TBP Balochi

بلوچ آجوئی لوٹوکیں سلاہ بندیں گل بلوچستان لبریشن پرنٹ ءِ جارکش میجرگوھرام بلوچ ءَ رسانکدراں وتی شنگ کرتگیں درشان ءِ تہ ءَ پنجگور ءَ پوج گون ءَ بوتگیں میڑے ءَ شھید بوتگیں گل ءِ باسک ظہور پنام بالی گوں ھمبلاں ھوار دروت ندر کرتگ ءُ گوشتگ کہ نوزدہ جون دوھزار بیست ءُ دو ءَ یکشمبے ءِ روچ ءَ پنجگور ءِ ھند پروم ءِ کوہ انجیرہ ءَ پاکستانی پوج ءَ گوں کشندہ ٹولی ءِ کارمندانی ھوار سرمچار انگیر کرتگ اَنت، پاکستانی پوج ءُ سرمچارانی میان ءَ میڑے بندات بیتگ- اے میڑ ءَ پاکستانی پوج ءَ بازیں کچے ءَ جانی تاوان بیتگ ءُ گَل ءِ پنچ ھمبل سرمچار ظہور ھمل پنام بالی، اکبر پنام ھمل، ساجد محمود پنام سمیر، صابر قادر پنام تاھیر، عطاء پنام ناسر ء واحد بکش ءُ بی این اے ءِ یک ھمبلے سرمچار ساجد پنام سگار پہ وتن ءِ پھازگ ءَ دُژمنیں پوج ءُ آئی ھندی کشندہ ٹولی ءِ بگیری ءَ جنگ داتگ ءُ شھید بیتگ اَنت-

جارکش ءَ دیمتر ءَ وتی درشان ءِ تہ ءَ گوشتگ کہ شھید ظہور ھمل پنام بالی ء امین جھمنند آواران چہ نودربری ءِ وھد ءَ گوں بلوچ راجکاری ءَ بندوک بیتگ – آ چہ وتی سرگرمیانی سوب ءَ ھند ءَ چیئرمین ءِ نام ءَ ناماں بیتگ- سال دوھزار یانزدہ ءَ بی ایل ایپ ءَ ھوار بیتگ – آئی کسانیں وھدے ءَ چیرجنگی ءِ رپک دربرتگ اَنت- آئی بلوچستان ءِ ھند جاؤ، آواران، کولواہ، کیلکور، بالگتر، پنجگور، پروم، راگے، گورکوپ ءُ اورماڑہ ءَ ھوار جتائیں جاھاں گوں وتی جنگی رپکاں دُژمن ءِ بگیری ءَ جوانمردی ءَ جنگ داتگ ءُ دُژمن تاوان داتگ- آ چہ وتی جوانیں کارشونیاں کپٹن ءِ اگدہ ءِ سر ءَ بیتگ۔ آئی شریں وڑے ءَ وتی زمہ واری پیلو کرتگ اَنت – آ زوت ءَ یک جنگی کماندارے ءِ بستار ءَ زانگ بیتگ- چہ بابا خیربخش ءِ شھیدی ءَ پد گیشتریں زمہ واری شھید ظہور بالی ءِ کوپگاں بیتگ اَنت- آئی ءَراگے، کولواہ ءُ اورماڑہ ءَ بلوچ راجی آجوئی سنگر ( براس) ءِ تیوگیں میڑاں جوانیں کردے پیلو کرتگ- پروم ءَ جنگ ءَ شھید بیتگیں صابر قادر پنام تاھیر ءُ بالی وت ماں وت تّرو زتک ءُ ناکو زتک بیتگ اَنت- آیانی شھیدی ءَ ھما کمی کہ ودی بیتگ آ جاھے پُر بیگ ارزان نہ اِنت- بلکیں آیاں وتی ورنائی ءَ ھما کارشونی پیلو کرتگ آ پہ ورنائیں پدریچ ءَ مادنیں راھے ءِ بستار انت ھمے وڑیں راستی، گَل ءُ آجوئی زْرمبشت ءِ گوں ءَ دل ءُ جان ءَ ھواری، گلزمین ءِ بے مٹیں مھر، راجی گھگیری ءُ گوں آجوئی جوزگ ءَ گَل ءِ مھکم کنگ ءَ مردمانی تہ ءَ ھمگرنچی ءَ شریں کردے پیلو کرتگ-

