TBP Balochi

تربت ڈی بلوچ ءِ شھدگ ءِ سرا بیگواھیں مردمانی کھول ءِ نیمگ ءَ زھرشانی نندانک برجاہ، زھرشانی کنوکاں سی پیک دگ بند کرتگ ءُ زورانسری آوار جنگ بوتگیں مردمانی یل کنگے لوٹ کتگ –

گیشیں ھالانی رِد ءَ کیچ ءِ دمگ تربت ءَ ڈی بلوچ ءِ شھدگ ءِ سرا بیگواھیں مردمانی کھولاں زھرشانی کتگ ءُ دگ بند کرتگ، زھرشانی ءَ بیگواھین مردمانی کھول، سول سوسائٹی ءُ سیاسی ءُ چاگردی باسک ھم ھوار انت –

تربت ڈی بلوچ ءِ شھدگ ءِ سرا زھرشانی سوب ءَ ھردو نیمگاں گاڑیانی روگ آھگ بند انت بازیں گاڑی ءِ اشتاتگ –

زھرشانی کنوکانی رِد ءَ پاکستانی پوج ءَ نودربر نعیم ء رحمت بلوچ ءُ شفیق ء دلدار ھمے سال ءِ ھبدہ مارچ ءَ آوار جتگ ءُ بیگواہ کتگ انت – وھدیکہ ھمے میان ءَ تربت ءَ ھوار کش ءُ کری دمگاں ھم بازیں مردمے زورانسری آوار جنگ ءُ بیگواہ کنگ بوتگ کہ ھنگت دیما آرگ نہ بوتگ –

زھرشانی کنوکانی رِد ءَ دمگے تہ ءَ زورانسری آوارجنیانی درچ یکشل ءَ برجاہ انت اشی ءَ پیش بیگواھیں ورنایانی یل کنگے ھاتر ءَ زھرشانی کنگ بوتگ گڈا دمگی واکداراں زھرشانی میان ءَ گند ءُ نند کتگ ءُ چیزے روچ ءِ مھلت لوٹ اِتگ بلے آھانی وھد ءِ سرجم بوگ ءَ پد ھم بیگواھیں مردم دیما آرگ نہ بوتگ انت – ھمے سوب ءَ مرچی ما پدا زھرشانی کنگ ءَ لاچار بوتگ ایں –

بیگواھیں مردمانی کھول گرماگی ماہ ءُ روچاں ھم دگانی سرا نشتگ ءُ زھرشانی انت – کھولانی گوشگ انت کہ آھاں وتی بیگواھیں مردمانی زند ءِ درگت ءَ ترس ءِ دل ءَ شتگ – زھرشانی ابید پہ آھاں دگہ ھچی راہ نیست – مئے دوستیگیں مردم بید سوب ءُ.کتکاری ءَ آوار جنگ ءُ بیگواہ کنگ بوتگ انت – وھدیکہ ھک ءِ ھاتر ءَ دمگی واکدارانی گور ءَ شتگ ایں گڈا مارا تسلی دیگ بوتگ کہ زھرشانی ءَ ھلاس نہ کن ات بلے بازیں ودار ءَ پد ھم مئے دوستیگیں مردم دیما آرگ نہ بوتگ انت چریشی ءَ ما دوبر زھرشانی کنگ ءَ لاچار بوتگیں –

زھرشانی کنوکاں نودربراں ھوار دگہ بیگواھیں مردمانی یل کنگے لوٹ کتگ ءُ واکدار کڈن کرتگ انت کہ اے رندی تانکہ گامگیج زورگ نہ بوت ءُ کھول ردّ دیگ ءُ زھرشانی ھلاس کنگے جھد کنگ بوت گڈا ترندیں زھرشانی کن ایں –

بلوچستان ءِ ھر ھند ءُ دمگاں زورانسری آوار جنیانی درچ یکشل ءَ برجاہ انت وھدیکے ھمے زورانسری آوار جنیانی بگیری ءَ کراچی ءَ بیگواھیں مردمانی کھولاں بنجلے برجم کتگ ءُ وھدیکہ دگہ بنجل ءِ وی بی ایم پی ءِ سرپرستی ءَ شال پریس کلب ءِ دیم ءَ برجاہ انت –

