈ رجیم یا اسپیت پوست واکدارانی ھیال ھمے بیتگ کہ نیلسن منڈیلا ءَ زندانی کنگ ءَ پد زاناں افریقہ ءَ جھد ھلاس بیت اِنت ءُ سیاہ پوست وتی اگبالانی لوٹ ءَ نہ کن اَنت۔ بلے وھد ءَ نہ تھنا اسپیت پوست رد کُتگ اَنت بلکیں ھمے زندانی ئیں نیلسن منڈیلا پد ءَ جھان ءَ یک نامداریں رھشونے ئِے ھساب ءَ زانگ بیتگ کہ آئی ءَ وتی لیکھانی ھاتر ءَ وتی زند ءِ یک مستریں بھرے زندان ءَ گوازینتگ۔

نیلسن منڈیلا ءِ زند ءِ گیشتر بھر آئی ءِ نبشتگیں کتاب لانگ والک ٹو فریڈم ءِ تہ ءَ گندگ بنت۔ نیلسن منڈیلا 1994 ءَ زرباری افریقہ ءِ اولی سیاہ پوستیں صدر گچین کنگ بیت اِنت ءُ داں 1990 ءَ زرباری افریقہ ءِ سروک بیت اِنت۔

05 دسمبر 2013 ءَ 95 سالی ئیں نیلسن منڈیلا وتی لوگ ءَ وتی کھول ءِ نیام ءَ بیران بیت اِنت ءُ جھان چہ یک زانتکار، مھکم، پر آشوبیں ءُ وتی لیکھانی سر ءَ اوشتوکیں رھشونی ءَ چہ زبھر بیت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یونائیٹڈ بلوچ آرمی ءِ جارکش مزار بلوچ ءَ رسانکدر ءَ شنگ کُتگیں درشان ءِ تہ ءَ گُشتگ کہ گوستگیں روچ ءَ مئے سرمچاراں سنی ءُ ڈھاڈر ءِ نیامی دمگ ھمپادگ ءَ زورگیریں ڈیھہ ءِ فرنٹئیر کور ءِ بنجاھی کیمپ ءِ سر ءَ BM12 ءَ گوں ءُ دگہ مزنیں سلاھاں گوں اُرش کُتگ، اُرش ءِ تہ ءَ زورگیریں ریاست ءَ جانی ءُ مالی تاوانانی دیمپانی کنگ کپتگ۔

جارکش ءَ گُشتگ زورگیریں ریاست بلوچ راجی مڈیاں لُٹگ ءِ نیت ءَ اے دمگانی تہ ءَ وتی سپاھیگانی کساس ءَ ودینگ ءَ اِنت جتائیں ھنداں بنجل جوڑ کنگ ءَ اَنت ءُ اے بنجلاں بنجاھی کیمپ ءَ چہ کمک ءُ آسراتی سر کنگ بیگ ءَ اِنت کہ اِشی سر ءَ گوستگیں روچ ءَ مئے سرمچاراں اُرش کُتگ۔

جارکش ءَ دیمتر ءَ گُشتگ کہ مئے اُرش داں بلوچستان ءِ آجوئی ءَ برجاہ مان اَنت۔

بلوچ اسٹوڈنٹس ایکشن کمیٹی تربت ھنکین ءِ یو او ٹی بنزہ ءِ بنزھی دیوان، نیاد بنزھی کارمستر آئشہ بلوچ ءِ سروکی ءَ برجم دارگ بوتگ دیوان ءِ گچینی ءِ مھمان ھنکینی کُمک کار مستر سگیر بلوچ ءُ ھواریں مھمان ھنکینی کارگُشاد مھمد بلوچ ءُ ھنکینی کُمک کارگشاد حبیب بلوچ ھوار بیتگ اَنت۔ دیوان ءَ گْوستگیں کارانی اھوال، گل ءِ نشست ءُ رھبندانی سر ءَ تْران ءَ پد آؤکیں گامگیجانی کْوھنیں کابینہ ھلاس کنگ ءُ نوکیں بنزھی کابینہ ءِ سنگت گچین کنگ بوتگ اَنت کہ آھانی تَہ ءَ آئشہ بلوچ پہ بنزہ ءِ کارمستر ءُ کریم بخش بلوچ پہ بنزہ ءِ کارگُشادی ءَ گچین کنگ بوتگ اَنت۔

