TBP Balochi

بلوچستان ءِ دمگ کیچ ءَ ناشناسیں سلاہ بندیں پرپٹ سواراں پاکستانی لشکریانی سرءَ تیر گواری کُتگ ءُ سَے کارمند کُشتگ اَنت۔

تیر گواری ءِ وئیل کیچ ءِ میتگ ناصر آباد ءِ ھند ءَ دیما اتکگ۔ اھوالکاراں ٹی بی پی ءَ گُشتگ کہ سلاہ بندیں مردماں لشکریانی بنجل ءَ روکیں ٹیم ءِ سر ءَ اُرش کُتگ ءُ تتکگ اَنت۔

گیشتریں اھوالانی ردءَ اُرش ءَ سَے کارمند ھما دمان ءَ مُرتگ اَنت وھدیکہ اُرش کار در آیگ ءَ سوبمند بیتگ اَنت۔

زانگ بہ بیت کیچ ءَ مرچی یکیں روچے تہءَ اے دومی اُرش اِنت کہ اشانی تہءَ لشکری نشانگ کنگ بیتگ اَنت چریشی ءَ پیسر مند ءِ ھنکین شیراز ءَ لشکریانی کارمند نشانگ کنگ بیتگ اِت اَنت بلے داں انگت اے اُرشانی زمہ واری ھچ گل ءَ نہ من اِتگ۔

بلوچستان لبریشن فرنٹ ءِ جارکش میجر گھرام بلوچ ءَ دشت ءَ یک پوجی کارمند ءِ کُشگ ءِ زمہ واری من اِتگ۔

بی ایل ایف جارکش میجر گھرام بلوچ ءَ گُشتگ کہ 20 دسمبر دو شمبے ءِ روچ ءَ سرمچاراں دشت ءِ دمگ گورگی ءَ پوجی پانگس ءِ سرءَ سنائپر توپگ ءَ گوں اُرش کُتگ۔

جارکش ءَ گُشتگ کہ سنائپر اُرش ءِ آسر ءَ یک پاکستانی پوجی ءِ کُشتگ۔

میجر گھرام بلوچ ءَ گُڈسرءَ گُشتگ کہ مئے چُشیں اُرش داں بلوچستان ءِ آجوئی ءَ برجاہ مان اَنت۔

بلوچستان ءِ دمگ کیچ ءَ پاکستانی پوج ءِ پانگس ءِ سر ءَ ناشناسیں سلاہ بندیں مردماں اُرش کُتگ۔

سربیتگیں ھالانی رد ءَ گوستگیں روچ ءَ بیگاہ ءِ ادار پنچ ءَ کیچ دمگ ءِ مند ھنکین ءَ شیراز مولڈ ءِ ھند ءَ بستگیں پھازگی لشکریانی پانگس ءِ سر ءَ اُرش کنگ بیتگ۔

ھالانی رد ءَ اُرش ءِ تہ ءَ لشکریاں تاوان ءِ دیمپانی کنگ کپتگ بلے داں انگت واکدارانی لیکہ اے درگت ءَ دیما نئیتکگ۔

زانگ بہ بیت بلوچستان ءِ دمگ کیچ ءَ گیشتریں وھدءَ پھازگی لشکر ءُ سی پیک دیمروئی کارانی سر ءَ بلوچ سلاہ بندیں آجوئی گل اُرشانی زمہ واریاں زیر اَنت۔ بلے داں انگت اے اُرش ءِ زمہ واری ھچ گل ءَ نہ من اِتگ۔

سر بیتگیں ھالانی رد ءَ روکپتی بلوچستان ءَ سیادروکیں زندانی ءِ اوین جیل ءَ پاھو دیگ بیتگ، پاھو گوستگیں روچ ءَ دیگ بیتگ-

پاھو دیگ بیتگیں مردم ءِ پجار عیدو ء مھمد شاہ جھمنند زاھدان سرجنگل ءِ نام ءَ زانگ بیتگ-

ھالانی تہ ءَ گوشگ بیتگ کہ اے چار سال ءَ پیسر ایرانی لشکر ءِ سر ءَ بیتگیں یک اُرشے ءِ بھتام ءَ گرگ بیتگ ءُ چار سالاں زنداں ترندیں سزاھانی دیمپانی ءَ پد گوستگیں روچ ءَ پاھو دیگ بیتگ –