کراچی ءِ زھرشانی بنجل ءَ چار روچ انت کہ برجاہ انت آ بیگواھیں مردمانی کھول ءُ بلوچ یکجھتی کمیٹی ءِ نیمگ ےَ برجم کنگ بوتگ – زھرشانی بنجل ءَ بیگواھیں عبدالحمید زھری ءِ لوگبانک ءُزھگ بیگواھیں سعید عمر ءِ مات، بیگواھیں عمران ءِ مات ءُ ڈاکٹر دین محمد بلوچ ءِ زھگ سمی دین ءَ ھوار دگہ بیگواھیں مردمانی کھول نشتگ انت –

کراچی زھرشانی بنجل ءَ زھرشانی ءَ نشتگیں بیگواھیں مردمانی کھولاں چہ سند ءِ سرکار ءَ لوٹ کتگ کہ جمہوری جھدے اھترام کنگ بہ بیت ءُ کانود ءُ رھبندانی رِد ءَ سند ءَ آوار جنگ بوتگیں مردم یل.کنگ بہ بنت اگاں ناں گڈا زھرشانیاں درچ گیش ءُ ترندتر کنگ بیت اِنت –

سربوتگیں ھالانی رِد ءَ بلوچستان ءِ دمگ بولان ءَ پاکستانی پوج ءَ کماشیں مردے زورانسری آوار جتگ ءُ بیگواہ کتگ –

آوار جنگ بوتگیں مردمے پجار حمزہ ء شکاری جھمنند لیس بولان ءِ نام ءَ چہ بوتگ –

اھوالکار ءِ رِد ءَ اے مرد گوستگیں روچ ءَ پاکستانی پوج ءَ مچ ڈگاری کراس ءَ مساپر کشیں گاڑی ءَ چہ ھما وھد ءَ ایرگپتگ ءُ گوں وت برتگ کہ شال ءَ روگ ءَ بوتگ –

بلوچستان ءَ زورانسری آوار جنیانی درچ یکشل ءَ برجاہ انت ءُ دومی نیمگ ءَ بیگواھیں مردمانی یل کنائینگے ھاتر ءَ زھرشانی ھم برجاہ انت –

ھمے زورانسری آوارجنیانی بگیری ءَ مروچی بیگواھیں مردمانی کھولاں تربت ءِ بنجاھی شھدگ ڈی بلوچ ءِ نندانک جتگ – کھول ءِ رِد ءَ آھانی زھرشانی تاں ھما وھد ءَ برجاہ بیت کہ آھانی دوستیگیں مردم یل کنگ نہ بنت –

زانگ بہ بیت ڈی بلوچ شھدگ تربت ءَ ھوار چہ کیچ ءَ بگر تاں گوادر ءُ سند ءِ دگہ دمگاں رؤت – اے شھدگ ءِ بند بوگ ءَ کیچ ءَ ھوار بازیں دمگ ءَ زمینی رؤگ آھگے راہ بند بنت –

دومی نیمگ ءَ مروچی بی این ایم ءِ رھشون ڈاکٹر دین محمد بلوچ ءِ زورانسری آوار جنی ءُ بیگواھی ءَ سینزدہ سال سرجم بوتگ انت ءُ ھمے درگت ءَ کراچی ءَ مراگش ءِ ھم برجم دارگ بوتگ –

