TBP Balochi

دی بلوچستان پتر ءَ سر بوتگیں ھالانی رِد ءَ بلوچستان ءِ دمگ کیچ ءَ یک مردم ءِ زورانسری آوار جنی ءَ پد بیگواہ

گیشیں ھالانی رِد ءَ گوستگیں شپ ءَ کیچ ءِ دمگ شاپک ءَ پاکستانی پوج ءَ گِس ءِ سر ءَ بیڑ برتگ زوراکی کنان ءَ یک مردم ءِ آوار جتگ –

کھول ءِ رِد ءَ پوج ءَ چپ ءُ چاگرد ءَ دمگ وتی انگیر ءَ کُتگ چادر ءُ چاردیوالی لگتمال کتگ تاج محمد ء گمشاد لٹ کُٹ کتگ گوں وت برتگ –

آھانی گوشگ ءَ پوج ءَ دمگی دلار ھم گون بوتگ انت

زانگ بہ بیت گوستگیں روچ ءَ کیچ ءِ دمگ سرنکن ءَ ھپت مردم ءُ تربت ءِ شھر آبسر ءَ ھم یک ورناھے زورانسری آوار جتگ ءُ بیگواہ کتگ انت ءُ پدا رند ءَ سرنکن ءَ آوار جنگ بوتگیں مردم لٹ کٹ کنگ ءَ پد یل کتگ انت –

کلاھو ءَ آوار جنگ بوتگیں مردمانی کھولاں ایپ سی ءِ بنجل ءِ دیم ءَ زھرشانی کتگ وتی دوستیگیں مردمانی یل کنگے لوٹ کتگ –

بلوچستان ءَ ھمک روچ زورانسری آوار جنی ءِ ھال آھگ انت وھدیکہ دومی نیمگ ءَ بیگواھیں مردمانی یل کنائینگے ھاتر ءَ وائس فار بلوچ مسنگ پرسنز ءِ بنجل بازیں وھد ءَ برجاہ انت –

بلوچستان ءِ تیابدپی دمگ گوادر ءَ سَے شمبے ءِ روچ ءَ نشہ ءِ ھلاپ ءَ یک زھرشانی ءِ کنگ بیتگ –

حق دو تحریک ءِ سروک مولانا ھدایت الرھمان ءِ سروکی ءَ سید زھورشاہ ھاشمی ایونیو گوادر ءَ پولیس کارگس ءِ دیم ءَ نشہ ءِ ھلاپ ءَ یک زھرشانی ءِ بیتگ ءُ چریشی ءَ شھریاں بازیں کچے ءَ بھر زرتگ-

ھمے وھد ءَ مولانا ھدایت الرھمان بلوچ ءُ ھسین واڈیلہ ءَ تران کنان ءَ گوشتگ کہ ھما پوجی چیک پوسٹاں مردمانی کمشرپی بیت اِنت ھما چیک پوسٹاں نشہ گواز اَنت ءُ شھراں سر بنت-

آیاں گشتگ کہ بلوچستان ءَ دَہ لَک ءَ گیش ورنا نشہ ءِ آماچ اَنت-

آیاں سرکاری ءُ ریاستی ادارھانی سر ءَ ایراد گپتگ ءُ گشتگ نشہ باپاری ءَ سیکورٹی پورس دزمانجن اِنت-

آیاں گشتگ کہ اد ءَ وتی گاڑیاں پاکستانی بیرک جن اَنت ءُ نشہ ءِ باپاری ءَ کنگ ءِ ھواری ءَ ھرچی بہ کن کس ھچ نہ گوش ایت –

آیاں گشتگ کہ چاردہ اگست ءُ بیست ءُ سَے مارچ ءَ ھمے نشہ پروش روانک کش اَنت کرنل وش بیت اِنت وتن دوست ھمیش اَنت –

آیاِ گشتگ کہ اگاں نشہ ءُ نشہ باپار کنوکانی ھلاپ ءَ کاروائی کنگ نہ بیت گڑا ھمک چار راہ ءِ سر ءَ آئی ایس آئی، ایم آئی، کوسٹ گارڈ، انٹی نارکوٹکیس ءُ پولیس ءِ نام گرگ بیت ءُ آیانی راز پاشک کنگ بنت-

آیاں گشتگ کہ کوسٹ گارڈ ءِ پونز ءِ چیر ءَ نشہ باپاری بیگ ءَ اِنت بلے بزگیں گریباں یک ڈبوکے روگناں ھم کوسٹ گارڈ گرگ ءُ برگ بنت –

آیاں گشتگ ما پاکستان ءِ نزام ءَ لانت کن ایں کہ اود ءَ مجرم ءُ منشیات پروش آجو اَنت ءُ ادارھانی گون ءَ نشتگ ءُ چاہ گلاٹ اَنت -.

