TBP Balochi

سندھی راجدوستیں سلاہ بندیں گل سندھودیش روولیوشنری آرمی ءَ گوستگیں شپ ءَ میرپور خاص ءَ سندھ ءِ رینجرز ءِ سر ءَ دستی بمب تراکے ءِ زمہ واری من اِتگ۔

سندھودیش روولیوشنری آرمی ءِ جارکش سوڈھو سندھی ءَ وتی شنگ کُتگیں درشان ءِ تہ ءَ گُشتگ کہ گوستگیں شپ ءَ میرپور خاص ءِ جرواری دگ ءَ پاکستان رینجرز ءِ بنجاہ ءِ گیٹ ءِ سر ءَ بستگیں چوکی ءِ سر ءَ دستی بمب اُرش ءِ زمہ واری ءِ من ایں، کہ اے اُرش ءِ تہ ءَ چوکی ءِ سر ءَ اوشتاتگیں دو کارمند کُشگ بیتگ اَنت ءُ یکے ٹپی بیتگ۔

ایس آر اے جارکش ءَ گیشتر گُشتگ کہ زوراکیں پاکستانی پوج ءَ بیھار دئیں ءُ گُش ایں کہ سندھ ءِ سرڈگار ءِ سر ءَ زورگری ءَ ھلاس بہ کن اَنت ءُ در بیا اَنت۔

گُڈ سر ءَ ایس آر اے جارکش ءَ گُشتگ کہ سندھ ءِ سرجمیں آجوئی ءَ داں گھگیریں جھد ءَ برجاہ دارگ ءِ اھد ءَ نوک کنیں۔

گوستگیں شپ ءَ تُربت ءَ بیتگیں بمب تراک ءِ زمہ واری بلوچ سلاہ بندیں آجوئی لوٹوکیں گل بلوچ لبریشن آرمی ءَ زرتگ۔

بلوچ لبریشن آرمی ءِ جارکش جیئند بلوچ ءَ وتی شنگ کُتگیں درشان ءِ تہ ءَ گُشتگ کہ مئے سرمچاراں شمبے ءِ شپ ءَ تربت ءِ دمگ جوسک ءَ کوھنیں آرت ءِ کارجاہ ءِ نزدیک ءَ زورگریں پاکستانی لشکر ءِ پانگس ءِ سر ءَ دز بمبے ءَ گوں اُرش کتگ۔

جئیند بلوچ ءَ گُشتگ کہ اُرش ءَ زورگریں لشکر ءَ جانی ءُ مالی تاوانانی دیمپانی کنگ کپتگ، آئی ءَ گُشتگ کہ اُرش ءِ ذمہ واری ءَ بلوچ لبریشن آرمی من ایت۔

بلوچ لبریشن آرمی ءِ جارکش جیئند بلوچ ءَ گُڈ سر ءَ گُشتگ کہ مئے اُرش داں گڈی منزل ءَ دژمن ءِ سرا انچش برجاہ بنت۔

بلوچستان ءِ دمگ کیچ ءَ سلاہ بندیں مردماں تیرگواری کرتگ ءُ یک مردمے کُشتگ-

تیرگواری ءِ وئیل کیچ ءِ دمگ بلیدہ ءَ پیش اتکگ، دمگی مردمانی رد ءَ شپ ءِ بے وھد ءَ سلاہ بندیں مردماں یک لوگے ءَ دور کرتگ ءُ یک مردمے کُشتگ –

بیرسن بیتگیں مردم ءِ پجار سراج ء صالح مھمد ءِ نام ءَ زانگ بیتگ –

وئیل ءِ درگت ءَ گیشیں سرپدی نہ بیتگ نانکہ انتزامیہ ءِ نیمگ ءَ اے درگت ءَ دگہ گپ دیم ءَ اتکگ اَنت –

بلوچستان ءَ 2020 ءَ ناشرکاری ءِ اُرش 137 بوتگ اَنت وھدے کہ ھمے سال ءَ 260 وئیل دیم ءَ اَتکگ-

مھکمہ داخلہ ءِ نیمگ ءَ شنگ کرتگیں رپورٹ ءِ رِد ءَ بلوچستان ءَ 2021 ءِ وھد ءَ ناشرکاری 260 وئیل دیم ءَ اَتکگ اَنت ءُ اے سال ءَ چہ گوستگیں سال ءَ ناشرکاری ءِ وئیلاں دیم ءَ گوستگ آئی ءَ رد ءَ اے سال ءَ ھشتاد ءُ نُھ درسد گیش بیتگ اَنت –

