TBP Balochi

پاکستانی پوج ءِ دست ءَ زورانسری آوار جنگ ءُ بیگواہ بوتگیں مردمانی کھولاں کراچی پریس کلب ءِ دیم ءَ بنجل کتگ ءُ نشتگ انت –

زھرشانی بنجل ءَ بیگواھیں مردمانی کھول وتی دوستیگیں مردمانی یل کنگے ھاتر ءَ ھوار انت کہ اے بیگواھیں مردم سند ءُ بلوچستان ءِ جتا جتائیں دمگاں آوار جنگ ءُ بیگواہ کنگ بوتگ انت کہ ھنگت گار ءُ بیگواہ انت –

بلوچ یکجھتی کمیٹی کراچی ءِ آرگنائزر ءَ بیگواھیں مردمانی کھول ءِ نیمگ ءَ جتگیں زھرشانی بنجل ءَ اھوالکاراں گوں تران کنان ءَ گوشتگ کہ کراچی ءَ آوار جنگ بوتگیں مردمانی یل کنائینگے جھد یک پُرایمنیں ءُ جمھوری تھریک ءِ بیگواھیں مردمانی کھول کانود ءِ رھبندانی رِد ءَ وتی دوستیگیں مردمانی ھاتر ءَ جھد انت سرکار ءُ آئی ءِ ادارہ کانودانی رھبندان پیلو بہ کن انت ءُ بیگواھیں مردماں آمیدگس ءَ بیار انت –

آمنہ بلوچ ءَ چہ سرکار ءَ لوٹ کتگ کہ جمھوری جھدے اھترام کنگ بہ بیت ءُ کانود ءِ رِد ءَ سند ءِ تہ ءَ بیگواھیں مردم یل کنگ بہ بنت ءُ مئے جمھوری ءُ کانودی تھریک ءَ ایرموش کنگے ھاتر ءَ تاکت کارمرز مہ کن انت –

آئی ءَ گوشتگ کہ کانود جوڈ کنوکیں ادارہ درکانودی کار کنگ ءَ انت کہ چریشی ءَ سند ءِ تہ ءَ ھم انسانی ھکانی لگتمالی بوگ ءَ انت – اے وھدی بے کساس ءَ مردم سی ٹی ڈی ءُ وفاقی ادارھانی زنداناں بندیگ انت کہ آ بے گناہ انت –

بلوچستان ءِ بنجاھی شھر شال ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی بنجل برجاہ ، زھرشانی بنجل ءَ مروچی چار ھزار ءُ شش سد ءُ ھشتاد ءُ سَے روچ سرجم بوتگ انت – مروچی پشتونخوا میپ ءِ بنجاھی اگدہ دار قادر آغا، سلیمان کاکڑ ءُ چہ ھاران ءَ چاگردی باسک داد شاہ بلوچ، نور محمد بلوچ، عبدالستار بلوچ ءُ دگہ مردماں بنجل ءَ اتکگ ءُ بیگواھیں مردمانی کھول ءِ گون ءَ دلپدردی درشان اتگ –
بنجل ءَ اتکگیں مردمانی گوم ءَ تران کنان ءَ وی بی ایم پی ءِ کمک سرکماش ماما قدیر بلوچ ءَ گوشتگ کہ پاکستانی پوج پیش ءَ چہ برجاھیں بلوچ راج ءِ کشت کوش ءِ تہ ءَ گیشی آرگے سرجمیں تیاری کتگ انت کہ بلوچستان ءِ جتا جتائیں دمگاں وتی کشندہ ٹولیانی سروکی ءَ آئی ءِ بندات کتگ وھدیکہ بلوچ ورنایانی زورانسری آوارجنی ءُ زانگولیں جونانی چگل دیگے تہ ءَ ھم گیشی آرگ بوتگ کہ آئی ءِ تہ ءَ پاکستان ءِ چیریں ادارھانی ھمراھی ءَ آھانی داشتگیں کشندہ ٹولی ھم وتی وپاداری ءَ جوانی ءَ پیلو کنگ ءَ انت –

