TBP Balochi

زورانسری آوارجنی ءُ بیگواھی ھما زوراکی انت کہ چہ اشی ءَ ناکہ تھنا یک مردمے بلکنہ سرجمیں کھول اسر مند بیت – اقوام متحدہ چہ پاکستان ءَ پسو بہ لوٹیت کہ کجام کانود ءِ رِد ءَ مردماں آوار جنگ انت – اے گپ سمی دین بلوچ ءَ گوستگیں روچ ءَ زوراکی ءِ آماچیں میاں استمانی روچ ءَ کراچی پریس کلب ءَ بوتگیں زھرشانی ءِ سرا جتگ انت

بلوچ یکجھتی کمیٹی ءُ وائس فار بلوچ مسنگ پرسنز ءِ نیمگ ءَ کنگ بوتگیں زھرشانی بیگواھیں ڈاکٹر دین محمد ءِ زھگ سمّی دین بلوچ ءَ وتی ھیال درشان اتگ گوشتگ کہ مارا بژن بیت کہ ما ھنچیں ریاست ءِ تہ ءَ نشتگ ایں کہ ادا ھک ءِ اوست ءَ مہ داریں ـ ھمے پھمگ کہ ما اے ملک ءِ یک ھساب ءَ شھری ایں گڈا منی ھیالاں اے ردیں ـ

آئی ءَ گوشتگ کہ مارا مدامی وت ءَ اے ریاست ءِ دیم ءَ باور کنائینگ کپیت کہ ما تئی شھری ایں مئے ھک ھم برابر ءَ دیگ بہ بیت مئے زھگاں ھم وانگے ھک ھست، مئے مردم ھم اگاں کتکار بنت آمیدگس ءَ آرگ بہ بنت سزا دیگ بہ بنت ھنچو کہ ایندگرانی کنگ بنت بلے اے وڈ شما بس یک مردمے آوار جنگ ءُ بیگواہ کنگ ءَ نہ ایت بلکنہ سرجمیں کھول ءِ ھمے ازاب ءِ تہ ءَ چگل دیگ ات –

سمی بلوچ ءَ گوشتگ کہ مروچی زوراکی آماچیں مردمانی گوم ءَ یکجھتی کنگ ءِ روچ انت من ھمے پھماں کہ یو این یا دگراں اے روچ بزاں انسانی ھکانی روچ، زورگ گردار روچ بس پہ نام انت – اے گلاں کریڈٹ گرگ ھاتر ءَ اے روچ داشتگ اانت پرچاکہ اگاں اے سنجیدگ بوتیناں گڈا اگاں یکے زوراکی ءِ آماچ بوتگ ات آھاں آئی ءِ توار گوش داشتگ ات – یکسدو ءُ بیست ءُ شش ملکاں اے پٹیشن ءِ سرا وتی دزنشان جتگ کہ آھاں زوراکی ایرجتگ ءُ آ ملکانی تہ ءَ پاکستان ھم ھواریں

آئی ءَ گوشتگ کہ زوراکی بس اے نہ انت کہ تو کسے زنداناں بندیگ کن یے یا یک مردمے لوگی جیڑہ ءَ لٹ شاپ کنگ بیت یا کساں امُریں زھگ ءَ کار گیپت ھر ھما کار زوراکی ءِ کہ ترا جانی ءُ ماژگی تاوان بہ دنت – جانی زوراکی ءَ تو چیزے روچ ءَ اسرمند بہ یے ءُ پدا وتی نارمل زندے گوازینے بلے ھما وڈ کہ مارا ماژگی نادراہ جوڈ کنگے جھد بوھگ ءَ انت – ھما وڈ کہ مئے دوستیگیں مردماں سالاں سال زنداناں بندیگ کن انت ءُ مارا ھما زند گوازینگ ءَ لاچار کن انت ھنچوش کہ ڈاکٹر دین محمد ءُ دگہ بیگواھیں مردم کہ دہ دہ سال انت بیگواہ انت – ما نزانیں کہ اے دھیں سالاں آھاں ورگ نسیب ءَ بوتگ یا ناں، آ سارت ءُ گرم ءَ رکینگ بوتگ انت یا ناں، آھاں وپسگ ءَ کل انت یا ناں – بلکنہ ھما آسراتی کہ بندیگاں دیگ بیت آ ھم دیگ نہ بنت – بلے آھانی ساڑی نہ بوھگ ءَ آھانی کھول، زھگ، لوگبانک آھانی مات ھما زند ءَ گوازینگ ءَ انت ھمک روچ پہ آھاں زوراکی یے – شمے پاد آھگ ءُ نندگ ورگ ءُ وپسگ، درسیں وشی یک زوراکی یے، ھنچیں زند ءِ کہ تو آئی ءَ گوازینگ نہ لوٹ ایت

