سر بیتگیں ھالانی رد ءَ روکپتی بلوچستان ءَ وت ما وتی جیڑہ ءُ جنگ ءُ چوپ ءَ سَے زلبول بیران، دو زدگ بیتگ اَنت –
گیشیں ھالانی رد ءَ روکپتی بلوچستان ءِ دمگ فنوج ءَ وت ما وتی جیڑہ ءَ جنگ ءُ چوپ بیتگ چریشی ءَ سَے زالبول بیران بیتگ اَنت ءُ دو زدگ بیتگ اَنت –
ھالانی تہ ءَ گوشگ بیتگ کہ وئیل زمین ءِ جیڑھے ءِ سر ءَ پاد اتکگ ءُ اود ءَ تیرگواری بیتگ چریشی ءَ سَے زالبول بیران بیتگ اَنت ءزپ دو زدگ بیتگ اَنت-
بابا اَسلم
نبشتہ کار: میار دشتی
دی بلوچستان پوسٹ
25 دسمبر۔۔۔ چوناھا دسمبر پہ ما چہ مھشر ءَ کمتِر نہ اِنت پہ بلوچ ءُ بلوچستان ءَ دسمبر ءَ گشئے آسشانی کُتگ ءُ کھر ریتکہ دسمبر ءَ بلوچ ءِ بلاھْ بلاھیں ھستی چہ بلوچ ءَ پُلِتگ ءُ بُرتگ اَنت ھمے سماھ بوگ ءَ اِنت کہ سرجمیں راج دسمبر ءَ وارتہ بلے انچیں نام ھست کہ گشئے مئے باتن ءَ نبشتہ کنگ بوتگ اَنت ھمے نامانی تہا بابا اسلم ھم ھواریں دسمبر بزاں25 دسمبر ءَ بابا جسمانی دروشُم ءَ اَچ ما جُتا بوت۔
بابا اسلم یک پگرے ،یک رُژنے اَچ ما ھمے زانت ودی بوگ ءَ اِنت کہ بابا اسلم ءَ را یک اَنچیں رُژناھی یے ودی کُتگ کہ آ رُژن سرجمیں جھان ءَ شِنگ بوگ ءَ اِنت ھمے سما بیتیں کہ اِے رُژن مارا مئے مِنزل ءَ سر کنت۔
ما ھمے سرپد ببیں کہ پگر ھجبر کُشگ ءُ گار ءُ گُمسار کنگ نہ بیتّیں مروچی مئےشمئے دیم ءَ اِنت بابا ءَ چے پد ھمُک ورناھ ءُ ھر بچ بلوچ ءِ بابا اسلم بوتگ ءُ ھمُک سرْ پہ بابا بوّگ ءَ ساڑی اِنت دژمِن ءَ اِے سرپد بوگی اِنت کہ بابا اَسلم ءَ را دگہ ھزاراں اسلم اِے زمین ءَ کِشتگ ءُ شُتگ اِے اَسلمانی رٗون کنگ تئی وس ءَ چہ در اِنت۔
بابا ءَ یک اَنچیں توانداریں ھاٹیگے سنگتاناں داتگ کہ مروچی دژمن آھاں کٗونڈاں دَور داتگ مروچی بابا ءِ کاروان ءَ ناپاک دژمن اَنچوش شکست ءِ دچار کُتگ کہ آ مروچی مقابلہ کنگ جاھ وت گشئے تچگ ءُ لگور بوّگ ءِ گیشتِر آئی ءَ ٹرینِینگ دَیگ بوتگ دژمن ھمُگ گام سر ءَ آ وتی شکست ءُ لگورے ءَ ثابت کنگ ءَ اِنت۔
بابا ءِ کاروان ھمُک روچ یک نوکیں رنگے ءَ گوں دژمن ءَ دیم پہ دیم بوگ ءَ اِنت بابا ھمُک روچ جُتا جُتائیں داب ءَ دژمن ءِ سر ءَ اُرش کنگ ءَ اِنت بابا ءِ کاروان ھمُک دروشم ءَ پہ دژمن ءَ ساڑی اِنت ، بابا ءِ کاروان زندگ بات آجوئی مانزمان بات، بابا ءُ شھیداں سُھرچکیں دروت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان ءِ تیابدپہ شھر گوادر ءِ ھند پسنی ءَ آدینگ ءِ روچ ےَ بلوچستان ھک دو تھریک ءِ سروک مولانا ھدایت الرھمان بلوچ پسنی ءَ آیگ ءَ مھلوک ءَ بازیں کچے ءَ آئی ءَ را وش اتک کرتگ –
اے وھد ءَ آئی ءَ وش اتکی مراگش ءَ تران کنان ءَ گوشتگ کہ بلوچستان ءِ مڈیاں ھوار اد ءِ سی پیک ءَ کس مارا پُل ایت نہ کنت –
