TBP Balochi

کراچی شھدربرجاہ ءِ دو نودربرانی زورانسری آوار جنی ءِ بگیری ءَ کراچی پریس کلب ءِ دیم ءَ مروچی دومی روچ ءَ ھم زھرشانی نندانک برجاہ بوتگ – کراچی شھدربرجاہ ءِ جنک ءُ بچکیں نودربراں وتی سنگتانی یل کنگے لوٹ کتگ – زھرشانی کنوکاں نودربرانی زورانسری آوار جنوکیں سرکاری ادارھانی بگیری ءَ ترندین نارہ ھم جتگ ءُ درکانودی کارے گوشتگ – آھاں گوشتگ کہ اگاں نودربرانی بگیری ءَ گواہ ھست گڈا آمیدگس ءَ آرگ بہ بنت – اے نودربر بے گناہ ءُ بے کسور انت –

زھرشانی کنوکانی گوشگ ات کہ چیریں ادارہ ءُ پھازگی لشکر ءِ کارمنداں ھپت جون دوھزار بیست ءُ دو ءَ کراچی ءِ دمگ مسکن چورنگی ءَ گِس ءِ سر ءَ بیڑ برتگ ءُ دودا بلوچ ءِ الہی بخش ءُ آئی ءِ سنگت گمشاد بلوچ زورانسری آوار جتگ ءُ گون وت برتگ انت – دودا بلوچ کراچی شھدربرجاہ ءَ فلسفہ ءِ سیمی سمیسٹر ءُ گمشاد بلوچ پنچمی سیمسٹر ءِ نودربر انت – آھانی زورانسری آوار جنی ءَ بگر تاں روچ مروچی آھانی ھچ وڈیں ھال اھوال نیست ءُ آھانی کھول ءَ ھچ سرپدی نیست کہ آ کجا انت ءُ چی ھال انت – آ پھازگی ایجنسیاں ناشناسیں جاہ ءَ برتگ انت –

زھرشانی کنوکاں چہ کراچی ءَ زورانسری آوار جنگ بوتگیں نودربرانی زورانسری آوار جنی ترندی ءَ ایرجتگ ءُ گوشتگ کہ بلوچ ورناھانی زورانسری آوار جنی ھمک روچی کارے جوڈ بوتگ – تنی وھدی چہ کراچی ءَ سدانی کچ ءَ ورنا آوار جنگ ءُ بیگواہ کنگ بوتگ انت زھرشانی کنوکانی پھازگی ادارھانی نیمگ ءَ زورانسری آوار جنی انسانی ھکانی لگتمالی ءِ گوشتگ ءُ دودا بلوچ ءُ گمشاد بلوچ ءِ یک کنگے لوٹ کتگ اے ھم گوشتگ تانکہ نودربر یل کنگ نہ بنت زھرشانی برجاہ بنت –

دومی نیمگ ءَ ھردو نودربرانی زورانسری آوار جنی ءِ بگیری ءَ باند ءَ بزاں دوازدہ جون ءِ ادار یانزدہ ءَ تربت پریس کلب ءِ دیم ءَ چہ کھول ءِ نیمگ ءَ زھرشانی کنگے جار ھم جنگ بوتگ –

جار ءِ تہ ءَ گوشتگ کہ زھرشانی پد ڈپٹی کمشنر ءِ سرجمیں ھال دیگ بنت ءُ دیمتری کارانی ھاتر ءَ گامگیج زورگ بیت اِنت – کہ آھانی تہ ءَ ڈی بلوچ دگ ءِ بند کنگ، تربت تاں کراچی پیادگ پند ءِ آپشن ھم ھست انت –

