TBP Balochi

شال ءَ ناشناسیں سلاہ بندیں مردماں حبیب اللہ کول مائن کمپنی ءَ چار ملازم آوار جتگ ءُ برتگ-

سلاہ بندیں مردمانی دست ءَ آوار جنگ بیتگیں مردمانی تہ ءَ شیر بھادر، وقاص ءُ نھر ءِ سیادی پنجاپ ءَ اِنت مھران ءِ سیادی چہ ھیبر پکتوانواہ ءِ دمگ مردان ءَ اِنت – پولیس ءِ رد ءَ سلاہ بندیں مردمانی دست ءَ آوار جنگ بیتگیں مردمانی تہ ءَ کمپنی ءِ ملازمانی تہ ءَ دو مائننگ انجینئرز ھم ھوار اَنت-

اود ءَ پولیس ءَ آوار جنوکانی پَٹ ءُ پول بندات کرتگ ءُ داں انگت ءَ پولیس ءَ ھچ سرپدی نہ رس اِتگ-

شال پولیس انتزامیہ ءَ گشتگ کہ ڈنی ملازمانی آوار جنی گوستگیں روچ ءَ شال ءِ دمگ ھنہ پولیس تھانہ ءِ نزیک ءَ بیتگ کہ اود ءَ پولیس گیش پَٹ ءُ پول کنگ ءَ اِنت-

دمگی مردمانی رد ءَ گوستگیں شپ ءَ بیست ءَ یا بیست ءُ پنچ سلاہ بندیں مردم دمگ ءَ سر بیتگ اَنت ءُ مائن منیجر شیر بھادر ءِ لوگ ءَ مائن منیجر ءَ ھوار چار مردم اش آوار جتگ –

کراچی: بلوچ زھرشانی کنوکانی سر ءَ پولیس ءِ زوراکی چاگردی رسانکدراں ترندی ءَ ایر جنگ بیتگ

ٹی بی پی اھوال

سمی بلوچ، آمنہ بلوچ، مھلب بلوچ ءُ مھناز بلوچ ءَ ھوار کساس بیست ءُ ھشت مردین ءُ جنین گوستگیں شپ ءَ سندھ پولیس ءَ چہ سندھ اسمبلی ءِ دیم ءَ لَٹ ءُ کُٹ کنگ ءَ پد دزگیر کُتگ ءُ گوں وت بُرتگ اِت اَنت۔ دزگیر بیتگیں بلوچ زالبولانی سر ءَ نہ تھنا لَٹ ءُ کُٹ کنگ بیتگ بلکیں آھاں بدیں گپ ھم گُشگ بیتگ اَنت۔

گوستگیں روچ ءَ بلوچ یکجھتی کمیٹی کراچی ءِ مستر آمنہ بلوچ، وائس فار بلوچ مسنگ پرسنز ءِ ڈپٹی سیکریٹری سمی بلوچ ءُ دگہ مردمانی گوں سی ٹی ڈی پولیس ءَ نیاد بیگی بیتگ کہ آئی ءِ تہ ءَ بیگواھیں دودا الاھی ءُ گمشاد بلوچ ءِ بیگواھی ءُ آھانی دیم ءَ آرگ ءِ درگت ءَ اھوال کنگی بیتگ۔ بلے سی ٹی ڈی ءَ نہ تھنا گچین کُتگیں مردماں گوں دیوان کُتگ بلکیں گوں آیاں کُتگیں کرار ھم دروگیں بیتگ کہ نبشتھی دروشم ءَ داتگ اِش۔

سی ٹی ڈی ءِ پندل ءُ رپکاں پد یک رندے پد ءَ بلوچ زالبول، نودربر ءُ آھانی پجیگ ءَ ھواریں اھوالکار ءُ انسانی ھکانی باسک درست یک برے پد ءَ دیم پہ سندھ اسمبلی ءَ رھادگ بیتگ اَنت کہ ھمودا وتی زھرشانی بندات کُتگ اِش۔ زھرشانی کنوکانی سر ءَ سندھ پولیس ءَ زوراکی کنان ءَ زالبول ءُ مردین لَٹ ءُ کُٹ کُتگ اَنت بازینے ٹپی کُتگ ءُ یک ٹپی ءِ داں نادراھجاہ ءَ برگ کپتگ۔