ماما قدیر بلوچ ءَ گوشتگ کہ یک نیمگے پاکستان ءِ داشتگیں کشندہ ٹولی بلوچ پرایمنیں جھد ءَ ایرموش کنگ ءُ بلوچانی کشت کوش ءَ وتی گام تیز کتگ انت ءُ وتگڑیں راجدوست بلوچ راج ءُ میاں استمان ابھام پیداک کنگ ءُ وتی ھلاس بوتگیں ھستی ءِ بدل ءَ پاکستانی ادارھاں مراعات گرگے ھاتر ءَ گوں آھاں ھمگام انت –

آئی ءَ گوشتگ کہ پاکستان ءِ منوگر اسمگلر، کشندہ ٹولی ھزدار ڈیرہ بگٹی، سوراب، کلات، مکران ءُ مستونگ ءَ ھوار سرجمیں بلوچستان ءَ بلوچ ورنایانی زورانسری آوار جنی ٹارگٹ کلنگ کنگ ءُ آھانی کشت کوش ءَ کنگ ءَ انت – دزی ڈنگی، آوارجنی ءُ ملام گرگ ءُ بلوچ راج ءِ تہ ءَ ترس ءِ پیداک کنگ ءُ آھاں پرایمنیں جھد ءَ دور دارگے کوشست بوگ ءَ انت –

ماما قدیر بلوچ ءَ گوشتگ کہ ورنایانی شھیدیءُ ھزاراں بلوچ پرزندانی زندانی بوگ ءَ بلوچ راج ءِ تہ ءَ وتی مولانی ھاتر ءَ گیش مھکم کتگ –

“The wind that shakes the barley”

‎دی ونڈ دیٹ شیکس دی بارلے تامر ءِ سر ءَ چمشانکے

چمشانک: حکیم بلوچ

ٹی بی پی بلوچی

سال دوھزار ءُ شَش ءَ برتانیہ ءِ تامر کار کین لوچ ءِ ڈائرکشن ءَ جوڑ بیتگیں تامر دی ونڈ دیٹ شیکس دی بارلے ھما زمانگ ءِ برتانیہ ءُ آئرلینڈ ءَ پیش دار ایت کہ آئرلینڈ پہ وتی آجوئی ءِ پچگرگ ءِ ھاتر ءَ برتانیہ ءِ ھلاپ ءَ جھد ءَ بیت۔

تامر ءِ تہ ءَ نامداریں آئرش ازمکار سیلین مرپی بنجاھی کارست اِنت کہ آ (پی کی بلائنڈرز ءِ تومس شیلبی ءِ نام ءَ گیشتر زانگ بیت)، سیلین مرپی تامری نام ڈیمین او ڈونوان تامر ءِ بندات ءَ، چہ آئرلینڈ ءَ دیم پہ لندن انگلینڈ ءَ روگ ءَ بیت کہ دانکہ وتی میڈیکل وانگ ءَ سرجم بہ کنت، بلے ڈیمین ھمے دمان ءَ برتانیہ ءِ لشکر کہ آئرلینڈ ءَ ھما وھد ءَ “بلیک اینڈ ٹینز” ءِ نام ءَ زانگ بنت آھانی زوراکیاں ھم گندگ ءَ بیت۔ بازیں زوراکی ءُ وتی مھلوک ءِ بزگی ءَ گندگ ءَ پد ڈیمین انگلینڈ ءَ روگ ءِ جاہ ءَ آئرلینڈ ءَ نند اِت ءُ آئی آر اے آئرش ریپبلکن آرمی ءَ ھوار بیت۔ ڈیمین ءِ مستریں برات ٹیڈی او ڈونوان چہ پیسر ءَ آئی آر اے ءَ ھوار بیت، ءُ برتانیہ ءِ زوراکی ءُ آئرلینڈ ءِ بزگیں مھلوک ءِ آجوئی ءِ جھد ءَ ھوار بنت۔

