TBP Balochi

شائر: سلیم ناز

دی بلوچستان پوسٹ

جنگولیں پؔدا تئی یاتاں

لبزاں گوهر ءُ آیاتاں

سنگر مهکم اَت کوهانی

دیوان اَت مدام گوں براتاں

دنیا پهر کنت تئی نام ءَ

وش ءُ من گل ءُ شر شاتاں

هر کس پہ وتی باریگ ءَ

لانت بات لگور کم زاتاں

تو گون لاگریں بالاد ءَ

دژمن سر کت اَنت پریاتاں

جائؔو مشؔکے ءُ گیشؔکور ءَ

بدواهیں لگور ڈاه داتاں

ساڑا ناؔز زمین پرزداں

بات اِنت آپرین سد ماتاں

تربت سول سوسائٹی ءَ گوادر ءَ سرجمیں بلوچستان گیشیں پولیس لوٹ کنگ ءَ ایر جن ایں یک نیمگے مولانا ھدایت الرحمان بلوچ ءِ سروکی ءَ راجی جیڑھانی زورگ ءُ نندانک ءَ نندگ ءُ اشی ءِ سر ءَ ھکومت گپ ءُ تران کنگ ءَ اِنت دومی نیمگ شش ھزار نزیک ءَ پولیس کارندھاں سرجمیں بلوچستان ءَ چہ گوادر آرگ ءِ نوٹیفکیشن شنگ کتگ-

اشی ءَ چہ زانگ بیت ھکومت راج ءِ جمھوری ھک زھرشانی ءَ پولیس ءُ تاکت ءِ کارمرز ءَ ایرموش کنگ لوٹ اِیت بلے زانگ لوٹ اِیت کہ راجی توار تاکت ءِ زور ءَ ایرموش کُت نہ کنت ، مولانا ھدایت الرحمان بلوچ یک پردے نہ اِنت بلکیں سرجمیں مکران ءِ راج آئی ءِ ھمراہ ءَ اِنت ، اگاں گوادر ءَ نندانک سر ءَ پولیس ءِ کارمرز کنگ ءَ گُڑا جاور گیش نگیگی ءَ دیم ءَ شُت کن اَنت –

ھکومتی مردم یک نیمگے گپ ءُ تران کنگ ءِ جُھد ءَ اَنت دومی نیمگ ءَ گوادر ءَ شھر ءَ پولیس ءِ گیشی لوٹ کنگ اے گپ پدر اِنت کہ ھکومتی مردمانی نَیت ھراب اِنت ءُ آ تاکت ءَ کارمرز کنگ ءُ گوستانک ءِ ردیاں پد ءَ کنگ لوٹ اِیت ، تربت پریس کلب لوٹ کنت کہ ھکومت گوادر ءِ نندانک ءِ شریں وڑے ءَ بہ چار اِیت ءُ مولانا ھدایت الرحمان بلوچ راجی ءُ راھبندی لوٹاں زوت ءَ زوت آئی ءِ سر ءَ چست ءُ ایر بہ من اَنت امن ایمنی ءِ ھراب مہ کنت –

بلوچ اسٹوڈنس ایکشن کمیٹی ھزدار ھنکین ءِ جنرل باڈی نیاد گوستگیں ھنکینی سرکماش خیرجان بلوچ ءِ سروکی ءَ برجاہ دارگ بوتگ ءُ گچینی مھمان بنجاھی پتر ءِ باسک رفیق بلوچ بوتگ –

نیاد ءِ بنگپ پجار، بنجاھی سرکیولر، ھنکین ءِ گوستگیں ھال، شرگداری، تنظیمی امور، دمگی ءُ میان استمانی جاور ھالاں پد آؤکیں کارانی تہ ءَ نوکیں کابینہ گچین کنگ بوتگ اَنت کہ حیربیار بلوچ ھنکینی سرکماش ءُ سلمان اشرف جنرل سیکرٹری گچین کنگ بوتگ انت –

