TBP Balochi

بلوچستان ءِ دمگ تربت ءَ پریس کلب ءَ پیریس کانفرنس کنان ءَ سول سوسائٹی کیچ ءِ کنوینر گلزار دوست ءَ گوشتگ کہ اگاں چل ءُ ھشت ادارانی تہ ءَ بلیدہ ءَ جنگ بیتگیں سراج ء سالہ مھمد ءِ کشندہ دزگیر نہ بیت اَنت گڑا سول سوسائٹی کیچ فدا چوک ءَ نندانکی زھرشانی کنت-

آئی ءَ گُشتگ کہ بیست ءُ پنچ دسمبر ءِ شپ ءَ لھتے سلاہ بندیں مردم کہ آیانی نان حنیف کمبر ے ھاجی ھسن جھمنند میناز بلوچ ءُ جھانزیب ء واھد بلوچ جھمنند سلو بلیدہ ءَ سالہ مھمد ءِ لوگ ءَ دور کتگ ءُ آئی ءِ ورنائیں بچ شھید کتگ –

آئی ءَ گُشتگ کوشکاراں پد ءَ چاگردی رسانکجاھاں وت اتکگ ءُ من اِتگ ءُ گوشتگ کہ سراج ما ھمے واستا کشتگ آئی ءَ پاکستان ءُ اسلام ءِ ھلاپ ءَ گپ جتگ –

گلزار دوست ءِ رد ءَ آئی ءِ کھول اے کوش ءِ چم دیتگیں گواہ اَنت ءُ آیانی چمانی دیم ءَ اے مردماں آیانی زھگ جتگ –

آئی ءَ گُشتگ کہ تربت سول سوسائٹی بلیدہ ءُ دمگداراں چل ءُ ھشت ادارانی مھلت ءَ دنت کہ آ سراج ءِ کوشکاراں دزگیر بہ کن اَنت ھمایانی نام بلیدہ تھانہ ءَ نبشتگ کنگ بیتگ انت آیاں دزگیر بہ کنت اگاں ناں تربت سول سوسائٹی اسرمندیں کھول ءِ ھواری ءَ شھید فدا چوک ءَ زھرشانی نندانک ءَ نند ایت-

آئی ءَ گشتگ کہ اے وئیل ءِ ھلاپ ءَ آدینگ ءِ روچ ءَ ساھت یازدہ ءَ تربت پریس کلب ءَ زھرشانی کنگ بیت ءُ چریشی ءَ پد شمبے ءِ سھب ءَ ساھت یازدہ ءَ کشگ بیتگیں سراج ءِ لوگ گلی داں بٹ بلیدہ ءَ یک روانکے کشگ بیت اِنت ءُ پولیس ءِ تھانہ ءِ دیم ءَ زھرشانی کنگ بیت اِنت –

آئی ءَ گُشتگ کہ اے وئیل ءِ چم دیتگیں گواہ ھست اَنت بلے بژن اِنت انگت ءَ واکدار ءُ انتزامیہ ءِ گوشاں مورے ھم نہ وارت اِنت –

زانگ بہ بیت گوستگیں روچاں بلیدہ گلی ءَ جنگ بیتگیں سراج ءِ مات ءُ گوھاراں ھم آئی ءِ کوش ءِ درگت ءَ یک تامر بندے شنگ کتگ اَت کوشکارانی نام پدر کرتگ اَت ءُ انساپ ءِ لوٹ کتگ اَت-

بلوچستان ءِ سرکار ءَ مکران کوسٹل ھائی وے ءِ سیکورٹی ءِ واستا کوسٹل ھائی وے پولیس ءِ واک ءَ داتگ –

رسانکدرانی شنگ بیتگیں ھالانی رد ءَ کوسٹل ھائی وے پولیس ءِ واک دیگ ءِ واستا ڈی آئی جی ھائی وے بلوچستان ءِ برکت حسین کھوسہ ءِ گچین کنگ بیتگ –

