TBP Balochi

نبشتانک: نمیرانیں واجہ مھمد ھسن آجز

نبشتہ کار: شاکر مراد

دی بلوچستان پوسٹ

زند یک بےو پائیں ھمراھے من ھمے بے وپا ءِ ھمراہ اوں چوناھا زند ءَ پہ ھچ کس ءَ وپا نیست زند ءِ ھمراہ بوھگ ءُ آئی ءِ سر ءَ پھر بندگ دروگیں گپے پرچا کہ زند پہ کس مھتل نہ بیت ۔

نی من کایاں وتی بُنگپ ءِ نیمگ ءَ منی بنگپ ھما بنگپ انت کہ آ یک انچیں ھستی ءُ راج ءِ سرکماشیں انسانے ءِ سرا انت چش کہ گوستگیں روچاں مے گل ءِ وتساپی دیوان ءَ یکے ءَ توار بندے راہ دات من ناگھاں توار بند پچ کرت کہ توار بند ءَ سنگت گوشگ ءَ انت کہ سنگتاں مرچی نہ وشیں ھالے من چہ ھمے نہ وشیں ھال ءِ اش کنگ ءَ مزنیں چُرتے ءَ کپتاں کہ اے چونیں نہ وشیں ھالے گڑا سنگت یار مئے کماش مئے ادیب شھیدکریم جان ءِ کماش ءَ اے کوڑھیں دنیا ءَ یلو دات آئی ءَ وپات کت من ھمے ھبر ءِ اش کنگ ءَ سک دل پہ درد بیتاں ۔

من ھمے دمان ءَ چہ ھاس ءَ سنگتے میسج کت کہ اے ناوشیں ھال راستے پد ءَ آ سنگت ءِ پہ گریوگی پسو اتک ھو سنگت راستے کماش دل ءِ اٹیک ءَ گپتگ ءُ بیران بیتگ گڑا سنگت ءِ ھال ءِ راست کنگ ءَ پد من گیشتر پریشان بیت آں ھیر مرگ پریشانی گپے نہ انت بلے لھتے انچیں مردم بنت کہ آھانی مرگ یک مزنیں تاوانے واجہ مھمد ھسن آجز آ یک چاگردی سرکماشیں مردمے ات آئی ءَ چاگرد ءِ ھر وڑیں کارانی تہ ءَ وتی دست مان کتگ مئے چاگرد ءِ تہ ءَ واجہ مھمد ھسن ءِ یک مزنیں نام ءُ پجارے وھدے کہ مئے چاگرد ءِ تہ ءَ دو برات نہ وش بیتگ گڑا اولی مردم واجہ مھمد ھسن بوتگ کہ مردم ئِے وش کتگ انت چش ایں کارے نہ بوتگ کہ واجہ مھمد ھسن گون نہ بیتگ واجہ مھمد ھسن چاگرد ءِ سروکی ءَ ابید یک مزنیں ادیب ءُ لچہ کارے بوتگ آئی ءِ بازیں شئر ءُ نبشتانک بلوچی تاک ءُ ماھتاکاں چاپ ءُ شنگ بیتگ ۔

واجہ مھمد ھسن آجز ملا اسمائیل لبزانکی گل ءِ جوڑ کنگ ءِ وھد ءَ بنگیجی مردم ھما بوتگ کہ گل ءِ جوڑ کنگ ءَ آئی ءِ مزنیں جھد ءُ کوشستے کتگ گل ءِ ھر دیوان ءَ مدام پہ وھد ساڑی بوتگ گل ءِ تہ ءَ دگہ لھتے مے باسک بوتگ آں کہ آھاں گل ءَ وھد کم داتگ گڑا واجہ مھمد ھسن ھمے باسکانی ٹوھینوک ءُ دیوان ءِ آروک بیتگ ما کہ وھدے وتی گرامر ءَ موکل کتگ ما کہ کریم ءِ دوکان ءَ شتگیں واجہ لازم دوکان ءَ ساڑی بوتگ مارا ھمود ءَ شئیر ءِ وانگ ءِ پرماتگ ۔

ما ھمود ءَ گوں سنگت انام رزا ءُ یوسف راز ءُ کریم ممتاز ءِ ھواری دوکان ءَ شئر وانی کتگ برے برے واجہ مھمد ھسن ءَ مارا وتی لوگ ءَ لوٹاھینتگ کہ بیا ات مرچی دیوانے کن ایں لھتے مھمان اتکگ گڑا ما سنگتاں وت ءَ ھمود ءَ لوگ ءَ سر کتگ ءُ شئر وانی کتگ ۔

