TBP Balochi

کاؤنٹر ٹیررزم ڈپارٹمنٹ ءَ ٹاہ داتگ ءُ گوشتگ کہ آھاں چیریں جاھے ءَ ھالے ءِ سربوگ ءَ یک مردمے تراکناکیں شوروانی ھمراھی ءَ دزگیر کتگ – سی ٹی ڈی ءِ رِد ءَ یک ناشرکارے تراک ءِ کنگ ءَ روگ ءَ بوتگ کہ آ داشتگ ءُ چیک ءُ تان کتگ – چیک کنگ ءِ میان ءَ آئی ءِ پرپٹ ءَ تراکناکیں شورو دست کپتگ اَنت –

سی ٹی ڈی ءِ رِد ءَ بمب ڈسپوزل ءَ بمب ناکارہ کتگ ءُ پرپٹ سوار دزگیر کتگ ءُ گیشیں پٹ ءُ پول بندات کتگ-

سی ٹی ڈی ءِ رِد ءَ کتکار ءِ پجار نظام الدین پنام ءِ خالد ءِ نام ءَ چہ بوتگ – کتکار ءَ وت منّ اِتگ کہ آ ھائی کورٹ، سیشن کورٹ، ایف سی ءُ پولیس سر ءَ اُرش کنگ ءِ شوربندی ءَ بوتگ انت – آئی ءَ گوشتگ کہ آ ھشت سنگت انت اے ناشرکاری ءِ کاراں کنگ ءَ آں-

سی ٹی ڈی ءِ رِد ءَ ڈی آئی جی ٹیلی حامد شکیل ءِ سر ءَ بوتگیں وتکش تراک ءَ ھم ھمے مردمانی دست مان بوتگ – کتکار ءَ اے ھم منّ اِتگ کہ آھاں آر آر جی فورس ءِ ٹرک، میکانگی دگ ءَ ایف سی گاڑی سر ءَ تراک ھم کتگ انت –

سی ٹی ڈی ءَ ٹاہ داتگ کہ چینی سفیر ءِ آیگ ءِ وھد ءَ شال سرینہ ھوٹل ءِ گاڑیانی پارک ءَ بوتگیں وتکش تراک ءَ ھم ھمے ٹولی ءِ دست مان بوتگ وھدیکہ بی اے مال ءِ نزیک ءَ پاکستان پوج ءِ ٹرک ءِ سر ءَ بوتگیں اُرش ھم اشی ءَ منّ اِتگ –

سی ٹی ڈی ءِ رِد ءَ کتکار ءَ سریاب شھدربر چار راہ ءَ پولیس سر ءَ بوتگیں بمب تراک ءِ منّگ ءَ ابید قندہاری بازار بخاری ءَ بوتگیں بمب تراک ءَ ھم ھمے ٹولی ءِ دست مان بوتگ –

سی ٹی ڈی ءِ رِد ءَ اشی ءَ اے ھم منّ اِتگ کہ سائنس کالج ءِ گیٹ دپ ءَ جمعیت نزریاتی سر ءَ تراک کتگ – کتکار ءَ اے ھم منّ اِتگ کہ آھاں فاطمہ جناح دگ ءَ دکان ءَ ھزارہ ٹارگٹ کتگ انت –

سی ٹی ڈی ءِ رِد ءَ کتکار ءِ ایندگہ سنگتانی واست ءَ دگہ جاھاں چاپہ جنگ بوگ ءَ انت – زانگ بہ بیت سی ٹی ڈی ءَ پیش ءَ بازیں دزگیری ءَ دیم پہ دیمی میڑ دروگ بوتگ انت –

رسانکدر ءُ دگہ اھوالکارانی نیمگ ءَ سی ٹی ڈی دروگیں میڑ ءَ بیگواھیں مردمانی جنگ پدر بوتگ اَنت –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ شش سد ءُ ھپتاد روچ سرجم بوتگ انت – مروچی ایچ آر سی پی ءِ پرگینگی سرکماش ھبیب طاہر گوں وتی ھمراھاں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

بنجل ءَ اتکگیں مردمانی میان ءَ تران کنان ءَ کمک سرکماش ماما قدیر بلوچ ءَ گوشتگ کہ بلوچستان ءِ تہ ءَ انسانی ھکانی لگتمالی یکشل ءَ برجاہ انت اے دمگ ءَ نا تھنا سیاسی ءُ چاگردی زانشتی کارانی سر ءَ بندش جنگ بوتگ بلکنہ اے پراہ ءُ شاھگانیں سرڈگار پہ ادے جھمننداں انگیر کنگ بوتگ – کہ ھر یکے اڈوجنجالانی آماچ انت کسے ھم پھریزگ بوھگ ءَ نہ انت ھمک روچ مھلوک ءِ جان ءُ مال ازت آبرو ءِ گوم ءَ گوازی بوھگ ءَ انت –

