TBP Balochi

گوستگیں سال ءِ دہ اپریل ءَ چہ کراچی ءَ زورانسری آوار جنگ ءُ بیگواہ بوتگیں عبدالحمید زھری ءِ کھول ءَ مروچی شمبے ءِ روچ ءَ کراچی پریس کلب ءِ دیم ءَ زھرشانی کُتگ –

نوکیں سال ءِ اولی روچ ءَ بیگواھیں عبدالحمید زھری ءِ زھگ، زالبول ءُ دگہ بیگواھیں مردمانی کھولاں وتی دوستیگیں مردمانی اکس زُرتگ ءُ کراچی پریس کلب ءِ دیم ءَ وتی دوستیگیں مردمانی یل کنگ ءِ لوٹ کُتگ –

بلوچستان ءَ زورانسری آوار جنگ بوتگیں مردمانی پانکجنیں گل وائس فار بلوچ مسنگ پرسنز ءِ کمک سرکماش ماما قدیر بلوچ ءُ دگہ سیاسی ءُ چاگردی باسکاں زھرشانی ءَ بھر زُرتگ –

اے درگت ءَ چہ کراچی ءَ زورانسری آوار جنگ ءُ بیگواہ بوتگیں ھزدار ءِ دمگ زھری ءِ جھمنند عبدالحمید زھری ءِ زھگ ءِ گوشگ ات کہ گوستگیں سال ءِ دہ اپریل ءَ دمگی پولیس ءُ لس مردمی پوشاکیں کارمنداں شپ ءِ نیم ءَ کراچی ءَ آھانی گِس ءِ سر ءَ بیڑ بُرتگ گِس ءِ تہ ءَ ساڑی ئیں عبدالحمید زھری ء شکر خان آوار جتگ ءُ گوں وت برتگ –

آئی ءِ گوشگ ات کہ پد ءَ رند ءَ ما دمگی پولیس ءُ دگہ ادارھانی بید ارزی ءَ گِس ءِ سر ءَ بیڑ برگ ءُ عبدالحمید زھری آوار جنی درگت ءَ دمگی پولیس گور ءَ شُتگیں بلے دمگی پولیس ءَ اے وئیل رد کُتگ –

آئی ءِ گوشگ ات کہ مروچی مئے سر پہ زھرشانی کنگ ءَ کپتگ تانکہ ما وتی توار ءَ اے ادارھاں سر بہ کنیں کہ بیگواھیں عبدالحمید زھری زاھر کنگ بہ بیت ءُ آئی ءَ ھک دیگ بہ بیت –

آئی ءِ گوشگ ات کہ ما ھنچیں بدکسمتیں مردمیں مھلوک نوکیں سال ءِ وشیانی دارگ ءِ بدل ءَ زھرشانی ءُ ھک لوٹگ انت –

آئی ءِ گوشگ ات کہ منی پت شکری ءِ نادراھی ءِ آماچ اِنت درمانانی سر ءَ انت آئی ءِ جاندراھی ءِ ھاتر ءَ مارا ترس ءِ دل ءَ انت –

آئی ءِ گوشگ ات کہ منی پت یل کنگ بہ بیت اگاں ریاستی ادارھانی نز ءَ آ کتکار انت گڑا آمیدگس ءَ آرگ بہ بیت –

ھمے درگت ءَ ماما قدیر بلوچ ءِ گوشگ ات کہ ھلاس نبوکیں اے سال بلوچستان ءِ ھاتر ءَ زورانسری آوار جنی، جون، پُرسی سال ءِ بوتگ ءُ نوکیں سال ءِ بندات ءَ ھم ریاست ءِ امل بندات کنگ بوتگ انت –

آئی ءِ گوشگ ات کہ میان استمانی انسانی ھکانی ادارھاں بلوچستان ءِ انسانانی ھلاسی ءِ گر ءُ دار ءِ ھاتر ءَ توار چست کنگ ءِ لوٹ ءَ کنیں کہ وتی زمہ واری ءَ جوانی ءَ پیلو بہ کن انت –