واجہ مھمد ھسن یک مزنیں ھستی ءُ نامی ئیں مردمے بوتگ من ستر گوں وتی نزوریں ند ءَ واجہ مھمد ھسن ءِ بابت ءَ نبشتہ بہ کناں انگت کم انت واجہ مھمد ھسن داں ابد نمیران انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

ھک دے بلوچستان تھریک ءِ سروکی ءَ مولانا ھدایت الرحمان ءَ پنچ شمبے ءِ روچ ءَ بلوچستان ءِ تیاب دپی شھر گوادر ءَ تھسیل اورماڑہ ءَ تر ءُ تاب ءَ شتگ-

ھمے درگت ءَ آئی ءَ دمگی دریاوردانی یک مراگشے ءَ تران کنان ءَ گْوشتگ کہ بلوچستان ءِ مال ءُ مڈی ھوار ءَ سی پیک مئے مڈی اَنت ھچ وڑیں تاکت نو مئے مڈیاں پُل اِت نہ کن اَنت-

آئی ءَ گوشتگ کہ وزیراعلیٰ قدوس بزنجو اش کن ما سے ماہ ءَ رند دہ لک ءَ گیش مردم شال ءَ یکجاہ کنگ ءَ ایں دانکہ بلوچستان ءَ چیک پوسٹانی ھلاس کنگ ءُ زر ءَ بے کانودی ٹرالرنگ ءِ ھلاس کنگ نہ بنت مئے جُھد برجاہ بیت-

آئی ءَ گوشتگ کہ بے کانودی ٹرالنگ ءِ دروشم مئے دریاوردانی سر ءَ یک اُرشکار ءُ لُٹ ءُ پول کنگ زور سر ءَ کپتگ آیاں مئے زر ءَ لُٹ ءُ پُل ءِ شکار جوڑ کتگ گوستگیں پانزدہ سالاں کمت زر ءَ بے کانودی شکار ءَ چہ ساپ کنگ بوتگ ءُ مرچی پانزدہ سال ءَ پد کلمت ءِ دریاورداں مزنیں کچے جنگھی ءِ شکار کنگ ءَ اَنت-

آئی ءَ گوشتگ کہ بزگرانی لوگانی چُل ءِ آس کشتگ آ تباہ کتگ اَنت بلے نو اے زُلم ھلاس بیت –

آئی ءَ گوشتگ کہ صوبہ ءِ مڈی مئے ئیگ اَنت بلوچستان مئے ئیگ اِنت، سی پیک مئے ئیگ اِنت ، زر تیاب مئے ئیگ اِنت گوادر پورٹ ھم مئے ئیگ اِنت-

آئی ءَ گوشتگ کہ اورماڑہ شھر اد ءِ دمگی مردمانی ئیگ اِنت کسی زاتی مڈی نہ اِنت مروچی ءَ پد پاکستان نیوی اگاں کمپان ھم جوڑ کنت گُڑا آئی ءَ جُست کنگ لوٹ اِیت اگاں ناں ما جوڑ بوتگیں کمپان ءَ پروش ایں-

بلوچ لبریشن آرمی ءِ جارکش جیئند بلوچ ءَ وتی شنگ کُتگیں درشان ءِ تہ ءَ مروچی کیچ ءَ بیتگیں اُرش ءِ زمہ واری من اتگ ءُ گُشتگ کہ مروچی کیچ ءِ بنجاھی شھر تربت ءَ نادرا کارگس ءِ دیما زورگیریں پاکستانی پوج ءِ یک چیک پوسٹ ءِ گوں دستی بمب ءَ نشانگ کُتگ کہ اِشی سوب ءَ دژمن ءِ دو کارمند ٹپیگ بیتگ اَت۔

جیئند بلوچ ءَ گُشتگ کہ بنجاھی کیمپ ءِ پھازگ ءِ ھاترءَ اے چوکی جوڑ کنگ بیتگ کہ اِشی سرءَ مروچی گوں دستی بمب ءَ مئے سرمچاراں اُرش کُتگ۔ جارکش ءَ گُشتگ کہ چہ تراک ءَ پروش وارتگیں پوجی کارمنداں شھر ءِ تہءَ تیرگواری بندات کتگ ءُ لس مھلوک لٹ کُٹ ھم کُتگ اَنت۔