وی بی ایم پی ءِ رھشون سمی بلوچ ءِ رد ءَ زھرشانی کنوکیں زالبولانی سرانی چادر کش اِتگ اَنت ءُ پاد شپاد پولیس وینانی تہ ءَ دور دیگ بیتگ اَنت آئی ءَ گُشتگ کہ مارا بدیں گپ گُشگ بیتگ اَنت۔ سمی بلوچ ءَ گُشتگ ما سندھ پولیس ءِ اے زوراکیں رویش ءَ ھچ بر بے ھیال نہ بہ ایں۔

بلوچ یکجھتی کمیٹی کراچی ءِ رھشونی کنوکیں آمنہ بلوچ ءِ رد ءَ سی ٹی ڈی ءَ گوں آھاں کرار کُتگ بیتگ بلے پد ءَ اے کرار دروگ ءَ ابید دگہ ھچ نہ بیتگ اَنت۔

ھمے پیم ءَ چاگردی رسانکدر ءَ مزن نامیں پاکستانی اھوالکار مبشر زیدی، حامد میر ءُ دگراں کراچی ءَ پولیس ءِ دست ءَ بلوچ زالبولانی دزگیری ایر جتگ ءُ گُشتگ کہ چہ مھلوک ءَ زھرشانی کنگ ءِ ھک پُلگ مہ بیت۔

دومی نیمگ ءَ چہ کراچی ءَ سیادی داروکیں اھوالکار فواد ھسن وت زھرشانی ھند ءَ جاڑیگ بیتگ ءُ اھوالکاری کنگ ءَ بیتگ کہ پولیس ءَ آ ھم دزگیر کُتگ۔ فواد ھسن ءَ وتی یک ھم کاری ءَ واٹسیپ کنان ءَ گُشتگ کہ من ھم دزگیر کنگ بیتگ اَنت۔ فواد ھسن ھم ایندگہ مردمانی پجیگ ءَ یل کنگ بیتگ۔

ھمے پیم ءَ انسانی ھکانی میان اُستمانی گل ایمنسٹی انٹرنیشل ءَ ھم بلوچ زھرشانی کنوکانی سرءَ سندھ پولیس ءِ اُرش ءُ آیانی دزگیری ایر جتگ ءُ گُشتگ کہ زھرشانی کنوک ءُ بیگواھیں مردم یل کنگ بہ بنت۔

بلوچ چاگردی رسانکدر کارمرز کنوکیں جھدکاراں ءُ اھوالکاراں ھم بلوچ زالبولانی دزگیری آیانی سر ءَ زوراکی ایر جتگ ءُ اِشی ءَ بلوچ دژمنی نامینتگ۔

ادا درستاں مستریں گپ اے دیم ءَ پیداک اِنت کہ سندھ پولیس ءُ سی ٹی ڈی بازیں زوراکی کنگ ءَ پد ھم لاچار بیتگ اَنت ءُ نہ تھنا زھرشانی کنوکیں مھلوک یل داتگ اَنت اِش بلکیں دودا الاھی ءُ گمشاد ھم دوشی یل کنگ بیتگ اَنت۔

بازیں چاگردی رسانکدر کارمرز کنوکیں مردم ھمے گُشگ ءَ اَنت کہ اگاں مردم وتی مردمانی بیگواھی ءِ درگت ءَ چہ اولی روچ ءَ جوانیں رنگے ءَ ترندیں توار چِست بہ کنت گُڑا الم آیانی مردمانی نہ تھنا زندمان رکینگ بیت کن اَنت بلکیں آھانی واتر بیگ ھم باوری بیت۔

بلوچستان ءَ ھوار دگہ جاھاں نندوکیں بلوچ گوستگیں روچ ءَ کراچی ءَ بلوچ زالبولانی گران کنگ ءُ آیانی برگ ءُ لَٹ شاپ کنگ ءَ گیشتر برانز گندگ ءَ آیگ ءَ اَنت بازیں پھنات پارلمینٹ ءَ نیشتگیں بلوچانی سر ءَ ھم ایراد گری کنگ ءَ اَنت باید آ اے وھد ءَ پارلیمنٹ ءَ چہ دزکَش بہ بنت-

