TBP Balochi

سرجمیں بلوچستان ءَ ھورانی گوارگ ءِ درچ یکشل ءَ برجاہ اَنت، شال ءَ ھوار جتاجتائیں دمگاں لوگانی چھت ءُ دیوالانی کپگ ءِ سبب ءَ بیست ءُ ھشت مردم بیران بیتگ اَنت ءُ بازیں مردمانی زدگ بوگ ءِ ھال اِنت-

گیشیں ھالانی رد ءَ شال، آواران، پنجگور، کیچ، گوادر، لسبیلہ ءُ ھزدار ءُ ھوار بلوچستان ءِ گیشتریں ھند ءُ دمگاں وھد وھد ءِ سر ءَ ھورانی درچ یکشل ءَ برجاہ اَنت بنجاھی شھر شال ءَ توپانی رگامانی گوارگ ءَ بازیں جاہ آپ ءَ گپتگ اَنت کُچگی دمگاں بازیں کچے ءَ لوگاں تاوان بیتگ-

گوستگیں لھتے روچاں بلوچستان ءِ جتا جتائیں جاھاں توپانی ھورانی گوارگ ءِ سبب ءَ اُستانی سرکار ءَ ناگیگیں جاورھالانی گر ءُ داری ءَ شال ءَ ایمرجنسی جتگ ءُ آیوکیں چل ءُ ھشت کلانی میان باز ناگیگی گوشتگ-

اُستانی ڈیزاسٹر مینجمنٹ اتھارٹی ءَ شنگ کرتگیں درشانی ءَ گُشتگ کہ سرجمیں بلوچستان ءَ سَے شمبے ءِ شپ ءَ رگامانی میان ءَ بیتگیں وئیلاں بیران مردمانی کچ بیست ءُ ھشت ءَ سر بیتگ اَنت اُستان ءَ ھورانی گوارگ ءَ بازیں مردمے زدگ بیتگ اَنت مورشنز ءُ توپانانی سبب ءَ شال ءِ کش ءُ گوری ھنداں سَے سد ءَ گیش ھاکی دیوالاں تاوان رس اتگ-

ڈیزاسٹرمینجمنٹ اتھارٹی ڈی جی ءِ رد ءَ ھورانی گوارگ ءِ سبب ءَ بیران بیتگیں مردماں سَے زالبول ءُ چار زھگ ھوار اَنت ترندیں ھورانی گوارگ ءَ بازیں جاہ اسرمند اَنت-

مھکمہ ءِ رپورٹ ءِ رد ءَ گوستگیں روچ ءَ شال ءِ دمگ سریاب ءَ چھت ءِ کپگ ءُ دیوال ءِ کپگ ءَ سَے زالبولاں ھوات شش مردم بیران بیتگ اَنت- رودراتکی شھدگ ءَ ڈیم ءِ نزیک ءَ دو زھگ آپ ءَ بڈ اتگ اَنت-

چہ مند ءَ سر بیتگیں اھوالاں مندیگ کور ءَ توپانی ھار ءَ سَے زھگ بڈ اتگ ءُ بیران بیتگ اَنت ءُ ھر سئیں زھگانی سیادی یکیں کھول ءَ اِنت لبنان ءِ جھمند اَنت-

ھمے وڑ ءَ بولان ءِ دمگ مچھ ءَ گیشتری کور ءَ پنچ کاریز کار بڈینتگ اَنت کہ اشانی تہ ءَ یکے دمگی مردماں ٹپی ءِ جاوراں کش اتگ ءُ دگہ چار گار اَنت-

شال ءَ دمگدار ءُ ریسکیو ٹیمانی نیمگ ءَ کمکی کار برجاہ اَنت ءُ بازیں جاھاں رھوتانی نہ بوگ ءَ کمکی کار نہ بوگ ءَ اَنت-