آزات لچہ

ریگزار گل انت

لچہ کار: هسابجار

دی بلوچستان پوسٹ

ریگزارے دل ! واهگ آں کل کنگ نزانت
ریگزارے دل ! رنگ ءُ دروشمان داشت بیت نہ بیت
ریگزار ءِ آدت انت کہ روچے رنگے ءَ بلیت
ریگزار ءِ منت انت کہ دل شاده ءُ گل انت
ریگزار ءُ دل دو دوستیں سنگت اَنت
ریگزار ءُ دل ہر دو تُنی اَنت
ریگزار ءُ دل کہ هور بنت تہ دِرکّگاں جُڑ انت
ریگزار منی دل انت ءُ من ریگزارے آں
منی ءُ ریگزار ءِ سنگتی ءَ دیر نہ انت
کہ ما ہر دو سنگتیں
ءُ ما ہر دو تُنی ایں
ریگزار ءِ بادشاه گوات
ءُ منی باد شاه هدا
چو مہ بیت اے ہر دُکانی شور یک
چو مہ بیت اے ہر دُک کار زوال
یکے پہ ریگزار ءَ گمراه انت
ءُ دومی پہ منا دلیر
انچو ریگزار بے وس اِنت
انچو من ءُ منی دل انت
کہ تُنگ انت پہ شادهے
ریگزار پہ هور پُرّ نہ بیت
ءُ دل منی پہ تیرکُواں
دل انت ریگزار ءِ دروشم ءَ درا
ءُ ریگزار چو منی دل ءَ
ریگزار ءِ سنگتی ءَ کے بہ کنت
ریگزار ءِ سنگتی چتور بیت
داں کسے مہ روت چاگی ءَ
داں کسے ءِ زهگ آس مہ بیت
ءُ مہ پلیوشین ایت دُژمناں
داں کسے ءِ واهگ ءُ متا ،
وتی ڈیہیں سرڈگار مہ بیت
ریگزار بے ارزش انت
ریگزار بدوائی یے پہ ہر هما کس ءَ
کہ ریگزار ءِ کیمت ءَ مہ زانت
ریگزار منی دل انت
ریگزار منی واهگ انت
چو یاسمین کہ کِشت کنت وتی وشبواں
ماں ریگزار ءِ دامن ءَ آ نازبواں
ریگزار گل انت ءُ شادہ اِنت
ریگزار ءَ بود کتگ ، گوں وشبوآنی شادھاں
ریگزار زانت کہ هست کسے
چو منی دل ءَ کہ آئی ءِ سنگت اِنت
ریگزار پرچہ گل مہ بیت
ریگزار پرچہ شان مہ کنت

نبشتانک: وٹس ایپی بلوچی وانگجاہ؟

نبشتہ کار : بیبرگ بلوچ

دی بلوچستان پوسٹ

وھدے کہ ما بلوچی ءِ وٹس ایپی وانگجاھے ءَ باسکی زُور ایں گُڑا چہ دْرُستاں پیش مارا اے پھمگ لوٹ ایت کہ اِے بلوچی وٹس ایپی وانگجاھانی مول ءُ مُراد چے اَنت؟ ءُ ما زاناں چے ءَ ماں اے گل ءَ ھوار بیتگ ایں؟ زاناں ما وتی وھد ءَ وَ زیان نہ کنگ ءَ ایں؟ چہ سرجمیں بلوچستان ءَ ھوار دُنیا ءِ کُنڈ کُنڈ ءِ بلوچ ماں اِے وٹس ایپی وانگجاھاں چے ءَ ھوار اَنت؟ بزاں داں وھدے کہ ما اِے وڑیں جُستانی جواباں مہ زان ایں گُڑا بزاں ما ھما تبک ءِ ابدالیں نودربر ایں کہ ھر چکاس ءَ بے سوب اِنت۔ مارا تچک بوگ لوٹ ایت کہ بلوچ راج یک گُلامیں راجے، گِند ئے گُلامیں بلوچ راج ءَ آئی ءِ زُبان ماں وانگجاھاں وانینگ نہ بیت۔ چے ءَ کہ اگاں یک گُلامے وتی راجی زُبان ءَ بوان ایت گُڑا آ راج ءِ مھلوک زُبان دوست ءُ راجدوستے جوڑ بنت ءُ راجدوستیں مھلوک گُلامی وَ نہ منّ ایت چمیشکا مئے راجی زُبان ھم ناں کہ تھنا بے آسراتی اِنت بلکیں لگتمالی ءِ ھم دیمپان اِنت۔ گِند ئے یک نیمگے ءَ ماں ٹَوک ءُ توار ءَ بلوچی ءِ زگریں گال ڈالچار بیگ ءَ اَنت دومی نیمگ ءَ لھتیں رَدیں نبشتہ کار بلوچی ءِ کْوھن ءُ زگریں گالانی جاہ ءَ ھِندی ءُ پارسی ءِ گالاں کارمرز کنگ ءَ اَنت۔ بژن اِنت کہ لھتیں بلوچ کہ آیاں چہ یونیورسٹیاں دربُرتگ بلے انگت وتی ماتی ءُ راجی زُبان ءِ وانگ ءُ نبشتہ کنگ ءَ زبھر اَنت۔ البت یونیسکو گْوش ایت “دنیا ءِ بے سوتّیں(جاھلیں) مردُم ھما اِنت کہ وتی جِند ءِ راجی ءُ ماتی زُبان ءَ ونت ءُ نبشتہ کُت مہ کنت”-

