بھارت ءِ ازمکار ٹائیگر شیروف ءِ واھشت ایں کہ بلوچستان ءِ ناچ کنوکیں زھگ ءَ دچار بہ کپیت

بھارتی ازمکار ءُ باگی فلم ءِ ھیرو ٹائیگر شیروف ءِ واھشت ایں کہ رسانکدراں شنگ ءُ تالان بوتگیں تامر ءِ تہ ءَ بریک ڈانس کنوکیں بلوچستان ءِ جھمنندیں گونڈو ءَ دچار بہ کپیت – 

وتی ٹویٹر ءَ آئی ءَ بلوچستان ءِ جھمنندیں زھگ سبھان سھیل بلوچ ءِ ناچ ءِ تامر شئیر کتگ نبشتگ کہ آئی ءِ واھشت ایں یک روچ ءِ اے گونڈل ءَ دچار بہ کپیت – 

سبھان سھیل ءِ ناچ ءِ تامر پاکستانی اھوالکار مہرین زہراء اولسر ءَ وتی ٹویٹر ءَ شنگ کُتگ ءُ بھارتی ازمکار ٹیگ کتگ – اھوالکار ءَ نبشتگ کہ بلوچستان ءِ کُچگ ءَ جھمنندیں دہ سالی زھگ بھارتی ازمکار ٹائیگر شیروف ءِ داب ءَ ناچ کنت،  آ لوٹیت کہ یک روچے ٹائیگر شیروف جوڈ بہ بیت – 

زانگ بہ بیت سبھان سھیل ءِ ناچ ءِ تامر چیزے روچ ساری رسانکدراں شنگ بوتگ ات – آئی ءِ اے تامر وانگجاہ ءِ مراگش ءِ میان ءَ پرنسپل مومل ثاقب بلوچ ءَ کش اِتگ – مومل ثاقب ءِ رِد ءَ اے تامر زھگانی مراگش ءِ وھد ءِ بوتگ بلے پدا ھم آ وش انت کہ اے تامر چاگردی ترامجاھاں شنگ بوتگ – 

سبھان ءِ تامر اولسر ءَ بلوچ سوشل میڈیا کارمرز کنوکانی نیمگ ءَ شنگ کنگ بوتگ کہ آئی ءِ تہ ءَ سبھان سھیل ویسٹ انڈیز کرکٹ گوازی کنوک ءُ ازمکار ڈی جی براؤ ءِ سوت ءِ سر ءَ ناچ کنگ ءَ گندگ بیت ءُ پدا رند ءَ بی بی سی ءَ سبھان سھیل ءُ آئی ءِ پت ءِ گلگدار ءِ گپتگ – سبھان سھیل بی بی سی ءِ گلگدار ءِ تہ ءَ ھم بھارتی ازمکار ءَ گوں دچار کپگے واھشت داشتگ – 

بی بی سی ءَ گوں تران کنان ءَ سبھان سھیل ءِ پت ءِ گوشگ ات کہ آئی ءِ زھگ ءَ کسانی ناچ ءِ شوک بوتگ – سبھان ءَ مدام وتی گوانکو ءِ تہ ءَ مائیکل جیکسن ءِ ناچی تامر چار اتگ انت ءُ ھمائی ءِ وڈا کنگے جھد کتگ – 

سبھان سھیل ءِ سیادی بلوچستان ءِ دمگ کیچ انت – آئی ءِ پت ءِ رِد ء آئی ءَ شش سال بوتگ کہ ناچ کنگے جھد کتگ بلے پدا ھم آئی ءِ پت ءِ رِد ءَ سبھان ءَ پروفیشنل ٹریننگ نہ رستگ – 

چاگردی ترامجاھاں ھر تک ءُ پھناتاں سیادی داروکیں مردم سبھان سھیل ءِ تامر ءَ شنگ کنگایاں – سبھان سھیل ءِ پت ءَ رسانکدراں تران کنان ءَ گوشتگ کہ آئی ءَ امیت ایں یک ناں یک روچے بھارتی ازمکار ءَ گوں سبھان ءِ دچار کپگے واھگ پورا بیت