TBP Balochi

نبشتانک: سِنگ ءُ سر میڑینگ نہ بیت

نبشتہ کار: سفرخان بلوچ (آسگال)

دی بلوچستان پوسٹ

انور یک وھدے ماسٹرے بوتگ، لھتیں سال بیت کہ آ چہ وتی نوکری ءَ ریٹائر بوتگ۔ آئی چہ ریٹائری ءَ پد لھتیں گوک ءُ پس، یک ڈگارے زُرت کہ ھمیشانی آسرا ءُ اُمیت ءَ وتی زند ءِ چاریں روچاں تیلانک بِہ دے آں۔

انور ءِ یک زھگے شال ءَ وانگ ءَ بوتگ بلے آئی انوں وانگ ھلاس کُتگ ءُ اے وھد ءَ لوگ ءَ نشتگ بے روزگار اِنت۔ ھمے بے روزگاری ءِ سَوَب ءَ آ سک باز ڈپریشن ءِ آماچ اِنت، یک ءُ دو رند ءَ آئی وتکشی ءِ جُھد کُتگ، بلے وشبھتی ءَ بچّ اِتگ۔

آئی اے جاورانی گِندگ ءَ پد انور ءَ یکروچے جیڑ اِت کہ چُک سک پریشان اِنت، سیاد وارِسانی تژن ءُ شِگانانی سَوَب ءَ آ گیشتر مونجان اِنت کہ آئرا مُدام گْوش اَنت کہ بلائیں ٹر ءُ ھچ نہ کنت ءُ بس پِت ءِ پادوم ءَ کپتگ، بلے راستی ءَ مُلک ءَ روزگار ءِ جند نیست ءُ آئی ھمینچو ونتگ پد ءَ برو برد ءُ ٹیکُمانی چیر ءَ بہ بیت، اے من ءَ وت ءَ پہ آئی بالاد ءَ شات نہ بیت۔

گڑا آئی پِت ءَ اِرادہ کُت کہ من وتی یک ءُ دو گوک بھا کناں دانکہ آ وت وتی کار ءُ بارے بِندات بِہ کنت ءُ چہ میتگ ءِ سوچاکیں تژن ءُ ٹاکوراں بِہ رکّ اِیت ءُ اِیمن ء دِل بِہ بیت۔

سارتیں بیگاھے ءَ کُڈُک ءِ چارِک ءَ انور گوں وانِندگیں بچّ ءَ نِندوک اَت کہ ناگت ھمے ھیال ءَ انور گونجت ءُ آئی چِڑکّہ کُت ءُ وتی چُکّ بھادین ءَ گْوشت: منی بچّ بھادین جان! من گوں وت ءَ سوڑگ کُتگ کہ وتی یک ءُ دو گوک بھا کناں ءُ ترا دیاں دانکہ تو کار ءُ بارے بِندات بِہ کن ئے ءُ وتی پادانی سر بِہ اُوشت ئے۔

وھدے بھادین ءَ وتی پِت ءِ دپ ءَ اے ھبر اِش کُت، دِل ءَ گل ءُ چہ چمّاں ارساں شنزگ بِندات کُت۔ انور گوں پُرمھریں نِگاھے وتی بچّ بھادین ءَ چارگ ءَ اَت کہ بھادین ءَ دِرّائینت ءُ گْوشت، ابّا من جُھد ءُ کُوشست کناں کہ تئی اے دیستگیں واب ءَ مانایے بِہ دیاں ءُ وت ءَ تئی ھمراھی ءَ میتگ ءِ تہ ءَ شرپداریں نامے بِہ دیاں، چی ءَ کہ اے دُگنیا لوٹ ھمیش اِنت کہ کسے ءِ گْور ءَ زر ءُ کلدار بوت آ میتگ ءِ ڈلگ ءُ شرپداریں مردم اِنت، بلے چو نزانت کہ مئے کش ءُ گْور ءِ نیزگاریں ھمساھِگ ھم شرپدار ءُ ھانوادھیں مردم اَنت۔

ابّا! اگاں من ءَ یک ءُ دو لکّ بہ بیت، من ءَ کراچی ءَ سنگتے ھست آئی گْوشتگ سابون جوڑ کنوکیں مشین ءُ سابون جوڑ کنگ ءِ سامان ھمینچُک ءَ کاینت، ءُ کار ءِ تہ ءَ بازیں سیت ءُ نپّے ھست اگاں کسے وتی کپگ ءُ پْرشگ ءَ بِہ زانت، ھاک دست ءَ را چوناھا پُر چنکّاں۔

