TBP Balochi

سربوتگیں ھالانی رِد ءَ سندھ ءِ دمگ ٹھٹھہ ءَ پنجگور ءِ جھمنندیں مردم ءِ جون دست کپتگ –

اھوالکار ءِ رِد ءَ دست کپتگیں جون پنجگور ءِ دمگ عیسی ءِ جھمنند بوتگ کہ انوگاں بلوچستان ءِ باپاری شھر ھب چوکی ءَ اتکگ ءُ نندوک بوتگ –

دست کپتگیں جون ءِ پجار سرفراز ء خدابخش ءِ نام ءَ چہ بوتگ کہ دو روچ ساری ناشناسیں مردماں چہ ھب چوکی ءَ آوار جتگ ءُ بیگواہ کتگ کہ مروچی آئی ءِ جون سندھ ءِ شھر ٹھٹھہ ءَ دست کپتگ کہ کل کنگ – آئی ءِ جون کڈ ءَ چہ کشگ ءُ نادراھجاہ ءَ سرکنگ بوتگ –

نادراھجاہ ءِ بنشون ءِ رِد ءَ اے مرد تیر جنگ ءُ کُشگ بوتگ بلے تنی وھدی کوش ءِ درگت ءَ ھچ وڑیں سرپدی نہ رس اتگ کجام سبب ءَ کُشگ بوتگ –

سندھ ءِ مزن شھر کراچی ءَ مروچی یکشمبے ءِ روچ ءَ سَے سال ءَ پیسر زورانسری آوار جنگ بوتگیں ورناہ راشد حسین بلوچ ءِ یل کنائینگ ءِ ھاتر ءَ زھرشانی کنگ بوتگ –

سال دوھزار ءُ ھژدہ ءَ بیست ءُ شش رمس ءَ متھدہ ارب امارات ءِ شھر شارجہ ءَ چیریں ادارھانی دست ءَ زورانسری آوار جنگ بوتگیں راشد حسین بلوچ ھما سال ءِ جون ءِ ماہ ءَ گیر کانودی پاکستان ءِ ھوالگ ءَ کنگ بوتگ –
کھول ءِ نیمگ ءَ کراچی پریس کلب ءِ دیم ءَ زھرشانی کنگ بوتگ مردماں مزنیں کچے ءَ زھرشانی ءَ بھر زرتگ – زھرشانی کنوکیں مردمانی دست ءَ راشد حسین بلوچ ءِ اکس، پلے کارڈ ءُ بینر بوتگ انت، زھگ ءُ زالبول ءُ ورنایاں راشد حسین بلوچ ءِ یل کنگ ءِ لوٹ کُتگ ءُ گوشتگ کہ آمیدگس ءَ آرگ بہ بیت –

زھرشانی ءَ سندھی ءُ پشتون رھشوناں ھم بھر زرتگ ءُ پاکستان ءِ سرکار ءَ چہ راشد حسین ءِ یل کنگ ءِ لوٹ کُتگ ءُ گوشتگ کہ اے وھدی بلوچ پشتون ءُ سندھی سیاسی باسک مزنیں کچے ءَ پاکستان ءِ چیریں ادارھانی کرا ءَ انت –

زھرشانی ءَ سِی اگست دوھزار ءُ ھژدہ ءَ نوشکی ءَ چہ زورانسری آوار جنگ بوتگیں رشید بلوچ ءُ آصف بلوچ کھول ءَ ابید لھتے ماہ پیسر کراچی ءَ چہ زورانسری آوار جنگ بوتگیں عبدالحمید زھری ءِ چُک ھم ھوار بوتگ اَنت کہ آھاں وتی دوستیگیں مردمانی اکس گون بوتگ انت ءُ پاکستانی ادارھاں چہ ھک ءِ لوٹ کُتگ –

زھرشانی ءَ تران کنان ءَ زورانسری آوار جنگ بوتگیں راشد حسین بلوچ ءِ مات ءِ گوشگ ات کہ راشد ءِ ھمراھی ءَ منی گِس ءِ درسیں وشی ھم بیگواہ انت –

مات ءِ گوشگ ات کہ منی زھگ ءِ سر ءَ ھما سنگینیں الزام کہ جنگ بوتگ انت آمیدگس ءَ سابت کنگ بہ بنت چوش دُزانی وڑ ءَ منی زھگ بیگواہ کنگ بوتگ –