بنزھی دیوان ءَ تْران کنان ءَ ھنکینی کُمک کارمستر سگیر بلوچ ءَ دَرائینت ءُ گُشتگ کہ مئے اھد ءِ ورنا مزنیں کچّے ءَ نشہ ءُ اے دگہ چاگردی سل کاریانی آماچ اَنت ءُ چہ وانگ ءُ زانگ ءِ پڑ ءَ گِستا بوان اَنت۔ مرچگیں وھد ءِ لوٹ ایش نہ انت کہ اھد ءِ ورنا وتی بے بھائیں وھد ءَ پہ بے نپیں کاراں بہ گوازین اَنت ءُ زوال ءِ نیمگ ءَ برو اَنت، بِگندے مرچگیں ورنا بلوچ راج ءَ یک جِتا ءُ بے مٹّیں بانداتے ءِ واھند کُرت کن انت ءُ چوش پہ وانگ ءُ زانگ ءُ شعور ءَ بیت کنت، بلے مرچی ھمے راج ءِ ورنا وتی راجی پرز ءَ پورا مکن انت ءُ راجی جیڑھاں گیشّ ءُ گیوار کنگ ءِ زمہ ءَ وتی کوپگاں مہ زور اَنت گڑا ایش پہ بلوچ ءَ مزنیں تاوانے بیت۔

نیاد ءَ آیاں دیمترا تْران کنان ءَ گُشت کہ دُگنیا ءِ کُنڈ کُنڈ ءَ بگر داں وتی ھَند ءِ جاورانی تپاسگ ءَ پد مارا جِتا جِتائیں سیاسی جاورانی دُروشُم گندگ کاینت ءُ دُگنیا ءِ ھرچ وڑیں زوراک چہ سیاسی جاوراں نپ چست کن انت ءُ پہ رِپک راجانی سر ءَ واجھی کن اَنت۔ مرچی بلوچ راج ھم ھمے جاوراں گوں دوچار اِنت ءُ جاورانی جتگیں مردمانی ھاترا گونڈیں بدلیی یے ھم تاھیر بکشیں ساھے کشّگ ءِ موکل بیت ءُ بزّگیں راج مُدام پہ ھمیشی ءَ زِند گوازینگ ءَ اِنت۔ مردماں مدام ھمے رنگ ءَ مژدہ دیگ بیت کہ دیمروئی چہ مرچی ءَ بِندات اِنت ءُ مردم پہ بُنکّی ھکّانی ھاترا ریپینگ بوگ ءَ اَنت۔ ھمے ھاترا ھرچ سیاسی سنگتے ءِ ھاتر ءَ اے الّم اِنت کہ آ تھی ءُ ڈنی اڑانداں بہ پھمیت ءُ چرایشاں بہ گْوزیت ءُ دیمروئی بہ کنت۔ ھمے رنگ ءَ بلوچ نودربر سیاست ھم مدام وتی ڈنی ءُ تھی اڑانداں گْوزیت ءُ دیمروئی کنت، ھمے اڈاندانی پجارگ ءُ گیشینگ پہ بلوچ سیاست ءِ باندات ءِ ھاترا ھژدری اِنت۔

آؤکیں گامگیجانی سر ءَ نیاد بنزہ ءِ گْوستگیں کابینہ ھلاس کنگ بوت ءُ نوکیں کابینہ اڈ دیگ بوتگ بنزہ ءِ اگدہ داراں چہ کار مستر سنگت آئیشہ بلوچ، کُمک کار مَستر یاسر بلوچ، کارگُشاد کریم بخش بلوچ، کُمک کارگُشاد عبدلرحمٰن بلوچ ءُ ھالرسانی کار گُشاد حکیم بلوچ گِچین کنگ بوت اَنت-

ھنکینی سنگت ءَ نوک گِچین بوتگیں کابینہ سوگِند دات اَنت ءُ سنگتاں وتی زمہ واریانی پورا کنگ ءِ کول کُت-