ماما قدیر بلوچ ءَ گوشتگ کہ اے درسیں جاورھالانی گندگ ءَ پد دنیائے نا دلکشی ءُ ڈالچاری ءَ چہ اندازگ جنگ گران نہ انت کہ پاکستان ءُ ایران ءِ ریاستی زلم زوراکی یک بلاھیں انسانی جیڑہ ءِ ودی کنگے سوب جوڈ بوت کناں –

ماما قدیر بلوچ ءَ گوشتگ کہ پاکستان ءِ اے زلم زوراکی ءِ گوستانک ءَ دیر انت بلے وھدے ھمراھی ءَ اشی ءِ تہ ءَ گیشی ھم آرگ بوتگ – انسان ءُ انسانیت چارگ بوھگ ءَ نہ انت یک دو ماہ ءِ تہ ءَ بلوچستان ءُ کراچی ءَ سدانی کچ ءَ بلوچ ورنا ءُ سیاسی باسک آوار جنگ ءُ بیگواہ کنگ بوتگ انت ءُ لس مھلوک ھنچوش لگتمال کنگ بوھگ انت کہ اشی ءِ گندگ ءَ انسان ءِ روح ھم ترسیت –

ماما قدیر بلوچ ءَ گوشتگ کہ پوج ءُ چیریں ادارہ منّ اتگیں سرکار ءُ ملٹری اسٹبلشمنٹ ءِ گوشگ پد ءَ گند ءُ نند ءِ ھمراھی ءَ بلوچ راج ءُ سیاسی باسکانی بگیری یکجاہ انت ءُ آھانی وتی دیم ءَ دیرکنگ ءَ دلگوش انت – اشی ءَ ابید کتاب، قلم ءُ زانت دژمنی ءِ ھما گوستانک نبیسگ بوھگ انت کہ بلوچ زھنانی تہ ءَ نہ تھنا وتی نقش ءَ یل کنگ ءَ اِنت بلکہ انسان ءِ گوستانک ءِ تہءَ سلتریں داگ جوڈ بوتگ انت –

بلوچستان لبریشن فرنٹ ءَ تمپ ءَ موبائل ٹاور ءِ مشینریانی سوچگ ءِ زمہ واری منّ اتگ-

بلوچستان لبریشن فرنٹ ءِ جارکش میجر گوھرام بلوچ ءَ گوشتگ کہ سرمچاراں گوستگیں شپ ءِ ساھت نُھ ءَ کیچ ءِ دمگ تمپ ءِ ھند آزیان ءَ موبائل پون کمپنی “یوفون ” ءِ ٹاور ءِ سر ءَ اُرش کرتگ ءُ مشینری ءُ دگہ ساز ءُ سامان مانداشتگ اَنت-

آئی ءَ گُشتگ کہ زورگریں ریاست وتی کمکاری ءُ سرمچارانی سر ءَ نگاہ ایر کنگ ءَ موبائل ٹاور مک کنگ اِنت – ما زورگر ءِ اے ھنر ءُ پندلاں شری ءِ سر ءَ سرپدیں اے وڑیں دراھیں چیز سرمچارانی نشانگ ءِ تہ ءَ اَنت-

نامداریں کولواہ ءِ ھال

نبشتہ کار: شاہ بلوچ شاؔہ

دی بلوچستان پوسٹ

نامداریں کولواہ چہ سیاست ءُ زانت ءَ زِبَھر اِنت ، لھتوکیں سرکاری چوکیدار ءُ ماسٹر است اِنت اِے بِچارگ وت نہ زان اَنت کہِ مئے زندگی چون اِنت ءُ مارا چی کنگی اِنت،وانگجاہ ھپت ءُ ھشت سال اِنت چہ پاکستانی لشکر ءُ چوکیدار ءَ پُر اَنت زھگانی وانگ ءُ زانگ تباہ ءُ برباد اِنت ۔ انچیں جاھاں اگاں اسکولے ھست اود ءَ ماسٹر نیست نادُراھجاھاں چہ سرکار ءِ نیمگ ءَ پیناڈول گولی یے نہ رس ایت، ڈاکٹر شریں نیست یک ءُ دو کمپوڈر اَنت بس بازیں مھلونکے نادراھی ءِ دَرگت ءَ زھنی مَریز انت ۔ پد ءَ درمانی دوکاندار انچوش گوں گِرانیں نیادے ءَ درماناں بھاہ کن اَنت کس زورت اِش اوں نہ کنت نادُراھے اگاں سک ناگیگ ءُ ناتڑ بہ بیت آ گڑا مِر ایت انوگیں دیمروئی دَور ءَ چہ ابید ھچ آسراتی نیست گیس بجلی روزگار” یہ ؤ دور کی بات ہے”-

