TBP Balochi

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار پنچ سد ءُ چاردہ روچ سرجم بوتگ – خان گڑھ جیکب آباد ءَ چہ جسقم اگدہ دار علی حسن سومرو، نور محمد ابڑو ءُ دگہ مردماں اتکگ ءُ بنجل ءِ تر ءُ تاب کتگ ءُ بیگواھیں مردمانی کھول گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچ، پشتون سندھی ءُ درسیں تک ءُ پھناتاں سیادی داروکیں مردماں چہ لوٹ کنیں کہ پُرایمنیں جھد ءِ تہ ءَ وتی کرد ءَ پیلو بہ کن انت – بلوچ جھدکار ءُ درسیں تاکتانی جھد ءُ شھیدانی ھوناں زورگیریں ریاست گڈی ساھے کشگ ءَ لاچار کتگ ءُ اے راستی ءِ کہ پاکستانی ریاست ءَ وتی زورگیری ءِ برجاہ دارگے ھاتر ءَ بلوچ سلو جینوسائڈ ءِ تہ ءَ گیشی آؤرتگ ءُ راجداریں باسک ءُ دگہ تک ءُ پھناتاں سیادی داروکیں مردمانی نشانگ کنگ ءَ گیشی آرگ انت ھمے ھاتر ءَ مروچی آ بلوچ پرزنداں یک یک ءَ جنگ انت – سرجمیں راج ءُ دنیاءَ دیستگ کہ مچھ بولان مستونگ، ڈیرہ بگٹی ءَ زورانسری آوار جنگ بوتگیں بلوچ پرزند دروگیں میڑ ءِ نام ءَ سی ٹی ڈی ءَ شھید کتگ انت – مکران ءُ ایردستیں بلوچستان ءِ دگہ ھند ءُ دمگاں لس مھلوک ءِ سر ءَ بے کساس ءَ پوجی تاکت کارمرز کنگ بوتگ بلوچ وتی جندے زمین ءِ سر ءَ بے ننگ کنگ بیت ءُ بلوچ راجداریں باسک ءُرھشونانی گِساں دور کنگ بیت ءُ آ شھید کنگ بنت – پُرایمنیں زھرشانیانی سر ءَ لٹ شاپ بیت، جنازھاں ھواریں مردم آوار جنگ بنت – سرکاری کرسی ءِ سر ءَ نندگ ءَ پیسر بیگواھیں مردمانی نام کارمرز کنگ بیت تانکہ دنیائے چماں ھاک مان بہ کن انت ءُ مروچی ھمے بیگواھیں مردمانی بنجل ماندارگ بیت کہ ادا شھید ءُ بیگواہ بوتگیں مردمانی کھول یکجاہ بنت ءُ وتی دوستیگیں مردمانی ھاتر ءَ دوا لوٹ اِنت ءُ دنیائے دیم ءَ زورگیریں ریاست ءِ زورکیاں پدر کنگے کوشست ءَ کن انت –

ماما قدیر بلوچ ءِ گوشگ ات کہ مروچی پاکستان ءِ ھاتر ءَ بلوچ ءِ لپز گناھ ءُ جرم ئے ءُ ریاست بلوچ کنگ ءُ جنگ ءَ انت – اگاں آ وتی گِس ءَ ھاموشی ءَ گوں نشتگ شر یا جھدے بھرے شر اگاں کسی ءَ گوں سیادی داریت بس جنگی انت –

بلوچستان ءِ دمگ پنجگور ءَ سلاہ بندیں مردماں پاکستانی پوج ءِ چوکی ءِ سر ءَ اُرش کرتگ-

اُرش پنجگور ءِ دمگ کیلکور ءَ ھستیں پوجی چوکی ءِ سر ءَ کنگ بیتگ –

ھالانی تہ ءَ گوشگ بیتگ کہ اُرش ءَ پوج ءَ جانی تاوانی دیمپانی کنگ کپتگ، بلے تنی وھدی پوج ءِ نیمگ ءَ چوشیں گپ دیم ءَ نیتکگ اَنت –

