TBP Balochi

بلیدہ ءِ جھمنند ءُ پاکستانی پوج ءِ کارمند حنیف بلیدئی ءَ گوستگیں روچ ءَ بلیدہ گلی ءَ گِس ءِ تہ ءَ دور کُتگ ءُ ورنایے کُشتگ –

اھوالکار ءِ رِد ءَ کُشندہ ھمے الزام ءَ جنگ انت کہ ورناہ ءَ پاکستانی پوج ءُ اسلام ءِ بگیری ءَ گپ جتگ ھمے واستا کُشتگ –

کھول ءِ رِد ءَ کُشندہ ما پجاہ آؤرتگ ءُ وئیل ءِ وھد ءَ آئی ءَ وتی دیم ھم نہ گپتگ –

اھوالکار ءِ رِد ءَ کُشندہ ءِ سیادی چہ پاکستانی پوج ءَ انت ءُ اے وھدی بلیدہ ءِ تہ ءَ یک گچینی ءِ درچے ءِ رِد ءَ کار کنگ ءَ اِنت –

اے مرد چاگردی ترامجاہ پیس بُک ءِ تہ ءَ نجیب بلیدئی ءِ نام ءَ نبشتگ ءُ آئی اے گپ وتی پوسٹ ءِ تہ ءَ منّ اِتگ کہ گوستگیں روچ ءَ ورناہ ھما کُشتگ –

وھدیکہ کھول ءِ مردماں چہ سرکار ءَ لوٹ کتگ کہ کُشندہ ءِ بگیری ءَ کانودی کاروائی کنگ بہ بیت بلے تنی وھدی سرکار ءِ نیمگ ءَ ھچ وڑیں گامگیج زورگ نبوتگ –

سر بیتگیں ھالانی رد ءَ روکپتی بلوچستان ءِ دمگ اسلام آباد لوتک ھامون ءَ ٹریکٹرانی تیل ءِ نہ پجگ ءِ ھلاپ ءَ زھرشانی کرتگ –

زھرشانی کنوکانی گوشگ اِنت بازیں روچ اَنت مئے ٹریکٹراں تیل دیگ بیگ ءَ نہ اِنت چریشی ءِ سبب ءَ مئے ٹریکٹراں تیل نیست اِنت –

دھکانکارانی گوشگ اِنت ٹریکٹرانی تیل ءِ نہ رسگ ءَ مارا بازیں چیزانی تاوانانی دیمپانی اِنت-

دھکانکاراں وتی ٹریکٹرانی ھواری ءَ تیل بھر کنوک ءِ کارگس ءِ دیم ءَ مُچ بیتگ ءُ زھرشانی بندات کرتگ –

آیانی گوشگ اِنت ما اد ءَ اتکگ ءُ زھرشانی کنگ ءَ اِنت بلے تیل واکدارانی گوشاں مورے ھم نہ وارت تنی وھدی کسے نیتکگ ءُ مئے ھال پرسی اش نہ کرتگ ءُ نانکہ مئے جیڑہ ءِ گیشنگ ءَ کسے ءَ گامگیج زرتگ-

آیاں لوٹ کرتگ ءُ گشتگ کہ مئے جیڑہ گشینگ بہ بیت ءُ مارا پہ وھد تیل ءُ دیگ دانکہ ما وتی کشار ءُ دگہ آسراتیاں سرجم کرت بہ کن ایں –

بلوچستان ءِ دمگ کیچ ءِ ھنکین تمپ ءَ پاکستانی پوج ءِ زوراکیانی ھلاپ ءَ کلاھو ءُ سرنکن ءِ مھلوک ءَ زھرشانی کنان ءَ ایف سی ءِ بنجل ءِ دیم ءَ زھرشانی نندانک جتگ –

تمپ ءِ دمگ کلاھو ءُ سرنکن ءَ سیادی داروکیں بازیں کچے ءَ مردین ءُ زالبولاں ھوار زھگاں سَے شمبے ءِ روچ ءَ سارتی ءَ زھرشانی کنان ءَ ایف سی ءِ بنجل ءِ دیم ءَ تمپ ءَ نندانک جتگ –