نیاد ءَ تران ءَ کنان ءَ بنجاھی پتر ءِ باسک رفیق بلوچ ءِ گوشگ ات کہ بلوچ اسٹوڈنس ایکشن کمیٹی ءِ بندات ءَ بگر تاں روچ ء مروچی آئی ءِ مول نودربرانی زانشت دیمروئی بوتگ – اداراھانی رویش ءِ دیمروئی ءَ ما بلوچ راج ءِ تہ ءَ ادارھانی شری ءَ دیم ءَ آؤرت کنیں – مروچی اے گپ ءَ ما پہ پھری گوشیں کہ بساک ءِ سنگتانی زانشتی جھد ءِ سبب ءَ ما بلوچ چاگرد ءِ تہ ءَ ادارھانی رویش ءِ دیمروئی یک ھد ءَ تاں سوبمند بوتگ انت بلے اے مار ءَ چد ءُ گیشتر کنگی انت ءُ چاگرد ءِ تہ ءَ ادارھانی شری ءِ دیمروئی گیش ءَ چہ گیش جھد کنگی انت ایشی ءِ بنداتی سبب ھمیش انت کہ چاگرد بس ادارھانی بنیاد ءَ دیم ءَ شُت کن انت آ راجداری ءِ ادارہ بہ بنت یا راجمانی ءُ چاگردی –

مروچی گوستانک ءِ اے پیسلہ ءَ ورنایانی کوپگ ءَ بازیں زمہ داری ءِ داتگ بلے ھمود ءَ لھتے ادارھاں کول کتگ کہ بلوچ راجمان ءَ تھاری دیمپان بہ کن انت گڑا مار ءَ نودربراں ھم بلوچ راجمان تھاری ءِ تہ ءَ چہ درکنگ ءِ جھد تیز کنگی انت- مروچی بلوچ چاگرد درسیں بنکی لوٹاں چہ زبھر انت – وانگ جاندراھی دو ھنچیں بنکی لوٹ کہ آھانی بوگ انسانی زند ءِ ھاتر ءَ المی انت بلے بلوچستان ءِ زانشتی درسانی دیم پدر انت زانشجاھاں نودربرانی زورانسری آوارجنی یا ھما نودربرانی یل کنائینگ ءِ ھاتر ءَ جھد کنگ ءُ دومی نیمگ ءَ گوستگیں بازیں ھپتگاں سرجمیں بلوچستان ءِ نادراھجاھانی بند بوگ ءُ ینگ ڈاکٹرانی زندانی پدردی انت – استان ءِ تہ ءَ وانگی ءُ جاندراھی ادارہ پیسر ءَ چہ ھما ھسابی انت ءُ آھانی بند بوگ ءُ سرکار ءِ بے وسی ادے مردماں گیشتر اڑ ءُ جنجالانی آماچ کنگ انت –

آئی ءَ تران کنان ءَ گوشتگ کہ مار ءَ وتی ورناھانی زانت ءِ درگت ءَ جھد برجاہ دارگی انت- اسٹڈی سرکل ءُ کتاب وانگے دیمروئی دیگ ءَ سنگتانی جھد ستا کرز انت – ھزدار ءِ تہ ءَ ادارہ ءِ پھال کنگ ءِ ھاتر ءَ سنگتاں گیشتر جھد کنگ لوٹ ایت ءُ ادے زانشتی جیڑھاں دیم ءَ آرگ ءَ ھوار آھانی پھال کنگ ءَ املی گامگیج زورگ انت –

نیاد ءَ ھنکینی اھوال، شرگداری، تنزیمی امور، دمگی ءُ میان استمانی جاور ھالانی سر ءَ باوست کنگ ءَ پد آؤکیں کارانی ھاتر ءَ بازیں پیسلہ زورگ بوتگ ءُ گوستگیں کابینہ وھد ءِ سرجم بوگ ءَ پد نوکیں ھنکینی کابینہ ءِ گچین کنگ بوتگ کہ آئی ءِ تہ ءَ حیربیار بلوچ ھنکینی سرکماش، ڈاکٹر احمد بلوچ کمک سرکماش، سلمان اشرف جنرل سیکرٹری، بالاچ بلوچ ڈپٹی جنرل سیکرٹری ءُ علیم مرزا ھنکینی انفارمیشن سیکرٹری گچین کنگ بوتگ انت –

