TBP Balochi

دی بلوچستان پوسٹ اھوال پتر ءَ سربیتگیں ھالانی رد ءَ بلوچستان ءِ باپاری شھر حب ءَ یک مردمے جون دزکپتگ کہ ایدھی کارمنداں نادراہ جاہ ءَ سرکُتگ۔

حب سول نادراہ جاہ ءَ آرتگیں جون ءِ پجار سندھ ءِ جھمنند رمیش لعل ء نند لعل ءِ نام ءَ بیتگ کہ سندھ ءِ شھر لاڑکانہ ءِ جھمنند بیتگ۔

پولیس ءِ رد ءَ رمیش لعل ء نند لعل گوستگیں روچ ءَ کراچی ءَ چہ حب وتی کاریے ھاتر ءَ اتکگ بیتگ کہ مروچی آئی ءِ جون دزکپتگ۔

نادراہ جاہ ءِ واکدارانی رد ءَ کُشگ بیتگیں مردم تپراں گوں جنگ ءُ کُشگ بیتگ ءُ آئی ءِ جون دور دیگ بیتگ بلے داں انگت اے درگت ءَ ھندی پولیس گیشتر پَٹ ءُ پول کنگ ءَ اِنت۔

گوستگیں روچاں کُشگ بیتگیں بلوچ ورنا سراج صالح ءِ کوشءَ ھواریں دو جرمکار گوستگیں شپ ءَ دزگیر کنگ بیتگ اَنت۔

سربیتگیں ھالانی رد ءَ ڈپٹی کمشنر کیچ ءِ گُشگ ءِ پد ءَ لیویز ءَ بلیدہ ءَ کُشگ بیتگیں سراج صالح ءِ کوش ءَ ھواریں دو جرمکار جھانزیب ءُ شاہ میر دزگیر کنگ بیتگ اَنت۔

گیشیں ھالانی رد ءَ گوستگیں روچاں بلیدہ ءَ کُشگ بیتگیں ورنا سراج صالح ءِ کوشکار جھانزیب ء عبدالواحد جھمنند سلو ءُ شاہ میر ء کریم بخش جھمنند میناز لیویز فورس بلیدہ تھانہ ءُ کیو آر ایف ءَ ھواریں گامگیجاں پد دزگیر کُتگ اَنت۔

ڈپٹی کمشنر کیچ حسین جان بلوچ ءَ اھوالکاراں گوں گپ کنان ءَ گُشتگ کہ اے وئیل ءَ ھواریں سیمی مردمے دزگیر کنگ ءِ ھاترءَ لیویز فورس ءُ کیو آر ایف ءَ ترندی ءَ گوں پرمان داتگ اَنت ءُ الم سیمی جرمکار ھم زیت دزگیر کنگ بیت ءُ سانمندیں کھول ءَ انساپ دیگ بیت اِنت-

زانگ بہ بیت سراج ء سالہ مھمد بیست ءُ پنچ دسمبر ءَ بلیدہ ءِ دمگ گلی ءَ جند ءِ لوگ ءَ تیر جنگ ءُ کُشگ بیتگ ءُ پد آئی ءِ کوشکاراں چاگردی رسانکجاھاں سراج ءِ کوش منّ اِتگ ءُ گُشتگ سراج ءَ پاکستان ءُ اسلام ءِ ھلاپ ءَ گپ جتگ ءُ چریشی ءَ ما سراج کُشتگ –

سراج ءِ کوش ءِ پژدر ءَ سول سوسائٹی کیچ ءَ انتزامیہ ءَ چل ءُ ھشت ادارانی مھلت داتگ کہ اگاں کوشکار دزگیر نہ بیت اَنت گڑا زھرشانیانی درچ بندات کنگ بنت –

ھمے وڑ ءَ بلوچ یکجھتی کمیٹی ءَ ھم وتی درشانی ءَ گُشتگ اَت سراج بلوچ ءِ کوش بلوچستان ءَ ورنایانی یکشلیں کوشانی درچ اَنت –

دومی نیمگ ءَ چاگردی رسانکجاھاں سراج ءِ کوشکارانی دزگیری ءُ کھول ءِ انساپ ءِ واستا کمپئن برجم دارگ بیتگ اَنت –

بلوچستان ءِ دمگ بولان ءَ لشکر کشی ءِ وھد ءَ پوج ءِ دست ءَ آوار جنگ بیتگیں کسان سالیں میرنی انگت ءَ یل نہ بیتگ،پت ءُ مات کسان سالیں میرنی ءِ واتری ءِ ودار ءَ اَنت-