دی ونڈ دیٹ شیکس دی بارلے ھما زوراکیاں تامری رد ءَ پیش داریت کہ برتانیہ ءَ آئرلینڈ ءِ تہ ءَ کُتگ اَنت۔ پہ درور یک ورنایے آئرش ءِ تھنا ھمے ھاتر ءَ کُشگ بیت کہ آ وتی نام ءَ وتی زبان ءِ تہ ءَ گُش اِیت ءُ انگلش گپ نہ کنت۔ اگاں یک لوگے ءِ سر ءَ برتانیہ ءِ لشکریانی بیڑ ءُ لوگانی ماندارگ زالبولانی لٹ ءُ کُٹ کنگ آھاں کپ شرپ کنگ دانکہ آھانی لوگانی مردین چہ جھد ءَ دلپروش بہ بنت ءُ سرکار ءِ دیم ءَ سرنڈر بہ بنت ءُ وتی ھمراھیں جھدکارانی چاریگری ءَ بہ کن اَنت۔

دی ونڈ دیٹ شیکس دی بارلے ءِ چارگ الم مردم ءَ اے گمان ءَ دنت کہ چہ آئرشانی جنگ ءَ بگر داں آھانی سر ءَ بیوکیں زوراکی ترا انچیں گمانے دے اَنت گشے اے کسہ بلوچستان ءِ کسہ اِنت۔ اے جنگ بلوچستان ءِ جنگ اِنت۔ پرچہ کہ آئی آر اے ءِ جنگ چیرجنگی بیتگ ءُ آھانی سر ءَ بیوکیں زوراکیانی دروشم ھم ھما بیتگ اَنت کہ بلوچانی سر ءَ برتانیہ ءِ داشتگیں گلام پنجابی کنگ ءَ اِنت۔ زندانی کنگ، لَٹ شاپی کنگ، زھنی ازیت دیگ ءُ ناکُنانی کَشگ ءِ پئیمیں ٹارچر کنگ دانکہ جھدکارانی تہ ءَ تُرس ودی بہ بیت ءُ آھاں چہ جھد ءَ دلپروش کنگ بہ بنت۔

اے تامر ءِ یکیں چہ مستریں وشی تامر ءِ تہ ءَ کیمرہ ءُ لائٹانی کارمرز کنگ اِنت انچوں گمان بیت گیشتریں وھداں کدرتی لائیٹنگ ءِ سر ءَ تامر جوڑ کنگ بیتگ دانکہ 1920 ءُ ھما اھد ءِ چارگ ھم جوانی ءَ تامر ءِ تہ ءَ گندگ بہ بیت۔

دی ونڈ دیٹ شیکس دی بارلے گُڈ سر ءَ یک برے پد ءَ برتانیہ ءِ پندل سازی ءُ پروش ءُ ھاکمی بہ کنگ ءِ راستی ءُ آئی ءِ سوب ءَ آئرش مھلوک ءَ بیتگیں تاوانانی راستی ءَ دیم ءَ کار ایت۔ ڈیمین ءُ ٹیڈی دو برات کہ دویں پہ آئرلینڈ ءِ آجوئی ءَ جھد ءَ بنت اینگلو – آئرش ٹریٹی ءَ پد دژمن جوڑ بنت۔ پرچاکہ اے ٹریٹی ءَ آئی آر اے ءُ ایندگہ گلانی بازیں سروک ءُ جھدکار یک پندلے ءُ آئرلینڈ ءَ دو بھر ءَ کنگ ءِ سوب لیک اَنت۔ ڈیمین ءُ آئی ءِ سنگت آ اے ٹریٹی ءَ ایر جن اَنت ءُ آ نوں وتی جنگ ءَ ھما آئرش لشکریانی ھلاپ ءَ برجاہ دار اَنت کہ آھاں گوں برتانیہ ءَ ٹریٹی من اِتگ۔

ڈیمین ءِ برات ٹیڈی فری اسٹیٹ آرمی اگاں نیشنل آرمی ءِ بھر بیت کہ آ ٹریٹی ءِ منوگر بنت ءُ مائیکل کولنز ءِ ھمراہ داری ءَ کن اَنت۔ ڈیمین ھما وھد ءَ دزگیر بیت کہ آ چہ نیشنل آرمی ءَ توپک دُزگ ءَ گوں وتی ھمراھاں کئیت ءُ آئی ءِ سنگت ءِ تیر وارت، ڈیمین نوک جوڑ بیتگیں فری اسٹیٹ آرمی ءِ رد ءَ راجدروہ بیت ءُ آئی ءِ برات ٹیڈی وت ڈیمین ءَ کُشگ ءِ پرمان ءَ شوٹنگ سکواڈ ءَ دنت۔