آئی ءَ گُشتگ کہ وزیراعلی قدوس بزنجو بہ اشکُن ما سَے ماہ ءَ پد دَہ لک مردماں گیش مردم شال ءِ واستا مُچ کنگ ءَ ایں ھما وھد ءَ داں بلوچستان ءَ چیک پوسٹ ھلاس نہ بنت ءُ زر ءَ ٹرالنگ ھلاس نہ بیت اے جد ءُ جھد برجاہ مان ایت –
آئی ءَ گُشتگ کہ گیرکانونی ٹرالنگ ءِ دروشم ءَ مئے دریا ورد یک اُرشکاریں مافیائِے سر ءَ مُشگ بیتگ اَنت اشی ءِ مئے زر سرجم ءَ پُل اِتگ ءُ انگت ءَ پُلگ ءُ اِنت ئِے گوستگیں سالاں بحرہ بلوچ ءَ گیر کانونی ٹرالنگی ھلاسی ءِ واستا کنگ ءَ اِنت –
آئی ءَ گُشتگ کہ پسنی ءِ شھر ءَ گیش کپتگیِ منشیات ءِ دارگ ء واستا گامگیج زورگ نہ بیت یک ھپتگے ءِ تہ ءُ پسنی ءِ پولیس تھانہ انگیر ءَ کنگ بیت اِنت –
پسنی جیٹی ءَ جیٹی ءَ ماھیگرانی انٹری ءِ وھد ءَ نام ءُ نشان پجار کنگ اوپار کنگ نہ بیت ایم ایس اے ءُ کوسٹ گارڈز چیک پوسٹ ھلاس کنگ بہ بنت، پسنی ءِ شھر ءَ ماھیگر ازت دیگ بہ بنت –
آئی ءَ گُشتگ کہ ما ٹرالر مافیا ءِ سھولتکاراں سرپد کنگ لوٹ ایں آ ماھیگیرانی دشمنی ءَ دور بہ بیت اگاں زوت آئی ءِ ناماں شنگ ءُ تالان کن ایں -ماھیگرانی لوگانی آس مُرتگ اَنت آ تباہ کنگ بیتگ اَنت بلے نی اے زُلم ھلاس بیت اِنت –
آئی ءَ گشتگ کہ ایف سی بلوچستان ءَ کشگ بہ بیت اے انسانے نہ اِنت رسترے مئے زھگاں شھید کنگ ءَ اِنت، آئی ءَ گُشتگ ھیات بلوچ پت ءُ مات ءِ دیم ءَ تیرباران کنگ نیتگ ےأ شھید کنگ بیتگ –
آئی ءَ گُشتگ کہ پوج ءِ جنرل وتی زھگاں بیار اَنت اے گلتی ءَ ما ھم کن ایں – آئی ءَ گُشتگ کہ اد ءِ گاڑی پاکستان ءِجھنڈی ءَ جن اَنت ھرچ رنگین سلکاری کنگ اَنت بلے وتن دوست اَنت-
بلوچستان نودربر گل ، بی ایس او، بی ایس او پجّار ، باسک، پی ایس ایف ءُ پیپلز ایس ایف ءَ شنگ کتگیں یکجاھی درشان ءَ شھدربرجاہ بلوچستان ءِ انتزامیہ نیمگ ءَ چہ شھدربرجاہ ءِ سارتیانی چُٹیانی ھاتر ءَ بند کنگ ءِ نوٹیفکیشن دیگ ءِ پُشدر ءَ گوشتگ اے یک مزاک ءُ مسکراہ ءُ مُھاد ءَ ئے بگیر گوشتگ-
نودربر گلانی یکجاھی درشان ءِ تہ ءَ گوشتگ کہ بلوچستان شھدربرجاہ اے وھد ھکومتی کمیٹی چہ جوڑ کتگیں مھاداھانی سر ءَ بند اِنت-
نومبر ءَ شھدربرجاہ ءِ نیمگ ءَ چہ شنگ کتگیں نوٹفکیشن ءَ تچکی ءَ اے گپ کنگ بوتگ اَنت کہ دو بیگواھیں نودربرانی پہ سلامتی دراھگ ءَ تاں بلوچستان شھدربرجاہ ءِ سرجمیں چست ءُ ایرانی ھاتر ءَ بند کنگ بیت ءُ اشی ءَ چہ ھوار پروفیشنل و نن پروفیشنل کالجانی چکاس مھتل کنگ بنت-
درشان ءِ تہ ءَ گوشگ بوتگ کہ انتزامیہ ھر وھد مُھاد ءِ ھلاپ ورزی کنت ھکم نامو شنگ کنت چریشی ءِ مسال چیزے وھد ءَ ساری ءَ میڈیکل کالجز ءِ چکاس ءِ جار ءُ مروچی یکرندے پد پیسر ءَ چہ بندیں شھدربرجاہ دومی رند ءَ بند کنگ ءَ نوٹفکیشن شنگ کتگ- ما تچکی ءَ گوشگ لوٹ ایں کہ بلوچستان شھدربرجاہ اے وھد ءَ بیگواھیں فصیح بلوچ ءُ سھیل بلوچ ءِ یل کنائینگ ءِ ھاتر ءَ زھرشانی سبب بند اِنت- بلے انتزامیہ ھکومتی کمیٹی ءِ گوم ءَ بوتگیں مُھادانی سر ءَ پُشت کنزی مہ کنت-