شپ ءَ یک نادُراھے مِرگ ءِ سر ءَ بہ بیت کَس ءَ موکل نیست کہ وتی بیمار ءَ دگہ جاہ ءُ ھَندے ءَ سَر بہِ کنت بارت ءُ یاکہ ڈاکٹرے بیار ایت موٹرسینکل سواری بند اِنت کوہ ءُ دمگاں پیش ءُ دار ءُ کاہ ءُ بوچ ءُ مالداری نیست مردمی سُریندگے درا بہِ بیت لشکر آر ءَ ھما دمان ءَ کوش ایت ءُ بارت ۔ بجلی گیس نیست مات ءُ گوھار بزگ اَنت چوں وردِن اڈّ کن اَنت ؟ ھرکس ھمے دار ءُ درچک ءُ پیش ءُ دازانی سر ءَ ورگ اڈ کرتگ ایشاناں بی نیلیت دُنیا ءِ تہ ءَ انسانی واکداراں گوں دست بندی اِنت اِے درگت ءَ زوت اکشن بُرور اَنت-

مئے راج دورست پھوال ءُ شوانگ اَنت آواں وتی لاپ پہ ھمے مال ءُ دلوتانی سر ءَ ھمے کوہ ءُ کُچِگ ءُ ڈگارانی سر ءَ وتی ایمروز گْوازینتگ کار کرتگ ءُ وارتگ نوں باز بزگ اَنت۔۔ پد ءَ لشکر ءَ بچار مئے جنگی ھلک ءُ میتگاں نِشتگ ءُ کس ءَ پہ دَم ءِ جَنگ ءَ نیل ایت مئے جنگلی نِندوک ایں مھلونک ءَ را ڈّک ءُ پَسیل نیست مئے زھگ سردرا ءُ پدر اَنت ڈن ءَ در اَتک نہ کن اَنت وپت ءُ واب کُت نہ کن اَنت آکِر کجا بُرو اَنت کوھانی سر ءَ لوگانی نزدیک ءَ اسکولانی سر ءَ نِشتگ مُلکے ءَ رَو ئے دگہ جاھے ءَ رَو ئے واجھ ھال دئے انٹری کن نی بُرو انوں کولواہ ءِ ھر ھَند ءَ کیمپ چوکی اِنت سرکاری واکدار ءُ پارٹی گپ جن اَنت کوم ءِ اوٹ گِراَنت بلے اِے درگت ءَ تنے وھدی ھچ چوشیں گامگیج کس ءَ چِست نہ کرتگ چوناھیں مردمے اِے گپ ءَ ؤ کُت نہ کنت اگں کنت دومی روچ ءَ آ چِست کنگ بیت لاش ئِے کیت
اِے بلوچستان ءِ ھال اِنت کولواہ گیشتر بزگ اِنت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: بیگواہ

نبشتہ کار: نودان بلوچ

دی بلوچستان پوسٹ

کندگانی تواراں گوش ئے شاھدربرجاہ سر ءَ زرتگ اَت چارمکنڈ ءِ سرجمیں نودربرانی گوش، چم ءُ ھیال عبداللہ گریسی ءَ نشتگیں چنگ بروت ءُ مزن شلواریں سُھرچمانی نیمگ ءَ اَت اَنت۔ ھرکس ءَ کہ دیست گُڑا جیڑ اِت ئِے ” اے مزن شلواری چون وش ءُ وشھال اَنت ھرچ وھد ءَ بچار گَل ءُ شادان اَنت کندگ ءَ انت-

بلے اے کندگانی پُشت ءَ کس ءَ ھچبر سما ھم نہ اَت کہ اے مزن شلواری چنکسدر گمیگ اَنت ایشانی زند کجام سکی ءُ سوریانی دیپمانی ءَ گوزگ ءَ اَنت-