دوشیگیں شپ ءَ بوتگیں پریمئیر لیگ فٹبال گوازی ٹوٹنھم ءُ برینٹ فورڈ، مانچسٹر یونائیٹڈ ءُ ارسنل ءِ میان ءَ کنگ بوتگ کہ ٹوٹنھم ءَ دو ، مانچسٹر یونائیٹڈ سَے پہ دو گول ءَ گوازی کٹ اِتگ اَنت –

ٹوٹنھم ءُ برینٹ فورڈ ءِ میان ءَ بوتگیں دوشیگیں گوازی ءَ ٹوٹنھم ءِ لیبیاں جوانیں لیب پیش داشت ءُ برینٹ فورڈ ءِ دیم ءَ دو گول اسکور کت ءُ برینٹ فورڈ ءِ لیبی گول اسکور کنگے موہ نہ دات ءُ گوازی وتی نام ءَ کُت – ٹوٹنھم ءِ نیمگ ءَ چہ لیبی ایس.کینوس ءُ ایچ.سن ءَ گول اسکور کتگ انت –

پریمئیر لیگ ءِ پنچ شمبے ءَ بوتگیں دومی گوازی ارسنل ءُ مانچسٹر یونائیٹڈ ءِ میان ءَ کنگ بوتگ – کہ مانچسٹر ءَ ارسنل یک گول ءَ چہ برتگ – ارسنل ءِ نیمگ ءَ چہ دو گول اسکور کنگ بوتگ وھدیکہ مانچسٹر یونائیٹڈ ءِ نیمگ ءَ سَے گول اسکور کنگ بوتگ-

ارسِنل ءِ لیبی یے.سیمیت روئے ءُ ایم.اوڈیگارڈ ءَ یک یک گولے اسکور کتگ وھدیکہ مانچسٹر یونائیٹڈ ءِ لیبی کرسٹانو رینالڈو ءَ دو ءُ بی.فرنندس ءَ یک گول ءِ اسکور کتگ ءُ گوازی وتی ٹیم ءِ نام ءَ کتگ –

بلوچ یکجھتی کمیٹی ءَ وتی شِنگ کتگیں درشان ءِ تہ ءَ گوشتگ کہ سیندک ءُ ریکوڈک ءِ درگت ءَ وفاقی ھکومت ءِ نیمگ ءَ بے جاری شور ءِ سر ءَ زھر درشان کتگ ءُ گوشتگ کہ وفاقی ھکومت مدام بلوچستان ءِ مال ءُ مڈیاں بلوچ راج ءِ رزامندی ابید ڈنی شرکتاں گوں بھا کنگ ءَ اَنت – گوادر پورٹ ءُ بلوچ تیاب بہ بیت یا سیندک ءُ ریکوڈک پروجیکٹس وفاقی ھکومت بے دردناکی ءَ ڈنی کمپنیاں گوں باپاری ءَ دلگوش اِنت – یک نیمگے بلوچستان ءِ کدرتی مالی ءُ مڈیاں بلوچ راج ءِ ابید رزامندی ءِ بگیر ءَ باپاری برجاہ ءَ اِنت وھدے کہ دومی نیمگ ءَ بلوچستان ءِ راج تنگدستی ءِ لکیر ءَ جھل ھم زندگی ءَ گوازینگ ءَ اَنت-

جارکش ءَ گوشتگ کہ ھمے اش کنگ بوتگ کہ ریکوڈک ءِ درگت ءَ یک بلاھیں پاباری بوگ ءَ اِنت – چریشی ءَ مدامی وڑ ءَ بلوچ راج ءِ ابید رزامندی ءَ ھوار نہ اَنت – وھدے کہ بلوچستان ءِ مال ءُ مڈیاں لُٹ ءُ پُل دومی منسوبھانی وڑ ءَ اے منسوبہ ھم چیر دیگ ءَ اَنت – وھدے کہ ما ھکومت ءَ گوشگ لوٹ ایں اے وڑیں کجام ھما منسوبہ کہ بلوچ راج ءِ مال مڈی ءُ تیاپ ءِ باپاری کنگ بیت اشی ءِ بگیر ءَ بلوچ راج ھرچ وڑ دیم ءَ اوشت اِیت – بلوچ وتی مال ءُ مڈیانی بھا کنگ ءَ ھچ وڑ نہ منّ اِیت- بلوچستان ءِ مڈی بلوچ راج ئیگ اَنت ءُ اشانی درگت ءَ شور کنگ مستری ھم بلوچ راج ئیگ اِنت-