بلوچستان ءَ یکرندے پدا زانگولیں جونانی درآھگ پدردی اِنت – ماما قدیر بلوچ
سند ءِ بنجاھی شھر کراچی ءَ پریس کلب ءِ دیم ءَ زورانسری آوار جنگ بوتگیں سیاسی باسکانی یل کنائینگے ھاتر ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل ءَ مروچی چار ھزار ءُ پنچ سد ءُ سِی ءُ پنچ روچ سرجم بوتگ – بی ایس او بلوچستان یونیورسٹی ءِ یونٹ سیکرٹری ایوب جاموٹ، پشتون تحفظ مومنٹ حسام کبزئی ءُ آھانی ھمراھاں اتکگ ءُ بیگواھیں مردمانی کھول ءِ گوم ءَ دلپدری درشانتگ –
ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچستان ءَ سیاسی باسکانی ترسینگے ھاتر ءَ یکبرے پدا زانگولیں جون دور دئیگ بوھگ انت –
آئی ءِ گوشگ ات کہ چیریں ادارھانی دست ءَ آوار جنگ بوتگیں سیاسی باسکانی یل کنائینگے ھاتر ءَ درساں یکجاہ بوھگی انت تانکہ ما وتی مردماں چہ اے رستراں رکینت بہ کن ایں –
ماما قدیر بلوچ ءِ گوشگ ات کہ گوستگیں روچ ءَ چار زانگولیں جون دست کپتگ کہ آھانی ابید پجار ءَ کل کنگ پدردی گپ اِنت ءُ اے کردگار ءِ پُشدر سیاسی پاٹیانی ھچ نگوشگ ایرجنگی انت –
ماما قدیر بلوچ ءِ گوشگ ات کہ بلوچستان ءَ بلوچ دمگاں پد نوں پشتون دمگان ھم ھمے گامگیج بندات کنگ بوتگ-
آئی ءِ گوشگ ات کہ بلوچستان ءَ بیگواھیں مردمانی جیڑھانی گیش گیوار کنگے ھاتر ءَ انسانی ھقانی میان اُستمانی گلانی کرد ساڑآھگی نہ اِنت۔
نبشتانک: دشت پھازیں نرمزاراں
نبشتہ کار: البُرز بلوچ
دی بلوچستان پوسٹ
ورنائی ءِ سھتاں کہ دگنیا ءِ ورنا عیش ءُ نوش، ترگ ءُ گردگ، وتی باندات، مھر ءُ مھبت ءُ ایندگہ وشیانی آماچ اَنت ھمود ءَ یک سرزمینے کہ آئی ءِ نام بلوچستان اِنت اود ءَ دنیا ءِ لزتاں چہ سر گوستگیں لہتے ورنا پہ وتی راج ءُ سرڈگار ءِ ہاتر ءَ یک عظیمیں مقصد ئے ءِ واستا جھد کنگ ءَ اَنت کہ آئی ءَ مِنزل بلوچ سرڈگار ءَ آجوئی اِنت۔ ہمے راہ ءَ لہتے ءَ وتی جان ندر کُتگ ءُ راجدپتر ءِ تاکاں مُدام نیمران بیتگ اَنت۔
دگنیا ءِ وتگڑیں ءُ ادارُکی وشیاں چہ سرگوستگیں بلوچ ورنا پہ بلوچ راج ءَ اوار دگنیا ءِ ایندگہ لگتمالیں راجاں مثال اَنت۔ بیست ءُ یکمی کرن ءِ مہلوک کہ دیم ءَ شتگیں مُلکاں جھمنند اَنت مارس ءِ سر ءَ روگ ءِ پگر ءُ ہیال ءَ اَنت ہمود ءَ بلوچ ورنا زمین ءِ سر ءِ نشتگیں مہلوک ءَ پہ یک پُرمھر، پُرایمنیں ءُ انسانیت دوستیں استان ئے ہاتر ءَ جُہد کنگ ءَ اَنت۔
بلوچستان ءَ کہ اے پنچمی راجی جُنز چِست بیتگ اے جُنز ءَ سجہیں بلوچستان ءَ ورنا،کسَان ءُ مزن،چُک ءُجنین وتا گوں اوار کُتگ اَنت، چُشیں گسّ ئے نیست کہ چہ راجی جُنز ءِ ساناں چہ وتا رکّینت کُت کُتگ ئِے۔ ہر شہر، میتیگ ءُ بازار، کوچگ ءُ کیلّگ ءَ پہ راجی جُنز ءَ وتی بہر داتگ ءُ دیان اَنت۔