بنجاھی پتر ءِ باسک رفیق بلوچ ءَ نوک گچین بوتگیں ھنکینی کابینہ سوگند داتگ ءُ ھنکینی اگدہ داراں آھانی سرجم کنگ ءِ کول کتگ نیاد ءِ گڈی جار پرینتگ –

بلوچستان ءِ تیاب دپی شھر گوادر ءَ وتی لوٹانی حق ءِ ھاترءَ برجاھیں نندانک 19می روچ ءَ ھم برجاہ اِنت۔

ھمے سال ءِ 15 نومبر ءَ گوادر شھر ءَ بندات بیتگیں نندانک کہ “گوادر حق دو تحریک” ءِ نام دیگ بیتگ اَت آئی نام مروچی بدل کنگ ءُ “بلوچستان کو حق دو تحریک” ایر کنگ بیتگ۔

نندانک ءَ گوادر دمگ ءِ پجیگ ءَ بلوچستان ءِ دگہ ھند ءُ دمگانی مردم ھم ھوار اَنت۔

نندانک ءِ ھاسیں لوٹ کہ اِشانی تہءَ بلوچ زرءَ گیر قانودی ٹرالرنگ ءِ ھلاسی ءَ ھوار سیمسری باپار ءِ پچ کنگ ءُ گیر المی ایں پاکستانی لشکریانی چیک پوسٹانی ھلاسی ءُ گیشتریں بلوچ دمگانی ھاسیں جیڑہ اَنت ھم۔

گوں نندانک ءَ تران کنان ءَ مولوی ھدایت الرحمن بلوچ ءَ گُشتگ کہ بلوچستان ءِ آسراتیانی لُٹ ءُ پُل کنگ ءِ پرمان نہ دئیں ءُ اے نندانک داں وتی لوٹانی منارینگ ءَ تاں برجاہ اِنت۔

آئی ءَ گُشتگ کہ مارءَ وتی پجار، آسراتی ءُ اگبالانی لوٹگ ءِ پشدءَ ھندوستان ءِ ایجنٹ گُشگ بیت، ایجنٹ ھمایاں کہ آ ادے آسراتیاں لُٹگ ءَ اَنت۔

آئی ءَ گُشتگ کہ ادے جاھمنندانی کم شرپی کنگ بیتگ چہ چین ءَ یک ورگ گرادوک ءِ گوادر ءَ کئیت گُڑا ادا سرجمیں دگ بند کنگ بنت۔

آئی ءَ گُشتگ مئے ماھیگیراں زرءَ روگ ءَ نئیلنت۔

مولوی ھدایت الرحمن بلوچ ءَ گُشتگ کہ آیوکیں آدینگ ءَ پاکستان ءِ تاریخ درستاں مستریں روانک کُشگ بیت اِنت ءُ ما اے پدر کنگ لوٹیں کہ بلوچستان ءِسرءَ دُز ءُ ڈُنگانی قوضہ ءَ نہ من ایں۔

شال ءَ چہ زورانسری آوار جنگ ءُ بیگواہ کنگ بوتگیں نصیر احمد بلوچ ءِ بلوچ ءِ برات ءَ بیگواھیں مردمانی پانکجنیں گل وائس فار بلوچ مسنگپرسنز ءِ بنجل ءَ اتکگ ءُ وتی بیگواھیں برات ءِ زاھر کنگے لوٹ کُتگ – 

شال ءِ جاھمنند ریھان بلوچ ءِ رِد ءَ آئی برات ھمے سال ءِ بیست ءُ سَے ستمبر ءَ پاکستانی پوج ءُ چیریں ادارھانی کارمنداں شال منو جاندگ ءِ سر ءَ زورانسری آوار جتگ ءُ بیگواہ کُتگ –

بیگواھیں نصیراحمد ءِ برات ءِ رِد ءَ نصیر احمد بلوچ نودربر ءِ بوتگ ءُ درمان جاہ ءَ کار ءَ بوتگ –