انور وتی گوک بھا کُت اَنت ءُ چُکّ شُت دیم پہ جُلگھیں کراچی ءَ، چہ کراچی ءَ مشین ءُ سامان زُرت اَنت ءُ واتر وتی ماتیں بُندر آتک ءُ وتی کار ءُ بار بِندات کُت۔ آئی بندات ءُ سابون جوڑ کُت ءُ ارزانیں نیادے ءَ وتی میتگ ءِ کش گور ءِ میتگاں بھا کنگ بندات کُت۔ وھد گْوازاں بوت ءُ آئی سابون ءِ لوٹ گیش بُوھان بوت اَنت، یکّے اِش اَت کہ آئی سابون ءِ نِھاد کم اَت ءُ جند اِش جوان اَت، گڑا سرجمیں مارکیٹ ءَ بس ھمائی سابون ءِ لوٹ اَت۔ چریشی ءَ رند دومی ءُ سیمی کش ءُ گْور ھند ءُ دمگ، شھر ءُ بازارں چہ آڈر آیان بوت، گُڑا بھادین ءِ کار ءُ بار گیش ودّان بوت ءُ آئی وتی کاردار ءُ ھمکار ھم ودّینت اَنت۔

اے وھد ءَ آئی سابون بے نام اَت، گُڑا یکروچے  شِرکت ( پیکٹری ) ءِ دیوان ءُ کارانی سر ءَ چمشانک دَیگ بوت، آئی مارکینٹنگ ڈائریکٹر ءَ گْوشت کہ مئے سابون ءِ لوٹ ھمُک روچ گیشتر بُوھان اِنت، کش ءُ پھنات ءِ ھند ءُ دمگانی مارکیٹ ما تانسر دستیگ کُرتگ اَنت، اُمیت اِنت دیمتِر ءَ یک ءُ دو ماہ ءِ تہ ءَ ما اے دگہ بچّ اِتگ اِیں ھند ءُ دمگاں وتی دست ءَ کن اِیں، پمشکا پہ ما ھژدری اِنت ءُ شِرکت ءِ لوٹ ھم ھمیش اِنت کہ ما پہ وتی برانڈ ءَ گچینی ئیں نامے در بِہ چِن اِیں ءُ ہی مارکینٹنگ ءِ ھاتِر ءَ لھتیں جارینک (اشتہار ) ھم جوڑ بِہ کن اِیں دانکہ مئے شِرکت ءِ نام ءُ نامداری گیش ءَ گیش بِہ ودّ اِیت ءُ ھرکسی دپ ءَ مئے شِرکت ءِ نام بِہ بیت۔

چہ بازیں سوڑگ، شور ءُ سلاہ ءَ پد برانڈ ءِ نام ٹیٹل اِیر کنگ بوت، جارِینک ( اشتہار ) ءِ ھاتِر ءَ گُڑا ھمے پیسلہ کنگ بوت کہ ما بِندات ءَ یک جِنکّی اَکسے جوڑ کن اِیں ءُ آئی ءَ ھمے ٹیٹل سابون ءَ دست ءَ دئیں ءُ آ گوں بلوچی گُد ءُ پوشاکاں بیت۔ کسان ءُ مزنیں اکس ءُ پوسٹر جوڑ کنیں چار راہ ءُ دگانی سر ءَ جنیں دانکہ ھر رھگوز ءِ چمّاں ٹیٹل سابون ءِ اکس زیارت بِہ کنت ءُ مئے شِرکت گیش ءَ گیش نامدار ءُ نامان بِہ بیت۔

چہ اے پیسلہ ءِ منّگ ءَ پد ھمے گامگیجانی سر ءَ کار بِندات بوت ءُ لھتیں وھد ءَ پد سرجمیں بازار ءَ بس ٹیٹل سابون ءِ نام اَت۔ ھر نیمگ ءَ ٹیٹل سابون ءِ جارینکانی ( اشتہارانی ) اکس ءُ پوسٹر، پیناپلکس جنوک اِت اَنت کہ آھانی سر ءَ شوکیں جِنکّے ءِ اکس ءُ آئرا ٹیٹل سابون دست ءَ ءُ جھل  ءَ زنڈ زنڈیں لبزاں گوں ٹیٹل سابون ءِ توسیپ نبشتگ اَت۔بھادین ءِ شِرکت ءِ نامداری ھر کُنڈ ءُ دمگاں پْرشتگ اَت ءُ انور ءِ بچکندانی کوکراں تانسریں آزمان امبازاں زُرتگ اَت، بلے اے ھبر میتگ ءِ کماش ءَ را دوست نہ بوت۔ پمشکا آئی ءَ وتی ناشرکار، دُزّ ءُ ڈُنگانی نْیام  ءَ اے گپ مُدام کُت کہ انور ءِ زھگ مئے لجّ ءُ ننگ ءِ گوم ءَ لیب کنگ ءَ اِنت۔ مئے زھگ ءُ زالبولانی اکساں چارراہ ءُ دگانی سر ءَ جَنَگ ءَ اِنت کہ منی بے پائدگیں سابون بھا بِہ بَہ اَنت، ما تنی وھدی چوش نہ کپتگیں کہ مئے لجّ ءُ ننگ ءِ گوم ءَ کسے لیب بِہ کنت، ءُ انور ءِ بچّ بھادین کَے اِنت ءُ آئی چے بِستار۔