اے ناشرکاری ءِ وئیلانی تہ ءَ 139 مردم بیران ءُ وھدیکہ 149 ٹپی بوتگ اَنت اے سال ءَ درستاں چہ گیش ایف سی ءِ سر 105 اُرش بوتگ اَنت چریشی ءِ آسر ءَ 68 بیران وھدیکہ 149 ٹپی بوتگ اَنت-

سال 2021 ءِ وھد ءَ تاں 24 دسمبر ءَ 37 چیرکتگیں بمبانی اُرشاں 20 مرتگ وھدیکہ 74 ٹپی بوتگ اَنت ، دست بمب ءِ 36 اُرش بوتگ چریشی ءِ آسر ءَ شش مردم بیران ءُ وھدیکہ 73 ٹپی بوتگ اَنت-

2021 ءَ پولیس سر ءَ دُرستی 13 اُرش بوتگ چریشی ءِ آسر ءَ ھشت مرتگ ءُ وھدیکہ 79 ٹپی بوتگ اَنت – ھمے سال ءَ 18 راکٹ اُرش بوتگ چریشی ءِ آسر ءَ دو مردم مرتگ یکے ٹپی بوتگ-

کانود گر ءُ دار کنوکیں ادارھانی سر ءَ 9 اُرش بوتگ پنچ مرتگ ءُ وھدیکہ 12 ٹپی بوتگ اَنت –

پاکستانی لشکر سر ءَ چار اُرش بوتگ ھپت کارندہ ٹپی بوتگ اَنت-

لیویز ءِ سر ءَ ھپت اُرش بوتگ ءُ شش بیران وھدیکہ پنچ ٹپی بوتگ اَنت-

این این آئی ءِ رِد اے سال ءَ پولیو ورکرز ، ریل ، سوئی گیس پائپ لین، کیسکو ءِ ٹاور ، نیکراھی ھچ وڑیں ناشرکاری وئیل دیم ءَ نیتکگ وھدیکہ سنی علماء ، ھزارہ مردم ، آباد کار ، بمب تراک ، کوسٹ گارڈ سر ءَ اُرش یک یک اُرشے بوتگ-

مھکمہ داخلہ ءِ یکجاہ کتگیں کچ رِد ءَ صوبہ ءِ تہ ءَ ھمے سال یوفون ءُ پی ٹی سی ایل ءِ شش ٹاور تباہ کنگ بوتگ اَنت صوبہ لینڈ مائن ءِ ھشت وھدیکہ اینٹی پرسنل مائن ءِ نُھ تراک ءَ چار مردم مرتگ ءُ وھدیکہ 16 ٹپی بوتگ اَنت –

اے سال ءَ لَس مھلوک ءِ سر ءَ دو ناشرکاری اُرش بوتگ چریشی ءِ آسر ءَ شش مردم مرتگ اَنف-

این این آئی ءِ رِد ءَ 2020 ءَ ناشرکاری 137 بوتگ اَنت وھدیکہ اے سال ءَ 260 بوتگ اَنت گوستگیں سال ءَ چہ اے سال 123 ءَ وئیل ءَ چہ دیم ءَ اِنت-

مکران، جھالاوان، لورلائی میڈیکل کالجانی نودربرانی نیمگ ءَ شال ءَ پریس کلب ءِ دیم ءَ زھرشانی برجاہ، زھرشانی ءَ مروچی ھبدہ روچ سرجم بوتگ – ھر تک ءُ پھناتاں سیادی داروکیں مردم ءُ پاٹیانی رھشوناں بنجل ءَ اتکگ انت – کہ آھانی تہ ءَ پشتونخوامیپ ءِ خوشحال خان کاکڑ، پی ٹی ایم ء وڑانگہ لونی، نیشنل ڈیموکریٹک پاٹی ءِ ڈپٹی آرگنائزر رشید کریم بلوچ، آرگنائزنگ کمیٹی باسک غنی بلوچ، عزیز اعجاز بلوچ، ڈاکٹر عرفان بلوچ ءَ ھوار دگہ مردماں اتکگ ءُ ازھار ءِ یکجھتی کتگ –

