TBP Balochi

نبشتانک: شاباشی پہ گلام ءَ انت

نبشتہ کار: هسابجار

دی بلوچستان پوسٹ

داد !
داد چی یے ءُ پہ چیا دیگ بیت ؟ داد یک دلبڈی یے پہ هما کار ءِ کنوک ءَ کہ مزنیں دلسیاھی ءُ جکانسری ءَ پد سرجم ئےِ کنت – تاں آئی ءِ هما کار ءِ شریں وڑے ءَ کنگ ءَ آئی ءَ داد دیگ بیت ، بُن اسل ءَ اے بادشاهی کارے کہ کدیمیں زمانگاں بادشاهاں وتی ریتے ءِ کجام یک کارے کہ دوست بوتگ تاں بادشاه ءَ وتی هزانگ ءِ دپ پچ کتگ ءُ چہ دست ء وتی وزیر ءُ گزیراں هما مردم ءَ داد بکش اتگ ءُ همے داد ءَ چہ جهل تریں چیزے کہ نام ئےِ شاباشی انت کہ بادشاهاں وتی چلوپگ کاراں بکشاتگ ءُ همے بلوچ چاگرد ءَ یک ائیبے مارگ ءُ زانگ بوتگ ، روچ ء مروچ آ بلوچ چاگرد ءِ مجگ ءَ کمتریں چیزے ءِ بستار ءَ انگت هست انت کہ کسے ءِ کجام کارئے ءَ کہ کسے وش بیت تاں آ گُشیت : شاباشی پہ گلام ءَ انت ، واجہ یا پلاں کس ءَ آفرین انت کہ اے کارے شر کتگ-