ہمے ہساب ءَ دشت کہ گوں وتی مہلبیں پُلکاں گوں زانگ بیت۔ دشت پہ راجی بامرداں یک سنگرجاہ ئے کہ وتی نرمزاراناں مُدام پہریزتگ ئے۔ وہدے سرگوات کشّیست ءُ دشت وتی مہلباں ماں وتی مہروانانی سر ءَ چنڈیت ءُ آہاناں چہ وتی مہر ءَ آشنا کنت گُڑا سرمچنڈاں پہ زمین ءِ باہوٹ بیگ ءَ یک کیف ئے سوار بیت کہ آ کیف پہ لبزاں درشان نہ بیت ۔ دشت ءَ کہ مُدام وتی بچ پناہ داتگ اَنت ہمے وڑ ءَ وہدے آئی ءِ سر ءَ پاکستانی استان ءِ لشکر ارُش کنت ءُ آئی ءِ پُرزیبائیں ہاکاں پلیت گُڑا اود ءَ نشتگیں نرمزار پہ وتی ماتیں زمین ءِ رکینگ ءَ سلاہاں بَڈّ ءَ کن اَنت ءُ وتی سنگر ءِ رکینگ ءِ جہد ءَ ساڑی بنت۔ 21 دسمبر ءِ پُرمڑائیں روچ ئے اَت مُرگ، جناور، درچک ءُ دار دشت ءِ دلکشیں مولم ءَ ساہ زیریگ ءَ ایت اَنت ہمے میان ءَ ہالے شنگ بیت کہ پاکستانی زورگریں لشکر ءَ ماں مھلبیں زمین ءَ دور کُتگ ءُ دیم ءَ آیان اِنت۔ جُتائیں میتگ ءُ بازارانی نرمزار پہ ھاک ءِ رکینگ ءَ پُرسلاہ بیت اَنت ءُ وتی سنگر گپت اَنت۔ دشت ءَ چہ ڈن نرمزاراں کہ ہال اِشکُت ھاک ءِ رکینگ ءِ واستا وت ءَ سر کُت ءُ وتی ہمبلانی ہمکوپگ بیان بیت اَنت۔ وتن پہازاں زورگریں لشکر چہ دشت سیاہلو ءَ بِگر داں بل نگْورءَ جنان کُت ءُ دیم داران کُت ، دومی نیمگ ءَ سیاجی ءُ زریں بُگ ءَ وتی سنگر داشت اَنت ءُ ھاک ءِ رکینگ ءَ اوشتات اَنت۔ ہمے میان ءَ دشت شئے زنگی بازار ءَ یک ھونے ئِے میڑئِے بیت کہ دو ورنایاں شہید جلال جان ءُ شہید سابرجان ءَ وتی ماتیں زمین ءِ پہازگ ءَ لشکر ءَ گوں جنگ داران ءَ وت ءَ پہ مُدامی ھاک ءِ باہوٹ کُت۔ دُژمن ءِ لشکر ءِ بازیں سُپاہی جت ءُ وتی سینگ ءَ تیر وارت بلے وتی ھاک ءَ گوں دگا نہ کُت ایش ءُ وتا مُدامی نمیران کُت اش۔ ہمے میان ءَ دشت ءِ دُتُّکیں جِنکُو سمرین بلوچ ہم استانی لشکر ءِ تیرانی آماچ بیت ءُ شہید بیت۔
وہدے لشکر ماں بل نگْور سورِک کور ءَ سر بیت داں سُھرچمیں بلوچ نرمزاراں وتی سنگر گپتگ ات اَنت ءُ زورگریں لشکر ءِ سر ءَ ترُْندے ءَ گوں اُرش کُت۔ لشکر ءَ نہ دیم ءَ روگ ءَ راہ اِشت نہ پُشت ءَ تچگ ءَ۔ سُھب ءَ جنگ بندات بیت داں دومی روچ ءِ نیمروچ ءَ ۔ اے میان ءَ بلوچ نرمزاراں زورگریں لشکر بے کساس تاوان دات کہ آ لاچار بیت ءُ بالگَرد لوٹائینت اَنت ءُ بلوچ سرڈگار ءِ سر ءَ بمب ءُ ٹوپانی امبار کُت۔ یک نیمگے بلوچ نرمزار گوں تُپنگ دست ءَ چاگل بڈ ءَ دشت ءِ پُلکانی سر ءَ زورگریں استانی لشکر ءِ مشین گن ءُ بالی گردانی بمباری ءِ دیم ءَ چو الُبرز ءِ کوہ ءِ مِکّ ات اَنت۔ ہما ورنا کہ دُگنیا ءِ وشیاں چہ دیر یک پُرمھریں آجوئی ءِ ہاتر ءَ گوں ڈنی زورگریں تاکت ءَ جنگ ءَ ات اَنت۔ ہر سنگت ءَ وتی سنگر داشتگ ات اَنت ءُ دلیری ءَ جنگ ءَ ات اَنت ہمے میان ءَ ہال اتک کہ دو سنگت شہید بیتگ یکے شہید داد ءُ یکے پارِس جان اِنت۔ سنگتاں ہال رس ست بلے آہانی ہوسلہ کم بیگ ءَ ابید گیشتر بیت اَنت ءُ دیم ءَ یک بچکندئے جت ءُ سنگر گِپت اَنت ءُ لشکر ءَ پُشت ءَ کِنزگ ءَ مجبور کُت۔ داں شپ ءَ دیراں جنگ داران ءَ باز سنگت ٹپی بیت ءُ لہتے سنگت ماما بُگٹی(شہید)ءَ گوں اوار کہ میان ءَ پنسیتگ اِت اَنت، نرمزاراں وتی سنگت کش ات انت ءُ لشکر دیم داشت داں دومی سُھب ءَ۔ جنگ ءِ تہ ءَ ہما لگور ہم اوار ات اَنت کہ آ دُژمن ءِ دست ءَ بھا بیتگ ات اَنت بلے سنگتاں اے نہ زانتگ اَت ءُ ہمے لگوراں پُشت ءَ چہ تیرگواری کُت ءُ جنگ بداس کنگ ءَ اوار سنگت ہم تاوان دات اَنت۔ وتی اندری لگوراں جنگ ءِ نیمگ مٹ کنائنت ءُ سنگت تاوان دات اَنت۔ سنگتاں گوریلہ جنگ ءِ کانودانی پاسداری کُت ءُ پُشت ءَ کنزیت اَنت۔
ہما زمین کہ مُدام پہ وتی بچاں پناہ گاہ اَت اے روچ ءَ زمین ءَ را وتی بچانی پَکار اَت کہ آئی ءِ بہ پہاز اَنت۔ پہ ھاک ءِ گوانک نرمزاریں سرانی تہ ءَ شہید جلال جان، شہید داد جان، شہید سابر جان، شہید فارس جان، شہید الطاف جان،شہید بالاچ جان،شہید غنی جان ءُ شہید امان جان گوں دلیری ءَ زورگریں لشکرءِ گون ءَ جنگ ءَ وتی جان ندر کُت اَنت ءُ گلزمین ءِ سینگ ءَ پہ وبد واب کَپت اَنت ءُ نمیران بیت اَنت۔ دشت ءِ اے ھون ئیں جنگ ءَ کہ نرمزاراں ھاک ءِ پہازگ ءَ دلیری ءَ گوں جنگ داشت ءُ دُژمن ءَ باور کنائینت کہ بلوچ سرمچار ترا چو ارزانی ءَ اے ہاک ءَ را پل ات کنگ ءَ نئیل اَنت۔ ورنائی ءِ عیش ءُ نوش یلہ داتگیں ءُ وتی زات ءَ چہ درتکگیں ہما ورنا کہ پہ سُرمگیں بانداتے ءَ سلاہ ماں کوپگاں کُتگ ات اَنت دُژمن ءَ گوں جنگ ءَ وت ءَ را مُدامی نمیران کُت اش ءُ پہ اَبد زمین ءِ باہوٹ بیت اَنت۔
بلے شہیدیں سراں دشت ءِ دلبند ءَ بلوچ جُہد ءِ نام ءِ پُل کِشت کہ پہ آؤکیں باندات ءِ ورنایاں بَر کاریت ءُ زمین ءِ پُسگ وتی زمین ءِ پہازگ ءَ وتی راجی جُنز ءَ گوں اوار بنت ءُ شہیدانی فلسفہ ءِ رندگیریءَ کن اَنت ءُ ہر کُجام سنگر ءَ پہ دُژمن ءَ جور بنت ءُ کپ اَنت۔ دشت ءِ مھلبیں پُلک کہ وتی پُسگاں سِنگاریت بلے دشت ءِ سِنگارگ آئی ءِ پُسگانی کار اِنت ءُ من دل ءَ سدّکاں کہ دشت پہازیں نرمزارانی جُھد چو بے آسر نہ بیت ءُ آیانی ریتکگیں ہون الم بَر کار اَنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
سربوتگیں ھالانی رِد ءَ بلوچستان ءِ بنجاھی شھر شال ءَ پاکستانی پوج ءَ نادراھجاہ ءِ لیباٹری ءِ مستر زورانسری آوار جتگ ءُ گوں وت برتگ ھمے وڑ کیچ تمپ ءَ پاکستانی پوج ءَ دو نودربر آوار جتگ ءُ بیگواہ کتگ- پد ءَ رند ءَ آھانی ھچ ھال اھوال نیست –
ھالانی رِد ءَ بیست دسمبر ءِ شپ ءَ پاکستانی پوج فرنٹیر کور ءُ لس مردمی پوشاکیں کارمنداں یاسین نادراھجاہ شال ءِ لیباٹریء مستر محمد ایوب ء محمد کریم سرپرہ زورانسری آوار جتگ ءُ گوں وت برتگ -محمد ایوب سرپرہ مستونگ ءِ دمگ گردگاپ ءِ جاھمنند انت-