تیابدپی شھر گوادر ءَ بجلی ءِ سِی کمبہ کپتگ اَنت ءُ ھور ءِ سبب ءَ زند اسرمند بیتگ اَنت-

کیچ ءُ پنجگور ءَ کورانی ھاراں دگ پرشت ءُ پروش ءِ آماچ بیتگ اَنت دمگاں زمینی راہ ءُ در بند بیتگ اَنت ءُ سَے گاڑی آپ ءَ بڈینتگ ءُ سواریں مردم رکیتگ اَنت-

ڈپٹی کمشنر کیچ ءَ پی ڈیم ایم اے رپورٹ ءِ سر ءَ نھنگ کور ءُ کیچ کور ءِ نزیک ءَ روگ ءِ دفعہ یک سد ءُ چل ءُ چار جتگ –

آواران ءِ جھمنندیں زالبول ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءِ ھمراھی ءَ گوستگیں روچ ءَ سَے شمبے ءَ بلوچستان ءِ بنجاھی شھر شال ءِ پریس کلب ءَ اھوالکاراں گوں تران کنان ءَ وتی برات ءِ یل کنگے لوٹ کتگ –
اھوالکاراں گوں تران کنان ءَ آئی ءَ گوشتگ کہ منی برات اخلاق ء نواز علی گوستگیں سال دوھزار بیست ءُ یک ءِ شانزدہ نومبر ءَ پوج ءَ تربت آپسر ءِ پانگس ءَ داشتگ ءُ آئی پجار کارڈ چارتگ ءُ آوار جتگ ءُ بیگواہ کتگ کہ ھما ایں گار ءُ بیگواھیں –

آئی ءَ گوشتگ کہ منی برات ءَ بلوچستان شھدربرجاہ ءَ بی اے کُتگ پدا لوگ ءِ مالی جاور ناگیگ بوتگ انت گڑا آئی ءَ اول ءَ ھب چوکی ءَپدا رند ءَ کیچ ءَ ٹیل ءِ باپاری کتگ –

آئی ءَ گوشتگ کہ منی برات ءِ زورانسری آوار جنی ءِ سوب ءَ مئے سرجمیں کھول تکانسر انت – ما چہ رسانکدراں ھمگرنچیں درسیں مردماں گوں دستبندی کن ایں کہ مئے ارز ءَ سرکاری نمائندگاں سر کنگے ھاتر ءَ مئے کمک ءَ بہ کن انت –

آئی ءَ گوشتگ کہ اگاں منی برات اخلاق ءَ جرمے کُتگ گڑا ملکی کانودانی رِد ءَ آمیدگس ءَ آرگ بہ بیت –

زیارت منگی ڈیم ءَ زورگیریں پاکستانی پوج ءِ سر ءَ تراکناکیں شورواں گوں اُرش کتگ ءُ سَے کارمند کُشتگ انت – جئیند بلوچ

بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ منگی ڈیم ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ ، گل ءِ نیمگ ءَ اُرش ءِ تامر ھم شنگ کرتگ –

جارکش ءَ وتی درشان ءِ تہ ءَ گوشتگ کہ مروچی مئے سرمچاراں زیارت منگی ڈیم ءَ زورگیریں پاکستانی پوج ءِ گاڑی ءِ تراکناکیں شوروانی نشانگ جوڈ کتگ –

آئی ءَ گوشتگ کہ مئے سرمچاراں دژمن پوج ھما وھد ءَ نشانگ کرتگ انت کہ وتی پانگس ءَ دراتک ءُ دیم پہ بازار ءَ تر ءُ گرد ءَ روگ ءَ بوتگ انت – تراک ءِ زد ءَ اتکگیں گاڑی ءَ سواریں سَے کارمند مرتگ انت ءُ وھدیکہ گاڑی تباہ بوتگ –

جارکش ءَ گوشتگ کہ اے اُرش ءِ زمہ واری ءَ مئے گل بی ایل اے منّ ایت ءُ کول کنت کہ دژمن پوج ءِ سرجمی ءَ درآھگ تاں مئے اُرش برجاہ مان انت –