منی مول ءُ مراد هستیں دور ءِ دژمنیں استان ءِ ” شاباشی ” دیگ ئیگ انت کہ پہ وتی بلوچیں چلوپگ کاریں ندکاراں دیگ ءَ انت ئِے من اشیا پمشکا یک شاباشی یے گُشاں ءُ آئی ءِ دست گروک ءَ آئی ءِ چلوپگ کار کہ اے ربیت کہ اے استان وتی منّاں داد دیگ ئیگ انت اے هما بادشاهانی پہ وتی چلوپگ کاراں بوتگ اگاں تو بگشے چتور ؟ گڑا من گشاں چُش کہ بادشاه جی ءُ جان لوٹ ایت ءُ پہ وتی هر توار ءَ انان ءِ واهگدار نہ انت اے مردماں کہ اے شاباشی رسگ ءَ انت آ واجہ ءِ هچ هبر ءَ نا هبر نہ انت ، پمشکا من اے نبشتہ کاراں واجہ ءِ چلوپگ کار گشاں ءُ اے داداں ءَ شاباشی بادشاهاں پد وهدے کہ ملکاں همے ربیت پہ وتی راجی بامرداں داشتگ تہ آهاں وتی راجی بامردانی دلبڈی دیگ ءِ هاترا ادارگ ٹهینتگ انت ءُ هما راجی بامرد تُری آئی ءِ سیادی گوں کجام تکے ءَ بندوک بوتگ گڑا هما تکانی ادارگاں اے زمہ واری دیگ بیت کہ هما بامرد یا کارست کہ کجام هم تکے ءَ یک جوانیں کردے پیلو کنگ ءَ انت پہ آئی ءِ دلبڈی دیگ ءَ هما تک ءِ ادارگ ءِ زانوگراں همے زمہ واری زرتگ ءُ چار ءُ بیچار کنگ ءُ الکاپی ءَ ٹپاسگ ءَ رند هما بامرد یا کارست ءَ هما داد گوں شرپ ءُ ازت آئی ءَ داتگ چو مہ بیت کہ کسے ءِ هکجنی بہ بیت ، هما کارست هما داد ءِ هک داریں آئی ءَ دیگ بیت – ( بلے اے کار ءَ هما ملک پہ وتی راجی بامرداں کنگ ءَ انت کہ آجوئیں راج ءُ آجوئیں ملک انت گلامیں ملک ءِ گلامیں راجانی داد انچش انت چُش کہ بلوچستان ءِ بلوچانیگ انت چش کہ بلوچستان یک استانے ءِ زیردستیں ملکے ءُ آئی ءِ راج یک گلامیں راجے گلامیں راج ءِ گلامیں ملک ءِ کلیں ادارگ تُری هرچ تکے ءَ گوں آیانی سیالی بہ بیت پہ وتی واجہ ءِ وژنود کنگ ءَ ءُ همائی ءِ منشا ءِ پد ءَ جوڑینگ بوتگ انت پارلمینٹ ءَ بگر داں دود ءُ ربیدگی سرکاری ادارگاں درا کل شے آئی ءَ پہ وتی زیردستی ءِ مهکم کنگ ءَ جوڑینتگ انت اد ءَ ملک ءُ راج ءِ هما زگریں مانا ءِ جند نہ گواهیت ، بس بادشاه، هاکم، ریئت، مهکوم ءِ بسات انت اد ءَ چہ هرکس ءَ کہ بادشاه رزا انت آئی ءَ شاباشی دنت چو هما بادشاهاں کہ وتی چلوپگ کاراں شاباشی داتگ اش اے انچائیں یا پونچیں گپ نہ انت ءُ نہ انت کہ من اش چہ وت کنگ ءَ آں اے گپ اے هیّاریں استان ءِ وتگڑیں ادارگاں وت منّارینتگ انت چہ وتی کُنشاں اگاں کسے گش ایت چتور ؟ گڑا من همے پسو ءَ دیاں کہ اے ناں تئی ندکارانی ساچشتاں واناں ءُ ناں کہ سرپد انت کہ کیا چے نبشتہ کتگ اگاں تو درور بہ لوٹ ئے گڑا من همے گشاں کہ اے انگت هینچک سرپد نیاں کہ مُچ کتگیں نکان دگہ چیزے ءُ کسے ءِ وتی ساچشت دگہ ، چاچ ءُ بتل کسی ساچشت نہ انت آ چاچ ءُ بتلانی مُچ کتگیں کتاب ءِ دیم ءَ نبشتہ کنت مصّنف اشی ءَ ابید هم اشانی هج وڑیں چشیں ادارگے نیست کہ اود ءَ پہ بلوچ دودمان ءُ لبزانک ءَ کہ چیزے گچینی مردم بہ بنت ءُ آ هما تک ءِ گچینی نکاناں سال پہ سال در بہ جن انت ءُ هماں نکاناں بوان انت پد ءَ هما هکدار ءَ وتی کتگیں کار ءِ داد ءَ بہ بکش انت – ( چہ اشاں انگت گهہ انت ” سید داد ” ءُ ” بیگل داد ” کہ باج بهرن ءُ کویت ءِ لبزانکی مردماں وتی هساب ءَ وت وتی لبزانک ءِ ندکاراناں پہ ستک ءُ دل چار ءُ بیچار کنگ ءُ ٹپاسگ ءَ پد شرپ بکش ات ءُ داد اش دات اے استان ءِ ادارگاں پہ وت ءَ زانوگرانانی بدل ءَ وتی ، وتی دلار داشتگ انت ، پہ بلوچ لبزانکی کارستانی کمشرپ کنگ ءَ یکے وَ اش کہ کسے اگاں داد بزاں” شاباشی ” لوٹ ایت تاں منی منتوار بہ بیت وتی کتاباں پانگ ء من وت بیاریت کہ جی اے منی کتاب انت اے سال ءِ داد ءَ منی اے کتاب ءَ بدئے دومی پہ بلوچ ءَ وت ماں وت گِر ءُچک کنگ ءَ ءُ بلوچ آریپیں ندکارانی کمشرپ کنگ ءَ زیک مراد ساهر ءُ مرچی مبارک کازی کجام کنڈ ءَ آپ دیگ بوت انت هما بلوچ شائر ءُ ندکار کہ پہ اے ” شاباشیاں ” وتی چوڑ اش بُرز کتگ انت تہ کمیں پادانی دیم ءَ هم بچار انت کہ یک زمینے ءِ سر ءَ کہ آ گردگ ءَ انت آ هونین انت ، ارسیگ انت ءُ گلام انت پہ دو کلدار ءُ اے استان ءِ وژنودی ءَ وتی آریپیں ندکار ءُ وتی لگتمالیں راج ءَ پراموش مہ بہ بیت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: گُڈی واھگ ءُ شھید اسد ھسن