بی ایل اے ءِ جارکش جیئند بلوچ ءَ گُڈ سرءَ گُشتگ کہ زورگیریں پوجانی سرءَ مئے اُرش مدامی گوں ترندیءَ برجاہ مان اَنت ۔

بلوچ آجوئی لوٹوکیں سلاہ بندیں گل بلوچ ریپبلکن آرمی ءِ جارکش بیبگر بلوچ ءَ رسانکدراں وتی شنگ کرتگیں درشان ءِ تہ ءَ زامران ءَ پوجی پانگس ءِ سر ءَ بوتگیں اُرش ءِ زمّہ واری منّ اِتگ گوشتگ کہ مئے سرمچاراں مروچی سھب زامران ءِ دمگ بگان ءُ نرم میان ءَ برجاھیں پاکستانی پوج ءِ پانگس ءِ سر ءَ دور جنگیں توپک ءَگوں اُرش کُتگ یک پوجی کارمند ءِ کُشتگ –

جارکش ءَ گوشتگ کہ اے پوجی کارمند پانگس ءَ ڈن داراں یکجاہ کنگ بوتگ کہ مئے اسنائپر وتی نشانگ جوڈ کتگ –

گڈسر ءَ.جارکش ءَ وتی درشان ءِ تہ ءَ گوشتگ کہ مئے اُرش بلوچستان ءِ آجوئی ءَ تاں برجاہ مان انت –

سند ءِ مزن شھر کراچی بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی سرجمی ءَ چار ھزار ءُ پنچ سد ءُ سِی ءُ چار روچ سرجم بوتگ – ملیر کراچی ءَ چہ راجدار ءُ چاگردی باسک عرض محمد بلوچ، نور محمد بلوچ، ایڈوکیٹ محمد عمر بلوچ ءَ زھرشانی بنجل ءَ اتکگ ءُ بیگواھیں مردمانی کھولانی گوم ءَ دلپدردی درشانتگ –

اتکگیں مردمانی گوم ءَ تران کنان ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ گوشگ ات کہ دنیا ءِ تہ ءَ میان استمانی تاکتانی میان ءَ وت ماں وتیں کش ءُ چیل، گِس جنگی ءُ ھونریچیاں آؤکیں جنجال گندگ بیگ ءَ اَنت-

ماما قدیر بلوچ ءِ گوشگ ات کہ دنیا ءَ ھر کجا ھم ھزاراں مردمانی زورانسری آوار ءُ ماورائے عدالت کُشگ ءُ چگل دیگ ءِ مُھکمیں شوندات ءِ بگیری ءَ زھرشانی ءُ یکسدو شش روچ ءِ روانک ءُ سینزدہ سال ءِ دراج کشیں شُدکشیں زھرشانیاں دنیا ءِ دلگوش گوں وت کُرتگ اَت، اگاں کسے ھنگت ھمے جیڑ ایت کہ بلوچ پہ ھُشکیں گپ ءُ بے ربیدگیں کانوداں دلجم اِنت گڑا آ رَد اِنت، مزن آمیدگس ءِ نیمگ ءَ داتگیں کولاں ابید بلوچستان ءَ برجاھیں جنگ ءِ زمہ وارانی بگیری ءَ ارزی نبشتہ کنگ وتی جاہ ءَ ایشانی تہ ءَ یک مردمے ءِ سر ءَ انگت بھتام جنگ نہ بیتگ-

آئی ءَ گوشتگ کہ بلوچ آبادیانی سر ءَ لشکرکشیانی بابت ءَ ھم ریاست ءِ نمائندگانی نیمگ ءَ جتائیں گپ دیم ءَ کاینت ءَ آئی جی ایپ سی تچکی ءَ گوش ایت کہ ریاستی رٹ ءِ برجاہ دارگے ھاتر ءَ لشکرکشی برجاہ اِنت- نومبر ءِ ماہ ءَ بگر تاں ھنوگ ءَ زورگیر ءِ بلوچستان ءِ بازیں دمگاں لشکرکشی برجاہ اِنت – آواران ءَ بگر داں کیچ ءِ بازیں جاہ ترندیں لشکرکشی ءِ آماچ اَنت- شاپک، ھوشاب ءُ آدگہ جاھاں پاکستانی پوج ءِ دو مزنیں بنجلاں ھوار یک مزنیں بُنجلے جوڑ کنگ ءَ ابید ھوشاپ ءَ وانگجاہ ءِ نام ءَ یک مزنیں بُنجلے جوڑ بیگ ءَ اِنت – سرجمیں کیچ ءِ مھلوک پاکستانی پوج ءِ انگیر ءَ انت، وھدے کہ مردماں ایشانی بگیری ءَ توار چِست کُرتگ گڑا پوج ءَ زھگ ءُ جنینانی سر ءَ زوراکی کُرتگ ءُ بازیں گسے ماندارگ بوتگ،بازیں مردمے آورجنگ ءُ بیگواہ کنگ بوتگ-

