بلوچستان ءِ بُنجاھی شھر چہ شال ءَ پشمبے ءِ روچ ءَ دو زالبولانی لاش پولیس ءَ دستیگ کتگ ءُ نادُراھجاہ ءَ برتگ اَنت-
سربوتگیں ھالانی رِد ءَ پشمبے ءِ روچ ءَ کچلاک ءِ دمگ بائی پاس ءَ پولیس ءَ دو زالبولانی لاش دستیگ کتگ ءُ سول نادُراھجاہ ءَ سر کتگ اَنت-
پولیس ءِ رِد ءَ گندگ ءَ زالبول دگہ جاھے کُشتگ ءُ لاش اد ءَ دور داتگ اَنت-
اے درگت ءَ پولیس ءِ گیشیں پٹ ءُ پول برجاہ ءَ اِنت وئیل سوب انگت زانگ نہ بوتگ-
دستونک
شائر: هسابجار
دی بلوچستان پوسٹ
دل ءِ گُکّاناں پَریچاں
من لبز ءُ گال دَریچان
نگاهاں ماں زِرے آباد
گم ءُ هندوهاں سریچاں
همک دیما تھاری انت
اجب رنگے کڑی پیچاں
منی ائے باتن ءِ دگنیا
کجام داب ءَ ترا گیچاں
بُن انت دامن کہ پنجاپ ءِ
منی شیرزال اگریچاں
بیا سھتے نسا پہ من
دل زنگاں وتی ریچاں
بلوچستان لبریشن فرنٹ ءِ جارکش میجر گْوھرام بلوچ ءَ وتی شنگ کتگیں درشان ءِ تہ ءَ گْوشتگ کہ پنچ شمبے ھپت جولائی ءِ سُھب ءَ کیچ دمگ ءِبُنجاھی شھر گورکوپ اسٹاپ سر ءَ ریاستی چاریگ حاجی آسمی سرمچاراں نشانگ کتگ ءُ کُشتگ-
آئی ءَ گْوشتگ کہ ریاستی چاریگ گورکوپ ءَ چہ لڈ اِتگ ءُ تربت ءَ اَتکگ ءُ جھمنند بوتگ –
گورکوپ ءَ 2018 ءَ پوجی لشکر کشی ءُ زوراکی ءَ آسمی ءُ جمک ءِ یک مردمے تچکی ءَ ھوار بوتگ- اے زوراکی ءَ آسمی ءِ نیمگ ءَ چہ ھما مردم ءَپوج ھمراھداری کتگ ءُ کُمک کتگ، اے سرجمیں مردمانی درگت ءَ منانک بی ایل ایف کر ءَ ھست اَنت-
جارکش ءَ دیمتر ءَ گْوشتگ کہ آسمی ءِ کارپدانی ءُ نیٹ ورک ءِ درگت ءَ اسلم نامیں یک چاریگے ءَ منانک داتگ اَنت کہ آ یک سنگتیں گلے ءَ دزگیرکتگ ءَ ءُ وتی جرمانی منگ ءَ پد مرگ ءِ پرمان داتگ اَت- گورکوپ ءَ بازیں مردمانی زورانسری آوار جنی ءَ آسمی ھوار بوتگ-
آ ئی بازیں مردم زورانسری بیگواہ کنائینتگ ءُ آیاں دوبر یل کنائینگ ءِ ھاتر ءَ کھول ءَ چہ مزنیں کچے ءَ زر گپتگ- اے انسانیت ءِ بگیری ءَ یکجرمے – مروچی اے سرمچاراں پوجی زوراکیانی تہءَ کُمکاری ءُ زورانسری آوار جنی ءِ وڑیں جرم ءَ ھواری ءِ سزا داتگ-