اھوالکار ءَ گوں ٹی بی پی ءَ تران کنان ءَگوشت کہ اے ورناہ ءِ آوار جنی ءَ پد پاکستانی پوج ءُ چیرہ ادارھانی کارمنداں کردگاپ ءَ دو گِسانی سر ءَ بیڑ برتگ پوج ءِ کارمنداں چادر چاردیوالی لگتمال کتگ چُک زالبولاں ھوار دگہ مردم بیھار داتگ انت –
سرکار ءِ نیمگ ءَ اے درگت ءَ ھچ وڈیں موقف دیم ءَ نہ اتکگ –
زانگ بہ بیت اشی ءَ پیش ھبدہ دسمبر پاکستانی پوج ءَ راشد ء محمد یوسف ھم چہ کردگاپ ءَ زورانسری آوار جتگ ءُ بیگواہ کتگ وھدیکہ آیشی ءَ پیش یک ستمبر ءَ راشد ء یوسف ءِ برات زاکر ء یوسف ھمراہ ءِ مدثر ء ٹکری سیف اللہ ھمے سال ءَ پوج ءَ آوار جتگ ءُ بیگواہ کتگ انت –
بیگواھیں مدثر ء ٹکری سیف اللہ پد ءَ رند ءَ یل کنگ بوتگ وھدیکہ زاکر ء یوسف ھنگت بیگواہ انت –
ھمے وڑ بلوچستان ءِ دمگ کیچ تمپ ءَ پاکستانی پوج ءَ گوستگیں روچ ءَ بیست ءُ سَے دسمبر ءَ دو نودربر ساری بلوچ ء براھیم بلوچ ءُ شیراز بلوچ ء اسمائیل بلوچ زورانسری آوار جتگ ءُ بیگواہ کتگ انت ھردو نودربر وتی ما وت سیاد انت ءُ زامران ءِ نندوک انت –
بیگواھیں نودربرانی کھول ءَ وتی درشان ءِ تہ ءَ گوشتگ کہ پوج آھاں یل بہ کنت کہ آ نودربر انت اگاں آھانی سر ءَ جرم ءِ ھست گڈا آمیدگس ءَ آرگ بہ بنت وھدیکہ آھان آل پارٹیز کیچ، سول سوسائیٹی ءُ نودربر گلاں چہ لوٹ کتگ کہ اھانی دوستیگیں مردمانی ھاتر ءَ توار چست بہ کن انت –
ھمے وڈ شال ء دمگ کلی کیچی بیگ ءَ جاوید ء شمس الحق سرپرہ ءُ فیاض ء محمد اعظم سرپرہ ھم جیل دگ ہدہ ءَ زورانسری آوار جنگ ءُ بیگواہ کنگ بوتگ انت کہ ھنگت بیگواہ انت –
زانگ بہ بیت بلوچستان ءَ زورانسری آوار جنیانی درچ یکشل ءَ برجاہ انت – اے زورانسری اوار جنیانی تہ ءَ گیشتریں کچ نودربرانی انت – گوستگیں ماہ ءَ بلوچستان شاھدربر جاہ ءَ دو نودربرانی زورانسری آوار جنی ءِ بگیری ءَ نودربر دو ماہ انت زھرشانی انت اے زھرشانی ءَ شاھدربرجاہ بند کنگ بوتگ ءُ درسیں سرگرمی ھلاس کنگ بوتگ انت –
نبشتانک: زبان ءُ پجّار ءُ بلوچی زبان ءِ گار بوھگ ءِ سبب
نبشتہ کار: ساجد بلوچ
دی بلوچستان پوسٹ
جاھے ارستو گْوش ایت، “زبان انسان ءِ پچّار اِنت۔” مرچی انگلش ءُ امریکن وتی سر ءَ پھر بند اَنت کہ ما انگلش ءُ امریکن ایں۔ اے آیانی وتی جُھد اِنت کہ آیاں وتی زبان رکینتگ ءُ دیم ءَ برتگ۔ مرچی دگنیا ءِ تہ ءَ ھر کس آیاں زانت پمشکا آیانی پچّار زندگ اِنت، ءُ درّی راج ھم ایشانی کار ءُ پدانی پُشتہ کَپتگ اَنت۔ ایشی ءِ سبب ایش اِنت کہ آیاں وتی زبان انچو ساپ ءُ پلگار کُتگ کہ ھر کس آیانی زبان ءَ وان ایت پرچا کہ آیانی زبان بزاں انگلش یک رھبندے پیلو کنگ ءَ اِنت۔