زھرشانی کنوکانی گوشگ اِنت کہ پوجی کارمند ھمک روچ لوگاں مانریچ اَنت ءُ مارا تنگ کنگ ءَ اَنت ءُ مئے زھگاں ابید ءِ ارزی گرزی ءَ گرگ ءُ بیگواہ کنگ اِنت – آیاں گشتگ گوستگیں شپ ءَ ایف سی ءِ بازیں کارمنداں مئے لوگاں مانریتکگ ءُ مئے زھگ اش گپتگ اَنت ءُ آیانی درگت ءَ ھچ ھال نیست اِنت –

آیاں گشتگ کہ اے مردمانی تہ ءُ ساری ء براھیم، عارف ء رحیم جان، مصدق ء رحیم جان، لطیف ء مھمد، شیراز ء اسماعیل ءُ عظیم ء نزرت ھوار اَنت انگت ءَ بیگواہ اَنت –

آیاں لوٹ کرتگ دراھیں بیگواھیں مردم یل کنگ بہ بنت اگاں مجرم اَنت آیانی درگت ءَ سبوت پیش بہ کنت آیانی سبوتاں آمیدگساں پیش بہ کنت ءُ آیاں انساپ دیگ بہ بیت اگان اے وڑ ءَ مردماں گرگ ءُ بیگواہ گڑا آمیدگسی کانونانی پروشگ اِنت ءُ چریشی ءَ پد اسسٹنٹ کمشنر تمپ ءُ ایس ایچ او تمپ ءُ گپ ءُ تران ءِ جھد کتگ ءُ آیاں اشانی گپ من اتگ ءُ بیگواھیں مردمانی یل کنگ ءِ باوری کنائینتگ اَنت –

آیاں گشتگ کہ دراھیں بیگواھیں مردم یل کنگ بہ بنت اگاں تمپ ءُ تربت ءِ دگ بند کنگ بیت اِنت –

نبشتانک: زاناں سید ءَ راجی شائِری نہ کتگ؟

نبشتہ کار: ساجد بلوچ

دی بلوچستان پوسٹ

راجی شائِری ءُ واجہ سید ءِ کِرد راجی شائِری ءِ تہ ءَ بیان کنگ ءَ پیسر، اے چیز بلوچ راج ءِ واست ءَ الم اِنت آ بہ زان اَنت کہ واجہ سید ءِ کِرد بلوچی زبان ءِ تہ ءَ چون ڈالچار کنگ بیتگ چوناھا اگاں یک زبانزانتے بِنند ایت ءُ بلوچی زبان ءِ ھر تَک ءُ پھناتاں پٹّ ءُ پول بہ کنت گڑا آ اے سرپد بیت کہ ابید نمیرانیں سید ءِ جُھد ءَ دیگ ءَ ھچ گِندگ ءَ نئیت۔ توری آ شیر ءُ شائِری ءِ پڑ بہ بیت، گدار ءُ آزمانک ءِ پڑ ءُ یاکہ بلوچی سْاھگ راست نبسّگ ءُ گالگنج ءِ پڑ بہ بیت آئی ءَ بلوچی زبان ءِ ھر پڑ ءَ کار کُتگ۔ اگاں واجہ مہ بیت اِنت، گڑا بارے بلوچی زبان نامیں چیزے ھست اَت یا نا بلے اگاں ما دومی نیمگ ءَ بچار ایں گڑا ما اے پھم ایں کہ واجہ ءِ کِرد کجام اساب ءَ ناشریں مردماں دیم ءَ ھارگ ءَ نیشتگ۔ آیانی مستریں پندل سید ءِ سْیاھگ راست نبسّگ گاجِیل کنگی بیتگ ءُ آ اے کار ءِ کنگ ءَ سوبمند بیتگ اَنت۔ چمیشکا انگت مئے مرچیگیں پدْریچ بلوچی زبان ءِ نبشتہ کنگ ءَ جیڑھانی ھماچ انت آیاں وھدے کہ سید ءِ زند ءِ ءُ کِرد ءِ سر ءَ گپ جتگ گڑا ما ھمے سرپد بیں کہ آیاں چے ڈول ءَ سید ءِ سرجمیں کار بلوچی زبان ءِ پڑ ءَ ڈالچار کُتگ اَنت۔