دی ونڈ دیٹ شیکس دی بارلے بہ بیت اگاں مائکل کولنز یا اگاں آئرش راجدپتر ءِ کسہ اِشانی چارگ، وانگ ءُ ٹپاسگ ءَ پد اے گمان الم بیت کہ گُشے آئرلینڈ ءَ بیتگیں زوراکی ھما اَنت کہ بلوچانی سر ءَ بیگ ءَ اَنت۔ ءُ آئرش لس مھلوک ءِ جھد ھم ھما دروشم ءَ اِنت انچش کہ بلوچانی جھد اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیاب دپی دمگ گوادر ءَ آدینگ ءِ روچ ءَ پاکستان ءِ مزن وزیر شھباز شریف ءِ گوادر تر ءُ تاب ءِ وھد مردماں مزنیں کچ ءَ زھرشانی کتگ کہ آھانی تہ ءَ زالبولاں ھم مزنیں کچ ءَ بھر زرتگ –

شھباز شریف ءِ گوادر ءِ ترءُتاب ءِ میان ءَ شھر ءِ پھازداری ءِ انتزام ھم ترندتر کنگ بوتگ انت – بلوچستان ءِ چیف سیکریٹری عبدالعزیز عقیلی ، آئی جی پولیس، گوادر پورٹ اتھارٹی چیرمین نصیر خان کاشانی، دیمروئی ادارہ گوادر ءِ ڈائریکٹر جنرل مجیب الرحمٰن قمبرانی، مکران ڈویژن کمشنر شبیر احمد مینگل، گوادر ءِڈپٹی کمشنر کپٹن ریٹائرڈ جمیل احمد ءُ بلوچستان ءِ سر وزیر عبدالقدوس بزنجو نے بالی پٹ ءَ مزن وزیر وش اتک کتگ –

شھباز شریف ءَ گوادر ءِ ترءُ تاب ءَ گوستگیں چکر ءَ شور سلاہ کنگ بوتگیں کہ جی ڈی نادراھجاہ ءَ انڈس نادراھجاہ کراچی ءَ دیگ ءُ گوادر ءَ ایرانی بجلی سد میگاواٹ گیش کنگے سرا دزنشان جتگ –

شھباز شریف ءِ گوادر ءِ ترءُ تاب ءِ بگیری ءَ حق دو تحریک لوٹ پد ءَ دمگی دریا ورداں مردماں مزنیں کچ ءَ پورٹ نزیک دگ بند کرتگ –

ھمے وھد ءَ ملا ہدایت الرحمان بلوچ ءَ گوشتگ کہ مروچی مئے اے زھرشانی ءِ مول شھباز شریف ءَ پیام دیگ انت کہ ادے مردم چہ اسلام آباد ءَ زھر انت مارا سولر ناں وتی بیگواھیں مردم لوت انت – آئی ءِ گوشتگ کہ گوادر مھلوک ھِ جیڑہ ھما وڈ انت –

آئی ءَ گوشتگ کہ بیگواھیں مردمانی درگت ءَ سوبائی سرکار ھچ کرت کنگ ءَ نہ انت وفاق اے جیڑھے سرا سنجیدہ بہ بیت بیگواھیں مردمانی ھاترا رونک کشگ بیت –

دومی نیمگ ءَ گوادر ءَ سَے جولائی دوھزار پانزدہ ءَ پاکستانی پوج ءِ دست ءَ زورانسری آوار جنگ ءُ بیگواہ کنگ بوتگیں عظیم دوست ءِ کھول ءِ لوٹ ءِ پدا زھرشانی ءِ کنگ بوتگ کہ اودا گوادر ءَ سیادی داروکیں مردم ءُ دگہ بیگواھیں مردمانی کھول، ھر تک ءُ پھناتاں سیادی داروکیں سیاسی پاٹی ءُ دمگی رھشوناں ھوار زھگ ءُ زالبولاں مزنیں کچ ءَ بھر زرتگ –