آیاں گشتگ کہ اے ٹوکن نوٹس اگاں منشیات ءِ ھلاپ ءَ کاروائی نہ بیت گڑا دیم ءِ ھپتگ ءَ مزنیں کچے ءَ زھرشانی کنگ بیت اِنت –

آیاں گشتگ کہ یک ماھے ءَ برجاھیں زھرشانی نندانک ءِ بارو ءَ گپ کنان ءَ گوشتگ اِت ئِے اگاں سرکار ءَ مسام سرجم نہ کت اَنت گڑا دیم ءِ نندانک ءِ زھرشانی ساجو اِنت-

آیاں گشتگ سرکار ءَ مئے بیتگیں مساماں ما بے ھیال نہ اِنت –

یک لوگے ءَ سلینڈر تراکے ءَ چار مردم زدگ ءُ بیران بیتگ اَنت –

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ یک لوگے ءَ سلینڈر تراکے ءَ چار مردم بیران ءُ زدگ بیتگ اَنت –

سلینڈر ایرانشھر ءِ ھند چاہ جمال ءَ یک لوگے ءَ ترک اِتگ ءُ اود ءَ یک زالبولے گوں زھگے ءَ بیران ءُ دو زدگ بیتگ اَنت –

ھال ءِ سر بیگ ءَ ایرانشھر ءِ نادراہ جاہ ءِ سروکاں ایمبولینس راہ داتگ ءُ اود ءَ دو زدگ ءُ لاش چست کنگ بیتگ ءُ خاتم الانبیا ایرانشھر ءِ نادراہ جاہ ءَ آرگ بیتگ اَنت –

دمگی مردمانی رد ءَ سی ءُ چار سالی ئیں زالبولے ھما جاہ ءَ بیران بیتگ ءُ سَے زدگ بیتگ اَنت کہ اشانی تہ ءَ یک ھپت سالی ئیں زھگے راہ ءَ بیران بیتگ –

زدگ بیتگیں مردمانی تہ ءَ یک ھژدہ سالی ئیں ورنا ءُ دگہ یک کسان سالیں زھگے ھوار اِنت کہ ھر چاریں مردم یکیں کھول ءِ مردم اَنت –

دوئیں زدگ بیتگیں مردم نادراہ جاہ ءَ برگ بیتگ اَنت کہ اود ءَ آیانی جاور ناگیگ گوشگ بیگ ءَ اِنت-

یکشمبے ءَ بیست ءُ شش دسمبر ءِ بیگاه ءَ چہ پیشُکان وانگی بُنجل Pishukan Reading Club ءِ چیردستی ءَ ماں پکاسو لائبریری ءَ یک اسٹڈی سرکَلے برجم دارگ بوتگ، اے گردانک ءِ سرهال ” سیکولرازم ” ات، تران کنوک ” سلال ساوڑ ” ات ءُ اے وانگی گردانک ءِ سرهال ءِ سر ءَ آئی ءَ تران کُت ءُ وتی لکچر داتگ اَنت –

آئی ءَ تران کنان ءَ دَرّائینت: گال ءُ گالبندانی بزانت دائم پَھمگ ، چرایاں آشنا بوگ ءُ آیانی راستی زانگی اَنت ءُ پد ءَ وتی جاه ءَ کارمرز کنگی اَنت بلے بدبَھتی اِد ءَ اَچ لاعلمی ءُ نابزانتی ءَ لبزاں دگہ مانا دَیگ ءُ دگہ ردیں بزانت ءَ کارمرد کنگ بَنت کہ چرایاں یکّے “سیکولرازم” اِنت کہ مُلّایانی ءُ دِگہ بازینے ءِ گُمان ءَ بلکیں اِے بےدینی ءُ کُفر ءِ راه اِنت ایشی ءَ چیں بداخلاقی ءُ گنده کاری ءِ دَر بُج اَنت چرایشی ءَ فساد ءُ فتنہ پیداگ بیت بلے چو نہ اِنت، اِے ھما لیکہ اِنت آئی ءِ رِد ءَ مذھب ءُ سیاست یک ءُ دومی ءَ چہ گیشّینگ بہ بَنت ءُ هچ مذھب بالاتر ءُ مُلکی سیاست ءِ تہ ءَ هَوار کنگ مہ بیت، ریاست پہ هر شھری ءَ کہ آئی ءِ سیادی کُجام هم سِتک ءُ بنیاد ءُ مذھب ءَ گوں بیت البت ریاست دُرستاں پہ مهربان بہ بیت ءُ یک پیمیں حقوق ، انتظام ءُ اختیار بہ دَنت ءُ یک رنگ ءَ آیانی پھریز ءُ چار ءُ گُزار ءَ بہ کنت-