ھالانی تہ ءَ گوشگ بیتگ کہ عیدو ءِ عمر سی ءُ پنچ سال اِنت ءُ آئی ءَ وتی پُشتپد ءَ پنچ زھگ یلو کرتگ ءُ شتگ آ چار سال ءَ پیسر یک بھتامے ءَ گرگ بیتگ ءُ گوستگیں روچ ءَ آ پاھو دیگ بیتگ –

روکپتی بلوچستان ءَ وھد وھد ءِ سر ءَ ایرانی آمیدگس مردماں پاھو دیگ ءَ اَنت ایمنسٹی ایران ءَ ھم اے پاھوانی ھلاپ ءَ زھر درشان کتگ اَنت –

بلوچستان ءِ دمگ خاران ءِ نندوک کسان سالیں کفایت اللہ بلوچ ءِ یل کنائینگ ءِ ھاتر ءَ یک روانکے کشگ بوتگ-

25 جولائی 2018 ءَ گچینکاری ءِ وھد خاران اولنگی پولنگ اسٹیشن ءَ سرکاری مردمانی دست ءَ چست کنگ بوتگیں کفایت اللہ بلوچ ءِ یل کنائینگ ءِ بگیری ءَ مروچی شھر ءَ یک روانکے کشگ بوتگ ءُ ڈپٹی کمشنر آفس ءِ دیم ءَ زھرشانی کنگ بوتگ-

روانک ءَ جتائیں سیاسی ، نیکراھی پارٹی، نودربر گل، سول سوسائٹی ، زالبول ءُ چکاں مزنیں کچے بھر زرتگ-

روانک ءِ کشوکیں مردمانی دست ءَ پلے کارڈز ، بینرز ءُ کفایت اللہ ءِ اکس چست کتگ ءُ کفایت اللہ یل کنائینگ ءِ لوٹ کتگ-

اے درگت ءَ ترانکاراں گوشتگ کہ کفایت اللہ ءِ کھول ءَ گوستگیں بازیں روچاں چہ زھرشانی کنگ ءَ اَنت بلے ھکومتی ادارہ بے تواری ءِ ندارگ جوڑ بوتگ اَنت-

آیاں گوشتگ کہ بدبھتی ءَ سے سالاں چہ یک یازدہ سالی ئیں گوانڈوے زورانسری آوار جنی ءِ نشانگ بوتگ ءُ ادارہ بے تواری ءِ ندارگ جوڑ بوتگ اَنت-

آیاں گوشتگ کہ ھما وھد ءَ کفایت اللہ زورانسری آوار جنی ءِ نشانگ کنگ بوتگ ءُ آئی اُمر ھشت سال بوتگ، یک ھشت سالی ئیں گوانڈوے بیگواہ کنگ انسانی مستریں پادمالی اِنت- یک گوانڈوے ءَ گوں دُژمنی بوت کنت-

آیاں گوشتگ کہ کفایت اللہ ءِ کھول اوٹ ندیگ پُشدر ءَ کسانیں کفایت اللہ بدکردیں ٹک ءِ میر ءُ واجکاراں بیگواہ کتگ-

آیاں گوشتگ کہ اد ءَ نامگپتگیں ایم پی اے ءِ بے تواری سر کچ نہ وارت آ جھان ءَ گرد اَنت انسانی ھکانی سر ءَ گپ من اَنت بلے اشی ءِ وتی شھر ءَ چہ یک یازدہ سالی ئیں گوانڈوے بیگواہ ءَ اِنت ءُ توسیپ کنوک بے توار اِنت-

ھمے درگت ءَ کھول ءَ گوشتگ کہ انسان دوست مئے ھمراھی ءَ توار چست بہ کن اَنت ءُ یازدہ سالی ئیں گوانڈوے یل کنائینگ ءَ وتی کرد ءَ پیلو بہ کن اَنت-