جارکش ءَ گوشتگ کہ شھید صابر پنام تاھیر ء قادربخش ءَ وتی درکسانی آواران ءِ روکپتی کوہ پاؤ ءَ گوازینتگ – اود ءَ وانگجاہ ءِ نہ بیگ ءِ سوب ءَ آئی ھچ نہ ونتگ بلکیں چہ راجی زانشت ءُ آجوئی ءِ جوزگ ءَ بلوچستان ءِ آجوئی ءِ جنگ ءَ وتی نیمگ ءَ آورتگ- آ سال دوھزار دوازدہ ءَ بی ایل ایپ ءَ ھوار بیگ ءَ پد جنگ ءِ پڑ ءَ زوت یک ٹیکنیکل ءُ سوھویں سرمچارے ءِ کرد ءَ دیم ءَ آتکگ، آ گَل ءِ لیپٹینٹ ءِ اگدہ ءِ سر ءَ بیتگ- سال دوھزار سینزدہ ءَ آواران ءُ کَش ءُ کراں توپانیں زمین چنڈ ءَ پد زورگریں پوج بازیں کچے ءَ آتکگ ءُ آجوئی لوٹوکیں سیاسی باسکانی بگیری ءَ لشکرکشی، گِس ءُ آدگہ چیزانی تاوان دیگ ءُ چہ ھند ءَ لڈینگ ءِ ترندیں دْرچ بندات کرتگ، ھما وھد ءَ تاھیر گوں چیرجنگی ءِ کارشونیاں گوں آدگہ ھمبلاں بازیں جاھاں دُژمنیں پوج ءِ سر ءَ سوبمندیں اُرش کرتگ – چیرجنگی ءِ ھیلکاری ءِ وھد ءَ آئی ءَ چہ آدگہ ھمبلیں سرمچاراں وانگ ءُ نبشتہ کنگ دربرتگ – آ وتی چیرجنگی ءِ کارشونیاں کمک کمان ءِ اگدہ ءِ سر ءَ بیگ ءِ ھواری ءَ چیریں ٹیم ورک ءِ کاراں مدام دیم ءَ بیتگ –

میجرگوھرام بلوچ ءَ گوشتگ کہ شھید ساجد محمود پنام سیمر ء محمود جھمنند گندچاھی کولواہ نودربری ءِ وھد ءَ گوں بلوچ ءِ راجکاری ءَ بندوک بیتگ – چہ وانگ ءَ پد آ سال دوھزار ھژدہ ءَ بی ایل ایپ ءَ ھوار بیگ ءُ گوں شھید باباخیر بخش پنام بابا ءِ سروکی ءَ بازیں جنگاں ھوار بیتگ- آ گَل ءِ سیکنڈ لیپٹینٹ ءِ اگدہ ءِ سر ءَ بیتگ- آ کولواہ ءَ گوں زورگریں لشکر ءَ میڑے ءَ ٹپی ھم بیتگ- ھمے وھد ءَ ریاست ءَ زوراکی ءِ کنگے وھد ءَ ساجد محمود ءُ آئی سیادانی گس مانداشتگ اَنت – آئی کھول چہ ھند ءَ لڈینگ بیتگ- بلے آئی ءَ تیوگیں زوراکی اوپار کرتگ اَنت آ پہ جوانمردی ءُ اوپار کنگ ءَ ھمبلانی تہ ءَ بے مٹیں درورے بیتگ- آ مکران ءُ کولواہ ءَ براس ءِ جتائیں جنگی کاراں ھم ھوار بیتگ-