بزاں تو توری چہ یونیورسٹی یے ءَ ایم اے انگلیش بہ کن ئے، توری پی ایچ ڈی بہ کن ئے یا توری انجینئرنگ بہ کن ئے بزاں بے وتی ماتی ءُ راجی زُبان ءِ وانگ ءُ راست نبیسّگ ءَ تو جاھلے ئے۔ وتی راجی زُبان ءُ پجّار ءَ ڈالچار کنگ ءُ زورگریں زُبان ءِ وانگ ءُ دربرگ کُجام ھساب ءَ زانتکاری اِنت؟ اگاں ما بلوچ لوٹ ایں کہ دُنیا ءِ دگہ زبانانی وڑ ءَ مئے راجی زُبان بلوچی ھم دیمروئی بہ کنت یا ما لوٹ ایں کہ مئے راجی زُبان گار مہ بیت گُڑا مارا منّگ لوٹ ایت کہ مئے بانُک ءُ واجھانی اولی راجی زمہ واری ھمیش اِنت کہ ما وتی راجی زُبان ءِ درونتاں وانان ءَ بلوچی نبشتہ دربر ایں، مارا وتی راجی زُبان وانگ ءُ راست نبیسّی ھیل کنگی اِنت۔ بلکیں مارا ھر یکے ءَ وٹس ایپی وانگجاہ اڈ کنگ ءُ وتی سنگت، دزگْوھار ءُ سْیاد وانینگی اِنت۔ گِند ئے اگاں ما بلوچی وانینگ ءِ جُھد ءَ بہ کن ایں گُڑا ما دربر ایں ءُ چوناھا بلوچی ھما وھد ءَ دیمروئی کنت وھدے کہ ما دْراہ بلوچی وانینگ ءِ جُھد بہ کن ایں، بزاں نی مارا ھر ھال ءَ زُبان دوست ءُ راجی زُبان ءِ اُستاد جوڑ بیگی اِنت۔

گْوش اَنت کہ یک روچ ءِ تہ ءَ پکیر مُلا جوڑ نہ بیت گُڑا ما گوں شما دزبندی کن ایں کہ بلوچی مئے وتی جِند ءِ زُبان اِنت پمیشکا بلوچی وانگ ءُ نبشتہ ئِے دربرگ پہ بلوچ ءَ سک آسان اِنت گُڑا باید اِنت ما تھنا اشتاپ مہ کن ایں بلکیں اِے جھلی کاراں رِد ءِ سر ءَ بہ کن ایں-

1- اول کسانیں بلوچی درونتاں بہ وان ءُ پد ءَ وت ھمے وڑیں کسانیں درونتاں ھیل (پریکٹس) کن، بزاں وت کسانیں درونتاں نبشتہ ءُ تیار کن ایں۔

2- رَند ءَ کسان کسانیں نبشتانک ءُ آزمانکاں نبشتہ بہ کن ایں۔

3- وتی نبشتگیں گالرِد(جملہ) ءُ نبشتگیں نبشتانکاں دو رند ءَ چمشانک دیان ءَ وت راست بہ کن ایں ءُ درگرانی نبشتھاں ھم راست بہ کن ایں۔