سمی دین بلوچ ءَ گوشتگ کہ ما درسیں انسانی ھکانی ادارہ ھاسکر اقوام متھدہ ءَ دستبندیءُ لوٹ کن ایں کہ زورانسری آوارجنیانی بگیری ءَ توار چست بہ کن انت – بیگواھیں مردمانی کھول درساں گیشتر زوراکی ءِ آماچ انت – اگاں اے روچ راستی ءَ پہ نام ءِ نہ انت گڈا آھانی بگیری ءَ گامگیج زورگ بہ بیت – پاکستان ءَ ھما کنوینشن ءِ سرا دزنشان جتگ گڈا پسو بہ دنت کہ کجام کانود ءِ رِد ءَ مردماں آوار جنگ ءُ بیگواہ کنگ بوھگ ءَ انت –

بلوچستان ءِ دمگ ھب ءَ لوگے ءَ تیرگواری ءَ زالبولے بیران –

پولیس ءِ رد ءَ زالبول لوگ ءَ کار کنگ ءَ بیتگ کہ سلاہ بندیں مردماں تیرگواری کرتگ ءُ کُشتگ، تیرگواری ءِ وئیل یکشمبے ءِ روچ ءَ پیش اتکگ-

پولیس ءِ رد ءَ کوش ءِ سبب ٹکی سبب بیت کنت وئیل ءَ دزمانجنیں مردم تتکگ اَنت ءُ آیانی پٹ ءُ پول ءَ پولیس کنگ ءَ اِنت-

زانگ بہ بیت بلوچستان ءَ لوگی جیڑھانی سر ءَ گیرت ءِ نام ءَ زالبولانی کوش ھمک وھد ءَ بیگ ءَ اَنت بلے اے وڑیں وئیلاں ھواریں باز کم مردم کانون ءِ پنجگاں کپ ایت –

یک کچ ءُ کساسے ءِ رد ءَ پاکستان ءَ سال ءِ تہ ءَ یک ھزار ءَ گیش زالبول کُشگ بنت کہ آیانی تہ ءَ گیشتر گیرت ءِ نام ءَ کُش اَنت-

وئیل ءِ ھال ءِ سر بوگ ءَ پولیس سر بیتگ لاش اش چست کرتگ ءُ ھسپتال ءَ رسینتگ ءُ اود ءَ اژدری چار ءُ ٹپاس ءَ پد لاش کھول ءِ دست ءَ دیگ بیتگ-