جارکش ءَ گوشتگ کہ اکبر علی پنام ھمل جان ء نور محمد جھمنند شے کنری بزداد آواران، چہ دو ھزار دوازہ ءَ بلوچ آجوئی ءِ زْرمبشت ءَ راجمستری گھگیری ءَ جھد کنگ ءَ بیتگ، آ وتی ھند ءُ کَش ءُ کرانی میتگاں پارٹی ءِ کاراں ءُ باسک زورگ ءَ سک ءَ گیش سرگرم بیتگ- نگیگیں جاوراں ءُ ریاست ءِ زوراکیاں ھوار چہ تنگدستی ءُ ھنکین ءَ لَڈ ءُ بار کنگ ءِ وھد ءَ شھید اکبر ءِ لوگبانک نادراہ ءُ آئی جاور نگیگ بیتگ اَنت درمان نہ بیگ ءِ سوب ءَ آئی ءِ دم ئے بند بیگ ءِ سوب ءَ شھید بیتگ- آئی تیوگیں گرانیں جاورانی گندگ ءَ پد وتی سیاسی کار برجاہ داشتگ اَنت- وھدے ریاست ءَ سیاسی کارکنانی زورانسری بیگواھی ءُ کُشگ بندات کرتگ، گڑا شھید اکبر سال دوھزار پانزدہ ءَ بی ایل ایپ ءِ رھبند ءِ سر ءَ وتی راجی آجوئی ءِ کاروان ءَ ھوار بیتگ – آ بی ایل ایپ ءَ ھوار بیگ ءَ پد سلاہ بندیں کاراں یک زمہ واریں سرمچارے ءِ بستار ءَ وتی زمہ واریاں شریں وڑے ءَ پیلو کنگ ءَ بیتگ داں گُڈی ساہ ءُ ھون ءِ گُڈی ترمپ ءَ گوں بلوچ زْرمبشت ءَ بندوک بیتگ ءُ گوستانک ءِ تہ ءَ پہ مدامی نمیران بیتگ- آ پما درساں گرانبھا، پھر ءُ شرپے ءِ بستار ءَ داریت-

آئی ءَ گوشتگ کہ شھید عطاء پنام ناصر ء واحد بخش جھمنند پروم ءَ گوستگیں یک سالے بیتگ کہ بی ایل ایپ ءَ ھوار بیتگ، آ گَل ءِ شھری نیٹورک ءَ کار ءَ بیتگ ءُ یک سالے ءَ آئی جوانیں کرد ءُ توکلے پیش داشتگ-

میجر گوھرام بلوچ ءَ گوشتگ کہ شھیداں جنگ ءِ پڑا گوں دُژمن ءَ جوانمردی ءَ جنگ داتگ ءُ شھیدی ءِ گرانبھائیں نام کٹ اِتگ ءُ نمیران بیتگ اَنت- بی ایل ایپ آیانی شھیدی ءَ ستک شانی ندر کنت ءُ داں بلوچستان ءِ آجوئی ءَ آیانی جنگ ءَ برجاہ داریت-

بلوچستان میڈیکل کالج ءِ اسٹوڈنس الائنس ءِ وتی لوٹانی ھک زھرشانی برجاہ ، نودربراں سَے روچ انت کہ کالج ءِ بند کتگ ءُ زھرشانی نندانک جتگ – نودربرانی گوشگ انت تانکہ مئے لوٹ سرجم کنگ نہ بنت مئے زھرشانی برجاہ انت –

بلوچستان میڈیکل کالج ءِ نودربر شھدربرجاہ ءَ بنکی آسراتیانی لوٹ کنگ ءَ انت زھرشانی ءَ نشتگیں نودربراں گوستگیں روچ ءَ شھدربرجاہ ءِ انتزامیہ گور ءَ وتی لوٹ ایر کتگ انت بلے تنی وھدی انتزامیہ ءُ نودربرانی میان ءَ ھچ وڈیں گند ءُ نند نہ بوتگ –