جارکش گْوھرام بلوچ ءَ گْوشتگ کہ کجام ھم مردم کہ اے وڑیں انسانی ھکانی پادمالی ءُ پوجی زوراکی ءَ ھوار بوتگ اشاں سزا دیگ جھانیکانودی رِد ءَ ھم ھک اِنت- ما اے وڑیں کرد ءِ مردماں مکن کن ایں آ پہ کمو لب ءِ ھاتر ءَ پاکستانی پوج ءِ کُمکاری ءَ پھریز بہ کن اَنت-
بلوچستان ءَ بندات بیتگیں بشی ھوراں تباھی کتگ – سرکار ءِ رِد ءَ تنی وھدی کساس چل ءُ پنچ مردم بیران بوتگ انت وھدیکہ دی بلوچستان پوسٹ پتر ءَ سربوتگیں ھالانی رِد ءَ بیران بوتگیں مردمانی کچ پنجاہ ءَ گیش انت –
پی ڈی ایم اے ءَ بلوچستان ءَ ھورانی سوب ءَ بوتگیں تاوانانی رپورٹ شنگ کرتگ – رپورٹ ءِ رِد ءَ اے ھورانی گوارگ ءِ سوب ءَ سرجمیں بلوچستان ءَ بازین وئیلے دیما اتکگ چریشی ءَ چِل ءُ پنچ مردم بیران بوتگ انت، بیران بوتگیں مردمانی تہ ءَ ھژدہ زالبول، یازدہ مردین ءُ شانزدہ زھگ انت –
پی ڈی ایم اے ءِ رپورٹ ءِ رِد ءَ اے مردم بولان، شال، ژوب، دکی، ھزدار، کوھلو، کیچ، مستونگ، ہرنائی قلعہ سیف اللہ ءُ سبی ءَ بیران بوتگ انت –
رپورٹ ءِ رِد ءَ ھورانی میان ءَ چِل ءُ ھپت مردم وئیلانی آماچ بوتگ ءُ زدگ بوتگ انت ءُ سرجمیں بلوچستان ءَ دوسد ءُ چِل ءُ یک گِس لڈیتگ ءُ کپتگ انت –
بلوچستان ءِ دمگ ہرنائی ءَ ھور ھارانی سوب ءَ ہرنائی تاں پنجاپ ءَ رؤکیں دگ بند بوتگ ءُ پدا ھور ءَ پد ھار ءِ آیگے سوب ءَ ہرنائی تاں پنجاپ ءَ رؤکیں شھدگ سرجمی ءَ بند بوتگ کہ ھچ وڈیں روگ آھگ نہ بوتگ –
ہرنائی ءُ چپ چاگردے دمگاں ھور ءُ ھاراں تباھی کتگ – ھارانی سوب ءَ ھرنائی شال ءِ دو مزنیں پُھل پلوسین کور ءُ ناکس ءِ پھل ءَ سک باز تاوان بوتگ وھدیکہ ناکس ءُ گچینہ ءَ تاں روکیں بجلی ءِ کمبہ ھم ھار ءَ بُرتگ انت –
ہرنائی بازار ھاتر ءَ جوڈ کنگ بوتگیں پھازگی بند ھم ھار ءَ بُرتگ، کلی مرزا، کلی لعل خان ءَ پھازگی بند ھم ھار ءَ برتگ انت –
کسانیں بندانی پُرشگے سوب ءَ ھار کلی لعل خان، کلی مرزا، انڈر اباد ءُ ھرنائی بازار ءَ ھار اتکگ چریشی ءَ ھار ءَ گِس ءُ دکان تاوان داتگ انت -.