کومی شائِری ءِ بزانت ھما شائِری اِنت کہ یک شائِرے وتی چاگرد ءِ سیاسی، راجمانی، باپاری، ءُ ھلمی جیزھانی سر ءَ شیر پر بہ بند ایت۔ اے ھما شائِراں ءَ گْوش اَنت کہ آ وتی راج ءِ جیڑھانی سر ءَ پِگر بہ کن اَنت بلے راجی شائِری ءِ واست ءَ الم نہ اِنت کہ آ شائِر ءَ سیاسی سیادی بہ بیت۔ جاھے واجہ سباہ دشتیاری گْوش ایت کہ اگاں من واجہ سید ءِ بارہ ءَ وانگ بندات کُت گڑا من ءَ سک باز گروگ اتک پر چا کہ واجہ سباہ ءَ زانتگ کہ واجہ سید ءَ اے زند ءِ تہ ءَ باز درد سگّیتگ واجہ سباہ اے ھم گْوش ایت کہ واجہ سید ءِ ھر شیر ءِ بندانی تہ ءَ راجی شائِری مارا گِندگ ءَ کیت بلے بژن ءِ گپ ایش اِنت کہ مرچیگیں پدْریچ واجہ ءِ کارانی جُھد ءَ ڈالچار کنگ ءَ انت انیگیں وھد ءَ گیشتر بلوچ لس مھلوک اکبال، شاہ لتیپ بھٹائ، کواجہ گلام پرید، ءُ گالب ءِ شیراں گیشتر اَرزِشت دے اَنت مرچیگیں بلوچ لس مھلوک اے ھم گْوش اَنت کہ آیانی شیراں دیمروی ھارتگ۔ درد ءِ گپ ایش اِنت کہ گڑا واجہ سید ءَ ھچ نہ کُتگ بوت کنت اے زالمیں سامراج ءِ پندال اَنت کہ مرچی بلوچ راج پدمنَتَگ جوڑ بیتگ۔

واجہ سید ءِ تہ ءَ راجی شائِری سد در سد مان بیتگ۔ سید ھاشمی جاھے اے ڈول گْوش ایت،
“راجے کہ بہ بیت گنگ نہ مان ایت ءُ نہ مان ایت،
مان ایت پہ ادارُکے بزاں زندگ ءَ مُردار
اد ءَ چے ما اے سرپد بیں کہ واجہ ءَ وتی شھدیں زبان ءِ سر ءَ ھم پِگر کُتگ۔ ابید بازیں جیزھانی دوچار کَپگ ءَ، واجہ ءَ بلوچی زبان رکینتگ۔ واجہ بلوچستان ءِ کُنڈ کُنڈ ءَ شُت ءُ وتی زبان ءِ گال پٹّ ءُ لوٹ کُت۔ مرچی مئے دیم ءَ بلوچی زبان ءِ گالگنج یک بلاھیں درورے۔ واجہ ءَ بلوچی سْیاھگ ءِ راست نبسّگ ھم اڑ کُتگ۔ واجہ سید ءَ بلوچی زبان ءِ سھجیں چیز جریدگ کُتگ اَنت۔

جاھے واجہ پد ءَ اے ڈول ھم گْوش ایت،
“شال پیسر سگار ءِ ھرجان اِنت،
دیناں بے سیتّ ءِ گنجیں گوادر شُت”۔
اے دوھیں بندانی تہ ءَ اے چیز ساپ ءُ پلگار اِنت کہ واجہ ءَ وتی راج ءِ درد ماریتگ۔ واجہ ءَ راست گْوشتگ مرچی پکّ ءَ ھمے داب بوھگ ءَ اِنت۔ پمیشکا اگاں من ءَ ھر کس جُست بہ کنت کہ واجہ سید ءَ راجی شائِری کُتگ۔ گڑا منی پسّو اے بیت ھو واجہ سید ھاشمی یک راجی شائِرے بیتگ پرچا کہ اے گپ اد ءَ پدّر اِنت کہ واجہ ءَ وتی راج ءِ گلامی ماریتگ ءُ پد ءَ راجی جیڑھانی سر ءَ شیر پربستگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ اسٹوڈنٹس ایکشن کمیٹی کراچی ھنکین ءِ نیمگ ءَ گوستگیں روچ 26 دسمبر دوھزار ءُ بیست ءُ یک ءَ یک گرینڈ سرکلے ھنکینی کماش پیرجان بلوچ ءِ سروکی ءَ برجم دارگ بوتگ کہ آئی ءِ سرھال ” کراچی ءِ گوستانک ءِ تپّاس” بیتگ دیوان ءِ تران کنوک غلام رسول کلمتی گچین کنگ بیتگ –

