TBP Balochi

بلوچستان لبریشن فرنٹ ءِ جارکشّ میجر گْوھرام بلوچ ءَ مشکے ءَ موبائل ٹاور، ریاستی چاریگ ءِ کوش ءُ تمپ ءِ پوجی بُنجل ءِ سر ءَ اُرش ءِ زِمہ واری منّ اِتگ ۔

بی ایل ایف ءِ جارکشّ میجر گْوھرام بلوچ ءَ گْوشتگ کہ آواران ءِ دمگ مشکے ءِ ھند  گجلی ءَ بیست ءُ یک جُلکان (جون ) ءَ ساھت پنچ ءَ سرمچاراں یوفون شِرکت ءِ  موبائل فون ءِ ٹاور گوں راکٹاں نِشانگ کُرتگ ءُ آئی ءِ سرجمیں مشینری مانداشتگ اَنت۔

جارکشّ میجر گْوھرام بلوچ ءَ اے ھم گْوشتگ کہ چار روچ ءَ پیسر مشکے ءِ ھند تنک ءَ ریاستی چاریگ ءُ کُشندہ ٹولی ءِ کارمند نذیر ء ھُزور بکش سرمچاراں دزگیر کُتگ۔ چہ جُست ءُ پُرس ءَ پد آئی ءَ ریاست ءِ پشت پناھی ءَ وتی تیوگیں جُرم ءُ سِلکاری منّ اِتگ اَنت۔ ریاست ءِ ایجنٹ بازیں چاگِردی سِلکاریاں ھوار ءُ جتا جتائیں پوجی آپریشناں زُورگِریں لشکر ءِ ھمراہ بوتگ۔ پیسر ءَ اِیشی ءَ چہ تنک ءَ نیزگاریں زالبُولے آوار جتگ۔ اے جُرمانی منّگ ءَ پد دُژمِنیں ریاست ءِ چاریگ مرگ ءِ سِزا داتگ۔

بلوچستان لبریشن فرنٹ ءِ جارکشّ میجر گْوھرام بلوچ ءَ دیمتِر ءَ اے ھم گْوشتگ کہ مرچی کیچ ءِ دمگ تمپ ءِ ھند ملانٹ ءَ برجاھیں پوجی بُنجل ءِ سر ءَ سرمچاراں دو مارٹرگولہ آس داتگ کہ آ پوجی بُنجل ءِ تہ ءَ کپتگ اَنت ءُ چریشی ءَ دُژمِنیں  لشکر ءَ را بازیں جانی ءُ مالی تاوانے رس اتگ۔

جارکشّ میجر گْوھرام بلوچ ءَ گُڈّی ءَ اے ھم گْوشتگ کہ زُورگِریں لشکر ءُ آئی ءِ کُمکّارانی سر ءَ اُرش دانکہ زُورگِپتیں بلوچستان ءِ آجوئی ءَ برجاہ بَہ اَنت۔

ورنائیں سیاسی باسکانی نام ءَ بھگت سنگھ ءِ نمدی

رجانک: حکیم بلوچ

دی بلوچستان پوسٹ

(ورنائیں سیاسی باسکانی نام ءَ بھگت سنگھ ءِ نمدی ءِ بھر اِنت کہ 2 فروری 1931 ءَ نبشتہ کنگ بیتگ-)

شما “آشوب زندگ بات” ءِ اوگام ءَ جن اِت۔ من واھگ داراں کہ شمارا زانگ بیت کہ اے اوگام ءِ بزانت چی اِنت۔ مئے رد ءَ آشوب ءِ بزانت اے چاگردی بنکی رھبندانی اونڈالاں گوجگ ءُ سوشلسٹ رھبند ءِ آرگ اِنت۔ اے رد ءَ مئے اولی لوٹ تاکت ءِ دزگرگ اِنت۔ راستی ءَ ڈیھہ ءُ سرکاری مشینری، ھاکمی کنوکیں تک ءِ سَلاہ اَنت کہ اِشانی کارمرز کنگ ءَ گوں آ وتی لوٹانی پھریزگ ءَ کن اَنت۔ مارا اے سلاہ پچ گرگی اِنت ءُ وتی لوٹانی دزگرگ ءِ ھاتر ءَ کارمرز کنگی اِنت کہ آ مارکسی لیکھانی رد ءَ یک نوکیں چاگردے ئِے ٹھینگ اِنت۔ ءُ ھمے لوٹانی پد ءَ ما سرکاری مشینری ءِ بگیری ءَ جنگ کنگ ءَ اِنت۔ اِشی ءَ ھوار ھوار مارا لس مھلوک زانشتی رد ءَ سر سوج کنگی اَنت کہ اے آیانی پجیگ ءَ جُنز ءَ ھوار بیگ ءَ گوں گھتریں وڑے ءَ بیت کن اَنت۔