بلوچ راج پرچا ءُ چیا پُشت ءَ کپتگ ءُ بلوچ راج ءُ آئی ءِ پچّار چیا میزان میزان ءَ گار بیان اِنت۔ ایشی ءِ سبب باز اَنت بلے من لھتیں شُمارا گْوش آں ایشی ءِ یک مستریں سببے ایش اِنت کہ اگاں یک بلوچے یک سرھالے ءِ سر ءَ بلوچی ءَ نبشتہ بہ کنت ءُ پد ءَ آئی ءَ پیسبوک ءَ روان بہ دنت، گڑا یک دیگ ءَ بلوچ براتے آئی ءِ ردیاں بہ کش ایت اگاں آ ردی بہ کنت۔ آ بھ وتی برات ءَ نہ من ایت۔ برے گْوش ایت تو کا ئے کہ من ءَ سر ءُ سوج کن ئے۔ مئے مستریں نیزوری ھمیش اِنت کہ ما از بلوچ دیگ ءَ کس ءَ نہ من ایں۔ ردی دیمروی ءِ نام اِنت بلکیں ردی ابیبے نہ اِنت۔ باز گْوش ایت ما سید ءَ نہ من ایں۔ باز گْوش ایت مئے گالوار الگ اَنت چمیشکا ما وتی گالوار ءِ اساب ءَ نبشتہ کن ایں۔ اگاں گالوار ءِ اساب ءَ بیت اِنت گڑا امریکن ءُ انگلش ءَ نبشتہ کُتگ اَت۔ ءُ ھر زبان ءِ گالوار باز اَنت گڑا آ بنند اَنت یک زبانے ءِ واست ءَ ھمینچو گالوار اَنت ھمینچو رھبند اڑ بہ کن اَنت۔
مارا زبان ھست بلے نیستی ءِ برابر اِنت ایشی ءِ بلاھیں سببے ایش اِنت کہ مئے بلوچی زبان ساپ ءُ پلگار نہ اِنت اگاں ما گپ بہ کن ایں یاکہ نبشتہ بہ کن ایں۔ ما وھدے گپ کن ایں مے گپّانی تہ ءَ اردو گال باز مان آ اردو گال چو اے ڈول ءَ اَنت۔ کیوکہ، اکیلا، سناھین ، ءُ دیگ ءَ باز۔ من نہ گْوشگ ءَ آں کہ اردو ءُ انگلش ھراب اَنت آیاں ھم ما بہ وان ایں بلے چو مہ بیت کہ درّی زبان ءِ گال مئے زبان ءِ گالانی تہ ءَ مسک بہ بنت۔ مرچی ما ھمے ڈول کنگ ءَ ایں اے راست اِنت۔ اگاں اے وڑ ءَ مئے مرچیگیں پدریچ بہ کنت آ روچ دیر نہ اِنت کہ مئے زبان گار بہ بیت انچو ڈاکٹر ناگمان یک جاھے اے ڈول گْوش ایت کہ اگاں ما بنند ایں ءُ بچار ایں وتی پیریں مردمانی کر ءَ گڑا ما زان ایں کہ آیانی گال مئے گالاں چے باز زگر اَنت ءُ اگاں ما وت ءَ ءُ وتی چکاں بچار ایں گڑا مئے گال مئے زھگانی گالاں چے باز شرتر اَنت۔
سیمی سبب ایش اِنت کہ ما اسل ءَ وت ءَ بلوچ گوں وتی جزبگ ءَ نہ مار ایں۔ مارا اسل ءَ وتی راج ءِ دوستی نیست اگاں بوتیں گڑا مارا وتی راج ءِ زبان دوست بوتگ اَنت۔ مارا وتی زبان گوں دل ءُ جان ءَ دوست دارگی اِنت گڑا تی ءُ منی پجّار گار نہ بیت۔ مرچی چینی گوں وتی کسانیں چماں کا اَنت ءُ دیم ءَ رو اَنت گڑا ما چون دیمروی نہ کن ایں۔ ھمے چینیھاں وتی زبان ءِ گوماں سک باز مھر ھست۔ آ ھر چیزے ءِ سر ءَ وتی زبان ءَ نبشتہ کن اَنت پرچا کہ آ آزات اَنت۔ بدکسمتی ءَ ما چینیھانی ڈول ءَ نہ ایں بلے چینی بی پیسر ءَ مئے وڑ ءَ بیتگ اَنت بلے مرچی آیاں دگنیا ءِ نزاں وتی پچّار زندگ داشتگ پرچا کہ آیاں وتی چینی زبان دوست بیتگ۔ اگاں مارا وتی شھدیں زبان دیم ءَ برّگی اِنت گڑا مارا وتی زبان ءِ گوماں مھر کنگی اِنت مارا وتی زبان وانگی اِنت ءُ وانینگی اِنت گڑا ما زندگ بیں۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