ٹی بی پی کارست

ایرنیسٹو چی گویرا

حکیم بلوچ

ٹی بی پی بلوچی

ایرنیسٹو گویرا چاردہ جون 1928 ءَ ایرنیسٹو گویرا لِنچ ءُ سیلیا ڈی لا سیرنا وائے للوسا ءِ لوگ ءَ روساریو، ارجینٹینا ءَ ودی بیتگ۔ آ وتی مات ءُ پِت ءِ پنچیں چکانی تہ ءَ مستریں زھگ بیتگ۔

ایرنیسٹو گویرا چہ کسانی ءَ بزگیں مھلوکانی سر ءَ بیوکیں زوراکیانی سر ءَ بے تاھیر بیتگ، پمیشکا آئی ءِ پِت ءَ آئی ءِ اے بے تاھیری ءَ را آئی ءِ رگانی تہ ءَ تچوکیں آئرش ھونانی سوب گُشتگ۔ در کسانی ایرنیسٹو گویرا ءَ لِفٹ ءِ سیاست ءُ لٹریچر وانگ ءِ موہ چہ آئی ءِ لوگ ءَ رس اتگ پرچا کہ آئی ءِ کھول چہ لِفٹ ءَ نزیک بیتگ۔ آئی ءِ کماش اسپینش سول جنگ ءَ ریپبلکنزانی مزنیں کمکارے بیتگ، مدام وتی گِس ءَ بازیں جنگول جاہ داتگ اَنت اِش۔

چی گویر ءَ ساہ (asthma) ءِ بیماری ءَ بیگ ءَ ابید ھم، آئی ءَ جوانیں دروشمے ءَ فٹبال، گولف، اوژناگ ءَ ابید سائیکل ھم تاتکگ ءُ رگبی یونین ءِ پلیر ءِ ھم بیتگ۔ ایرنیسٹو ءَ 1953 ءَ وتی ڈاکٹری ءِ وانگ ھلاس کُتگ، آئی ءِ گیشتریں وھداں وتی موکل لاتینی امریکہ ءِ ملکانی تر ءُ تابانی تہ ءَ گوازینتگ اَنت۔ ھمے تر ءُ تابانی تہ ءَ ایرنیسٹو ءَ مھلوکے بزگی آیانی زندمان دیستگ ءُ آئی ءِ تہ ءَ مدام آشوب ءِ آس ءِ بلگ ءَ بیتگ۔

ایرنیسٹو گویرا کہ جھان آئی ءَ مروچی ڈاکٹر چی گویرا ءِ نام ءَ زانتگ آئی ءَ وتی آشوبی زندمان ءِ بندات 1953 ءَ ھما وھد ءَ کُتگ وھدے کہ گواتیمالا ءَ جیکب اربینز یک چاگردی آشوب ءِ آرگ ءِ جھد ءَ بیت اِنت۔ بلے 1954 ءَ امریکی چیریں گل سی آئی اے ءِ کمک ءَ گوں جیکب اربینز ءَ پروش دیگ بیت۔ اے ھما وھد بیت کہ ایرنیسٹو نی چی ءِ پنام ءَ زانگ بیت، جیکب ءِ پروش ءِ تہ ءَ امریکہ ءِ کرد ءِ گندگ ءَ پد چی ھمے سرپد بیت کہ جھان ءَ کجا ھم لِفٹ دیمروئی بکنت امریکہ آئی ءَ پروش دیگ ءِ ھاتر ءَ کجام ھم سیمسراں رؤت۔ اے ھما سوب بنت کہ چی ءَ جیڑگ پرمائنت کہ سوشلزم ءِ وڑ ءُ پئیماں ءَ گوں جھانی آشوب ءِ آرگ بہ بیت۔