شنگ بیتگیں ھالانی رد ءَ کوسٹل ھائی وے پولیس ءِ 1000 کارمنداں ھوار بیت اِنت ءُ ھمے رنگ ءَ کوسٹل ھائی وے ءَ 2 ریسکیو سینٹر ءُ 9 جاھاں چیک پوسٹ جوڑ کنگ بنت، یک پوسٹے ءِ واستا 100 نپر دارگ بیت اِنت –

شنگ بیتگیں ھالانی تہ ءَ گوشگ بیتگ 3 پوائنٹ ءِ سر ءَ سرکل آفیسز برجم بنت کہ اود ءَ ڈی ایس پیز دارگ بنت، 2 ایس پی آفس اورماڑہ ءُ گوادر ءِ ھنداں بنت ھمے رنگ ءَ یک ڈی آئی جی ءِ اورماڑہ ءَ دارگ بیت، گوادر ءِ دمگ اورماڑہ سروکی ءِ دارگ ءِ سوڑگ بیتگ اَنت –

ھال ءِ تہ ءَ گوشگ بیتگ 2 ریسکیو سینٹراں 50 کارندہ ءِ گنجائش ھوار گیجگ بیت اِنت – دومی نیمگ ءُ آوکیں سال ءَ پوڑی جولائی ءِ ماہ ءَ مکران ءَ دگہ گیشیں نپر دارگ بنت ءُ چیک پوسٹانی بندگ بندات کنگ بیت اِنت –

ھائی وے پولیس اسٹیشن ءُ ریسکیو سینٹرانی بندگ ءَ 800 ملین ءَ گیش لگ ایت ءُ بنداتی ءَ 400 کانسٹیبل ءُ دگہ کارمندانی زیرگ مکران ءَ سَے ھنداں گوادر، تربت ءُ پنجگور ءَ کنگ بنت –

بلوچستان ءِ دمگ کیچ ءَ پاکستانی لشکریاں یک مردمے دزگیر کنگ ءَ پد بیگواہ کُتگ۔

بیگواھیں مردمے پجار دولت ء حسن نام ءَ بیتگ کہ چہ کیچ دمگ ءِ ھنکین ھیرونک ءَ لشکریاں دزگیر کنگ ءَ پد بیگواہ کُتگ۔

اھوالانی رد ءَ لشکریاں بیڑ یے نیام ءَ جنین ءُ زھگانی سر ءَ زوراکی کُتگ۔

کیچ دمگ ءِ میتگ سنگ آباد ءَ چہ اھوال پیداک اَنت کہ گوستگیں شپ ءَ پاکستانی لشکر ءَ لوگ پہ لوگ بیڑ بُرتگ ءُ سرجمیں میتگ ءِ مردم جنین ءُ زھگاں ھوار ترندیں سارتی ءِ تہءَ لوگاں چہ ڈَن ءَ اوشتارینتگ اَنت۔

گیشتریں اھوالانی رد ءَ اے وھدءَ لشکریاں زھگ ءُ زالبولانی زھنی زوراکی کتگ ءُ لٹ ءُ کُٹ کُتگ اَنت، وھدیکہ لوگانی دروازگ ءُ دریگ ھم پروشتگ اَنت ءُ چہ لوگاں گران بھائیں شَے ھم وتی ھمراہ بُرتگ اَنت۔