نبشتانک: نگور ءِ دو سرمتابیں پِدائی

نبشتہ کار : جَنگی بلوچ

دی بلوچستان پوسٹ

اے سپر ھمے وڑ ءَ روان کنت داں وتی منزل ءَ بروت ءُ سر بہ بیت اے کِشک ءُ دَراں ھمینچو بزگی ءُ بے چاڑی ، ابیتکی ، مونجائی کئیت کہ مردم چہ وتی تہ ءَ ھم پُرشان ءُ ڈُران کنت باز وھد ءَ دمبرگ ھم کپ ایت ، بلے دُنیا ءِ سیر تِریں مردماں چہ یکے بل گیٹس اِنت کہ آ جاھے گُش ایت وھدیکہ دمبرگ کپ ئے یا دلپروش بے گُڑا ھمے بہ جیڑ کہ بندات کجام سوْب ءَ کُتگ پمیشکا اے سپرے مُساپراں وتی تہ ءَ وڑ وڑیں نگیگیں جاورانی نِدارگ ءِ ایر بَرگ در بُرتگ اے ھمے سپر ءُ ھمے منزل اِنت کہ دُنیا ءِ نامداریں چیر جنگی سرمچنڈ ارنسٹو چی گویرا ءَ ماں کیوبا ءَ گوں پیڈل کاسترو ءَ سپر کُت ، بھگت سنگھ ءَ گون وتی ھمبلاں ماں ھندوستان ءَ انگریزانی ھلاپ ءَ کُت ، ھوچی منہ ماں ویتنام ءِ ھاترا ھچ وڑیں کُربانی ءِ دیگ ءَ چَک ءُ پد نہ بیت یا ما بنگالی ءُ الجیریا ءِ درور ءَ بزیر ایں زمین ھما وھد ءَ دست ءَ در کپ ایت کہ پچیں چم کُور بیئگ ءِ نیمون ءَ بکن اَنت گُوش کَر ءُ زُبان ءَ گُنگ بہ بے وھدے کِسہ جنگانی کاینت گُڑا اے درگت ءَ بازیں زانتکار جنگ ءِ بابت ءَ نہ وشیں ھیال درشان کن اَنت پرچاکہ اے وَ ھکیکت ءِ کہ جنگ تبائی یے ، جنگ ءَ مردم تھنا بنت، وتی ھست ءُ نیستاں چہ زِبھر بنت بلے اے وڑیں جنگے ءَ پُشت کنزگ ءُ جھد ءَ چہ گِستا بیگ یک مزنیں گناھاں چہ گناھے بیت ناں ھُدا مارا بکش ایت گوں اے بدیں نیتّ ءُ نیکہ گْوستانک شھید واجہ کندیل سبا دشتیاری ءَ گُشتگ اَت گْوَستانک کسی رو ءُ ریا ءَ نہ کنت ، یکروچے کئیت کہ مردم ءِ گورجیگ ءَ گِر ایت ءُ گُش ایت آ وھد ءَ کہ تئی زلورت بیتگ تو کجا بیتگ ئے۔

منظور بسمل گُش ایت
“جنگ ءَ نُک زھر بنت “
“جنگ ءَ دِل کھر بنت”
“جنگ پہ زور بنت”
“جنگ وھدے سرا کپت پُشت ءَ مہ کنز”
“ناگھاں دژمن ءِ تیر پُشت ءَ بہ لگ ایت شگانی بہ بے”