نبشتہ کار: ساچان آسکانی

دی بلوچستان پوسٹ

مھکمیں کردانی واھند دائم گیر آرگ بنت آوانی رَستگین ءُ رستگیں کشک کدی کور نہ بنت ءُ نہ سد انت چہ آواں پد آوانی ھم پگر ءُ ھم لیکہ دائم ھما رَس اتگیں ءُ رِستگیں کشک ءَ روان کن انت گوں ھوناں شود انت ءُ ریدگ ئِے کن انت۔

راجی زرمبشت ءُ گوستانکانی تہ ءَ اے پیمیں ھستی دائم مارگ بنت آوانی ھمک گپ ءُ ھبر راجی بامردانی راھشونی ءَ کن انت اگاں ما وتی بلوچ راج ءِ راجدپتر ءَ سر سری پٹ ءُ پول بہ کنیں گڑا مارا تاک تاک ءَ ھمک دور ءُ نوبت ءَ وڑ وڑیں نام جتا جتائیں اھداں دست کپ انت پہ بلوچے باندات ءُ بلوچیت ءِ مانا کنگ ءَ ابدمان بوتگ انت۔

دودا پہ میارجلی ءِ دِینا وتی سانلونکیں ساہ ءُ سرے دیمونی ءَ دنت بلے زوراوریں بیبگرے دیم ءَ تُک ، نُک دست ءُ گوش نہ بیت ۔

بالاچ گورگیج پہ وتی برات ءِ ناھکیں کوش ءَ زوراوریں بیبگر ءَ کُش ایت بلوچ ءِ بیرگیری ءِ دوداں زندگ دار ایت ءُ وتی پہ شانے مجتی نمیران کنت۔ بلوچ راجدپتر ءَ دودا ءُ بالاچ بلوچ دودمان بیرگیری ءُ میار جلی ءِ دومی نام زانگ بنت ھمے ناماں بلوچ پہ شانے وتی چُکاں پِر کن انت ءُ آواں بیرگیری ءُ میار جلی ءِ پہ وتی ھکاں سر بلندی ءُ ابدمان بوگ ءِ سکین ءَ دے انت شھید کامریڈ اسد ھسن پنام بالاچ اے اھد ءُ نوبت ءِ بالاچ ات چہ وتی مکھیں مات ءَ پنت زرتگیں پہ بلوچ ءِ باندات ءُ آؤکیں پدریچ ءَ ابدمان ءُ نمیران بوؤکیں یک کارستے ات ۔ شھید کامریڈ بالاچ دائم گشتگ ات مرگ ابرم ءِ ھما راستی انت کہ چہ آئی ءَ ھچ ساھدار نہ رکیت بلے ھما وش بھتیں مردم بنت کہ اے ادارُکی ساہ ءَ پہ یک مکسدے ءَ کولیگ کن انت ءُ دائمی نمیران بنت ۔

شھید کامریڈ بالاچ ءِ زند یک پچیں کتابے ات ھرکجا بوتگ ھودے مردمانی دل ءُ مچگ وتی نیمگا ترینتگ ات انت ۔ اے وڑیں ھستیانی روگ چہ وھد ءَ پیسر سک دردناک انت بلے یک راجی بامردے ءِ اولی ءُ گڈی واھگ پہ راج ءَ وتی تنگھیں زندے دیمونی ءُ ابدمانی انت پہ اشاں مَرگ مِرگ ءِ نام نہ انت بلکیں وتی لُکیں زندمان ءِ نمیرانی ءِ سوگات انت۔

شھید کامریڈ اسد ھسن آواران تیرتیج ءَ1/2/1993 ءَ واجہ مھمد ھسن ءِ لوگ ءَ ودی بوتگ شھید کامریڈ اسد ھسن ءَ وتی جد ءُ جھدے بندات آواران ءَ 2007 ءَ چہ بی ایس او آزاد ءَ کتگ ۔