اتکگیں مردماں رسانکدران گوں تران کنان ءَ گوشتگ کہ سرکار ءُ جانسلامتی ءِ گر ءُ دار کنوکانی مزن مری سر ءُ سر گوستگ انت کہ گوستگیں شانزدہ روچاں کشوکیں گوات سارتی ءِ سر ءَ بلوچستان ءِ باندات ءِ ڈاکٹر وتی بنکی ھکانی بزاں زانشتی کیرئیر ءِ ھاتر ءَ شال پریس کلب ءِ دیم ءَ پی ایم سی ءِ نیمگ ءَ گیر رھبندی ءُ گیرکانودی جار جنگ بوتگیں اسپیشل چکاسانی بگیری ءَ زھرشانی کنگ ءَ انت بلے سرکار ءُ جانسلامتی مجال نیست کہ بیا انت نودربرانی داد رسی ءَ بہ کن انت ءُ آھانی جائزیں ھک ءُ جیڑھانی گیش ءُ گیواری ءِ باور بہ کنائین انت –

آھانی گوشگ ات کہ بلوچستان چوش انت کہ یک نیمگے ورنائیں ڈاکٹر وتی بنکی ھکانی ھاتر ءَ نادراھجاہ بند کتگ انت ءُ زھرشانی کنگ انت دومی نیمگ ءَ باندات ءِ ڈاکٹر ھم زھرشانی انت بلے سرکار ءُ جانسلامتی ءِ واکدار بس ھمے گوش درس شر انت – درست شر ھما وھد ءَ بنت وھدیکہ ڈاکٹر ءُ میڈیکل ءِ نودربرانی جیڑہ گیش ءُ گیوار کنگ بہ بنت ءُ زھرشانی ھلاس کنگ بہ بنت بلے زھرشانی ءَ چہ ھمے سرپدی رس ایت جانسلامتی واکدار نابودیں مردمانی دست ءَ یرگمال اَنت ھمے ھاتر ءَ شانزدہ روچ ءِ گوزگ ءَ پد نودربرانی داد رسی ھم کنگ بوگ ءَ نہ انت –

بلوچستان ءِ دمگ کیچ ءِ بنجاھی شھر تربت ءَ شمبے ءِ شپ ءَ پاکستانی پوج ءِ یک چیک پوسٹے ءِ سر ءَ اُرش بیتگ –

دی بلوچستان پوسٹ پتر ھال ءَ سر بیتگیں ھالانی رد ءَ تربت ءِ دمگ جوسک ءَ آرت ءِ مل ءِ نزیک ءَ ایف سی ءِ چیک پوسٹ ءِ ناشناساں دزبمبے چگل داتگ –

اُرش ءَ پد ایف سی ءَ گنوکائی تیرگواری کرتگ ءُ چریشی ءِ آسر ءَ دمگ ءَ ترس ءُ بیم ودی بیتگ –

بنداتی ھالانی تہ ءَ جانی تاوانانی ھال نہ بیتگ اَنت نانکہ تنی وھدی گلے ءَ پہ وت ءَ اے اُرش زرتگ –

زانگ بہ بیت کیچ ءُ کش ءُ گوری دمگاں آجوئیں لوٹوکیں گل پُرکار اَنت ءُ پاکستانی پوج ءِ سر ءَ یکشل ءَ اُرش کنگ ءَ اَنت –

گوستگیں روچ ءَ تربت ءِ شھر ءَ نادرا کارگس ءِ دیم ءَ یک چیک پوسٹے ءِ سر ءَ دزبمب اُرشے بیتگ اَت ءُ دو کارندہ زدگ بیتگ اِت اَنت کہ اشی ءِ زمہ واری پرکاریں گل بلوچ لبریشن آرمی ءَ منّ اِتگ اَت-

وزیرستان ءَ سلاہ بندیں مردماں تیرگواری کرتگ ءُ یک پوجی کارندھے کشتگ –

تیرگواری ءِ وئیل وزیرستان ءِ دمگ شیوا ءَ پیش اتکگ کہ اود ءَ تیرگواری ءَ نائیک نور مرجان بیران بیتگ –

پاکستانی پوج ءِ جارکش (آئی ایس پی آر) ءِ رد ءَ شمالی وزیرستان ءِ ھند شیوا ءَ پوجی چوکی ءِ سر ءَ تیرگواری ءَ پوج ءَ پسھی تیرگواری کرتگ ءُ اُرشکار تاچینتگ اَنت –

دی بلوچستان پوسٹ پتر ھال ءَ سربوتگیں ھالانی رِد ءَ بلوچستان ءِ جتا جتائیں دمگاں دگ ءِ وئیلاں چار مردم بیران بیتگ اَنت وھدیکہ اے وئیلاں چاردہ مردم زدگ بوتگ اَنت –