زانگ بہ بیت سرکار ءِ نیمگ ءَ شنگ کنگ بوتگیں اے رپورٹ تہ ءَ پنجگور، نوشکی ، پشین ءُ ھب چوکی ءِ درگت ءَ ھچ نبشتہ نہ انت – پنجگور ءِ دمگ سوردو حاجی غازی ءَ ھورانی سوب ءَ چار دیوال پُرشتگ ءُ کپتگ انت ءُ چریشی ءَ یکیں کھول ءِ چار زھگ چیر تریتگ ءُ بیران بوتگ انت –
دومی نیمگ ءَ بلوچستان ءِ باپاری شھر حب چوکی ءِ دمگ بلوچ کالونی ءَ نوک جوڈ بؤکیں گِس ءِ چت ءں کپگ ءَ چاردہ سالی عبدالرسول ء فیض محمد نامی زھگے چیر تریتگ ءَ بیران بوتگ –
ھمے وڑ پشین ءَ بشی ھوراں مزنیں کچ ءَ تباھی کتگ گوستگیں شپ ءَ برشور ءِ نزیک ءَ تور مرغہ ڈیم ءِ پُرشگ ءَ آپ کانزئی کراس، منزکی ءُ ملکیار ءَ پُترتگ – یکے دومی ءِ ھال رسائی نہ بوتگ ءُ مسیتانی تہ ءَ اِیلان کنگ بوتگ – ملکیار ءَ سرجمی شپ ءَ مھلوک ڈن ءَ بوتگ سدانی کچ ءَ مردم اودا دراتکگ ءُ دیم پہ شال ءُ پشین ءَ شتگ انت –
ملکیار ءَ زھگ ءُ زالبولانی پھازگی گاڑی ھار ءَ بُرتگ چریشی ءَ گاڑی ءَ سواریں گاڑی ڈرائیور دو زالبول ءُ سَے زھگ آپ ءَ برتگ انت آھانی تہ ءَ سَے مردمانی جون درکنگ بوتگ انت وھدیکہ سَے ھنگت گار انت –
ھمے وڑ ءَ گوستگیں روچ ءَ نوشکی خیصار کور ءَ کنڈ ءَ جان شودگے وھد ءَ یک زھگے بیران بوتگ وئیل ءَ پد کھول ءَ بنجاھی دگ بند کرتگ ءُ زھرشانی کتگ –
سر بیتگیں ھالانی رد ءَ ایرانی آمیدگس ءَ مروچی دو زندانی پاھو داتگ اَنت-
گیشیں ھالانی رد ءَ روکپتی بلوچستان ءِ بنجاھی شھر زاھدان ءُ سیمسری شھر زابل ءَ دو بندیگیں بلوچ پاھو داتگ اَنت-
پاھو دیگ بیتگیں مردمانی پجار بھزاد نارویی ء مھمد ءُ ظریف کاکر جھمنند کریم آباد زاھدان ءِ ناماناں زانگ بیتگ اَنت-
ھالانی تہ ءَ گوشگ بیتگ کہ بھزاد ایرانی سال نود ءُ ھشت ءَ نشہ باپاری ءِ بھتام ءَ گرگ بیتگ کہ مروچی آ زاھدان ءِ سنٹرجیل ءَ پاھو دیگ بیتگ-
ظریف کاکر زابل ءِ زندان ءَ پاھو دیگ بیتگ – ھردوکانی کھول گوستگیں روچ ءَ گڈی دوچاری ءَ ڈک کپتگ اَنت-
بلوچ کمپعن فعالین ءِ رد ءَ گوستگین سال ءَ داں انیگ ءَ پنجاہ مردمانی راستیں ھال پاھو ءِ سر بیتگ اَنت بلے اشانی کچ ءُ کساس ھپتاد ءُ نُھ اِنت رپورٹ پنجاہ کسانی بیتگ اَنت-
بلوچ کمپعن فعالین ءِ رد ءَ اشانی تہ ءَ سِی ءُ چار نشہ ءِ باپاری ءِ سر ءَ، ھپت کوشانی سر ءَ، سَے گلانی بندوکی ءُ دگہ وت ما وتی کوشانی سر ءَ پاھو دیگ بیتگ اَنت-
روکپتی بلوچستان ءَ مردمانی پاھو دیگ ءِ سر ءَ انسانی ھکانی گلانی نیمگ ءَ ھم ایرانی آمیدگس ءِ پرمان پدردی کتگ اَنت ءُ گوشگ بیتگ کہ مردمانی گون ءَ ھک ءُ انساپ ءَ ابید آیاں پاھو دیگ ءَ اَنت –