راشد حسین ءِ مات ءَ یکرندے پد ءَ درسیں انسانی ھکانی ادارھاں چہ لوٹ کُتگ گوشتگ کہ راشد حسین ءِ یل کنائینگ ءَ وتی کرد ءَ پیلو بہ کن انت – راشد ءِ جُرم ھمے بیتگ وتی مردمانی سر ءِ زوراکی ءِ سر ءَ توار چست کتگ ءُ دگہ ھچ –

زھرشانی ءَ راشد حسین ءِ برازتگ ماہ زیب بلوچ ءِ گوشگ ات کہ من ءَ سَے سال انت کہ اے دگانی سر ءَ زھرشانی ءَ انت ءُ منی جُھد وتی ناکو ءِ یل کنائینگ ءِ ھاتر ءَ انت –

آئی ءِ گوشگ ات کہ من وتی کماشیں بی بی ءِ ھمراھی ءَ سَے سال انت ھر چار راہ ءُ دگانی سر ءَ زھرشانی ءِ انت ءُ اشی ءَ ابید من آمیدگس ءُ کمیشن ءَ ھم شُتگ انت بلے مار ءَ دروگیں تسلی ءَ ابید ھچ نہ رس اتگ –

آئی ءِ گوشگ ات کہ مئے گِس ءِ تہ ءَ وشی نیست ما درست گمزدگیں، منی ناکو بید جرم ءُ دروگیں الزام ءَ سَے سال انت کہ بیگواہ کنگ بوتگ –

زھرشانی ءَ وائس فار بلوچ مسنگ پرسنز ءِ کمک سرکماش ماما قدیر بلوچ، بیگواھیں بلوچ رھشون ڈاکٹر دین محمد بلوچ ءِ زھگ سمی بلوچ ءَ تران کنان ءَ گوشتگ کہ راشد حسین بلوچ آمیدگس ءَ آرگ بہ بیت ءُ آئی ءِ سر ءَ جنگ بوتگیں الزام سابت کنگ بہ بنت اے وڑ بید جُرم ءَ آئی ءَ بیگواہ کنگ وت یک جُرمے –

سمی دین ءِ گوشگ ات کہ راشد ھما الزامانی سر ءَ زورانسری آوار جنگ بیگواہ کنگ بوتگ ھمے وڑ پنچ دگہ ورناہ ھمے جُرم ءَ بیگواہ کنگ بوتگ انت پد ءَ رند ءَ آمیدگس ءَ آرگ بوتگ انت ءُ ما ھم ھمے گوشگ لوٹیں راشد حسین ھم آمیدگس ءَ آرگ بہ بیت –

زھرشانی ءَ تران کنان ءَ انسانی ھکانی باسک عبداللہ بلوچ ءِ گوشگ ات کہ راشد حسین انسانی ھکانی باسکے بوتگ ءُ مدامی مئے مراگشاں ھوار بوتگ آ بیگواہ کنگ بوتگ –

عبداللہ بلوچ ءَ راشد حسین ءِ یل کنگ ءِ لوٹ کتگ گوشتگ کہ پاکستان آئی ءَ وتی آمیدگس ءَ بیار ایت – آئی ءَ گوشتگ کہ گوستگیں روچاں گوادر ءَ سَے ورناہ زورانسری آوار جنگ بوتگ اَنت ءُ پد ءَ رند ءَ سی ٹی ڈی ءِ ھوالگ ءَ کنگ بوتگ انت –

عبداللہ بلوچ ءِ گوشگ ات کہ من ھماھاں چہ یکے ءِ کھول ءَ ھال اھوال کتگ گڑا آھاں گوشگ بوتگ کہ شما ھچ مگوش اِت –

آئی ءِ گوشگ ات کہ بلوچستان ءَ زورانسری اوار جنگ بوتگیں مردمانی کھول تُرسینگ بنت بازکمے مردم دیم ءَ کیت –

راشد حسین بلوچ ءِ کھول ءَ زھرشانی ءَ پد رسانکدراں داتگیں درشان ءِ تہ ءَ گوشتگ کہ سَے سال ءَ پیش مروچیگیں روچ ءَ بیست ءُ شش دسمبر سال ھزار ھژدہ ءَ متھدہ ارب امارات ءَ بیست ءُ سَے سالی ئیً ورناہ انسانی ھکانی باسک راشد حسین بلوچ دزگیری ءَ پد سَے ماہ ءَ تاں ھمود ءَ بیگواہ کنگ بوتگ ءُ پد ءَ رند ءَ آ گیرکانودی پاکستان ءِ ھوالگ ءَ کنگ بوتگ –

