TBP Balochi

یوروپئین پریمئیر لیگ فٹبال گوازی برجاہ انت ءُ گوستگیں شپ ءَ ھشت ٹیمانی میان ءَ گوازی کنگ بوتگ، ھشتیں ٹیمانی تہ ءَ ویسٹ ھام ءَ چیلسیا ءِ دیم ءَ دو پہ سَے ، نیوکاسٹل ءَ برنلی ءِ دیم ءَ یک، لیورپول ءَ وولوز ءِ دیم ءَ یک ءُ مانچسٹر سٹی ءَ وٹفورڈ ءِ دیم ءَ یک پہ سَے گول ءَ گوازی کٹیتگ وھدیکہ ساؤتھ ایمپتون ءُ برائیٹون یک پہ یک گولے ءَ دیمیگ بوتگ انت –

شمبے ءَ بوتگیں پریمئیر لیگ فٹبال گوازی ءِ اولی گوازی ویسٹ ھام ءُ چیلسیا ءِ میان ءَ بوتگ کہ ویسٹ ھام ءَ یک گولے ءَ چہ گوازی کٹیتگ – چیلسیا ءِ نیمگ ءَ چہ دو گول اسکور کنگ بوتگ کہ چیلسیا ءِ لیبی ٹی.سیلوا ءُ ایم.مؤنٹ ءَ داتگ انت وھدیکہ ویسٹ ھام ءِ لیبی ایم.لینزینی، جے.بؤون، اے ماسیوکو ءَ یک یک گولے اسکور کتگ وتی گوازی وتی ٹیم ءِ نام ءَ کتگ –

نیوکاسٹل ءُ برنلی ءِ میان ءَ بوتگیں دومی گوازی ءَ نیوکاسٹل ءَ یک گولے ءَ گوازی کٹیتگ وھدیکہ برنلی ءِ نیمگ ءَ چہ ھچ گول اسکور کنگ نبوتگ – نیوکاسٹل ءِ نیمگ ءَ چہ لیبی سی.ویلسن ءَ گول اسکور کتگ –

لیورپول ءُ وولوز ءِ میان ءَ بوتگیں گوازی ءَ لیور پول ءَ یک گول ءَ گوازی کٹیتگ وھدیکہ وولوز ءِ نیمگ ءَ چہ ھچ گول اسکور کنگ نبوتگ – لیور پول ءِ نیمگ ءَ چہ ڈی اوریگی ءَ گول اسکور کتگ –

پریمئیر لیگ ءِ چارمی گوازی ساؤتھ ایمپتون ءُ برائیٹون ءِ میان ءَ کنگ بوتگ کہ ھردو ٹیمانی لیبیاں جوانی ءَ گوازی کنان ءَ ھردو ٹیم یک یک گول ءَ دیمیگ بوتگ انت – برائیٹون ءِ نیمگ ءَ چہ لیبی این.مائوفے ءَ گول اسکور کتگ ءُ ایمپتون ءِ نیمگ ءَ چہ لیبی اے.بروجا ءَ گول اسکور کتگ انت –

وٹفورڈ ءُ مانچسٹر سٹی ءِ میان ءَ بوتگیں پنچمی گوازی ءَ مانچسٹر سٹی ءَ دو گول ءَ گوازی کٹیتگ – وٹفورڈ ءِ نیمگ ءَ چہ یک گول ءِ اسکور کنگ بوتگ کہ لیبی جے.ھیرننداز ءَ داتگ وھدیکہ مانچسٹر سٹی ءِ لیبی بی. سیلوا ءَ دو ءُ آر اسٹریلنگ ءَ یکے گول ءِ اسکور کتگ گوازی وتی ٹیم ءِ نام ءَ کنائینتگ –

بلوچ ریپبلکن گارڈز ءِ جارکش دوستیں بلوچ ءَ وتی شنگ کتگیں یک درشانے ءِ تہ ءَ گْوشتگ کہ بلوچستان ءِ دمگ ڈیرہ مراد جمالی ءَ بمب ناکارہ کنوکیں ٹولی گوں چیرکتگیں بمبے ءَ نشانگ کتگ اَنت ءُ چریشی ءِ آسر ءَ بمب ناکارہ کنوکانی یک کارندھے مرتگ ءُ دو سک ٹپی بوتگ اَنت-