بلوچستان ءِ دمگ کیچ ءَ سلاہ بندیں مردمانی تیرگواری ءَ یک مردمے بیران بیتگ-
تیرگواری ءِ وئیل ءِ کیچ ءِ بنجاھی شھر تربت ءَ پیش اتکگ اود ءَ سلاہ بندیں مردمانی تیرگواری ءَ تربت گورکوپ ءِ جھمنند ھاشم بیران بیتگ-
پولیس ءِ رد ءَ وئیل تربت مانشجاہ ءِ نزیک ءَ لکڑی گلی ءَ پیش اتکگ، وئیل ءِ بارو ءَ دگہ گیشیں سرپدی نہ بیتگ اَنت-
نبشتانک: بے ترا ائید من ءَ گمیگ کنت
نبشتہ کار: کادر ھسرت
دی بلوچستان پوسٹ
شررنگ اے گپ ءَ تو وَ راست گْوش ئے کہ ائید یک وشیں روچے من نوکیں گُد گْور ءَ بہ کن آں نوکیں جوڑی یے چمپل ءُ یک سیاھیں بلوچی چادرے پہ وت ءَ بہ زیر آں ءُ ائید ءِ سھب ءَ مھلہ چہ واب ءَ پاد بیا آں ترا میسجے بہ کن آں منی شررنگ ترا ائید مراد بات ءُ تو من ءَ منی میسج ءِ پسو ءَ بہ دے ئے تئی گپ چو اے وڑ ءَ بہ بنت تو زاناں گنوک ئے تئی چماں واب نیست اِنت اے ساھت ءَ میسج پہ میسج کتگ من کندگے بہ جن آں ءُ بہ گْوش آں ھو من گنوک آں منی گنوکی ءِ سوب تو ئے۔ تو ملور بِہ بَہ ئے ءُ بہ گْوش ئے چشیں گپ مہ کن ھدا گنوکی ءِ روچاں میار ایت۔
بَلے شررنگ چوش کہ من جیڑگ ءَ آں اے وڑ ءَ ھجبر نہ بیت چی ءَ کہ منی ءُ تئی یکجاھی یک ھیالے کہ اناگہ ءَ منی ھیال ءَ کیت اِنت ءُ پد ءَ گار بیت آ دگہ اَئید بوتگ اَنت ھردینکہ ترا ائید ءِ واست ءَ گُد گِرگی بوتگ تو اَلم من ءَ جست کتگ ترا کجام رنگ ءِ گُد دوست بنت ھما رنگ ءِ کہ ترا دوست بنت من ھما رنگ ءِ گُداں پہ وت ءَ زیر آں من زان ئے چے گْوشتگ شمئے جنکانی وتی تبے ءُ مئے بچکانی وتی تبے تو ھمے گْوشتگ منی تب ءِ گپ ءَ مہ کن تو ھما وڑ گْوش ئے من ھما وڑ کن آں، یک ائیدے ءَ تو پہ وت ءَ گلابی ئیں گُد زرتگ اَت تو وٹس ایپ ءَ ھمے گُدانی اکس روان داتگ اَت تو گْوشت بچار باریں اے گُد پہ من چون اَنت من اکس پچ کت ءُ چار اِت ترا میسجے کت ءُ گْوشت اے گُد من ءَ دوست بوگ ءَ نہ اَنت ایشاں ائید ءَ گْور ءَ مہ کن دزگْوھار ترا کلاگ بند اَنت، تو منی اے گپ ءِ سر ءَ زھر گپت ئے تو من ءَ میسجے کت شر اِنت اگاں ترا کہ دوست نہ بنت گڑا چے کار ءَ کا اَنت شرتر ھمیش اِنت بُن اِش دے آں۔ من تئی اے میسج چار اِت ءُ گْوشت اڑے منی شررنگ من مسکرا کنگ ءَ آں دل ءَ مہ کن من گار بات آں، تو داں دیراں منی میسجانی پسو نہ دات اَنت من سک پریشان بوت آں کہ شررنگ ءَ منی گپ دل ءَ کتگ دلگران بوت، ساھتے ءَ پد تئی میسج آتک من وَ لوٹ اِت گون تو دلگران بہ باں بَلے چے کن آں تو انچیں مھر من ءَ بکش اِتگ تئی مھر من ءَ دلگران بوگ ءَ نئیل اَنت بَلے مرچی ءَ پد چشیں مسکرا مہ کن تو منی بابت ءَ شر سرپد ئے من چشیں گپاں دمان ءَ دل ءَ کن آں۔