اے دمگ ءَ آجوئی دوستین گل پرکار اَنت بلے تنی وھدی اے اُرش ءِ زمہ واری کس ءَ پہ وت ءَ نہ زرتگ –

بلوچستان ءِ بنجاھی شھر شال ءَ ینگ ڈاکٹرزانی زھرشانی برجاہ اِنت کہ ءُ ینگ ڈاکٹرزانی نیمگ ءَ او پی ڈیز، اون ڈور سروسز ءُ آپریشن تھیٹرز بند کتگ اَنت، چریشی ءِ سبب ءَ نادرھاں بازیں جیڑھانی دیمپانی اِنت –

ینگ ڈاکٹرزانی ھمراھیانی یل کنگ ءِ واستا ڈیوٹیز ءَ چہ دزکشی کتگ ءُ لوٹ کرتگ کہ شال ءَ نندانک ءِ وھد ءَ گرگ بیتگیں ڈاکٹر دلجمی ءَ یل کنگ بہ بنت ءُ سرکاری ھسپتالاں جانسلامتی ءِ واستا گیشتر آسراتی دیگ بہ بیت اِنت –

زانگ بہ بیت ینگ ڈاکٹرزاں بیست ءُ دو نومبر ءَ وتی ھکانی واستا شال ءَ ریڈ زون ءَ نندانک جتگ ءُ نشتگ اِت اَنت ءُ آیانی لوٹ منگ ءَ ابید آیانی سر ءَ پولیس ءَ بیڑ برتگ اَت-

پولیس ءَ دگ ءِ بندی ءِ سبب ءَ بیڑ برتگ ءُ سِی نومبر ءَ نندانک ءَ ھواریں نوزدہ مردم دزگیر کرتگ اَت کہ اشانی تہ ءَ پانزدہ ڈاکٹرز ءُ چار پیرامیڈیکس اسٹاف ءِ باسک ھوار اِت اَنت ءُ دزگیر کنگ بیتگیں ڈاکٹرانی بارو ءَ آمیدگس ءَ شش دسمبر ءَ داں سزا گوشتگ اَت ءُ پولیس ءَ ڈاکٹر جیل ءَ برتگ اَنت-

اھولانی رد ءَ بلوچستان ءِ سرکار ءَ پیسر ءَ ایم آر آئی میشن ءِ واستا بیست ءُ پنچ ملین کلدار ءِ جار جتگ ءُ دگہ یک بیانے ءِ تہ ءَ گوشگ بیتگ کہ سر وزیر میر عبدالقدوس بزنجو ءِ شنگ کرتگیں جار ءَ زوت اے کار سرجم کنگ بنت –

ھمے وڑ ءَ اُستانی وزیر میر ظھور بلیدی ءَ ھم گوستگیں روچ ءَ شال ءَ رسانکدراں گپ کنان ءَ گوشتگ کہ زھرشانی کنگ ھرکسی ھک اِنت ءُ ھما وڑ کہ شھریاں دگہ جیڑہ پیش مہ بیت اِنت-

بلوچستان ءِ تیابدپی شھر گوادر ءَ وتی ھکانی واستا “گوادر ءَ حق دو تحریک “ءِ نندانک مروچی ھژدھمی روچ ءَ برجاہ – لوٹانی پد ءَ مروچی مکران کوسٹل ھائی وے ءِ سر ءَ شھریاں بازیں کچے ءَ زھرشانی کنان ءَ روانی مھتل کتگ اَنت-

دی بلوچستان پتر ھال ءَ سر بیتگیں ھالانی رد ءَ پشمبے ءِ سھب ءَ مکران ءِ کوسٹل ھائی وے اورماڑہ زیروپوائنٹ، پسنی زیروپوائنٹ ءُ سربندن چاراہ بند کنگ بیتگ اَنت- چریشی ءِ سبب ءَ گوادر ءَ کراچی ءَ ھوار بلوچستان ءِ دگہ جاھاں روانی رھوت مھتل بیتگ اَنت –