داں انگت اے وئیل ءِ ردءَ واکدارانی لیکہ دیما نئیتکگ۔

نبشتانک: ندر پہ ماتے ءِ نام ءَ

چہ تو پد من مار اِتگ ما چورو اِنت-

نبشتہ کار: دیدار کولوائی

دی بلوچستان پوسٹ

ماتی تئی یات اَنچو پیداک اِنت انوں شپے سهت 1 بج اِنت ءُ شیھو ءَ منی کُٹّ ءَ سر ایر کتگ ءُ گریوگ ءَ انت کہ ماتے ءَ مارا یلّ ءَ کُتگ پہ کئی امیت ءَ ؟ماتی تو زان ئے اد ءَ رستر مارا وراں ماتی اد ءَ مارا کس وتی گس ءِ دپ ءَ اوں نیل ایت بگندے همے واستا کہ ما چورو انت ماتی گوں تو هنچو باز گلّہ است تو ماتی یک برے واتر بہ کن ماتی ماتی ماتی تو اشِکنگ ءَ ئے شیھو چے گُشگ ءَ اِنت؟ ماتی من دمبُرتگ شیھو ءِ تسلّہ دیگ ءَ ماتی من زوت کایاں تئی گوْر ءَ ءُ شیھو ءَ اوں کاراں گوں تئی گوْر ءَ شیھو مُدام گوں تو گلّہ کنت کہ ما ماتی ءَ دوست نہ بنت لالا شہداد ءُ آفتاب آئی ءِ دوستیں چُک انت کہ آئی ءَ گوں وت هوار بُرت اَنت ماتی تو کدی کائے ؟ ماتی انو هچ نویسِت کنگ ءَ نہ آں شیھو منی کُٹ ءَ واب کپت گڑا سُهب ءَ نمدی ءَ سرجم کناں تئی سر ءَ روان دے آں –

ماتی انو سُهب اِنت من ءُ شیھو آس ءِ گور ءَ نشتگ اِنت بلے شیھو انگت تئی جُست ءَ اِنت ماتی من شیھو ءَ گنداں ابیتکی ءَ منی دل ترکگ ءَ کیت پد ءَ تئی گپ یات کیت کہ شما اگاں منی کرا بیا اِت شُمئے کستریں برات ءُ گُوھاراں کے دست ءَ گیپت ماتی چہ تو چہ پد دگنیا ءِ کلیں رنگاں مئے گوم ءَ وتی سیادی بُرّ اِتگ هما هونی ئین براتاں ءُ دژمن ءِ بنجل وتی لوگ کُتگ انَت ماتی وهدے من تئی عکساں گنداں گڑا منی دیم ءَ یک ساهگے کیت ءُ اوشت ایت من ءَ تسلّہ دنت کہ تو کریمہ ءِ چکُے ترا موتک براه نہ دنت تئی مات بلوچ اهدے مستریں باجن ءُ شیر زال اِنت کہ هر وهد ءَ گوں وتی همکوپگیں همپگریں چُک ءُ براتاں داں زند ءِ گُڈی ساه ءَ پیوستگ اَت آئی ءَ وتی تنگوئیں ساہ اوں پہ ھمے زمین زبان ءُ راج ءِ ھاتر ءَ باھینت اَنت-

ماتی وهدے ساهگ تئی دلیری یے گپ ءَ کنت گڑا من ءَ گُمان نہ بیت کہ تو چہ اچ ما جتا ءُ گستا ءِ من ءَ همے گُمان بیت من تئی کُٹ ءَ سر ایر کُتگ ءُ واب گندگایاں بلے وهدے من پچگُڑاں ءُ سُد کن آں من آگایاں ءُ من ءُ تئی اکساں تئی اکس منی ایرجیگ ءَ ایر اِنت ءُ تر اِنت بگندے منی زندے مستریں مڈّی تئی پش کپتگیں اکس اَنت ماتی ترا یات بیت تو رضا جھانگیر، زاهد ءُ لکمیر ءُ دگہ یک زالے ءَ گوں عکسے کَشّ اتگ اَت اے کلیں سنگتاں زاناں بلے همے زال منی پجاروکے نہ انت بلے تئی کرا نشتگ من زاناں کہ درامدے نہ اِنت من سک جیڑاں اگاں اے زال تئی کرا نندوک انت گُڑا اَنو کُجا اِنت؟ اگاں تئی دزگُهار انت ترا یات کنت ؟تئی روگ ءَ پد آ چو تئی چکانی وڑ ءَ ابیتک اِنت ؟ اے کلیں سنگت کہ عکس ءِ تہ ءَ هوار اَنت مرچی یکے هم مئے دیم ءَ ساڑی نہ اِنت تو شر سرپدے بلے همے زال نزاناں کُجا اِنت ؟ اگاں هست ءُ هیات اِنت گوں هُداوندا دُوا اِنت آئی یے سر ءَ سلامت بکنت-