وھدے کہ ما اے سے ئیں کاراں ھیل کن ایں گُڑا ما وت دربر ایں بلکیں ما دْراہ راجی زُبان ءِ اُستاد جوڑ بہ بَہ ایں۔ بزاں اے پیسبوکی بلوچی گل، تاکدیم ءُ وٹس ایپی بلوچی وانگجاھانی مول ءُ مُراد ھمیش اِنت کہ ما دْراہ زیت بلوچی وت دربر ایں ءُ گُڑا وتی سْیاد ءُ لوگ ءِ مردماں بلوچی بوانین ایں ناں کہ بے بھر ءَ ھوار بہ ایں۔ مارا تھنا بلوچی وت دربرگی نہ اِنت بلکیں راج ھم وانینگی اِنت ءُ اِے مئے دْراھیں نودربرانی زمہ واری اِنت کہ گیشتر بلوچی وٹس ایپی وانگجاھاں اڈ کنان ءَ وتی راج ءِ مھلوک ءَ بلوچی وانگ ءُ دربرگ ءِ سکین بدے ایں۔ راج ءَ موبائلانی تہ ءَ بلوچی کیبورڈ ءُ بلوچی ڈکشنری ءِ ایرگیجگ ءُ کارمرز کنگ ءِ سرپدی بہ دے ایں۔ بلوچی درونت ءُ دربرگی تامُراں(Learning Videos) ھورت چار ایں ءُ دیم ءَ ھم روان بہ کن ایں کہ ھر بلوچے ءَ وتی راجی زُبان ءِ وانگ ءُ دربرگ ءِ موہ بہ رس ایت۔

بلوچی مئے وتی شھدیں زُبان ءُ بلوچ راج ءِ پجّار اِنت۔ بلوچ شالا یکمُشت بات اَنت ءُ بلوچی شالا دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک:گوریلا جنگ ءِ سر ءَ چمشانکے

گڈی بھر

نبشتہ کار: خالد سھیل

رجانک: زبیر بلوچ

دی بلوچستان پوسٹ

گوریلا جنگ ءِ دور ءَ سوبمندیں گوریلا جنگ چار دور ءَ چے گوز ایت اولی دور ءَ سرمچارانی رھشون جنگ ءِ رد ءُ بنداں ٹائنیت ءُ سرمچارانی ھیلکاری ءَ کنت سرمچار روایتی پوج ءَ چے چٹ جتا بنت آیانی فوجی تربیت ءَ ابید نزریاتی ءُ پکری تربیت دیگ بیت اِنت یک سرمچارے یکیں وھد ءَ سیاسی باسک ءُ سرمچارے –

دومی دور ءَ سرمچارانی راھشون ءُ سرمچار مھلوک ءَ پہ جنگ ءَ تیار کن اَنت پرچاکہ آیاں سرپدی انت کہ گوریلا جنگ بید ء مھلوک ءِ کمک ءُ پلہ مرزی ءَ سوب مند بوت نہ کنت ۔

سیمی دور ءَ سرمچار سرکار ءِ فوج ءُ پولیس ءُ آئی ءِ اھمییں نشانگ ءِ سر ءَ شپ ءِ تھاری ءَ ارش کنت ءُ چیر بنت آ جوانی ءَ پوو ءُ سرپد انت کہ گوریلا جنگ دراجیں پندے سال ءُ ماہ ءِ گپ ءَ نہ انت مزنیں میاد ءُ مدت ءِ جنت ۔ اے جنگ ءِ توک ءَ میراتھن رندے وڑا سبر ءُ اوپار کشگ لوٹ ایت ۔

چارمی دور ءَ گوریلا وتی سوب مند بوگ ءِ شاتکامی ءَ کن انت کہ لشکری آشوبی ءَ رند چے وڑ سیاسی ءُ زرکاری ءُ چاگردی آشوپ ءِ راہ گیشنگ بیت راجدپتر گواہ انت ءُ ما درست سرجمی ءَ زاناں کہ بیستمی کرن ءَ ماوزے تنگ ءَ چین ءَ ویتنام ءَ ھوچی مھنہ ءَ کیوبا کاسترو ءُ چے گویرا ءَ جنوبی افریقہ ءَ نیلسن منڈیلا سوب مندیں گوریلا جنگ کتگ ۔
ھلاس

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بلوچ وت ءَ چہ مھر گڑھ ءَ بہ شوھاز ایت

نبشتہ کار: ساجد بلوچ

دی بلوچستان پوسٹ

اولی بھر

بلوچ انِچو ھم بدبھت نہ اِنت کہ وتی ھستی ءَ چہ وتی جِند ءِ تہ ءَ مہ شوھاز ایت بلوچ ءِ ھستی وتی سرزمین بلوچستان ءَ گوں بندوک اِنت بلے دگنیا ءِ تہ ءَ مزنیں سِویلائیزیشن بیتگ اَنت آیاں وتی نشانی وتی آھوکیں پدریچ ءِ واست ءَ ایر نہ کُتگ اَنت چمیشکا مرچی آ وت نہ زان اَنت کہ آیانی زبان، کلچر، راج دپتر چے اَنت اے آیانی بد بھتی اِنت اگاں بلوچ وت ءَ زانگ لوٹ ایت، گڑا بلوچ ءَ را وتی راج ءِ دپتر الم وانگ لوٹ ایت کہ بنیاد ءَ بلوچ چہ کُجا اتکگ بلے بدبھتی ءَ مرچی ما وت نہ زان ایں کہ ما چہ کجا اتکگ ایں۔

