TBP Balochi

دی بلوچستان پوسٹ اھوال پترءَ سر بیتگیں ھالانی ردءَ چار ماہ پیسر سندھ ءَ چہ زورانسری بیگواھی ءِ آماچ بیتگیں سندھی راجدوستیں جھدکار مروچی یل بیتگ ءُ وتی لوگ ءَ سر بیتگ۔

وائس فار مسنگ پرسنز آف سندھ ءَ وتی شنگ کُتگیں درشان ءِ تہءَ گُشتگ کہ ھمے سال ءَ اگست ءِ ماہ ءَ کراچی ءَ چہ پاکستانی چیریں ترامگیجانی دست ءَ زورانسری بیگواھی ءِ آماچ بیتگیں راجدوستیں باسک ذاکر سھتو مروچی یل بیتگ ءُ وتی لوگ ءَ سر بیتگ۔

یات بہ بیت کہ گوستگیں چار ماھاں چہ سندھی راجدوستیں جھدکار ذاکر سھتو ءِ یل کنائنگ ءِ ھاترءَ نوابشاہ ءَ ھوار سندھ ءِ دگہ شھراں زھرشانی کنگ بیتگ اَنت وھدیکہ چار روچ پیسر ھم کراچی ءَ چہ دگہ یک بیگواھیں جھدکاریں آکاش سرگانی ھم یل کنگ بیتگ۔

وائس فار مسنگ پرسنز آف سندھءَ بیگواھیں راجدوستیں جھدکارانی یل کنگ ءِ کرد ءَ جوانیں گامگیجیں نامینتگ ءُ اوست داشتگ کہ دگہ بیگواھیں مردم ھم یل کنگ بنت۔

بلوچستان ءِ دمگ پنجگور ءَ چہ بیگواہ بیتگیں دو مردم پاکستانی پوج ءَ پولیس ءِ دست ءَ داتگ اَنت۔

دوھیں مردمانی پجار بھزاد ءُ مسعود ءِ ناماں زانگ بیتگ۔ چہ ایشاں بھزاد دلاوری 30 نومبر ءُ وھدیکہ مسعود 1 نومبر ءَ دزگیر کنگ بیتگ اَت۔

بیگواہ بیتگیں دوھیں مردم گوستگیں روچ ءَ پنجگور پولیس ءِ دست ءَ دیگ بیتگ اَنت بلے داں انگت اے زانگ نہ بیتگ کہ اشانی کجام کیس جنگ بیتگ اَنت۔

بھزاد دلاوری ءَ برات بھروز دلاوری ءَ پولیس ءِ دست ءَ دیگ بیگ ءِ ھال راست کنان ءَ چاگردی رسانکدر ءِ تندجاہ ٹویٹر ءَ گُشتگ کہ یک ماہ ءُ نیم پیسر بیگواھ بیتگیں منی برات ءُ ناکو زتک پنجگور پولیس ءِ دست ءَ دیگ بیتگ اَنت۔

اوگان طالبان ءَ سیمسراں پاکستانی واکدارانی نیمگ ءَ جوڑ بوکیں ٹٹ ءِ ھلاپ ءَ جنزگ بندات کرتگ –

ننگرھار ءَ پد طالبان پورس ءَ اوگانستان ءَ بلوچ پھناتانی اُستان نیمروز ءِ سیمسراں ٹٹ ءِ برجمیں کار داشتگ ءُ دراھیں ساز ءُ سامان برتگ اَنت –

چہ کابل ءَ دی بلوچستان پوسٹ ءِ اھوالکار ءِ رد ءَ سیمسراں طالبان ءَ نیمروز ءِ ھند چاربرجک ءَ ڈک ءِ دمگ ءَ پاکستانی پوج ءِ نیمگ ءَ برجمیں ٹٹ ءِ کار داشتگ ءُ دراھیں مڈی گون وت برتگ اَنت-

زانگ بہ بیت ھمے ھپتگ ءِ اے دومی بر اِنت طالبان پورس ءِ نیمگ ءَ سیمسراں کار دارگ بیگ ءَ اِنت چریشی ءَ پیسر طالبان پورس ءَ اوگانستان ءِ اُستان ننگر ھار ءِ سیمسراں ٹٹ دور کرتگ ءُ چریشی ءَ پد ننگرھار ءَ جنگی جاورے ودی بیتگ بلے اے جاور پہ گپ ءُ تران ءَ گیشنگ بیتگ –

گمان ھمے کنگ بیگ ءَ اِنت آؤکیں روچاں طالبان ءِ واکدار سیمسرانی سر ءَ ترندیں گامگیج زور ایت –

سیمسرانی درگت ءَ اوگان پرکار اِنت آ اشی ءَ میان اُستمانی سیمسر ءَ ابید یک لکیرے سرپد بیت اِنت ھردوکیں نیمگاں اے زمین ءِ درگت ءَ وتی بنگپاں ایر کنت ءُ آ اوگان ءِ سرزمین سرپد بیت اِنت-