ماتی من وهدے کجام دیوان ءَ رواں گڑا اود ءَ تئی نام ءَ الم گِر اَنت ءُ گش انت لُمّہِ وتن گڑا منی دلے هما ٹپ لگوریں دژمن ءَ ایر کُتگ انت آ پد ءَ نوک بنت ءُ من ءَ سِکین دے اَنت کہ من اوں تئی داتگیں پنتانی سر ءَ زند بہ گوازیناں ماتی من نزاناں پہ تئی هاتر ءَ چے بہ نویساں تو هنچیں نازُرکیں مہزبےیے کہ من کمّو رد بباں گڑا من گُنهگار باں ماتی منی دُوا اِنت گوں هُدا وندا تئی ارواه آسودگ بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءِ شھر تربت ءَ سلاہ بندانی تیرگواری ءَ زدگ بیتگیں کارندہ ءَ ٹپانی درد نہ سگ اِتگ ءُ بیران بیتگ-

پولیس ءِ رد ءَ شاپورھوٹل ءِ نزیک ءَ سلاہ بندیں مردماں انٹی نارکورٹکس ءِ کارندھانی سر ءَ تیرگواری کرتگ ءُ چریشی ءَ دو کارندہ زدگ بیتگ اَنت ءُ پد ءَ یکے بیراب بیتگ-

بیران بیتگیں کارندہ ءِ پجار اشراک خان ءُ زدگ بیتگین ءِ عرفان ءِ نام ءَ زانگ بیتگ –

اُرشکاراں اُرش ءَ پد تچگ ءَ سوبمند بیتگ اَنت –

ھمے وڑ ءَ تربت ءَ دگہ یک تیرگواری وئیلے ءَ ایف سی ءِ کارندہ زدگ بیتگ –

ھالانی تہ ءَ گوشگ بیتگ تربت ءِ شھر ءَ آغا خان لیبارٹری ءِ دیم ءَ سلاہ بنداں ایف سی ءِ کارمندانی سر ءَ تیرگواری کرتگ ءُ چریشی ءَ یک کارمندے تچگ ءَ سوبمند بیتگ ءُ یکے زدگ بیتگ –

دمگی مردمانی رد ءَ زدگ بیتگیں ایف سی ءِ کارندہ سک زدگ بیتگ ءُ اُرشکار تچگ ءُ روگ ءَ سوبمند بیتگ اَنت –

دمگی مردمانی رد ءَ زدگ بیتگیں کارندہ ناگیگیں جاوراں نادراہ جاہ ءَ برگ بیتگ ءُ اود ءَ آئی ءِ جاور ناگیگ گوشگ بیگ ءَ اَنت –

زانگ بہ بیت تربت ءِ شھر ءَ ھوار کش ءُ گوری دمگاں پوج ءِ سر ءَ یکشلیں اُرش ترندی ءَ گندگ ءَ آیگ ءَ اَنت ءُ اے اُرشانی زمہ واریاں گیشتر بلوچ سلاہ بندیں گل منّگ ءَ اَنت بلے مروچی بیتگیں اُرشانی زمہ واری کس ءَ پہ وت ءَ نہ زرتگ اَنت-

یوروپئین پریمئیر لیگ ءِ فٹبال گوازی ءِ گوستگیں شپ ءَ ھشت ٹیمانی میان ءَ گوازی کنگ بوتگ کہ آھانی تہ ءَ ساؤتھ امیپتون ءُ ٹوٹنہم یک یک گولے ءَ دیمیگ بوتگ انت ءُ ویسٹ ہام ءَ وٹفورڈ ءِ دیم ءَ چار پہ یکے ءَ ، کریسٹال ءَ نارویچ ءِ دیم ءَ سَے ءُ لیسسٹر سٹی ءَ لیورپول ءِ دیم ءَ یک گولے ءَ گوازی کٹ اتگ –