اد ءَ منی مجگ ءَ یک شیرے کیت بوت کنت رد بہ بیت پرچا کہ من شائِرے نہ آں بلے اے منی ماریشت اِنت پرچا کہ من ءَ مارگ ءِ ھاک ھست جھل ءَ داتگیں اے بند ءَ بہ وان اِنت بوت کنت شما پوہ بہ بئیت۔

“تو کجا ئے وتی شوھاز ءَ دیگ ءَ نیمگ ءِ”
“تئی ڈیھ ءِ یک یک سِنگے ءِ سر ءَ تئی نام نبشتگ”

مئے بلوچ زانتکار گْوش اَنت کہ بلوچ چہ الب ءَ پیداک اَنت لھتیں گْوش اَنت بلوچ چہ ایران ءَ پیداک اِنت، ءُ بازینیں گْوش ایت بلوچ چہ یورپ ءُ ایشا ءَ اتکگ اَنت ما وت نہ زان ایں کہ مئے بنیاد چہ کجا بوتگ اے بژن ءِ گپّ اِنت کہ ایشی ءِ زانگ ءَ چہ پد کہ ما گار ایں، ما انگت وتی شوھاز ءَ رھادگ نہ ایں اے بژن ءِ ھبر اِنت کہ ما انگت وتی دپتر ءَ نہ وان ایں من گْوش آں بلوچ بلوچستان ءِ پرزند اِنت بلوچ مھر گڑھ ءِ اَسَل وارس اِنت۔

باید اِنت بلوچ وت ءَ چہ مھر گڑھ ءَ بہ شوھاز ایت مھر گڑھ دگنیا ءِ تہ ءَ یک سکیں کوئیں سِویلائیزیشنے بیتگ ءُ بازیں آرکیولوجسٹاں گْوشتگ کہ مھر گڑھ دگنیا ءِ تہ ءَ اولی سِویلائیزیشن اِنت اے گپ راست اِنت کہ مھر گڑھ چہ میسوپوٹیمیا ءُ مِسر ءِ سِویلائیزیشن ءَ ھم ساری اتکگ نی بیا اِنت ما سرپد بئیں کہ سِویلائیزیشن ءِ بزانت چے اِنت سِویلائیزیشن ءِ بزانت ایش اِنت کہ مردم ءَ اے سرپدی دنت کہ بنی آدم وتی زند ءَ چے ڈول ءَ بہ گوازین ایت کلچر سِویلائیزیشن ءِ پیداور اِنت ءُ کلچر انسان ءَ را اے سرپدی دنت کہ مئے چاگرد ءِ ھساب ءَ زند گوازینگی اِنت۔

1974 ءَ پرانس ءِ یک آرکیولوجسٹے بلوچستان ءِ دلبند ءَ کیت ءُ مھر گڑھ سِویلائیزیشن ءَ پٹ ایت آئی ءِ گْوشگ اِنت کہ بلوچ تنّ ءَ مھر گڑھ ءِ پیداور نہ بیتگ اَنت بلکیں آ مھر گڑھ ءِ پھازوک ھم بیتگ اَنت مھر گڑھ 9000 ءُ 2000 ءِ میانجی ءَ آباد بیتگ مھر گڑھ چہ سبی ءَ کساس 26 کلومیٹر ءَ دیر اِنت ءُ چہ ڈھاڈر ءَ 10 کلومیٹر دیر اِنت دیگ ءَ بازیں آرکیولوجسٹانی گْوشگ اِنت کہ مھرگڑھ یک سکیں کوئنیں سِویلائیزیشنے اِنت ءُ بلوچ دگنیا ءِ تہ ءَ اولی مردم بیتگ اَنت کہ آباد بیتگ اَنت چمیشکا من وتی بلوچ راج ءَ را اے گْوشگ لوٹ آں کہ ما چہ ڈنی ملکاں نیاتکگ ایں بلکیں ما ھزاراں سال پیسر بلوچستان ءِ تہ ءَ آباد بیتگ۔