اے وھداں شھید کامریڈ اسد ھسن ءِ اُمر 14سال بوتگ چہ کسانی ءَ گوں سرزمین ءَ مھر ءُ پہ راج ءَ ندر بوگ ءِ جزبگ ءَ زانشتی ھوالہ ءَ آگھ بوتگ آئی ءَ زانتگ کہ منی اے جد ءُ جھدے تہ ءَ تنگی تکلیفی بزگی بنت بلے گوں بچکنداں درست ئِے کبول کتگ ات انت گوں وتی لیکہ ءُ کاروان ءَ داں گڈی ساہ ءَ بندوک بوتگ ۔

شھید کامریڈ اسد ھسن ءَ گوں سرزمین ءُ بزگیں راج ءَ ھب ءُ وشھالی ءِ واھگ ءَ کدی تاھیر گرگ ءَ نیشتگ دائم بہ دیست ایں سُر ءُ پُرے تہ ءَ ات ۔ گُش انت کہ واب ھما انت ترا واب ءَ میلیت شھید کامریڈ اسد ھسن ءَ وتی راج ءِ وشھالی ءُ آجوئی ءِ واب ءَ کدی کرار گرگ ءَ نشتگ ات چوناھا انسان گوں ھزاراں واب ءُ واھگاں ودی بیت بلے یک واھگ ئِے انچیں بیت ھزاراں مردماں چہ یکے ھما واب ءُ واھگ ءَ وتیگ کنت آ گڈی واھگ گشگ بیت آ واھگ پہ راج ءُ گلیں زمین ءَ وتی ندر کنگ انت۔ ھمئے واب ءُ واھگ ات انت کہ بے تاھیری ءِ بنھشت ات انت وتی وابے مانا کنگ ءَ 23مئی 2020ءَ کولواہ جت ءَ گوں دژمن ءَ دیم پہ دیم بیت ءُ وتی گڈی واھگ ءَ پیلو کنت گوں شھید راشد رمزان پنام سوبین ابدی ابدمان ءُ نمیران بیت مروچی ھردو سرمتابیں جنگولیں بلوچ پُسگانی دومی سالروچ انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورکایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بلوچ چاگرد ءَ زالبولانی شرپ

نبشتہ کار: ھان تگرانی بلوچ

دی بلوچستان پوسٹ

بلوچ زالبول بلوچ ءِ شان ءُ ننگ انت بلوچ پہ وتی ننگ ءَ پہ وتی زالبولاں چہ ھمک چیز ءَ سرگوست کنت سر گوستگ بلوچ ءِ وت ماں وتی جنگ بہ بنت یادری جنگ وھدیکہ بلوچ زالبول نیام ءَ اتکگ گڑا ھما برھنگیں اسپر دارگ بیتگ انت-

بلوچ زالبول وھدیکہ نیام ءَ اوشتاتگ وتی چادر اش دور داتگ پت کشتن سد سالی ئیں دژمن ءَ وتی بیر بکشگ بیتگ انت مرچی پاکستان بلوچ زالبولانی گوں ازت ءَ لیب کنگ ءَ انت بلے میاریگ نہ انت پاکستان ءَ نہ وت ءَ تاریک ءُ راجدپترے ھست ناں بلوچ ءِ راجدپتر ءَ سرپد انت ءُ زانت-