کھول ءِ گوشگ ات کہ اے میان ءَ ناں آئی ءِ سر ءَ کیس ءِ چارج کنگ بوتگ ناکہ آمیدگس ءَ آرگ بوتگ ءُ ناکہ آئی ءِ درگت ءَ ھاسیں سرپدی ءِ دیگ بوتگ ءُ ناکہ کانودی وکیل ءِ آئی ءِ گور ءَ سر بوگ ءَ اِشتگ –

کھول ءِ رِد ءَ سَے جولائی سال دوھزار ءُ نوزدہ ءَ پاکستان ءِ درسیں رسانکدراں کہ آھانی تہ ءَ جیو، اے آر وائی ءُ دگہ چینلاں اے ھبر شنگ تالان کتگ کہ کراچی ءَ چینی ایمبیسی ءِ اُرش ءَ ھواریں کتکار راشد حسین دبئی ءَ چہ انٹرپول ءِ کمک ءَ پاکستان ءِ ھوالگ ءَ کنگ بوتگ –

آھانی گوشگ ات کہ راشد حسین ءِ سر ءَ ھر الزام ءِ کہ جنگ بوتگ آھانی سابت کنگ ءَ پاکستان بے سوب بوتگ نوں ریاست ءِ پاکستان راشد حسین ءِ زورانسری آوار جنی ءَ منّگ ءَ نہ انت –

دومی نیمگ ءَ چاگردی ترامجاہ ٹویٹر ءَ بلوچ سوشل میڈیا ایکٹویسٹس (بی ایس ایم اے) نیمگ ءَ راشد حسین ءِ زورانسری آوار جنی ءَ سَے سال سرجم بوگ ءں درگت ءَ کمپئین برجم دارگ بوتگ – کہ بلوچ سندھی، پشتون ءُ چاگردی ءُ انسانی ھکانی باسکاں راشد ھسین ءِ یل کنگ ءِ ھاتر ءَ ٹویٹ کتگ ءُ یکرندے پد ءَ انسانی ھکانی میان استمانی گلاں چہ راشد حسین یل کنائینگ ءَ وتی کرد پیلو کنگ ءِ لوٹ کتگ –

بلوچ سوشل میڈیا ایکٹویسٹان وتی ٹویٹانی تہ ءَ گوشتگ کہ راشد حسین بلوچ بیست ءُ شش دسمبر ءَ متحدہ ارب امارات شارجہ ءَ چہ پاکستان ءِ گوشگے پد ءَ زورانسری اوار جنگ بوتگ –
ٹویٹانی تہ ءَ گوشگ بوتگ کہ متھدہ ارب امارات ءِ چیریں ایجنسیاں شش ماہ ءَ تاں راشد حسین لٹ ءُ کُٹ کرتگ ءُ پد ءَ پاکستان ءِ ھوالگ ءَ داتگ –

آھانی گوشگ ات کہ راشد حسین ءِ متھدہ ارب امارات ءَ زاروانسری آوار جنی ءُ پاکستان ءِ ھوالگ کنگ ءِ درگت ءَ بازیں گواہ ھست انت مروچی سَے سال پرگوستگ بلے متھدہ ارب امارات ءُ پاکستان ھردو ھچ گوشگ ءَ نہ انت اگاں راشد ءَ چیزے بہ بیت ھردو ریاست اشی ءِ زمہ دار انت –

زانگ بہ بیت بلوچ سوشل میڈیا ایکٹویسٹ ءُ انسانی ھکانی باسک راشد حسین بلوچ ءِ زورانسری اوار جنی ءَ پد انسانی ھکانی میان استمانی گل ایمنسٹی انٹرنیشنل وتی ارجنٹ یل کنگ ءِ لوٹ کتگ ءُ پد ءَ رند ءَ پاکستان ءِ مزن وزیر عمران خان ءَ نمدی ھم نبشتہ کنگ بوتگ وھدیکہ یورپی شھر جرمنی ءَ ایمنسٹی انٹر نیشنل ءَ بازیں وھداں راشد حسین بلوچ ءِ یل کنائینگ ءِ درگت ءَ کمپئین ھم کتگ –