بلوچستان ءِ دمگ کیچ ءَ پوج ءِ سر ءَ دگہ یک اُرشے ءِ ھال اِنت، اُرش پوج ءِ سر ءَ کیچ ءِ ھند زامران نرمگ ءُ بگان ءِ میان ءَ پوج ءِ چوکی ءِ سر ءَ بیتگ –

اھوالانی رد ءَ اُرش ءَ پوج ءَ جانی تاوانانی دیمپانی کنگ کپتگ ءُ تنی وھدی دگہ گیشیں ھال سر نہ بیتگ اَنت –

زانگ بہ بیت کیچ ءِ دمگاں لھتے ادارانی تہ ءَ اے سیمی اُرش اِنت اشی ءَ پیسر مند ءُ ناصر آباد ءَ پوج نشانگ کنگ بیتگ –

ناصر آباد اُرش ءَ انتزامیہ ءِ یک کارندھے ءَ نام پدر نہ کنگ ءِ شرت ءَ دی بلوچستان پوسٹ ءَ گوں گپ کنان ءَ گوشتگ کہ اُرش ءَ دو کارندہ بیران بیتگ اَنت ءُ یکے زدگ بیتگ ءُ اُرشکاراں پوجیانی توپک ءُ دگہ ساز ءُ سامان برتگ اَنت –

اے درگت ءُ پوج ءِ شعبہ تعلقات عامہ آئی آیس پی آر ءِ گپ دیم ءَ نیتکگ اَنت ناکہ اُرشانی زمہ واری منّگ بیتگ اَنت –

ھزدار ءِ دمگ وڈھ ءَ دزبمب اُرشے ءَ سَے مردم زدگ بیتگ اَنت –

تراک وڈھ ءَ تیل منڈی ءَ بیتگ اود ءَ سَے مردم زدگ بیتگ اَنت –

زدگ بیتگیں مردم درمانی ءَ ھسپتال ءَ برگ بیتگ اَنت ءُ تنی وھدی وئیل ءِ بارو ءَ گیشیں سرپدی نہ بیتگ اَنت کہ اُرش ءِ نشانگ ءَ کے بیتگ –

نبشتانک: دشت ءِ نرمزارانی شھیدی ءِ ششمی سالروچ

نبشتہ کار: گلزمان بلوچ

دی بلوچستان پوسٹ

دشت ءِ وش لزتیں کوش ، پلانی گواڑگ ، سیل ءُ سواد ھر مولم ءِ وشی چہ ورنایانی دل ءَ در بوان اَت، مردمانی بدپیلی گیش، وت ماں وت جنگ ءُ چوپ، نشہ ءُ دگہ سلیں کار روچ پہ روچ ودان اَت۔ ھمے میان ءَ آشوب ءَ ھم سر ماں دشت ءِ جلگھیں زر ءَ دور دات، ھما ورنایاں کہ اِے سرجمیں لزتانی روگ اِے بدپیلی ءُ بدیں کرد مار اِت اَت۔ اول سرْپ ءِ ھما جنگولاں گوں ھوار بوت اَنت ، پہ ننگ ءَ پہ پدمنتگی ءَ پہ بلوچ ءِ وتواجھی ءِ ھاتر ءَ تپنگ اِش چست کت، کوھاں یاگی بوت اَنت، گوں مزن جگری ءَ دژمن ءِ دیم ءَ جنگ اِش داشت، روچ ءُ شپ اِش چار اِت ناں سارتی ءُ تبد، ھر رنگ ءَ وتی جھد ءِ سربلندی ءُ وتی مول ءُ مراد ءِ سر ءَ وت ءَ کربان اِش کت، ھر کجا دژمن ءِ ھالے بوت آیاں مدام دژمن ءِ سر بست ءُ جنگ اِش کت ءُ دژمن ءِ پندل اِش بے سوب کت اَنت۔

