TBP Balochi

اوگانستان ءِ رودراتکی دمگاں اتکگیں زمین چَنڈ ءَ 130 مردم ءَ گیش مرگ ءِ ارجان بیتگ اَنت، درستاں گیش تباھی اُستان پکتیکا ءَ بیتگ،گوستگیں شپ ءَ اتکگیں زمین چنڈ ءَ یک ھزار ءُ دو سد ءُ پنجاہ مردمانی زدگ بیگ ءِ ھال اِنت، ریسکیو کارمنداں کمکی کار بندات کتگ اَنت-

خبررساں ایجنسی رائٹر ءِ رد ءَ امریکی جیولوجیکل سروے ءَ گشتگ سَے شمبے ءُ چار شمبے ےِ میانی شپ ءَ اتکگیں زمین چنڈ پاکستان ءُ اوگانستان ءِ گنجان آباد ءِ دمگ چَنڈینتگ اَنت-

ریکٹت اسکیل ءَ زمین چنڈ ءِ زور شش ٹِک اشاریہ بیتگ ءُ اشی ءِ بنجاہ ھوست ءِ شھر ءَ چِل ءُ چار مِیل دوری ءَ بیتگ ءُ پنجاہ ءُ پنچ میل زمین ءِ چیر ءَ بیتگ-

جارکش امارت اسلامی اوگانستان ذبیح اللہ مجاھد ءَ گوشتگ کہ کابل ءُ ابید پکتیکا، پکتیا غزنی، میدان وردک، لوگر، ھوست، لغمان ءُ ننگرھار اُستان زمین چنڈ ءَ اسرمند کتگ اَنت-

طالبان انتزامیہ ءَ ڈیزاسٹر مینجمنٹ اتھارٹی ءِ سروک مھمد نسیم ھکانی ءَ زمین چنڈ ءَ یک سد ءُ سِی مردمانی بیرانی ءِ ھال راست کتگ –

آئی ءَ گُشتگ کہ گیشتر بیرانی اُستاب پکتیکا ءَ بیتگ اَنت اود ءَ سد ءَ گیش مردم بیران ءُ دو سد ءُ پنجاہ مردم زدگ بیتگ اَنت-

آئی ءَ گُشتگ کہ اشی ءُ ابید اُستان ھوست ءَ بیست ءُ پنچ مردم ءُ ننگرھار ءَ پنچ مردم بیران بیتگ اَنت گیشیں بیرانیانی گیشیں سرپدیانی واستا پَٹ ءُ پول بیگ ءَ اِنت-

اوگانستان ءِ رودراتکی شھراں بیتگیں زمین چنڈ ءَ پد بازیں کچے ءَ لوگانی دیوال کپتگ اَنت-

زمین چنڈ ءِ جُمبگ پاکستان ءَ سما کنگ بیتگ بلے اود ءَ دگہ جانی تاوانانی ھال سر نہ بیتگ اَنت-

بیگواھیں بلوچ باسک راشد حسین ءِ پاکستان دست ءَ دیگ ءُ زورانسری آوار سَے سال سرجم بوگ ءَ شال ءَ زھرشانی کنگ بوتگ – زھرشانی ءَ نودربرگلانی باسک ءُ ساسی باسکاں ھوار بیگواھیں مردمانی کھولاں بھر زرتگ –

زھرشانی کنوکانی دست ءَ پلے کارڈ ءُ بینرز بوتگ انت کہ آھانی سرا راشد حسین ءُ دگہ بیگواھیں مردمانی یل کنگے لوٹ نبشتہ بوتگ انت –

راشد حسین بیست ءُ شش دسمبر دوھزار ھژدہ متحدہ ارب امارات ءَ ھمودے چیریں ادارھاں دزگیر کتگ ناشناسیں جاہ ءَ برتگ کہ پدا رند ءَ بیست ءُ دو جون دوھزار نوزدہ ءَ بلوچ باسک پاکستان ءَ آرگ بوتگ – راشد حسین ءِ کھول ءِ رِد ءَ راشد پاکستان ءِ واکدارانی گوشگ ءِ پد ءَ امارات ءَ گیرکانودی پاکستان ءَ دیم داتگ – وھدیکہ راشد حسین ءِ جان ءَ پاکستان ءِ تہ ءَ ھترہ بوتگ کہ در پہ دری زند گوازینگ ءَ بوتگ –