نبشتانک: کِسھے گوں شھید شے مرید ءَ

نبشتہ کار: ھمراز شکاری

دی بلوچستان پوسٹ

کِسّہ ءَ پرّیچان کن آں، ما شش سنگت چہ اوتاک ءَ در کپت اِیں دیم پہ سپرے ءَ کہ ما اتک اِیں یک جاھے داشت ءُ وھد دیگر اَت ءُ ما چاھے گراست ءُ وارت ءُ گڑا دو سنگت شُت جھل ءَ پہ کارے ءِ ھاتر ءَ گڑا ما ھمد ءَ نشتگ اِت اِیں روچ کمو جھل تِر بوت ءُ ما وتی لوھیگ زُرت کہ بٹے گِرادیں لوھیگ شُشت پِر کت دان لھڑ ورگ ءَ اِت اَنت کہ سنگتے ءَ گوشت گرانی ءِ توار اِنت دیر نہ بیت جھازاں سر کش اِت ءُ گڑا من سنگتاں گوشت کہ چیزاں چیر بدے اِت کہ جھاز اِش مہ گندیت شیھو ءَ پہ بچکندگے پسو دات ءُ گوشت کہ اے ھاک نہ گند اِیت من گوشت اڑے بروسہ نیست گڑا من پاد اتک آں ءُ درستیں چیز چیر دات اَنت ءُ سنگتے ءَ گوشت تو برو آ جُمپ سر ءَ بہ چار کہ باریں کجانگُر رواں سنگت شت من شئے جان ءَ گوشت کہ اڑے شئے آ دوئیں سنگت جھل ءَ شتگ اَنت باریں چون بنت گوشت ئِے ھو گندے گڑا گوشیت بِریں من ءُ تو آ سنگتانی ھال ءَ گِریں من گُوشت کہ تو دگہ سنگتے زور ءُ برو من ھمد ءَ اے چیزاں ءُ آ دگہ سنگتاں سمبالاں شیھو ءَ گوشت اے سنگت کوہ توک ءَ اَنت پرواہ نیست تو بِریں من گوشت گڑا بسم اللہ کن گڑا ما دوئیں در کپت اِیں دیم سنگتاں شت اِیں-

جنگل ءَ ما سنگت ڈیک دات اَنت ءُ سنگتانی کر ءَ رسگ ءَ گوں نھنگ ءِ نیمگ ءَ تیرانی توار بُتک ءُ یک دو منٹ ءَ رند گڑا مندیگ ءِ نیمگ ءَ ھم تیرانی توار بندات بیت ما دوئیں سک پریشان بیت اِیں کہ آ سنگت ما یلہ دات اَنت کہ آ دوئیں کسانیں سنگت اَنت باریں چون بنت شیھو من ءَ گوشیت تو برو سنگتاں زیر ءُ بیا کہ پلان سنگت ءَ پون کتگ ءُ گوشتگ کہ وت ءَ جنگل ءَ کمے بدار اِت بِلے اے شور ءُ شار ھلاس بنت گڑا در کپ اِیں من گوشت من شمارا چون اِد ءَ یلہ بہ کن آں ءُ بہ رواں آ سنگت انگت کوہ ءِ دامن ءَ نشتگ اَنت شورے بیت کوہ ءَ زان اَنت شیھو جان ءَ من ءَ باز گوشت کہ تو برو مارا پرواہ نیست تو الم برو سنگتانی گور ءَ من گڑا راہ کپت آں کہ چہ شیھو ئیتاں کمے گستا بیت اَنت گڑا ھمدا من چہ واب ءَ پچ گڑ اِت آں داں چاراں من ھما جاہ ءَ واب بیتگ آں اِد ءَ شیھو کج اِنت ءُ من کجا آں؟-

اے منی واب اَت گوں شیھو ءَ دیستگ اَت، بلئے مُردنی شیھو ھمک واب، پاس، آگاھی ءُ ھمک جنگجاہ ءَ وتی ھمبلانی ھمراہ اِنت شیھو انگت سنگتانی ھمراھی ءَ سنگراں نشتگ ءُ جنگ کنگ ءَ اِنت، شیھو گُلزمین ءِ ھمک بو ءُ باساں ھوار اِنت ءُ داں ابد ھوار بیت پرچہ کہ اے آئی ئے مھرانی بَرورد اَنت کہ ھمک پاس مارا گوں ھوار کن اَنت –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچ راجی زْرمبشت (بی این ایم) ءِ نیمگ ءَ بیتگیں زھرشانی ءَ بھرزیروکاں لوٹ کرتگ کہ میان استمان بلوچستان ءِ سر ءَ پاکستان ءِ زوراکیانی جست ءَ بہ کنت پرچا کہ بلوچانی اگبال ھم آ دگہ مردماں برابر اَنت۔