میتگ ءِ کماش ءَ وتی بچک پرماتاں شُما انور ءِ زھگ ءَ بِہ کُش اِت، چُکّاں وتی پِت ءِ ھبر ءَ ابید جیڑگ ءُ دیمروئی کُتگیں لوٹانی پُژدر ءَ چو کور ءَ پیسلہ کُرت ءُ دومی روچ ءَ بھادین ءِ راہ بست ءُ آئی  گاڑی ءِ سر ءَ اُرش کُت۔ چرے اُرش ءَ بھادیں ءَ بیست ءُ چار تیر ءَ گیش لگ اِت کہ آئی جون پہ شودگ ءَ ھم پیم نہ بوت، وھدے آئی جون اِش بےشود ءَ کل کُت۔

دومی روچ ءَ ھما میتگ ءِ کماش گوں وتی ھمراہ ءُ چُکّاں وتی اوتاگ ءَ نشتگ اَت ءُ وتی چُکّانی توسیپ ءَ کنگ ءَ اَت کہ آیاں گیرتی کارے کُتگ، اِسلامی کارے کُتگ، ما شما کُل ھواری ءَ بے جست ءَ جنت ءَ رویں۔

ھمے مْیان ءَ یک گْونڈویے پہ تگ ءُ میدان، تُرس لرز اتک ءُ گْوشت ئے کہ پاکستانی لشکر ءَ نازاتون ءُ آئی دوئیں لائِکیں جِنکّ آمنہ ءُ مریم آوار جتگ ءُ گوں وت بُرتگ اَنت، گوں گْونڈل ءِ اے ھبر ءِ اِش کنگ ءَ ھور دیوان ءَ نندوکیں کماش، آئی ھمراہ ءُ بچکّاں سرجھل کُت ءُ گْوشت، سِنگ ءُ سر میڑینگ نہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءُ بولان ءَ پاکستانی پوج ءِ نیمگ ءَ لشکر کشی برجاہ انت-

ھالانی رِد ءَ کیچ ء دمگ گومازی ءَ کوھی دمگاں زیکین انت کہ لشکر کشی برجاہ انت وھدیکہ اے کوھی دمگاں پوج ءِ گاڑیانی رؤگ آھگ ھمبوتگ-

دومی نیمگ ءَ چہ بولان ءَ ھم اے ھال آھگ ءَ اِنت کہ مروچی سھب ءَ پاکستانی پوج ءَ بولان ءِ دمگ تاوے،  ہنهوں، جری شم ءُ زرغون برزگ ءَ ھملشکر کشی بندات کنگ بوتگ وھدیکہ زمینی پوج ءِ ھمراھی ءَ جنگی بالگرد ھم بھر زورگ ءَ انت-

ھردو دمگاں برجاھیں لشکر کشی ءَ تنی وھدی ھچ وڈیں جانی ءُ مالی تاوان ءِ یا دزگیری ءِ ھال نیست ناکہ سرکار ءِ نیمگ ءَ اے لشکر کشیانیدرگت ءَ درشان دیگ بوتگ –