زانگ بہ بیت راشد حسین ءِ پاکستان آرگے راستی کاؤنٹر ٹیررزم ڈپارٹمنٹ سی ٹی ڈی کراچی ءِ انچارج عبداللہ شیخ ءَ یک ٹی وی رسانکدر ءَ داتگ – آئی گوشتگ کہ راشد حسین انٹر پول ءِ زریہ ءَ پاکستان ءَ آرگ بوتگ –

زھرشانی ءَ تران کنان ءَ راشد حسین ءِ مات ءِ گوشگ ات کہ متحدہ ءِ عرب امارات ءَ زورانسری آوار جنی ءَ پد منی زھگ دیما آرگ نہ بوتگ – راشد حسین ءِ مات ءِ رِد ءَ آئی ءَ بلوچستان ءَ بؤکیں زوراکیانی سرا گپ جنگے سوب ءَ آوار جنگ بوتگ – آئی ءَ گوشتگ کہ اگاں منی زھگے سرا الزام ءِ ھست آمیدگس ءَ آرگ بہ بیت –

راشد حسین ءِ مات ءَ دیمتر ءَ گوشتگ کہ زھگے یل کنگے ھاترءَ کمیشنز ءُ آمیدگساں کیس ھم فائل کتگ بلے ھچ وڈیں امیت نیست – سردار اختر ءُ مریم نواز ھردے کہ اپوزیشن ءَ بوتگ انت گڈا گوں من کول ءِ کتگ زھگ ءَ یل کنائین ایں وھدیکہ نوں آھانی سرکار انت بلے بیگواھیں مردمانی درگت ءَ گپ ءِ ھم نگوش انت – راشد حسین ءِ مات ءَ سرکار ءُ دمگی نمائندگاں لوٹ کتگ منی زھگ آمیدگس ءَ آرگ بہ بیت ءُ آئی ءَ ھک دیگ کمک کنگ بہ بیت –

زھرشانی ءَ تران کنان ءَ مستونگ ءِ جھمنند بیگواھیں سعید احمد ءِ مات ءَ گوشتگ کہ منی زھگ ھنگت دیما آرگ نہ بوتگ ـ زھگے بیگواھی ءَ زند ازاب ءِ تہ ءَ گوزگ انت بلوچستان ءِ نمائندگ وتی کتگیں کول ءَ سرجم بہ کن انت ءُ مئے دوستیگیں مردماں یل بہ کنائیناں –

زھرشانی ءَ تران کنان ءَ وائس فاربلوچ مسنگ پرسنز ءِ سرکماش نصراللہ بلوچ ءَ گوشتگ کہ بلوچستان ءِ تہ ءَ زورانسری آوار جنیانی تہ ءَ گیشی اتکگ مردمانی یل کنگے بدل ءَ زورانسری آوار جنگ بوگ ءَ انت وھدیکہ مزن وزیر ادا اتکگ گوشتگے کہ تاکتورانی گوم ءَ بیگواھیں مردمانی یل کنائینگ ءَ گپ جن ایں ـ ما نزانیں ملک مزن وزیر تاکتور کئیں –

نصراللہ بلوچ ءَ گوشتگ کہ بیگواھیں مردمانی کھول ھمک روچ وتی زھرشانیاں نبشتہ کنائینگ انت تانکہ ھمے تبک ءَ آھانی توار سر بہ بیت بلے ادا ھمے کھولانی داد رسی کنوک ھم نیست –

زھرشانی کنوکاں بلوچستان ءَ بیگواھیں مردمانی یل کنگے لوٹ کتگ وتی زھرشانی ھلاس کتگ گوشتگ اگاں بلوچستان ءَ زورانسری اوار جنیانی درچ دارگ نہ بوت گڈا زھرشانیانی درچ ترندی ءَ گوں برجاہ داریں –