ریھان بلوچ ءَ چہ سرکار ءُ انسانی ھکانی ادارھاں چہ لوٹ کُتگ کہ نصیر احمد زاھر کنگ بہ بیت ءُ آمیدگس ءَ آرگ بہ بیت آئی ءَ ھک دئیگ بہبیت اِنت –

کیلکور ءَ سی پیک ءِ پھازگی پوجی پانگس ءِ سر ءَ اُرش کتگ – بیبگر بلوچ

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ پنجگور ءَ پوجی پانگس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں روچ ءَ سھب ءِ ھپت ءَ پنجگور ءِ دمگ کیلکور ابراھیم میتگ ءَ سی پیک دگ ءِ پھازگ ءِ ھاتر ءَ برجاھیں زورگیریں پاکستانی پوج ءِ پانگس ءِ سر ءَ دور جنگیں ءُ وتکاریں سلاھانی گوم ءَ اُرش کُتگ –

جارکش ءَ گوشتگ کہ سرمچارانی اے اُرش ءَ زورگیریں پوج ءِ دو کارمند مُرتگ ءُ بازینے زدگ بوتگ –

بیبگر بلوچ ءَ گڈسر ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

سربوتگیں ھالانی رِد ءَ بلوچستان ءِ دمگ پنجگور ، دالبندین ءُ دکی ءَ ھرنائی تیرگواری ءُ دگہ وئیلاں دہ سالی ئیں جنکوے ءَ ھوار سَے مردم بیران ءُ شش زدگ بوتگ اَنت-

گیشیں ھالانی رِد ءَ پنجگور ءَ دو جتائیں تیرگواری ءِ وئیلاں یک مردمے بیران ءُ یکے زدگ بوتگ –

اھوالکار ءِ رِد ءَ تیرگواری ءِ وئیل پنجگور ءِ دمگ گرمکان ءُ بونستان ءَ دیم ءَ اتکگ انت – گرمکان ءِ وئیل ءَ بیران بوتگیں مردم ءِ پجار منظور ء شفیع نام ءَ چہ بوتگ – آئی ءِ کھول ءِ رِد ءَ منظور ءَ وت ءَ وت جتگ، آ ماژگی نادراھی آماچ بوتگ ءُ نشہ ءِ ھم کتگ بیتگ –

دومی وئیل بونستان ءَ بوتگ کہ تیرگواری ءَ چہ ندیم ء بالاچ نامیں مردمے زدگ بوتگ – وئیل ءِ درگت ءَ تنی وھدی ھچ وڑیں سرپدی نہ رس اتگ –

ھمے وڑ دالبندین ءِ دمگ سوتگان ءَ گاڑی ءِ چپی بوگ ءَ دہ سالی ئیں جنکوے بیران بوتگ –

اھوالکار ءِ رِد ءَ وئیل آماچ بوتگیں زھگ اولسر ءَ زدگ بوتگ مردماں نادراھجاہ ءَ سرکتگ بلے آئی ءَ ٹپانی درد نہ سگتگ ءُ بیران بوتگ –

دگہ وئیلے بلوچستان ءِ دمگ دکی ءَ لیز دگ ءِ نزیک ءَ دیوال ءِ کپگ ءَ چہ دو سالی ئیں جنکوے زدگ بوتگ – نادراھجاہ ءِ بنشون ءِ رِد ءَ گونڈو ءِ پجار بی بی خاتمہ ء شائستہ خان انت آ دکی نادراھجاہ ءَ سرکنگ بوتگ ءُ ٹپانی درمان کنگ ءَ پد شال ءَ دیم دیگ بوتگ –

زرات ھرنائی کراس ءِ نزیک ءَ شال ءَ آؤکیں مساپر کشیں گاڑی ءَ گوں ٹرالرے ءَ ڈیک وارتگ یک مردمے بیران دگہ باز زدگ بوتگ اَنت – لیویز ءِ رِد ءَ بیران بوتگیں مردم ءِ پجار شربت خان ءِ نام ءَ چہ بوتگ –

اشی ءَ ابید کچلاک ءَ دگ ءِ سر ءَ وئیل ءَ دو مردم زدگ بوتگ انت نادراھجاہ ءَ سر کنگ بوتگ انت –