بلوچ زالبولانی چست کنگ ءُ آوار جنگ بلوچ چاگرد ءَ مستریں گناھے زانگ بیت دگنیا سرپد انت کہ بلوچ جنین آدمے چنچو ازت ءُ شرپ انت مروچی اے مردہ زمیریں دژمن ءَ نہ وت ءَ ازت ءُ شرپے ھست نہ بلوچ ءِ ازت ءُ شرپ ءَ زانت کہ بلوچ زالبولانی بندیگ کنگ آوار جنگ مرچیگیں گپے نہ انت کہ لھتیں مردم ھمے جواز پیش کنت کہ چہ پدائین شاری ءِ امل ءَ بندات انت پدائین شاری ءِ سر ءَ بلوچ ءَ وَ بلوچ راجدپتر پھر ءُ شان کنت ساڑاھیت شاری بلوچ ءَ بلوچ راجدپتر تاجگ کت بلوچ نام درپشناک کت ریاست پمیشکا بلوچ ءِ کمشرپی کنگ ءَ انت بلکیں شمارا یات بیت 1971بھٹو ءِ دور ءَ بلوچ زالبول ماں منڈیاں بھا بیتگ انت بلوچ گوریلہ کمانڈر شیرو مری ماں وتی بی بی سی ءَ داتگیں انٹرو ءَ گش ایت کہ من بھا زرتگ ءُ آزات کتگ انت آھاں کجا پدائین کتگ ؟نواب اکبرھان پہ یک پنجابی زالبول ءُ میار ءِ واستا کہ پنجابی پوج ءَ گوں آئی ءَ بدکاری کنت کہ ایشانی پت ءُ پیروکی پیشہ ءُ آدتے وھدیکہ اے ویل پاشک بیت نواب اکبرھان برانزگپت ءُ کوہ ءَ روت چاکر ءِ کمبر ءِ داستان ءَ نوکیں رنگے بکشائیت نمیران بیت بلوچ گوریلہ کمانڈر استاد جنرل اسلم ءَ لوگبانک اما یاسمین وَ بلوچ گوریلہ کمانڈر ڈاکٹر اللہ نزر ءِ لوگ بانک بندیگ بنت ایشانی چے گناھ کتگ ات زرینہ مری گوں تپلیں زھگ ءَ انگت بیگواہ انت پہ کجام گناھے باپشت ءَ برگ بیت اے ھما بے زمیریں ریاست انت کہ وت ءَ ھچ ازت ءُ شرپ اش نیست نہ دگرے ازت ءُ شرپ ءَ دار انت اے ھما بھیمانیں ریاست ءُ پوج انت کہ گوں بنگالی جنین آدماں کجام دیم سیاھی نہ کت؟ایشانی دیم سیاھی ماں دگنیا ءِ راجدپتر ءَ نکش انت نی گوں بلوچ ء نہ کنت اے ایشانی پالیسی انت کہ بلوچ جنین آدماں گوں بدکاری ءُ بدپیلی بکن تانکہ بلوچ پروش بوارت سر ءُ جھل بکنت سجدگ ریزی ءَ لاچار بہ بیت مئے گلامی ءَ بہ من ایت بلے اے ایشانی زھنی شکست انت بلوچ وتی دژمن ءَ تانکہ سد سال ءَ نہ بکش ایت نہ کہ وتی مکسد ءَ چہ پد کنز ایت بلوچ سوبین بیت شکست پاکستان ءُ آئی ءِ کاسگ چٹانی نسیب ءَ بیت بلے گپ ءَ ما شموشکار نہ انت کہ ھرکس کہ اے بے ننگیں ریاست ءِ نان ءَ وارت پاکستان ءِ پارلیمنٹ ءَ روت وزیر گزیر اے سی ڈی سی جوڑ بیت آچہ بلوچ ءِ سپا درکیت مردہ زمیر ءُ بے ننگ بیت چہ بلوچی گیرت ءَ زبھر بیت اچ کجام کھول ءُ کھٹم ءَ سیادی دار ایت ھرکس کہ بے ننگیں نان ءَ وارت چم جھل لگورانی سپا اوشت ایت اھدی مردماں راست گوشتگ کہ ماہ نندے ماہ بئے سیاہ نندے سیاہ بئے ۔یک گپے من آں یات انت ھما وھداں ڈاکٹر مالک بی این ایم ءَ ات وھدیکہ تلوے سر ءَ سر کپت ھمے گوشتانک ءِ دات ٹیبل ءِ پہ مشت پروشت ءُ کوکار کت وھدیکہ من بلوچ ءِ سودا جت اے منی زھم ءُ اے منی گردن من اوٹ نہ لوٹ آں ھون لوٹ آں بلے ھما ھون لوٹ مرچی اوٹ لوٹ ایت چہ ھوٹ لوٹگ ءَ دست گٹ انت کہ بلوچ زالبول آوار جنگ بنت واجہ سد ءَ نہ انت من ھمے سرپد باں کہ واجھے گردن ھما وھد ءَ زھم ءَ سستگ کہ پاکستان ءِ پارلیمنٹ ءِ شربت نوشتگ مرچی بلوچ دژمناں بلوچ ننگ ءِ سودا جتگ مات ءُ گوھار بندیگ انت آدگراں بل کہ کورمیم انت اکبر آسکانی وڑیں اردو رٹ ءَ جنوکانی کس گلہ ءَ نہ کنت نہ سیاست زان انت نہ الم ءُ سواد ءِ نہ زانت ءُ سرپدی نہ بلوچی گیرت نہ بلوچ ءُ بلوچ کوم ءَ گوں مھرے نہ کہ زانت کہ منی سرزمین کجام انت کدی کبزہ بیتگ من منی کوم گلام انت یا ناں ؟بھا گپتگیں مردم انت ھرچی کہ دپ ءَ دیئگ بنت ھما گش انت سوداگر ءُ منشیات پروش ءُ چاگردی سلکاریانی آماچ انت ھمے وڑ ءَ یا زبیدہ بہ بیت کہ گوں بلوچ دژمناں جرنل ءُ کرنلاں بلوچ ءِ ننگ ءِ سودا گر زانگ بنت ۔بائدیں نی بلوچ مھلوک ءُ الس بزانت سرپد بہ بیت کہ کئے منی دوست ءُ کئے منی دژمن انت چرے گرانتریں ساھتاں چہ گرانتریں ساھت نیتکگ نہ کیت کہ بلوچ ءِ مات ءُ گوھار نیلام انت پہ بلوچ ءَ چے پشتکپتگ وھدیکہ ازت نیلام بہ بیت اے جاوراں نہ بلوچ مانیت نہ بلوچ ءِ ننگ مانیت نہ بلوچ مرزبومءُ گلزمین مانیت نہ پہ بلوچ ءَ دود ءُ ربیدگ پشت کپیت نہ بلوچ پدریچ مانیت نہ بلوچ ءَ پہ بستار پشتکپیت اگاں بلوچ لوٹیت کہ زندگیں راج ءِ بستار ءَ پشت بہ کپ آں زندگ بہ مان آں گڑا ھمے مزاھمت ءَ زندگ بدار ایت سلاھبندیں جھد ءَ برجاہ بدارایت وتی بھر ءَ ھوار بکنت دلار ءُ مکبراں پجاہ بیار ایت کہ ریاست ءِ چم ءُ پونز ھمیش انت ھمے بلوچ ءَ نکسان دیگ ءَ انت بلوچ ءَ چہ دری دژمناں زیات ھمیشاں نکسان داتگ بلوچ راج سوبین بات بلوچستان آجو بات-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورکایشانی منّوک بہ بیت یا اگاں اے گل ءِ پالیسیانی درشانی اِنت۔