جارکش ءَ دیمتر ءَ گْوشتگ کہ پوج ھما وھد ءَ نشانگ کتگ کہ وھدے آ ڈیٹیکٹر ءِ سر ءَ بمب ءَ شوھازگ ءَ بیتگ اَنت-

جارکش دوستیں بلوچ ءَ گْوشتگ کہ اے وڑیں اُرش داں بلوچستان ءِ وتواجھی ءَ برجاہ بنت-

بلوچ نیشنل موؤمنٹ ءِ جارکش ءَ وتی شنگ کرتگیں درشان ءِ تہ ءَ گْوشتگ کہ مند ءَ آجوئی ءِ ھَک ءَ روانک،پاکستانی لشکر ءِ چمانی دیم ءَ آجوئی ءِ اوگام پاکستانی ناشرکاری ءُ زوراکی ءِ بےسوبی اِنت۔مند ءِ شرپمندیں مردماں سرجمیں راج ءِ مارشت گوں جُرت ءُ توانمندی ءَ جھان ءِ دیم ءَ پدر کُرت ءُ پیشداشت کہ پہ زوراکی ءَ سَر سِندگ بنت بلے جوزگ گیش بنت۔

آئی ءَ گْوشتگ کہ بلوچ راجی آجوئی زْرمبشت ءِ ھلاس کنگ ءَ پاکستان ءَ مئے مزنیں راھشون گُلام مھمد،مئے ھزاراں سروک،باسک ءُ لس مردم کُشتگ ءُ مرچی ھم کُشت ءُ کوش برجاہ اِنت۔پاکستانی زوراکی وتی گُڈی ھد ءَ سر اِنت ءُ مردم مُچی سزا ءِ بنیاد ءَ نشانگ کنگ بیگ ءَ اَنت داں بلوچ چہ آجوئی ءِ مزنیں مُراد ءَ دزکش بہ بیت بلے بلوچ ءَ گْوستانک ءِ رُژنائی ءَ سمائی بنیاد ءَ وتی گُڈی سْوڑگ کُرتگ۔ایشی ءِ سر ءَ گوں توانمندی ءُ جوانمردی ءَ برجاہ اِنت،پاکستانی رستری ءُ زوراکی مردماں بےسوب کُرت نہ کنت۔مرچی دُژمن ءَ بلوچ سرڈگار یک لشکری بُنجل ءُ نازی ءِ پیمیں مُچی آزارجاھے ءَ بدل کُرتگ بلے گْوستانک ءِ ھمبلیں بلوچ اے ناشرکاری ءِ دیم پہ دیمی ءَ کنان ءُدیم ءَ جُنزان اَنت۔

جارکش ءَ گْوشتگ کہ مند ءَ برجم کنگ بیتگیں روانک ءَ مردم آزات بلوچستان ءِ اوگام ءَ جنان ءُ بلوچ راج ءِ پیشونکی ءَ کنگ ءَ اِت اَنت۔اے سرجمیں بلوچ راج ءِ اوگام اِنت پاکستانی زوراکیاں گندگ ءَ بازینے ءِ زْبان بند کُرتگ بلے دلانی تہ ءَ روکیں آس ءِ برانز جتائیں دْروشُماں پدر بنت،اے برانزانی کُشگ پاکستان ءِ وس ءَ نہ انت چے ءَ کہ راست ءُ دروگ ءِ میڑ ءَ بےسوبی مدام دروگ ءِ بھر ءَ کپ ایت ءُ راستی یک روچے الم سوبمند بیت۔

آئی ءَ گْوشتگ کہ مند روانک ءِ بھر زورگ ءِ پُژدر ءَ پاکستانی لشکر ءَ ابدل رھیم ء ایسا جھمنند گْوک مند دزگیر کنگ ءَ پد بیگواہ کُرتگ۔آئی ءِ سر ءَ بُھتام ھمیش اِنت کہ روانک ءَ بھرے زُرتگ۔پاکستان آزات بلوچستان ءِ اوگام جنوک ھزاراں مردم آزارجاھاں بند کنگ ءَ ابید ھم بےسوب اِنت ،اوگام انگت جنگ بیگ ءَ اِنت ءُ داں آجوئی ءَ اوگام جنگ بیت اے مئے دُرسانی سَدکی انت۔