دیمتر ءَ آئی ءَ گوْشت چوناھا سیکولر ءُ سیکولرازم تچکیں دو مغربی گالبند اَنت لاطینی زُبان ءَ سیکولَم Seculm ءِ مانا ” دُنیا ” اِنت، ءُ آئی ءَ گوْشت ماں قرون وسطی ءَ عیسائیانی یک فرقہ یے “رومن کیتهولک” پادَری کہ بیتگ اَنت تاں آ دو ٹولی ءِ تہ ءَ بَھر بیتگ اَنت یکے هما پادَری کہ کلیسائی رَهبند ءِ پَد ءَ عبادت گاهاں بیتگ ءُ دومی هما پادَری بیتگ اَنت کہ لَس مھلوک ءَ گوں هور ءُ همایانی پیم ءَ زندگی کُتگ اش کلیسا ءِ گالبند ءَ دومی سیکولر پادری گوشگ بیتگ اَنت ، ءُ هما دُرستیں اداره اوں سیکولر گوشگ بیتگ اَنت کہ کلیسا ءِ زیردست نہ بیتگ اَنت-

دیمترا آئی ءَ چو گوْشت اصلا سیکولر ھیالات سک کوْهن اَنت آئی ءِ بندات کساس 600 قبل مسیح دنیا ءِ اوّلی ءُ یونان ءِ کوْهن تریں فلسفی ”تهیلز” ءِ لیکہ ءَ چے بیت کہ پد ءَ بازیں یونانی فلسفی اِے فکر ءَ دیم ءَ بَرنت، بلے شانزدُهمی کرن ءَ نامداریں اطالوی شاهزانت ” میکیا ولی” ءُ جرمن شاهزانت “مارٹن لوتهر ” ءِ گُشتِنانی بدولت ءَ اِے تَک ءَ باز دیمروئی کیت، اِشانی گوْشگ همے بیتگ کہ ” سیاست ءُ مذھب ءَ چہ یک ءُ دومی ءَ گِستا کنگ بہ بیت پرچا کہ اگاں مذھب سیاست ءِ تہ ءَ هَوار گیجگ بیت تاں سیاست ءِ واستا تاوان اِنت-

دیمتر ءَ آئی ءَ گوْشت بُندر ءَ سیکولراِزم ءِ گالبند جارج جیکب ہولی اوک نامیں انگریزے ءَ 1840ء دیم ءَ آؤرتگ ءُ کارمرز کُتگ کہ آئی جند وت آزات هیالیں مردُمے اَت ءُ آزات هیالی درگت ءَ باز نبشتہ کُتگ ءُ گوشتانک داتگ ءُ پہ سیکولرازم ءَ کار کُتگ-

آئی ءَ گوْشت سیکولراِزم ءِ مستر ءُ بُنکی رَهبند ایش اِنت کہ آئی رِد ‎ءَ وتی پگر ءُ لیکھے دارگ ءُ جند ءِ هیال ءِ درشانی ہَمُک انسان ءِ پیدائشی حقّ اِنت، ءُ سیکولرازم اِے گوْش ایت کہ هر مردُم ءَ اِے سرجم ءَ اجازت بہ رَس ایت کہ راستی ءَ وت بہ پولیت ءُ شوھاز بہ کنت ءُ زندگی ءِ دُرائیں پِڑ ءُ پَھناتاں آئی سیادی تُری سیاست بہ بیت یا معیشت ، مذھب، اخلاق ، لبزانک یاکہ چونائیں تَکے بہ بیت بِلّے وتی ازھار ءَ کنت –

ماں لکچر ءَ پد گُڈسر ءَ جُست ءُ پُرس ءُ پسھی بوت ءُ نودربراں وت ماں وت ھمے درگت ءَ ڈسکشن کُت ءُ پد ءَ سرکَل آسر کُت۔