اڑے شررنگ پھل کن من ءَ نی چشیں مسکرا نہ کن آں تو باریں وتی دست ءُ پاد ھنی کتگ اَنت یا کہ اناں باریں” ھَو منی تُرو ءَ منی دست ءُ پاد ھنی کتگ اَنت چی ءَ زاناں” ھو ھاں تو گڑا زور ئے تو چوش کن گڑا یار اکسے روان بہ دے باریں شوک اَنت یا کہ اناں” پھل کن گنوک من پیسر ءَ وتی گُدانی اکس روان دات اَنت تو ایبے بست اَنت نی منی دست ءُ پاداں ایبے بند ئے، اڑے تو انگت ھما گپ دل ءَ کتگ کسم اِنت تئی آ گُد من ءَ سک دوست بوت اَنت، تو سک بلد ئے گپ ءَ گرگ نہ بہ ئے-
تو یار بِل اے گپاں تو دست ءُ پادانی اکس ءَ روان بہ دے جان، اکس ءِ باریگ ءَ پلپٹ اڑے شررنگ من یک اکسے ءِ ھم لائک نہ آں شر اِنت گنوک وت ءَ گمیگ مہ کن روان دے آں اکس ءَ کمو ودار بہ کن، گپ گپ ءَ شررنگ ءَ وتی دست ءُ پادانی اکس روان دات اَنت سک زیبا اِت اَنت من نامدا کت ءُ گْوشت شررنگ سک زیبا اَنت نامدا نزر مبات ئے تئی تَرو چوں بَلد اِنت کَھرکپتگ ھنی کنگ ءَ، گنوک ترا چون اِنت چشیں گپ کنگ ءَ ئے منی تُرو ءَ نزر مہ کن، ھچ نہ بیت تئی پٹکیں تُرو ءَ من نامدا کتگ شر اِنت شر اِنت گیشیں گپ مہ جن تو باریں وتی ھالاں بہ دے تو اے ائید ءَ پہ وت ءَ چونیں گُد ءُ چمپل زرتگ وتی گُد ءُ چمپلانی اکساں روان بہ دے، من ترا گپے بہ گْوش آں ترا باور نہ بیت من انگت پہ وت ءَ گُد ءُ چمپل نہ زرتگ، اڑے گنوک اے چونیں گپ ءَ من ءَ باور بوگ ءَ نہ اِنت اے بزرگیں ائید ءَ تو پہ وت ءَ گُد ءُ چمپل نہ زرتگ اڑے باور بہ کن اے گپ راستے، اگاں اے گپ راستے گڑا بہ اِشکن من ھم وتی گُد ءُ چمپلاں ماندار آں من ھم بِلے اے ائید ءَ بے گُد ءُ بے چمپل باں، اڑے شررنگ چشیں گپ مہ جن منی دل لوٹگ ءَ نہ اِنت کہ من اے ائید ءَ نوکیں گُد ءُ چمپل پہ وت ءَ بہ زیر آں، من انگت زندگ آں اگاں مُرت آں گڑا پہ وت ءَ گُد ءُ چمپل مہ زیر، اڑے شررنگ ترا منی کسم اِنت چوش مہ گُش، چوش مہ گْوش آں گڑا چے بہ گْوش آں ترا اگاں منی دوستی ھست اِنت باندا برو پہ وت ءَ گُد ءُ چمپل بہ زیر زان ئے چونیں گُد زور ئے اسپیتیں کاٹن بہ زیر ءُ یک سیاھیں بلوچی چادرے ھم بزور، شر اِنت بانک ھرچی تو گْوش ئے-