بلوچ اسٹوڈنٹس آرگنائزیشن ءِ بُنجاھی جارکش ءَ وتی شنگ کتگیں درشان ءِ تہ ءَ گْوشتگ کہ نامے ئیں زانوگر ءُ دی اویسس اسکول ءِ ڈائریکٹر شھید سر زاھد آسکانی ءِ شھیدی ءِ ھپتمی سال روچ ءِ سر ءَ آئی ءَ سُھرچکیں دروت ندر کن ایں – آئی ءَ گوشتگ کہ مکران ءَ ھوار بلوچستان ءِ ھاتر ءَ آئی ءِ وانگی جُھد بیھال کنگ نہ بنت-

جارکش ءَ گوشتگ کہ شھید زاھد آسکانی ءَ مکران ءَ نوکیں وانگی نزام الّم زانوگر سرپد بوتگ اَنت- آئی ءَ کہ جوانیں وانگی ادارھانی بُن ھشت سر ءَ باور کتگ ءُ اِلم ءِ کندیل رُژن ءَ کتگ – آئی ءَ گوشتگ کہ مکران گرلز ایجوکیشن چادر پر دیگ ءَ زالبولانی وانگ ءِ پڑ ءَ دلبڈی داتگ – زائد آسکانی ءِ ناں تھنا پنجگور ، گوادر وڑیں جاگھے ءَ نوکیں وانگی نزام بنا کتگ بلکیں چاگرد ءَ راستیں استاد کرد پیلو کتگ ءُ مدام نودربرانی راھشونی کتگ ئِے-

آئی ءَ وتی درشان ءِ تہ ءَ گوشتگ کہ شھید سر زاھد آسکانی 4 دسمبر 2014 گوادر ءَ آئی ءِ وانگجاہ دیم ءَ شھید کتگ- چریشی ءَ مکران ءَ ھوار بلوچستان ءَ یک جوانیں استادے ءَ زبھر بوتگ- بلوچستان ءَ جتائیں ھیال لیکہ ءِ مردمانی ھواری ءَ زانتکار ءُ استادانی درگت ءَ ھم بے مھر اَنت کہ اود ءَ زائد آسکانی ، پروفیسر صباء دشتیاری ، پروفیسر رازق زھری ءَ ھوار درزن ءَ الم ءُ شعور ءِ کندیل روک کنگ ءِ سر ءَ کُشگ بوتگ اَنت وھدے کہ درزنی ءَ گیش استاد بیگواہ کتگ ءُ آیانی سر ءَ لَٹ کُٹ کتگ ءُ شھید ءُ بیگواہ کتگ اَنت-

جارکش ءَ وتی درشان ءِ تہ ءَ گوشتگ کہ بلوچ استاداں گوں گپ تران کنان ءَ گوشتگ کہ آ الم ءَ یک جوانیں کارے سرپد بیت چاگرد ءَ راستیں شعور ءِ سرچستی ءِ سپر ءَ برجاہ دار اِیت – شھید زاھد آسکانی ءِ جسمانی ڈول ءَ جتا کتگ بلے آئی ءِ پکر ءُ ھیال مدام زندگ بنت-

جارکش ءَ گوشتگ کہ بلوچ ڈیھ ءَ زانوگر ءَ چہ زبھر کنگ ءِ ھاتر ءَ مدام اد ءَ وانندہ زُلم ءُ زوراکیانی نشانگ ءِ تہ ءَ اَنت اشی ءِ مکسد بلوچستان ءَ آئی ءِ بُنکی ھک آسراتی ءَ چہ بے الم کنگ زوراوری منسوبہ ءِ چادر ءَ سر ءَ بہ دنت بلے بلوچ ھرچ مردمے ءَ مدام اے منسوبھانی بے سوب کنگ ءِ ھاتر ءَ اے زوراورانی وتی زانتی ءُ سیاست ءَ چہ مکابلہ کتگ ءُ ھچ کس اے گپ ءَ دل وش مہ بیت مئے استاد کُشتگ ءُ آ بلوچ دُژمن منسوبھانی سرجمی ءَ سوبین بہ ئے-