مھر گڑھ ءِ اولی زمانگ سِنگ ءِ زمانگ بوتگ پہ بلوچاں سِنگ ءِ تٛراشگ ءُ پد ءَ چہ سِنگ ءَ اوزار اڈ کنگ یک مزنیں کِردے بیتگ جیالوجی اے زمانگ ءَ انگلیش ءَ Neo-lathic گْوش ایت اے زمانگ ءَ پیسر کمیونزم بیتگ ءُ کمیوزم ءِ زمانگ ءَ مردماں یکے دومئیگ ءَ کمک کُتگ کس ءَ کس نہ کُشتگ ءُ کس ءَ کسی چیز کبزہ نہ کُتگ بلے وھدے کہ سِنگ ءِ زمانگ کئیت گڑا بازیں جیڑہ دیم ءَ کا اَنت۔

آ زمانگ ءَ مردین ءَ شیکار کُتگ بلے جنیناں ورگ یکجا کُتگ گڑا ھمے ھساب ءَ مھر گڑھ سِویلائیزیشن ءَ دیم ءَ آیان کُتگ آ دور ءَ بلوچانی یک مزنیں کارے اے بیتگ کہ آیاں ڈریل دیم ءَ آرت وھدے کہ آیاں اے مار اِت کہ آیانی دنتان سڑگ ءَ اَنت ڈریل یک تْرندیں دارے بیت (انیگیں وھد ءَ مُلاھاں گون اِنت ءُ وتی دنتاناں ساپ کنگ ءَ اَنت بلے اے مُلاھانی اڈ کُتگیں چیزے نہ اِنت بلکیں اے ھما زمانگ ءَ 9000 سال ءَ پیسر بلوچاں جوڑ کُتگ) یک روچے آرکیولوجسٹانی ٹیمے کیت ھمے جاگہ ءَ، ءُ آ 300 کَنڑ کُتگیں لاشاں در کن اَنت ءُ ھما کَنڈ کُتگیں لاشانی تہ ءَ 7 لاشسنی دنتان ڈریل کُتگیں دنتان بنت ءُ آ یانی دنتان انگت سلامت بنت۔

گْوشگ ءِ بزانت ایش اِنت کہ ما بزاں بلوچ یک سکیں کوئیں سِویلائیزیشنے ءَ سیادی دار ایں ءُ اے ایشی ءَ را ما مھر گڑھ گْوش ایں ما وت ءَ بلوچستان ءِ تہ ءَ بہ پٹ ایں ایشی ءِ واست ءَ مارا وتی راج ءِ دپتر وانگی اِنت بوت کنت بازیں چیز من نبشتہ نہ کُتگ بلے شُما از ءَ بلوچ راج وت بہ وان اِت ءُ پد ءَ نبشتہ بہ کن اِت تاکہ ما ھم سرپد بہ بئیں من ھمے دستبندی کن آں گون وتی راج ءِ مردماں کہ مئے راستی بلوچستان ءِ تہ ءَ اِنت ءُ ما باید ایں دْرست وتی راج دپتر ءَ بہ وان ایں مھر گڑھ مئے گڑھ اِنت دیمتر ءَ من ھمے جُھد کن آں کہ دومی بھر ءَ زوت شُمئے دیم ءَ بیار آں ھر کُجا اِت بلوچ بات اِت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: منی کامریڈیں بانُک ترا ودی بوگ ءِ روچ مُراد بات

نبشتہ کار: شے بلوچ

دی بلوچستان پوسٹ

دراھی پہ تو ءُ دائم ءَ سلامت بات ئے

نزاناں پہ ترا چے نبشتہ بکن آں؟منی کِر ءَ اے وڑیں ھچ لبز نیست کہ پہ ترا نبشتہ کُت بکن آں او زندگی ءِ ھمسپریں شوکیں مردم ، تو گپے زان ئے تئی وڑیں مھروانیں سنگتے ءِ واست ءَ مردم نزانت کہ چے نبشتہ بکنت تئی وڑیں مھروان گُش ئے مردم ءَ را دست نہ کپت ایت من وَ بھتاوریں مردمے آں کہ من ءَ تئی وڑیں مھردلیں ھمراھے رَس اِتگ ، من باریں کدی تئی پَٹ ءُ لوٹ ءَ بوتگ آں-