پریمئیر لیگ دوشی شپ ءَ بوتگیں اولی گوازی ٹوٹنہم ءُ ساؤتھ امپتون ءِ میان ءَ کنگ بوتگ کہ ھردو ٹیم یک یک گولے ءَ دیمیگ بوتگ انت –

ساؤتھ ایمپتون ءِ نیمگ ءَ چہ لیبی جے.وارڈ ءَ اولی ھاپ ءَ وتی اولی گول اسکور کتگ وھدیکہ ٹوٹنہم ءِ لیبی ایچ کینے ءَ دومی ھاپ ءَ یک گولے داتگ- پد ءَ رند ءَ ھردو ٹیمانی میان ءَ ھچ گول اسکور کنگ نہ بوتگ ھردو ٹیم دیمیگ بوتگ انت –

دومی گوازی وٹفورڈ ءُ ویسٹ ہام ءِ میان ءَ کنگ بوتگ کہ وٹفورڈ ءِ نیمگ ءَ چہ اولی چار ملٹانی تہ ءَ یک گولے اسکور کنگ بوتگ پد ءَ داں گڈسر ءَ ھچ گول اسکور کت ئِے نہ کتگ وھدیکہ ویسٹ ہام ءِ نیمگ ءَ چہ چار گول اسکور کنگ بوتگ –

پریمئیر لیگ ءِ سیمی گوازی کریسٹال فلیس ءُ نارویچ سٹی ءِ میان ءَ بوتگ کہ کریسٹال فلیس ءَ چار گول ءَ گوازی کٹ اتگ وھدیکہ نارویچ ءِ نیمگ ءَ چہ ھچ گول اسکور کنگ نہ بوتگ –

لیسسٹر سٹی ءُ لیورپول ءِ میان ءَ بوتگیں چارمی گوازی ءَ لیسسٹر سٹی ءَ یک گولے ءَ گوازی کٹ اتگ لیور پول ءِ نیمگ ءَ چہ ھچ گول اسکور کنگ نہ بوتگ لیسسٹر سٹی لیبی اے لقمان ءَ پنجاہ نہمی ملٹ ءِ تہ ءَ گول اسکور کتگ گوازی وتی ٹیم ءِ نام ءَ کتگ –

ریکوڈک ءِ چیریں سوڑگ ءِ ھلاپ ءَ سَے شمبے ءِ روچ ءَ سرجمیں بلوچستان ءَ آمیدگسی روگ ءُ آیگ بند بیتگ اَنت، بلوچستان بار کونسل، ھائی کورٹ بار ایسوسی ایشن ءُ شال بار ایسوسی ایشن ءَ ریکوڈک ءِ بارو ءَ بلوچستان ءِ ھائی کورٹ ءَ را ھم پَٹ ءُ پول کنگ ءِ جار –

بلوچستان ءِ بارکونسل ءِ وائس چیئرمین قاسم علی ءَ جرمن ءِ ھبرشنگکار ڈی ڈبلیو ءَ گوں گپ کنان ءَ گوشتگ کہ سرکار اے وشی ءِ تام ءَ مہ بیت ریکوڈک ءِ چیریں سوڑگ سوبمند بیت کن اَنت بلوچستان ءِ مھلوک گوست ءِ رنگ ءَ انگت ءَ بے توار نہ اِنت –

قاسم علی ءَ گُشتگ کہ باندا اسمبلی ءِ اے کیمرھانی تہ ءَ تران بیتگ اشی ءِ سر ءَ کانونی چار ءُ ٹپاس کنگ بیت اِنت اگاں اژدری بیت گڑا سپریم کورٹ ءَ ھم شت کن ایں –

بلوچ راجدوستیں رھشون نوابزدہ ھاجی لشکری رئیسانی ءَ ریکوڈک ءِ بارو ءَ گشتگ ھاکم ملک ءِ دگہ مڈیانی رنگ ءَ ریکوڈک ءَ ھم چیریں رنگے ءَ کنگ ءَ اَنت –