بلوچ نودربر گل آزاد ءِ بنجاھی جارکش ءَ رسانکدراں وتی شنگ کرتگیں درشان ءِ تہ آن لائن ویبنار ءِ کنگے جار پرینتگ گوشتگ کہ بانک کریمہ بلوچ ءِ شھیدی سالروچ ءِ درگت ءَ آن لائن ویبنار ءِ کنگ بیت اِنت کہ آئی ءِ تہ ءَ بانک کریمہ بلوچ زند ءُ راجکاری جُھد ءِ سر ءَ بانک ءِ راجدار، زرمبشت ءِ سنگت وتی ھیالاں درشان انت –

جارکش ءَ گوشتگ کہ بانک کریمہ ءِ بلوچ راجی زرمبشت ءِ تہ ءَ روڈ ماڈل کرد ءَ بلوچ راجمان ءِ تہ ءَ بازیں بدلی ءِ آرتگ ءُ راجی جُھد ءِ تہ زالبول ءَ یک شرّیں وڈی ءَ مھکم کتگ ءُ دیم ءَ آؤرتگ انت –

آئی ءَ گوشتگ کہ کریمہ بلوچ ءِ راجی زرمبشت ءِ تہ ءَ داتگیں کربانی مئے درستانی واست ءَ روکیں چراگ درور انت اشی ءِ تہ ءَ ھچ تپاوت نیست کہ آ بلوچ راج ءِ گچین کتگیں رھشونانی چہ یکے، کہ آئی ءَ ناکہ ایوک ءَ جھد ءِ تہ ءَ وتی بھر ءِ وام ادا کتگ انت بلکنہ جھد ءِ تہ ءَ بازیں بدلیانی آرگے سوب ھم بوتگ –

آئی ءَ گوشتگ کہ ما ھمے پھمیں بانک کریمہ ءِ زند ءُ راجکاری ءِ جھد ءِ سر ءَ یکشل ءَ باوست بوھگ لوٹیت کہ پہ راجکاریں باسک ھاسکر زالبولیں راجداریں باسکانی راجکاری ءِ تربیت ءِ ھاتر ءَ مھکمیں زریہ ءِ بیت انت ءُ مئے ویبنار ھمے تربیتء درچ ءِ بھرے –

بلوچ اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگین درشانی ءَ گشتگ کہ آواران ءَ بازیں وانگجاھانی بندش پدردی گْوشان ءَ گوشتگ کہ بلوچستان ءَ وانگی نزام کجام رنگ ءَ جھل ءَ دور دیگ بیتگ اشی ءِ وت پدراھی اِنت ءُ سرکاری ءُ واکدار وانگی نزام ءِ آرگ ءَ بے تھمبل اَنت – بازیں جاھاں وانگجاھانی بندش سرکاری ٹاپاراں رد کنگ ءِ پدراھی ءَ کن اَنت –

آئی ءَ گُشتگ بلوچستان ڈیھ ءِ پشکپتگیں اُستاناں چہ یکے کہ اود ءَ مھلوک کمتری ءِ زند ءِ گوازینگ ءَ لاچار اَنت – بلوچستان ءَ ھنچش مھلوک زرکاری ءَ زبھر اَنت ھنچش وانگی تک ھم یکدم کمزور اَنت یک نیمگے ءَ اُستان ءَ وانگی ادارہ ھما ھسابی اَنت ءُ اود ءَ انگیں وانگ ءِ واستا نودربر کاینت بلے اود ءَ شریں وانگ دیگ ءَ واکدار یکدم بے تھمبل اَنت –

آئی ءَ گُشتگ کہ اشی ءَ پدر بیت نودربر شریں وانگجاھاں آیگ ءِ واستا دور دور ءَ رو اَنت گڑا اشی ءِ اے ھم پدر بیت نودربراں وانگجاھاں دور کنگ ءِ جھد بیگ ءَ اِنت –

آئی ءَ گُشتگ کہ سرکار یک نیمگے ءَ وانگی ایمرجنسی ءِ وڑیں ٹاپاراں جنت ءُ بلوچستان ءَ شریں وانگیانی ٹاہ ءَ دنت گڑا اشی ءَ یک دمگے ءَ بازیں کچے ءَ وانگجاھانی بندشی سرکار ءِ سیاھیں دروگاں ٹُنگ ٹنگ کنت –