کجام ھم آشوبی پاٹی ءِ ھاتر ءَ یک مھکمیں کِشک ءُ دیوانے ءِ بیگ المی اِنت۔ شمارا زانگ لوٹ ایت کہ آشوب ءِ بزانت گامگیجی جھد اِنت۔ اِشی ءِ بزانت ساچستی رد ءَ ءُ مھکمیں وڑے ءَ کار کنان ءَ مٹ (بدلی) آرگ اِنت، ناکہ ابید مھکمین ءُ اناگتی مٹ (بدلی) یا اگاں پُرشت ءُ پروش۔ ءُ (آشوبی) دیوان اڈ دیگ ءِ ھاتر ءَ جھل ءَ نبشتگیں گپانی درگت ءَ زانت بیگ المی ءُ اژدری اِنت۔

1. گُڈی (مستریں) لوٹ
2. اے درگت ءَ زانت بیگ کہ کار چہ کج ءَ بندات کنگی اِنت، بزاں کہ جاورھالانی سر ءَ چمشانک دیگ
3. کارکنگ ءِ وڑ ءُ پیم ءُ گامگیج دانکہ اے سئیں گپانی سر ءَ سرجم ءَ چمشانک دیگ مہ بیت داں ھما وھد ءَ ھچ پئیمیں دیوان اڈ دیگ بیت کُت نہ کنت۔ ما یک سوشلسٹ آشوبے ءِ واھگ دار اِنت کہ آ یک سیاسی آشوبی ءَ ابید باوری نہ اِنت۔ سیاسی آشوب ءِ بزانت چہ انگریزانی گور ءَ سرکار (ریاست) ءِ پچگرگ ءُ ھندوستانیانی دست ءَ دیگ نہ اِنت، بلکیں داں ھما ھندوستانیاں ھاکمی سر کنگی اِنت کہ آ داں گُڈی منزل ءَ مئے گون ءَ اوشتاتگ اَنت، دومی لبزانی تہ ءَ لس مھلوک ءِ ھمراھداری ءَ گوں آشوبی پاٹی داں تاکت سر کنگ اِنت۔ آیوکیں راستیں گام سوشلسٹ رھبندانی سر ءَ چاگرد ءِ اڈ کنگ بیت اِنت۔ اگاں شما چُشیں آشوب ءِ ھمراہ دار بیت نہ کن ئے گُڑ ءَ چہ شما دزبندی اِنت کہ “آشوب زندگ بات” ءِ اوگام ءَ بند بہ کن اِت۔ آشوب ءِ لبز مئے ھاتر ءَ باز گچین اِنت ءُ اِشی ءَ رزوا بیگ ءَ دست نہ کنیں۔ بلے اگاں شما راجی آشوب لوٹ اِت ءُ شمئے جھد ءِ لوٹ امریکہ ءِ پئیمیں جمھوری ھندوستان ءِ اڈ کنگ اِنت گُڑ ءَ دزبندی اِنت کہ اے بگش اِت کہ کجام تاکتانی سر ءَ باور کنان ءَ شما اے آشوب ءَ آرگ لوٹ اِت؟ (آشوب تُری) راجی بہ بیت اگاں سوشلسٹ اے ڈبہ ءَ تھنا دھکان ءُ پوریا گر سرجم کُت کن اَنت۔ اگاں شما ( تھنا راجی بنیادانی سر ءَ) دھکان ءُ پوریاگرانی ھمراھداری ءَ گرگ لوٹ اِت گُڑ ءَ بزان اِت کہ آ جزباتی گپاں گوں رد دیگ نہ بنت۔ آ چہ شما جُست کن اَنت کہ: کہ ھما آشوب ءِ ھاتر ءَ شما چہ آھاں دیمھونی ءِ لوٹ کنگ ءَ اِت آھاں چی دات کنت ؟ شما آھاں وتی لوٹانی ھاتر ءَ کارمرز کُت نہ کن اِت بلکیں شمارا آیاں باوری دیگی اِنت کہ آشوب آھانی اِنت ءُ ھمایانی مُزانی ھاتر ءَ اِنت۔ پرولتاریہ ءِ ھاتر ءَ پرولتاریہ آشوب۔