تھنا مئے دودانی تہ ءَ جنگ ءَ پُشت کِنزگ ائیب ءُ شگانی نہ اِنت ایش دُراھیں راجانی دود ئِے تہ ءَ ھست اِنت پرچا کہ اے جنگ ءَ ننگ ءِ گپ اِنت اِد ءَ پُشت کِنزگ ءَ راجانی کم شرپی بیت مردم بے لوگ ءُ جاگہ بیت ھپتاد سال ءَ گیش بنداتیں جنگ تنیگا وتی سپر ءَ اَنت زمین ءِ بچ پہ شان ئِے وتی مات ئِے ھک ءَ پیلو کنگ ءَ اَنت اے جنگ ءَ ھزار دروشمیں سر متاب اتکگ ءُ رپتگ اَنت پہ وتی بانداتاں سر اِش کُربان کُتگ اَنت بلے چو آ دگے مردماں زندمان پہ واھشتانی پُشت ءِ کپگ ءَ نہ گوازینتگ ئِے ھمے وڑا دو راجی بامرد کہ پدائی رم ءَ ھوار ات انت یکے ءَ اسٹاک ایکسچینج کراچی ءَ گوں چیزے ھمراھاں جنگ دات ءُ دومی ءَ ماں نوشکی ءَ دو روچ جنگ دات ءُ دژمن ءِ ارواہ دپا آرت ءُ آئی ءِ قد اِش پیشداشت اے دویں زمین آشکاں دژمن ءَ را ھمے کلوہ دات کہ ما زمین آشک ایں پہ وتی زمین ءُ آئی ءِ مھلوک ءَ ھرچی کت کن ایں۔ پیش ءَ مردماں گشتگ سنگ گوں سر ءَ میڑینگ نہ بیت ، بلے مۓ ورناھاں سر گوں سنگ ءَ میڑینتگ وتی جاہ ءَ بلکیں سنگ ءَ پروشتگ ھم اے دویں سرمتاب نگور ءِ نندوک اَنت ھمے نگور ءِ کہ گلام ھسین شوھاز ءَ وتی کسانی ھمودا گوازینتگ، پرائی ءِ یات ءَ ھمینچو شئر پِر بستگ داں دنیا ءَ سپر کنت بلے پہ نگور ئےِ زید ءُ کوچگاں آئی ءِ تُن ھما وڑ برجاہ اَت شھید مسلم، جت نگور ءَ وتی چماں پچ کنت ، شھید ءِ مات ءُ پت آئی ءِ کسان امبری ءَ گوں بیران بنت بزانکہ شھید وتی زندگی ءَ پہ چورھی گوازینیت شھید پدائی مسلم وتی زندمان ءِ گیشتریں وھد ءَ ماں ساربانے ءَ تیلینیت ،گوں چیزے اُشتر ءَ مدام کوہ پہ کوہ بیت ساربانی کنت دومی سرمتاب شھید انیل اَت کہ آ درچکوہ نگور ءَ ودی بیت ھپت مکتب ءِ وانگ ءَ پد وتی زمین ءِ پھازگ ءَ در کپ ایت شھید انیل باز کسان اَت بلے ھر دو دل ءَ مزن ءُ زیبائیں کردانی ھُدا بند اِت اَنت راجانی ورنائیں کارست مدام ھرچ شریں کاراں دیما بنت آ گوں کاڑاں چنچو مھروان بنت ،ھمے دروشم ءَ گوں زمین ءَ ھم مھروان بنت ءُ گوں زمین ءَ چو شے ءُ ھانی ءَ آشک بنت سقراط ءَ جنگ ءُ ایمنی ءِ بابت ءَ گشتگ اَت جنگ ءَ مدام ورنایانی جون ماں پیرینانی کوپگ ءَ بنت ھمے وڑا ما گندگ ءَ ایں کہ مئے آجوئی جنگ ءَ ورنایانی سرپ اولی اِنت نگور ءِ دمگ چوناھا آئی ءِ زبْیائیں ندارگ ءِ ھمرائی ءَ گوں لبزانتاں نامدار اَت ، بلے مروچاں وتن دیوانگانی ھنکین ھم گُشگ بیت اودے مھلوک پھر بند ایت پہ شھید انیل ءُ شھید مسلم ءَ ھوار گوں آ دگے شھیداں اے دویں پدائیاں وتی لس مھلوک ءِ تہ ءِ تُرس پہ دژمن ءِ ناشرکاریاں ود اِتگ اَت ، آ چہ تہ ءَ در کت ءُ آھاں اے کلوہ دات کہ گوں زمین ءَ مھروانیں کارستانی دیمپانی ءَ کس کت نہ کنت اے دژمن ءِ زور تاکت تھنا پہ زالبول ءُ ایندگہ لس مھلوک ءَ ھست اِنت بلے مئے گورا آئی ءَ ایمان درو ایت مروچی ھمے ورنایانی کربانی ءِ مُز اِنت ءُ آھانی مزن مردی کہ دژمن ءِ شپانی واب ءُ آرام بیگواہ اِنت ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ ضلع ھرنائی ءِ دمگ شاھرگ ءِ نندوک بی بی حاجرہ ءَ بیگواھیں بلوچانی یل کنائینگ ءِ ھاتر ءَ کار کنوکیں گل وائس فار بلوچستان مسنگ پرسنز بُنجل ءَ اَتکگ ءُ وتی لوگ واجہ مجیب الرحمٰن ء عبدالرحمٰن درگت ءَ سرپدی یے کاگد داتگ –

بیگواھیں مجیب الرحمن ءِ لوگ بانُک ءَ بھتام جتگ کہ شش ماہ ءَ ساری پیرا ملٹری فورس ( ایف سی) سی ٹی ڈی ءُ چیریں ادارھانی کارندھاں آئی ءِ لوگ واجہ چست کتگ ءُ ناشناسیں جاھے ءَ برتگ ئِے –

آئی ءَ گْوشتگ کہ ھمے روچ ءَ آ سُھب ءِ ساھت ھشت ءَ چہ لوگ ءَ درتکگ ءُ اشکر چاتجناں برگ ءَ بوتگ کہ پوج ءَ چست ءُ کتگ بیگواہ کتگ-

آئی ءَ ٹاہ جتگ پوج ءَ اود ءِ ساڑی ئیں مردم بیھار داتگ اَنت کہ اگاں کسی منّانک دنت آ ھم چست کنگ ءُ کُشگ بیت-

زانگ بہ بیت بلوچستان ءَ زورانسری آوار جنی ءِ وئیل ھمُک روچ دیم ءَ آھگ ءَ اَنت، راجدوست ءُ انسانی ھکانی ادارہ پاکستانی پوج ءُ چیریں ادارھانی سر ءَ بھتام جن اَنت کہ مردمانی چست کنگ ءَ تچکی ءَ ھوار اَنت بلے پوج ءَ اے گپ رد کتگ –