شمبے ءِ روچ ءَ جرمنی ءِ شھر مونسٹر ءَ آزاردیستگیں مردمانی پلہ مرزی ءِ میان استمانی روچ ءُ نشہ ءُ آئی ءِ شپکی ءِ بگیری ءِ میان استمانی روچ ءِ دم ءُ درگت ءَ زھرشانی کنگ بیتگ، مراگش ءَ بلوچ راجی زْرمبشت بی این ایم ءُ بلوچ استمان گل بی آر پی ءِ باسکاں بھر زرتگ زھرشانی ءَ انگریزی ءُ جرمن زبان ءَ پنتاک بھر کنگ بیتگ پنتاک ھمود ءِ مردماں بلوچستان ءِ انیگیں جاور ءُ ھمروچ بلوچستان ءِ سر ءَ بیوکیں زوراکی ءِ بارہ ءَ جھان ءُ جرمنی ءِ نندوکیں مردماں آگاھی دیگ بیتگ زھرشانی ءَ بھرزیروکاں پہ زوریں بیگواھی ءِ بگیری ءَ اوگام جتگ ءُ چہ مردمی اگبالانی میان استمانی گلاں دزبندی کرتگ کہ بلوچستان ءَ چہ پاکستان ءِ نیمگ ءَ بیوکیں در مردمی روشت ءُ کارانی سر ءَ چہ پاکستان ءَ جست بہ کنت پرچا کہ بلوچانی اگبال ھم گوں آ دگہ مردماں برابر اَنت۔

ازگرالی ءَ دیمتر ءَ گْوشتگ کہ گْوستگیں دو دھکاں پاکستان ءَ ھزارھانی کچ ءَ بلوچ سیاسی، چاگردی کارکن ءُ زند ءِ آ دگہ تکاں سْیادی داروکیں مردماں پہ زوربیگواہ کنگ ءَ اِنت ءُ آ چہ سالاں پاکستان ءِ آزار جاھاں آزار سگگ ءَ اَنت۔ ڈاکٹر دین مھمد ءَ مروچی 13 سال اِنت کہ پاکستان ءِ چیریں ادارھاں چہ ھورناچ ءَ ڈیوٹی ءِ میان ءَ پہ زور بیگواہ کرتگ ءُ آئی ءِ جنک پہ وتی پت ءِ درا کنگ ءَ پاکستان ءِ دگانی سر ءَ در پہ در اَنت بلے بژنی گپ ایش اِنت کہ اے سیزدھیں سالاں آیاں ابید چہ دلپروشی ءَ دگہ ھچ نہ رس اتگ۔

بلوچ راجی زْرمبشت۔ بی این ایم جرمنی ءِ کمک سرکماش سمل ءَ منشیات ءُ آئی ءِ شپکی ءِ بگیری ءِ میان استمانی روچ ءِ بارہ ءَ گپ جنان ءَ گْوشتگ کہ سرجمیں جھان ءَ منشیات ءِ تالانی ءَ پاکستان ءُ آئی ءِ لشکر ءِ مزنیں دست اِنت۔ میان استمان ءَ منشیات ءِ تالانی ءِ مزنیں راہ چہ بلوچستان ءَ گْوز اَنت۔ بلوچستان ءِ دمگ آواران ءَ منشیات بھا کنوکاں پاکستان پلہ مرزی کنت۔ بلوچستان ءِ ھمک ھلک ءُ میتگانی مردم نشہ ءِ آماچ بیگ ءَ اَنت۔ مروچی ورنا نشہ ءِ بازیں کارمرد ءَ وڑوڑیں نادراھیانی آماچ بیگ ءَ اَنت۔ آیانی تہ ءَ زھنی نادراھی ، ڈپریش ءُ چہ ایشاں ابید بے روزگاری ھوار اَنت۔ ورنا راجانی باندات ءِ ساچکار اَنت بلے بلوچستان ءَ چک چک نشہ ءِ آماچ بیگ ءَ اِنت۔بلے پاکستانی ریاست وتی نوک آبادی شونداتانی مھکم کنگ ءَ نشہ ءِ ناراھیں باپار ءَ گیش کنگ ءَ اَنت داں بلوچستان ءِ باندات ءَ لوچ بہ کن اَنت۔ اے پہ زانتیں پندلے داں پاکستان وتی زورگریں بستار ءَ بلوچستان ءَ برجاہ داشت بہ کنت۔ بلوچستان ءِ مردماں چہ پیش ءَ پاکستان ءِ نیمگ ءَ سالاں سال زوراکی ءِ بگیری ءَ بے کساس دیمونی داتگ ءُ پاکستان چہ اے نشہ ءِ تالانی ءَ بلوچ راج ءَ تباھی ءِ نیمگ ءَ تیلانک دیگ ءَ اِنت۔