گُڈی لوٹ ءِ پدر کنگ ءَ پد شما، وتی تاکتاں سنچی گامگیج ءِ ھاتر ءَ مھکم کُت کن اِت۔ نی شمارا دو المی ءِ کشکاں چہ گوزگی اِنت، اولی وت ءَ ساڑی کنگ ءُ دومی گامگیج زیرگ۔ ھستیں جُنز ءِ ھلاس بیگ ءَ پد شما ایمانداریں آشوبیانی تہ ءَ بے باوری ءُ دلپروشی گندگ ءَ کیت۔ بلے تُرسگ نہ لوٹ ایت۔ جزباتی بوگ ءَ یک کِر کن اِت۔ راستی ءِ دیمپانی کنگ ءِ ھاتر ءَ ساڑی بہ بئیت۔ آشوب یک گرانیں کارے۔ اے کجام ھم (تھنائیں) مردم ءِ کار نہ اِنت۔ نا کہ پہ اِشی ءَ یک رمسے دیگ بیت کنت۔ بلکیں آشوب ھاسیں زرکاری ءُ چاگردی جاورانی تہ ءَ ودی بنت۔مھکمیں پاٹی ءِ بُنکی کار چُشیں جاورانی سوب ودی بیتگیں وھداں چہ مُز چِست کنت۔ آشوب ءِ ھاتر ءَ لس مھلوک ءَ ساڑی کنگ گرانیں کارے، ءُ اے کار چہ آشوبیاں دیمھونیانی لوٹ ءَ کنت۔ ادا یک گپے پدر کنگ لوٹاں کہ اگاں شما چہ باپار ءَ بندوکیں مردم اَنت یا اگاں ھمک روچی کار ءُ کھول ءَ گوں دزگٹیں مردم اَنت گُڑ ءَ دزبندی اِنت کہ گوں اے آس ءَ گوازی مہ کن اِت۔ یک رھشونی ءِ رد ءَ تو پہ پاٹی ءَ ھچ کارمند نہ ئے۔ مئے گورا پیسر ءَ چہ بیگاھاں پہ وھد گوازینگ ءَ تران کنوکیں رھشونانی مزنیں کساسے ھست کہ بیکار اَنت۔ مارا لینن ءِ گالانی تہ ءَ “پیشہ ور آشوبی” لوٹ اَنت، درستیں وھد ءَ کارکنوکیں انچیں باسک کہ آھانی زند ءِ لوٹ آشوب ءَ ابید دگہ ھچ مہ بیت۔ چُشیں آشوبی باسک پاٹی ءِ تہ ءَ ھمینچو گیشتر کساس ءَ مھکم بنت سوبمندی ءِ گمان ھمینچو گیشتر بیت اِنت۔

مھکمیں رنگے ءَ دیمروئی ءِ ھاتر ءَ انچیں پاٹی ءِ لوٹ اِنت کہ آئی ءِ تہ ءَ انچیں باسک بہ بنت کہ بُرز ءَ گپ کنگ بیتگ، چہ لیکہ ءَ چکار بہ بنت ءُ جاورانی رد ءَ شریں پیسلہ کنگ ءِ لائک بہ بنت۔ پاٹی تچکیں رھبندی بہ بیت ءُ المی نہ اِنت کہ پاٹی تھنا چیروکائی کار بہ کنت، بلکیں اِشی ءَ ابید جتاجتائیں جاورانی تہ ءَ جتا جتائیں دروشماں کار کُت بہ کنت۔ پاٹی ءَ ھما باسکانی لوٹ اِنت آ تھنا ورنایانی جُنزانی دروشم ءَ زیرگ بیت کُت کن اَنت۔ پمیشکا مارا ورنایانی جُنز وتی دیوانانی بندات ءِ پئیم ءَ چارگ لوٹ اَنت۔ ورنایانی جُنزانی تہ ءَ اسٹدی سرکلز، مکتبانی تہ ءَ لیکچرز اڈ دیگ بہ بنت ءُ پنتاک، ماھتاک ءُ تاکبند چاپ ءُ شنگ کنگ بہ بنت۔ سیاسی باسکانی ھوار گیجگ ءُ ساڑی کنگ ءِ اے گھتریں دروشم اِنت۔ اے بنکی سر ءَ کہ اِشانی درگت ءَ بُرز ءَ گپ بیتگ پاٹی ءَ وتی کار دیم ءَ برگ لوٹ اَنت۔ یکشلیں دیوان ءُ نیاد دارگ ءَ گوں باسکانی درستیں سرھالانی سر ءَ سرسوجی کنگ بہ بیت۔ اگاں شما اے بنکیانی سر ءَ کار کنگ بندات کن اِت گُڑ ءَ شمارا اوپار ھم کنگ لوٹ ایت۔ اے کار ءِ سرجم بیگ کساس بیست سال ءِ وھد پکار اِنت۔ اِے لوٹانی ھاتر ءَ جزباتیت اگاں ھون ریچی ءَ ابید وشنودی ءَ گوں کُتگیں جھد، دیمروئی ءُ دیمھونی لوٹ ایت۔ چہ درستاں پیسر وتی جند ءُ وتی زند ءِ درگت دستگیں واباں چہ آجو بیگی اِنت۔