نودربرانی گوشگ انت کہ انتزامیہ آھانی لوٹاں سنجیدگی ءَ گون نزیرگ انت شھدربرجاہ ءِ انتزامیہ ءِ بے ھسی ءِ سوب ءَ زھرشانی کنگ ءَ لاچار ایں –

بلوچستان میڈیکل کالج ءَ زھرشانی ءَ نشتگیں نودربراں ھمے لوٹ کتگ کہ شھدربرجاہ ءَ نودربراں بنکی آسراتی دیگ بہ بنت چوشکہ نودربراں نوکین پرائیوٹ ھاسٹل دیگ بہ بیت ءُ پیسری ھاسٹل ءِ ھڈ کنگے کار بندات کنگ بہ بیت ءُ ورگی ساپیں آپ دیگ بہ بیت – نودربراں لوٹ کتگ کہ گوستگیں ھژدہ ماھانی بجٹ ءُ اسٹوڈنس ویلفئر فنڈ ءِ شریں وڈی ءَ چارٹپاس کنگ بہ بیت –

نودربراں گوشتگ کہ شھدربرجاہ ءِ انتزامیہ اکیڈمک بورڈ ءَ پھال بہ کنت ءُ کالج ءِ اکیدمک کارانی چارگزار ءَ بہ کنت ءُ نودربرانی لوٹانی تہ ءَ ھمک ماھے وظیفہ آنی گیشی ھم مان انت –
زانشتی نزام ءُ زانشجاھانی تہ دلسیاھی سوب ءَ بلوچستان ءِ نودبر ھمک روچ زھرشانی ءَ انت – دومی نیمگ ءَ لورلائی میڈیکل کالج ءِ نودربر ھم وتی ھکانی لوٹ ءَ زھرشانی ءَ نشتگ انت ھمے وڈ بولان میڈیکل نرسنگ کالج ءِ نودربر ھم زھرشانی ءَ انت –

دومی نیمگ ءَ نودربر گلاں بی ایم سی انتزامیہ ءِ نیمگ ءَ نودربرانی گوم ءَ اے گیرادارتی رویش ایرجتگ ءُ گوشتگ کہ انتزامیہ نودربرانی لوٹاں سرجم بہ کنت اگان ناں زھرشانی درچ گیش کنگ بیت انت –

نودربر گلانی گوشگ انت کہ بلوچستان ءِ تہ ءَ پندل ءِ رِد ءَ زانشجاہ تباہ کنگ بوگ ءَ انت ءُ اے درسیں کارانی تہ ءَ انتزامیہ ءُ وی سی پرنسپل ءِ دست مان انت وھدیکہ نودربر چہ انتزامیہ ءَ پرایمنیں وڈی ءَ وتی لوٹان کن انت گڈا انتزامیہ جیڑھانی گیشگیواری ءِ بدل ءَ نودبراں تنگ کن انت ءُ آھاں زانشجاھاں درکنگے بیھار ءَ دئینت ءُ آھاں ھچ نگوشگے کوشست ءَ کن انت –

سربوتگیں ھالانی رِد ءَ بلوچستان ءِ دمگ کلات ءِ کوھی ھنداں پاکستانی پوج ءِ لشکر کشی ءِ میان ءَ میڑے بوتگ –

لشکر کشی گوستگیں روچ ءَ نرمک ءُ چپ چاگردی کوھی دمگاں بندات کنگ بوتگ – دمگے تہ ءَ پوجی کاروان ھم گندگ بوتگ انت وھدیکہ میڑے ھال ھم آھگ انت –

بلے پدا ھم واکدارانی نیمگ تنی وھدی ھچ وڈیں درشان دیگ نہ بوتگ –

زانگ بہ بیت بلوچستان ءِ جتا جتائیں دمگاں پوجی لشکر کشیانی درچ برجاہ انت – گوستگیں روچ ءَ پنجگور ءَ لشکر کشی ءِ میان ءَ آئی ایس پی آر ءَ شش بلوچ سلاھبندیں جھدکارانی کوش ءِ ٹاہ داتگ ات بلے اے درگت ءَ تنی وھدی بلوچ سلاہ بندیں گلانی نیمگ ءَ ھچ وڈیں درشان دیگ نہ بوتگ –