بی این ایم جرمنی تک ءِ کمک کارگشاد شارھسن ءَ گْوشتگ کہ پاکستان وتی زوراکیانی گڈی سیمسر ءَ سر بیتگ۔بلوچ جنیناں پہ زور بیگواہ کنگ ءُ آیاں آزار دیگ یک در مردمی روشتے ءُ جھان اے زوراکی ءِ بگیری ءَ گپ بہ جنت ءُ پاکستان ءَ بلوچ چکچینی ءِ سر ءَ جست بہ کنت۔

بی این ایم ءِ باسک سئید ءَ وتی تْران ءَ گْوشتگ کہ بلوچستان ءَ 40 ھزار ءَ گیش بلوچ پہ زوریں بیگواھی ءِ آماچ کنگ بیتگ۔ ھزارھاں بلوچانی ژانگولیں کنٹ ویرانگاں چگل دیگ بیتگ ءُ اے دْرچ ھم روچ برجاہ اِنت ۔ بازیں بلوچ ، نودربر داں جنین نشانگ کنگ بیتگ اَنت۔ھمک میتگ، ھلک ءُ وانگجاھاں پاکستانی لشکر مردماں بے میار ءَ دلسیاہ کنت۔ گڈی ءَ آیاں مردمی اگبالانی ادارھاں دزبندی کرتگ ءُ گْوشتگ ئِے کہ آ بلوچستان ءَ مردمی اگبالانی لگتمالیانی سر ءَ جست بہ کنت۔ پہ زوریں بیگواھیں بلوچاں پد جنگ ءُ پہ زوریں بیگواھیانی گر ءُ دار ءَ وتی کرد ءَ پیلو بہ کن اَنت۔

گپ جنوکانی تہ ءَ بدل بلوچ، ایمان بلوچ، بشیربلوچ، امجدبلوچ ءُ اھمد بلوچ ءَ بلوچستان ءِ سر ءَ بیوکیں زوراکانی سر ءَ گپ جتگ۔

گڈ سر ءَ بی این ایم جرمنی ءِ سرکماش ازگر ءَ زھرشانی ءَ بھر زیروکانی منت گیپتگ ءُ گْوشتگ کہ جرمنی ءَ نندوکیں بلوچانی زمہ واری اِنت کہ آ بلوچستان ءَ پاکستانی زوراکیانی بگیری ءَ گوں ھم پتی ءَ ھم دست بہ بہ اَنت ءُ جھان ءِ دیم ءَ پاکستان ءِ زوراکیاں پدر بہ کن اَنت۔

سربوتگیں ھالانی رِد ءَ بلوچستان ءِ دمگ نوشکی ءَ پیرا ملٹری فورس ایف سی ءَ یک مردمے تیرباران کُتگ ءُ کُشتگ وھدیکہ دو مردم آوار جتگ ءُ بیگواہ کتگ انت –

تیرگواری ءَ بیران بوتگیں مردمے پجار نور اللہ ء خالق داد جھمنند چمن ءِ نام ءَ بوتگ –

بیران بوتگیں نوراللہ ءِ کھول ءِ رِد ءَ اے مردماں چہ اوگانستان ءَ سامان پاکستان ءَ آرگ ءَ بوتگ انت کہ پوج ءَ تیرگواری کتگ ءُ یکے کُشتگ ءُ دو آوار جتگ ءُ گوں وت برتگ انت –

کھول ءِ رِد ءَ دوشی شپ شال ءَ جون مئے دست ءَ دیگ بوتگ، بلے تنی وھدی واکدارانی نیمگ ءَ اے درگت ءَ ھچ وڈیں درشان دیگ نہ بوتگ –

زانگ بہ بیت کہ بلوچستان ءَ مزنیں کچ ءَ مردم اوگانستان ءُ ایران ءِ سیمسراں باپاری کنگ ءَ انت –