زھرشانی سبب ءَ ھزارانی مساپر بریں گاڑی نندانکجاہ ءَ سر بیتگ – دومی نیمگ ءَ انجمن تاجران ءِ نیمگ ءَ گوادر، پسنی، جیونج ءُ اورماڑہ ءِ دراھیں باپاری بنجل بند کتگ اَنت –

تھتک بندیں ھرتال ءِ سبب ءَ مالیاتی ادارہ ھم بند ءُ دومی نیمگ ءَ سرکاری کارگساں ملازمانی رو ءُ آہ کم بیتگ گوستگیں شپ ءَ سرکاری کمیٹی ءُ زھرشانی کنوکانی میان ءَ گپ ءُ تران پنچمی بر ءَ بے سوب بیتگ –

زانگ بہ بیت زھرشانی نندانک ءَ گوستگیں شپ ءَ اُستانی وزیر ظھور بلیدی، لالا رشید اتکگ اَنت ءُ مولوی ھدایر الرھمان بلوچ ءَ داں دیراں گپ ءُ تران ءَ پد مولوی ھدایت الرھمان بلوچ ءَ نندانک ءَ نشتگیں مردمانی گون ءَ گپ کنان ءَ گوشتگ کہ مئے لوٹانی تہ ءَ دو لوٹ منّگ بیتگ اَنت –

آئی ءَ گُشتگ اَت کہ سرکاری کمیٹی ءِ باسکاں اے ستک داتگ کہ مروچی کوسٹ گارڈ ءِ دست ءَ گرگ بیتگیں لانچ ءُ کسٹم ءِ دست ءَ گرگ بیتگیں گاڑی یل کنگ بنت ءُ آئی ءَ گُشتگ کہ اے گپانی منگ ءُ سیمسر ءِ پچ کنگ ءَ داں زھرشانی نندانک برجاہ بیت اِنت –

ھدایت الرھمان ءَ گشتگ اَت کہ گوستگیں شپ ءَ بیتگیں شور ءُ سلاھاں اے پیسلہ کنگ نیتگ کہ نندانک برجاہ بیت اِنت ءُ نِی گپ ءُ تران بس سر وزیر بلوچستان، چیف سیکریٹری بلوچستان ءُ کورکمانڈر بلوچستان ءِ گون ءَ بس گپ بیت اِنت –

گوستگیں شپ ءَ پریمئیر لیگ فٹبال گوازی ءَ دوازدہ ٹیمانی میان ءَ گوازی کنگ بوتگ، آھانی تہ ءَ چلسیا ءَ وٹفورڈ ءِ دیم ءَ یک گول ءَ، لیورپول ءَ ایورٹون ءِ دیم سَے، مانچسٹر سٹی ءَ آسٹون ویلا ءِ دیم یک گولے ءَ گوازی کٹ اتگ وھدیکہ ساؤت ایمٹون ءُ لسسٹر سٹی، وولوز ءُ برنلی، ویسٹ ہام ءُ برائٹون دیمیگ بوتگ انت –

چارشمبے ءَ بوتگیں پریمیئر لیگ ءِ اولی گوازی ساؤتھ امپٹون ءُ لیسسٹر سٹی ءِ میان ءَ بوتگ کہ ھردو ٹیم دو دو گول ءَ دیمیگ بوتگ انت –

ھردو ٹیمانی لیبیاں جوانی ءَ گوازی کنان ءَ ساؤتھ امپٹون ءِ لیبی جے.بیڈنارک ءُ سی.آڈمس ءَ یک یک گول ءِ اسکور کتگ وھدیکہ لیسسٹر لیبی جے.ایونس ءُ جے.میڈیسن ءَ ھم یک یک گول ءِ اسکور کتگ ءُ ھردو ٹیم دیمیگ بوتگ انت –

وولوز ءُ برنلی میان ءَ بوتگیں دومی گوازی ءَ ھم ھردو ٹیم دیمیگ بوتگ انت – ھردو ٹیمانی میان ءَ ھچ گول اسکور کنگ نہ بوتگ –