بلوچستان ءِ دمگ کیچ ءِ ھند تجابان ءَ زالبولاں زھرشانی کنان ءَ سی پیک دگ بند کرتگ، زھرشانی برجاہ، ھمے وڑ چہ تربت ءَ کمشنر گپ ءُ تران ءَ رھادگ بیتگ –

زھرشانی کنوکانی گوشگ اِنت ھما وھد ءَ داں مئے لوٹ منّگ نہ بنت زھرشانی ھمے وڑ ءَ برجاہ بیت اِنت ءُ سی پیک دگ ھردوکیں نیمگاں رپت ءُ آمد ءَ بند کنگ بیتگ –

زھرشانی کنوکانی گوشگ اِنت مئے مردم پوج ءَ دزگیر کرتگ ءُ انگت ءَ گار اِنت –

ورنا کدی بیگواہ کنگ بیتگ: بیست ءُ نُھ دسمبر ءَ ناگتی پوج ءِ نیمگ ءَ چادر ءُ چار دیواری پامال کنان ءَ ھیرونک ءِ دمگ ءَ بیڑ برتگ ءُ یک مردمے دزگیر کنگ ءَ پد بیگواہ کرتگ آئی ءِ پجار دولت ء ھسن ءِ نام ءَ زانگ بیتگ –

آ شپ ءُ سنگ آباد ءَ چی بیتگ: ھما شپ ءَ پوج ءَ سنگ آباد ءَ بیڑ برتگ ءُ زھگ ءُ زالبول لوگاں کش اِتگ ءُ ڈن ءَ سارتی ءِ سر ءَ اوشتارینتگ اَنت ءُ لوگانی مڈی دز اِتگ ءُ برتگ اَنت ءُ لوگانی دریگ پروشتگ اَنت –

یک ماھے ءِ وھد ءَ کیچ ءِ دمگ ءَ اے دومی وئیل اِنت اے رنگین:

گوستگیں ماہ ءِ بیست ءُ ھپت دسمبر ءَ پاکستانی پوج ءِ زوراکیانی ھلاپ ءَ کلاھو ءُ سرنکن ءَ مھلوک ءَ ترندیں زھرشانی کرتگ ءُ ایف سی ءِ بنجل ءِ دیم ءَ زھرشانی نندانک جتگ –

تمپ ءُ کلاھو ءُ سرنکن ءِ مھلوک بازیں کچے ءَ زھرشانی کنان ءَ ایف سی ءِ بنجل ءِ دیم ءَ نشتگ اَنت –

زھرشانی کنوکانی گوشگ اَت کہ پوج ءِ کارمند مئے لوگاں دور کنت ءُ مارا تنگ کنت ءُ مئے لوگانی مڈیاں بارت ءُ ھمے وھد ءَ پوج ءَ مئے شش زھگ آوار جتگ اَنت کہ آیانی درگت ءَ ھچ ھال نیست اِنت-

زھرشانی کنوکاں گوشتگ کہ مئے مردم یل کنگ بہ بنت اگاں تمپ ءُ تربت ءِ راہ بند کنگ بیت اِنت-

انتزامیہ ءِ نیمگ ءَ اے درگت ءَ دگہ ھچ ھال دیم ءَ نیتکگ اَنت کھول ءَ بھتام جتگ اَنت مئے مردم پوج ءَ گپتگ اَنت اشی ءِ لیکہ انگت دیم ءَ نیتکگ اَنت –

بلوچستان ءَ دکی ءِ ھند چمالانگ ءَ اشکرانی کھن ءَ کرود ءِ لُمبگ ءَ چہ دو کاریزکار بیران بیتگ اَنت –

پولیس ءِ رد ءَ ھردوکیں کاریزکارانی لاش اشکرانی کھن ءَ کش اِتگ ءُ ھسپتال ءَ سر کتگ اَنت –