دی بلوچستان پوسٹ پتر ھال ءَ سر بیتگیں اھوالانی رد ءَ 17 اکتوبر 2021 ءَ بولان ءُ ھرنائی ءَ ھواریں دمگاں مزنیں پوجی لشکر کشی ءِ وھد ءَ پاکستانی پوج ءَ کسان سالی میرنی ھما وھد ءَ دزگیر کرتگ ءُ برتگ آ وتی پساں چارینگ ءَ بیتگ –

کھول ءِ رد ءَ ما شوانگی کنگ ءَ ایں، بیگواھیں میرنی بریلی ءِ ھند ءَ پساں چارینگ ءَ بیتگ پوجی کارمنداں آوار جتگ ءُ برتگ ءُ چریشی ءَ پد آئی ءِ درگت ءَ ھچ ھال نیست اِنت –

زانگ بہ نیت ھمے سال ءِ ستمبر ءَ بولان ءُ ھرنائی ءِ بازیں جاھاں پاکستانی پوج ءَ مزنیں کچے ءَ لشکر کشیانی بندات کرتگ ات یک ھپتگے ءَ داں برجاہ اِت اَنت داں اکتوبر ءِ ماہ ءَ وھد وھد ءِ سر ءَ اے لشکر کشیانی درچ برجاہ اَت –

دمگی مردماں ٹی بی پی ءَ گوں گوشتگ کہ نیلی ءِ ھند بریلی، چیٹانی، بوریال ءُ کش ءُ گوری دمگاں لشکر کشی ءِ وھد ءَ کسان سالیں میرنی ءَ ھوار بیست ءُ ھشت مردم زورانسری آوار جنگ بیتگ اَنت پد ءَ آ دگہ لھتے مردم یل بیتگ اَنت داں انگت ءَ دَہ مردم آیانی تہ ءُ جعفر، بیڑا، یارو، چاکر، کریمہ ء رازم، ھزار خان، نھال خان، پتیال ءُ گل بیگ ھوار اَنت –

واکداراں اے درگت ءَ ھچ گپ پیش نہ کرتگ –

بلوچستان ءِ دمگ پنجگور ءَ گوستگیں شپ ءَ پاکستانی پوج ءَ یک لوگے ءِ سر ءَ بیڑ برتگ ءُ اود ءَ یک مردمے دزگیر کنگ ءَ پد گوں وت برتگ –

ورنا پنجگور ءِ دمگ گرمکان ءَ آوار جنگ بیتگ آئی ءِ پجار شاکر ء عبدالصمد ءِ نام ءَ زانگ بیتگ –

دمگی مردمانی رد ءَ پوج ءَ بیڑ ءِ وھد ءَ لوگ ءَ جاڑیگیں زھگ ءُ زالبول ترسینتگ اَنت-

اے درگت ءَ انتزامیہ ءِ لیکہ دیم ءَ نیتکگ اَنت –

یورپئین پریمئیر لیگ فٹبال گوازی برجاہ انت دوشی شپ ءَ برینٹفورڈ ءُ مانچسٹر سٹی، چیلسیا ءُ برائیٹون ءِ میان ءَ گوزی کنگ بوتگ اَنت –

دوشی شپ ءَ بوتگیں اولی گوازی چیلسیا ءُ برائیٹون ءِ میان ءَ کنگ بوتگ کہ ھردو ٹیم یک یک گولے ءَ دیمیگ بوتگ انت – چیلسیا ءِ نیمگ ءَ چہ لیبی آر.لُکاکو ءَ بیست ھشتمی ملٹ ءِ تہ ءَ یک گولے اسکور کتگ ءُ پد ءَ برائیٹون ءِ دیم جوانی ءَ داشتگ بلے دومی ھاپ ءِ گڈسر ءَ برائیٹون ءِ لیبی ڈی.ول بیک ءَ نودمی ملٹ ءِ تہ ءَ چہ وتی ٹیم ءِ نیمگ ءَ یک گولے اسکور کُتگ ھردو ٹیم یک یک گولے ءَ دیمیگ بوتگ انت –

دومی گوازی مانچسٹر سٹی ءُ برینٹفورڈ ءِ میان ءَ بوتگ کہ مانچسٹر سٹی ءَ یک گولے ءَ گوازی کٹ اتگ ءُ برینٹفورڈ ءِ نیمگ ءَ چہ ھچ گول اسکور کنگ نہ بوتگ –

مانچسٹر ءِ نیمگ ءَ چہ یکیں گول لیبی پی فوڈن ءَ شانزدھمی ملٹ ءِ تہ ءَ اسکور کتگ گوازی وتی ٹیم ءِ نام ءَ کتگ –