ائید ءِ سھب ءَ من وتی نوکیں گُد ءُ گْور ءَ کت اَنت ءُ چمپل پاداں کت اَنت سیاھیں چادر ماں کوپگاں کت تئی سر ءَ اکسے روان دات ءُ پد ءَ مُلا ءَ بانگ دات زگر ءِ وھد بوت من رھادگ بوت آں دیم پہ زگرھانہ تو ھم گوں وتی دزگْوھاراں زگرھانہ ءَ آتک ئے من کہ گلابی ئیں گُداں گوں ترا دیست منی ھوش ءُ سار شت سک ڈولدار اَت ئے من تاں دیراں ترا چار اِت دل ءَ نہ لوٹ اِت کہ تئی زیبائی ءَ یک دمانے ھم منی چم مہ گند اَنت سنگتاں گْوشت بر ایں نی رو ایں زگر ءِ وھد اِنت تئی گندگ ءَ پد دل ءُ ھیالاں بس تو اَت ءُ تئی زیبائی اَت-
آ ائید ءَ من تئی گپ زرت اَنت تئی دوستیگیں گُد ءُ چمپل زرت اَنت اپسوز اِنت اے ائید ءَ تو من ءَ میسج نہ کت ءُ نہ گْوشت کہ گنوک اے ائید ءَ پِلان گُد ءُ پلان چمپل ءُ ءُ چادر ءَ پہ وت ءَ بہ زیر من پہ وت ءَ اے ائید ءَ گد ءُ چمپل نہ زرتگ تو بلکیں منی سنگتاں گند ئے زگرھانہ روگ ءَ بنت تو وتی چماں شانک دے ئے من ءَ شوھاز ئے بَلے تو اے گنوک ءَ نہ گند ئے اگاں ترا باور کنت اے ائید پہ من مھشر اِنت تو شر سرپد ئے کہ ائید ءِ روچ چی ءَ پہ من مھشر اِنت؟ گْوستگیں ائید ءَ من ءُ تو وشان اِت ایں ائید ءَ شپ ءَ داں دیراں گپ جت ءُ یکے دومی ءَ را کندینت” نی بہ گْوش اے ائید ءَ کے من ءَ کندین ایت ءُ کے سھب ءِ مھلہ میسجے روان دنت کہ ترا ائید مراد بات اِنت
بلوچستان ءِ دمگ پنجگور ءَ ھورانی سوب ءَ نزوریں دیوال ءِ کپگ ءِ سوب ءَ چار چُک بیران بیتگ اَنت۔
اھوالانی ردءَ پنجگور ءِ ھند سوردو حاجی غازی ءَ ھور ءِ سوب ءَ لوگے ءِ چار دیوال ءِ کپگ ءُ آھانی چیر ءَ آیگ سوب ءَ یکے کھول ءِ چار زھگ بیران بیتگ اَنت۔
کھول ءِ ردءَ زھگ لوگے چار دیوال ءِ دیما گوازی کنگ ءَ بیتگ اَنت کہ اناگتی دیوال کپتگ، دیوال کپگ ءِ سوب ءَ پنچ سالی طلال، ھپت سالی عدیدہ ء مجاھد، دو سالی ایں نعمان ءُ چار سالی شاھد ھما دمان ءَ بیران بیتگ اَنت۔
زھگانی لاش چہ کپتگیں دیوال ءِ چیر ءَ چہ کشگ ءُ لوگ ءَ برگ بیتگ اَنت۔ وئیل ءَ پد ھندی مردماں کمکی کارانی تہءَ مزنیں کساس ءَ بھر زرتگ۔
یات بہ بیت پنجگور ءَ گوستگیں سئے روچاں چہ کمے کمے دمان ءَ پد توپانی ھورانی سوب ءَ پنجگور ءُ کش ءُ کرءِ دمگانی تہءَ مزنیں تاوان باری کُتگ، مزنیں کچے ءَ لوگ ءُ دیوال کپتگ اَنت۔ ھندی مردمانی گُشگ اِنت کہ داں انگت واکدارانی نیمگ ءَ ھچ پئیمیں کمک گندگ ءَ آیگ ءَ نہ اِنت۔
بلوچستان ءِ دمگ نوشکی ءَ گوستگیں روچ ءَ خیصار جو ءَ جانشودگ ءِ وھد ءَ زھگے بیران بیتگ – زھگ ءِ کھول ءَ زھرشانی کنان ءَ بنجاھی شھدگ بند کتگ-
دمگی مردمانی رد ءَ ھور ءَ پد خیصار جو ءَ آپ ءِ آیگ ءَ مزنیں کنڈ آپ ءُ پر بوتگ اَنت ءُ یک زھگے مھمد الیاس ء عبدالظاھر جھمنند غریب آباد بڈ اِتگ ءُ بیران بیتگ-