پاکستان ءِ اُستان ءِ پنجاپ ءِ ھند سیالکوٹ ءَ شھریاں مُچی ءِ ھمراھی ءَ توھین مذھب ءِ بھتام ءَ اسپورٹس ویئر جوڑ کنوکیں انڈسٹری سری لنکن منیجر کُشگ ءَ پد ماندارگ بیتگ – اے وئیل مروچی آدینگ ءِ روچ ءَ سَے دسمبر ءِ سھب ءَ پیش اتکگ –

وئیل سیالکوٹ ءِ دمگ وزیر آباد دگ ءَ پیش اتکگ کہ اود ءَ بازیں کَچے ءَ شھریاں درملکی منیجر بے کساس لَٹ ءُ کُٹانی نشانگ کتگ ءُ پد ءُ بیرانی ءَ پد دگ ءِ میان ءَ مانداشتگ –

وئیل ءِ ویڈیو سوشل میڈیا ءَ شنگ بیتگ، کہ چریشی ءَ گندگ بیت یک سُچوکیں لاشے ءِ نزیک ءَ مھلوک بازیں کچے ءَ مردم جاڑیگ اَنت –

سوشل میڈیا ءَ شنگ بیتگیں لھتے ویڈیواں مردمانی گپاں اشکنگ بیت اِنت آ اے گپ ءُ جنگ ءَ اَنت آ فیکٹری ءِ کار کنوک اَنت، اود ءَ درملکی بستار جنرل مینجری ءِ کار ءَ بیتگ – فیکٹری ءِ کار کنوکانی رد ءَ آدینگ ءِ روچ سری لنکن شھری ءَ لھتے پاکیں تاکانی توھین کتگ ءُ چریشی ءَ اود ءَ مُچیں مردم برانز گپتگ ءُ سری لنکن شھری ءِ سر ءَ اُرش اش کرتگ –

لھتے ویڈیوانی تہ ءَ گندگ بیت اِنت کہ شھریانی مُچی ءَ سری لنکن شھری جتگ ءُ مانداشتگ، ویڈیوانی تہ ءَ لاش گندگ بیت اِنت ءُ آئی ءِ کَش ءُ گوراں بازیں مردم گندگ بنت –

سوشل میڈیا ءَ شنگ بیتگیں ویڈیوانی تہ ءَ گوشگ بیگ ءَ اِنت درملکی منیجر ءِ کُشگ ءَ پد مھلوک ءَ اوگام جتگ –

یونائیٹڈ بلوچ آرمی ءِ جارکش مرید بلوچ ءَ ناشناسیں جاھے ءَ شنگ کتگیں درشان ءِ تہ ءَ گوشتگ کہ گوستگیں روچ ءَ پنجگور شھر ءَ زورگریں پاکستانی ریاستی ڈیتھ اسکواڈ ایم آئی کارندہ یاسر شاپاتانی ء فیض محمد ءِ سر ءَ بلوچ سرمچاراں اُرش کتگ ءُ اے اُرش ءِ زمہ واری ءَ یونائیٹڈ بلوچ آرمی منّ اِیت-

جارکش ءَ گوشتگ کہ یاسر شاپاتانی ء فیض محمد پاکستانی ریاستی ایجنسی ایم آئی ءِ ھاسیں کارندہ محبوب شاپاتانی دست راست یاسر شاپاتانی بلوچ سیاسی کارندھانی آوار جنگ ءُ شھیدی ءَ ھوار اِنت-

آئی ءَ گْوشتگ کہ یاسر شاپاتانی پاکستانی فوج ءُ ایم آئی چیردستی ءَ وتی دمگ ءِ کش ءُ گوراں دُز ءُ ڈُنگی ، چاگردی سلکاریاں تچکی ءَ ھوار اَنت یونائیٹڈ بلوچ آرمی ءِ اے وڑیں مردماں ھچ موکل ندنت کہ آ پاکستانی فوج ءُ ایم آئی ، آئی ایس آئی ءِ چیردستی ءَ چہ وتی بلوچ راج سر ءَ زُلم بہ کن اَنت یاسر شاپاتانی وڑیں سرجمیں مردم مئے نشانگ ءَ اَنت-