آیاں سرجمیں سیاسی ، نیکراھی پارٹی، نودربر گل ءُ انسانی ھکانی ادارھاں گوں یکرندے پد ءَ دزبندی کتگ کفایت اللہ یل کنائیگ ءَ وتی کرد ءَ پیلو کتگ-

کھول ءَ گوشتگ کہ مئے کھول ءَ گوستگیں سے سالاں چہ ازیت اوپار کنگ ءَ اَنت ، مزنیں آمیدگس کفایت اللہ یل کنائینگ ءَ وتی راھبندی راہ ءِ در بہ چن اَنت ءُ مئے کُمک ءَ بہ کن اَنت-

چہ سَے سالاں زورانسری آوار جنی ءَ پد بیگواھیں انسانی ھکانی باسک راشد حسین بلوچ ءِ مات کراچی پریس کلب ءِ دیم دو روچی شدکشیں زھرشانی ءَ نندیت ءُ کراچی ءَ زھرشانی کنگ بیت اِنت وھدیکہ چاگردی ترامجاھاں آگھی مھمے چلائینگ بیت اِنت –

ریلیز راشد حسین کمیٹی ءِ نیمگ ءَ چہ شنگ بوتگیں درشان ءِ تہ ءَ گوشگ بوتگ کہ متھدہ ارب امارات ءُ پاکستان ءَ زورانسری آوار جنگ بوتگیں راشد حسین بلوچ انگت ءَ زاھر کنگ نہ بوتگ ناکہ آمیدگس ءَ آرگ بوتگ ءُ ناکہ ھک دیگ بوتگ –

درشان ءِ تہ ءَ گوشگ بوتگ کہ ھمے سال ءِ بیست ءُ شش رمس ءَ راشد حسین ءِ زورانسری آوار جنی ءَ سَے سال سرجم بوگ انت بلے راشد حسین انگت بیگواہ انت اے درگت ءَ گوستگیں سَے سالاں راشد حسین ءِ مات ءُ کھول ءِ دگہ مردم زھرشانی کنگ ءَ انت وھدیکہ اے میان ءَ سند ءُ بلوچستان ءِ آمیدگسانی تہ ءَ پٹیشن ھم کنگ بوتگ بلے اے درگت ءَ ھچ وڑیں گامگیج زورگ بوگ ءَ نہ انت –

درشان ءِ تہ ءَ گوشگ بوتگ کہ راشد حسین ءِ متھدہ ارب امارت ءَ چہ زورانسری آوار جنی ءَ سَے سال سرجم بوگ ءَ آئی ءِ مات بیست ءُ پنچ ءُ بیست ءُ شش دسمبر ءَ کراچی پریس کلب ءِ دیم ءَ شدکشیں زھرشانی بنجل ءَ نند ایت وھدیکہ بیست ءُ شش دسمبر ءِ روچ ءَ پریس کلب ءِ دیم ءَ زھرشانی کنگ بیت اِنت ھمے روچ ءَ چاگردی ترامجاھاں بلوچ سوشل میڈیا ایکٹوسٹانی نیمگ ءَ آگھی مھم چلائینگ بیت اِنت –

ریلیز راشد حسین کمیٹی ءَ وتی شنگ کرتگیں درشان ءِ تہ ءَ درسیں تک ءُ پھناتاں سیادی داروکیں مردماں لوٹ کتگ گوشتگ انت زھرشانی ءُ ٹوئیٹر کمپئین بھر بہ زور انت وھدیکہ درشان ءِ کمک ءَ دمگی ءُ میان استمانی انسانی ھکانی گل، راجداریں گل چہ لوٹ کنگ بوتگ کہ رشد حسین ءِ یل کنائینگ ءَ توار چست بہ کن انت –

دی بلوچستان پوسٹ پتر ءَ سربوتگیں ھالانی رِد ءَ مروچی چار شمبے ءِ روچ ءَ بلوچستان ءِ دمگ ژوب ءَ چار مردمانی جون دست کپتگ اَنت-

لیوز بنشون ءِ رِد ءَ اشانی جون سرکچ ءَ ھونڈ ءِ تہ ءَ دست کپتگ انت کہ پجار کنگ نہ بنت – چاریں جون ڈی ایچ کیو برگ بوتگ انت –