اشاں پیش شال ءُ چپ چاگردی دمگاں پوجی لشکر کشی وھد وھدے سرا بوگ ءَ انت کہ دمگی مردمانی آوار جنی ءُ مال ءُ دلوتانی تاوان باری ءِ ھال ھم آھگ ءَ انت –

وھدیکہ نوشکی ءِلشکر کشی ءِ میان ءَ بلوچ لبریشن آرمی ءِ دو جھد کار بیران بوتگ ات اے لشکر کشی ڈورون اُرش ءَ بندات بوتگ ات ءُ آئی ءِ تہ ءَ جنگی بالگرداں ھم بھر زرتگ ات –

بلوچ نیشنلسٹ آرمی ءِ جارکش مرید بلوچ ءَ رسانکدراں وتی شنگ کرتگیں درشان ءِ تمپ پل آباد ءَ پوجی پانگس ءِ سرا بوتگیں اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءِ ادار دہ ءَ کیچ ءِ دمگ تمپ پُل آباد ءَ برجاھیں پوجی پانگس ءِ سرا گرنیڈ لانچراں گوں اُرش کُتگ کہ شُتگ ءُ پانگس ءِ تہ ءَ کپتگ انت –

جارکش ءَ گوشتگ کہ اُرش ءِ آسر ءَ پانگس ءَ ساڑی ایں بازیں پوجی کارمندے مُرتگ ءُ زدگ بوتگ انت –

جارکش ءَ وتی درشان ءِ گڈسر ءَ گوشتگ کہ مئے سلاہ بندیں جھد بلوچستان ءِ آجوئی ءَ تاں برجاہ مانیت –

بلوچستان ءِ جتا جتائیں دمگاں گوستگیں روچاں توپانی ھوراں دوازدہ مردم بیران بیتگ اَنت بیست ءُ یک زدگ بیتگ اَنت، بیران بیتگیں مردمانی تہ ءَ ھشت زالبول ءُ زھگ ھوار اَنت-

کدرتی توپانی ھورانی پھریزی گر ءُ دارانی واستا اُستانی ادارے پراونشل ڈیزاسسٹر مینجمنٹ اتھارٹی (پی ڈی ایم اے) ءِ واکدارانی رد ءَ ھرنائی ءِ دمگ سپین تنگی ءَ توپانی ھاراں دو زالبول ءُ یک زھگے ءَ ھوار سَے مردم بڈ اِتگ ءُ بیران بیتگ اَنت کہ اشانی زھگے لاش دزکپتگ ءُ زالبولانی لاش گار اَنت-

واکداراں گُشتگ کہ ھرنائی ءِ دمگاں ھورانی گوارگ ءَ چار جاھاں سنجاوی ءَ دگ پروشتگ اشی ءَ ابید دو پل ءُ یک میلے ریل ءِ پٹی ھم اسرمند بیتگ ءُ ھوراں کشت ءُ کشار ھم تاوان داتگ اَنت-

پی ڈی ایم اے ءِ کچ ءُ کساسانی رد ءَ بیست جون ءَ بیوکیں ھور ءُ توپانانی سبب ءَ داں انگت ءَ اُستان ءَ نُھ مردم بیران ءُ بیست ءُ یک زدگ اَنت-

پی ڈی ایم اے ءِ رد ءَ واکداراں گیشتر گشان ءَ گُشتگ کہ ڈیرہ بگٹی ءِ یک لوگے سرجم ءَ تباہ بیتگ ءُ بارکھان ءُ ھرنائی ءَ ھم دوازدہ لوگاں تاوانباری بیتگ، ھمے رنگ ءَ سَے سد ءُ شست ءُ شَش بس ءُ دلوت مرتگ اَنت ءُ سَے سد ءُ بیست ءُ نُھ سولر پلیٹساں تاوان رس اِتگ –