منی دوستیں ارواہ اے گپ ءَ بِل بیا دگہ گپے کن ایں،کمو ساری من گوں دَمبورتگیں پاداں وتی کوٹی نمبر 24 تہ ءَ آتک آں داں منی سرجمیں چیز شنگ ءُ شانگ اِت اَنت، تو وَ زان ئے منی چیز پرچا شِنگ ءُ شانگ اَنت ؟ سُھبی کہ من انچو واب ءَ بُست کُت من وھد ءُ پاس چار اِت، کہ سک بے وھد اَت من زوت زوت ءَ وتی وانگ جاہ ءِ گُد گور ءَ کُت اَنت ءُ دیم پہ وانگجاہ ءَ رھادگ بوت آں ، دو ءِ ساھت ءَ واتر وتی کمرہ لمبر 24 اتک آں ، بلے من وتی شنگ ءُ شانگیں چیز یک پہ یکءَ شوک سارت اَنت ءُ یک نمیگے ءَ ایر کُت اَنت ھمئے چیزانی تہ ءَ یک کتابے ھم ماں اَت آ کتاب ءِ نام اِنت ، گنوک ءِ رو دَپتر، اے کتاب من چِست کُت وتی الماری ءَ ایر کُت،من دست گوانکو ءَ بُرت کہ ترا کلوھے کناں باریں تئی گوستگیں شپ چوں گوستگ ءُ نی چے کنگ ءَ ئے؟ بلے تو وَ زان ئے کہ مئے نودربرانی زندگی چون اِنت انچوش کہ بیست ءُ چار تاریک شرو بیت ما وَ انچو لَات ءُ کنگلا بہ ایں آ گپ نہ بیت ترا چے بگُش آں؟! پد ءَ دوشی شپ ءَ منی گوانکو ءِ سرجمیں پیکج ھلاس بوتگ اَت ،گڑا من وتی گوانکو ھما سرجاہ ءِ چیر ءَ ایر کُت شُت ورگ وارت پد ءَ واتر وتی ھما بزّگیں کمرہ ءَ آتک آں ھما کمرہ اِنت ترا یاد بیت من ترا گُشت کہ اے کمرہ ءِ توک ءَ اگاں یک مردمے رَدی ءِ سر ءَ ھم بئیت گُڑا آ ھمئے مار ایت اے کمرہ ءِ توک ءَ زندگیں مردمے ءِ کمی اِنت، تو ھمے گپ ءَ کامریڈ سک کند اِت ءُ گُشت اڑے منھوس اے سرجمیں کمرہ ھمئے وڑ بنت بلے شُما وت ءَ را شوک بکن اِت کہ شُما نودربر اِت، ھمے کمرہ ءِ توک ءَ آیگ ءَ رند من وتی گوانکو نہ چار اِت ، پد ءَ سک دمبرتگ اَت، گڑا کمرہ ءِ یک کُنڈے ءَ شت ءُ واب کپت آں، دو کلاک ءَ پد وھدے من بُست کت گُش ئے من ءَ یک گَلے ( خوش فہمی) بھر بوتگ اَت بَلے من نزانت کہ اے چونیں روچے؟! گڑا وتی وانگجاہ ءِ کارانی کنگ بندات کُت انوں کہ شش بج بوت من پاد اتک آں بلے منی وانگ ءِ لھتیں کار پَشت کپتگ، چاہ ءِ نشتہ ءَ سک گورجتگ اَت گڑا دیم پہ ھوٹل ءَ رھادگ بوت آں، ھمے وھد ءَ من ءَ منی استاد باز یاد پیداک اَت ءُ دل ھم لوٹگ ءَ اَت گوں استاد ءَ گپ بہ کن آں،تو وَ منی استاد ءَ زان ئے من ترا گُشت اَت آ یک سکیں شَرین ءُ مھروانیں مردمے،دومی گپ آ پد ءَ منی بلوچی ءِ استاد اِنت ھم ، منی مھروانیں سنگت، تو زان ئے من ءَ پرچا استاد دل ءَ پیداک اَت ؟-