کیچ کور ءَ پاکستانی پوج ءِ دو کارمندانی سر ءَ دستی بمب اُرشے کُتگ – جئیند بلوچ

بلوچ سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں گوستگیں شپ ءَ تربت ءَ ڈی بلوچ دگ ءِ سر ءَ کیچ کور ءَ زورگریں پاکستانی پوج ءِ کارمند ھما وھد ءَ دستی بمب اُرش ءِ نشانگ جوڑ کرتگ اَنت وھدیکہ وتی پانگس ءَ ڈن اُوشتوک بوتگ انت – اُرش ءَ دو کارمند زدگ بوتگ –

جارکش ءَ گوشتگ پد ءَ رند ءَ زورگریں پوج ءَ نزیک گور ءِ گِسانی سر ءَ بیڑ برتگ ءُ دسٹ گوشیں مردم بیھار داتگ انت، بلوچ سرمچارانی سوب مندیں اُرشاں پد گوستگیں روچ ءَ ھم تُرسوکیں دژمن پوج ءِ کارمنداں تربت شھر ءَ تیرگواری کتگ ءُ مردم بیھار داتگ انت –

جارکش ءَ گوشتگ سرمچارانی دست ءَ شکست وارتگیں زورگیریں پوج لس مھلوک ءَ وتی نشانگ کنگ انت مھلوک ءَ کارمرز کنگ ءِ کوشست انت –

جارکش ءَ وتی درشان ءِ گڈسر ءَ گوشتگ کہ بی ایل اے اُرش وتی مکسد ءَ سوبین ءَ تاں برجاہ مان انت –

بلوچستان ءِ دمگ کیچ کولواہ ءِ ھند رودکان ءِ جاھمنند طارق بلوچ ءِ کھول ءِ رِد ءَ طارق بلوچ پاکستانی پوج ءَ دمگی بنجل ءَ لوٹارینتگ ءُ پد ءَ بیگواہ کتگ –

طارق بلوچ ءِ کھول ءِ رِد ءَ طارق وتی زھگے الاج ءِ ھاتر ءَ کراچی ءَ رؤگی بوتگ کہ دمگ ءِ تہ ءَ برجاھیں ایپ سی بنجل ءَ طارق لوٹارینگ بوتگ بلے ایپ سی بنجل ءِ رؤگ ءَ پد طارق واتر نہ بوتگ –

زانگ بہ بیت بلوچستان ءِ دیریں دمگاں پاکستانی پوج دمگی مردماں وتی بنجل ءَ پہ ھازری جنگ ءَ لوٹارینیت ءُ ھمے میان ءَ بازیں مردم ءِ آوار جنگ ءُ بیگواہ کنگ بوتگ –

طارق بلوچ ءِ کھول ءِ رِد ءَ طارق بلوچ ایپ ءِ وتی بندیگ کتگ اھاں چہ کانودی ادارہ ءُ انسانی ھکانی گلاں چہ لوٹ کتگ کہ طارق ءِ یل کنائینگ ءَ وتی کرد ءَ پیلو بہ کن انت –

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ قاسم پنام ء شکاری سال دوھزار ءُ نُہ ءَ سلاہ بندیں جھد ءَ گوں ھمگرنچ بوتگ آئی ءِ گرانبھائیں دیمونیاں سھر چکیں دروت ندر کنیں –

جارکش ءَ گوشتگ کہ گَل ءِ ھمراہ قاسم پنام ء شکاری جھمنند بالگتر کیچ ءِ دمگ پروم ءَ دژمن ءِ اُرشے ءَ شھید بوتگ۔ قاسم شکاری سال دوھزار ءُ نُھ ءَ چہ ھم پَنتیں گَل بی ایل ایف ءِ پَتر ءَ راجی سلاہ بندیں جھد ءَ ھوار بوتگ- پد ءَ رند ءَ سال دوھزار ءُ ھژدہ ءَ گوں بی آر اے ءَ بندوک بوتگ- آ یک جپاکَش ءُ نا ترسیں سنگتے بوتگ ءُ ماں پیر ءُ کماشی ءَ ھم آ گوں گلءِ ورنائیں ھمراھاں دائم ھمگام بوتگ – شھید ءِ کھول ءِ چار ورناہ پیسر ءَ ماں راجی آجوئی جنز ءَ نمیران بوتگ اَنت ءُ آ پہ وتی کھول ءُ ھمراھاں ھِمت ءُ اوپار ءِ چیدگ بوتگ۔ آئی ءَ ماں بالگتر ھوشاپ پنجگور پروم ءُ دگہ بازیں ھند ءُ جاھاں جنگ ءِ پڑ ءَ دژمن ءِ نام گپتیں سی پیک شرکت ءِ بگیری ءَ جوانیں کردے پیلو کتگ-