دیوان ءَ نشتگیں درستیں شلواری سرجمیں شلواریانی چم آئی ءَ سک بوت اَنت انچش گمان بوت کہ اے کندگانی مجلس ناگتی پُرس نامگے جوڑ بوت۔

شمئے کندگ مرچاں گیش بوان اَنت” آئی ءَ وتی لَنکُک ءِ نشتگین شلواریانی نیمگ ءَ شھار دات ءُ گوشت۔

نوک بروت سبزینتگیں شلواری ءَ گوں بشکند ءَ پسو دات، “ھو مئے گندگ گیش بوتگ اَنت اگاں ترا اے گندگاں چِی بیم کیت گُڑا ترا رز ءَ اِنت وتی زور ءَ بِہ جَن-

ھھھھھھھھھ درستاں انچش گند اِت گُوش اِت شاھدربرجاہ لرزگ ءَ لگ اِت چاہ والا ءَ کُکار کرت ءُ جست کرت آں “بھائیوں کی بات ہے آج بہت زور سے ہنس رہے ہو سب”-

پد ءَ درستاں گند اِت ءُ پسو دات” ھمے ھبر ءِ سر ءَ ھشت گرما گرم چاہ بیار۔

آئی ءَ ھچ نہ گوشت بلے زھر زھر ءَ گوں ترندیں گاماں دیم پہ ایڈمین ءِ نیمگ ءَ راھدگ بوت۔

چپ ءُ روش گوزان بوت اَنت شلواریانی شاھدربرجاہ ءَ کندگ ساریگ ءَ چِی انگت گیشتر بوان اَت اَنت وانگ ءُ زانگی دیواناں سرجمیں شاھدربرجاہ ءِ ٹیچر وتی نیمگ ءَ کرتگ اَت اَنت ھرچ وھد ءَ ٹیچراں کہ وانگ ءِ باروا گپ جَت گُڑا ھمے شلواریانی الم ءَ مسالے دات۔

بلے دیر نہ گوست وھد ءَ موہ نہ دات کہ اے لاگریں شلواری وتی واھشتاں پیلو بہ کن اَنت ءُ وتی گیمرتگین ارماناں بہِ ساڑیناں۔

وشیانی جمبر ھچ بَر دائم ءَ ساھیل نہ کن اَنت کُکار بوت انچش کُکار بوت کہ گریسی ءَ کس ءَ نشت ھم نہ کرت درستیں شلواری ھمے کُکارانی تہ ءَ یک ءُ دومیگ ءَ پُولگ ءَ ات اَنت بلے کس کس ءَ پجاہ آرگ ءَ نہ اَت انچش گمان بوگ ءَ اَت گوشے مھشر اِنت کندگ وتی جاہ ءَ کس ءَ اے شلواری بشکند ءَ ھم نہ دیست اَنت۔

آئی ءَ یک روشے پد ءَ اَتک دیوان ءَ گوشت” ھھھھھ شمئے کندگانی توار مرچاں گار اَنت ھھھھھھھ کجا اَنت ھما کہ زی زور اَت اَنت یکے ءَ گوں لھمیں توارے ءَ گوشت بیگواہ بوتگ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ پاکستانی پوج ءَ چار مردم زورانسری آوار جتگ ءُ بیگواہ کتگ انت –

گیشیں ھالانی رِد ءَ بلوچستان ءِ دمگ کیچ دشت ءَ پاکستان ءِ پھازگی ادارھاں سَے مردم زورانسری آوار جتگ ءُ گوں وت برتگ انت –

پوج ءِ دست ءَ آوار جنگ بوتگیں مردمانی پجار آعظم ء نبی بخش، نادر ء رحیم بخش ءُ مسلم ء حمید ناماں چہ بوتگ انت – ھر سَئیں مردم دو روچ ساری دشت سبدان ءَ پوج ءَ آوار جتگ انت –

ھمے وڈ ھمے ھپتگ ءَ زورانسری آوار جنی ءِ آماچ بوتگیں مردمانی کچ سینزدہ ءَ سربوتگ انت اشی ءَ پیش کراچی ءَ ھوار بلوچستان ءَ نُھ مردم آوار جنی ءِ آماچ بوتگ انت –

دومی نیمگ ءَ اے ھم ھال آھگ انت کہ کیچ آبسر ءَ یک دگہ نودربرے گوستگیں شپ ءَ آوار جنگ بوتگ –
گوستگیں شپ ءَ کیچ ءِ بنجاھی شھر تربت کولوائی بازار آپسر ءَ پوج ءَ گِس ءِ سر ءَ بیڑ برتگ ءُ حفیظ بشیر ء بشیر احمد آوار جتگ ءُ گوں وت برتگ –