نبشتانک: بلوچ نودربر ءُ سرکار ءِ پندل

نبشتہ کار: واجو بلوچ

دی بلوچستان پوسٹ

ھر زندگیں انسانے ءِ دل ءَ لھتیں واب، واھگ ءُ واھشت بَنت نیست چوشیں مردمے کِہ آئی ءِ دل چَہ اے چیزاں پاک ءُ پلگار اِنت ھمے رنگ ءَ بلوچ نودربر ھم انسان اَنت گُڑا آھانی دل ءَ ھم الم لھتیں واب ءُ واھگ بیت۔ یک بلوچ نودربرے وتئ دل ءِ واھشت ءُ واباں چار ایت ءُ پد ءَ چمّے وتئ زمین ءَ جنت کِہ آ چَہ ھر آسراتی ءَ زِھبار اِنت، اود ءَ جنگ اِنت، کُشت ءُ کوش اِنت، گِرگ ءُبرگ اِنت، وانگجاہ پوجی کیمپ اَنت، اگاں یک ءُ دو وانگجاہ اَست گُڑا اود ءَ نودربر ءُ اُستاد ءَ چَہ گیش ترا پوجی گندگ ءَ کئیت۔ اشی ءِ درستاں چَہ مستریں درور مئے کرّ ءَ بلوچستان شاہ دربرجاہ اِنت۔ بلوچستان شاہ دربرجاہ ءِ ھر کُنڈ ءَ یک پوجی چوکی یے۔ اود ءَ نو سد ءَ چَہ بُرز پوجی نندارینگ بوتگ۔ نوں اے رنگیں جاورانی تہ ءَ وانگ وَ دوریں ھبرے بلکیں ساہ ءِ زورگ ھم باز مشکل اِنت۔ ھمے ھاتر ءَ، بلوچ نودربر وتئ واباں کوار ءَ کن اَنت ءُ دیم پَہ پنجاب ءُ اسلام آباد ءِ شاہ دربرجاھاں کدم جَن اَنت۔ بِندات ءَ وَ چوش بیت کِہ پنجاب بلوچ نودربراں وشّ اَتک کَنت، آھاں اسکالرشِپ دنت ءُ پَہ نندگ ءَ آسٹل ءُ کوٹی۔ پنجاب پرچی ءَ چو دزپچ ءُ مِھرباں بیت؟ اشی ءِ پُشت ءَ سرکار ءِ مَزنیں پندلے است بیت۔ آ پندل بلوچ نودربراں پنجاب ءُ اسلاام آباد ءِ کانچ ءِ میتگ ءُ ماڈیانی تہ ءَ بےسُد ءُ بے سَما کنگ بیت سرکار ءِ گُمان ھمیش بوتگ کِہ وھدے بلوچ نودربر اے شوک شوکیں روڑ ءُ ماڑیاں گِند آں گُڑا آ چَہ وتئ بَزگریں راج ءَ پراموش بَنت ءُ پَہ وتئ جِند ءَ واب گِند اَنت۔ بلے زاناں سرکار چَہ اے ھبر ءَ نزانتکار بوتگ کِہ بلوچ چو اَرزانی ءَ رد نَہ کپ ایت۔ آئی ءَ زُلم ءُ زوراکیانی ساھگ ءَ شیر مِتکگ چوشکہ بلوچ نودربر ءَ گیشتر ھرچ دور ءُ زمانگ ءَ وتئ زُلم ءِ آماچیں راج ءِ درد کوپگ ءَ بوتگ گُڑا اے رندی ھم ھمے پیم بیت۔ بلوچ نودربر ماں پنجاب ءُ اسلام آباد ءَ یکجاہ ءُ یکمُشت بنت، گپ کنت اَنت، وان اَنت، سرپد بنت۔ ءُ اے چیز سرکار ءَ وش نَہ بیت۔ پرچی ءَ کِہ سرکار ءَ چَہ بلوچ نودربراں دگہ امیت داشتگ اَت کِہ آ ماں ھاکاں ھوار بوت اَت۔ نوں مَرچی باندات ما گندگ ءَ ایں کِہ سرکار ءَ وتئ پندل مَٹ کُتگ اَنت۔ آ جُھد ھمے کنگ ءَ انت کِہ بلوچ نودربراں چَہ زانت ءُ زانگ ءَ دور بِدار ایت۔ ھمے سبب انت کِہ مرچی پَہ بلوچ ءَ پنجاب ءُ اسلام آباد ءِ شاہ دربرجاہ وانگجاہ ءَ چَہ گیش ازیتگاہ جوڑ بوتگ اَنت۔ ھر روچ گِرگ ءُ برگ، نودربراں کوانک کنگ ءُ آھاں بیھار دیگ، آھاں رنگ رنگ ءَ ازیت دیگ ءُ دگہ باز، اے درستیں عملانی پُشت ءَ بس ءُ بس ھمے یکّیں پندل اِنت کِہ بلوچ ءَ چَہ وانگ ءُ زانگ ءَ دور دارگ۔

اے درائیں جاوران ما دیم ءَ بکن اِیں ءُ بچار ایں گُڑا مارا ھمے چیز گندگ ءَ کئیت کِہ مرچی بلوچ نودربر چَہ سرکار ءِ درائیں پندلاں آژنا ءُ سرپد انت ءُ گوں مُھکمی ءَ اے رنگیں جاورانی دیم ءَ اوشتاتگ۔ مُھکمی ءِ درور ءُ کِسّہ باز اَنت۔حفیظ بلوچ کِہ قائد اعظم شاہ دربرجاہ ءِ یک ایم پِل (M.Phil) فزکس ءِ یک نودربرے، آ وھدے چَہ وتئ میتگ ھُزدار ءَ یک وانگجاھے ءَ نودربرانی دیم ءَ گِرّان کنگ ءُ برگ بیت گُڑا سرکار گوں وتئ اے عمل ھمے پیش دارگ ءِ جُھد ءَ کنت کِہ اگاں کسے گوں کتاب ءَ مِھر کَنت گُڑا آئی ءِ ھال ایش بیت۔ بلے پد ءَ دومی روچ ءَ ما گِندگ ایں کِہ ھما نودر کہ آھانی چمّانی دیم ءَ حفیظ برگ بیت ءُ آھاں ھمے کُلوہ دیگ بیت کِہ اگاں شُما کسے ءَ حفیظ بوئگ ءِ واب دیستگ گُڑا شمے ھال ھمے پیم بیت، بلے ھما نودربر حفیظ ءِ اکساں دست ءَ کن اَنت ءُ کُوکار کن اَنت ءُ گوش اَنت کِہ مۓ اُستاد ءَ بیار۔ ھمے رنگ ءَ اسلام آباد ءِ نودربر ھم بےتوار نَہ بَنت۔ ھروچ بگند کِہ ریلی یے، ھرتالے، پریس کانپرنسے۔ ءُ آ داں 27 روچ ءَ پریس کلب ءِ دیم ءَ نند اَنت ءُ وتئ سنگت حفیظ بلوچ ءِ یل کنگ ءِ لوٹ ءَ کن اَنت۔ بازیں جُھد ءُ کوششت ءُ توار ءَ پد، سرکار حفیظ بلوچ ءَ دیم ءَ کار ایت بلے آئی ءِ سر ءَ وتگڑیں بُھتام جنت ءُ آئی ءَ زندانی کَنت۔
کِسّہ چَہ حفیظ ءَ ھلاس نَہ بیت۔ چَہ آئی ءَ پد بیبگر امداد چَہ پنجاب شاہ دربرجاہ ءِ ھاسٹل ءَ گَرگ ءُ برگ بیت بلے بلوچ نودربر انچو کِہ پیسر ءَ ھاموش نَہ بوتگ اِت اَنت، اے رند ءَ ھم بےتوار نَہ بوت اَنت۔ ھر نیمگ ءَ کوکار ءُ زھرشانی بیت، ءُ سرکار لاچار بیت کِہ بیبگر ءَ یل ءَ بدنت۔ چَہ بیبگری ءَ پَد فیروز بلوچ چَہ راولپنڈی ءَ گار کنگ بیت کِہ روچ ءِ مروچی ءَ داں گار ءُ بیگواہ اِنت بلے بلوچ نودربر انگت ھاموش نَہ اَنت۔ ھر روچ ھرتالے، ٹویٹر کیمپینے، توارے، جاکے۔ انچو گِندگ بوئگ ءَ اِنت کِہ سرکار چَہ بلوچ نودربراں سک باز تنگ اَتکگ۔ آ ھر پندل ءِ کِہ ساز ایت بےسوب انت۔ یک نیمگ ءِ تمدر ءُ زوراوریں سرکار ءُ دومی نیمگ ءَ ناتُرسوکیں بلوچ نودربر اَنت۔