جارکش ءَ گوشتگ کہ گَل پہ آئی ءِ گرانکدریں دیمونی آں سھریں چکیں دروت ندر کنیں ءُ کؤل کنیں کہ شھید ءِ مول ءُ مکسد بزاں آجوئیں بلوچستان ءَ جھد ءَ ھمے وڑ ءَ برجاہ داریں –

مکران جھالاوان، لورلائی ءِ میڈیکل کالج ءِ نودربرانی نیمگ ءَ شال پریس کلب ءِ زھرشانی بنجل برجاہ، زھرشانی ءَ مروچی ھژدہ روچ سرجم بوتگ –

زھرشانی ءَ ھواریں مردمانی گوشگ ات کہ سارتی ءُ ناوشیں موسمی جاور ھالاں ابید نودربراں وتی جائزیں لوٹانی ھاتر ءَ زھرشانی برجاہ داشتگ – راج ءِ بانداتاں دلگوش دئیگ ءَ ھاکم کوتاھی کنگ ءَ انت –

آھانی گوشگ ات کہ ملک ءں دگہ کارانی ھاتر ءَ کانود سازی کنگ بیت اِنت بلے زانشتی ایمرجنسی ءِ نام ءَ کوکار کنوکاں راج ءِ باندات جیڑہ ءُ جنجالانی تہ ءَ دور داتگ انت ءُ وتی پاٹی ءَ سرکار ءِ تہ ءَ آرگ ءَ دلگوش انت – چوش کہ زانشت ءِ سر ءَ کوکار کنوکاں میڈیکل نودربرانی جیڑہ ءَ زوت گیش گیوار بہ کرتین انت بلے اشی ءِ تہ ءَ آھانی ھچ مپاد مانیست اِنت –

آھانی گوشگ ات کہ ما چیف جسٹس ءَ اگدہ داریں ادارھاں چہ لوٹ کنیں کہ اے راج ءِ باندات ءِ جیڑھانی زوت ءَ زوت گیشگیوار بہ کن انت –

بلوچستان ءِ دمگ کیچ ءِ بنجاھی شھر تربت ءَ پاکستانی پوج ءِ فرنٹیئر کور ءِ کارمندانی سر ءَ ناشناساں دزبمبے چگل داتگ –

دمگی مردماِ ٹی بی پی ءَ گوں گپ کنان ءَ گوشتگ کہ گوستگیں شپ ءَ تربت ءِ دمگ ڈی بلوچ ءِ دگ ءَ کیچ کور ءَ ناشناسیں مردماں فرنٹیئر کور ءِ چیک پوسٹ بمبے ءَ گوں نشانگ کرتگ ءُ تتکگ اَنت-

واکدارانی نیمگ ءَ تنی وھدی اے درگت ءَ ھچ گپ پیش کنگ نہ بیتگ اَنت ءُ پوج ءَ تراک ءَ پد پَٹ ءُ پول کرتگ ءُ راہ دربستگ اَنت ءُ دمگ ءَ یک ورنایے دزگیر کنگ ءِ ھم ھال اِنت کہ اشی ءِ گیشیں ھالانی وداریگ اِنت –

زانگ بہ بیت گوستگیں شپ ءَ تربت ءِ نزیکیں ھند آرت کارجاہ ءِ نزیک ءَ پوج ءِ یک چوکی ءِ سر ءَ ناشناساں اُرش کتگ اَت کہ اے اُرش ءِ زمہ واری بلوچ لبریشن آرمی ءَ منّ اِتگ اَت-

اے لھتے روچانی تہ ءَ پوج ءَ سر ءَ بیتگیں اُرشاں اے چارُمی اُرش اِنت کہ چریشانی تہ ءَ یک کارندھے بیران دو زدگ بیتگ اِت اَنت ءُ بلوچ آجوئی لوٹوکیں گل بلوچ لبریشن آرمی ءَ اے اُرشانی زمہ واری زرتگ اِنت ءُ ڈی بلوچ ءَ بیتگیں اُرش انگت ءَ کس ءَ پہ وت ءَ نہ زرتگ –