جارکش ءَ گوشتگ اے سرجمیں جاورھالانی دردناک اش اَنت کہ بلوچستان ءَ سیاسی پارٹی بلوچستان ءِ مال ءُ مڈیانی پُلگ ، بلوچستان ءَ نگگیں انسانی ھکّانی پادمالی ءُ مالی بدھالی سر ءَ مدام گپانی سر ءَ مھدود اَنت – اے جاورھالاں بلوچ راج ءِ سیاسی آگاھی ءِ سک زرورت اِنت – اگاں بلوچ راج وتی ھک ءُ پھازگ ءِ ھاتر ءَ سیاست جُھد ءِ راہ گچین نہ کُت ءُ اے نگگیں جاوراں بے توار باں گُڑا ھمے وڑ بلوچستان ءَ بلوچ راج ءُ بلوچستان تیاب ءُ مڈی لُٹ ءُ پُلّ ءِ نشانگ ءَ اَنت ءُ اشی ءِ تہ ءَ گیشی آرگ بیت ءُ بلوچ وتی ڈیھ ءِ سر ءَ بے وارس کنگ بنت-

سربوتگیں ھالانی رِد ءَ بلوچستان ءِ دمگ پنجگور ءَ ناشناسیں مردماں گاڑی ءِ سر ءَ دستی بمب ءِ چگل داتگ – اُرش پنجگور ءِ دمگ تبلیگی بنجاہ خدابادان ءَ یاسر ء فیض محمد جاھمنند شاپاتان نامی مردم ءِ گاڑی ءِ سر ءَ بوتگ –

اھوالکار ءِ رِد ءَ اُرش ءَ اے یاسر سک باز زدگ بوتگ ءُ آئی ءِ جاور سک نگیگ انت پہ درمان کنگ ءَ ھسپتال ءَ برگ بوتگ –

دمگی اھوالکار ءِ رِد ءَ اے مرد ءِ سیادی چہ سرکاری ٹولی ءِ بوتگ-

زانگ بہ بیت بلوچ راجدوستانی رِد ءَ سرجمیں بلوچستان ءَ پاکستانی پوج ءُ چیریں ادارھاں بازیں سلاہ بندیں ٹولی جوڈ کتگ کہ آ ڈیت اسکواڈ ءِ نام ءَ زانگ بنت –

بلوچ راجدوستانی گوشگ انت کہ اے ٹولی بلوچانی کُشت کوش ءُ آوار جنی ءَ ھوار دگہ بازیں چاگردی سلکاریاں ھوار انت-

گوست ءَ اے وڈیں مردمانی سر ءَ بوتگیں اُرشانی زمہ واری بلوچ آجوئی لوٹوکیں سلاہ بندیں گلاں منّ اِتگ انت بلے دنیگت ءَ ایشی ءِ سر ءَ بوتگیں اُرش ھچ گل ءَ نہ منّ اِتگ –

متھدہ عرب امارات ءَ میان استمانی ھکانی لگتمالی کتگ ءُ مروچی وتی راجی روچ ءِ جشن ءَ کنگ ءَ انت – ھلیجی ڈیھاں نشتگیں بلوچاں راشد حسین بلوچ ءِ زورانسری آوار جنی ءِ بگیری ءَ توار چست کنگ لوٹ ایت –

بیگواھیں انسانی ھکانی باسک راشد حسین بلوچ ءِ گوھار فریدہ بلوچ ءَ متھدہ عرب امارات راجی روچ ءِ درگت ءَ وتی ھیال درشان اتگ انت –

فریدہ بلوچ ءَ گوشتگ کہ راشد حسین بلوچ متحدہ عرب امارات ءَ اود ءِ چیریں ادارھاں سرکار ءِ گوشگ ءِ پد ءَ زورانسری آوار جتگ ءُ شش ماہ ءَ وتی کِر ءَ داشتگ ءُ پد ءَ رند ءَ گیرکانودی پاکستان ءِ ھوالگ ءَ داتگ کہ تنی وھدی انگت گار ءُ بیگواہ انت –