اے کِسّہ ھمے پیم ءَ روان اِنت۔ سرکار گرگ ءُ برگ ءَ اِنت ءُ بلوچ نودربراں بگند کِہ چو کوہ ءَ سرکار ءِ دیم ءَ مِکّ اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ آواران ءُ خاران ءَ تیر گواری ءِ دو جتاھیں وئیلانی تہءَ دو مردم کُشگ بیتگ وھدیکہ یکے ٹپی بیتگ۔

آواران ءَ تیر گواری ءِ وئیل جھاؤ ھنکین ءَ دیما اتکگ کہ آودا کُشگ بیتگیں مردمے پجار رحمدل ء بارو ءِ نام ءَ چہ بیتگ۔

اھوالانی ردءَ کُشگ بیتگیں مردمے جون مروچی سھب ءَ جھاؤ ءِ غریب آباد میتگ ءَ ھستیں آپی ڈیم ءَ چہ دزکپتگ ءُ پدءَ واکداراں جون دزگپتگ ءُ سول نادراھجاہ کیمپ جھاؤ ءَ بُرتگ۔

اھوالانی گیشتر گُشگ اِنت کہ 04 اپریل 2017 ءَ ھمے کھول ءِ سئے مردم کہ اِشانی تہءَ بائیان ء لعلو، پیرجان ء بائیان ءُ کسان سالیں قمبر ھوار بیتگ، کہ ناشناسیں مردماں لوگءَ پُترتگ ءُ کُشتگ اِت اَنت وھدیکہ اھوالاں اے ھم گُشتگ کہ کوشکارانی سیادی گوں سرکاری مستری ءَ جنزوکیں ٹولیانی گوں بیتگ کہ اِشی درگت ءَ واکدارانی نیمگ ءَ ھچ پئیم ءِ لیکہ دیما نئیتکگ۔

دومی نیمگ ءَ خاران دمگ ءَ چہ اھوال اَنت کہ گوستگیں روچ ءَ ناشناسیں مردماں واپڈا کالونی ءِ نزیک ءَ تیر گواری کُتگ ءُ اشفاق شاھوانی ء حاجی ثناہ اللہ شاھوانی کُشتگ وھدیکہ آئی برازتک ٹپی کُتگ۔

وئیل ءَ پد پولیس ءَ جون دزگپتگ ءُ نادراھجاہ ءَ بُرتگ، وھدیکہ وئیل ءِ پُشدر ءِ سوب زانگ نہ بیتگ اَنت۔

نبشتانک: بلوچ وت ءَ چہ مھر گڑھ ءَ بہ شوھاز ایت

دومی بھر

نبشتہ کار: ساجد بلوچ

دی بلوچستان پوسٹ

مھر گڑھ یک 9000 سال ءَ بِگر تاکہ 6000 سال ءَ آباد بیتگ ءُ اے مھر گڑھ ءِ اولی زمانگ بیتگ اے اولی زمانگ ءَ 3000 سال ءِ وھد جَت اے زمانگ ءِ تہ ءَ مردم نیم ھانہ بدوش بیتگ اَنت ءُ نیم مردماں کشت ءُ کِشاری کُتگ ھمے واست ءَ کوچّگانی ھستی دیم ءَ اتکگ اَنت اے راست اِنت کہ مردم ھما جاگہ ءَ نِند ایت وھدے کہ اود ءَ نا ایوک ءَ ورگ ءِ واست ءَ آپ بہ بیت بلکیں شیکار کنگ ءِ واست ءَ یک جنگلے ھم بہ بیت گڑا مردم کوچّگ جوڑ کنت ءُ وتی زند ءَ گْوازینگ ءِ جُھد ءَ کنت بلے اگاں اے آسراتی مہ بنت گڑا مردم ھانہ بدوش ءِ دْروشم ءَ دیگ ءَ جاھاں روت ءُ گیچین کنت۔