بلوچستان ءِ دمگ چہ کیچ ءَ پاکستانی پوج ءَ یک مردمے دزگیر کنگ ءَ پد بیگواہ کرتگ –

ھالانی رد ءَ گوستگیں شپ ءَ پاکستانی پوج ءَ تمپ ءِ دمگ سرنکن ءَ یک لوگے ءَ بیڑ برتگ ءُ اود ءَ یک مردمے دزگیر کنگ ءَ پد بیگواہ کرتگ –

کھول ءَ اے ھال راست کرتگ ءُ گوشتگ کہ گوستگیں شپ ءِ ساھت سَے ءَ پاکستانی پوج ءَ لوگ ءِ سر ءَ بیڑ برتگ ءُ لطیف ء مھمد آوار جتگ ءُ برتگ –

زانگ بہ بیت اے گرگ بیتگیں مردم ءَ سیادی داروکیں چار مردم بشام ء غلام مھمد، ساری ء ابراھیم، شیراز ء اسماعیل ءُ حکیم ء غلام مھمد بیست ءُ سَے رمس ءَ دزگیر کنگ ءَ پد بیگواہ کرتگ اَنت انگت ءَ بیگواہ اَنت –

ساری بلوچ بلوچستان یونیورسٹی ءِ فزکس 4th ائیر ءِ نودربرے کہ بلوچستان یونیورسٹی ءَ موکلانی وھد ءَ وتی لوگ ءَ اتکگ بیتگ ءُ پاکستانی پوج ءَ دزگیر کرتگ ءُ برتگ –

بلوچ نیشنل موومنٹ ءَ چاگردی رسانکدر ءِ تندجاہ ٹویٹر ءَ شنگ کُتگیں وتی ٹویٹسانی تہ ءَ گُشتگ کہ چہ متحدہ عرب امارات ءَ بیگواہ کنگ ءَ پد پاکستان ءِ دست ءَ دیگ بیتگیں مردمی اگبالانی باسک ءُ سوشل میڈیا ایکٹیویسٹ راشد حسین ءِ بیگواھی ءَ سَے سال سرجم بیگ ءِ روچ ءِ درگت ءَ بی این ایم ساؤتھ کوریا زون ءَ یک کمپینے برجم داشتگ۔

بی این ایم ساؤتھ کوریا زون ءِ باسکاں راشد حسین ءِ عکس، بینرز ءُ پلے کارڈ گون بیتگ اَنت ءُ آیاں راشد حسین ءِ آجوئی ءَ ھوار بلوچستان ءَ برجاھیں زوراکیانی ھلاپ ءَ اوگام ھم جتگ۔

زھرشانی ءَ بی این ایم کوریا زون ءِ وائس پریزیڈنٹ سیم بلوچ ءُ بختاور بلوچ ءَ تران کُتگ ءُ گُشتگ کہ ما مروچی راشد حسین ءِ بیگواھی ءَ سَے سال سرجم بیگ ءِ روچ ءِ درگت ءَ اد ءَ مُچ بیتگ اِنت، آیاں گُشتگ بلوچ جھدکار بلوچستان ءَ پہ وتی مھلوک ءِ آجوئی ءُ ھکانی ھاتر ءَ توار چِست کنگ ءِ پد ءَ بیگواہ کنگ بیتگ اَنت زانگولیں جون دور دیگ بیتگ اَنت پمیشکا بلوچ جھدکار پہ باھوٹی درانڈیھہ بیتگ اَنت، بلے راشد حسین چہ متحدہ عرب امارات ءَ دزگیر کنگ ءُ پاکستان ءِ دست ءَ دیگ بیتگ۔

زھرشانی ءَ بھرزیروکیں مردماں راشد حسین ءِ بیگواھی ءُ بلوچستان ءَ برجاھیں زوراکیانی ھلاپ ءَ پنتاک ھم بھر کُتگ اَنت۔

دومی نیمگ ءَ چاگردی رسانکدر ءَ ھم راشد حسین ءِ ھاتر ءَ کمپین برجاہ اِنت کہ مھلوک #SaveRashidHussain ھیشٹیگ ءَ گوں ٹویٹ کنگ ءُ راشد حسین ءِ یل کنائنگ ءِ لوٹ ءَ کنگ ءَ اَنت۔