چہ اِشاں ءَ پد کار بندات کنگ بہ بیت۔ شمارا یک دم سستیں گاماں گوں دیمروئی کنگی اِنت پہ اِشی ءِ ھاتر ءَ ھاٹیگ ءُ مھکمیں جزبگانی لوٹ اَنت۔ گرانی ءُ نگیگیں جاور شمارا دلپروش مہ کن اَنت۔ نانکہ بے سوبی ءُ راجدروھیانی سوب ءَ دلپروش بہ بہ بیت۔ ھمینچو سکیانی دیمپانی کنگ بہ کپ ایت، شمئے اندر ءِ آشوب مرگ ءَ نیلگی اِنت۔ بے سوبی ءُ سوبمندیانی اے چکاساں گوزگ ءَ پد شما سوبمند بہ اِت، ءُ شمئے جند ءِ سوبمندی آشوب ءِ جوانتریں بھر زانگ بیت اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ کیچ ءَ ناشناسیں سلاہ بندیں مردماں پاکستانی لشکریانی سرءَ اُرش کُتگ۔ وئیل گوستگیں شپ ءَ دیما اتکگ وھدیکہ ارشکار تچگ ءَ سوبمند بیتگ اَنت۔

اھوالانی ردءَ گوستگیں شپ ءَ ادار دھ ءَ پد ناشناسیں مردماں تمپ ءِ ھند پُل آباد ءَ لشکری بُنجل ءِ سرءَ اُرش کُتگ۔

ھندی اھوالانی ردءَ ناشناسیں مردماں اُرش کُتگ ءُ لشکری تاوان بار کُتگ اَنت۔ اُرش ءَ پد گیشتر لشکری ھند ءَ سربیتگ اَنت بلے اُرش کار تتکگ اَنت۔

واکدارانی نیمگ ءَ داں انگت اے درگت ءَ ھچ پئیمیں درشان دیما نئیتکگ۔ ھمے ھندانی تہءَ چدو پیسر بلوچ سلاہ بندیں آجوئی لوٹوکیں گلانی نیمگ ءَ جتا جتاھیں اُرشانی تہءَ لشکری نشانگ کنگ بیتگ اَنت۔

پاکستانی پوج ءِ دست ءَ زورانسری آوار جنگ بوتگیں سَے مردم علی ء بخشی، اسرار ء انور عمر ءُ نواز علی ء ناصر یل بوتگ ءُ وتی گِساں سر بوتگ انت- یل بوتگیں مردم ماہ ءَ ساری پاکستانی پوج ءَ آوار جتگ ءُ بیگواہ کتگ انت کہ آھانی آوار جنی ءِ ھبر بلوچ یکجھتی کمیٹی ءِ رھشون آمنہ بلوچ راست کتگ بوتگ –

آمنہ بلوچ ءِ رِد ءَ آھانی تہ ءَ عمران ء محمد حنیف ماری پور ءِ دمگ دلپل آباد ءُ سعید احمد ء محمد عمر چہ ملیر ءُ نوربخش ء حبیب کراچی ءِ دمگ رئیس گوٹ پوج ءُ سی ٹی ڈی ءِ کارمنداں آوار جتگ انت –