دیوان ءَ تران کنان ءَ غلام رسول کلمتی ءَ گُشتگ کہ بلوچ چہ قدیم ءَ کراچی ءِ جھمنند بوتگ اَنت ءُ کراچی چہ بنیاد ءَ ریاست قلات ءِ بھرے بیتگ ءُ پد ءَ سندھ ءِ حکمراناں کراچی ءَ تالپور کنفیڈریسی ءَ ھوار کتگ-

دیوان ءَ دیمتر ءَ آئی ءَ گُشتگ کہ کراچی دائم ءَ بلوچانی واستا لوگے بیتگ ءُ بلوچاں اے زمین ءِ ھاتر ءَ بے کساس قربانی داتگ- وھدیکہ انگریز اے زمین ءِ سر ءَ اتکگ اَنت گڑا ھمے بلوچ بیتگ اَنگ کہ 1839 ءَ انگریز ءِ دیم ءِ دارگ ءِ ھاتر ءَ منّوڑا ءِ قلات ءَ لھتے سپاھیگ ءُ یک بَلُّک ءُ نماسگے ءَ گھگیری کتگ –

دیم ترا آئی ءَ گُشت کہ وھدے انگریز قلات ءُ سندھ ءِ سر ءَ اُرشکار بیتگ اَنت گُڑا کراچی ءَ قادر بخش رند انگریز ءِ ھلاپ ءَ سلاہ بندیں جھد ءَ بندات کنت- کراچی ءِ گوستانک ءِ تہ ءَ دگہ یک مزنیں نامے ” چاکر نوتک” اِنت- چاکر نوتک ھم انگریزانی ھلاپ ءَ گوریلہ جنگ کنت ءُ بازیں جنگاں انگریز لشکر ءَ پروش دنت بلے سیاسی کُمک نہ رسگ ءِ سبب ءَ چاکر سوب مند نہ بیت اِنت۔

غلام رسول کلمتی ءَ گشت کہ مئے مھلوک ءِ تہ ءَ سیاسی سنچ نہ بوگ ءِ سبب ءَ مئے بازیں ھند ءُ دمگ چہ ما پُلگ بوتگ اَنت اگاں مئے تہ ءَ سیاسی پگر مھکم بوت اِنت، بلکیں مرچی مئے جاور اے وڑ ءَ نہ ات اَنت انچو کہ 10 ھزار انگریز اتکگ ءُ 10 کروڑ مھلوک ءِ سر ءَ ھاکمی اِش کتگ ءُ ایش آھانی سیاسی پگر ءِ مھکمی بوتگ اَنت۔

دیمتر ءَ آئی ءَ گُشت کہ کراچی ءِ تہ ءَ کْوھنیں دمب اوں دست کپتگ اَنت اوزار ءُ دگہ چیز ھم کہ اے بلوچ چہ کرناں کراچی ءِ جھمنند بوتگ اَنت ھمیشانی نشانی اَنت ءُ چو کہ مُھکمیں سیاسی گل ءُ سیاسی پگر ءِ نہ بوگ ءِ سبب ءَ جتاجتائیں تاکتاں بلوچ ءَ را پروش داتگ ءُ چہ کراچی ءَ مزنیں کچے ءَ کشگ ءَ بوتگ اَنت۔