بلوچستان ءِ بنجاھی شھر شال ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زورانسری آوار جنیانی بگیری ءَ زھرشانی بنجل برجاہ، زھرشانی ءَ بنجل ءَ مروچی چار ھزار ءُ شش سد ءُ ھپتاد ءُ نُھ روچ سرجم بوتگ انت –

زھرشانی بنجل ءَ مروچی ماما قدیر بلوچ ءِ ھمراھی ءَ بیگواھیں راشد حسین بلوچ ءِ مات ءُ دگہ کھول ساڑی بوتگ انت –

ھمے وھد ءَ بی ایس او پجار، بی ایس او ءُ دگہ سیاسی ءُ چاگردی باسکاں بنجل ءَ اتکگ ءُ دلپدردی درشان اتگ –

گل ءِ کمک سرکماش ماما قدیر بلوچ ءَ گوشتگ کہ بلوچستان ءَ زوراکیانی درچ ھچبر ھلاس نہ بوتگ، مروچی ھم پاکستانی پوج ءَ وتی داشتگیں کشندہ ٹولیانی ھمراھی ءَ بازیں دمگاں لشکر کشی ءُ زوراکی کتگ ءُ زورانسری آوار جنیانی درچ برجاہ داشتگ –

آئی ءَ گوشتگ کہ بلوچستان ءَ ھوار کراچی ءِ تہ ءَ ھم یک دو ماہ انت کہ زورانسری آوار جنیانی تہ ءَ گیشی آرگ بوتگ –

ماما قدیر ءَ گوشتگ کہ پاکستانی ریاست ءَ میاں استمانی انسانی ھکانی کانود لگتمال کتگ انت بلے آئی ءَ جست پُرس کنوک نیست – انسانی ھکانی گلانی درشان بس کاگزی جوڈ بوتگ انت – انسانی ھکانی درگت بلوچستان بلیک ھول جوڈ بوان انت استمانی ءُ میاں استمانی رسانکدر بلیک آؤٹ انت درساں وتی چم بستگ انت –

انسانی ھکانی ادارھانی نیمگ ءَ گامگیج زورگ ءُ جار جنگ ءَ ابید ھم ناکہ انسانی ھکانی بگیری دارگ ءَ کمی اتکگ ناکہ آئی ءِ سرا گامگیج زورگ بوگ انت –

آئی ءِ گوشگ ات کہ ما درسیں بیگواھیں مردمانی کھولاں گوں دستبندی کنیں کہ وت بیا انت ءُ وتی دوستیگیں مردمانی ھاتر ءَ زھرشانی نبشتہ بہ کنائیناں –

بلوچستان ءِ دمگ چاگی ءِ ھند دالبندین ءِ نزیک ءَ ڈھڈر ءَ پاکستانی پوج ءَ یک زمباد گاڑی ءِ سر ءَ تیرگواری کتگ ءُ یک زالبولے زدگ کتگ-

گیشین ھالانی رد ءَ سَے شمبے ءِ بیگاہ ءَ ایف سی ءِ کارندھاں یک گاڑی ءِ سر ءَ تیرگواری کتگ ءُ چریشی ءَ گاڑی ءَ سواریں زالبولے زدگ بیتگ –

وئیل ءَ پد مھلوک برانز گپتگ ءُ زھرشانی کنان ءَ لشکریانی ھلاپ ءَ اوگام اش جتگ ءُ ھواریں برانزگپتگیں مردماں ایف سی ءِ یک گاڑی ءِ مانداشتگ ءُ لٹ ءُ کٹانی وھد ءَ ایف سی ءِ یک کارندھے بیران بیتگ-

دی بلوچستان پوسٹ پتر ھال ءَ سر بیتگیں ھالانی رد ءَ زگ بیتگیں زالبول بنداتی درمانی ءَ پد شال ءَ برگ بیتگ ءُ جاور ناگیگ گوشگ بیگ ءَ اَنت گیشیں لشکری دمگ ءَ سر بیتگ اَنت-

زانگ بہ بیت ھمے سال ءِ اپریل ءَ دالبندین ءَ پاکستانی پوج ءِ تیرگواری ءَ چہ ڈرائیورے بیران بیتگ اَت ءُ دمگ ءَ مھلوک برانز گپتگ اَت ءُ ایف سی ءِ چیک پوسٹ اش آس داتگ اش ئِے تیرگواریاں بازیں مردمے زدگ بیتگ اَت-