گوستگیں روچاں چاگی ءِ دمگ دالبندین ءَ ھم ایف سی ءِ کارمنداں گاڑی ءِ سرا تیرگواری کتگ ات کہ چریشی ءَ گاڑی ءَ سواریں زالبول ءِ سک باز زدگ بوتگ ات –

وئیل ءَ پد مزنین کچ ءَ مھلوک ءَ زھرشانی کتگ ات ءُ پوج ءِ بگیری ءَ نارہ جتگ ات وھدیکہ پوج ءِ یک گاڑی ءِ ھم مانداشتگ ات ءُ ھمے میان ءَ زھرشانی کنوکاں ایف سی ءِ یک کارمند ءِ سرا لٹ شاپی کتگ ات چریشی ءَ آ بیران بوتگ ات –

وائس فار بلوچ مسنگ پرسنز ءِ زھرشانی بنجل ءَ مروشی چار ھزار ءُ شش سد ءُ ھشتاد ءُ چار سرجم بیتگ، بی ایس او پجار ءِ سروک زبیر بلوچ، سنا بلوچ ءُ بلال بلوچ اتکگ ءُ بنجل ءَ کھولانی گون ءَ پدردی اش درشان کتگ –

وی بی ایم پی ءِ وائس چیئرمین ماما قدیر بلوچ اتکگیں گپ کنان ءَ گوشتگ کہ اے گپ رد کنگ نہ بیت اِنت ورنا راج ءِ سرین ءِ ھڈ ءِ بستار ءَ دار ایت راجی جنزانی تہ ءَ جوانیں کرد پیلو کن اَنت اگاں راج بے جنگ ءَ تباہ کنگی اَنت گڑا ایانی ورنایاں نشہ ءُ دگہ سلکاریانی تہ ءَ یل کنگ ءُ راج وھد ءَ ھلاس بنت ابید جنگ ءَ گلامی ءَ من اَنت-

ماما قدیر بلوچ ءَ دیمتر ءَ گشتگ کہ بیگواھیں مردمانی کھولانی توار دودمانیں دنیا ءُ امریکہ راجپتراں سر بیتگ، پاکستانی ریاست ءُ دمگی نباشدیں پاٹیانی لیڈر شپ ءِ جاناں کِچُک کپتگ آ ھمے گوش اَنت ما پارلیمنٹ ءَ وتی ھکاں دست گر ایں بلے ورنا اے گپ ءِ منگ ءَ ساجو نہ اَنت بلوچ ورناہ ھمک رنگیں جیڑھانی دیمپان بیگ ءَ ابیگ پرامنیں جد ءُ جھد ءَ دزکشگ ءَ ابید وتی لوٹانی سر ءَ مھکمیں کوہ ءَ مک اَنت-

ماما قدیر بلوچ ءَ دیمتر ءَ گُشتگ کہ بلوچستان ءَ زورانسری بیگواھیں بلوچانی یل نہ کنگ ءِ ھلاپ ءَ بیگواھیں مردمانی کھولانی ھمراھی ءَ زھرشانی لڑ برجاہ داشتگ سال دوھزار ءُ یک ءَ بہ گر داں انیگ ءَ شست ھزار ءِ کچ ءَ بلوچ زالبول، زھگ، کماش ءُ ورنا گرگ ءُ گار کنگ بیتگ اَنت داں انگت ءَ بیست ھزار ءَ گیش زانگول کرتگیں لاش دزکپتگ اَنت بازیں کچے ءَ بلوچ تیرانی نشانگ کنگ بیتگ اَنت ءُ چریشی ءَ پد آ دیم پہ دیمی جنگ ءِ نام دیگ بیتگ اَنت بلوچستان ءَ انسانی ھکانی لگتمالی ھمک روچ ترند ءَ ترند لگتمال کنگ بیگ ءَ اَنت زورانسری آوار جنی ءُ زانگولیں جونانی دزکپگ ءِ کمی ءَ ابید گیش بیگ ءَ اَنت بیگواھیں مردمانی کھول ترندیں بیھارانی دیمپان کنگ بیگ ءَ اَنت سیکورٹی پورسز ءُ چیرین ادارہ ھچ کانون ءِ پاسدار نہ اَنت-