نبشتانک: راشد ھسین ءِ مکھیں مات

نبشتہ کار : شیردل بلوچ

دی بلوچستان پوسٹ

ساہ کندن ءِ چم پاچی ءُ بے وانکی ءَ ھست اَنت زبان
چَمّے بہ بیت پہ گندگ ءَ
گوشے بہ بیت پہ اِشکنگ
آکبت اوبادگاں پہ ساھت اَنت ساہ کندن ءِ
گند اَنت ءُ بے روک اَنت چَمّ
کرّ اَنت بلے گوش اِشکن اَنت
ساہ اِنت بیگواہ اِنت
شائر ” اتا شاد

پیرزالے چہ گوستگیں سے سال ءَ وتی بیگواھیں بچ ءِ اکس ئِے دستانی دل ءَ داشتگ ءُ چکرگ ءَ اِنت شال ءُ کراچی بگر تاں بے مرادیں اسلام آباد ءِ ڈی چوک ءَ نندانک ءِ تمبو جتگ ءُ زھرشانی کرتگ،چوناھا بیگواھیں بلوچانی شُدلاپیں ھڑتال ءِ نندانکجاہ ماما کدیر بلوچ ءِ کر ءَ گندگ بیت پہ وتی تنگہ ءُ تلاھیں بچ ءِ آجوئی ءَ چہ زورگیریں ڈیھ ءِ واکداراں ھوار جھان ءِ انسانی اُکبالانی پھازوکیں گلانی دیم ءَ دزبندی ءُ پریات کنگ ءَ اِنت، ھچ کسی گوشاں آئی گریوگ ءُ زار پُترگ ءَ نہ اَنت، ھزارانی کساس بلوچ پرزند بیگواہ اَنت، استان ءِ کھریں زنداناں بندیگ اَنت بیگواھیں پُسگانی کھول دائم ءَ زھرشانی ءَ ماں دگّانی سر ءَ گُھار ” سیما ءُ زرینہ یا گُھار سمّی ءُ مھلب ءِ دروشم ءَ گندگ بوگ ءَ اَنت۔

راشد ھسین بلوچ بیست ءُ شش تاکشان( 26/12/20 ) ءَ چہ متھدہ ارب امارات شارجہ ءَ امارات ءِ گل ءِ چیریں کارمننداں آوار جتگ ءُ داں شش ماہ ءَ وتی کر ءَ زندانی کتگ، پد وتگڑیں استان ءِ دست ءَ ئِےداتگ، آ وَ چہ ھمے ڈُنگانی زوراکیاں وتی جان ءِ رکینگ ءَ ماں امارات شُتگ اَت، امارات ءَ جھان ءِ کانود مان نیاؤر اَنت ءُ بے میاریں گامگیجے چست کُت گوں اِستاں ءِ بلوچ دژمنی ءَ وت ءَ ھوار پدّر کت ءُ جھان ءِ دیم ءَ وت ءَ را بد رُو ئِے کُت ۔

راشد ھسین وت” اِنسانی اُکبالانی پھازوکیں کارمنندے بوتگ پمشکا اِستان ءَ را اے ھبر اُوپار نہ بوت پہ وتی ناشریں کارپدانی چیر دیگ ءَ آئی ءَ “راشد ھسین ءِ سر ءَ دروگیں تھمت جت ءُ آوار جنائینت، ھمے وڑ ءَ چہ سویڈن ءَ اھوالکار ” ساجد بلوچ ءَ را وتی کارمنندانی دست ءَ آوار جنائینت ءُ آئی کُنٹ ماھے ءَ پد آپ تاچے ءَ دَور دات ، پرچا کہ” ساجد بلوچ ءِ کارست ءُ زندگ بوگ ایردستیں پہ بلوچ راج ءِ واست ءَ بوتگ اَنت ءُ ناشریں ڈیھ ءِ زوراکیاں جھان ءِ دیم ءَ پدّر کنگ بوتگ، پمشکا “ساجد بلوچ ءِ توار گُٹگیر کُت ئِے۔