گیشیں ھالانی رد ءَ بلوچستان ءِ دمگ لسبیلہ اوتھل ءَ مساپر کشیں کوچ ءَ گوں ٹرکے ءَ ڈیک وارتگ چریشی ءَ زالبول ءُ زھگاں ھوار یازدہ مردم زدگ بوتگ اَنت –

پولیس ءِ رِد ءَ وئیل شال ءُ کراچی ءِ شاھدگ ءِ سر ءَ ایگریکلچر فارم ءِ نزیک ءَ دیم ءَ اتکگ کہ شال چہ کراچی ءَ رؤکیں مساپر کشیں کوچ ءَ گوں ڈوکاں لوڑیں ٹرک ءَ ڈیک وارتگ، وئیل ءَ زدگ بوتگیں مردم نزیکیں نادراھجاہ ءَ برگ بوتگ اَنت اود ءَ ٹپانی درمان کنگ ءَ پد پہ گیشیں الاج ءِ ھاتر ءَ ھب ءُ کراچی ءَ برگ بوتگ اَنت –

دگہ وئیلے شال ءَ ائیرپورٹ دگ ءِ سر ءَ دیم ءَ اتکگ کہ تیز رؤکیں گاڑی ءَ گوں پرپٹے ءَ ڈیک وارتگ چریشی ءَ سَے مردم محمد علی ء لعل محمد، محمد عثمان ءُ دگہ یک مردمے بیران بوتگ اَنت –

جون نادراھجاہ ءَ برگ بوتگ انت اود ءَ اژدری چار ءُ ٹپاس ءَ پد کھول ءِ ھوالگ ءَ دیگ بوتگ انت –

دومی نیمگ ءَ ڈھاڈر بختیار آباد نیشنل ہائی وے ناصر آباد ءَ ویگو گاڑی ءَ گوں پرپٹے ءَ ڈیک وارتگ، پرپٹ ءَ سواریں زالبول بیران وھدیکہ دو زھگاں ھوار سَے مردم زدگ بوتگ انت –

بلوچستان ءِ بنجاھی شھر شال ءَ پولیس ءَ ناگتی میڑ ءَ دو مردم کُشتگ اَنت۔

پولیس واکدارانی گُشگ اِنت کہ دوھیں مردم یک باپاری ءِ زھگے ءِ بیگواھی ءَ ھوار بیتگ اَنت کہ آئی یل کنائنگ ءِ پُشدر ءَ چہ کھول ءَ سَے کروڑ روپیہ ءِ لوٹ کُتگ اَت۔

پولیس ءِ رد ءَ جنگ بیتگینانی تہءَ عبدالسخی پولیس ءِ دزگیری ءَ بیتگ کہ آئی گُشگ ءِ پدءَ آئی دگہ چیریں ھمراھانی دزگیر کنگ ءِ ھاترءَ جمعہ ءُ شمبے ءِ نیامی شپ ءَ شال ءِ تھانہ منظور ءِ کش ءُ کراں مشرقی بائی پاس ءِ سرءَ سی آئی اے پولیس ءَ بیڑ بُرتگ-

کیس ءِ پَٹ ءُ پول کنوکیں اپسر اکرم لغاری ءَ میان اُستمانی شنگاری گل ءَ گشتگ کہ جرمکاراں پولیس ءِ گندگ ءَ ھوار تیرگواری بندات کُتگ کہ اشی سوب ءَ آیانی وتی ھمراہ عبدالسخی کُشگ بیتگ اَت۔

پولیس واکداراں ٹاہ داتگ کہ پسھی تیرگواری ءَ لوٹ اِتگیں جرمکار غوث الدین ھم کُشگ بیتگ وھدیکہ آیانی دگہ دو ھمراہ تچگ ءَ سوبمند بیتگ اَنت کہ آیانی درگیجگ ءِ جھد برجاہ اِنت۔

آیانی گُشگ اَت کہ جرمکاراں دو ماہ پیسر شال ءِ میتگ سرجی کلاں ءِ جھمنند باپاری مھمد عمر ءِ 23 سالی نودربریں زھگ امان اللہ غوث آباد ءَ چہ یک کباب ءِ دکانی ءِ دیما بیگواہ کُتگ اَت ءُ یل کنگ ءِ بدلی ءَ چہ کھول ءَ سَے کروڑ زر ءِ لوٹ کُتگ بیتگ کہ اِشانی تہءَ پانزدہ لکھ زرتگ اِش ھم۔