سیمسر چی یے؟: سیمسر اوگان ءُ بلوچ ءِ یک کش اتگیں لکیرے سرپد بیت اِنت کہ اوگانستان ءَ اے سیمسر میان اُستمانی سیمسر نہ منّ اِتگ – 1893 ءَ اوگان امیر عبدالرھمان ءُ برطانوی ھند ءِ سیکرٹری سرمارٹیمر ڈیورنڈ ءَ سیمسر ءِ گشینتگ ءُ اشی ءِ وھد بس سد سال بیتگ –

پاکستان ءُ اوگانستان ءِ میان ءَ 2600 کلومیٹر ءِ دراجیں سیمسر چُشکہ یازدہ سد کلومیٹر ءَ گیش سیمسر بلوچستان ءِ گون ءَ ھوار بیت اِنت – پاکستانی واکدار سیمسر ءَ ٹٹ جنگ ءَ اِنت-

اشی ءَ پیسر سیمسر ءِ سر ءَ ٹٹ جنگ ءِ درگت ءَ پاکستانی ٹیم ءَ اوگانستان ءِ گوستگیں سرکار ءِ وھد ءَ سیمسراں پوج ءَ اُرش کرتگ اَت-

اوگانستان ءِ طالبان ءِ بنگپ: گوست ءَ ھم اوگانستان ءَ وھدیکہ طالبان ءِ واک بیتگ پاکستانی واکداراں ملا عمر ءِ گون ءَ سیمسر ءِ جیڑ ءِ گیش ءُ گیواری ءِ جھد بیتگ ءُ چہ ملا عمر ءَ اے میان اُستمانی سیمسرئِے ءِ منگ ءِ جھد بیتگ بلے طالبان ءِ واکداراں ھم اے گپ رد کرتگ –

بلوچستان ءِ ضلع کیچ ءُ لورلائی ءَ دگ ءِ وئیل ءَ دو مردم بیران ءُ دو ٹپی بوتگ اَنت-

سربوتگیں ھالانی رِد ءَ ضلع کیچ ءِ شھر تربت ءَ بالی پٹ دگ ءَ کرولا گاڑی یے تیز روگ ءَ چہ وئیل آماچ بوتگ چپ بوتگ –

چریشی ءِ آسر ءَ فرید ء سید بیران ءُ میراج ءُ بھرام ٹپی بوتگ اَنت-

پہ الاج ھاتر ءَ نادُراھجاہ ءَ برگ بوتگ اَنت-

ھمے وڑ لورلائی ءَ ڈیرہ غازی خان گاڑی یے ءُ پرپٹے ءِ ڈک ورگ ءَ چہ پرپٹ ءَ سوار پولیس کارندہ ابدالباقی ء ناصر بیران بوتگ-

پولیس ءَ لاش دستیگ کتگ ءُ نادُراھجاہ ءَ برتگ-

تربت ءَ زورگیریں پوج ءِ پانگس ءِ سر ءَ دستی بمب اُرشے کتگ دو کارمند زدگ کتگ اَنت – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوستگیں شپ ءَ تربت پوجی پانگِس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ مئے سرمچاراں بالی پٹ ءِ دگ ءِ سر ءَ برجاھیں زورگیریں پاکستانی پوج ءِ پانگس ءِ سر ءَ دستی بمب اُرشے کتگ – اُرش ءَ پانگس ءَ تاوان رس اتگ ءُ دو پوجی کارمند زدگ بوتگ اَنت –

جارکش ءَ وتی درشان ءِ گڈسر ءَ گوشتگ کہ منزل ءَ سربوھگ ءُ سوبین ءَ تاں بی ایل اے اُرش ھمے داب ءَ برجاہ مان انت –

سربوتگیں ھالانی رِد ءَ بلوچستان ءِ بنجاھی شھر شال ءَ سائنس کالج دگ ءِ سر ءَ سلیم کمپلیکس ءِ نزیک ءَ بوتگیں بمب تراکے ءَ دوازدہ مردم زدگ بوتگ اَنت ءُ سَے مردم بیران بوتگ اَنت –

پولیس ءِ رِد ءَ تراک گاڑی ءِ نزیک ءَ بوتگ بلے تنی وھدی پولیس ءَ اے گپ زاھر نکوتگ کہ تراک کئی سر ءَ کنگ بوتگ –

پولیس ءِ رِد ءَ زدگ بوتگیں مردم سول ھسپتال ءَ برگ بوتگ انت ءُ اے درگت ءَ پٹ ءُ پول بوگ انت ھسپتال بنشون ءِ رِد ءَ سَے مردم بیران بوتگ انت –

دمگی اھوالکار ءِ رِد ءَ مزنیں تراکے بوتگ ءُ اشی ءِ توار دور دور ءَ مردماں اشکتگ ءُ گاڑی ءُ بلڈنگانی شیشگ پُرشتگ انت –

بلوچستان ءِ وزیر اعلی عبدالقدوس بزنجو ءَ شال تراک ایرجتگ ءُ آئی جی پولیس ءَ چہ رپورٹ لوٹ کتگ ءُ صوبائی مشیر داخلی شھر ءِ سیکورٹی پلان مھکم کنگ ءِ کڈنی ھم داتگ –