ھمے پیم ءَ ” بانَک کریمہ بلوچ ئِے گوستگیں سال ءِ بیست ءُ یک تاکشان، دو ھزار بیست ءَ چہ کینڈا ءِ شھر ٹورنٹو ءَ آوار جنائینت لھتیں ادارک ءِ تھ ءَ شھید اِش کُت کُنٹ چو ساجد بلوچ ءِ کُنٹ ءَ ماں آپ تاچے ءَ دَور دات، زورگیر مُدام وتی زندگ بوگ ءِ واست ءَ راست ھبر کنوکاں کُش ایت ءُ بیگواہ کنت داں اے دگر ترس ءُ ییم ءِ آماچ بہ بنت جُنز اِش ھلاس بہ بنت اگاں ھلاس نہ بنت گڑا نزور بہ بنت ۔

بلکیں اِستان بلوچ ءِ راجدپتر ءَ سرپد نہ اِنت، بتلے گوش اَنت :”بیر بلوچ ءِ تاں دوسد سال ءَ لسھیں آھوگ ءَ دونتاں اِنت ” بلوچ کدی وتی دژمن ءِ دیم ءَ پروش نہ من ایت چدد ءُ ساریگیں وھداں بلوچ ءَ وتی لج ءُ ننگ وتن ءِ دژمناں گوں تاں گڈی وھد ءَ جنگ داتگ، دژمن پہ پدکنزگ ءَ لاچار کرتگ اَنت۔

یکرندے پد ءَ گوں زورگیریں” اِستان ءَ وتی سرڈگار ءِ رکینگ ءُ راجی وتواجھی ءِ جنگ ءَ کنگ ءَ اَنت، بلوچ ءِ جنگ ءَ اِستان نگیگ کرتگ پمشکا ھمک بلوچ ءَ آ وتی دژمن زانت ءُ سرڈگار ءِ وارس لیک اِیت ھرّوچ بلوچ پُسگانی آوارجنی ءَ دست گلائیش اِنت ۔

ھما شَیر ءِ بھرے :

“راستے کہ تئی سوب ءَ من ءَ مرگی کُتگ”
“شات ئے کہ تئی زوراکی ءَ مرچی پد ءَ یلیں بَچے جتگ “
“بچ آجوئی
بچ ایمنی “
“بچ گلزمین ءِ دیدگ ءُ زرد ءِ مُراد “
“بچ گم جتیں بنی آدم ءِ رکینگ جھد ءِ مُراد”
“بچ دیریں مانیں شادہ ءِ شوھازگ ءِ مُزد ءِ مُراد”
“بچ زند ءِ مھر ءِ مُجتی ارمان
مستاگی ازاب ءِ آسرے”
“تو پہ سرانی گُڈگ ءَ زند ءِ ھیالاں کُش ئے ؟”
“پہ سندگ ءَ داشت کن ئے ؟ پلاں چہ بو تالانی ءَ”
“مرگ ءَ منی لوٹ ئے تھ ءَ ارواہ ءَ بکُش “

راشد ھسین بلوچ ءِ منگھیں مات ءُ بانکیں گُھار پریدہ ءُ کسان سالیں ماھزیب شپ پہ جیڑگ ءُ روچ دگّانی سر ءَ گوزینتگ اَنت، اے نام گپتیں مسلمانیں ڈیھ وت ءَ را چہ زوراکیں دژمناں دیم پہ دیمی ءِ چہ بچگ ءِ واست ءَ انسانی ھمدرد گوش ایت امریکہ شھری ریمنڈ ڈیوس، ھندوستان ءِ ونگ کمانڈر” ابھینداں ءُ کلھبوش یادیو ءَ واست ءَ نند اَنت کانود اڑ دے اَنت ءُ انسانی ھمدردی ءِ نام ءَ گیپت ءُ الاج ءِ آسراتی ءُ وشتامیں ورگ دے اَنت، گوں شرپ ءُ ازت ءَ وت بارت ءُ یلہ دے اَنت، بلے!! گوں بلوچاں انسانی ھمدردی ءُ مسلمانیت ھچ گندگ نہ بیت، پرچا بلوچ ءِ زندگ بوگ ءَ را پنجاب وتی مرگ زانت گوں بلوچ ءِ مات ءُ گُھارانی رِتکگیں ارساں مسکرا کنگ بوگ ءَ اِنت بیگواھیں بچانی آجوئی ءِ ھبر دراہ دروگیں تسلہ اَنت ۔