چی گویرا گواتیمالا ءَ یل کنگ ءَ پد دیم پہ میکسیکو ءَ رؤت کہ اود ءَ آئی پجاروکی گوں فیڈل کاسترو ءُ آئی ءِ برات راؤل کاسترو ءَ گوں بیت اِنت۔ فیڈل ءُ راؤل کاسترو چہ کیوبا ءَ تتکگ ءُ میکسیکو ءَ سیاسی باھوٹی بنت۔ فیڈل کاسترو ھمے وھداں جھد ءَ بیت کہ فلگینکیو باٹیسٹہ ءِ ڈکٹیٹرشپ ءَ چوں ھلاس بہ کنت۔ (فیڈل کاسترو ءِ درگت ءَ دیمترے کارستانی تہ ءَ گیشتر گپ بیت) ایرنیسٹو گویرا گوں فیدل کاسترو ءُ راؤل کاسترو ءَ آیانی ٹوئینٹی سکستھ آف جولائی موومنٹ ھوار بیت۔ کہ اِشی ءِ تہ ءَ سرجم ءَ 81 مردم بھر زیر اَنت ءُ کیوبا ءِ اورینٹے پر گینگ 02 دسمبر 1956 ءَ ایر کپ اَنت۔ آیانی سر بیگ ءَ ھور باٹیسٹہ ءِ پوج سرپد بیت ءُ کساس درستیں مردماں کُش اَنت پشت کپوکانی تہ ءَ ٹپی ئیں چی گویرا ھم ھوار بیت کہ سئیرا میسٹرا ءَ سر بنت۔ پد ءَ ھمے جاہ آھانی چیرجنگی ءِ مھکمیں بُنزہ جوڑ بیت۔ چہ ھمدا باٹیسٹہ ءِ پوجے سر ءَ اُرشانی تہ ءَ سوبمندی ءِ سوب ءَ مردمانی تہ ءَ باوری ودی بیت ءُ گوریلا جنگولاں گیشتر توپک ءُ مھلوک ءِ ھمراھداری رس اِیت۔

اے گپ ءِ زانگ ھم المی اِنت کہ چی گویرا بندات ءَ اے جنگ ءِ تہ ءَ یک ڈاکٹر ئے ءِ رد ءَ گون بیت کہ ٹپی آں چار ایت ءُ آیانی الاج ءَ کنت۔ بلے چُش کہ چی گویرا ءَ توپکانی سرپدی ھم بیتگ، چی گویرا باز زِیت فیڈل کاسترو ءِ نزیکیں مردماں چہ یکے بیت ءُ گُش اَنت کہ برے برے چی گویرا ءَ وت ھم جنگ ءِ تہ ءَ بھر زرتگ ءُ باز برا چاریگانی کُشگ ءِ پرمان اِش ھم داتگ اَنت۔

ھشت جنوری 1959 ءَ فیڈل کاسترو ءِ آشوب سوبمند بیت ءُ باٹیسٹہ ءِ سرکار پروش وارت ءُ کیوبا ءَ مارکسسٹ سرکار ءِ جوڑ بیت۔ ھمے وھد ءَ چی گویرا ءَ کیوبا ءِ شھری نامینگ بیت۔ چی گویرا کیوبا ءِ بندیگ جاھانی تہ ءَ آشوب دژمنیں مردمانی سزا ءُ کوشانی زمہ وار بیت۔ چی گویرا بازیں ھنداں کیوبا ءِ لیکھانی درشان کنوکیں چیدگ جوڑ بیت ءُ رو برکتی ملکانی تہ ءَ آ وتی گھگیریں لیکہ ھاس کالیونیلزم ءُ نیوکالونیلزم ءِ بگیری ءُ آئی ءَ امریکہ ءِ پالیسیانی سر ءَ ترندیں ایرادانی سوب ءَ سک نامدار بیت اِنت۔

چی گویرا چُش کہ یک جھانی آشوبی ءِ رند ءَ بیت آئی ءِ ھیال چہ یک مُلکے ءِ یک دمگ ءُ یک براعظم ءَ باز دیم ءَ بنت۔ آئی ءِ ھیال یک سوشلسٹ ءِ جھان ءِ جوڑ کنگ بیت۔ اپریل 1965 ءَ پد چی گویرا چہ لس زند ءَ گار بیت ءُ داں دو سال ءَ کس نزانت آ کجا اِنت۔ رند ءَ زانگ بیت کہ آ گوں دگہ آشوبیانی پجیگ ءَ کانگو ءَ پٹریس لومومبا ءِ جنگولانی کمک ءَ رؤ انت، کہ آ اود ءَ یک لس جنگے کنگ ءَ بنت۔ زانتکارانی رد ءَ ءُ گوستانک ءِ منانک ءِ چارگ ءَ پد زانگ بیت کہ چی گویرا ءُ دگہ کیوبن آشوبیانی کانگو ءَ روگ یک بے سوبیں گام ءِ بیتگ۔ چی گویرا ھمے نیام ءَ وتی کیوبن سرکار ءِ اگدہ ءُ شھریت ءَ یل کنت۔