بلوچستان ءَ چہ جتاھیں وھداں زورانسری آوارجنی ءِ آماچ بیتگیں ھشت مردم دیما آرگ بیتگ اَنت کہ اشانی تہءَ چار مردم نوشکی ءَ سی ٹی ڈی ءِ دزگیری ءَ اَنت ءُ وھدیکہ ایندگہ چاریں مردم یل بیتگ ءُ وتی لوگاں سربیتگ اَنت۔

نوشکی ءَ سی ٹی ڈی ءِ دستءَ دیگ بیتگیں مردمانی تہءَ پیرجان ء سردو جھمنند ایرو، پسند علی ء چار شمبے جھمنند کساک بلیدہ عبدالصمد ء رحیم بخش جھمنند ایریکان ءُ پھلان جان ء خدا بخش ھوار اَنت۔ داں انگت چہ پولیس ءِ نیمگ ءَ اے مردمانی سرءَ ھچ پئیمیں کیس ءِ اھوال رسانکدر ءَ دیگ نہ بیتگ اَنت۔

چہ پنجگور ءَ بیگواہ بیتگیں دو برات ارشاد ءُ شرافت ء محمد عوض جھمنند شاھو کہن یل بیتگ اَنت ءُ وتی لوگ ءَ سر بیتگ اَنت، دوھیں یل بیتگیں مردم لھتیں روچاں پیسر لشکریاں دزگیری ءَ پد ایف سی کیمپ ءَ بُرتگ بیتگ اَنت۔

ارشاد ءُ شرافت ءِ لشکریانی دست ءَ زورانسری بیگواھی ءِ بگیری ءَ آئی کھول ءَ سی پیک دگ ءِ سرءَ زھرشانی ننداک داتگ بیتگ۔

ھمے پئیم ءَ جنزوکیں سال ءَ چہ تُربت ءَ دزگیری ءَ پد بیگواہ بیتگیں نودربر حفیظ بشیر ءُ ابرار بلوچ گوستگیں روچ ءَ یل بیتگ ءُ وتی لوگاں سر بیتگ اَنت۔

بلوچستان ءِ دمگ ھزدار ءَ گوستگیں شپ ءَ ناشناسیں مردماں سردار ءِ لوگ ءِ سر ءَ اُرش کرتگ-

اُرش ھزدار ءِ دمگ زھری چشمہ ءَ پیش اتکگ،دمگی مردمانی رد ءَ گوستگیں شپ ءِ ساھت یک ءُ چِل دمان ءَ زھری چشمہ سمری ءَ ناشناسیں مردماں حاصل خان جتک ءِ لوگ ءِ چاریں نیمگاں اُرش کتگ ءُ تیرگواری کتگ، یک ادارے ءَ داں ھردوکیں نیمگاں تیرگواری ءِ درچ برجاہ بیتگ ھمے وھد ءَ راکٹ ھم کارمرد کنگ بیتگ اَنت-

دمگی مردماں ھال راست کنان ءَ گوشتگ کہ دگہ جانی تاوانانی ھال نہ بیتگ اَنت ءُ بلے حاصل خان ءِ لوگ ءَ تاوانبار بیتگ –

تنی وھدی وئیل ءِ بارو ءَ دگہ سرپدی نہ بیتگ –

ھمے وڑ ءَ ھاران ءَ سلاہ بندیں مردمانی تیرگواری ءَ یک مردمے بیران بیتگ –

ھالانی رد ءَ ھاران ءِ دمگ کلان سید ءَ ھیدر شاہ مسیت ءِ نزیک ءَ سلاہ بندیں مردمانی تیرگواری ءَ لیویز کارمند عبدالرحمٰن ء یار مھمد ملازئی بیران بیتگ-

پولیس ءَ لاش چست کرتگ ءُ ھسپتال ءَ سر کرتگ ءُ دگہ گیشیں پَٹ ءُ پول کنگ ءَ اِنت-