زانگ بہ بیت اشکرانی کھن ءَ کاریزکاری بلوچستان ءِ جتا جتائیں جاھاں چار سد ءُ پنجاہ اشکرانی کھن ھست اَنت کاریزکار گیشتر گیس ءِ پُر بوگ، کرود ءِ کپگ ءُ تراکانی سبب ءَ وئیل ھمک روچی ئیں جوڑ بیتگ اَنت-

پاکستان سینٹرل مائنز لیبر فیڈریشن ءِ رد ءَ کھناں پیش اتکگیں وئیلاں سالانہ ءِ دو سد ءِ کچ ءَ بیرانی بیتگ اَنت –

سندھ ءِ بنجاھی شھر کراچی ءَ وائس فار بلوچ مسنگ پرسنز ءِ زھرشانی ءَ چار ھزار ءُ پنچ سد ءُ چِل ءُ چار روچ سرجم بیتگ – مند کیچ ءِ سول سوسائٹی ءِ سلیمان بلوچ، نسیم بلوچ، عبیداللہ بنجل ءَ اتکگ ءُ کھولانی گون ءَ پدری اش درشان کرتگ – ھمے وھد ءَ بیگواھیں عبدالحمید زھری ءِ کھول بنجل ءَ جاڑیگ بیتگ –

بیگواھیں عبدالحمید زھری ءِ یل نہ بیگ ءِ ھلاپ ءَ مروچی کراچی پریس کلب ءِ دیم ءَ زھرشانی کنگ بیت اِنت ءُ ھمے رنگ ءَ چاگردی رسانکجاھاں سرپدی مھم برجم دارگ بیت اِنت –

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ سال 2021 زیردستیں بلوچستان ریاستی زُلمانی دیمپان بیتگ، چُشکہ اے وڑیں روچ نہ بیتگ کہ یک ناوشیں گپے اش نہ کتگ نا مروچی ریاست ءَ وتی دست بلوچانی ھوناں مچلگی ءَ داشتگ اَنت اگاں کجام جاہ ءَ بلوچ پُسگے بیگواہ کنگ بیتگ ءُ ھمے وڑ دومی نیمگ ءَ زانگولیں جونانی دزکپگ ءِ جونانی ھال تالان بیتگ اَنت-

آئی ءَ گُشتگ ھمک سھب ءِ دراتکگیں روچ گوں ریاستی زُلماں ایر بُک اِتگ – ریاست ءَ نوکیں ھنر ءُ ھِلاھازن گوں اے سال ءَ یک نیمگے ءَ بلوچ زالبولانی آوار جنگ بندات کرتگ ءُ دومی لاشانی دور دیگ پہ زانت پشتونانی ھنداں دور دیگ بندات کرتگ – اود ءَ بازیں جاھاں اے دمگاں بازیں لاش دزکپتگ اَنت – آیانی مول ھمے بیتگ اے لاشانی دزکپگ ءَ بلوچ آبادی ءَ مھلوک ءِ لیکھ ءِ کم کنگ بیتگ ءُ اے گمان آیانی تہ ءَ پرینگی بیتگ اے لاش بلوچاں ابید پشتون ءُ یا دگہ مردمانی ئیگ اَنت-