مرید بلوچ ءَ گْوشتگ کہ بلوچ راج ءَ گوں دزبندی اِنت کہ بلوچ راج ریاستی ڈیتھ اسکواڈ کارندھاں چہ گستا بہ بنت اے وڑیں مردمانی سر ءَ بلوچ سرمچارانی گیش جنگ برجاہ بنت

مولانا عبدالحق مئے رھشون بیتگ، چہ مارا گیشتر کس آئی ءِ زانگ ءِ ٹاہ دات نہ کنت، من مولانا عبدالحق بلوچ ءِ رند پدی ءَ کنگ ءُ بلوچانی لوٹانی ھاتر ءَ جد ءُ جھد کنگ ءَ اَنت، گوادر حق دو تحریک ءِ سروک مولانا ھدایت الرحمان

چاگردی رسانکدر ءِ تندجاہ سوشل میڈیا ءَ گوستگیں لھتے روچاں چہ یک باوستے برجاہ اِنت، اے باوست گوادر حق دو تحریک ءِ سروک مولانا ھدایت الرحمان ءِ نیمگ ءَ چہ شراب خانھانء سر ءَ بندش ءِ لوٹ ءَ پد دیم ءَ اَتکگ۔ ھمے رد ءَ گوستگیں روچ ءَ امریکہ ءَ جھمنندیں اھوالکار ملک سراج اکبر ءَ لھتے ٹوئیٹ کُتگ ءُ وتی لیکہ ایر کُتگ اَنت ۔

ملک سراج اکبر ءَ وتی ٹوئیٹ ءِ تہ ءَ گُشتگ کہ سرکار مولانا ءِ لوٹاں منگ ءَ اِنت۔ مولانا بائد اِنت سیکولر بلوچانی لوٹاں بہ من اِت۔ شراب خانہ والا لوٹ ءَ پد ءَ بہ زیر اِت۔ شراب ورگ ھرکسی وتی جیڑہ اِنت۔ ڈیھہ (مذھب) مردمانی ورگ ءُ نوشگ ءِ جیڑھانی تہ ءَ دزمانجنی مہ کن اَنت۔ شراب خانہ تھنا یک بھانہ اِنت، باندا جنکانی وانگ، ءُ مذھبی اقلیت نشانگ بنت۔

ملک سراج اکبر ءِ ٹوئیٹ ءَ گوں ھمراہ داری کنان ءَ بلوچ اھوال کار شھمیر بلوچ ءَ ھم چہ مولانا ءَ جُست کُتگ ءَ گُشتگ کہ زاناں مولانا ھدایت الرحمان صاحب گوادر ءِ جیڑہ شراب خانہ اَنت؟ تئی سجھیں لوٹ راست اَنت، آ تھنا تئی نہ بلوچ مھلوک ءِ لوٹ اَنت۔

شراب خانہ ءِ بند کنینگ ءِ لوٹ ءُ لوٹ درگت ءَ سرکار ءَ نبشتہ ھم کنائنگ، تُرس ودی کنگ کہ باندا دگہ مذھبی لوٹ اتک کن اَنت۔

ملک سراج ءُ شھمیر بلوچ ءَ پسہ دیان ءَ مولانا ھدایت الرحمان ءَ جُست کُتگ زاناں ما بلوچ نہ اِنت یا مئے سیادی گوں ھمے سرڈگار ءَ نہ اِنت؟ کمو مارا ھم بلوچ اگاں ھمے سرڈگار ءَ چہ بیگ ءِ حق بہ دے اَنت۔

آئی ءَ گُشتگ کہ اے لوٹ مئے یک درزن ءَ چہ گیش لوٹاں چہ یکے ءُ تحریک ءِ سروک ءُ باسکاں گوں شور ءُ سلاہ ءَ چہ بیتگ اَنت، کہ درست بلوچ اَنت۔ مولانا ءَ دیمتر ءَ گُشتگ شراب ءِ گیش ھمک وڑیں منشیات ءِ بندش ءِ ھلاپ ءَ اَنت۔

