مستونگ ءُ ھاران ءَ سے لاش دزکپتگ اَنت کہ ایشانی توک ءَ مستونگ ءَ پوج ءَ یک مردمے آوار جتگ ءُ کشتگ ءُ آ دگہ دوین سلاہ بندیں مردماں آوار جتگ ءُ پد ءَ کشتگ ءُ چگل داتگ انت۔
ائید ءِ شپ ءَ شپ ءِ سئے بج ءِ نزیک ءَ فرنٹیئر کور ءِ کارندہاں مستونگ ءِ دمگ کلی کاریز سور ءَ یک لوگے ءِ سر ءَ اُرش کتگ ءُ محمد عامر ء دلمراد زورانسری چہ لوگ ءَ در کتگ ءُ تیر گواری کتگ ءُ کشتگ۔
کھول ءِ گشگ اِنت کہ بیڑ ءِ وھد ءَ ھچ وڑیں وارنٹ پیش کنگ نہ بوتگ، ایف آئی آر درج نہ بوتگ ءُ ھچ وڑیں ابوت پیش نہ بوتگ۔ ایشانی گشگ ءِ رد ءَ یک وشی ءِ روچ ءَ لوگے ءِ تہ ءَ دور کنگ ءُ ورناہے ءِ کُشگ نہ ایوک ءَ پشومانی ءِ گپے بلکیں بازیں جُست ودین ایت کہ اے وڑیں کارروائی ھچ وڑیں کانونی درچ ءِ تہ ءَ ھوار اَنت یا ناں۔
کشتگین ءِ مات ءَ زھر ءُ رنج ءِ درشان کنان ءَ گْوشتگ کہ من وتی چُکّ بازیں مشکل ءُ جنجالانی گوزگ ءَ پد رودینتگ بلے لھتیں ساھتاں پد آئی ءِ چُک چہ آئی ءَ پُلگ بوتگ۔ آہاں گشت کہ ما وت ءَ گیر مھپوز ءُ درگلو سرپد بوگ ءَ ایں، کہ اود ءَ ھرکس ہر وھد ءَ آہانی لوگاں اتک ءُ دور کنت۔
کھول ءِ گشگ ءِ رد ءَ اے وئیل ءَ پد ایف سی ءِ کارندھاں لاش گوں وت برتگ کہ نزیک ءَ دوازدھیں کلاک ءَ پد لاش پد ءَ دیگ بوتگ۔ دیمترا اے گپ ءِ سر ءَ زھرشانی کنگ بوتگ کہ اے وھد ءَ کھول ءَ ھم درکانودی اسٹامپ پیپرے ءِ سر ءَ دستھت کنگ ءَ مجبور کنگ بوتگ انت کہ آھاں وانگ ءِ اجازت نہ بوتگ۔ گْوشگ بوت کہ دمگ ءِ لھتے بے وانندگیں شھزانتاں ھم اے دستاویز ءِ سر ءَ دستھت گپتگ انت، چہ ایشی ءِ نبشتانک ءِ وانگ ءِ اجازت ءَ ابید۔
کھول ءَ اے گپ پدر کتگ کہ اگاں اے کاگد ءِ تہ ءَ آھانی ھلاپ ءَ ھرچی ھست گڑا آ چہ ایشی ءَ بے پرواہ اَنت۔ دومی نیمگ ءَ اے وئیل ءِ سر ءَ ایف سی ءَ چہ تاں انوگ ءَ سرکاری لیکہ پیش نہ بیتگ انت۔ اے وئیل نہ ایوک ءَ سنگینیں جُست ءُ پُرس ءِ دیم ءَ کاریت بلکیں گم جتیں کھول انساپ ءِ ودار ءَ اِنت۔
ھمے وڑ ءَ چہ ھاران ءَ دو لاش دزکپتگ انت کہ اے مردم برشونکی ءَ جنگ ءِ وھد ءَ سلاہ بندیں مردماں آوار جتگ انت۔
اے دوینانی پجار سعد ساسولی ءُ احمد محمد حسنی ءِ نام ءَ بیتگ انت۔