چی گویرا کانگو ءَ بے سوبی ءَ پد پیسر ءَ تنزانیہ ءُ پد ءَ پراگ ءِ یک پھاز اتگیں جاھے ءَ رؤت۔ سال 1966 ءَ چی گویرا ءَ وتی مَٹ کُتگیں دروشم ءَ گوں بولیویا ءَ سربیت کہ اود ءَ آ سنتا کروز ءَ یک آشوبی ٹولی ءِ جوڑ کنت ءُ آیانی سروکی ءَ کنگ ءَ بیت۔ بنداتی لھتے سوبمندیں اُرشاں پد چی گویرا ءُ آئی ءِ ٹولی مدام بولیویا ءِ پوج ءِ نشانگ ءَ بنت۔ 08 اکتوبر 1967 ءَ بولیویا ءِ پوج ءِ ھاسیں ٹولی گوں امریکہ ءِ سی آئی اے کمک ءَ گوں کساس سرجمیں آشوبیاں ھلاس کن اَنت۔ ڈاکٹر چی گویرا وت ٹپی ئیں جاورانی تہ ءَ دزگیر کنگ ءُ کُشگ بیت۔

ڈاکٹر چی گویرا ءِ کوش ءَ پد آئی ءِ دست بُرگ بنت ءُ آئی ءِ سرجمیں جون چیروکائی کل کنگ بیت۔ 1997 ءَ پولکار چی گویرا ءُ آئی ھمراھیں آشوبیانی مانشجاھاں درگیج اَنت ءُ آیانی پشت کپتگیں ھڈ پد ءَ کیوبا ءَ دیم دیگ بنت کہ اود ءَ آھاں گون ستاشانی سنتا کلارہ ءَ جاہ دیگ بیت اِنت۔

ڈاکٹر چی گویرا ءِ سرجمیں زندمان ءُ داں آئی ءِ کوش سرجم ءَ آشوب ءُ چاگردی بدلیانی جھد ءِ تہ ءَ گوستگ۔ آئی زند ءِ مستریں لوٹ ھمیش بیتگ کہ جھان ءِ تہ ءَ ھمک مھلوک ءِ ھاترا یکیں کانود یکیں رھبند یکیں انساپ بہ بیت۔ مروچی ھم جھان ءَ کجام ھم جاہ ءَ اگاں کس آشوب ءَ گوں آشنا اِنت آ الم چی گویرا ءَ زانت۔ کس اگاں جنگ کنگ ءَ اِنت آ الم چی گویرا ءَ زانت۔ پرچا کہ چی ءَ وت گُشتگ داں گُڈی سوب ءَ مدام جھد کنگی اِنت۔

دلگوش: ٹی بی پی کارستانی درگت ءَ سرپدی ءُ اھوال چہ انٹرنیٹ ءُ دگہ جاھاں زیرگ بیتگ اَنت ءُ اِشانی تہ ءَ ردی اگاں گیشی ءُ کمی الم بیت کن اَنت-

شال، کیش ءُ خضدار ءَ پاکستانی لشکریانی سرءَ اُرشانی تہءَ پاکستانی لشکریاں جانی ءُ مالی تاوان ءِ دیمپانی کنگ کپتگ۔

بلوچستان ءِ مزن شھر شال ءِ ھنکین ولی تنگی ڈیم ءِ ھند ءَ گوستگیں شپ ءَ سلاہ بندیں مردماں پاکستانی لشکر ءِ سرءَ اُرش کُتگ۔

اھوالانی ردءَ اُرش کاراں مزنیں کساس ءَ جتا جتائیں سلاھاں سے بنجل ءِ سرءَ اُرش کُتگ کہ اِشی آسر ءَ لشکریاں جانی تاوان رسگ ءِ ھال اِنت بلے چہ واکدارانی نیمگ ءَ اے درگت ھچ پئیمیں گپ بنشون دیما نئیتکگ۔