ھمے سال ءَ کراچی ءَ بلوچ جھمنندیں دمگاں بازیں مردمے آوار جنگ ءُ بیگواہ کنگ بوتگ انت کہ آھانی تہ ءَ لھتے پد ءَ رند ءَ یل بوتگ وھدیکہ بازینے انگت گار ءُ بیگواہ انت –

اے درگت ءَ آمنہ بلوچ ءِ گوشگ انت کہ اے وھدی بازیں بیگناھیں مردم سی ٹی ڈی ءُ وفاقی ادارھانی زنداناں بندیگ انت، بیگواھیں مردمانی کھول کانود ءُ رھبندانی رِد ءَ زورانسری آوار جنگ بوتگیں مردمانی ھاتر ءَ زرمبشت ءِ چلائینگ انت، سرکار ءُ آئی ءِ ادارہ کانودانی پلامرزی ءَ بہ کن انت ءُ بیگواھیں مردماں آمیدگساں پیش بہ کن انت –

آمنہ بلوچ ءُ ایندگہ مردماں بیگواھیں مردمانی یل کنگ ءِ لوٹ کتگ ءُ گوشتگ کہ متحدہ عرب امارات ءِ واکدارانی نیمگ ءَ پاکستان ءِ دست ءَ دیگ بوتگیں دو بلوچ ایکٹویسٹ راشد حسین بلوچ ءُ حفیظ زھری زاھر کنگ بہ بنت ھردو بیگواھیں بلوچیں باسکانی زند ھترہ ءِ تہ ءَ انت –

زانگ بہ بیت بلوچستان ءَ زورانسری آوار جنگ بوتگیں مردمانی تہ ءَ بازیں مردمے یل بوتگ بلے پدا ھم دومی نیمگ ءَ زورانسری آوار جنیانی درچ یکشل ءَ برجاہ انت چریشی سوب ءَ بیگواھیں مردمانی ھاتر ءَ توار چست کنوکیں گل اے درگت ءَ دلجم نہ انت –

آمنہ بلوچ ءَ پدردی درشان اتگ ءُ گوشتگ کہ نودربر رھشون زاھد بلوچ، شبیر بلوچ، زاکر مجید بلوچ ءُ ڈاکٹر دین محمد بلوچ ءَ ھوار بیگواھیں مردمانی زورانسری آوار جنی ءَ بازیں وھدے پرگوستگ بلے ھنگت آ بیگواہ انت آھانی یل کنگے ما لوٹ ءَ کنیں –

بلوچستان ءِ تیاب دپی شھر گوادر ءَ ھک دے تھریک ءِ سروک مولانا ھدایت الرحمان بلوچ، حسین واڈیلہ ءَ دمگی دریاوردانی ھمراھی ءَ آدینگ ءِ روچ ءَ پاکستانی وزیراعظم شھباز شریف ءِ گوادر ءِ تر ءُ تاب ءِ درگت ءِ سر ءَ زھرشانی ءِ جار جتگ ءُ گْوشتگ کہ گوادر پورٹ ءِ دیم ءَ وزیراعظم ءِ گھگیری وش آتک کنگ بیت-

آیاں گْوشتگ کہ ما اشاں گْوشگ لوٹ ایں کہ اد ءِ مردم چہ ترا وش نہ اَنت-

آیانی گْوشگ اِنت کہ ھزارانی ماتانی تاسپیں بچّ بیگواہ اَنت مردم گرانبھائی ءَ چہ دلسیاہ اَنت، سیمسری باپاری ءِ بند ءُ پھازوکی لشکر ءِ رویشگ تہ ءَ مٹی نیتکگ-

آیاں دیمتر ءَ گْوشتگ کہ پاکستانی وزیراعظم شھباز شریف آدینگ ءَ گوادر ءَ پیداگ اِنت ھمے درگت ءَ گوادر ءِ نندوک پورٹ دیم ءَ آئی ءِ گھگیری وش آتک کن ایں-

آئی ءِ گْوشگ اِنت کہ ضلع گوادر ءَ یوٹیلیٹی بلز پھل کنگ بہ بنت ءُ کھر آماچیں دمگ گوشگ بہ بیت-

بلوچستان میڈیکل کالج ءِ اسٹوڈنس الائنس ءِ وتی لوٹانی ھک ءَ زھرشانی برجاہ، اسٹوڈنس الائنس ءَ شھدربرجاہ ءِ انتزامیہ ءِ دیما وتی لوٹ ایر کتگ انت –