بلوچستان ءِ بنجاھی شھر شال ءَ بلوچستان میڈیکل کالج ءِ نودربرانی زھرشانی بنجل مروچی چاردھمی روچ ءَ برجاہ بوتگ، زھرشانی بنجل ءَ نودر بازیں روچ ءِ بیت کہ سارتی ءِ سر ءَ نشتگ انت –
بلوچستان ءِ سَے میڈیکل کالج آنی تہ ءَ پاکستان میڈیکل کمیشن ءِ نیمگ ءَ جار جنگ بوتگیں ٹیسٹانی بگیری ءَ گوستگیں بازیں روچاں شال ءَ زھرشانی بنجل جنگ بوتگ –
زھرشانی کنوکیں نودربرانی گوشگ اِنت کہ پی ایم سی ءِ نیمگ ءَ جار جنگ بوتگیں ٹیسٹاں نودربر جنجالانی آماچ کُتگ کہ آئی ءِ بگیری ءَ نودربراں بازیں روچاں چہ زھرشانی کتگ ءُ نِشتگ انت بلے پدا ھم نودربرانی درجیں زھرشانی ابید سرکاری مردم نودربرانی جیڑہ ءِ گیشگیوار ءَ بے سوب انت –
زھرشانی کنوکانی گوشگ ات کہ بلوچستان ءِ گورنر ءَ زھرشانی ءَ نندوکیں نودربر لوٹارینتگ انت جیڑھانی گیش گیواری ءِ باور کنائینگ ءَ ابید ھچ وڈیں گامگیج زورگ نہ بوتگ آھانی گوشگ ات تاں ھما وھد ءَ.نودربرانی سرجمی گیشگیوار نہ بنت زھرشانی ننداک برجاہ بیت اِنت –
زانگ بہ بیت پاکستان میڈیکل کمیشن ءِ شنگ بوتگیں جار ءِ رِد ءَ بلوچستان ءِ سَے میڈیکل کالج ھزدار، لورلائی ءُ تربت کالج ءِ نودربراں یک ٹیسٹ ءِ دئیگی انت اے ٹیسٹ ءَ پاس بؤکیں نودربرانی نام پاکستان میڈیکل کالج ءِ لسٹ تہ ءَ ھوار کنگ بیت اِنت کہ پہ گیشیں میڈیکل وانگے ھاتر ءَ دگہ زانشجاھاں شُت کن انت –
زھرشانی کنوکیں نودربرانی گوشگ ات کہ بلوچستان ءِ اے سئیں میڈیکل کالجاں سَے سال انت کہ پی ایم سی ءَ رجسٹر نہ بوتگ نوں اے بار ءَ نودربرانی سر ءَ لڈگ بوھگ انت –
بلوچستان لبریشن فرنٹ ءِ جارکش میجر گْوھرام بلوچ ءَ ضلع کیچ ءَ پاکستانی پوج ءِ سر ءَ دو اُرشانی زمہ واری منّ اِتگ ءُ گوشتگ کہ گوستگیں روچ ءَ سُھب ءِ وھد ءَ سرمچاراں ناصرآباد ءَ پاکستانی پوج ءِ کاروان ءَ پھاز دیوکیں دو پرپٹ سوارانی سر ءَ اُرش کتگ – دوئیں کارندہ ھما دمان ءَ مرتگ اَنت-
جارکش ءَ گوشتگ کہ سرمچاراں آیانی سلاہ ءُ دگہ ساز ءُ سامان گوں وت برتگ اَنت- شھریاں گوں دزبندی اِنت آ پاکستانی لشکر ءَ چہ دور بہ بنت-
زیک مگرب ءَ رند سرمچاراں مند ءِ دمگ ملاچات ءَ پاکستانی لشکر ءِ چوکی سر ءَ اُرش کتگ ءُ یک کارندھے کشتگ- اے چوکی سیمسر ءِ نیمگ ءَ رؤکاں ٹوکن دنت ءُ ھمے درگت ءَ مردماں زلیل کنگ ءَ دلگوش اَنت-
جارکش ءَ گوشتگ اے اُرش داں بلوچستان ءِ وتواجھی ءَ برجاہ بنت-
دومی نیمگ ءَ پاکستانی پوج ءِ جارکش آئی ایس پی آر وتی شنگ کتگیں درشان ءِ تہ ءَ گوشتگ کہ بلوچستان ءِ ضلع کیچ ءَ سلاہ بنداں پوج چیک پوسٹ سر ءَ اُرش کتگ-
آئی ایس پی آر ءِ رِد ءَ تیرگواری ءَ چہ لانس نائیک منظر عباس ءُ سپاھی عبدالفاتح مرتگ اَنت- آئی ایس پی آر ءِ گوشگ اِنت کہ تتکگیں اُرشکارانی پٹ ءُ پول برجاہ ءَ اِنت-
درشان ءِ تہ ءَ گوشگ بوتگ لانس منظر عباس ءِ سیادی خوشاب ءَ اِنت ءُ وھدے کہ سپاھی عبدالفاتح ءِ سیادی خضدار ءَ اِنت-