ھاجی لشکری ءِ گوشگ اَت ریکوڈک مئے راجی مڈی اِنت ءُ مئے آؤکیں نسل ءِ مڈی ھمیش اِنت بندیں کوٹیاں ریکوڈک ءَ ھوار بلوچستان ءِ ھچ مڈیانی سر ءَ بیتگیں سوڑگ منگ نہ بنت-

نوابزدہ لشکری رئیسانی ءِ گوشگ ات کمیرہ نیاد ءَ سرکاری پندل ساز پاشک کتگ اَنت –

زانگ بہ بیت ریکوڈک ءِ بارو ءَ بیتگیں سوڑگ ءِ درگت ءَ گوستگیں روچ ءَ بلوچستان اسمبلی ءَ دَہ اداراں دراجیں ان کیمرہ سیشنے برجم دارگ بیتگ اے نیاد ءَ دراھیں جھداں پد ھم سرکار ریکوڈک ءِ سوڑگ ءِ درگت ءَ پارلیمان ءِ شک ءَ دور کنگ ءَ سوبمند نہ بیتگ –

ھمے وڑ بلوچستان سرکار ءَ یک شنگ کرتگیں درشانے ءِ تہ ءَ ٹاہ داتگ ریکوڈک ءِ درگت ءَ ان کیمرہ ءِ نیاد اسمبلی ءِ باسکارانی شَور ءَ چہ کنگ بیتگ درشان ءِ رد ءَ استان ءِ اسمبلی ءَ ان کیمرہ ءِ نیاد ءَ چل ءُ دو باسک موجود بیتگ اَنت چریشی ءَ آ ریکوڈک ءِ درگت ءَ میان استمانی ادارہ ءِ سُھل ءُ دگہ بنگپانی بارو ءَ گپ بیتگ –

بلے بلوچ راجدوستیں پاٹیاں ریکوڈک ءِ بارو ءَ بیتگیں چیریں سوڑگ ءِ رد کتگ – زانگ بہ بیت ریکوڈک ءِ ھما جاہ اِنت پاکستان ءَ سھر ءُ چاندی ءِ درستاں مستریں جاہ اِنت اے منسوبہ ءِ درگت ءَ اولی مسام نوزدہ سد ءُ نود ءُ سَے ءَ بیتگ پد ءَ ھواریں کمپنیانی کار ءُ بار ءِ سر ءَ بدلی آتک ءُ چریشی ءَ پاکستانی سپریم کورٹ ءَ لھتے سال پیسر رھبندانی لگتمالی ءِ سر ءَ ٹی سی سی یا ٹھیتیان کاپر کمپبی ءِ گون ءَ بیتگیں ریکوڈک ءِ مسام شکی گشتگ –

گوستگیں روچاں بلوچستان ءِ دمگ کیچ بلیدہ گلی ءَ کُشگ بوتگیں ورناہ سراج ء صالح محمد ءِ مات سعیدہ ءَ گوشتگ کہ منی زھگ ءِ کوش ءَ ھواریں مردم سزا دیگ بہ بنت ءُ مارا ھک دیگ بہ بیت –

زانگ بہ بیت بیست ءُ پنچ دسمبر ءِ شپ ءَ گلی کوچگ بلیدہ ءَ آئی ءِ گِس ءَ دور کتگ سراج کُشتگ اِت – سراج ء مات ءُ آئی ءِ گوھار ءَ کُشندہ پجا آؤرتگ ءُ آ نامزد کتگ گوشتگ کہ واکدار ءُ سرکار ءَ ھوار سیاسی ءُ چاگردی باسک آھاں ھک دیگ ءَ وتی کرد ءَ پیلو بہ کن انت –

سراج صالح ء مات ءُ گوھار ءِ رِد ءَ حنیف حسن ءُ جھانزیب واحد ءَ آئی ءِ زھگ کُشتگ –