زی پد ءَ ماں کراچی ءَ مسنگ پرسنز ءِ بنجل ءَ ماما کدیر بلوچ ءِ گور ءَ راشد ھسین ءِ مکھیں مات ،گُھار پریدہ بلوچ ءُ کسان سالیں” ماھزیب شدلاپ ءَ نشتگ اَنت، جھان انسانی اُکبالانی گل دیم ءَ بیا اَنت بیگواھیں راشد ھسین ھوار دراھیں بیگواھیں مردمانی آجوئی ءِ واست ءَ ترندیں توارے جوڑ بہ اِت تیوگیں بندیگ آجو بات اَنت راجی جُنز زندگ بات ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

اکس کمانچر بلوچ

دستونک

دستونکار: گُلؔ بلوچ

دی بلوچستان پوسٹ

ترا چہ دیراں بہ جیڑاں باریں
وت ءَ گوں جیڑاں بہ جیڑاں باریں

سپر بناہ اِنت یک جنگلے ءَ
بادشاہ ءُ شیراں بہ جیڑاں باریں

گرنچے ءَ بنداں مدام تئی زنگاں
پکیر ءَ گرداں بہ جیڑاں باریں

گم ءِ بھاریں نہ رُستگ وشی
گماں گوں سازاں بہ جیڑاں باریں

جوانی گْوست کہ نہ کت من ھچی
دل ءَ چہ پیراں بہ جیڑاں باریں

شپانی پاس ءَ من اللہ اللہ
کن آں نمازاں بہ جیڑاں باریں

یک بچے بند اِنت یک لاشے کپتگ
بندیگ ءُ تیراں بہ جیڑاں باریں

درا نہ بیتیں تلاھیں دروشم
کجام گوں رنگاں بہ جیڑاں باریں

موالی ءَ آں گوں چرس ءُ بنگاں
وراں شراباں بہ جیڑاں باریں

شموشگ لوٹاں بہ لوٹاں دوست ءَ
گوں یات ءُ گیراں بہ جیڑاں باریں

ھدا تئی گنج اِنت نہ اِنت کہ کمی
گماں گوں سیراں بہ جیڑاں باریں

کول ءُ کسم آ سوگند ءُ وادہ
دوست ءِ گوں گپاں بہ جیڑاں باریں

بہ باں من چاکر مریدے یا کہ
ھانی ءِ یاتاں بہ جیڑاں باریں

ھبر اِے کٹ اِت دوست اِنت نوں رکست
گل ءُ من شاتاں بہ جیڑاں باریں

گُلؔے آں ھرجاہ من پل اوں شانتگ
بہ ریچاں ارساں بہ جیڑاں باریں

سر بیتگیں ھالانی رد ءَ روکپتی بلوچستان ءَ ایرانی آمیدگس ءِ پرمان ءَ یک بندیں بلوچے پاھو دیگ بیتگ –

ھالانی تہ ءَ گوشگ بیتگ روکپتی بلوچستان ءِ دمگ ھیرآباد بیرجند ءِ جھمنندیں اھمد نھتانی ء مولوی شیراھمد گوستگیں روچ ءَ ایرانی آمیدگس ءِ پرمان ءَ سبزوار ءِ زندان ءَ پاھو دیگ بیتگ –

اھمد نھتانی سَے سال ءَ پیسر سبزوار ءَ ما نشہ ءِ بھتام ءَ گرگ بیتگ ءُ چریشی ءَ پد آئی ءَ اے سَے سال ءِ دراجیں مُدت ءِ گوازینگ ءَ پد گوستگیں روچ ءَ آئی ءِ گڈی روچ نامینگ بیت –

اھمد نھتانی روکپتی بلوچستان ءِ دمگ ھیر آباد بیرجند ءِ جھمنند اِنت ءُ گوستگیں دو روچاں پیسر آئی ءِ کھول ءِ مردم ماں سبز وار ءِ زندان ءَ گڈی گِندوک ءَ شتگ بیتگ اَنت –

روکپتی بلوچستان ءَ بلوچانی پاھو دیگ یکشل ءَ برجاہ اَنت ءُ ایرانی ھمے سال ءِ بندات ءَ داں انیگ ءُ 63 سَے مردم پاھو دیگ بیتگ اَنت کہ آیانی سر ءَ جتا جتائیں بھتام بیتگ اَنت –

بلوچستان ءَ تیرگواری ءُ دگ ءِ وئیل ءَ دو مردم بیران ءُ یکے ٹپی بوتگ-

گیشیں ھالانی رِد ءَ تیاب دپی شھر گوادر ءِ ھند سربندن ءَ یک ڈمپرے ءَ پرپٹے جتگ ءُ چریشی ءِ آسر ءَ پرپٹ ءَ سوار ابدالرشید ء اسماعیل ءُ ابدلرحمان ء الہی بخش ٹپی بوتگ اَنت-