غلام رسول کلمتی ءِ گشگ اَت کہ کراچی انگت ءَ تیوگ ءَ بلوچ ءِ دست ءَ چہ نہ شتگ، انگت کراچی ءِ سئے یا چاریں نیم ءَ ھما کہ کراچی ءِ راہ اَنت انگت ھمود ءَ بلوچ جھمنند اَنت یا کراچی ءِ تیاب دپ بہ بیت دراھیں بلوچ انت اے چیز ءَ چہ پدر بیت کہ بلوچ چہ کرناں کراچی ءَ جھمنند بوتگ اَنت-

آئی ءَ دیمترا گشت کہ مئے بدبھتی اِنت مئے مردماں وت ءَ خانہ بدوش گشتگ اے ھم ھما تاکتانی یک پالیسی ءِ بوتگ، بلوچ ءَ اگاں لڈ ءُ بار کتگ موسم ءِ بدل بوگ ءِ سبب ءَ بلے آ چہ وتی سرڈگار ءَ در نہ شُتگ مکوران ءَ اگاں ڈُکّال بوتگ آ کراچی ءَ اتکگ اَنت کراچی ءَ بلوچ وتی سرڈگار سرپد بیت یا کراچی ءَ چہ بلوچاں لڈ ءُ بار کتگ مکوران یا بلوچستان ءِ کجام ھم دمگ ءَ شتگ اَنت آیاں بلے وتی زمین یلہ نہ داتگ اَنت-

گڈسر ءَ دیوان ءَ ساڑی ئیں باسکاں وتی وتی جست ایر کت اَنت ءُ واجہ ءَ آیانی پسّو دات ءُ دیوان ءِ کارگشاد ءَ دیوان ءِ منت گپت ءُ ھلاسی ءِ جار جت-

بلوچستان ءِ دمگ کیچ ءِ ھند تربت ءَ پاکستانی پوج ءَ یک بیڑے ءِ وھد ءَ ھپت مردمانی کوش ءِ ٹاہ داتگ –

پوج ءِ واکداراں ٹاہ داتگ ءُ گوشتگ کہ جنگ بیتگیں مردمانی گور ءَ سلاہ ءُ تراکناکہں شورو دزکپتگ اَنت -انتزامیہ ءِ رد ءَ سلاہ بندیں مردمانی ھال ءِ سر بیگ ءَ پوج ءَ بیڑ برتگےُ ھپت مردم کُشگ بیتگ اَنت کہ آیانی گور ءَ سلاہ ءُ شورو دزکپتگ اَنت –

دلگوش اے بنداتی ھال اَنت اے درگت ءَ دیمتر ءَ گیشتریں ھال ھوار گیجگ بنت-

گدسن اسپورٹس ھزدار ءَ دومی بر ءَ سٹی چیمپیئن لیگ ءِ تاج کٹ اِتگ ءُ وتی نام ءَ کتگ –

گُڈی گوازی گدان اسپورٹس ءَ جیلانی اسپورٹس ءَ را پنچ وکٹاں پروش داتگ گچینی ءِ داد وتی نام ءَ کتگ –

گڈی گوازی ءَ مھمد عامر ءَ ھپتاد ءُ پنج رن ءُ وکٹ وتی نام ءَ کتگ ءُ گوازی ءَ یک دلکشیں جاھے پہ وت ءَ نامینتگ – مھمد عامر سَے سد رن آروکی ءِ ھمراھی ءَ ٹورنامنٹ ءَ جوانتریں بیٹسمینے منّگ بیتگ-

ھمے وڑ مھمد آصف ءَ بیست ءُ دو وکٹانی ھواری ءَ ٹورنامنٹ ءَ جوانتریں بالر ءُ جوانتریں جاھے پہ وت ءَ گپتگ –

گڈی گوازی ءِ گچینی ءِ مھمان آغا شکیل اھمد درانی بیتگ آئی ءَ ٹورنامنٹ ءِ واستا پنجاہ ھزار ءُ چیمپیئن ٹیم ءِ واستا دَہ ھزار رن ءِ واستا پنچ ھزار دستی کلدار داد دیگ ءِ جار جتگ –

بلوچستان ءِ دمگ کیچ ءَ پاکستانی پوج ءَ یک ھپتگے ءِ تہ ءَ یکیں کھول ءَ سیادی داروکیں ھپت گپتگ ءُ بیگواہ کرتگ اَنت –