سلهیں دستونک

هسابجار

دی بلوچستان پوسٹ

موسم رنگے مٹ بکنت
زِر وامدار بیت روزرد ءِ

شینکے نزوریں سر کشیت
بالاں کپوتے داراں کنت

چونیں دیارے مهرانی
شارے شلاں انت هوناکیں

ملّان اِنت پہ گْومے ھر کس
درد کج انت تیرکو کجا انت

مارا بِلّ کہ گون وت بئیں
چے آشوب ءُ چے آجوئی

چنچو مالک کئیت باریں
چنچو شاری مانداریت

گوں ما دیر انت کہ بام انت
تئی بلے بیا کہ جورکان داتگ

راه ءُ رند اِنت گامانی
مارا وداریں باریگ ءِ

ھمے سال ءَ چہ متھدہ ارب امارات ءَ زورانسری آوار جنی ءَ پد پاکستان ء  دست ءَ دیگ بوتگیں حفیظ زھری کراچی ءِ یک بندیگجاھے ءَ دیم ءَ آرگ بوتگ-

اے گپ ءِ پدری عبدالحفیظ زھری ءِ گْھار بی بی فاطمہ ءَ برطانوی رسانکدری ادارہ بی بی سی اردو ءَ گوں اھوال کتگ-

آئی ءَ گْوشتگ کہ اگاں منی برات بلے پاکستان ءِ مستریں شھر کراچی ءِ یک جیلے ءَ اِنت بلے مئے واست ءَ اے یک بلاھیں گپے آئی ءِ ھال رستگ ءُ آ ما چمّ وت دیستگ-

بی بی فاطمہ ءَ دیمتر ءَ گْوشتگ عبدالحفیظ ھمے سال 27 جنوری ءِ شپ ءَ ھما وھد ءَ فلیٹس پارکنگ ھند ءَ چہ دبئی واکداراں چست کتگ وھدے آ واتر لوگ ءَ آھگ ءَ بوتگ-