زانگ بہ بیت چد ءُ پیش ھم بلوچستان ءِ جتا جتائیں ھند ءُ دمگاں بازیں جون دست کپتگ اَنت کہ آھانی پجار کنگ نہ بوتگ ءُ بے وارسی کل کنگ بوتگ انت –

بلوچستان ءَ زانگولیں جون دست گرگ بنت بلے آھانی پجار کنگ ءِ ھچ وڑیں طریقہ کار نیست –

بلوچستان ءَ گیشتر دست کپتگیں جون بیگواھیں مردمانی بنت کہ بید پجار ءَ کل کنگ بنت چریشی ءِ سوب ءَ بیگواھیں مردمانی کھول گیشتر ماژگی پریشانی آماچ بنت –

بلوچستان ءِ جتا جتائیں ھند ءُ دمگاں جونانی دست کپگے درچ یکشل ءَ برجاہ انت کہ بازیں زانگولیں جونانی پجار کنگ نہ بیت اِنت وھدیکہ بازینے پجار بیگواھیں مردمانی نام ءَ بوتگ انت –

کاؤنٹر ٹیررازم ڈیپارٹمنٹ (سی ٹی ڈی) دست ءَ زورانسری آوار جنگ بوتگیں دو بیگواھیں مردمانی بلوچستان ءِ دمگ ھاران ءَ ارزی نبشتہ کنگ ءُ پیش کنگ بوتگ انت – ھردو مردمانی ارزی گوستگیں روچ ءَ سیشن کورٹ ھاران ءَ جمع کنگ بوتگ انت ءُ بیگواھیں مردم آمیدگس ءَ پیش کنگ بوتگ انت –

بیگواھیں مردمانی تہ ءَ رسول بخش ء عبدالخالق سمالانی جاھمنند ھرنائی شاھرگ ءُ جما خان ء چکراللہ سمالانی جاھمنند شال ءِ ناماں چہ بوتگ انت –
ھالانی رِد ءَ سی ٹی ڈی ءَ آھانی سر ءَ الزام جتگ ءُ آھانی ارزی آمیدگس ءَ جمع کتگ انت – آھانی سر ءَ ھمے الزام جنگ بوتگ ھردو مردم بلوچ آجوئی لوٹوکیں سلاہ بندیں گلاں گوں سیادی دار انت ءُ لھتے روچ ساری نالہ بڈو ھاران ءَ چہ دزگیر کنگ بوتگ انت –

بلے اھوالکار ءِ رِد ءَ ھردو مردم سی ٹی ڈی ءَ بازیں وھد ءَ پیسر زورانسری آوار جتگ ءُ بیگواہ کتگ بوتگ انت –

زانگ بہ بیت سی ٹی ڈی ءِ مستونگ، شال، زیارت ءُ بولان ءَ بوتگیں میڑ دروگ گوشگ بوتگ انت کہ اودا بیگواھیں مردم کُشگ بوتگ انت اے گپ ءِ پدرائی بازیں جاھاں چہ بوتگ –

دروگیں میڑ ءَ بیگواھیں مردمانی کوش ءِ وئیلاں پد بلوچستان نیشنل پاٹی ءِ رھشون سردار اختر مینگل ءَ ھوار دگہ بازین ءَ سرکار ءِ سر ءَ تنکید کُتگ بلے انگت ھاکمانی نیمگ ءَ اے درگت ءَ ھچ وڑیں درشان دئیگ نہ بوتگ –

نبشتانک: مروچی شھید امان جان ءِ ششمی سالروچ اِنت

نبشتہ کار: مزار کریم

دی بلوچستان پوسٹ

شھید امان ءِ زند ءِ درگت ءَ لھتے دانک، شھید امان چہ اَمارات گِسیس جدید نادراہ جاہ ءَ 23/02/1992 ودی بوتگ ودی بوھگ ءَ چہ دو سال ءَ رند آئی ءِ کِبلھیں پت چہ اَمارات ءَ گو ں وتی کھول (فیملی) ءِ ھمراھی ءَ واتر بلوچستان ءَ کیت ءُ شھید امان جان اے وھد ءَ سک کسان بیت گڑا وهد دیم ءَ جُنزان کنت ءُ شھید امان جان وتی بِنداتی وانگ ءَ سن 1997 چہ جمک ءِ وانگجاہ ءَ بندات کنت پنچمی چکاس ءِ سوبین بوگ ءَ رند دیم ءِ واستا مڈل وانگجاہ کاشاپ ءَ نام ءَ درج کنت شش ءَ بگر داں هشت ءَ کاشاپ وانگ جاہ ءَ دربارت ءُ چکاس ءَ مڈل سکول کاشاپ ءَ سُوبین بیت۔