نودربراں گوستگیں روچ ءَ کالج بند کُتگ ءُ زھرشانی ءَ نشتگ انت، نودربرانی گوشگ انت کہ دانکہ لوٹ سرجم کنگ نہ بنت آ زھرشانی ءَ نندنت –

بلوچستاب میڈیکل کالج ءَ زھرشانی ءَ نندوکیں نودربراں لوٹ کتگ کہ شھدربرجاہ ءَ نودربراں بنکی آسراتی دیگ بہ بنت چوشکہ نودربراں نوکین پرائیوٹ ھاسٹل دیگ بہ بیت ءُ پیسری ھاسٹل ءِ ھڈ کنگے کار بندات کنگ بہ بیت ءُ ورگی ساپیں آپ دیگ بہ بیت – نودربراں لوٹ کتگ کہ گوستگیں ھژدہ ماھانی بجٹ ءُ اسٹوڈنس ویلفئر فنڈ ءِ شریں وڈی ءَ چارٹپاس کنگ بہ بیت –

نودربراں گوشتگ کہ شھدربرجاہ ءِ انتزامیہ اکیڈمک بورڈ ءَ پھال بہ کنت ءُ کالج ءِ اکیدمک کارانی چارگزار ءَ بہ کنت ءُ نودربرانی لوٹانی تہ ءَ ھمک ماھے وظیفہ آنی گیشی ھم مان انت –

زانشتی نزام ءُ زانشجاھانی تہ دلسیاھی سوب ءَ بلوچستان ءِ نودبر ھمک روچ زھرشانی ءَ انت – دومی نیمگ ءَ لورلائی میڈیکل کالج ءِ نودربر ھم وتی ھکانی لوٹ ءَ زھرشانی ءَ نشتگ انت ھمے وڈ بولان میڈیکل نرسنگ کالج ءِ نودربر ھم زھرشانی ءَ انت –

گوستگیں روچ ءَ بولان میڈیکل ءَ نرسنگ تبک ءِ بیست ءُ سَے نودربر کالج ءَ چہ در کنگ بوتگ ات کہ آھانی درکنگے بگیری ءَ نودربر زھرشانی کنگ ءَ انت – زھرشانی کنوکانی رِد ءَ بی ایم سی نرسنگ کالج ءَ سال اول ءِ بیست ءُ سَے نودربر دومی سمسٹر میان ءَ بے سوب ءَ درکتگ انت – نرسنگ کالج ءِ نودربراں انتزامیہ ءِ رویش بگیری ءَ وتی زھرشانی نبشتہ کنائینتگ گڈا نودربراں انتزامیہ ھاسٹل پترگ نیلگ انت –

زانگ بہ بیت اشی ءَ لورلائی میڈیکل کالج، جھالوان میڈیکل کالج ءُ تربت میڈیکل کالج ءِ نودربراں سَے ماہ ءَ پاکستان میڈیکل کمیشن ءِ نیمگ ءَ بلوچستان نودربرانی ءِ ھاتر ءَ ٹیسٹ گرگے بگیری ءَ نندانک جتگ ءُ زھرشانی کتگ –

نودربر گلانی گوشگ انت کہ بلوچستان ءِ تہ ءَ پندل ءِ رِد ءَ زانشجاہ تباہ کنگ بوگ ءَ انت ءُ اے درسیں کارانی تہ ءَ انتزامیہ ءُ وی سی پرنسپل ءِ دست مان انت وھدیکہ نودربر چہ انتزامیہ ءَ پرایمنیں وڈی ءَ وتی لوٹان کن انت گڈا انتزامیہ جیڑھانی گیشگیواری ءِ بدل ءَ نودبراں تنگ کن انت ءُ آھاں زانشجاھاں درکنگے بیھار ءَ دئینت ءُ آھاں ھچ نگوشگے کوشست ءَ کن انت –

وائس فار بلوچ مسنگ پرسنز ءِ بنجل ءَ چار ھزار ءُ شش سدءُ ھشتاد روچ سرجم بوتگ انت – مروچی بی ایس او پجار ءِ سرکماش زبیر بلوچ گوں وتی ھمراھاں ھوار دگہ مردین ءُ جنیناں بنجل ءَ اتکگ ءُ دلپدردی درشان اِتگ –