بلوچستان ءِ دمگ کیچ تربت ءَ گوستگیں روچ ءَ آل پارٹیز کیچ ءِ کنوینر خان مھمد جان ءَ یک پریس کانفرنسے ءَ گُشتگ کہ بلیدہ ءَ شپ تھار ءَ لوگ ءِ تہ ءَ مانریچگ ءُ کھول ءِ دیم ءَ کُشگ بیتگیں سراج سالہ ءِ کوش ءَ ھواریں نشانگ کنگ بیتگیں کوشکاراں انتزامیہ ءَ زوت دزگیر بہ کنت اگاں گڑا زھرشانیانی درچ بندات بنت ءُ اشی ءِ آسر ترند بنت-

اے گپانی درشانی آئی ءَ چار شمبے ءِ روچ ءَ پاکستان نیشنل پاٹی عوامی ءِ کارگس ءَ یک پریس کانفرنسے ءِ وھد ءَ جتگ اَنت – پریس کانفرنس ءِ وھد ءَ آل پارٹیز کیچ ءِ ڈپٹی کنوینر عبدالغفور کٹور، پاکستان پیپلز پاٹی ءِ اُستانی رھشون نواب شمبے زئی، بی این پی عوامی ءِ بنجاھی پتر ءِ باسک میر خلیل تگرانی، کامریڈ ظریف زدگ، اھد الاھی، نیشنل پاٹی ءِ رھشون فضل کریم، بی این پی ءِ رھشون شَے رضا بلوچ، محسن بلوچ، سراج بلوچ، بنجاھی جمعیت اھل حدیث ءِ رھشون یلان زامرانی، بی این پی عوامی ءِ سراج بیبگر، نزیر اھمد کٹور، تربت سول سوسائٹی ءِ کنوینر گلزار دوست، جمیل عمر ءُ دگہ مردم جاڑیگ بیتگ اَنت –

کنوینر خان مھمد جان ءَ گُشتگ کہ آپ پارٹیز کیچ مروچی یک گچینی ءِ نیاد ءَ بیست ءُ پنچ دسمبر ءِ شپ ءَ بلیدہ ءِ دمگ گلی کوچہ ءَ کُشگ بیتگیں ورنا سراج سالہ ءِ کوش ءَ ایر جنت ءُ اشی ءِ ھلاپ ءَ ترندیں زھرشانی ءِ جار پرین ایت-

آئی ءَ گُشتگ کہ اشی ءِ درچ ءَ آل پارٹیز ءِ رھشون کمشنر مکران ڈویژن،ڈی سی کیچ، ڈی پی او کیچ ءُ دگہ زمہ واریں واکداراں گوں دُچار کپ ایت ءُ آیاں گوں دزبندی کنت آ امن ءُ ایمنی ءِ ھاتر ءَ وتی زمہ واریاں پیلو بہ کن اَنت ءُ مھلوک ءِ جان ءُ ساہ ءِ پھریز ءَ بہ کن اَنت –

آئی ءَ گُشتگ کہ ما انتزامیہ ءَ گوشگ لوٹ ایں آ سیکورٹی اداراں لگام بہ کنت ھرکجا وئیلے بیت آ بے گناھیں مردماں تنگ کنگ ءَ اَنت وئیل ءِ پژدر ءَ لس شھری ءُ راھگوزانی لٹ ءُ کُٹ کنگ ءُ چوپگ ءِ اجازت دیگ نہ بیت –

آیاں گُشتگ کہ شپ تھار کوشکاراں لوگ ءَ دور کرتگ ءُ ورنائیں سراج کھول ءِ دیم ءخ تیرانی نشانگ کتگ ءُ کشتگ ءُ کوشکار زانگ ھم بیتگ اَنت بلے انگت ءَ انتزامیہ ءِ دزگیری ءَ نیتکگ اَنت اے زُلمانی ھلاپ ءَ آل پارٹیز کیچ توار چست کنت ءُ بی بی ملک ناز ءِ کوش ءَ بہ گر داں ھوشاپ ءِ وئیل ءَ آل پارٹیز کیچ ءَ توار چست کرتگ ءُ اے دمگ سرجم ءَ سیکورٹی بیگ ءَ ابید سلاہ بند آیگ ءُ لس مردماں کُشگ ءُ روگ ءَ اَنت اے گپ جیڑین اَنت –

بلوچستان ءِ دمگ کیچ ءِ بُنجاھی شھر تربت ءَ ناشناسیں مردماں پاکستانی پوجی چوکی ءِ سر ءَ دست بمبے ءَ گوں نشانگ کتگ-

ناشناسں مردماں اے اُرش ائیرپورٹ دگ ءَ ھستیں پاکستانی پوج ءِ چوکی ءِ سر ءَ کتگ ءُ وھدیکہ اُرشکار تتکگ اَنت-