پوج ءَ گوستگیں شپ ءَ یک رندے پد ءَ کیچ ءِ دمگ تمپ سرنکن ءَ بیڑ برتگ ءُ اود ءَ دو برات دزگیر کنگ ءَ پد بیگواہ کرتگ اَنت – بیگواہ کنگ بیتگیں ھردوکیں براتانی پجار عارف ءُ مصدق ء رحیم جان ءِ ناماں زانگ بیتگ اَنت –

زانگ بہ بیت اے ھردوکیں برات ھمے ٹک ءِ ھپتیں مردمانی تہ ءَ اَنت یکیں ھپتگ ءِ تہ ءَ پوج ءَ بیڑ برتگ ءُ بیگواہ کرتگ اَنت-

اشی ءَ پیسر چار مردم بشام ء غلام مھمد، ساری ء ابراھیم، شیراز ء اسماعیل ءُ حکیم ء غلام مھمد بیست ءُ سَے رمس ءَ بیگواہ کنگ بیتگ اَنت کہ انگت ءَ بیگواہ اَنت ءُ اشانی پجیگ ءَ بیست ءُ سَے رمس ءَ گرگ بیتگیں حکیم ء غلام مھمد گوستگیں روچ ءَ یلو بیتگ ءُ وتی لوگ ءَ سر بیتگ –

اشی ءَ ابید گوستگیں روچ ءَ پاکستانی پوج ءَ یک لوگے ءَ بیڑ برتگ ءُ لطیف ء مھمد آوار جتگ ءُ برتگ –

پریمئیر لیگ فٹبال گوازی برجاہ دوشی شپ ءَ دوازدہ ٹیمانی میان ءَ گوازی کنگ بوتگ کہ آھانی تہ ءَ ساؤتھ امپتون ءَ سَے، ٹوٹنھم سَے، ارسنل ءَ پنچ، مانچسٹر سٹی ءَ شش، چیلسیا ءَ سَے ءُ برائیٹون ءَ دو گول ءَ گوازی کٹ اتگ –

دوشی شپ ءَ بوتگیں پریمئیر لیگ ءِ اولی گوازی ویسٹ ہام ءُ ساؤتھ ایمپتون ءِ میان ءَ کنگ بوتگ کہ ویسٹ ہام ءِ نیمگ ءَ چہ دو گول دیگ بوتگ وھدیکہ ساؤتھ ایمپتون ءِ لیبیاں سَے گول اسکور کتگ گوازی وتی نام ءَ کتگ –

دل سُرینوکیں گپ ایش اِنت ویسٹ ھام ءَ اے گوازی پہ وتی لیک اِتگ اَت بلے ساؤتھ ایمپتون ءِ گوازی کنوکاں اے گوازی ویسٹ ھام ءِ بچکانی دست ءَ پچ گپت ءُ برت-

ٹوٹنھم ءُ کریسٹال فلیس ءِ میان ءَ بوتگیں دومی گوازی ءَ ٹوٹھم ءَ کریسٹال ءِ دیم ءَ چہ سَے گول ءَ گوازی کٹ اتگ وھدیکہ کریسٹال ءِ نیمگ ءَ چہ ھچ گول اسکور کنگ نہ بوتگ –

سیمی گوازی نارویچ سٹی ءُ ارسنل ءِ میان ءَ کنگ بوتگ کہ ارسنل ءِ لیبیاں جوانی ءَ گوازی کنان ءَ پنچ گول اسکور کتگ وھدیکہ نارویچ لیبی گول اسکور کنگ ءَ بے سوب بوتگ انت ءُ ارسنل ءَ پنچ گول ءَ گوازی کٹ اتگ –

مانچسٹر سٹی ءُ لیسسٹر سٹی ءِ میان ءَ بوتگیں گوازی ءَ لیسسٹر سٹی ءِ نیمگ ءَ سَے گول اسکور کنگ بوتگ وھدیکہ مانچسٹر لیبیاں جوانی ءَ گوازی کنان ءَ شش گول اسکور کتگ ءُ گوازی کٹ اتگ –