اُرش ءَ پد ھیلی کاپٹر ھمے ھند ءَ سر بیتگ اَنت کہ اشاں ھمے دمگانی تہءَ بیڑ بندات کُتگ۔ اھوالاں ٹی بی پی گُشتگ کہ ھیلی کاپٹرانی شیلنگ ءُ بمب گواریانی سوب ءَ ھندی لس مھلوکاں جانی ءُ مالی تاوان چِست کنگ کپتگ۔

اُرش ءِ زمہ واری داں انگت ھچ گل ءَ نہ زرتگ بلے یک ماھے پیسر ھمے ھند ءَ لشکریانی سرءَ اُرش کنگ بیتگ اَت کہ آئی زمہ واری بلوچ لبریشن آرمی ءَ من اِتگ اَت۔

ھمے پئیم ءَ گوستگیں شپ ءَ خضدار ءَ چمروک ءِ ھند ءَ ھم ناشناسیں مردماں پاکستانی لشکری ایف سی ءِ کارمندانی سرءَ دستی بمب ءَ گوں اُرش کُتگ ءُ تتکگ اَنت۔

داں انگت اے درگت ءَ واکدارانی نیمگ ءَ ھچ پئیمیں اھوال شنگ کنگ نہ بیتگ۔

بلوچستان لبریشن فرنٹ ءَ ایرانی سِیمسر ءَ گوں ھمگرنچیں کیچ ءِ ھند ءُ جاہ مند نیلگ کوہ ءَ پاکستانی لشکر ءِ سر ءَ اُرش ءَ یک کارمندے ءِ کُشگ ءِ زِمہ واری منّ اِتگ۔

بی ایل ایف ءِ جارکشّ میجر گْوھرام بلوچ ءَ گْوشتگ کہ گْوستگیں روچ دوشمبے ءِ ساھت بیگاہ ءِ ھپت ءَ گل ءِ پُرکار ءُ چاڑیگیں سرمچاراں ایرانی سِیمسر ءَ گوں ھمگرنچیں بلوچستان ءِ دمگ کیچ ءِ تھسیل مند ءِ ھند نیلگ کوہ ءِ جاہ ءَ سِیمسری ٹٹ جوڑ کنوکیں پاکستانی لشکر ءِ سر ءَ اسنائپر ءَ گوں اُرش کُرتگ۔

اُرش ءِ آسر ءَ لشکر ءِ یک کارمندے ھما جاہ ءَ مُرتگ۔

وتی درشان ءِ گُڈّی ءَ گْوھرام بلوچ ءَ گْوشتگ کہ من اے اُرش ءِ زِمہ واری ءَ منّاں ءُ دانکہ بلوچستان ءِ آجوئی ءَ زورگِریں پاکستانی لشکر ءِ سر ءَ بلوچستان ءَ ھوار پاکستان ءَ اے دابیں اُرش برجاہ بَہ اَنت-

سربیتگیں ھالانی رِد ءَ سندھ ءِ مزن شھر کراچی ءِ دمگ مسکن چورنگی ءَ ھپت جون ءَ پاکستانی پوج ءُ سی ٹی ڈی ءِ دست ءَ زورانسری آوار جنگ بوتگیں کراچی شھدربرجاہ ءِ دو نودربر یل بوتگ ءُ وتی گِساں سر بوتگ انت –

زورانسری آوار جنگ بوتگیں ھردو نودربرانی کھولاں دودا الھی ءُ گمشاد مُرید ءِ یل بوگ ےِ ھال راست کُتگ ءُ گشتگ کہ ما چہ بلوچ راج ءُ نودربر ءُ بیگواھیں مردمانی کھول، بلوچ یکجھتی کمیٹی ءُ سوشل میڈیا ایکٹوسٹ ءُ ھر تک ءُ پھناتاں سیادی داروکیں مردمانی منت ءَ گریں کہ آھاں مئے دوستیگیں مردمانی ھاتر ءَ توار چست کُتگ ءُ گوں ما ھمراہ داری کتگ – ھمے امیت ءَ داریں کہ ھنچو کہ بلوچ راج ءَ گوما ھمراہ داری آھانی یل کنگ ءَ گوما ھمکوپگ بوتگ انت ایندگہ بیگواھیں مردمانی کھولانی ھم ھمے وڑ ھمراھداری کن انت ءُ آھانی دوستیگیں مردمانی یل کنائینگ ءَ گوں آھاں ھم کوپگ بنت – تانکہ آھانی دوستیگین مردم وش ءُ سلامتی یل بہ بنت ءُ وتی گِس ءَ سر بہ بنت –