گوستگیں روچ ءَ پاکستان وفاقی وزیر ءُ انسانی ھکانی ریاض پیرزادہ ءَ یک چُست پُرسے ءِ میان ءَ اے بھتام جتگ کہ بیگواھیں مردم ھمساھگیں ڈیھ ءَ پناہ زرتگ اِت ءُ اشانی تہ ءَ لھتے ناشرکار بیڑاں جنگ بوتگ اَنت کہ آیانی کلبھوشن یادیو یا ھمساھگ ڈیھاں ھال ایوال بوتگ اِت-

اے وزیر درشان سر ءَ بیگواھیں ڈاکٹر دین محمد ءِ جنک ءُ وی بی ایم پی ءِ راھشون سمی دین ءَ ایر جتگ ءُ چاگردی رسانکدر ءَ نبشتہ کتگ کہ شرم ءِ یک ھندے کہ اے ڈیھ ءِ انسانی ھکانی وزیر اے گوش اِیت لاچاریں مردم کلدار ھاتر ءَ ھمساھگیں ڈیھ ءِ دست ءَ کارمرز بوگ ءَ اَنت ” زورانسری آوار جنی ءِ پلامرزی ءَ کنگ ءَ اِنت-

آئی ءَ دیمتر ءَ نبشتہ کتگ کہ زورانسری آوار جنی ءِ جیڑہ ھرچ وڑیں چادر پر دے اِت ءُ ھرچ وڑیں سبب بیار اِت بلے زورانسری آوار جنی بے کانودی اِنت –

گوستگیں سینیٹر افراسیاب خٹک ءَ اے درشان ایر جتگ ءُ نبشتہ کتگ کہ اے وزارت انسانی ھکانی کرسی ءَ چونیں نادُراھی یے کہ اشی ءِ سر ءَ نندوکیں زوت انسانی ھکانی بگیر بنت، زالم ءَ ایردست ءُ ایردست ءَ زالم سرپد بوگ ءِ جُھد ءَ کن اَنت، نو ڈاکٹر گوشت کن اَنت الاج واستا کرسی سر ءَ بہ بیت یا وزیر سر ءَ-

سند ءَ زورانسری آوار جنگ بوتگیں مردمانی بگیری ءَ توار چست کنوکیں گل وائس فار مسنگ پرسنز آف سند ءِ سرکماش سورٹھ لوہار ءَ رسانکدراں وتی شنگ کرتگیں درشان ءِ تہ ءَ گوشتگ کہ اولی رند انت کہ پاکستان ریاست ءَ بیگواھیں مردمانی کوش منّ اِتگ – اقوام متحدہ، ایمنسٹی انٹرنیشنل، ریڈکراس ءُ ایشین ہیومن رائٹس کمیشن ءَ ھوار سرجمیں دنیا ءِ انسانی ھکانی ادارہ اشی ءِ سرا گامگیج بہ زور انت –

وائس فار مسنگ پرسنز آف سند ءِ سرکماش ءِ نیمگ ءَ شنگ بوتگیں درشان ءِ رِد ءَ پاکستان ءِ انسانی ھکانی وفاقی وزیر ریاض پیرزادہ ءَ اولی رند ءَ چہ ریاست ءِ نیمگ ءَ اے گپ جتگ کہ بازیں بیگواھیں مردمے کُشگ بوتگ ءُ آئی ءَ بیگواھیں مردمانی سر ءَ ھمے بھتام جتگ کہ آھانی تہ ءَ بازیں مردمے ھمساھگیں ڈیھ ءُ آئی ادارھاں ھوار کلبھوشن یادو ءَ گوں ھال اھوال ءَ بوتگ انت ءُ بازیں بیگواھیں مردمے ءِ دست ناشرکاری ءِ وئیلاں ھوار بوتگ انت آ درست پوج ءِ دست ءَ کُشگ بوتگ انت –

سورٹھ لوہار ءِ گوشگ انت کہ روچ مروچی دنیائے درسیں میان استمانی ادارہ ءُ امیدگساں پاکستان ءِ ریاستی نمائندگ بیگواھیں مردمانی جیڑہ سرءَ ھمے گوش انت کہ ما ھچ ءَ سرپد نہ ایں بلے اے اولی رند انت کہ پاکستان ءِ انسانی ھکانی وزیر ریاض پیرزادہ ءَ اھوالکاراں گوں تران کنان ءَ دپ ءِ وت منّ اِتگ کہ بیگواھیں مردم ریاستی پوج ءِ دست ءَ کُشگ بوتگ انت –