آئی ءَ گْوشتگ کہ پد ءَ مارا ھمے ھال رستگ آ دبئی ءَ چہ پاکستانی واکدارانی دست ءَ داتگ بلے آئی ءِ اد ءَ ھچ وڑیں نشانی یے نہ رستگ-

بی بی فاطمہ ءَ گْوشتگ وھدے کہ مارا آئی ءِ درگت ءَ سرپدی نہ رستگ گُڑا ما سندھ ہائیکورٹ ءَ یک ارزبندی یے داتگ کہ آ 29 مارچ 2022 ءَ گوشدارگ ھاتر ءَ منّگ بوتگ-

آئی ءَ گْوشتگ کہ 14 اپریل ءَ وھدے آئی ءِ زورانسری ءِ ارزبندی گوشدارگ ءَ ہائیکورٹ سرپد کنگ بوتگ کہ آ سی ٹی ڈی ءَ کراچی ءَ چہ دزگیر کتگ ءُ آ سینٹرل جیل کراچی ءَ برتگ اِت-

بی بی فاطمہ ءَ گْوشتگ توری بلّے منی برات ءِ بگیری ءَ وتگڑیں ایف آئی آر نکش کتگ چریشی ءِ آسر ءَ آ بندیگجاہ ءَ اِنت بلے اے وشی ءِ اے بلاھیں گپے بوتگ پرچاکہ شکر اِنت ھدا ئے آئی ءِ نشانی مارا دست کپتگ-

آئی ءَ گْوشتگ آئی ءِ سرپدی ءَ پد ما سینٹرل جیل “بندیگجاہ” ءَ شتگ ایں ءُ برات وتی چمّاں گوں دیستگ کہ وش ءُ سلامت اِنت-

زانگ بہ بیت اشی ءَ ساری ھم ھمے یکیں کھول ءَ گوً سیادی داروکیں راشد حسین بلوچ 26 دسمبر 2018 چہ ءَ متھدہ ارب امارات ءَ دزگیر کنگ ءَ پد بیگواہ کتگ،  راشد حسین ءِ کھول ءَ اے بھتام جتگ کہ آ 2018 ءَ دسمبر ماہ ءَ چہ متھدہ ارب امارات شارجہ ءَ زورانسری آوار جتگ ءُ شش ماہ ناشناسیں جاھے ءَ بند کنگ ءَ پد آ بے کانودی دروشم ءَ پاکستان ءِ دست ءَ داتگ-

وھدے کہ ضلع ھُزدار ءِ تھسیل زھری ءِ نندوک عبدالحمید زھری ءِ کھول رِد ءَ گوستگیں سال 10 اپریل 2021 ءَ دمگی پولیس ءُ سادگیں پُچّانی تہ ءِ کارندھاں کراچی ءَ آئی ءِ لوگ ءَ شپ ءِ بے وھد ءَ بیڑبرتگ ءُ لوگ تہ ءَ ساڑی ئیں عبدالحمید زھری ء شکر خان وتی ھمراھی ءَ برتگ گوں-

بیگواھیں عبدالحمید زھری لوگ بانُک رِد ءَ وئیل ءَ پد ما دمگی پولیس ءُ دگہ ادارھاں چہ لوگ ءَ بے وارنٹ ءَ بیڑبرگ ءُ عبدالحمید زھری ءِ دزگیری ءِ درگت ءَ شتگ ایں گُرا دمگی پولیس ءَ اے وڑیں وئیل ءِ بوگ ءِ نہ منّ اِتگ-

عبدالحفیظ زھری ءِ دیم ءَ آرگ سر ءَ وائس فار بلوچ مسنگ پرسنز ءِ گْوشگ اِنت کہ عبدالحفیظ زھری چہ کراچی ءَ دیم آرگ یک وشیں گپے ما اُمیت کن ایں سندھ ہائیکورٹ حفیظ سر ءَ جنگ بوتگیں بھتام کانودی دروشم ءَ چہ پٹ ءُ پول کنت ءُ انساپ کنت پرچاکہ حفیظ چہ ارب امارات ءَ چست کنگ ءَ پد ھکومت پاکستان دست ءَ داتگ-