ھمے رنگ ءَ دوھزار سینزدہ ءِ گچینکاری ءِ وھد ءَ ماں دشت ءِ دمگ ءَ دژمن بے سوبی ءِ آماچ اِش کت۔ ھر کارے ءَ دژمن ءِ پندل بے سوب بوت اَنت پہ دژمن ءَ ھچ راہ نیست اَت، آئی ءَ دشت ءَ پہ وت ءَ مزنیں کیمپے جوڑ کنگی اَت ، چہ اِے سوچ ءُ چارگ ءَ پد مرچی ءَ چہ شش سال ساری دوھزار پانزدہ ءِ گڈی ماہ ءِ بیست ءُ دو رمس بزانکہ مرچیگیں روچ ءَ مزنیں کچے ءَ لشکر ءَ وتی گاڑی ءُ موٹل زرت اَنت ءُ دیم پہ دشت ءَ دات، وھدے اِے ھال ماں دشت ءِ نرمزاریں بچاں سر بوت، گڑا آیاں دژمن ءِ راہ بست ، پد ءَ جنگ بندات اَت، ھر نیمگ ءَ تیر ءُ تپنگانی توار اَت، دراھیں مھلوک ءَ پہ نرمزارانی ھاتر ءَ نیک دوائی اَت ءُ پہ دژمن ءَ بے سوبی ءِ دوا اَت۔

لشکر ءَ مزنیں کیمپے دشت ءِ دمگ بلنگور ءَ جوڑ کنگی اَت ، بلے نرمزاراں انچش آئی ءِ دیم داشت کہ دہ بیست کلومیٹر ءِ راہ ءَ دژمن ءَ پورھیں روچے لگ اِت، سھب ءِ بانگواہ ءِ لشکر گوں مزنیں سلاہ ءُ توپاں ھیلتے شپ ءِ وھدے ءَ سر بوت اِے نرمزاراں انچیں میڑے دات کہ ھچ دیم ءَ کنز اِت ئِے نہ کت ، گڈی ءَ جنگی بالگتر ئِے آؤرت اَنت۔ اِے جنگ ءَ لشکر ءِ مزنیں کچے ءَ کماندار ءُ سپاھیگ مرت اَنت ءُ زدگ بوت اَنت۔

اِے جنگ ءَ بی ایل ایپ ءُ بی آر اِے ءِ سنگت دوئیں ھور اِت اَنت۔ جنگ ءَ پد شش بی آر اِے ءِ سنگت ءُ دو بی ایل ایپ ءِ سنگت ءِ شھیدی ءِ ھال بوت، چہ اِے سنگتاں بی ایل اِیپ ءِ شھید سابر ءُ شھید داد جان ، بی آر اِے ءِ شھید گنی ، شھید جلال، شھید امان، شھید پارس، شھید التاپ ءُ شھید بالاچ اِت اَنت۔

اِے نرمزاراں وتی مزن جگری ءَ گوں جنگ داران کت ءُ وت ءَ مدامی راج دپتر ءَ نمیران کت، مرچی ششمی سالروچ اِنت ءُ آیانی نام پہ شان گرگ بیت ، آ ابدی نمیران اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ پاکستانی لشکریاں دوشی بیڑ بُرتگ ءُ دو براتاں ھوار چار مردم دزگیر کنگ ءَ پد بیگواہ کُتگ اَنت۔

لشکریاں بیڑ کیچ دمگ ءِ میتگ سرنکن ءَ بُرتگ کہ اودءَ چار مردم دزگیر کُتگ ءُ گوں وت بُرتگ اَنت۔ بیگواہ بیتگیں مردمانی پجار بشام ء غلام محمد ،ساری ء ابراہیم، شیراز ء اسماعیل ءُ حکیم ء غلام محمد ءِ ناماں بیتگ۔

کھول ءَ اے گپ راست کُتگ ءُ گُشتگ کہ لشکریاں شپ ءَ دیر ءَ بیڑ بُرتگ ءُ مئے مردم دزگیر کُتگ ءُ بیگواہ کُتگ اَنت کہ چریشی ءَ پد آیانی درگت ءَ ھچ پئیم ءِ ھال نیست اِنت۔

زانگ بہ بیت کہ ھمے یکے ھپتگ ءِ تہءَ سرجمیں بلوچستان ءَ لشکریانی دستءَ زورانسری بیگواھیانی کیسانی تہءَ گیشی اتکگ یک ھپتگ ءِ تہءَ پانزدہ مردم ءَ گیش لشکریاں بیگواہ کُتگ اَنت۔