سیمی گوازی وٹفورڈ ءُ چیلسیا ءِ میان ءَ بوتگ کہ وٹفورڈ ءِ نیمگ ءَ چہ یک گول ءِ اسکور کنگ بوتگ – چیلسیا ءِ لیبیاں جوانی گوازی کنان ءَ دو گول اسکور کتگ ھردو گولانی تہ ءَ یک گول ءِ ایم.موؤنٹ ءُ دومی گول ایچ.زئیچ ءَ داتگ انت – وٹفورڈ نیمگ ءَ اسکور کنگ بوتگیں گول وٹفورڈ ءِ لیبی ای. بوناوینچر ءَ داتگ –

پریمئیر لیگ ءِ چارمی گوازی ویسٹ ہام ءُ برائیٹون ءِ میان ءَ بوتگ کہ ھردو ٹیم یک یک گول ءَ دیمیگ بوتگ انت – برائیٹون ءِ نیمگ ءَ چہ این.ماؤفے ءَ گول اسکور کتگ ویسٹ ہام ءِ نیمگ ءَ چہ ٹی.سوسیک ءَ گول اسکور کتگ –

لیورپول ءُ ایورتون ءِ میان ءَ بوتگیں پنچمی گوازی ءَ لیور پول ءَ ایورٹون ءِ دیم ءَ چار گول اسکور کتگ گوازی وتی نام ءَ کتگ وھدیکہ ایورٹون ءِ نیمگ ءَ چہ یک گول ءِ اسکور کنگ بوتگ –

لیورپول ءِ نیمگ ءَ چہ ڈی.جوٹا ءُ جے.ہینڈرسن ءَ یک یک گول ءِ اسکور کتگ وھدیکہ ایم.سالھ ءَ دو گول اسکور کتگ گوازی وتی نام ءَ کتگ – ایورٹون ءِ گول اسکورر لیبی ڈی گرے بوتگ-

پریمئیر لیگ ءِ ششمی گوازی آسٹون ویلا ءُ مانچسٹر سٹی ءِ میان ءَ کنگ بوتگ کہ مانچسٹر سٹی ءَ دو پہ یک گول ءَ باج برتگ گوازی وتی نام ءَ کتگ –
آسٹون ویلائے نیمگ ءَ چہ یک گول ءِ اسکور کنگ بوتگ کہ آسٹون ءِ لیبی او.وٹکنس ءَ داتگ وھدیکہ مانچسٹر ءِ لیبی آر.دیاس ءُ بی.سِلوا یک یک گول ءِ اسکور کتگ گوازی وتی ٹیم ءِ نام ءَ کتگ –

بلوچستان ءِ تیابدپی شھر گوادر ءَ حق دو تحریک ءِ زھرشانی نندانک نامی ئیں جاہ وائی چوک ءَ مولانا ھدایت الرحمان ءِ سروکی ءَ مروچی ھژدھمی روچ ءَ سر بیتگ –

گوستگیں شپ ءَ سرکاری کمیٹی ءِ آیگ ءَ پد حق دو تحریک ءِ سروک مولانا ھدایت الرحمان ءَ نندانک ءِ مردمانی دیم ءَ گپ کنان ءَ گوشتگ کہ نی ھچ وزیر ءَ گوں گپ ءُ تران نہ بیت ابید سروزیر ، چیف سیکریٹری ءُ کورکمانڈر ءَ اے مردم کاینت مئے لوٹانی سر ءَ گپ ءُ باوست کن اَنت داں ھما وھد ءَ گڑا ما وتی دلجمیں شَور ءَ کرت کن ایں –

دیمتر ءَ آئی ءَ گوشتگ کہ ما ھپتگے ھم اشاں دات نہ کن ایں اگاں ھپتگے ءِ تہ ءَ کاراں کن اَنت بلے مئے نندانک ھلاس نہ بیت آ برجاہ بیت ما چار ایں آ چُنت لوٹاں سرجم کن اَنت-