ماما قدیر بلوچ ءَ گوشتگ کہ پاکستان ءِ ھاکماں پرایمنی ءِ جد ءُ جھد ءِ ھلاس کنگ ءِ واستس وتی کاروائیانی تہ ءَ باز گیشی آورتگ سرجمیں بلوچستان ءَ پاکستانی لشکر ءَ ھیلی کاپٹرانی کمک ءَ بیڑ بندات کرتگ چریشانی تہ ءَ ایف سی، فوج ءُ سی ٹی ڈی ءَ چادر ءُ چار دیواری لگتمال کتگ اَنت ءُ بلوچ زالبول آوار جتگ اَنت- ریاستی لشکر ءَ سرجمیں دمگاں لوگانی مڈیانی پُلگ ءِ ھواری ءَ لوگ مانداشتگ اَنت ھمے وڑ کسان سالیں زھگانی آوار جنیانی وئیل ھم دیم ءَ اتکگ اَنت اشی ءَ گیش سی ٹی ڈی ءَ دروگیں میڑ ءِ نام ءَ سِی ءَ گیش مردم شھید کتگ اَنت کہ چریشانی تہ ءَ گیشتریں بیگواہ کنگ بیتگیں مردم بیتگ اَنت –

بلوچستان ءِ دمگ گڈانی ءَ مولانا ھدایت الرحمان ءِ سرکماشی ءَ زھرشانی کنگ بوتگ، زھرشانی ءَ مزنیں کچے ءَ مردماں بھر زرتگ –

تران کنان ءَ ھک دو تحریک ءِ سرکماش مولانا ہدایت الرحمان ءِ گوشگ ات کہ شما ھچبر اشکُتگ کہ امریکہ ءِ کہ گچین کاری بنت گچین کاریانی وھد ءَ امریکی وؤٹ پنڈ انت؟ مھلوک کرا رو انت کہ مار ءَ وؤٹ بہ دے ات ما شمارا کمبہ، آپ، لین، پیناڈول دے ایں -ھپتاد ءُ چار سال انت اے ملک ءَ مئے کرا کائنت کہ مارا وؤٹ بہ دے من شمارا کمبہ، پیناڈول دے ایں، آپ پیپ لین دیاں – اگاں اشاں سال ءِ مارا یک کمبھے بہ دات اِنت مئے کمبہ پورا بیتگ اِت اَنت ـ ھپتاد ءُ چار سالیں ناں مئے کمبہ مکمل بنت، ناں آپ پیپ لائن سرجم بیت ناکہ مئے ھسپتالانی پیناڈول سرجم بنت – ھمیشانی وتی دنتان ءِ درد بہ کنت لندن ءَ رؤ انت –

گڈانی ءَ آئی ءَ تران کنان ءَ دیمتر ءَ گوشت کہ گوادر کہ سی پیک ءِ بنجاہ انت ھمے گُش انت کہ سنگاپور ات ما تپ ءِ الاج ءِ کراچی ءَ آیگ انت – مارا ھمے گشاں باند ءَ پونشی گوادر دبی ءُ سنگاپور بیت بلے ما گندگ ءَ ایں اے دبی ناں اے سند ءِ مونجو داڈو بوگ انت –

آئی ءَ دیمتر ءَ اتکگیں مردمانی منت گپت گُشت کہ گوں من کول بہ کن ات اے زِر کہ یک ھزانھے مئے گور ءَ انت ما شما درست اے زِر ءِ پھریز ءَ بہ کنیں- ھمے ٹرالر مافیا، گجو مافیا کہ مئے آب ھیات ءِ چُک چینی ءَ کنگ ءَ انت اشانی بگیری ءَ ما شما یکجاہ بہ ایں وتی زِر ءِ پھریزگ ءِ کول ءَ کن ایں –

کنڈ ملیر ءَ ھم ھک دو تھریک ءِ سروک مولانا ھدایت الرھمان ءَ دمگ ءِ مھلوک ءِ گون ءَ گپ ءُ تران ءُ مُچی کرتگ ءُ آیوکیں گامگیجانی درگت ءَ مھلوک ھُژار کتگ اَنت –