دیم تر ءِ وانگ ءَ مزن دربرجاہ بلنگور ءَ دربارت ءُ سوبین بیت چد ءُ باد پہ گیشیں وانگ ءِ ھاتر ءَ اَتا شاد ڈگری کالج تربت ءَ 1 پروری 2011 ءَ جنرل سائنس ءِ واستا نام ءَ درج کنت شھید امان جان F.A پاس کنت ءُ گیشیں مجبوریانی سوب ءَ وانگ ءَ یلہ کنت روزگار ءِ بندات آ موٹر سینکل گیراجے ءَ پہ شاگردی کارکنت ءُ کار ءَ شری ءِ سر ءَ سرپد بیت ءُ دربارت کموکے ءَ رند وت یک جوانیں اُستادے جوڑ بیت شھید امان جان کمو وهد ءَ کپکپار ءَ کار کنت ءُکیت۔ اے وهد ءَ بل نگور ءَ بلے بل نگور ءَ کار کمو سست بیت ءُ گراک ھم کم تر اَنت اد ءَ چہ باد روت مند سورو ءَ کمو وھد ءَ ھمود ءَ کار کنت چار پنچ ماہ ءَ رند کار ءَ یلہ کنت واتر وتی لوگ ءَ کیت۔

بلے اے واتری ءَ آئی ءِ تہ ءَ زرمبشتے آرتگ اَت ، آئی ءِ گپ ءُ گال درست مٹ بوتگ اَت انت ھمے گپ ئِے جت کہ دراھیں وھد پہ مزدوری بزگی گوازینگ نہ بیت ھما سنگت کہ پہ باندات جھد کنگ ءَ اَنت مارا ھم وتی پرز پورا کنگی اِنت اے جھد یک کسے ءِ جھد نہ اِنت اے جھد ءَ بلوچستان ءِ وشیں ھمگرنچ اِنت ھمے مارشتاں آ چہ گِس ءَ در کت ءُ کوہ ءَ برت کوہ ءَ جھدکاراں شریں سنگت ءِ زلورت اَت پمیشکا شھید امان ھم آیاں پرز اد ءَ کنگ ءِ موہ دات گڑا آ وتی ٹرینگ ءَ بندات کنت ٹرین بوگ ءَ رند جھدکاریں سنگتانی ھمراھی ءِ بازیں جنگ ءُ ارشاں گون بیت ءُ سوبیں ھم بنت-

جھد ءِ سنگتانی گون ءَ پگری بُنیاد ءَ گوں دلپھکی ءُ ایمانداری ءَ کار ءَ دیم ءَ بران کنت یک روچے شھید امان پہ وتی کبلھیں مات ءُ پت ءُ لاڈکیں گھارانی دیدار گندی ءَ کیت
چہ کماندار ءِ موکل ءَ سے ءُ چار روچ ءَ گِندوکی کنت بلے اناگہ ءَ کماندار شھید ءَ گوانکو ءِ سر ءَ گوانک جنت ءُ گوش اِیت ئِے زوت کن بیا ۔