زانگ بہ بیت دودا الھی ءُ گمشاد مُرید ھپت جون چہ کراچی مسکن چورنگی ءَ وتی گِس ءَ آوار جنگ ءُ بیگواہ کنگ بوتگ انت – آھانی بیگواھی ءِ پژدر ءَ کراچی پریس کلب ءِ دیم ءَ زھرشانی بنجل ءِ ھم جنگ بوتگ ءُ کراچی ءُ تربت ءَ زھرشانی ھم روانک ھم کشگ بوتگ اَنت –

پنجگور ءَ پوج ءِ دست ءَ دو براتانی زورانسری آوار جنی ءِ بگیری ءَ دمگی مردماں زھرشانی کتگ ءُ سی پیک دگ بند کرتگ –

پنجگور شاھو کھن ءَ پوج ءِ دست ءَ دو براتانی زورانسری آوار جنی ءِ بگیری ءَ سی پیک دگ ءِ سر ءَ نندانک جنگ بوتگ چریشی ءَ سی پیک دگ سرجمیں بند بوتگ ءُ ھردو نیمگاں گاڑیانی لین لگتگ – زھرشانی کنوکاں لوٹ کتگ گوشتگ سیاسی پاٹی ءُ سوبائی سرکار آھانی دوستیگیں مردماں وش سلامتی یل بہ کنائینگ ءَ وتی کرد ءَ پیلو بہ کن انت –

زھرشانی کنوکانی رِد ءَ پنجگور شاھو کہن ءِ جھمنندیں دو برات شرافت ءُ ارشاد ء ملا عوض پرندوشی پاکستان ءِ پھازگی لشکر ءَ چہ جند ءِ گِس ءَ زورانسری آوار جتگ ءُ بیگواہ کتگ انت – پدا رند ءَ آھانی ھچ وڈیں ھال اھوال نیست – زورانسری آوار جنگ بوتگیں مردمانی کھول ءَ مروچی نیمروچ ءِ ادار سَے ءَ سی پیک دگ بند کتگ نندانک جتگ ءُ زھرشانی برجاہ داشتگ –

بیگواھیں مردمانی کھول ءَ پنجگور ءِ سیاسی ءُ چاگردی گل ءُ سول سوسائیٹی ءَ چہ لوٹ کتگ گوشتگ کہ آ سی پیک شھدگ ءِ سر ءَ بیا انت ءُ زھرشانی ءَ بھر بہ زور انت آھانی دوستیگیں مردمانی یل کنائینگ ءَ آھانی توار جوڈ بہ بنت –

ھمے ماہ ءَ زورانسری آوار جنگ بوتگیں مردمانی کچ پانزدہ ءَ سر بوتگ انت اشی ءَ پیش کراچی ءُ بلوچستانءَ سینزدہ مردم زورانسری آوار جنگ ءُ بیگواہ کنگ بوتگ انت –

بلوچ ورناھانی زورانسری آوار جنی ءِ تہ ءَ گیشی آھگ ءَ انت کہ پنچ مردم چہ کراچی، سے آواران ءُ چار کیچ ءَ یکے چہ ھزدار ءَ آوار جنگ ءُ بیگواہ کنگ بوتگ انت – کراچی ءَ آوار جنگ بوتگیں سَے نودربرانی تہ ءَ شاداد بلوچ، دودا الھی ءُ گمشاد بلوچ ھوار انت –

کراچی شھدربر جاہ ءِ نودربرانی زورانسری آوار جنی ءِ بگیری ءَ آدینگ ءِ روچ ءَ کراچی پریس کلب ءِ دیم ءَ زھرشانی بنجل ءِ اڈ دیگ بوتگ کہ مروچی ھم برجاہ بوتگ –