زانگ بہ بیت گوستگیں روچ ءَ جیونی ءَ ھک دو تحریک ءِ مچے ءِ بوتگ اَت کہ مزنیں کچے ءَ مردماں بھر زرتگ اَت مُچی تران کنان ءَ ملا ھدایت الرحمان ءِ گوشگ ات کہ اگاں ادارہ بے بس انت ما وت ٹرالر مافیاں تاچینیں، یک ھپتگے ءِ تہ ءَ نشہ ءِ بنجل بند کنگ نہ بوت اَنے وتی تاکت ءِ زور بند ءِ کنائینیں مئے لوٹ اگاں منّگ نہ بوت اَنت دیم ءِ دھرنا گوادر پورٹ ءَ بیت اِنت –

ملائے گوشگ ات کہ روچ رھمانی نشہ باپاری ادارھانی واستا بھمیانکی نشانی اِنت نشہ باپاری ءِ سرمستری وت ادارھانی کارمند کنگ ءَ انت –

آئی ءِ گوشگ ات کہ نوں چیک پوسٹانی سر ءَ مردمانی کم شرپی ءَ چد ءُ گیشتر اوپار کت نہ کنیں ھما چیک پوسٹ ءَ کہ مردمانی کم شرپی بیت ھمود ءَ نندیں ءُ زھرشانی کنیں – آئی ءَ لوٹ کتگ ایپ سی ءِ جاہ ءَ پولیس آرگ بہ بیت – آئی ء گوشگ ات کہ اگاں وھد ءِ سرجم بوگ ءَ اگاں مئے لوٹ منّگ نہ بوت اَنت گامگیج زورگ نہ بوت گڑا گوادر پورٹ ءِ گیٹ ءِ دپ ءَ ننداک جنیں –

تران کنان ءَ بلوچ راج دوستیں رھشون حسین واڈیلہ ءَ تران کنان ءَ گُشت کہ حق دو تحریک ورنایانی نمائندگیں تحریک انت ءُ اے تحریک بلوچ راج ءِ باندات ءِ شرکنگ ءِ ھاتر ءَ جوڑ بوتگ چینچو بژنی گپ ئِے کہ مال ءُ مڈیاں سریچیں بلوچستان ءِ مردمانی پاد ءَ چمپل نیست –

سر بیتگیں ھالانی رد ءَ ایران ءَ بلوچ دمگ گالیکش استان گلستان ءَ مولانا گورگیج ءِ برگ ءِ ھلاپ ءَ زھرشانی بیتگ ءُ ھمے میان ءَ ایرانی انتزامیہ ءَ تیرگواری ھم کرتگ ءُ زھرشانیانی کنوکانی زدگ بیگ ءِ ھال بیتگ –

گیشیں ھالانی رد ءَ آدینگ ءِ نماز ءَ پد مزنیں مسیت ءَ بلوچ عالم دین مولانا گورگیج چہ ممبر ءَ ایرگیجگ ءُ برگ ءُ مشھد ءَ آمیدگس ءَ تلب کنگ ءِ ھلاپ ءَ شھریاں زھرشانی کرتگ-

زھرشانی کنوکاں مولانا گورگیج ءِ پلامرزی ءَ اوگام ءُ “اللہ اکبر ” گوشتگ ءُ ھمے میان ءَ انتزامیہ ءَ مھلوک ءِ سر ءَ بیڑ برتگ ءُ تیرگواری ھم کرتگ ءُ لس مردمانی زدگ بیگ ءِ ھال اِنت –

ھالانی تہ ءُ گوشگ بیتگ کہ ایرانی انتزامیہ ءَ بازیں مردمے دزگیر کرتگ ءُ برتگ اَنت بلے تاں راستیں ھالانی تہ ءَ بس دو مردمانی گرگ ءِ ھال راست بیتگ اَنت-

زانگ بہ بیت گوستگیں لھتے روچاں پد ایرانی آمیدگس ءَ مولانا گورگیج کہ استان گلستان ءَ مزنیں مسیت ءِ پیشو اِنت ءُ آ لوٹاٹینتگ ءُ برتگ ءُ امام جمعہ ءِ ممبر ءَ ایر گپتگ ءُ چریشی ءَ پد مولانا گورگیج ءِ پلامرزی ءَ مشھد ءَ ھم گوستگیں روچاں زھرشانی کنگ بیتگ ءُ مولانا ءِ برگ ایر جنگ بیتگ –