شنگ کرتگیں دو ملٹی تامر ءِ تہ ءَ گندگ بیت پوج ءِ گاڑی تراکناکیں شوروانی نشانگ کنگ بیت چریشی ءَ گاڑی سرجمی ءَ تباہ بیت انت –

بالویں بالی

سیمی بهر

نبشتہ کار: شُپانک بلوچ

دی بلوچستان پوسٹ

جنگی ءَ دْراهینت کہ پرپٹ جوان اَنت ، تیل اش مان تنیگ ءَ منزلے ءَ الم رسین انت شمارا شهیک ءَ را، میجرا گْوشت کہ تو گوں بالی ءُ همراهاں برو گوں شپانک گوں سنگتاں چو سرپد نہ اِنت داں گردگ ءُ چَکرگ ءَ جوانترے بیت ، بالی ءَ میجر ءَ را گْوشت کہ نوں شپ جنز اِتگ ماں سهب ءِ نزیکی اِنت ما جهد کن ایں کہ در کپ ایں –

من ءُ شیهک بالی ءِ پرپٹ ءَ سوار بوت اِنت بالی ءِ سنگتے ءَ گوں همراه ءَ شیهک ءِ پرپٹ زرت داں ما میجر جنگی ءُ نواز جان ءُ سنگت موکل کت انت ءُ در اتک ایں-

بالی ءَ کندگے جت ءُ گوشت شپانک تو چو لجوئیں سنگتے چے ءَ ؟ شهیک ءَ سَکّا کند اِت ءُ گْوشت کہ اے تنیگ ءَ واکپ نہ اِنت گوں شما اگاں پِری بوت سیاه دل اِت کنت هاهاها بالی ءَ گْوشت کہ یار اے سنج مزاجیں همبلانی مهر انت کہ گوں ما انت
سپر روان اَت کُروسانی بانگ ءِ وهد نزیک ات کہ مئے همراهانی پرپٹ بند بوت ، شهیک ءَ چک جت دیست پد ءَ ما واتر اِتیں
هاں سنگت هال کن ات چے بوت ، سنگت ءَ پسہ دات نزاناں چے ءَ پد ءَ کِکے جتے پرپٹ شر بوت ما جنزان بوت ایں شیهل ءَ بالی جست کت باریں سپر دور اِنت مئے سیا چاهے ءِ موڑ بوگ ءَ انت بالی ءَ کند اِت کہ رواں کمو دیم ءَ تهاری هلاس بیت چمگ ءَ داریں جانے شودیں ءُ چاهے اڈ دے ئیں ، شیهو ءِ دل سگریٹے لوٹگ ءَ ات ءُ منی اوں شیهو ءَ برداشت نہ بوت بالی ءِ کیسگ ءَ دستے راه دات ، بالی کیتلی بوت هاهاها چے کنے اڑے منی کیسگ ءَ جنوزام هاهاها جند مئے کپ ایت ، هاهاها ، کور سِک دیم اَت اے دیم ءُ آدیم ءَ پیش اَت انت ما سپر کنان اِت ایں ، بالی ءَ جست کت چے لوٹ بگش گڑا ، شیهل، شپانک سگریٹ ءِ کشگ لوٹ ایت-

بالی ءَ کندگے جت ءُ دراهینت کہ بگش گڑا یار بلے آپ بند نزیک اِنت همودا رو ایں شر نند ایں ءُ چاه اڈ دے اِت پد ءَ نوں روچ وتی انت ،من همدا بالی جست کت کہ بالی جان ارداه کجانگور کتگ باریں گرد ءُ چکرگے بالی ءَ کند اِت چونین گردگ چدو وشتریں ساهت تو کدی دیستگ ، هاهآها من گوشت پد ءَ اوں ، پد ءَ بی داں چمگ رس ات ءُ پرپٹ بالی ءَ داشت پشتی همراه اتک انت ، بالی پسہ دات کہ ترا گوں اهدی هدا بندیں همبلے ءَ گوں مِلاریناں ، من گوشت شر منی وشبهتی اِنت همبل ، هواریں-