ھمے وھد ءَ وائس فار بلوچ مسنگ پرسنز ءِ کمک سرکاش ماما قدیر بلوچ ءَ اتکگیں مردمانی میاں تران کنان ءَ گوشتگ کہ چہ اولی روچ ءَ پاکستانی پوج بلوچ زرمبشت ءِ ھلاس کنگے ھاتر ءَ تاکت کارمرز کنگ ءَ انت – مردماں آوار جنگ ءُ وتی زنداناں بند کنگ یا بجن چگل دیے پالیسی ءِ رِد ءَ شھید کنگ ءُ آھانی جوناں ویرانگاں چگل دیگ اشی ءَ ابید ھم بلوچ ءَ وتی سر جھل نہ کرتگ بلکنہ اے زوراکیانی بگیری ءَ توار چست کتگ ءُ جھد کنگ ءَ انت –

ماما قدیر بلوچ ءَ گوشتگ کہ تنی وھدی پنجاہ ھزار ءَ گیش مردم زورانسری آوار جنی ءِ آماچ بوتگ انت ءُ آھانی تہ ءَ بازینے شھید کنگ ءُ آھانی زانگولیں جون چگل دیگ بوتگ انت –

ماما قدیر بلوچ ءَ گوشتگ پوج ءِ ھمے زوراکیانی بگیری ءَ مارا دھک ءَ گیش انت کہ زھرشانی کنگ ءَ انت اے وڈیں دراجیں وھد ءَ زھرشانی ءِ درور گوستانک ءَ ھم دست نہ کپیت بلے اشی ءَ ابید ھم دنیا پاکستان بگیری ءَ گامگیج زورگ ءَ بے سوب بوتگ –

آئی ءَ گوشت کہ اے گپ چو روچ ءِ رژن ءَ پدر انت کہ بلوچستان ءِ تہ ءَ ھمینچو انسانی ھکانی لگتمالی بوگ ءَ انت آئی ءِ تہ ءَ پاکستانی پوج ءُ آئی ءِ ادارھانی دست مان انت بلے اشی ءَ ابید ھم دنیائے تہ ءَ ھمیکس انسانی ھکانی ادارہ ھست آھاں وتی دپ بستگ ءُ ھچ گوشگ ءَ نہ انت آھانی ھچ نگوشگ ھما اولی روچ ءَ بگر تاں روچ مروچی پہ بلوچاں جست ءِ نشان ءِ جوڈ بوتگ –

پنجگور ءَ آپ نہ بوھگے سوب ءَ مھلوک دلسیاہ انت ءُ پنجگور ءِ واٹر سپلائی ھم بند انت –

دمگی مردمانی گوشگ انت کہ ھمک سال وارگی آپ ءِ ھاتر ءَ سرکار ءِ نیمگ ءَ کروڈانی ھساب ءَ پنڈ گرگ بیت بلے پنجگور ءِ مھلوک اے گرماگی ماہ ءُ روچاں پہ ترمپ ءِ آپ ءَ تلوسگ انت – ھدابادان، گرمکان ، سورد چتکان دگہ دمگاں وٹرسپلائی ھم بند کنگ بوتگ انت ءُ مھلوک آپ دیگ بوگ ءَ نہ انت –

آھانی گوشگ انت کہ مردماں وتی کمک ءِ وت لکّانی ھساب ءَ زر ھرچ کتگ ءُ آپ ءِ بندوبست کتگ بلے پنجگور ءِ بازیں دمگاں زیرزمین ءِ آپ ورگی نہ انت ءُ دومی نیمگ ءَ مھلوک ءِ چم واٹر سپلائی ءَ سک انت بلے واٹرسپلائی ءِ نزام درھم برھم انت ءُ ھر یکے بئیت واٹر سپلائی نام ءَ بہ گپت بوارت بس –

دمگی اھوالکارانی رِد ءَ پنجگور ءِ دمگ چتکان سٹی ایریا ءَ آپ دیگے ھاتر ءَ پنچ سال ساری کار بندات بوتگ کہ سِی کروڈ ءِ منسوبہ بوتگ – بلے پنچ سال گوزگ ءَ پد آ ھنگت سرجم کنگ نہ بوتگ – ھمود ءَ کہ کار ءَ چہ گیش کرپشن ءِ سرا دھان دیگ بہ بیت گڈا آ کار سوبمند نہ بنت – پنجگور گوارگو، پروم، گچک، کیلکور دگہ کُچگی دمگاں واٹر سپلائیانی ھم ھمے ھال انت-