آیانی گوشگ اِنت مولانا گورگیج اُستان گلستان ءِ مزنیں مولوی اِنت ءُ بلوچانی سروکی ءَ کنگ ءَ اِنت باید آ چو کمشرپ کنگ مہ بیت اِنت-

بلوچستان ءَ زورانسری آوار جنگ ءُ بیگواہ بوتگیں مردمانی پانکجنیں گل وائس فار بلوچ مسنگ پرسنز ءِ سرکماش نصراللہ بلوچ ءِ گوشگ انت کہ بلال احمد، محمد اسحاق ء عبداللہ نیچاری ءُ شیر محمد ء غلام مصطفی نیچاری ءِ کھول ءَ گوں آئی ءَ دچار کپتگ ءُ گوشتگ کہ بلال احمد، محمد اسحاق ءُ شیر محمد ھمے سال ءِ بیست نُھ نومبر ءِمیانی شپ ءَ سیکیورٹی ادارھانی کارمنداں لشکر کشی ءِ میان ءَ ولی آباد مستونگ ءِ دگ ءِ سر ءَ آوار جتگ ءُ بیگواہ کتگ انت سرکار ءِ نیمگ ءَ ھچ وڈیں سرپدی دئیگ نہ بوتگ چریشی ءَ چہ آ سک باز پریشان انت –

نصراللہ بلوچ ءِ گوشگ انت کہ ھر سَے ورناھانی درگت ءَ میر ضیاء لانگو ءَ گوں ھال اھوال کتگ ءُ بیگواہ مردمانی درگت ءَ درسیں رپورٹ داتگ انت ءُ میر ضیاء لانگو ءَ باور کنائینتگ کہ آ بلال احمد، محمد اسحاق ءُ شیر محمد یل کنائینگ ءَ وتی کرد ءَ پیلو کنت –

نصراللہ بلوچ ءَ ھمے امیت ءِ درشانی کتگ گوشتگ کہ ھنچوش میر ضیاء لانگو ءَ پیسر ءَ بیگواھیں مردمانی یل کنائینگ ءَ وتی کرد پیلو کتگ آ ھنگت بلال احمد ، محمد اسحاق ءُ شیر محمد ءَ ھوار دگہ بیگواھیں مردمانی یل کنائینگ ءَ وتی کرد ءَ پیلو کنت –

اُرش ءِ آسر ءَ لشکر ءِ یک کارمندے مرتگ ءُ یکے ٹپی بوتگ۔ بیبگر بلوچ

بلوچ ریپبلکن آرمی ءِ جارکش بیبگر بلوچ ءَ وتی شنگ کرتگیں درشان ءِ تہ ءَ گوشتگ کہ گوستگیں بیگاہ ءَ مئے سرمچاراں دشت ءِ کوھی دمگ مزن بند پنسن کؤر ءَ برجاھیں زورگیریں پاکستان ءِ لشکر ءِ پانگس ءِ سر ءَ گوں راکٹ ءُ اسنائپر توپکاں اُرش کتگ ۔اُرش ءِ آسر ءَ یک کارمندے مرتگ ءُ یکے ٹپی بوتگ۔

جارکش ءَ گشتگ پوج ءِ سر ءَ سر ءَ مئے جھد داں بلوچستان ءِ آجوئی ءَ ھمے وڑ ءَ برجاہ مان اَنت-

تربت ءَ سول سوسائیٹی ءِ نیمگ ءَ چہ بلیدہ ءَ جنگ بوتگیں ورناہ سراج سالح کھول ءَ ھک دئیگ ءُ کُشندھانی دزگیری ءِ ھاتر ءَ مروچی آدینگ ءِ روچ ءَ تربت پریس کلب ءِ دیم ءَ زھرشانی کنگ بوتگ –