کھول لاش ءِ ھمراھی ءَ اسٹیشن ءِ ھند ءَ زھرشانی کنان ءَ بھتام اش جتگ کہ کلی غریب آباد ءَ مزن شھدگ ءِ جوڑ کنگ ءِ وھد ءَ ٹھیکیداراں کنڈ جتگ بجری لوڑ کتگ چریشی ءَ مئے زھگ بڈ اتگ ءُ بیران بیتگ-
آیاں گُشتگ کہ ٹھیکیدار ءِ ھلاپ ءَ ارزی نبشتہ کنگ بہ بیت اگاں ناں زھرشانی برجاہ بیت اِنت-
ھمے وڑ ءَ پنجگور ءَ رخشان کور ءَ گاڑی ءِ بڈ اتگ، گاڑی ءِ ھواری ءَ پس ھم بڈ اتگ اَنت ءُ جانی تاوانی ھال ایگ ءَ پش کپتگ اَنت-
بلوچستان ءَ ھورانی گوارگ ءَ بازیں کچے ءَ جانی ءُ مالی تاوانانی دیمپانی کنگ کپتگ ءُ ھورانی گوارگ انگت ءَ برجاہ اَنت-
گوستگیں روچ ءَ پی ڈی ایم اے بلوچستان ءَ ھورانی گوارگ ءَ بیتگیں تاوانانی ھال شنگ کتگ ات – ھال ءِ رد ءَ ھورانی گوارگ ءَ داں انگت ءَ سِی ءُ نُھ مردم بیران بیتگ اَنت – بیران بیتگیں مردمانی تہ ءَ دَہ مردین، شانزدہ زالبول ءُ سیزدہ زھگ ھوار اَنت – ھورانی میان ءَ جتا جتائیں وئیلاں چِل ءُ ھپت مردم زدگ بیتگ اَنت-
ھال ءِ رد ءَ ھورانی گوارگ ءَ درستاں گیش شال، لسبیلہ، سبی، ھرنائی، دکی، کوھلو، بارکھان، ژوپ ءُ ڈیرہ بگٹی اسرمند بیتگ اَنت-
بلوچستان ءِ بنجاھی شھر شال ءَ زورانسری آوار جنگ بوتگیں مردمانی ھاتر ءَ وائس فار بلوچ مسنگ پرسنز ءِ زھرشانی بنجل برجاہ ءُ بلوچستان ءَ دوریں دمگاں نشتگیں بیگواھیں مردمانی کھول ھم بنجل ءَ آھگ ءَ انت –
بلوچستان ءِ دمگ کیچ ءِ جھمنندیں بلوچ زالبولے ءَ بنجل ءَ اتکگ ءُ وتی زھرشانی نبشتہ کنائینتگ –
ھمے وھد ءَ بیگواھیں اخلاص ءِ مات ءَ گوشتگ کہ منی زھگ ھشت ماہ ساری پاکستانی پوج ءَ تربت آپسر ءِ پانگس ءَ آوار جتگ ءُ گوں وت برتگ –
نور خاتون ءَ گوشتگ کہ من وام زرتگ ءُ شال ءَ اتکگاں تانکہ یکے منی پریات ءَ گوش بہ داریت ءُ من درسیں تک ءُ پھناتاں سیادی داروکیں مردماں لوٹ کناں کہ آ منی زھگے یل کنائینگے ھاتر ءَ توار چست بہ کناں –
ھمے وڈ بلوچستان ءِ دمگ پنجگور ءُ ھب چوکی ءِ جھمنند بیگواھیں غیاث الدین ءِ زھگ خدیجہ ھم بنجل ءَ اتکگ ءُ وتی پت ءِ یل کنگے لوٹ کتگ –
آئی ءَ گوشتگ کہ منی پت غیاث الدین سال دوھزار سینزدہ ءِ اکتوبر ءِ ماہ ءَ پاکستانی پوج ءَ چہ کراچی ءَ زورانسری آوار جتگ ءُ بیگواہ کتگ کہ ھنگت بیگواہ انت ءُ مئے کسانی بید پت ءِ سھارگ ءَ گوزگ انت –
آئی ءَ گوشتگ کہ ما وتی پت ءِ مھراں چہ زبھر انت – اگاں منی پت ءِ سر ءَ الزام ءِ ھست گڑا آمیدگس ءَ آرگ بہ بیت – مارا پت ءِ مھرانی مارشت نیست کہ آ مارا چینچو مھر کنت پرچا کہ ما وتی پت دھ سالیں کہ ندیستگ – ما کسان بوتگیں مئے پت آوار جنگ ءُ بیگواہ کنگ بوتگ –