مولانا ھدایت الرحمان بلوچ ءَ گوشتگ کہ باندا بزانکہ دو دسمبر ءُ کوسٹل آئی وے پنچ جاگہ اورماڑہ ، پسنی ، کُنڈملیر، سُر ءُ گڈانی ءِ ھند ءَ بند کنگ ءُ زھرشانی کنگ بیت بلے ایکسپریس وے بند کنگ نہ بیت ھمے ھاتر ءَ کہ ھکومتی کمیٹی ءِ اتکگیں وزیراں گاڑیانی یل کنائینگ ءِ لوٹ منّ اِتگ ءُ مارا باور کنائینتگ کہ باندا گاڑیاں یل کن اَنت آیانی اھترام کنگ ءِ ھاتر ءَ ایکسپریس وے بند کنگ ءَ مھتل کن ایں-

مولانا دیمتر ءَ گوشتگ کہ باندا مئے زمہ دار بلوچستان شھر گوادر ، پنجگور ءُ تربت ءَ وانگجاہ یا نادُراھجاہ ءُ دگہ جاگھاں ھمینچو چیک پوسٹ ھست اَنت آیانی لِسٹ ءَ باندا شنگ کنگ بیت ءُ ھمے چیک پوسٹ مئے نندانک ءِ پادایگ ءَ ساری پاد بیا اَنت ، باردڑ پچ بہ بیت، ٹرالر چہ تیاب ءَ در کنگ بہ بنت ، ھما گاڑی ءُ لانچ کہ کوسٹ گارڈ ءَ گپتگ اَنت آ یل کنگ بہ بنت گُڑا اشی ءَ پد نی ما گپ جنگ ءَ ساڑی ئیں ھپتگے بہ بیت یا ماھے دانکہ مئے ھاسیں لوٹ سرجم کنگ نہ بوت اَنت ما وتی نندانک ءَ برجاہ دار ایں –

زانگ بہ بیت حق دو تحریک ءِ نندانک ءَ ھبدہ روچ گوازینتگ ءُ ھژدھمی روچ ءَ سر بیتگ گوستگیں ماہ ءِ پانزدہ نومبر ءَ برجاہ بوتگ دانکہ مروچی انگت برجاہ ءَ اِنت ءُ ھکومتی کمیٹی نیمگ ءَ چہ مروچی پد ءَ ظھور بلیدی ءُ لالا رشید ءُ دگہ لھتے مردمانی ھمراھی ءَ حق دو تحریک ءِ نندانک جاہ ءَ اَتکگ ءُ سر بوتگ اَنت ءُ ظھور بلیدی ءَ اے گپ باور کنائینتگ کہ باندا الّم گاڑیاں یل کنائین ایں بلے دو روچ ساری ھم ظھور بلیدی ءُ لالا رشید ءِ ھمراھی ءَ نندانک جاہ ءَ اَتکگ ءُ سر بوتگ اِتاں گوں مولانا ھدایت الرحمان بلوچ گپ ءُ تران کنگ ءَ پد آ دیوان سوبین نہ بوتگ ءُ واتر شتگ اَنت مروچی ھم چُشیں دیوان دیم ءَ برگ نہ بوتگ تھنا گاڑیانی یل کنائینگ ءِ لوٹ سرجم کنگ ءِ باور کنائینتگ-

زانگ بہ بیت دو روچ ءَ ساری تیاب دپی شھر گوادر ءَ زالبولانی یک بلاھیں روانکے کشگ بوتگ اَنت اے روانک ءِ تہ ءَ مزنیں کچے ءَ چُک ءُ زالبولاں بھر زرتگ اَت-

گوادر ءِ راجدپتر ءِ تہ ءَ اے مستریں روانک گوشگ بیگ ءَ اِنت کہ زالبولاں اے کچ ءَ پہ وتی ھکانی ھاتر ءَ روانک کش اِتگ-

بلوچستان ءِ راجدانی شال ءِ سمنگلی دگ ءَ، بورڈ کارگس ءِ نزیک ءَ ناشناسیں سلاہ بندیں مردماں پولیس ءِ اولاک ءِ سر ءَ تیر گواری کُتگ کہ اِشی سوب ءَ دو سپاھیگ ٹپی بیتگ اَنت۔