ھمے درگت ءَ بیگواھیں عظیم دوست ءِ گھار ءَ گوشتگ کہ منی برات یل کنگ بہ بیت ما ھمک وھد ءَ ھمے لوٹ ءَ کنگائیں کہ اگاں آ کتکار انت گڈا آمیدگس ءَ آرگ بہ بیت –

ھمے درگت ءَ دگہ ترانکاراں بلوچستان ءَ پاکستانی پوج ءِ دست ءَ زورانسری آوار جنگ بوتگیں مردمانی یل کنگے لوٹ کتگ گوشتگ کہ پاکستان ءِ واکدار ھمینچو زورانسری آوار جنی ءِ جیڑہ ءَ دراجکش دیاں اے پہ ھماھانی ھاترا جیڑھے بیت –

آھان گوشتگ کہ گوادر ءِ دیمروئی راز مروچی پدر بوتگ کہ چیزے مردم بندیں کمرھان نشتگ ءُ گوادر ءِ باندات ءِ پیسلہ ءِ کتگ وھدیکہ ھمے وھد ءَ بازار ءِ تہ ءَ ھزارانی کچ ءَ چک زالبول ءُ دریا ورد زھرشانی ءَ بوتگ انت –

پہ شھیدی آں مئے جزبگ نِزور بوت نہ کن اَنت ءُ پہ ماتیں سرڈگار ءِ دیمپانی ءَ شھیدی پہ ما پھر ءِ ھبر اَنت۔ مرید بلوچ

19 جون 2022 یکشمبے ءِ روچ ءَ پنجگور ءِ دمگ پروم انجیر کوہ ءِ ھند ءَ مئے ءُ ھمراھیں گَل بلوچستان لبریشن فرنٹ ءِ سرمچار مدامی ئیں پیم ءَ گَشت ءَ بوتگ اَنت کہ آھانی دیم پہ دیمی گوں زورگیریں پاکستان ءِ لشکر ءُ آھانی زرھریدیں کشندہ ٹولی ءِ کارندھاں بوتگ کہ چہ آئی یک دراجکشیں میڑے بندات بوتگ۔ اے دراجکش ءُ ھونی ئیں میڑ ءَ زورگیریں پوج ءُ آئی ءِ کشندہ ٹولی ءِ کارندھاں مزنیں کساسے ءَ جانی ءُ مالی تاوان بوتگ ءُ پہ سرڈگار ءِ دیمپانی ءَ ساجد پنام سگار ءَ ھوار ھمراھیں گل بی ایل ایف ءِ پنچ ھمراھیں سرمچار کپٹن ظھور ھمل پنام بالی ، اکبر پنام حمل، سکینڈ لیفٹیننٹ ساجد محمود پنام سمیر ، صابر قادر پنام تاھیر ، عطاء پنام ناصر شھید بوتگ اَنت۔

شھید ساجد جان پنام سگار ء حسین جھمنند چتکان پنجگور چہ گوستگیں دو سالاں چہ بلوچ نیشنلسٹ آرمی ءِ پَتر ءَ گوں سلاہ بندیں جھد ءَ ھمگرنچ بوتگ۔ آ یک دلیر ءُ کاری ئیں سرمچارے بوتگ ءُ پہ بلوچستان ءِ آجوئی ءَ دژمن ءِ بگیری ءَ سلاہ بندیں چِست ءُ ایر آنی تہ ءَ آئی ءَ وتی ڈُبہ داری جوانیں رنگےءَ پیلو کتگ اَنت ءُ داں گُڈی ساہ ءُ ھون ءِ گُڈی ترمپ ءَ دژمن ءِ بگیری ءَ جنگءَ بوتگ۔

بلوچ نیشنلسٹ آرمی ساجد بلوچ پنام سگار ءُ ھمراھیں شھیدیں سرمچاراں ستک شانی ءُ سھریں دروت ندر کنت۔ ءُ یکبرے پدا اے کؤلءَ کنت کہ زورگیر ءِ بگیری ءَ داں گڈی تیر ءُ گڈی سرمچار ءَ مئے سلاہ بندیں اُرش گوں گیشتر ترندی ءَ برجاہ بنت۔