شیهل ءَ پرپٹ ءِگون ءَ چہ شکر ءُ چائی تاک کش ات انت کتلی ما زرت شتاں آبند ءَ بالی ءَ کتار پچ کت انت آ سنگتاں ، آس روک کت ما شتیں چاه اڈ کنگ ءَ لگ ات ایں شیهو ءَ سگریٹ ءِ بندات روچ اوں در آیگی اَت کمو سرد سرد گوات کشگ ءَ پوره زردے آجوئی ءِ مهنائیں وابانی آدینک ءَ گوں ندارگ ءَ ات، داں بالی ءَ جان شت ءُ اتک آدگہ سنگت اوں پارگ اِت انت چاه اڈ بوت ما شتیں کوه دیم ءَ نشت ایں چاه دیم ءَ ایر کت انت ، شیهو ءَ پیشی کنڈه جوڑ کت ءُ چاه ایر اِتک انت-

روان انت

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سرجمیں بلوچستان ءَ ھورانی درچ برجاہ اَنت، شال ءَ ھوار جتا جتائیں جاھاں لوگانی چَھت ءُ دیوالانی کپگ ءِ سبب ءَ سَے زالبولاں ھوار ھپت مردم بیران ءُ بیست زدگ بیتگ اَنت-

گیشیں ھالانی رد ءَ شال ءَ بلوچستان ءِ بازیں جاھاں وھد وھد ءِ سر ءَ ھورانی درچ برجاہ اَنت، بنجاھی شھر شال ءَ توپانی ھورانی سبب ءَ بازیں جاہ آپ ءَ تل اِتگ اَنت ءُ کُچگی دمگاں لوگاں تاوان بیتگ-

شال ءِ دمگ سریاب ءَ چھتے ءِ کپگ ءَ سَے زالبولاں ھوار شش مردم بیران بیتگ اَنت رودراتکی شھدگ ءَ ڈیم ءِ نزیک ءَ دو زھگ آپ ءَ بڈ اتگ اَنت ءَ شھر ءَ جتا جتائیں جاھاں بیست مردم زدگ بیتگ اَنت-

شال ءَ دمگدار ءُ ریسکیو ٹیمانی نیمگ ءَ اسرمند بیتگیں مردمانی کمک برجاہ اِنت-

ڈپٹی کمشنر شال ءُ ایس ایس پی آپریشن ھور ءَ اسرمند بیتگیں دمگ کلی، گوھر آباد،سریاب ءِ تر ءُ تاب کتگ ءُ کمکی کارانی ٹپاس کتگ –

کلی گوھر آباد ءَ ھور ءَ بازیں مردمے اسرمند بیتگ اَنت ءُ کھول نزیکیں وانگجاہ ءَ برگ بیتگ اَنت-

ھمے وڑ ءَ بولان ءِ کوھی دمگاں ترندیں ھورانی سبب ءَ کور آپ ءَ پُر بیتگ اَنت مچھ ءِ دمگ ءَ گیشتری کور ءَ پنچ کاریزکار آپ ءَ برتگ اَنت دمگی مردماں یک مردمے کش اتگ ءُ دگہ چار انگت در نیتکگ اَنت آیانی شوھاز برجاہ اِنت-

بڈ اِتگیں کاریزکارانی سیادی مری ٹک ءَ گوشگ بیگ ءَ اِنت اشکرانی کھن ءَ کار کنگ ءَ پد لوگ ءَ روگ ءَ بیتگ اَنت – کولپور ءَ ترندیں ھورانی گوارگ ءَ پد بولان ءِ مزن شھدگ ءَ رو ءُ آیگ بند بیتگ-