اھوالانی رد ءَ ھوالدار برھان دین ءَ ھوار دو مردم ٹپی بیتگ اَنت کہ اَے زوت ھسپتال ءَ برگ بیتگ اَنت۔

ایس ایچ او صدر ءِ ردءَ اُرش کار موٹر سائیکل ءَ سوار بیتگ اَنت۔ اے وئیل سمنگلی دگ ءَ بورڈ کارگس ءِ نزیک ءَ دیما اَتکگ۔ پولیس ءَ سرجمیں ھند انگیراں کُتگ ءُ اُرش کارانی درگیجگ بندات کُتگ۔

وئیل ءَ پد شھر ءِ پُترگی ءُ درآیگی راہ بندگ بیتگ اَنت ءُ ترندیں پَٹ ءُ پول بندات کنت بیتگ۔

چار شمبے ءِ روچ ءَ بلوچستان ءِ بنجاھی شھر شال ءَ پریس کلب ءِ دیم ءَ بیگواھیں محمد عامر ءِ گوھار ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ ھمراھی ءَ پریس کانفرنس کنان ءَ گوشتگ کہ منی برات عامر ء محمد اکبر ھمے سال ءِ بیست ءُ سَے نومبر ءِ شپ ءَ بلوچستان ءِ دمگ لسبیلہ گڈانی ءَ ھب پٹرول پمپ ءِ سر ءَ پولیس کارمنداں دزگیر کنگ ءَ پد لس پوشاکیں چیریں ادارھانی کارمندانی دست ءَ داتگ –

آئی ءِ گوشگ ات کہ منی برات آوار جنی ءَ پد ھماھیں بیگواہ انت مارا وتی برات ءِ درگت ءَ ھچ وڑیں سرپدی دیگ بوگ ءَ نہ انت –

آئی ءِ گُشگ ات کہ اگاں منی برات کُتکار انت گڑا پولیس والھاں بگیر وارنٹ پرچا دزگیر کتگ؟

نازیہ اکبر ءَ پریس کانفرنس کنان ءَ دیمتر ءَ گوشتگ کہ آواران ءَ تُرس، جنگی جاور ھال ءُ گِسانی ماندارگ ءِ سبب ءَ ما سال دوھزار ءُ پانزدہ ءَ چہ اود ءَ لڈِتگ ءُ ھب چوکی ءَ اتکگ انت تاکہ اد ءَ وانگ ءُ روزگار پہ ما ارزانتر بہ بنت بلے اد ءَ ھم مئے برات زورانسری آوارجنی آماچ کنگ بوتگ – منی برات ءِ سر ءَ اے وڑیں چونیں جُرمے بوتگ کہ چیریں ادارھانی کارمنداں آوار جتگ ءُ بیگواہ کتگ – اگاں منی برات کتکار انت گڑا آمیدگس ءَ پرچا آرگ نہ بیت اِنت؟

آئی ءِ گوشگ ات آئی برات ءِ آوارجنی ءَ تھنا ھمائی جند آوار جنگ نہ بوتگ بلے مئے کھول ءِ مالی کوش بوتگ پرچاکہ منی برات نادراھ بوگے جاورھالاں آئی ءَ تنگدستی ءُ لاچاری مزدوری کتگ بلے آئی ءِ آوار جنی ءَ مارا مالی، جانی ءُ ماژگی آماچ کنگ بوگ انت –

آئی ءِ گوشگ ات کہ منی برات ٹی بی ءِ نادراھی ءِ آماچ انت ٹی بی نادراھاں وتی درمان پہ وھد ورگی انت اگان اے میان ءَ نادراہ یک روچے وتی درماناں مہ وارت گڑا بندات ءَ چہ دوبر وتی کورس بندات کنگی انت اگاں ھما دمان ءَ آئی ءِ نادراھی الاج مہ بیت ٹی بی آئی ءِ مرگ ءِ سبب جوڑ بوت کنت –