دمگی اھوالکارانی رِد ءَ پنجگور ءِ بازیں دمگان واٹر سپلائی بند انت بلے ھر ماہ پہ آھانی شر کنگ ءُ ٹیل ءِ ھاتر ءَ زر گرگ ءُ ورگ بوگ ءَ انت – گوستگیں پنجگور ءِ ایم این اے عبدالقادر ءِ ٹیم ءَ بازیں واٹر سپلائی ءُ سولر سسٹم ھاتر ءَ پنڈ گرگ بوتگ بلے ناکہ سولر لگتگ ءُ ناکہ واٹر سپلائی سرا کار بوتگ –

ھمے وڈ پنجگور ءِ بازیں دمگاں ھشک سالی ءِ سوب ءَ کھن ھم ھُشک تر اِتگ انت چریشی ءَ مھلوک ءِمچ دگہ درچک مرگ ءَ انت – دھکان کاراں چہ سرکار ءَ لوٹ کتگ کہ کھنانی شر کنگ ءُ آپ سرکنگ ءَ گامگیج زورگ بہ بیت –

دمگی اھوالکارانی رِد ءَ پنجگور ءَ ھشک سالی ءِ سوب ءَ کھن کورجو ھشک تر اِتگ انت ، چریشی ءَ دھکانکارانی مچ مرگ انت ، مچاں ھوار انار، انگور، انجیر ءِ درچکاں ھم تاوان رسگ ءَ انت – مچ کہ پنجگور ءِ پجار انت ءُ ھزارانی کچ ءَ دھکانکار چہ ھمے مچاں کار کنگ ءُ ورگ انت –

دمگی مردمانی رِد ءَ مچانی پھریزگ ءِ یکیں راہ ھمیش انت کہ ھشک بوتگیں کھناں سولر سسٹم جنگ بہ بیت ءُ دھکانکاراں موہ دیگ بہ بیت کہ دھکانکاری بہ کن انت –

آھاں لوٹ کتگ گوشتگ کہ ھمے زوتاں کہ دمگے زمیندارانی ھاتر ءَ سولر سسٹم ءِ دیگے جار جنگ بوتگ آ درسیں سولر مچانی پھریزگے ھاتر ءَ دیگ بہ بنت – اگاں اے رندی مچانی سرا دلگوش دیگ نہ بوت گڈا دیمتر ءَ پنجگور ءِ مچ نہ مان انت –

اوگانستان ءَ گوستگیں شپ ءَ پیش اتکگیں تباہ کاریں زمین چنڈ ءَ بیران بیتگیں مردمانی کچ داں انیگ ءَ نھ سد ءَ سر بیتگ-

درملکی رسانکدری ھالانی رد ءَ اوگانستان ءِ اُستان پکتیکا ءَ گوستگیں شپ ءَ ترندیں زمین چنڈ بیتگ کہ آئی ءِ زور شش ٹک یک بیتگ ءُ زمین چنڈ ءِ سبب ءَ داں انیگ ءَ نُھ سد مردم بیران بیتگ اَنت ءُ بازیں کچے ءَ زدگ بیتگ اَنت-

رسانکدری ھالانی رد ءَ دمگی واکدارانی گوشگ اِنت کہ زمین چنڈ ءَ بازیں کچے ءَ لوگ کپتگ اَنت ءُ ابرمی اتکگیں تباھی ءَ بازیں کچے ءَ مردم زدگ اَنت ءُ آیاں نادراہ جاہ ءَ سر کنگ ءَ اَنت-

ھال ءِ رد ءَ زمین چنڈ ءَ اوگانستان ءِ پنچ میل ءَ گیش جاھاں سما کنگ بیتگ چریشی ءِ سبب ءَ پاکستان ءُ ھندوستان ءَ ھم اے زمین جمبگ سما کنگ بیتگ ءُ بنجاھی شھر کابل ءَ ھم زمین چنڈ سما بیتگ-

امریکی جیولوجیکل سروے ءِ رد ءَ زمین چنڈ ءِ زور شش ٹک یک بیتگ ءُ پنجاہ میل زمین ءِ جھلانکی ءَ بیتگ –

اوگان واکدارانی رد ءَ زمین چنڈ ءَ اسرمند بیتگیں دمگاں کمکی کار برجاہ اَنت-