آئی ءَ گُشتگ آواران ایوک ءَ وانگی بندشیانی دیمپان اِنت بلکیں سرجمیں بلوچستان ءَ بازیں وانگ جاہ بند اَنت ءُ وانگی گر ءُ دار کنوک اے درگت ءَ بس نشتگ ءُ تماشہ چارگ ءَ اَنت ءُ دومی نیمگ ءَ بلوچستان ءَ وانگجاھانی گیشی بندی یک پدرناکی یے –

جارکش ءَ گوشتگ کہ بلوچستان ءَ وانگجاھانی بندی پدری اِنت ءُ سرکار ءِ ھروھد ءَ نادلگوشی ایرجنی اِنت ءُ ما سرکاری ءُ وانگی واکداراں گوں دزبندی کن ایں آواران ءَ ھوار سرجمیں بلوچستان ءِ بندشیں وانگجاھاں زوت پچ کنگ ءَ گامگیج بہ زور ایت ءُ مھکمہ تعلیم ءَ پسو بہ لوٹ ایت اگاں سرکار ءَ اے چیزانی سر ءَ اژدری گامگیج نہ زرتگ گڑا اے درگت ءَ دومی نودربریں گلانی ھواری ءَ وانگجاھانی بندشی ءِ ھلاپ ءَ زرمبشت ءِ بندات کن ایں –

دی بلوچستان پوسٹ پتر ءَ سربوتگیں ھالانی رِد ءَ بلوچستان ءِ دمگ کیچ ءَ پاکستانی پوج ءَ دو ورناہ زورانسری آوار جتگ ءُ بیگواہ کتگ اَنت-

پاکستانی پوج ءِ دست ءَ زورانسری آوار جنگ ءُ بیگواہ بوتگیں مردمانی پجار سعید احمد ء علی محمد جھمنند جمک گورکوپ ءُ یانزدہ سالی ئیں بختیار ءِ ناماں چہ بوتگ انت –

ھردو چار ماہ ساری پاکستانی پوج ءَ چہ تربت زیارت سر ءَ جندے گِس ءَ آوار جتگ ءُ بیگواہ کتگ انت –

بیگواھیں مردمانی تہ ءَ ھواریں یانزدہ سالی ئیں بختیار بلوچ ءِ پت ءِ رِد ءَ آئی ءِ کسانسالیں زھگ بید ء جرم ءَ پاکستانی پوج ءَ آوار جتگ ءُ بیگواہ کتگ اگاں آئی ءِ زھگ سر ءَ ھر وڑیں الزامے ھست آمیدگس ءَ آرگ بہ بیت ءُ آئی ءِ گوم ءَ ھک کنگ بہ بیت –

بلوچستان ءِ دمگ ھرنائی ءِ ھند شاھرگ ءَ پاکستانی پوج ءَ یک مردمے دزگیر کنگ ءَ پد ناشناسیں جاھے ءَ برتگ، بیگواھیں مردم ءِ پجار بلوچ ء غلام نبی ءِ نام ءَ زانگ بیتگ –

دمگی مردماں ٹی بی پی ءَ گوں گپ کنان ءَ گوشتگ کہ گرگ بیتگیں مردن بیست ءُ نُھ نومبر ءَ پاکستانی پوج ءِ کارمنداں شاھرگ ءِ دمگ ءَ دزگیر کرتگ ءُ بیگواہ کتگ – گرگ بیتگیں مردم بنکی ءُ سبی ببر کُچ ءِ جھمنند اِنت ءُ ھرنائی ءُ مالداری ءِ سبب ءَ جھمنند بیتگ –

واکداراں اے درگت ءُ دگہ گپ دیم ءَ نیاؤرتگ بلے بلوچستان ءِ دگہ جاھانی پیم ءَ ھرنائی ءَ ھم بیگواھیانی ھال یکشل ءَ شنگ بیگ ءَ اَنت –

ھرنائی ءِ کش ءُ گوراں گیشتر مردم مالداری ءَ گوں بندوک اَنت ءُ ھمے سال ءَ پوج ءَ ھرنائی ءَ لشکر کشی کنان ءَ دو مالدار جمعہ خان ءُ محمود کشتگ اِتگ اَنت –