پہ الاج ءِ ھاتر ءَ نادُراھجاہ ءَ برگ بوتگ اَنت ءُ ابدالرشید ءَ ٹپانی درد نہ سگ اِتگ ءُ بیران بوتگ-

ھمے پئیم ءَ بلوچستان ءِ دمگ قلات ءَ ناشناسیں سلاہ بندیں مردمانی تیرگواری ءَ چہ یک مردمے بیران بوتگ-

بیران بوتگیں مردم ءِ پجّار محمد رحیم نام ءَ چہ بوتگ ءُ پولیس ءَ آئی جون چست کتگ ءُ نادُراھجاہ ءَ برتگ، زانگ بہ بیت کوش ءِ سوب داں انگت زانگ نہ بوتگ-

مند ءَ پوجی پانگس ءِ سر ءَ اُرش کُتگ یک کارمند ءِ کُشتگ – میجر گوھرام

بلوچ آجوئی لوٹوکیں گل بلوچستان لبریشن پرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ گوستگیں روچ ءَ بیست ءُ شش دسمبر ءَ مئے سرمچاراں مند ءَ باگزو ءُ نھنگ ءِ میان ءَ سیمسراں ٹٹ جنوکانی پھازگی پانگس ءِ سر ءَ دورجنگ ءُ وتکاریں سلاھاں گوں اُرش کتگ –

جارکش ءَ گوشتگ اُرش ءِ آسر ءَ یک پوجی کارمند ءِ مُرتگ ءُ یکے زدگ بوتگ –
جارکش میجر گوھرام بلوچ ءَ وتی درشان ءِ گڈسر ءَ گوشتگ کہ بلوچستان ءِ آجوئی ءَ تاں زورگیریں پوج ءِ سر ءَ مئے اُرش ھمے داب ءَ برجاہ مان انت –

سربوتگیں ھالانی رِد ءَ گوستگیں شپ ءَ بلوچستان ءِ دمگ کیچ ءَ پاکستانی پوج ءَ گِس ءِ سر ءَ بیڑ برتگ یک مردمے زورانسری آوار جتگ ءُ بیگواہ کتگ –

آوار جنگ بوتگیں ورناہ ءِ پجار عارف ء سفر ءِ نام ءَ چہ بوتگ کہ تربت ءِ دمگ آبسر ءَ زورانسری اوار جنگ ءُ بیگواہ کنگ بوتگ -.

اھوالکار ءِ رِد ءَ اے مرد بالگتر چیری گڈگی ءِ جھمنند انت کہ اے وھدی تربت آبسر ءَ نندوک بوتگ –

اے ورناہ پیسر ءَ ھم پاکستانی پوج ءَ آوار جتگ بلے پد ءَ رند ءَ یل داتگ کہ گوستگیں روچ ءَ یکبرے پد ءَ آوار جتگ –

زانگ بہ بیت ھپتگے بیت کہ پاکستانی پوج ءَ کیچ ءَ چہ بازیں مردمے زورانسری آوار جتگ کہ آھانی تہ ءَ یکیں کھول ءِ شش مردم ھوار کہ تمپ ءِ دمگ سرنکن ءَ آوار جنگ بوتگ انت –

مروچی تمپ ءَ پاکستانی پوج ءِ بگیری کلاھو ءُ سرنکن ءِ مھلوک ءَ زھرشانی کتگ ءُ ایف سی بنجل ءِ دپ ءَ نندانک جتگ –

زھرشانی کنوکانی گوشگ ات کہ پوج ءِ کارمند ھمک روچ گِسانی تہ ءَ مانریچ انت ءُ مردماں تنگ کن انت ءُ آھانی زھگاں زورانسری اوار جن انت ءُ بیگواہ کن انت –

آھانی گوشگ ات کہ گوستگیں شپ ءَ ھم مزنیں کچ ءَ ایپ سی ءِ کارمنداں مئے گِسانی سر ءَ بیڑ برتگ ءُ مئے شش زھگ زورانسری آوار جتگ ءُ بیگواہ کتگ انت کہ آھانی درگت ءَ تنی وھدی ھچ وڑیں ھال ءُ اھوال نیست –