اے زمانگ ءَ بلوچاں وتی لوگ لیچ ءِ اڑ کُتگیں ھِشتانی سر ءَ بستگ اَنت ءُ ھما گِس کہ آیاں چت پِر نہ بیتگ آ وھد ءَ آیانی گِس کساس 6 یا 10 بیتگ اَنت ءُ لوگانی لمبر اے زاھر کنگ ءَ اَنت کہ آ وھد ءَ مردمانی آبادی سک کم بیتگ آ زمانگ ءَ دیگ ءَ چیزے اے بیتگ کہ لیچ ءِ سر ءَ مردماں لوگ بستگ ءُ ھمے لیچ ءِ تہ ءَ بوسہ ھم مان بیتگ اِدْ ءَ اے چیز پدّر بیت کہ آ اَھد ءَ بلوچاں گلّا ءُ جو کِشتگ پرچا کہ چہ گلّا ءُ جو ءَ بوسہ پیداک بیت۔

بازبراں من اے ونتگ کہ مچ بلوچستان ءِ تہ ءَ 7000 سال ءَ پیسر بیتگ اے دور ءَ گڑا مردماں مچ ءِ کِشگ ھم بندات کُتگ ءُ پد ءَ آیاں مچ ءِ ناہ ءُ جو ءِ بیپاری کُتگ پد ءَ مدان مدان ءَ آ زمانگ ءَ پُل، چاول، مکئی، ءُ آلو ھم دیم ءَ اتکگ اے گپ گْواچن اِنت کہ مھر گڑھ ءِ سیویلائیزیشن گلّا ءُ جو ءِ سبب ءَ دیم ءَ اتکگ ءُ بازیں دپترزانتاں گْوشتگ کہ گلّا ءُ جو ءِ پٹّگ آیانی مستریں کار بیت چمیشکا مرچی مئے سیویلائیزیشن زندگ اِنت۔

بلے اے گپ وتی مجگ ءَ دارگی اِنت کہ آ وھد ءَ باز کِشت ءُ کِشاری نہ بیتگ بلکیں سک کم بیتگ پرچا کہ آ باز مردم نہ بیتگ اَنت ءُ آیانی گِس ھم باز نہ بیتگ اَنت دیگ ءَ ھیالے آیانی مجگ ءَ اتکگ آ ایش اِنت کہ آیاں اے پھم اِتگ کہ اگاں آ جانوراں بہ دار اَنت گڑا آ گیشتر بنت تاکہ آیاں بازیں پائدگ بہ رس ایت آیاں جانورانی دارگ ءِ کار ھم کُتگ گڑا آیاں شیر، گْوشت، پوست، مشک، ھینزک، ءُ دیگ ءَ بازیں پائدگ رس اتگ وھدے کہ آیانی کِرّا ورگ باز بیتگ گڑا آ یک جاھے ءَ نشتگ اَنت ءُ وتی زند گْوازینتگ آیانی زند گیشتر اَرزان بیان بیتگ آیانی داشتگیں جانور بزاں پس، گوک، ھاتی، ءُ دیگ ءَ بازیں جانور بیتگ اَنت بلے شاہ مھمد مری ءِ کتاب ءِ ھساب ءَ آ وھد ءَ آسک، سوّر ءُ دیگ ءَ ڈولیں رستر ھم بیتگ۔

دیگ ءَ یک چیزے ءَ ما سرپد بہ بئیں کہ آ زمانگ ءَ جنیناں ھم یک مزنیں کردے بیتگ گْوشگ ءِ مُراد ایش اِنت کہ اولی رند ءَ جنیناں گلّا ءُ جو ماں جنگل ءَ پٹّ اتگ ءُ آ کِشت ءُ کِشاری ءِ وھد ءَ ھم گون بیتگ اَنت دیگ ءَ یک گپّے ایش اِنت کہ آ وھد ءَ مھر گڑھ ءِ بلوچاں جانور کا ءُ بوچ کُتگ اَنت گڑا آ کَے بیتگ اَنت آ کس نہ بیتگ اَنت آ بلوچ زالبول بیتگ اَنت مھر گڑھ سیویلائیزیشن ءِ دیم ءَ آروک ءُ پھازوک ھم بلوچ زالبول بیتگ اَنت اے گپّ ءَ کس چیر دات کُت نہ کنت کہ مئے زالبول مھر گڑھ ءَ بگر تاکہ روچ مروچی مئے ھیال ءَ کنگ ءَ اَنت۔