وائس فار مسنگ پرسنز آف سند ءِ سرکماش سورٹھ لوہار ءَ گوشتگ کہ ریاض پیرزادہ ءَ چہ ریاست ءِ نیمگ ءَ بیگواھیں مردمانی سر ءَ دروگیں بھتام جتگ ءُ آھانی کوش ءِ زمّہ واری منّ اِتگ – اے درسیں بیگواھیں مردم کہ آھانی سر ءَ ھچ وڈیں کتکاری ءِ کیس ثابت نہ بوتگ آھانی کوش ءِ زمّہ واری منّگ بوگ ءَ انت – نوں ما کجام امیت ءَ اے وڈیں ریاستی ادارھاں سرا بیگواھیں مردمانی یل بوھگ ءُ آھاں ھک دیگے اوست ءَ بہ داریں – آئی ءَ گوشتگ کہ نوں پاکستان ءِ ریاست دیما آھگ ءُ جار جنگ انت کہ ما بیگواھیں مردم کُشتگ انت –

سندی رھشون ءِ گوشگ ات کہ ما چہ اقوام متحدہ ق ایمنسٹی انٹرنیشنل، ریڈکراس، ایشن ہیومن رائٹس کمیشن ءَ ھوار درسیں میاں استمانی ءُ انسانی ھکانی ادارھاں چہ لوٹ کن ایں کہ سند ءُ بلوچستان ءَ ھزارانی کچ ءَ بازیں سیاسی ءُ چاگردی ءُ راجدوستیں باسک پاکستانی پوج ءَ زورانسری آوار جتگ ءُ بیگواہ کتگ انت – میاں استمانی ادارہ انسانی ھکانی بنیاد ءَ وتی کمیشنز ءُ اسپیشل ٹاسک فورس ءِ اڈ بہ دنت ءُ پاکستان ءَ میان استمانی آمیدگس ءَ دیما بیاریت – سند ءُ بلوچستان ءَ زورانسری آوارجنی ءُ انسانی ھکانی لگتمالی سرا میاں استمان وتی سیاسی ءُ سفارتی کرد ءَ پیلو بہ کن انت –

شال ءَ زورانسری آوار جنگ بوتگیں ورنا سی ٹی ڈی ءَ چہ ڈیرہ بگٹی ءَ دزگیر کنگ ءِ ٹاہ داتگ –

کاؤنٹر ٹررزم ڈپارٹمنٹ (سی ٹی ڈی) ءَ چہ ڈیرہ بگٹی ءِ دمگ سوئی ءَ یک مردمے گوں سلاہ ءُ تراکناکیں شوروانی ھمراھی ءَ دزگیر کنگ ءِ ٹاہ داتگ – دزگیر کنگ مردم ءِ پجار عبدالباسط ء عبدالغنی ءِ جھمنند ھزدار ءِ نام ءَ چہ بوتگ – بلے دزگیر کنگ بوتگیں ورنا ءِ نزیکیں مردمے ءِ گوشگ انت کہ عبدالباسط چار ماہ ساری چہ شال ءَ زورانسری آوار جنگ بوتگ –

عبدالباسط ءِ نزیکیں اھوالکار ءِ رِد ءَ باسط ھبدہ فروری ءَ شال ءِ دمگ جیور کالونی ءَ پاکستانی پوج ایف سی ءُ چیریں ادارھانی کارمنداں چہ جندے گس ءَ بیڑ برتگ ءُ گوں وت برتگ –

باسط ء عبدالغنی زورانسری آوارجنی ءِ ھال پیش ءَ ھم آئی ءِ نزیکیں مردمانی نیمگ ءَ رسانکدراں دیگ بوتگ –

زانگ بہ بیت سی ٹی ڈی ءَ پیش ھم دزگیری ءُ دروگیں میڑ ءَ کوش ءِ ٹاھانی زمّہ واری منّ اِتگ – اشی ءَ پیش ھم سی ٹی ڈی ءَ ھزدار ءَ نودربر حفیظ بلوچ بلوچستان ءِ دمگ نصیرآباد ءَ گوں تراکناکیں شوروانی ھمراھی ءَ دزگیری زاھر کتگ –

کاؤنٹر ٹررزم ڈپارٹمنٹ نیمگ ءَ حفیظ بلوچ مجسٹریٹ دیما پیش کنگ بوتگ ءُ بی ایل اے ءَ گوں سیادی دارگے بھتام ھم جنگ بوتگ – وھدیکہ ھنو حفیظ بلوچ نصیرآباد پولیس تانہ ءَ بندیگ انت ءُ آئی ٹرائل برجاہ انت –