بلوچستان ءِ دمگ کیچ ءَ پاکستانی پوج ءِ چوکی ءِ سر ءَ ناشناسیں سلاہ بندیں مردماں اُرش کتگ-

سربوتگیں ھالانی رِد ءَ کیچ ءِ دمگ تھسیل دشت ءِ ھند پنس کور ءَ پاکستانی پوج ءِ چوکی ءِ سر ءَ ناشناسیں سلاہ بندیں مردماں مزن ءُ وتکاریں سلاھاں گوں نشانگ کتگ –

سر بیتگیں اھوالانی رد ءَ اُرش ءِ آسر ءَ پاکستانی پوج ءَ تاوانانی دیمپان کنگ کپتگ بلے پوج ءِ بنشون نیمگ ءَ اے اُرش ءِ درگت ءَ گپ دیم ءَ نیتکگ اَنت-

زانگ بہ بیت ھپتگے ءِ تہ ءَ کیچ ءِ شھر ءُ کش ءُ گور ءِ دمگاں پاکستانی پوج ءِ سر ءَ اُرشانی تہ ءَ گیشی اَتکگ گوستگیں روچ ءَ کیچ ءِ شھر تربت آغا خان لیبارٹری نزیک ءَ سلاہ بنداں پاکستان پوج سر ءَ اُرش کتگ اَت دو کارندہ بیران بیتگ اِت اَنت اے اُرش ءِ زمہ واری بی ایل ایف ءَ منّ اِتگ اَت ءُ دگہ دست بمب اُرشے کیچ بالی پٹ دگ ءَ پاکستانی پوج سر ءَ بوتگ اَت آئی ءِ زمہ واری انگت ھچ گل ءَ نہ زرتگ-

دشت ءَ بوتگیں اُرش ءِ زمہ واری انگت ھچ گل ءَ نہ زرتگ-

شمالی وزیرستان ءَ سلاہ بندیں مردمانی اُرش ءَ چار پوجی کارمند بیران بیتگ اَنت-

وئیل وزیرستان ءِ دمگ میر علی ءَ پیش اتکگ اود ءَ لشکر کشی ءِ وھد ءَ سلاہ بند ءُ پاکستانی پوج ءِ میان ءَ ترندیں جنگ ءُ چوپ ءَ چار کارندہ بیران بیتگ اَنت –

دمگی مردمانی رد ءَ گوستگیں شپ ءَ تحریک طالبان پاکستان ءِ ھلاپ ءَ بیتگیں اے بیڑ ءَ جنگ ءُ چوپ ءَ چار کارندہ بیران بیتگ اَنت چریشانی تہ ءَ یکے ءِ پجار ذخااللہ ءِ نام ءَ زانگ بیتگ ءُ لکی مروت ءِ جھمنند اِنت –

دومی نیمگ ءَ ٹی ٹی پی ءِ جارکش مھمد ھراسانی ءَ وئیل ءِ زمہ واری منّ اِتگ ءُ گُشتگ اے پسھی اُرش ءَ ھپت پوجی کارمند مرتگ ءُ بازینے زدگ بیتگ اَنت-

زانگ بہ بیت ھمے ماہ ءَ ٹی ٹی پی ءِ اُرشانی تہ ءَ گیشی گندگ آیگ ءَ اَنت ءُ بس شمالی وزیرستان ءَ دَہ ءَ گیش اُرش بیتگ اَنت-

سلاہ بنداں ایرانشھر ءَ تیرگواری کرتگ ءُ یک زالبولے کشتگ، کوشکار دزگیر کنگ بیتگ اَنت –

سر بیتگیں ھالانی رد ءَ روکپتی بلوچستان ءِ دمگ ایرانشھر ءَ سلاہ بندیں مردماں تیرگواری کرتگ ءُ یک زالبولے کشتگ –

ھالانی تہ ءَ گوشگ بیتگ کہ سلاہ بند سَے کس بیتگ اَنت ءُ سیستان و بلوچستان ءِ انتزامیہ ءَ ھر سئیں جرمکارانی دزگیری ءِ ٹاہ داتگ –

سر بیتگیں اھوالانی تہ ءَ گوشگ بیتگ زالبول مراد ءِ جنک اِنت ءُ تاروانی بخش ایرانشھر ءِ نندوک اِنت –

ھالانی تہ ءَ گیش گوشگ بیتگ ھرسئیں مردمانی تہ ءَ یکے ھمے مردمانی تہ ءَ جنین ءِ لوگ واجہ بیتگ –

دمگدار اھمد طاھری ءَ گوشتگ کہ ھرسئیں جرمکار گپت اَنت ءُ اشانی تہ ءَ ھمے جنین ءِ لوگ واجہ اِنت ءُ آئی ءِ گوشگ اِنت لوگی جیڑھانی سر ءَ مرد ءَ وتی زال کشتگ –

اھمد طاھری ءِ گوشگ اِنت کہ جرمکارانی گور ءَ یک پستولے دزکپتگ ءُ ھرسئیں گرگ ءُ بند کنگ بیتگ اَنت –