آئی ءِ گوشگ ات کہ متحدہ عرب امارات ءَ انسانی ھکانی لگتمالی کتگ ءُ مروچی وتی راجی روچ ءِ وشی ءَ دارگ انت – فریدہ بلوچ ءَ گوشتگ کہ راشد حسین ءِ زورانسری آوار جنی بس یک گِس ءُ پرد ءِ جیڑہ نہ انت بلکیں اے گیرکانودی امل ءَ بلوچ راج ءِ بگیری زانگ بیت اِنت –

آئی ءِ گوشگ ات کہ ما ھلیجی ڈیھ ءُ سرجمیں دنیا ءِ نشتگیں بلوچ ءُ انسانی ھکانی منوگراں چہ لوٹ کن ایں کہ راشد حسین بلوچ ءِ زورانسری آوار جنی ءِ بگیری ءَ توار چست بہ کن انت –

بلوچستان ءِ دمگ چہ کچھی ڈاڈر ءَ پاکستانی پوج ءِ دست ءَ زورانسری آوار جنگ بوتگیں نادر خان ء ھاجی سید خان انگت تاں یل نہ بیتگ –

نادر خان ء حاجی سید خان بیست ءُ شش نومبر سال دوھزار ءُ بیست ءَ پاکستانی پوج ءَ چہ ڈھاڈر ءَ زورانسری آوار جتگ ءُ بیگواہ کتگ ات آئی ءَ چہ پد آئی ءِ ھچ وڑیں ھال ءُ اھوال نیست اِنت –

نادر خان بنکی ءَ سبی ءِ دمگ جالڑی ءِ جھمنند انت –

نادر خان اشی ءَ پیش ھشت مئی ءَ آوار جنگ بوتگ ءُ بیگواہ کنگ بوتگ ات کہ ھشت نومبر ءَ زاھر کنگ بوتگ ءُ جیل کنگ بوتگ ات ءُ پد ءَ بیست ءَ شش نومبر ءَ یل کنگ بوتگ ءُ دو روچ ءَ پد دزگیر کنگ ءَ پد بیگواہ کنگ بوتگ ات –

زانگ بہ بیت کہ بلوچستان ءَ زورانسری آوار جنی ءِ وئیل گوستگیں دو دھکاں یکشل ءَ برجاہ انت – انسانی ھکانی ادارہ ءُ راجدوستانی گوشگ انت کہ زورانسری آوار جنیاں پاکستانی پوج ءُ چیریں ادارہ ھوار انت –

مند ابدوئی ءَ پاکستانی پوج ءِ سر ءَ اُرش کتگ ءُ یک کارمندے کُشتگ – میجرگوھرام بلوچ

سربوتگیں ھالانی رِد ءَ گوستگیں روچ ءَ ناشناسیں سلاہ بندیں مردماں کیچ ءِ دمگ مند ءَ پاکستانی پوج ءِ سر ءَ اُرش کتگ –

اُرش مند ءِ دمگ ابدوئی ءَ سِی نومبر ءَ پوجی پانگس ءِ سر ءَ اُرش کتگ ءُ اُرش ءَ پوج ءَ جانی تاوان بوتگ، اُرش ءِ زمہ واری بلوچ آجوئی لوٹوکیں سلاہ بندیں گل بی ایل ایف ءَ منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں سِی نومبر ءَ سیمسراں ٹٹ جنوکیں زورگیریں پوج ءِ سر ءَ اُرش کتگ –

جارکش ءَ گوشتگ کہ اُرش سِی نومبر ءَ مئے سرمچاراں مند ءِ دمگ ابدوئی ءَ برجاھیں پوجی پانگس ءِ سر ءَ یک پوجی کارمندے دورجنگیں توپک ءِ سر ءَ نشانگ کتگ کُشتگ ءُ پوجی پانگس ءِ سر ءَ راکٹ ءُ دگہ وتکاریں سلاھاں گوں اُرش کتگ چریشی ءَ پوجی پانگس ءَ جانی ءُ مالی تاوان ءِ دیمپانی بوتگ –

جارکش ءَگڈسر وتی درشان ءِ تہ ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