بلوچستان ءِ دمگ ڈیرہ مراد جمالی ءَ بند ءُ ساچی شرکت ءِ سر ءَ بمب تراکے کنگ بیتگ –

سر بیتگیں اھوالانی رد ءَ ڈیرہ مراد جمالی ءَ مزن شھدگ ءَ بند ءُ ساچی شرکت ءِ سر ءَ بمب تراکے کنگ بیتگ، تراک ءَ دگہ جانی ءُ مالی تاوانانی بارو ءَ دمگداراں ھچ ھال سر نہ کرتگ –

واکدارانی گوشگ اِنت تراک ریموٹ کنٹرول ڈیوائس ءِ زور ءَ کنگ بیتگ ءُ اے درگت ءَ گیشیں پَٹ ءُ پول برجاہ اَنت –

گوستگیں ماہ ءَ ھم ڈیرہ مراف جمالی ءَ بند ءُ ساچی کمپنی ءِ مشینری ءُ کارندہ بمبے ءِ نشانگ کنگ بیتگ اِت اَنت کہ چریشی ءَ دو مردم زدگ بیتگ اِت اَنت –

بلوچستان ءَ بلوچ سلاہ بندیں آجوئی دوستیں گل اے وڑیں اُرشانی زمہ واریاں منگ ءَ اَنت – اے گلانی گوشگ اِنت کہ پوج ءِ بند ءُ ساچی کمپنی ایف ڈبلیو او ءُ دگہ کمپنی وتی شریداری ءَ بند ءُ ساچی ءَ زورگری ءِ منسوبھاں گیش کنگ ءَ اَنت ءُ چریشی ءَ آیانی سر ءَ اُرش بیگ ءَ اَنت –

گوادر: چہ یونیورسٹی ءِ ھاسٹل ءَ نودربر رمیز اختر پوج ءں دست ءَ بیگواہ

بلوچستان ءِ دمگ چہ گوادر ءَ پاکستانی پوج ءَ نودربر دزگیر کنگ ءَ پد پھمیانیں جاھے ءَ برتگ ءُ چریشی ءَ پد ورنایے درگت ءَ ھچ وڑیں ھال نیست اِنت-

دمگی مردماں ٹی بی پی ءَ گوں گپ کنان ءَ گوشتگ کہ پشکان ءِ جھمنندیں نودربر رمیز اختر یک دسمبر ءِ شپ ءَ تربت یونیورسٹی ءَ گوادر کیمپس ءِ ھاسٹل ءَ پاکستانی پوج ءُ لس پوشاکیں کارندھاں دزگیر کنگ ءَ پد پھمیانیں جاھے ءَ برتگ –

چم دیستگیں مردمانی رد ءَ پوج ءَ بازیں کچے ءَ ھاسٹل انگیر ءَ کرتگ ءُ بیڑ برتگ، گرگ بیتگیں نودربر ءِ چم بندگ بیتگ ءُ لَٹ ءُ کُٹ کنان ءَ گون وت اش برتگ چریشی ءَ پد آئی ءِ بارو ءَ ھچ ھال نیست اِنت –

دمگداراں اے درگت ءَ تنی وھدی ھچ ھال دیم ءَ نیاؤرتگ –

زانگ بہ بیت بلوچستان ءَ زورانسری آوار جنیانی وئیل دو دھکاں برجاہ اَنت، زورانسری آوار جنیانی تہ ءَ گیشین کچ نودربرانیگ اِنت ھمے وڑ سدانی کچ ءَ نودربرانی زانگول کرتگیں لاش بلوچستان ءِ جتا جتائیں ھنداں گوست ءَ دزکپتگ اَنت-

گوستگیں ماہ ءَ شال ءَ ھستیں بلوچستان یونیورسٹی ءِ ھاسٹل ءَ دو نودربر سھیل بلوچ ءُ فصیح بلوچ زورانسری آوار جنگ بیتگ اِت اَنت کہ داں انگت ءَ بیگواہ اَنت – بیگواھیں نودربرانی یل کنگ ءِ ھاتر ءَ بلوچستان ءِ یونیورسٹی زھرشانی کنان ءَ بندشی ءَ ھوار سرجمیں بلوچستان ءَ وانگی ادارہ بند کنگ بیتگ اِت اَنت-