گڑا شھید اشتاپ اشتاپ ءَپت ءُ مات ءَ گوش ایت ھکّاں پھل کن اِت من روگ ءَ آں بلے زانگ نہ بیت اگاں بچّ اِت آں گڑا الم وتی لاڈکیں گوھارانی دیدار گندی ءَ واتر کایاں جنگی ساز ءُ ساماناں زیر اِیت چہ گس ءَ پہ پھر ءُ شان در کیت اَسر نماز ءَ کمو پیسر چداں چہ در کیت دومی روچ ءَ استانی لشکر ءِ تکریبن چِل (40) گاڑی چہ میرانی ڈیم ءَ درکیت ءُ دیم پہ بلنگور ءَ آیگ ءَ بنت کماندار ھم شھید ءَ گوانک جنت کہ زوت وت ءَ رسین شھید گوں سگنتاں اشتاپی ءَ کماندار ءَ گور ءَ وت ءَ سر کن اَنت کماندار گوں اے سنگتاں بل سُورک ءِ میان ءَ وتی سنگراں گر اَنت ءُ لشکر ءِ ودار ءَ نند اَنت کمے وھد ءَ رند ناپاکیں لشکر ھمے سنگربستگیں راہ ءَ گوزگ ءَ لگّ اِیت چہ کماندار ءِ ھکم ءَ سنگت تیرگواری ءَ بندات کن اَنت شھید امان ءُ وتی سنگتاں دژمن ءَ گوں لشکر ءِ اولی گاڑی ءِ درستیں کارندہ جنَگ بنت ءُ شھید امان جان ءُ گوں دگہ لھتے سنگت ءَ روت سلاھان اِش کار اَنت ۔

سھتے ءَ رند آدگہ بتّر بندیں گاڈی ھم سر بنت ءُ پشت ءُ دیم جنگ زور ءِ گوما بندات بیت ءُ سنگتاں لشکر دوئیں نیمگ ءَ انگیرّ ءَ کنت ءُ برز ءَ بمبگواریں بال گرد ترّگ ءَ لگّ اِیت نی جنگ زبردست زور ءِ تہ ءَ کیت شیلینگ ءُ مزنیں توپنگانی گوما لشکر سنگتاں گوں تیراں رگام ریچ کنت ءُ سنگت ھم پہ تمردی وتی سنگراں یلہ نہ کن اَنت بلے چہ بال گرد ءِ نیمگ ءَ یک شومّیں تیرے کیت ءُ شھید امان جان ءِ سیرین ءَ لگّ اِیت ۔

گڑا شھید ءَ گوں زدگی ھالت ءَ سنگت چہ جنگجاہ ءَ کش اَنت ءُ اے دگہ سنگت پہ جوانمردی جنگ ءَ دار اَنت آ سنگت شھید ءَ پہ الاج برگ ءَ بنت بلے وهد امان جان ءَ گیشیں موہ نہ دنت ءُ امان جان ءِ چم پہ اِمروز ءِ ندارگانی چارگ ءَ مدامی بند بنت۔

ھما سنگت کہ شھید امان جان ءِ ھمراھی ءَ شھید کنگ بنت آیانی نام ایش اَنت
شھید التاپ جان
شھید داد جان
شھید پارس جان
شھید جلال جان
شھید گنی جان بگٹی
شھید سابر جان
شھید بالاچ جان
گوں شھید امان ءَ اے تمردیں بچ پہ وتن نیمران بنت
شھادت ءِ روچ
22 دسمبر 2015

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پاکستانی لشکر ءَ یک مردمے دزگیر کنگ ءَ پد بیگواہ کُتگ، وھدیکہ چار بیگواھیں مردم یل بیتگ ءُ وتی لوگاں سربیتگ اَنت۔

بیگواہ بیتگیں مردم لشکریاں کیچ ءِ دمگ مند گواک ءَ چہ گوستگیں روچ ءَ لوگے ءَ بیڑ بُرتگ ءُ دزگیر کُتگ۔ بیگواہ بیتگیں مردمے پجار واجو ء عبدالواحد ءِ نام ءَ بیتگ۔

دومی نیمگ ءَ لشکریانی دستءَ بیتگواہ بیتگیں چار مردم یل بیتگ ءُ وتی لوگاں سر بیتگ اَنت۔ یل بیتگیں سے مردم گوستگیں روچءَ پنجگورءِ دمگ وشبود ءَ چہ دزگیری ءَ پد بیگواہ کنگ بیتگ اِت اَنت۔

ھمے پئیم ءَ پنجگور ءِ دمگ پروم لکیری ءِ جھمنند اھمد ء ھاجی داد کہ سے ماہ پیسر بیگواہ کنگ بیتگ اَت آ ھم یل کنگ بیتگ۔