وھد ءِ گْوازگ ءَ پد مردمانی تہ ءَ زانت اتکگ ءُ پد ءَ آیانی آبادی ءُ ورگ ھم گیشاں چے گیش بیان بیتگ اَنت کِشت ءُ کِشاری ھم گیش بیان بوتگ گڑا آیاں دانانی جاگہ ءِ واست ءَ مزنیں جاگہ درکار بیتگ کِشگ ءِ واست ءَ یک مزنیں جاھے گیپتگ ءُ پد ءَ میزان میزان ءَ آیاں وتی کوئیں اوزار ھم نوکیں اوزارانی تہ مٹ کُتگ اَنت۔ نوکیں سِنگ ءِ اوزار دیم ءَ آرتگ ءُ آیاں آ اوزارانی تینز کنگ ءِ واست ءَ ھما ھاسیں سِنگ ھم شوھاز کُتگ اے سِنگ ءَ ما مرچیگیں زمانگ ءَ پہ کارچ ءِ تینز کنگ ءَ کارمرد کنگ ءَ ایں دْرستاں شرتریں سِنگ ھما بیتگ اَنت کہ آ گرّان ءُ تْرندیں سِنگ بیتگ اَنت۔

اے زمانگ ءَ مردماں اڑّ ءِ اوزار ھم اڑ کُتگ ءُ آیاں پس ءِ پُٹّانی سر ءَ گُد ھم اڑ کُتگ اے زمانگ ءَ اگاں مردم مُرتگ اَنت گڑا آیاں گُد از ءَ کپن ھم کار مرز کُتگ اَنت اے گپّ ءَ ھم یاد بہ کن اِت وھدے کہ مُردم مُرتگ اَنت گڑا مردماں ھمے مُرتگیں مردمانی گوماں آیانی مال ءُ مڈی ھم کَل کُتگ اَنت۔

ما باید ایں اے چیز ءَ سرپد بہ بئیں کہ ما سک کوئیں مردم ایں مئے کلچر سک کوئیں اِنت ما باید ایں وتی ھستی ءِ سر ءَ پَگرمند بہ بئیں ءُ پد ءَ مھر گڑھ دو ءَ ھم زوت نبشتہ کن آں تاکہ ما سرپد بہ بئیں کہ ما چہ کُجا اتکگ ایں ءُ چے ڈول ءَ اے دگنیا ءَ اتکگ ایں مُدام سلامت بات اِت ءُ بلوچ بات اِت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بیگواھیں بلوچ ایکٹویسٹ ءُ انسانی ھکانی باسک راشد حسین ءِ گْھار فریدہ بلوچ ءَ گْوشتگ کہ برات ءِ زند ءَ ماں ریاستی آزارجاھاں سک ھترہ اِنت، آئی ءَ دیم ءَ آرگ ءَ نہ اَنت- گمان بیت کہ برات ءَ تاوان دے اَنت-

فریدہ بلوچ ءَ گْوشتگ کہ آئی ءِ برات راشد حسین پاکستان ءَ آرگ ءَ پد ھما اِنت بیگواہ ءَ اِنت، برات سر ءَ دروگیں کیس جوڑ کنگ ءَ پد چہ متھدہ ارب امارات ءَ بے کانودی ءَ پاکستان ءَ آرگ بوتگ ءُ آئی ءَ آمیدگس پیش کنگ وتی جاہ ءَ آ یاگی یے نام داتگ- راشد حسین ءِ گْھار ءِ رِد ءَ راشد حسین شش ماہ تاں متھدہ ارب امارات ءَ بے کانودی ءَ آزارجاھاں بندیگ بوتگ- راشد حسین ءِ گْھار ءَ گْوشتگ کہ ھمے ایف آئی آر ءَ راشد نامدپ کتگ ءُ بیگواہ کتگ ھمے ایف آئی آر ءَ نامدپ دگہ یک مردمے عارف ء عبدلقادر کراچی بندیگجاہ ءَ کُشتگ-

فریدہ بلوچ ءَ گْوشتگ کہ برات سر ءَ ھچ وڑیں جرم پدر کنگ نہ بوتگ تُرس اِنت کہ آئی ءِ زند ءَ بندیگجاہ ءِ میانی ءَ تاوان دیگ بیت-

فریدہ بلوچ ءَ انسانی ھکانی ادارہ، سیاسی گلاں گوں دزبندی کتگ کہ آ راشد حسین ءِ یل کنائینگ ءِ ھاتر ءَ وتی کرد ءَ پیلو بہ کن اَنت-

زانگ بہ بیت راشد حسین 26 دسمبر 2018 ءَمتھدہ ارب امارات شارجہ ءَ اود ءِ چیریں ادارھاں سیادانی دیم ءَ چست کتگ ءُ ناشناسیں جاھے ءَ برتگ- متھدہ ارب امارات امیگریشن ءَ چہ رستگیں ھالانی رِد ءَ راشد حسین امارات بطین ایئرپورٹ ءَ چہ 22 جون 2019 ءَ یک ھاسیں جھازے سر ءَ بلوچستان ءِ دمگ نوشکی ءَ برتگ-

راشد حسین ءِ چہ امارات ءَ دزگیری ءُ پاکستان ءَ آرگ ءِ گپ پدری سی ٹی ڈی کراچی مستر عبداللہ شیخ ءَ 3 جولائی 2019 ءَ جتائیں ٹی وی چینلانی درگت ءَ کتگ بلے آ انگت دیم ءَ آرگ نہ بوتگ-