بلوچ اھوالکار کئیا بلوچ ءَ شراب ءِ بندش ءِ درگت ملک سراج اکبر ءِ ٹوئیٹ ءِ پسہ ءَ جُست کُتگ کہ ترا چہ ابید دگہ چنچو سیکولر مردماں شراب خانھانی پچ کنگ ءِ لوٹ کُتگ ؟ آئی ءَ گُشتگ من ھم شراب خانھانی سر ءَ بندش ءِ حق ءَ نہ آں بلے بائد اِنت آیانی ھاتر ءَ جوانیں رھبند ءِ آرگ بہ بیت۔

آئی ءَ دیمتر ءَ گُشتگ مولانا ءَ اے لوٹ گوادر ءَ ودوکیں چاگردی جرمکاری ءُ بے ایمنی ءِ وئیلانی پُشدر ءَ کُتگ –

مولانا ھدایت الرحمان ءَ شھمیر بلوچ ءِ دگہ ٹوئیٹے ءِ کہ شھمیر بلوچ ءَ ھدا مرزی ئیں مولانا عبدالحق بلوچ ءِ درور دیان ءَ گُش ایت کہ “ درستاں پیسر مولانا عبدالحق یک بلوچ راجدوستے بیتگ اے گپ ءَ ابید کہ آئی ءِ سیادی گوں جماعت اسلامی ءَ بیتگ”۔ آئی ءَ مدام بلوچ اگبالانی، مڈیانی ءُ زر ءِ ھاتر ءَ گپ کُتگ۔ آئی ءَ مذھبی لیکہ دمگ ءِ تہ ءَ نیاورتگ اَنت بلے لھتے مردماں تُرس اِنت کہ تئی شراب خانھانی بند کنگ ءِ لوٹ دگہ مستریں شئے ءِ نیمگ ءَ رؤت”۔

مولانا ھدایت الرحمان ءَ وتی ٹوئیٹ ءِ تہ ءَ گُشتگ کہ، برادر شھمیر مولانا عبدالحق مئے رھشون ءُ مئے سوجکار بیتگ ءُ ھچ کس اے ٹاہ ءَ دات نہ کنت کہ آ مولانا ءَ چہ مارا شرتر زانت کنت۔ ما ھمائی ءِ رندپد ءَ روگ ءِ اِنت ءُ بلوچ اگبال، مڈی ءُ زر ءِ گپءَ کنگ ءَ اِنت۔

ابید چہ مولانا ءَ مزنیں کساسے ءَ لس مردم ھم مولانا ءِ گپانی ھمراہ داری کنگ ءَ اَنت، ءُ ھمے پیم ءَ دومی نیمگ ءَ لھتے مردم اے تُرس ءِ درشانی ءَ کنگ ءَ اَنت کہ بیت مولانا ھدایت الرحمان ءِ جُنز دیمترا نیکراھی دروشمے زیر ایت۔

زانتکارانی رد ءَ مردم بزگ اَنت، آیانی سر ءَ زوراکیانی کساس ءَ ھد نیست، مھلوک نوں بیزار اَنت، پہ آیاں اے گپ مانا نہ داریت آیانی رھشونی یک مُلاھے کنت، راجدوستے کنت، کمیونسٹ اگاں سوشسلٹے کنت مھلوک وتی جیڑھانی گیش ءُ گیوار ءِ ھاتر ءَ یک رھشونے شوھازگ ءَ بیتگ مروچی آ مھلوک ءِ چماں مولانا ھدایت الرحمان اِنت۔

زانتکار راجدوستیں گلاں ایراد گران ءَ اے ھم گُشگ ءَ اَنت کہ ھمائیں آجوئی لوٹوکیں سیاسی گلانی سر ءَ بندش لگ اتگ ھمائیں آجوئی لوٹوکیں سیاسی گل سر زاھری ءَ جھد کُت کنگ ءَ نہ اَنت، پارلیمانی راجدوستاں مھلوک دل پروش کُتگ پرچہ کہ آیانی نیمگ ءَ ھچ گام زیرگ نہ بیتگ۔ پمیشکا مھلوک مروچی مولانا ءِ ھمراہ اَنت۔