آھاں چہ بلوچستان ءِ راج ءَ چہ ھم لوٹ کتگ پہ آھاں توار چست بہ کن انت –

زانگ بہ بیت سراج ءِ کوش ءَ پد حنیف نامیں مردمے ءَ کہ ھستیں وھد ءَ پاکستانی پوج ءِ کارمند ات آئی ءَ سراج کوش ءِ زمہ منّ اِتگ ءُ آئی ءَ گوشتگ کہ سراج ءَ پاکستان ءُ اسلام ءِ بگیری ءَ گپ جتگ پمے ھاتر ءَ من آ کُشتگ ءُ اگاں اے کار دگہ یکے ءَ کُت آئی ءَ ھم کُش آں –

سراج بلوچ ءِ کوش ءَ پد چاگردی ترامجاہ ٹویٹر ءَ بازیں تک ءُ پھناتاں سیادی داروکیں مردمانی دلپدردی درشان کتگ ءُ گوشتگ کہ بلوچستان ءِ ورناہ وڑ وڑ ءَ ٹارگٹ کنگ بوگ ءَ انت ءُ ترس ءِ ماھول ءِ پیدا کنگ بوگ ءَ انت –

بلوچ یکجھتی کمیٹی ءِ نیمگ ءَ شنگ بوتگیں درشان ءِ تہ ءَ گوشتگ کہ گوستگیں روچاں تربت ءِ دمگ بلیدہ ءَ ورنائیں نودربر سراج سالح ءِ کوش ایرجتگ ءُ گوشتگ کہ بلوچستان ءَ بازیں وھدے بیت کہ انسانی ھکانی لگتمالی درچ یکشل ءَ برجاہ انت –

درشان ءِ تہ ءَ گوشگ بوتگ کہ بلوچستان ءَ ھچ چُشیں جاھے نیست کہ چرے زلم ءُ زوراکیاں چہ رکیتگ ھمک روچ کسے ناں کسے ٹارگٹ کلنگ ءِ نشانگ جوڑ کنگ بیت اِنت ھمے وڑ وئیل روچ پہ روچ گیشتر بوان انت وھدیکہ زورانسری آوارجنیانی درچ ھم یکشل ءَ برجاہ انت – ریاستی ادارھاں بلوچستان یک کوش جاھے جوڑ کرتگ –

جارکش ءَ گوشتگ کہ سراج سالح بلیدہ ءَ چہ جند ءِ گِس ءَ کُشگ بوتگ وھدیکہ کُشندہ پوجی کارمندے ءُ آئی ءَ وت یک لوکل رسانکدرے ءَ کوش منّ اِتگ بلے سیکورٹی ادارھاں ناکہ سراج سالح ءِ کُشندہ دزگیر کتگ ءُ ناکہ آئی ءِ بگیری ءَ گامگیج ءِ زرتگ – ھمے وڑ یک دگہ وئیلے ءَ سیکورٹی پوج ءَ تمپ ءَ چہ شش مردم گیر کانودی ءُ بید ء رھبندی ءَ آوار جتگ اے درسیں جاورھالاں پوج ھچ امل ءِ جوابدہ نہ انت –

درشان ءِ تہ ءَ گوشگ بوتگ کہ ریاست ءِ درسیں ادارہ پوج ءِ گیرکانودی کارانی دیم ءَ بے بس انت ءُ بلوچستان ءِ مردمانی پھریزگ ءَ پہ ھچ کنگ ءَ نہ انت –

جارکش ءَ گوشتگ کہ سراج سالح ءِ کوش ءُ تمپ ءُ دگہ دمگاں مزنیں کچے ءَ مردمانی زورانسری اوارجنی ءَ بلوچستان ءِ تہ ءَ سر برگ ءُ دور دیگی جاور ءِ ودی بوتگ اَنت بلے امیدگساں ھوار درسیں ادارہ پوج ءِ دست ءَ یرگمال بوتگ انت کہ چریشی ءَ بلوچستان ءِ جاور ھال روچ پہ روچ گنتر بوان انت –