آسٹون ویلا ءُ چیلسیا ءِ میان ءَ بوتگیں پنچمی گوازی ءَ چیلسیا ءَ سَے پہ یک گول ءَ گوازی کٹیتگ – آسٹون ویلائے نیمگ ءَ چہ یک گول ءِ اسکور کنگ بوتگ چیلسیا ءِ لیبیاں جوانی ءَ گوازی کنان ءَ سَے گول اسکور کتگ گوازی وتی نام ءَ کتگ-

یوروپئین پریمئیر لیگ ءِ گوستگیں شپ ءَ گڈی ششمی گوازی برائیٹون ءُ برینٹ فورڈ ءِ میان ءَ کنگ بوتگ برینٹ فورڈ ءِ لیبی ھردو ھاپ ءَ گول اسکور کنگ ءَ بے سوب بوتگ انت وھدیکہ برائیٹون ءِ لیبیاں جوانی ءَ گوازی کنان ءَ اولی ھاپ ءَ یک گول ءِ اسکور کُتگ ءُ دومی ھاپ ءَ ھم دومی گول اسکور کتگ گوازی وتی ٹیم ءِ نام ءَ کتگ –

سیو اسٹوڈنٹس فیوچر ءِ بُنجاھی کابینہ ءِ دیوان چیئرمین فضل یعقوب بلوچ ءِ سروکی ءَ کنگ بوتگ ، چریشی ءَ گشیتریں باسکاں بھر زرتگ ءُ جتاجتائیں بُنگپانی سر ءَ گپ بوتگ-

دیوان ءِ نزامت گل ءِ جنرل سیکریٹری قدیر شیخ ءَ زرتگ ءُ آئی ءَ گل ءِ ساب ءُ کتاب پیش کتگ چریشی ءَ شریں وڑے ءَ چار ءُ ٹپاس کتگ ءُ اشی ءَ پد ایرجنگی ھیال لیکہ ءَ پد جتائیں شور کنگ بوتگ اَنت-

رپورٹ ءَ گوشگ بوتگ کہ اے سال ءَ ایس ایس ایف ءِ راھشون ، جوانیں سر ءُ سوج ءُ سرپدی کنگ ءِ سبب ءَ چہ خضدار ءَ چہ ھزرانی ھساب ءَ جنک ءُ بچکیں نودربراں بلوچستان ءُ بلوچستان ءَ چہ در پنجاب ، سندھ، خیبر پختونخواہ ءُ آسلام آباد ءَ داخلہ رستگ-

ایس ایس ایف ءِ بُنجاھی کابینہ سرجم بوتگ ءُ 2022 ءِ بنداتی ھپتگ ءَ نوکیں کابینہ ءِ جار ءَ جن ایں، آؤکیں کابینہ ءِ جوڑ کنگ ءِ ھاتر ءَ الیکشن کمیٹی ءِ آرگ ءَ چست ءُ ایر بیت-

جارکش ءَ وتی درشان ءِ تہ ءَ گوشتگ کہ خُضدار ءَ ابید بلوچستان ءِ جتائیں دمگاں چہ سنگتانی گوشگ ءِ سر ءَ گل خضدار ءَ چہ ڈن سرجمیں بلوچستان ءَ چست ءُ ایر ءِ شور کتگ-

ھمے سال ءَ گل ءِ راہ راھبندانی پروشگ ءِ سر ءَ سنگت نعیم بلوچ ءَ چہ وتی اوگد ءَ چہ ھلاس کتگ چریشی ءَ پد سنگت نعیم بلوچ ءَ وتی ردی منّ اِتگ اَنت ءُ پد ءَ آ وتی اوگد ءِ سر ءَ آھگ ءِ دزبندی کتگ ءُ باور کنائینتگ کہ آ دیمتر ءَ گل ءِ راہ راھبندانی پابند بیت- چریشی ءَ گل ءِ بُنجاھی کابینہ ءَ شور ءُ سلاہ ءَ پد سنگت نعیم بلوچ ءِ اوگد ءَ سر ءَ آورتگ- گُڈی ءَ آؤکیں کار ایر کتگ اَنت-