چوناھا من ءَ استاد ھر روچ دل ءَ کیت، مئے گپ بیت ، بلے مرچی اے واستا منی دل ءَ گیشتر پیداک اَت کہ منی استاد کمو پریشان اِنت، نگیگ اِنت ھمئے مھرے ارجان اِنت ، بلے دل ءَ باز لوٹ ات کہ آئی ءِ ھالے بگراں ، پد ءَ ھما گپ مردم کہ کَنگلا بیت ، کیسگ ءِ توک ءَ پنجاہ کلدار ءَ ابید ھچ نہ بیت گڑا مردم اوشت ءِ آماچ بیت ءُ ھچ کت نہ کنت، پمیشکا منی ھال ءُ اھوال گوں استاد ءَ ھم نہ بوت-

منی زندمان ءِ اُمیتانی ھستی ، من شت ءُ چاھے وارت پد ءَ وتی بے بھائیں کمرہ ءَ آتک آں، کمرہ ءِ منتوار آں مدام منی وڑیں ابدال ءَ جاہ دنت ءُ اوپار کنت، گڑا من گنوک ءِ رو دپتر زُرت ءُ ھاسٹل ءِ بُرز ءَ نشتاں، کتاب ءِ وانگ بندات کُت ، بلے منی ھیال گوں کتاب ءَ کم ، گوں وتی میتگ ءَ گیش اَت گُڑا من گوانکو کَش ات ،وتی میتگ ءُ مردمانی اکسانی چارگ بندات کُت ، ھمے اکسانی اندر ءَ تئی اکسے منی دیم ءَ کپت من دیست ، من ءَ انچو تئی ودی بوگ ءِ روچ یاد اَتک ، من بچکندگے جَت ءُ گُشت اڑے مرچی منی مھرل ءِ وَدی بوگ ءِ روچ اِنت ، پمیشکا گند آں گَل آن ءُ گیش گَل بوت آں- منی مھرُل ترا ودی بوگ ءِ روچ مُراد بات-

من ھمئے چت ءَ سر نشتگ ءُ جیڑگاں کہ مھرُل پہ من ودی بوتگ ھما اِنت کہ مھرُل منی زندگی ءَ اتکگ گُش ئے زندگی رژنا اِنت گُش ئے زندگی ءَ دگہ رنگے زرتگ، گُش ئے زندگی ءَ را بھار گاہ ءَ پَتاتگ-

“منی دل ءَ مھرُل منی بلوچستان ءِ رنگ اِنت”
“مھرُل منی تربت ءِ دورشم ءَ جَنت”
“مھرُل منی دشت ءِ بھار گاہ اِنت”
“مھرُل منی باتل ءِ کوہ اِنت”
“مھرُل منی چور ءِ تیاب دپ اِنت”
“مھرُل منی کُلانچ ءِ بیگاہ اِنت”
“مھرُل من ءَ پسنی ءِ زَرین ءُ جُڈی ءِ وڑ ءَ دوست بیت”
“مھرُل من ءَ چو شادی کور ءِ کَوش ءَ دوست بیت”
“مھرُل من ءَ کلمت ءِ سھب ءِ گوات ءَ دوست بیت”
” مھرُل من ءَ اورماڑہ ءِ مید ءَ دوست بیت”
“مھرُل من ءَ ھنگلول ءِ کوہ ءَ دوست بیت”
” مھرُل من ءَ کنڈملیر ءِ ندارگ ءَ دوست بیت “
“مھرُل من ءَ شال ءِ یاد ءَ چِے دوست تر اِنت”

مھرُل منی زندگی ءِ درپشوکیں چراگ اِنت، ھما چراگ کہ وھدے یک گِدانے ءِ تہ ءَ روک بیت ، سرجمیں گِدان رژن ءَ کنت مھرل ھم پمن ءَ انچوش اِنت،مھرل منی دیم ءِ آدینک اِنت ، من کہ کند آں گڑا کند ایت، من کہ گریواں آ ھم گریو ایت پمیشکا ما دوئیں یکیں ارواہ ءِ بندوکیں ھمسپر ایں-

منی مھرُل یکبرے پد ءَ ترا تئی ودی بوگ ءِ روچ مُراد بات زندگ باتئے، مُراداں بات ئے، شادان بات ئے ، ھچ وڑیں گَم ءُ رنج مہ گندات ئے – آمین

منی دل ءِ کامریڈیں بانُک ، تئی گنوکوئیں شے بلوچ

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