راشد حسین ءِ گْھار ءَ گْوشتگ کہ پاکستان ءَ آرگ ءَ پد ما وتی وکیل نیمگ ءَ چہ سندھ ءُ بلوچستان ھائی کورٹ ءَ پٹیشن نکش کتگ ءُ ریاستی ادارہ پیشی ءِ وھد ءَ برات ءِ دزگیری ءَ انکار اِش کتگ، مئے لوگانی سر ءَ اُرش کتگ ءُ کیس واتر زورگ ءِ بیھار داتگ اِت-

فریدہ بلوچ ءَ دیمتر ءَ گْوشتگ کہ ریاستی ادارھانی رویشگ ءُ کردار ءَ چہ پدر اِنت آ برات ءَ بے کانودی ءَ بندیگجاہ ءَ بند کنگ ءُ آئی ءَ تاوان دیگ لوٹ اَنت-

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ نوشکی ءَ شش جون سال دوھزار ءُ بیست ءُ دو ءَ دو شمبے ءِ روچ ءَ زورگیریں پوج ءَ بلوچ لبریشن آرمی ءِ بنجاھی اوتاک ءِ سر ءَ اُرش کنگ ءِ جھد کرتگ، دژمن ءِ دیم ءِ دارگ ءَ بی ایل اے ءِ دو تمردیں سرمچار شھید بوتگ اَنت ءُ وھدیکہ اے دراجکشیں میڑ ءَ دژمنیں پوج ءِ بازیں کارمندے مُرتگ اَنت –

جارکش ءِ رِد ءَ دو روچاں تاں اے میڑ برجاہ بوتگ ءُ میڑ ءِ بندات شش جون ءِ سھب ءَ نوشکی ءِ کوھی دمگ مخبلی ءَ ڈرون اُرش ءَ چہ بوتگ، چریشی ءَ پد جنگی بالگرداں سرجمیں دمگ ءَ کورکاؤ شیلنگ کرتگ ءُ کمانڈوز ایر کتگ انت – ڈرون اُرش ءَ بی ایل اے ءِ ترءُ گرد کنوکیں ٹولی ءِ دو تمردیں سنگت شھید سنگت شھزاد پنام ءِ ریحان ءُ شھید سنگت ندیم پنام ءِ سبزو نمیران بوتگ انت –

جئیند بلوچ ءَ گوشتگ کہ بی ایل اے ءِ ایندگہ سرمچاراں جوانیں جنگی رپک ءُ ھنراں بازیں جاہ ءَ سنگر بستگ ءُ دژمنیں پوج ءِ کمانڈوزانی سر ءَ اُرش کُتگ – چہ اے اُرشاں دژمن ءِ بازیں کمانڈوز ءِ مُرتگ ءُ زدگ بوتگ انت ءُ بلوچ سرمچاراں جنگ ءِ میدان ءَ دژمن تچگ ءُ رؤگ ءَ لاچار کُتگ –

درشان ءِ تہ ءَ گوشتگ بوتگ کہ شھید بوتگیں تمردیں سنگت شھزاد بادینی پنام ءِ ریھان ءِ سیادی چہ نوشکی ءَ بوتگ ءُ آئی ءَ سال ءِ بوتگ کہ بلوچ لبریشن آرمی ءَ گوں بندوک بوتگ – آ کرد شناس ءُ کربانی جزبگ ءَ سر ریچیں سرمچارے بوتگ-

وھدیکہ سرمچاریں سنگت شھید ندیم عبدالقادر پنام ءِ سبزو ءِ سیادی چہ ھاران ءِ دمگ کلان ءَ بوتگ – آئی ءَ دو سال بوتگ کہ سلاہ بندیں جھد ءِ تہ ءَ وتی پرز ءَ پیلو کنگ ءَ بوتگ – بلوچ لبریشن آرمی ءَ پیش شھیدیں سنگت ءَ دگہ گلے ءَ وتی پرز پیلو کتگ بوتگ – شھید ندیم دوسال ءَ دژمن ءِ زنداناں بندیگ ھم بوتگ ءُ ھر وڑیں درد اوپار کُتگ بلے ناکہ آئی ءَ راجی راز داتگ انت ءُ ناکہ راجی آجوئی ءِ جھد ءَ دزکش بوتگ آ مھکم ءُ نہ لرزوکیں گامان بلاھیں درورے بیتگ-

جارکش ءَ گوشتگ کہ ھردو سنگتاں بلوچ راجی آجوئی ءِ جھد ءِ تہ ءَ سک باز کار کتگ ءُ گڈی ساہ ءَ آجوئی سرڈگار ءِ بنگپ ءِ سر ءَ بوتگ انت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی شھیدیں سنگتاں دروت ندر کنت ءُ اے کول ءَ کنت کہ شھیدانی دیمھونی ھچبر شمشکار کنگ نہ بنت ءُ آھانی بیر بلوچ سرڈگار ءِ آجوئی دروشم ءَ گرگ بیت اِنت-