آئی ءَ وتی برات ءِ یل کنگ ءِ لوٹ کتگ ءُ گوشتگ کہ اگاں آ کتکار انت کانودی وڈ ءُ ڈول ءَ دزگیر کنگ بہ بیت ءُ آمیدگس ءَ آرگ بہ بیت –

سربوتگیں ھالانی رِد ءَ بلوچ اسٹوڈنس ایکشن کمیٹی ءِ چیئیرپرسن ڈاکٹر صبیحہ بلوچ ءِ برات چہ ازیت جاھاں یل کنگ بوتگ ءُ گِس ءَ سربوتگ –

بساک ءِ چئیرپرسن ڈاکٹر صبیحہ بلوچ ءِ برات شاھمیر بلوچ ھمے سال ءِ نوزدہ جون ءُ آئی وارس مرتضٰی بلوچ ھمے سال ءِ بیست ءُ دو دسمبر ءَ زورانسری آوار جنگ ءُ بیگواہ کنگ بوتگ انت –

پاکستانی پوج ءِ دست ءَ زورانسری آوار جنی ءَ پد بیگواہ بوتگیں مرتضی زھری ھمے سال بیست ءُ سَے نومبر ءَ یل کنگ بوتگ گِس ءَ سربوتگ –

ڈاکٹر صبیحہ بلوچ ءِ برات ءُ وارس ءِ زورانسری آوارجنی ءِ بگیری ءَ نودربر گل ءُ بیگواھیں مردمانی پانکجنیں گل وی بی ایم پی ءَ زھرشانی ھم کتگ بیتگ –

زانگ بہ بیت بلوچستان ءِ شاھدبرجاہ ءَ چہ زورانسری آوار جنگ بوتگیں دو نودربر سھیل ءُ فصیح ءِ یل کنائینگے ھاتر ءَ نودربرانی زھرشانی ھنگت برجاہ انت –

بلوچستان شاھدربرجاہ ءِ مزنیں گیٹ دپ ءَ گوستگیں ھژدہ روچاں زھرشانی کنگ بوتگ بلے سرکاری کمیٹی ءُ زھرشانی کنوکانی میان ءَ نیاد ءَ پد شاھدبرجاہ دیم ءَ زھرشانی کنوکیں نودربراں وتی زھرشانی پانزدہ روچ ءِ واست ءَ ھلاس کتگ – زھرشانی کنوکانی گوشگ انت کہ پانزدہ روچ ءِ تہ ءَ نودربر زاھر کنگ نبوتاں گڈا پدا زھرشانی کنگ بیت اِنت –

نودربر فصیح بلوچ ءُ سھیل بلوچ گوستگیں ماھے اولی روچ ءَ شاھدربرجاہ ءَ چہ آوار جنگ ءُ بیگواہ کنگ بوتگ انت –

چین ءِ وزیر خارجہ ءَ گوادر ءَ چائنا ءِ بگیری ءَ بیوکیں زھرشانی دروگے گپ ئِے گوشتگ –

چین ءِ وزیر خارجہ ءِ جارکش ءَ ٹوئٹر ءَ ویڈیو کلپ ءِ شنگ کنان ءَ گوادر ءَ بیوکیں زھرشانی دروگے گپ ئِے –

چینی وزارت خارجہ ءِ رد ءَ سوشل میڈیا ءِ زور ءَ گوستگیں روچ ءَ لھتے گپاں زھرشانی ءِ دروگیں گپ شنگ کنگ بیتگ اَنت کہ آ رنگ دیگ بیتگ اَنت گوادر ءِ زر ءَ چائنیز ٹرالرنگ ءِ ھلاپ ءَ زھرشانی کنگ ءَ اَنت چُشکہ تچک ءَ اے رد اَنت –

آئی ءَ ٹاپار جتگ کہ گوادر ءَ ھچ چائنیز ٹرالر نیست اِنت اے گپانی تالان کنگ پاکستان چائنا کوریڈور ءِ وڑیں پروجیکٹسانی ھلاپ ءَ پندل اَنت –