پَٹ ءُ پولی اپسر ءِ ردءَ بیگواھی ءِ کیس انڈسٹریل تھانہ ءَ نبشتگ کنگ بیتگ ءُ پَٹ پول سی آئی اَے ءِ دست ءَ دیگ بیتگ۔ پَٹ ءُ پول ءِ نیام ءَ جرمکار عبدالسخی ءِ درگیجگ ءَ پد آ 30 نومبر ءَ غوث آباد ءَ دزگیر کنگ بیتگ۔

پولیس ءِ ردءَ عبدالسخی ءَ جُست پرسانی نیام ءَ من اِتگ کہ آیاں بیگواھیں امان اللہ لنک بادینی دگ ءِ سرءَ یک لوگے ءَ چیر داتگ۔

دزگیریں بندیگ ءِ ردءَ بیگواھیں امان اللہ ءَ آ پجا آورتگ اَنت پمیشکہ آیاں آ کشتگ ءُ آئی جون ھمے لوگ ءِ گٹر ءَ دور داتگ۔

پولیس ءَ دزگیریں مردمے گُشگ ءِ رد ءَ 1 دسمبر ءَ بیگواھیں امان اللہ ءِ جون درگیتکگ۔ کُشگ بیتگیں جرمکارانی جون سول ھسپتال ءَ دیم دیگ بیتگ اَنت۔

سَے سال پیسر چہ متحدہ عرب امارات ءَ زورانسری بیگواہ بیتگیں مردمی اگبالانی باسک راشد حسین ءِ دیما نیارگ ءِ بگیری ءَ سند ءِ بنجاھی شھر کراچی ءِ پریس کلب ءِ دیما شُد ھڑتالی بنجل جنگ بیتگ۔

بیگواھیں مردمی اگبالانی باسک راشد حسین ءِ مات ءُ برازتک ماہ زیب بلوچ ءَ گُشتگ کہ چہ مرچیگءَ دو روچ ءِ ھاترءَ شُد ھڑتالی زھرشانی بنجل جنگ بیت وھدیکہ 26 دسمبر ءَ یک زھرشانی ءِ کنگ بیت اِنت۔

راشد حسین ءِ مات ءَ گُشت کہ منی چُک 2018 ءِ دسمبر ءَ متحدہ عرب امارات شارجہ ءَ چہ زورانسری بیگواھی ءِ آماچ کنگ بیتگ ءُ شش ماہ ءَ لٹ ءُ کُٹ ءَ پد گیر قانودی پئیم ءَ پاکستان ءِ دستءَ دیگ بیتگ ۔

آئی ءَ گُشتگ منی چُک ءِ سرءَ سنگینیں بھتام جنگ بیتگ اَنت بلے آئی ءَ دیما آرگ ءُ کجام ھم آمید گِس ءَ پیش کنگ ابید پاکستانی ڈیھ آئی زورانسری بیگواھی ءُ دزگیری ءَ چہ انکاری اِنت۔

آئی ءَ گُشتگ من یک برے پدءَ مردم دوستاں چہ دزبندی کناں کہ آ مئے ھمراہ داری بہ کن اَنت ءُ منی زھگ ءِ یل کنائینگ ءِ ھاترءَ توار چِست بہ کن اَنت۔

ھمے وھدءَ وائس فار بلوچ مسنگ پرسنز ءِ کمک سر کماش ماما قدیر بلوچ دگہ تکاں چہ سیادی داروکیں مردم ھمودءَ بیتگ اَنت۔

وائس فار بلوچ مسنگ پرسنز ءِ سروک نصر اللہ بلوچ ءَ چاگردی رسانکدر ءِ تندجاہ ٹویٹر ءَ گُشتگ کہ راشد حسین ءِ پاکستان ءِ دستءَ دیگ کہ اِشی منانک پاکستانی رسانکدر ءَ ھم کنگ بیتگ۔ من یک پاکستانی شھری ءِ زورانسری بیگواھی ءَ گیر رھبندی سرپد باں ءُ چہ استان ءَ دزبندی کناں کہ راشد حسین ءِ پچیں ٹرائل کنگ بہ بیت۔

راشد حسین ءِ کھول لس مھلوکاں چہ باندہ کراچی پریس کلب ءِ دیما زھرشانی کنگ ءُ چاگردی رسانکدر ءِ تندجاہ ٹویٹر کمپین ءَ بھر زیرگ ءِ دزبندی کُتگ۔