اھوالکارانی رِد ءَ اُرش ءَ پوج ءَ تاوانانی دیمپان کنگ کپتگ ءُ پوج ءِ نیمگ ءَ انگت ءَ اے درگت ءَ چُشیں درشان دیم ءَ نیتکگ اَنت-

زانگ بہ بیت مروچی تربت ءَ شاپور ھوٹل نزیک ءَ ناشناسیں سلاہ بندیں مردماں اُرش کتگ اَت ءُ دو کارندہ ٹپی بوتگ اَت آ پہ الاج ءِ ھاتر ءَ نادُراھجاہ ءَ برگ بوتگ اِت اَنت-

نادُراھجاہ ءَ سر بوگ ءَ یک کارندھے مرتگ ءُ وھدیکہ دومی ٹپی بوتگ ءُ پد ءَ آئی ءَ ٹپانی درد نہ سگ اِتگ ءُ مرتگ-

مرتگیں کارندھانی سیادی اینٹی نارکوٹکس ءَ چہ بوتگ دوئینانی پجّار عرفان جھمنند صوابی ءُ اشراک جھمنند سیالکوٹ نام ءَ چہ بوتگ اَنت-

اشانی سر ءَ بوتگیں اُرش ءِ زمہ واری بلوچ آجوئی لوٹوکیں گل بی ایل ایف منّ اِتگ اَت ءُ دست بمب اُرش ءِ زمہ واری انگت ھچ گل ءَ وتی نہ کتگ-

تربت ءُ تمپ ءَ پاکستانی پوج ءِ سر ءَ اُرش کُتگ ءُ یک کارمند ءِ کُشتگ –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ تمپ ءُ تربت ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ گوشتگ کہ مئے سرمچاراں مروچی ادار دوازدہ ءَ تربت ءِ شھر ءَ آغا خان لیباٹری ءِ نزیک ءَ پاکستانی پوج ءِ کارمندانی سر ءَ تیرگواری کُتگ چریشی ءَ یک کارمند ءِ زدگ بوتگ –

جارکش میجر گوھرام بلوچ ءَ دیمتر ءَ وتی درشان ءِ تہ ءَ گوشتگ کہ گوستگیں روچ ءَ بیست ءُ ھشت نومبر ءَ ھم مئے سرمچاراں تمپ ءِ دمگ دازن ءَ زیارت کلگ ءَ شاگار کوہ ءِ سر ءَ پاکستانی پوج ءِ سر ءَدعر جنگ ءُ وتکاریں سلاھاں گوں اُرش چریشی ءَ یک پوجی کارمند مرتگ ءُ دو زدگ بوتگ –

جارکش ءَ گڈسر ءَ وتی درشان ءِ تہ ءَ گوشتگ بلوچستان ءِ آجوئی تاں مئے اُرش برجاہ مان انت –

سر بیتگیں ھالانی رد ءَ روکپتی بلوچستان ءِ بنجاھی شھر دزاپ ءَ جامعہ مسیت مکی ءَ دو ٹکانی دیرگیں جنگ ءُ چوپ ءَ بیتگیں اڑ گیشنگ بیتگ ءُ ھردوکیں ٹک وت ماں وت وشان بیتگ اَنت –

روکپتی بلوچستان ءَ سنی آن لائن تندجاہ ءِ رد ءَ لھتے سالاں پیش زنگی زئی ءُ شاکرم زئی ٹک ءِ میان ءَ بیتگیں دلرنجی مولان عبدالحمید ءِ سروکی ءَ سِلاہ بیتگ اَنت-

سنی آن لائن ءِ رد ءَ اے ھردوکیں ٹک بازیں سالاں وت ماں وت جنگ ءُ چوپ ءَ بیتگ اَنت کہ گوستگیں روچ ءَ دزاپ ءِ مزنیں مسیت ءِ امام مولانا عبدالحمید ءِ سروکی ءَ ھردوکیں ٹکانی سلاہ بیتگ –

آئی ءَ گُشتگ کہ وت ما وتی جیڑہ ھما نادراھی اِنت چریشی ءِ سبب ءَ راج بازیں کساسے ءَ تاوانبار بنت ءُ باید وت ما وتی ٹکی جیڑھاں سرگوز بہ کن اَنت ءُ ٹک وت ما وت دل ماں دل بہ بنت-

آئی ءَ گشتگ کہ ھما سلاہ آمیدگساں بیت آئی ءِ پژدر ءَ گڑا ھدا وتی رھمتاں ایر کار ایت ءُ جھد ھمے بہ بیت سلاہ ءَ چہ مستریں چیز نیست اِنت –