آئی ءَ گُشتگ کہ چین گوادر ءِ دیمروئی ءُ گھتری ءِ واستا جھد کنگ ءَ اِنت –

زانگ بہ بیت پانزدہ نومبر ءَ گوادر ءَ پورٹ روڈ ءِ نزیک ءَ مولانا ھدایت اللہ الرھمان ءِ سروکی ءَ زھرشانی نندانک برجاہ اِنت- زھرشانی نندانک ءِ پلامرزی ءَ ھزارانی کچ ءَ زالبولاں روانکے کش اِتگ اَت-

سرکار ءَ زھرشانی ءَ نشتگیں مھلوک ءِ چار لوٹانی نوٹیفیکیشن شنگ کتگ اَنت بلے نندانک ءَ نشتگیں مھلوک آیانی اے گپ ءَ سِتک نہ اَنت –

مولانا ھدایت اللہ رھمان ءَ ٹی وی چینلے ءَ گپ کنان ءَ گوشتگ کہ بلوچستان ءِ سرکار سرجم ءَ بے سوب اِنت اے مردمانی دست ءَ ھچ نیست اِنت –

مولانا ءِ رد ءَ اگاں مئے لوٹ منّگ نہ بیت اَنت گڑا دو دسمبر ءَ گوادر کوسٹل ھائی وے ءُ پد ءَ سی پیک روڈ ءُ شال ءُ کراچی ءِ شھدگاں بند کنت –

گوستگیں ھپتگ ءَ لوٹانی سرجم نہ بیگ ءِ دروشم ءَ کوسٹل ھائی وے ءُ ایکسپریس وے ءِ بند کنگ ءِ جار جتگ اَت – بلے بلوچستان ءِ پتر ءِ سَے باسک سید احسان شاہ، میر ظھور بلیدی ءُ لالہ رشید بلوچ گوادر ءَ زھرشانی نندانک ءَ نشتگیں مردمانی گون ءَ گپ ءُ تران ءَ شتگ اِت اَنت ےُ چار لوٹانی منّ اِتگ اَنت ءُ نوٹیفیکشن شنگ کرتگ ءُ مولانا ھدایت الرھمان ءِ دست ءَ اش داتگ –

چار لوٹانی نوٹیفیکیشنز ءِ سرجم بیگ ءَ ابید ھم نندانک ءِ ھلاس نہ کنگ ءِ سر ءَ جستے ءِ پسو ءَ گوادر حق دو تحریک ءِ سروک مولانا ھدایت الرھمان ءَ برطانوی نشریاتی ادارھے ءَ گوں گوشتگ کہ نوٹیفیکیشن شنگ بیتگ اَنت آیانی سر ءَ ھچ امل کنگ نہ بیتگ –

آئی ءَ گُشتگ کہ مئے مستریں لوٹ اِنت آ زرکاری ءُ روزگار اِنت-

آئی ءَ گُشتگ کہ دوشمبے ءِ روچ ءَ اورماڑہ ءَ بلوچستان ءِ زری ھدا سِی ءَ داں چِل ٹرالر ماھیگ گرگ ءَ بیتگ اَنت ءُ مئے دمگی دریا وردانی دام اش بر اِتگ ءُ برتگ اَنت ئِے –

آئی ءَ گُشتگ سیمسری کار ءُ بار ءِ سر ءَ ھچ بدلی نیتکگ ءُ نوٹیفیکشن ءِ رد ءَ اود ءَ گر ءُ داری دمگدارانی دست ءَ دیگ بیت اِنت بلے داں انگت ءَ ایف سی ءِ دست ءَ اِنت ءُ ٹوکن سسٹم برجاہ اِنت-

آئی ءَ گُشتگ کہ مئے لوٹ ھمیش اَنت ٹوکن سسٹم سرجم ءَ ھلاس کنگ بہ بیت ءُ سیمسراں کار ءُ بار پیسری رنگ ءَ بہ بیت اِنت-