زھرشانی کنوکاں پلے کارڈ دست ءَ بوتگ ءُ سراج سالح کوش ایر جتگ ءُ کُشندھانی دزگیری ءِ لوٹ کتگ –

زھرشانی ءَ تران کنان ءَ تربت سول سوسائٹی ءِ کنوینر گلزار دوست ءِ گوشگ ات کہ بلوچستان ءَ ورناھانی کوش ءُ آوار جنی ءِ درچ یک شل ءَ برجاہ انت – گیشتر دمگاں کشندہ ٹولیاں اے زمہ داری دئیگ بوتگ کہ آ بگیری داروکیں سیاسی ءُ چاگردی باسک ءُ نودربراں بہ جن انت لٹ کٹ بہ کن انت یا آوار بہ جن انت ءُ بیگواہ بکن انت اے وڈیں گیرکانودی عملاں چہ بلوچستان ءَ ھچ کس پھریز نہ انت –

آئی گوشگ ات کہ ھر ھما جاہ ءَ ڈیت اسکواڈ کار کنگ انت آھاں سرکار ءِ دست سر انت آھانی گور ءَ بے لاسنیں توپک ھم ھست ءُ آھاں بڈا انت سر بازار چکر انت بلے آھانی بگیری کانود ھاموش انت پرچاکہ اشاں سرکار ءَ دست بڈا جتگ اے مردماں چو ھپس ءَ مھار گٹ داتگ ءُ یل داتگ انت –

زھرشانی کنوکانی گوشگ ات کہ گوستگیں دوسالانی میان ءَ بس بلیدہ ءَ اے وڈیں بازیں ورناہ ءِ جنگ بوتگ کہ آھانی الزام ھما مردمانی سر ءَ اتکگ کہ سرکار ءَ نیمگ ءَ مھار گٹ ءَ دئیگ ءُ یل کنگ بوتگ انت – ورناھیں سراج سالح کوش وت اے گواھی دنت کہ کشندھ کئی سرپرستی ءَ کار انت پرچا کہ کُشندہ دپ وت منّگ ءَ اِنت بلے کانود ھمے ھاتر ءَ آئی بگیری ءَ گامگیج نہ زوریت پرچا کہ آ وت چہ کانود ءَ مستر اِنت –

آھانی گوشگ ات کہ اگاں سراج سالح کُشندہ دزگیر کنگ نہ بوتاں گڑا تربت سول سوسائٹی اشی ءِ سر ءَ یکشل ءَ توار چِست کنت –

زھرشانی ءَ بی ایس او ءِ بنجاھی پتر ءِ باسک کریم شمبے، بی ایس او پجار دمگی رھشون نوید تاج، بی ایس او گوستگیں دمگی آرگنائزر عقیل جلال ءُ تربت سعل سوسائٹی ءِ باسک ناکو ثناءاللہ جمیل عمر ءُ دگراں ھم تران کتگ –

زھرشانی کنوکانی گوشگ ات کہ کجام کانودانی رِد ءَ گیر ریاستی مردم توپک دئیگ بوتگ ءُ مردمانی کوش ءِ اجازت دئیگ بوتگ – کشندہ ءَ ترامجاھاں چہ وتی جرم منّ اِتگ گوشتگ کی سراج ھمے واست ءَ جتگ کہ آئی ءَ ملک ءُ مزھب ےِ بگیری ءَ گپ جتگ –

آھانی گوشگ ات کہ کانود کجام لس مردم ءَ اے مستری ءَ دنت کہ ملک ءُ مزھب ءِ بگیری ءَ گپ جنوکاں بہ کوش اے عمل انارکی ءُ گِس جنگی ودی کنگ ءِ سوب جوڑ بیت اگاں سرکار یا برزی تکاں اے لگام دیگ نہ بوت گڑا ھچ کس چہ اے آس ءَ نہ رکیت –