بلوچ اسٹودنس ایکشن کمیٹی ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ ھزدار انجینئرنگ شاھدربر جاہ ءِ نودربرانی نیمگ ءَ چہ بوتگیں زھرشانی پلامرزی کُتگ گوشتگ کہ بلوچستان ءِ تہ ءَ کمیں کساس ءَ ھستیں زانشجاھانی ءَ تہ ءَ نودربرانی راہ سر ءَ کنٹگ کنگ ءُ آھاں اسکالرشپ ءَ چہ زبھر کنگ ایرجنگی ایت ھزدار شاھدربرجاہ سرجمیں بلوچستان ءِ یکیں انجینئرنگ شاھدربرجاہ انت ھمیشی ءِ واکدارانی بےضابطگی اسکالرشپانی دارگ پدردی ئے-

آئی ءِ گوشگ ات کہ بلوچستان یونیورسٹی آف انجینئرنگ اینڈ ٹیکنالوجی ھزدار بلوچستان ءِ مستریں انجینئرنگ یونیوسٹی نام ءَ زانگ بیت ھمودا چہ سرجمیں بلوچستان ءِ نودربر ٹیکنیکل ءُ انجینئرنگ ءَ ھوار بوھگے ھاتر ءَ شاھدربرجاہ ءِ نیمگ ءَ کائینت – سرجمیں بلوچستان ءِ نودربرانی زانت ءِ تن ءَ ھلاس کنوکیں یکیں زانشجاہ گوستگیں بازیں وھد ءَ واکدارنی بےضابطگی انت چریشی ءَ نودربر بازیں اڈوجنجالاں گوں دچار انت – شاھدبرجاہ ءَ واکدارانی بےضابطگی سوب ءَ بازیں وھد ءِ بیت کہ نودربر ڈائریکٹریٹ اسکالر شپ ءَ چہ زبھر انت –

آئی ءِ دیمتر ءَ گوشگ ات کہ بلوچستان ملک ءِ پشت کپتگیں سوبہ ءِ زانگ بیت اِنت ھمود ءَ ھزارانی کچ ءَ نودربر مالی درگت ءَ نزور بوھگ ءِ سوب ءَ بازیں شاھدبرجاھاں چہ اسکالر شپ ءِ بنیاد ءَ ھرسال داکلہ زور انت – نودربرانی آھگے درچ ءَ سرکار ءِ نیمگ ءَ چہ یونیورسٹی آف انجینئرنگ ءُ ٹیکنالوجی ھزادر ءِ نودربرانی ھاتر ءَ ڈائریکٹ اسکالر شپ پچ کنگ بوتگ کہ گوستگیں سَے سالاں بند انت ءُ نودربر چہ اسکالر شپ ءَ زبھر انت – سرکاری نمائندگ ءُ شاھدربرجاہ ھاکماں اے جیڑہ ھلاس کنگ بوتگ وھدیکہ ھچ وڑیں فورم نودربرانی شنوئی نبوتگ –

آئی ءَ وتی درشان ءِ گڈی ءَ گوشتگ کہ شاھدربر جاہ ءِ نودربر گوستگیں بازیں وھد ءَ اسکالرشپ ءِ ھاتر ءَ جھد کنگ ءَ انت ءُ سرکار دلگوش کنگ ءَ زھرشانی کنگ بوھگ انت بلے سرکار ءُ شاھدربرجاہ ءِ واکدارانی نیمگ ءَ گیرسنجیدگی ءِ بوھگ انت تنی وھدی نودربرانی لوٹانی ھاتر ءَ ھچ وڈیں گامگیج زورگ نبوتگ – شاھدربرجاہ ءِ نودربراں مروچی درسیں سرگرمی بند کتگ انت بلے سرکار ءُ شاھدربرجاہ ءِ واکدارانی نیمگ ءَ ھچ وڈا گامگیج زورگ ءَ نہ انت ما نودربر گلاں ھمکوپگ انت ءُ ھستیں وھدے سرکار ءَ لوٹ کنیں کہ نودربرانی لوٹاں سنجیدگی بہ زور انت ءُ گوستگیں سَے سالاں بندیں ڈائریکٹریٹ اسکالر شپ زوتاں زوت پچ کنگ بہ بیت –