بلوچ ورناھانی آوارجنی ءِ تہ ءَ گیشی اتکگ کہ پنچ ورنا چہ کراچی ءَ سَے آواران، چار کیچ ءُ یکے ھزدار ءَ زورانسری آوار جنگ ءُ بیگواہ کنگ بوتگ انت- چہ کراچی ءَ گمشاد بلوچ، شھداد، دودا الھی ھوار انت –

کراچی شھدبرجاہ ءِ نودربرانی زورانسری آوارجنی ءِ بگیری ءَ آدینگ ءِ روچ ءَ کراچی پریس کلب ءِ دیم ءَ زھرشانی بنجل ءِ جنگ بوتگ ءُ کہ مروچی دومی روچ ءَ ھم برجاہ بوتگ –

کیچ ءِ تحصیل تمپ ءَ ناشناسیں سلاہ بندیں مردماں یوفون ٹاور سر ءَ اُرش کتگ ءُ آئی ءِ مشینری مانداشتگ اَنت-

سربوتگیں ھالانی رِد ءِ مروچی شپ ءِ نُھ ءِ وھد ءَ تمپ ءِ دمگ آزیان ءَ ناشناسیں سلاہ بندیں مردماں یوفون ٹاور سر ءَ اُرش کتگ ءُ ٹاور ءِ مشینری مانداشتگ اَنت-

زانگ بہ بیت اشی ءَ ساری ھم بلوچستان ءِ جتاجتائیں دمگاں یوفون ٹاورانی سر ءَ اُرش کنگ بوتگ ءُ آ مانداشتگ اَنت ءُ آیانی زمہ واری بلوچ آجوئی لوٹوکیں گلاں منّ اِتگ اَنت-

آجوئی لوٹوکانی ھمے بھتام اِنت کہ پاکستانی پوج ءُ چیریں ادارہ ٹاوراں بلوچ جُھدکارانی بگیری ءَ چاریگری ءَ ھاتر ءَ کارمرز کنگ ءَ اَنت-

اے ٹاور سر ءَ بوتگیں اُرش زمہ واری انگت ھچ گل ءَ نہ زرتگ-

خضدار ءَ چہ پاکستانی لشکریاں ورناھے دزگیر کنگ ءَ پد ناشناسیں جاھاں بُرتگ۔

اھوالانی ردءَ پاکستانی لشکریاں بلوچستان ءِ دمگ خضدار ءِ بنجاھی بازار ءَ دکان ءَ نشتگیں ثاقب زھری دزگیر کنگ ءَ پد گوں وت بُرتگ۔

اھوالانی ردءَ ورناھے بیگواھی ءِ وئیل گوستگیں روچ ءَ دیما اتکگ۔ ثاقب زھری لشکریاں دزگیر کنگ ءَ پد ناشناسیں جاھاں بُرتگ۔

یات بہ بیتگ ھمے ھپتگ ءَ یک رندیں پد ءَ بلوچستان ءُ کراچی ءَ چہ کساس دھ مردم لشکریانی دست ءَ دزگیری ءَ پد بیگواہ کنگ بیتگ اَنت وھدیکہ مروچیگیں روچءَ بلوچستان ءِ دمگ آواران ءَ چہ چار ورناہ پاکستانی لشکریاں بیگواہ کُتگ اَنت۔

زورانسری بیگواھیانی تہءَ ترندی برجاہ اِنت چہ کراچی ءَ لھتیں روچ پیسر کراچی شھدربرجاہ ءِ فلسفہ ءِ دو نودربر دودا بلوچ ء الہی بخش ءُ گمشاد بلوچ ء غنی بلوچ زورانسری بیگواھی ءِ آماچ کنگ بیتگ اَنت۔

کراچی شھدربرجاہ ءَ چہ بیگواہ بیتگیں دوھیں نودربرانی زورانسری بیگواھی ءِ ھلاپ آدینگ ءِ روچ ءَ کراچی پریس کلب ءِ دیما زھرشانی کیمپ جنگ بیتگ اَت کہ مروچی دومی روچءَ ھم برجاہ بیتگ، اے کیمپ کراچی شھدربرجاہ ءَ سیادی داروکیں نودربرانی نیمگ ءَ جنگ بیتگ۔ کہ اِشی تہءَ مزنیں کساس ءَ بچک ءُ جنکیں نودربراں بھر زرتگ۔